1. Hadibaia Tauna 7:20 hegeregerena, King Solomona be dahaka hereva momokani ia gwauraia?

 KING Solomona ia gwau: “Tanobada ai kara namo sibona ia karaia kara maoromaoro tauna ta ia noho lasi, ia danu be do ia kara dika.” (Had. 7:20) Unai be momokani! Badina ita ibounai be kara dika taudia. (1 Ioa. 1:8) Unai dainai Dirava bona ma haida ese iseda dika idia gwauatao be namo.

2. Tura namona ta ese emu dika ia gwauatao neganai, emu hemami be edena bamona?

² Reana emu tura namona ta ena lalona oi hahisia negana oi laloatao. Oi ura ia oi tura henia lou dainai, mai kudouna ibounai ida ia dekenai oi sori. Emu turana ese emu dika ia gwauatao neganai emu hemami be edena bamona? Emu hemami ia namo lou, a? Oibe, bona oi moale danu!

3. Inai atikol ai dahaka do ita herevalaia?

³ Ita ura Iehova be iseda Turana namona ai ia lao, to nega haida iseda hereva o kara amo iena lalona ita hahisia. To, dahaka dainai ita abia dae Iehova ia ura iseda dika ia gwauatao? Edena dala ai Iehova ese dika ia gwauatao karana bona ita ese  dika ita gwauatao karana be idau? Bona Dirava be daika ena dika ia gwauatao?

4. Dahaka dainai ita abia dae Iehova ia noho hegaegae dika ia gwauatao totona?

⁴ Baibel ese ita ia hadibaia Iehova ia noho hegaegae dika ia gwauatao totona. Sinai Ororona ai, Iehova be Mose dekenai sibona ia gwauraia hedinarai neganai, aneru ta amo ia gwau: “Lau be Iehova, lau Iehova be hebogahisi Diravana, lau badu haraga lasi, egu lalokau be bada herea bona nega ibounai egu hereva lau hamomokania. Uru tausen momo dekenai lalokau lau hahedinaraia, kerere bona kara dika lau gwauatao.” (Eso. 34:6, 7) Iehova be kara namo bona hebogahisi Diravana dainai, hanaihanai ia noho hegaegae idia helalo-kerehai taudia edia dika ia gwauatao totona.​—Neh. 9:17; Sal. 86:15.

5. Salamo 103:13, 14 hegeregerena, Iehova be ita ia diba namonamo dainai dahaka ia karaia?

⁵ Iehova be iseda Havaraia Tauna dainai, ita ia diba namonamo. Momokani, ita ta ta ia diba namonamo karana ita laloa neganai, unai be hoa gauna. (Sal. 139:15-17) Bona iseda tama sina amo ita abia hanai goevadae lasi maurina ia itaia diba. Danu, iseda mauri ia haidaua gaudia ia diba danu. Iehova be ita ia diba namonamo dainai, dahaka ia karaia? Ita dekenai hebogahisi karana ia hahedinaraia.​—Sal. 78:39; Salamo 103:13, 14 duahia.

6. Edena dala ai Iehova be mai ura ida dika ia gwauatao?

⁶ Iehova be mai ura ida dika ia gwauatao. Ia laloparara, tau ginigunana Adamu dainai ita kara dika bona mase. (Roma 5:12) Kara dika bona mase amo ita bona ma haida ita hamauria totona dala be lasi. (Sal. 49:7-9) To, iseda lalokau Diravana be hebogahisi karana ia hahedinaraia bona dala ia kehoa ita ia hamauria totona. Dahaka ia karaia? Ioane 3:16 ese ia hahedinaraia, Iehova ese ena Natuna korikorina ia siaia ita totona ia mase. (Mat. 20:28; Roma 5:19) Iesu be ita dainai ia mase, unai amo ia idia abidadama henia taudia ia hamauria. (Heb. 2:9) Iehova ia itaia ena Natuna lalokauna be hisihisi bada ia abia bona hemarai dalanai idia hamasea neganai, ia lalohisihisi bada! Momokani, bema Iehova ia ura lasi iseda dika ia gwauatao, iena Natuna idia hamasea karana ia koua diba.

7. Baibel ai Iehova ese daidia edia dika ia gwauatao?

 ⁷ Baibel ai, Iehova ese edia dika ia gwauatao taudia momo edia haheitalai idia noho. (Efe. 4:32) Idia ta be daika? Reana idia ta be King Manase. Ia be Iehova ena vairanai kara dika badadia ia karaia. Dirava koikoidia ia tomadiho henia bona ma haida ia hagoadaia unai idia karaia totona. Ia ese ena natudia ia alaia, dirava koikoidia dekenai ia bouboulaia totona. Danu, Iehova ena dubu helaga lalonai kaivakuku ta ia atoa. Baibel ese King Manase ia herevalaia neganai, ia gwau: “Ia ese Iehova ena vairanai kara dika badadia ia karaia, Dirava ia habadua totona. (2 Siv. 33:2-7) To, Manase be mai ena kudouna ibounai ida ia helalo-kerehai neganai, Iehova ese ena dika ia gwauatao. Bona Dirava ese ena king dagi ia henia lou. (2 Siv. 33:12, 13) Reana King Davida oi laloa danu, ia be Iehova ena vairanai kara dika badadia ia karaia, hegeregere ia heudahanai bona ala-ala. To, Davida ia helalo-kerehai momokani bona ena kerere ia gwauraia hedinarai neganai, Iehova ese ena dika ia gwauatao danu. (2 Sam. 12:9, 10, 13, 14) Oibe, ita diba momokani Iehova be mai ura ida dika ia gwauatao. Bona Ia ese dika ia gwauatao karana be taunimanima ese dika idia gwauatao karana amo ia idau. Hari unai do ita itaia.

8. Dahaka dainai Iehova be Hahemaoro Tauna namona?

⁸ Iehova be “tanobada ibounai edia Hahemaoro Tauna.” (Gen. 18:25) Hahemaoro tauna namona ese taravatu ia lalopararalaia namonamo be namo. Iehova be unai bamona tauna, badina ia be Hahemaoro Tauna sibona lasi, to Taravatu Henia Tauna danu. (Isa. 33:22) Iehova sibona be maoro bona kerere edia idau ia diba, bona ta be unai bamona lasi. Hahemaoro tauna namona be dahaka ia karaia danu? Namona be idia vara momokani gaudia ibounai ia diba guna, unai murinai disisen ia karaia. Unai dainai, Iehova be Hahemaoro Tauna namona, badina idia vara momokani gaudia ibounai ia diba.

9. Dahaka dainai Iehova sibona be hegeregere ta ena dika ia gwauatao eiava lasi?

⁹ Iehova ena hahemaoro dalana be taunimanima amo ia idau, badina nega ibounai idia vara momokani gaudia ia diba. (Gen. 18:20, 21; Sal. 90:8) Taunimanima be idia itaia o kamonai gaudia sibona idia abia dae, to Dirava be unai bamona lasi. Danu, Ia ese ta ena kara ia haidaua ena badina ia lalopararalaia namonamo, hegeregere ena tama sina amo ia abia hanai karadia, ia abia edukeisen, ena noho gabuna, ena hemami bona laloa dalana. Iehova be kudouna dekenai idia noho gaudia ia diba danu. Ta ese gau ta ia karaia ena badina ia lalopararalaia. Iehova amo gau ta ia hunia diba lasi. (Heb. 4:13) Unai dainai, Iehova be ta ena dika ia gwauatao diba, badina idia vara gaudia ibounai ia diba namonamo.

10. Dahaka dainai Iehova ena hahemaoro karana be nega ibounai maoromaoro bona momokani? (Deuteronomi 32:4)

¹⁰ Iehova ena hahemaoro karana be nega ibounai maoromaoro bona momokani. Ia be maka tamona ai taunimanima ia kara henia. Iehova ese ta ena dika gwauatao neganai, unai tauna ena toana, moni o kohu, ladana bada, eiava ena diba dainai ia karaia lasi. (1 Sam. 16:7; Iam. 2:1-4) Ta ese laloani herevadia eiava laloani moni amo Iehova ena lalona ia veria diba lasi. (2 Siv. 19:7) Ia be ta ia badu henia eiava ia ura henia dainai disisen ia karaia lasi. (Eso. 34:7) Oibe, Iehova be Hahemaoro  Tauna namona, badina ia ese ita ta ta bona iseda mauri dalana ia lalopararalaia.​—Deuteronomi 32:4 duahia.

11. Dahaka dainai Iehova ese dika ia gwauatao karana be idau momokani?

¹¹ Heberu Revarevadia idia torea taudia idia laloparara Iehova ese dika ia gwauatao karana be idau momokani. Idia gaukaralaia Heberu herevana dekenai referens ta ia gwau, “unai hereva be Dirava ese kara dika taudia ia gwauatao karana sibona dekenai idia gaukaralaia. Ta ese ma ta ena dika ia gwauatao karana dekenai unai hereva idia gaukaralaia lasi.” Iehova sibona be hegeregere helalo-kerehai tauna ena dika ia gwauatao momokani totona. Iehova ese iseda dika ia gwauatao neganai, dahaka ia vara?

12-13. (a) Iehova ese ta ena dika ia gwauatao neganai, unai tauna ena hemami be edena bamona? (b) Iehova ese iseda dika ia gwauatao neganai, dahaka ia karaia?

¹² Iehova ese iseda dika ia gwauatao karana ita abia dae neganai, ita ese “goada matamata,” hegeregere lalomaino bona lalomamina goevana ita abia. Bema “Iehova sibona” ese iseda dika ia gwauatao, unai hemami namona ita abia diba. (Kara 3:19) Iehova ese iseda dika ia gwauatao neganai, iseda hetura karana ia hanamoa lou, unai be hegeregere kara dika ta ita karaia lasi bamona.

¹³ Iehova ese iseda dika ia gwauatao murinai, unai kara dikana dainai ita do ia bleim lasi eiava panisia lou lasi. (Isa. 43:25; Ier. 31:34) Iehova ese iseda dika be gabu daudau dekenai ia atoa, “dina ia daekau kahana be dina ia diho kahana amo ia daudau hegeregerena.” * (Sal. 103:12) Iehova ese dika ia gwauatao karana ita laloa neganai, ia ita laloa bada bona matauraia. (Sal. 130:4) To daika ena dika ia gwauatao diba?

14. Iehova ese dika ia gwauatao karana dekenai dahaka ita dibaia?

¹⁴ Inai stadi amo ita diba, ena be ta ena dika be bada o maragi, to Iehova be unai hegeregerena dika ia gwauatao lasi. Danu, ita itaia Iehova be iseda Havaraia Tauna, Taravatu Henia Tauna, bona Hahemaoro Tauna dainai ena diba ia gaukaralaia, unai amo ta ena  dika ia gwauatao eiava lasi ena disisen ia karaia. To Iehova be dahaka gaudia ia laloa?

15. Luka 12:47, 48 hegeregerena, Iehova ese ia laloa gauna ta be dahaka?

¹⁵ Iehova ese ia laloa gauna ta be, kara dika tauna be ia karaia kerere ia lalopararalaia eiava lasi. Luka 12:47, 48 ai, Iesu ese unai ia hahedinaraia. (Duahia.) Ta ia diba do ia karaia karana be Dirava ese ia inai henia, to mai ura ida ia karaia neganai, unai be kara dika badana. Iehova be disisen ia karaia diba unai tauna ena dika ia gwauatao lasi totona. (Mar. 3:29; Ioa. 9:41) To, nega haida ita diba ita karaia karana be kerere. Unai nega ai Dirava ese iseda dika ia gwauatao diba, a? Oibe! Iehova ese ia laloa gauna ma ta do ita itaia.

16. Helalo-kerehai ena anina be dahaka, bona Iehova ese iseda dika ia gwauatao totona dahaka dainai unai be mai anina bada?

¹⁶ Iehova ese ia laloa gauna ma ta be, kara dika tauna ia helalo-kerehai momokani eiava lasi. Helalo-kerehai ena anina be dahaka? Ena anina be, “ta be ena lalona, kara, eiava ura ia haidaua.” Bona ena anina ma ta be, ta be ia karaia kara dikadia eiava matamanai kara maorodia ia karaia lasi dainai ia lalohisihisi bada. Helalo-kerehai tauna be ia karaia kara dikadia dainai ia lalohisihisi sibona lasi, to ena hetura karana Iehova ida ia dika dainai ia lalohisihisi danu. King Manase bona Davida be kara dika badadia idia karaia, to idia helalo-kerehai momokani dainai Iehova ese edia dika ia gwauatao. (1 Kin. 14:8) Oibe, Iehova ese ita do ia gwauatao bema ia itaia ita helalo-kerehai momokani. To ita karaia kara dikadia dainai ita sori sibona be hegeregere lasi. Namona be kara ta ita karaia. * Bona Iehova ese ia laloa gauna ma ta do ita itaia.

17. Ta ena kara ia haidaua anina be dahaka, bona dahaka dainai unai be mai anina bada? (Isaia 55:7)

¹⁷ Iehova ese ia laloa gauna ma ta be, kara dika tauna ena kara ia haidaua momokani eiava lasi. Ta ena kara ia haidaua anina be, ena kara dikana ia rakatania bona Iehova ena dala ia badinaia. (Isaia 55:7 duahia.) Iena laloa dalana ia hamatamataia be namo, unai amo Iehova ena lalohadai ia abia dae. (Roma  12:2; Efe. 4:23) Bona ena lalona ia hadaia guna ia karaia kara dikadia bona lalohadai dikadia ia rakatania totona. (Kol. 3:7-10) Oibe, Iehova ese iseda dika ia gwauatao bona kara dika amo ita ia hagoevaia totona, Keriso ena boubou gauna ita abidadama henia be namo. Iehova ia itaia ita hekwarahi iseda kara ita haidaua neganai, Ia ese unai boubou gauna amo iseda dika do ia gwauatao.​—1 Ioa. 1:7.  

18. Dahaka dainai Iehova be Dika Gwauatao Tauna badana?

¹⁸ Matamanai ita herevalaia point badadia haida ita riviulaia. Iunives lalonai Iehova be Dika Gwauatao Tauna badana. Dahaka dainai unai bamona ita hereva? Ginigunana be, ia be hanaihanai ia noho hegaegae dika ia gwauatao totona. Iharuana be, ia be ita ia diba namonamo. Ita dekenai idia vara gaudia ibounai ia diba, bona ia sibona ia diba bema ita helalo-kerehai momokani eiava lasi. Bona ihatoina be, Iehova ese ita ia gwauatao neganai, ita karaia dika ia laloaboio momokani. Unai ese dala ia kehoa lalomamina goevana bona ena lalonamo ita abia totona.

19. Ena be ita be goevadae lasi bona kara dika ita karaia noho, to dahaka dainai ita moale?

¹⁹ Oibe, ita be goevadae lasi taudia dainai, kara dika do ita karaia noho. To, Insight on the Scriptures, Volium 2, rau 771 ai idia noho herevadia ese ita ia hagoadaia, ia gwau: “Iehova be hebogahisi Diravana bona ia diba ena hesiai taudia edia goada be mai ena hetoana. Unai dainai, namo lasi idia laloa idia be goevadae lasi bona kara dika idia abia hanai dainai nega ibounai idia lalohisihisi. (Sal. 103:8-14; 130:3) Bema idia gaukara goada Dirava ena ura hegeregerena idia noho, do idia moale. (Fili. 4:4-6; 1 Ioa. 3:19-22).” Unai be hagoadaia herevana, ani?

20. Atikol 25 ai dahaka do ita herevalaia?

²⁰ Iseda kara dikadia dainai ita helalo-kerehai momokani neganai, Iehova ia noho hegaegae iseda dika ia gwauatao totona. To, edena dala ai Iehova ena dika gwauatao karana ita tohotohoa? Edena dala haida ai dika ita gwauatao karana bona Iehova ese dika ia gwauatao karana be idia hegeregere, to edena dala haida ai idia idau? Dahaka dainai ena idau ita lalopararalaia be mai anina bada? Atikol 25 ese unai henanadai do ia haerelaidia.