1. Sa Ecclesiastes 7:20, unsang kamatuoran ang gisulti ni Haring Solomon?

 SI Haring Solomon misulat: “Walay tawong matarong sa yuta nga kanunayng nagbuhat ug maayo ug wala makasala.” (Eccl. 7:20) Tinuod gyod ni! Kitang tanan makasasala. (1 Juan 1:8) Busa kitang tanan nagkinahanglag pagpasaylo sa Diyos ug sa atong isigkatawo.

2. Unsay imong bation kon pasayloon ka sa imong suod nga higala?

² Tingali mahinumdom ka dihang napasakitan nimo ang imong suod nga higala. Gusto nimo nga magkauli mo, mao nga kinasingkasing kang nangayog pasaylo. Unsay imong gibati dihang gipasaylo ka niya? Migaan ba ang imong paminaw? Segurado, ug nalipay pod ka!

3. Unsay atong hisgotan niining artikuloha?

³ Gusto nato nga si Jehova ang atong pinakasuod nga Higala, pero usahay naa tay masulti o mabuhat nga makapasakit niya. Pero nganong makaseguro ta nga gusto kaayo ni Jehova nga pasayloon ta? Unsay kalainan sa pagpasaylo ni Jehova ug sa atong pagpasaylo? Ug kinsay pasayloon sa Diyos?

4. Nganong makaseguro ta nga si Jehova andam mopasaylo?

⁴ Ang Pulong sa Diyos nagpasalig nato nga si Jehova andam mopasaylo. Dihang gipaila ni Jehova ang iyang kaugalingon kang Moises sa Bukid sa Sinai, Siya miingon pinaagi sa usa ka anghel: “Si Jehova, si Jehova, Diyos nga maluluy-on ug  mabination, dili daling masuko ug dagaya sa maunongong gugma ug kamatuoran, nagapakitag maunongong gugma sa linibo ka henerasyon, nagapasaylo sa kasaypanan ug kalapasan ug kasal-anan.” (Ex. 34:6, 7) Si Jehova maoy buotan ug maluluy-ong Diyos nga kanunayng andam nga mopasaylo sa mahinulsolong mga makasasala.​—Neh. 9:17; Sal. 86:15.

5. Kay nakaila pag-ayo si Jehova sa mga tawo, unsa may iyang himoon base sa Salmo 103:13, 14?

⁵ Ingong atong Maglalalang, si Jehova nahibalo sa tanan bahin nato. Hunahunaa ra! Nahibalo siya sa tanang detalye sa kada tawo dinhi sa yuta. (Sal. 139:15-17) Busa nasayod siya sa tanang pagkadili-hingpit nga nakuha nato sa atong ginikanan. Nahibalo pod siya sa tanang nahitabo sa atong kinabuhi nga maoy nakaimpluwensiya kon unsa tang klaseha sa tawo. Kay si Jehova nakaila pag-ayo sa mga tawo, unsa may iyang himoon? Iya gyod tang pakitaan ug kaluoy.​—Sal. 78:39; basaha ang Salmo 103:13, 14.

6. Sa unsang paagi gipamatud-an ni Jehova nga gusto ta niyang pasayloon?

⁶ Gipamatud-an ni Jehova nga gusto gyod niyang mopasaylo. Nakasabot siya nga tungod sa gihimo sa unang tawo nga si Adan, kitang tanan nailalom sa tunglo sa sala ug kamatayon. (Roma 5:12) Wala gyod tay mahimo aron makalingkawas ta ug ang uban gikan niini nga tunglo. (Sal. 49:7-9) Pero gikaluy-an ta sa atong mahigugmaong Diyos ug naa siyay gihimo aron makalingkawas ta. Unsa may iyang gihimo? Sumala sa Juan 3:16, gipadala ni Jehova ang iyang bugtong Anak aron mamatay para nato. (Mat. 20:28; Roma 5:19) Si Jesus ang midawat sa silot nga kamatayon imbes kita, aron si bisan kinsa nga magpakitag pagtuo kaniya makalingkawas sa sala ug kamatayon. (Heb. 2:9) Seguradong nasakitan pag-ayo si Jehova nga nakita ang iyang pinalanggang Anak nga nag-antos sa sakit ug makauulawng kamatayon! Tugotan kaha ni Jehova nga mamatay ang iyang Anak kon dili ta Niya gustong pasayloon?

7. Sumala sa Bibliya, kinsa ang pipila ka tawo nga gipasaylo ni Jehova?

⁷ Ang Bibliya daghag pananglitan sa mga tawo nga gipasaylo ni Jehova. (Efe. 4:32) Kinsay imong mahunahunaan? Tingali si Haring Manases. Daotan siya nga tawo ug grabe kaayo ang nahimo niyang mga sala kang  Jehova. Nanguna siya sa bakak nga pagsimba. Gipatay niya ang kaugalingon niyang mga anak, kay gihalad niya sila sa paganong mga diyos. Nagbutang pa gani siyag diyosdiyos diha sa sagradong templo ni Jehova. Ang Bibliya nag-ingon: “Siya nagbuhat ug grabeng pagkadaotan sa atubangan ni Jehova sa pagpasuko kaniya.” (2 Cron. 33:2-7) Pero dihang kinasingkasing nga naghinulsol si Manases, gipasaylo siya ni Jehova. Gibalik pa gani siya sa Diyos sa iyang posisyon ingong hari. (2 Cron. 33:12, 13) Tingali makahunahuna pod ka kang Haring David, nga nakahimog bug-at nga mga sala batok kang Jehova, apil na ang pagpanapaw ug pagpatay. Pero dihang si David miangkon sa iyang mga sala ug kinasingkasing nga naghinulsol, gipasaylo pod siya ni Jehova. (2 Sam. 12:9, 10, 13, 14) Oo, makaseguro ta nga gusto gyod ni Jehova nga mopasaylo. Ug sa ato unyang mahisgotan, ang pagpasaylo ni Jehova lahi sa pagpasaylo sa tawo.

8. Nganong si Jehova ang pinakamaayong Maghuhukom, ug sa unsang paagi makaapektar ni sa iyang katakos sa pagpasaylo?

⁸ Si Jehova “ang Maghuhukom sa tibuok yuta.” (Gen. 18:25) Ang maayong maghuhukom kinahanglang nakasabot pag-ayo sa balaod. Ingon ana gyod si Jehova, kay gawas nga siya ang atong Maghuhukom, siya pod ang atong Tighatag ug Balaod. (Isa. 33:22) Si Jehova ang kinalabwang nahibalo kon unsay husto ug sayop. Unsa pay gikinahanglan aron ang usa mahimong maayong maghuhukom? Kinahanglang nahibalo siya sa tanang impormasyon sa usa ka kaso sa dili pa modesisyon. Busa klaro gyod nga si Jehova ang pinakamaayong Maghuhukom.

9. Unsay nahibaloan ni Jehova bahin nato nga iyang konsiderahon dihang modesisyon kon pasayloon ba ta niya o dili?

⁹ Dili parehas sa mga maghuhukom nga tawo, si Jehova nahibalo pag-ayo sa tanang impormasyon bahin sa bisan unsang kaso. (Gen. 18:20, 21; Sal. 90:8) Dili pod siya parehas sa tawo nga limitado rag makita o madungog. Nahibalo siya pag-ayo kon unsang mga kinaiya ang atong nakuha sa atong ginikanan, kon giunsa ta pagpadako, kon asa ta nagpuyo, ug kon unsay atong kahimtang sa mental ug emosyonal. Ug nahibalo pod siya kon unsay epekto ani sa atong mga ginahimo. Si Jehova makabasa ug kasingkasing. Kabalo kaayo siya kon unsay motibo, intensiyon, ug gusto sa matag tawo. Walay matago kang Jehova. (Heb. 4:13) Busa dihang pasayloon ni Jehova ang usa ka tawo, tungod nâ kay nahibalo siya sa tanang impormasyon.

10. Nganong makaingon ta nga ang mga desisyon ni Jehova kanunayng patas? (Deuteronomio 32:4)

¹⁰ Ang mga desisyon ni Jehova kanunayng patas. Dili gyod siya magpaborpabor. Ang pagpasaylo ni Jehova dili ibase sa hitsura, kadato, kasikat, o sa mga abilidad sa usa ka tawo. (1 Sam. 16:7; Sant. 2:1-4) Walay makapresyur o makahiphip kang Jehova. (2 Cron. 19:7) Ang iyang paghimog desisyon dili maimpluwensiyahan sa kasuko o kaguol. (Ex. 34:7) Sa walay duhaduha, si Jehova ang pinakamaayong Maghuhukom kay nakasabot siya pag-ayo nato ug sa atong situwasyon.—Basaha ang Deuteronomio 32:4.

11. Nganong ang pagpasaylo ni Jehova lahi kaayo?

¹¹ Ang mga magsusulat sa Hebreohanong Kasulatan nahibalo nga ang pagpasaylo ni Jehova lahi kaayo. Sa pipila ka teksto, migamit silag Hebreohanong pulong nga sumala pa sa  usa ka reperensiya, “gigamit lang kon ang gitumong mao ang pagpasaylo sa Diyos sa mga makasasala, ug wala gyod gamita para sa mas ubos nga klase sa pagpasaylo nga ginahimo sa usa ka tawo sa iyang isigkatawo.” Si Jehova lang ang bug-os makapasaylo sa naghinulsol nga makasasala. Unsay resulta kon pasayloon ta ni Jehova?

12-13. (a) Unsay atong bation dihang pasayloon ta ni Jehova? (b) Dihang mapasaylo na ta ni Jehova, hangtod kanus-a nga makabenepisyo ta ana?

¹² Dihang dawaton nato nga gipasaylo na ta ni Jehova, mobati tag “kahayahay,” apil na ang kalinaw sa hunahuna ug hinlong konsensiya. Bation lang nato ni kon si ‘Jehova mismo’ ang mopasaylo nato. (Buh. 3:19) Dihang pasayloon ta ni Jehova, makigsuod siya nato pag-usab nga mora bag wala ta makasala.

¹³ Dihang mapasaylo na ta ni Jehova, dili na niya hinumdoman ang atong sala o silotan ta tungod ana. (Isa. 43:25; Jer. 31:34) Ibutang ni Jehova ang atong mga sala nga “sama ka layo sa sidlakan gikan sa kasadpan.” * (Sal. 103:12) Dihang atong pamalandongon kon unsa ka dako ang pagpasaylo ni Jehova, ang atong kasingkasing mapuno gyod ug pasalamat ug pagtahod kaniya. (Sal. 130:4) Pero kinsay pasayloon ni Jehova?

14. Unsa nay atong nahisgotan bahin sa pagpasaylo ni Jehova?

¹⁴ Sa ato nang nahisgotan, ang pagpasaylo ni Jehova dili niya ibase sa kon unsa ka dako o ka gamay ang atong sala. Nakat-onan pod nato nga gamiton ni Jehova ang iyang kahibalo ingong atong Maglalalang, Tighatag ug Balaod, ug Maghuhukom dihang modesisyon kon mopasaylo ba siya o dili. Unsang mga butang ang konsiderahon ni Jehova?

15. Base sa Lucas 12:47, 48, unsay usa sa konsiderahon ni Jehova?

¹⁵ Una, konsiderahon ni Jehova kon ang nakasala nahibalo ba nga sayop ang iyang ginahimo. Giklaro kini ni Jesus sa Lucas 12:47, 48. (Basaha.) Ang tawo nga nagplano sa paghimog daotan​—ug nahibalo pag-ayo nga ang iyang ginabuhat makapasuko kang Jehova—​nakahimog grabeng sala.  Delikado ang iyang kahimtang kay basig dili siya pasayloon. (Mar. 3:29; Juan 9:41) Pero usahay, kabalo ta nga sayop ang atong gihimo. Naa bay paglaom nga pasayloon ta? Oo! Kay naa pay laing konsiderahon si Jehova kon pasayloon ba ta niya o dili.

16. Unsa ang paghinulsol, ug nganong importante ni aron pasayloon ta ni Jehova?

¹⁶ Ikaduha, konsiderahon ni Jehova kon ang nakasala kinasingkasing bang naghinulsol. Unsa ang paghinulsol? Nagpasabot ni nga “bag-ohon ang panghunahuna, pagbati, o intensiyon.” Nagpasabot pod ni nga ang usa nagbasol ug naguol pag-ayo kay nakahimo siyag dili maayo o kaha wala niya mahimo ang maayong mga butang nga angay unta niyang himoon. Ang tawo nga naghinulsol naguol pag-ayo, dili lang tungod kay nakahimo siyag kasaypanan, kondili kay gitugotan pod niya nga mohuyang ang iyang espirituwalidad nga maoy hinungdan nga nakahimo siyag daotan. Hinumdomi nga si Haring Manases ug Haring David nakahimog grabeng mga sala, pero gipasaylo sila ni Jehova kay kinasingkasing silang naghinulsol. (1 Hari 14:8) Oo, kinahanglang makita ni Jehova nga naghinulsol ta aron pasayloon ta niya. Pero dili igo nga basta maguol lang ta sa mga sala nga atong nahimo. Kinahanglan nga naa tay himoon. * Busa atong hisgotan ang lain pang konsiderahon ni Jehova.

17. Unsa ang pagkakombertir, ug nganong importante ni aron dili na nato maotro ang atong mga sala? (Isaias 55:7)

¹⁷ Ikatulo, konsiderahon ni Jehova kon ang usa nakombertir ba. Ang pagkakombertir nagpasabot ug “pagliko.” Sa ato pa, biyaan sa usa ang daotang dalan ug subayon niya ang dalan ni Jehova. (Basaha ang Isaias 55:7.) Kinahanglang bag-ohon niya ang iyang panghunahuna aron magiyahan siya sa panghunahuna ni Jehova. (Roma 12:2; Efe. 4:23) Kinahanglan nga determinado siya nga biyaan ang iyang daotang panghunahuna ug binuhatan. (Col. 3:7-10) Siyempre,  ang atong pagtuo sa halad sa Kristo mao ang pangunang basehanan aron mapasaylo ta ni Jehova ug mahinloan ta sa atong mga sala. Pasayloon ta ni Jehova pinasukad ana nga halad dihang makita niya nga naningkamot gyod ta nga bag-ohon ang atong binuhatan.​—1 Juan 1:7.

18. Unsa nay atong nakat-onan bahin sa pagpasaylo ni Jehova?

¹⁸ Atong i-review kadiyot ang pangunang mga punto nga atong nahisgotan. Wala nay molabaw kang Jehova kon bahin sa pagpasaylo. Nganong makaingon ta ana? Una, andam siya kanunay nga mopasaylo. Ikaduha, nakaila kaayo siya nato. Nasayod siya sa tanang detalye bahin nato maong kabalo siya kon kinasingkasing tang naghinulsol. Ug ikatulo, ang pagpasaylo ni Jehova bug-os, nga mora bag iyang gipapas ang atong mga sala. Tungod ani, mabatonan nato ang hinlong konsensiya ug ang iyang pag-uyon.

19. Bisag dili ta hingpit ug makasala gihapon, nganong puwede tang magmalipayon?

¹⁹ Siyempre, kay di pa ta hingpit, dili kalikayan nga makasala ta. Pero makapahupay kaayo ang giingon sa Pagtugkad sa Kasulatan, Tomo 2, panid 570: “Sanglit maluluy-ong gitagad ni Jehova ang unodnong kahuyangan sa iyang mga alagad, sila dili kinahanglan nga padayong mobatig pagbasol tungod sa ilang mga sayop gumikan sa napanunod nga pagkadili-hingpit. (Sal 103:8-14; 130:3) Kon sila tim-os nga nagalakaw diha sa mga dalan sa Diyos, sila mahimong magmalipayon. (Flp 4:4-6; 1Ju 3:19-22).” Makapadasig gyod kaayo ni!

20. Unsay atong hisgotan sa sunod artikulo?

²⁰ Mapasalamaton ta nga si Jehova andam mopasaylo nato kon kinasingkasing tang maghinulsol. Pero unsaon nato pagsundog ang pagpasaylo ni Jehova? Sa unsang mga paagi magkaparehas ang atong pagpasaylo ug ang pagpasaylo ni Jehova, pero sa unsang mga paagi ni magkalahi? Nganong importante nga ato nang masabtan? Kining mga pangutanaha tubagon sa sunod artikulo.