“Zimbangi zi Yave basa monisa ko to mamboti kuidi minu vayi mvandi kuidi zimbua ziama. Kilumbu kimueka, Elaine wuba na dikalu di bilongulu ayi wuvana zibulacha kuidi zimbua ziama. Tona mu kilumbu beni, kadika khumbu tuaba viokilanga va khonzo dikalu di bilongulu, zimbua ziama baba tombanga kue dia zibulacha.’

“Zingonda ziwombo zivioka, zimbua ziama baba zolanga zibulacha baba kuba vananga ayi minu yaba zolanga kukoluka na Zimbangi zi Yave. Vayi yabasa tomba ko kuba yawu kikundi kifikama. Minu yiba 70 di mimvu ayi yabasa kikininanga ko mambu bawu baba longanga. Minu yivongila binganga mu kibila ki mambu yiviokila mu kinganga kiama. Diawu yibakila makani ma kulonguka Kibibila minu veka.

“Minu yaba monanga Zimbangi ziwombo zi Yave va divula ditu na makalu mawu ma bilongulu. Bawu mvandi baba kumbonisanga mamboti ayi baba sadilanga Kibibila muingi kutambudila biuvu yaba kuba kuvulanga. Diawu yitonina kuba fiatila.

“Kilumbu kimueka, Elaine wundiuvula, ‘ngie wunkikinina ti bibulu bidi nkhailu wu Nzambi?’ Minu yimvutudila, ‘Ngete, yinkikinina!’ Bosi Elaine wuthangila Yesaya 11:6-9. Yizola beni matangu amomo vayi kheti bobo yabasa zolanga ko kutambula bilongulu.

“Mua bilumbu kuntuala, minu yiyiza baka ndongukulu yi Kibibila na Elaine ayi nnuni’andi, Brent. Bawu bandinda muingi yifiongunina buku yi Matai muingi yivisa mbi binsundula kuba Baklisto bakiedika. Ayi mawu yivanga. Vasa vioka ko beni thangu, mu mvu 2016 minu yikikinina kulongukanga Kibibila na Brent ayi Elaine.

“Yiba beni phuila yi kulonguka Kibibila ayi kulandakana zikhutukunu. Yiba beni mu mayangi ayi yimona ti luba lusakumunu luwombo kuzaba mbi Kibibila kinlonga. Ayi bo vavioka mvu mueka yiyiza botama. Bubu yeka 79 di mimvu ayi yinkuangalalanga beni mu kubakula kinganga kikiedika ayi kuba mu dikabu di bisadi bi Yave.