ZÃMSGÃ YĨNGA 24
A Zeova yaa sug-kõat sẽn ka to
“Zu-soaba, yãmb yaa sõmblem soaba, la y kõta sugri. Yãmb nonglmã yaa kãsenga, neb nins fãa sẽn boond yãmbã yĩnga.”—YƖƖN. 86:5.
YƖƖLL 42 Wẽnnaam ned pʋʋsgo
D SẼN NA N YÃ WÃ *
1. Bõe la rĩm a Salomo yeel Koɛɛg soab 7:20 wã pʋgẽ tɩ yaa gõaag zugu?
RĨM a Salomo yeelame: “Nin-tɩrg ka be dũniyã zug n maand tɩrg n ka maand yel-wẽnd ye.” (Koɛ. 7:20) A gomdã yaa sɩda. D fãa sɩd yaa yel-wẽn-maandba. (1 Zã 1:8) Rẽ n so tɩ d fãa rat tɩ Wẽnnaam la neb a taabã kõt-d sugri.
2. Y zoa sã n kõ-y sugri, y manesem yaa wãna?
2 Sãmbg kae tɩ y zoe n maana bũmb n sãam y zoa sũuri. La y sẽn da pa rat tɩ y zoodã sãamã yĩnga, y kosa y zoa wã sugr ne y sũur fãa. A sẽn sak n kõ yãmb sugrã, y manesem yɩɩ wãna? Yaa vẽeneg tɩ y sũur yɩɩ noog wʋsgo.
3. Bõe la d na n bãng sõs-kãngã pʋgẽ?
3 D ratame t’a Zeova yɩ d zoa hakɩɩka. La wakat ninga, d pa tõe n pa yeel bɩ n maan bũmb n sãam a sũur ye. La bõe yĩng tɩ d tõe n kɩs sɩd t’a Zeova tʋllame n kõ-d sugri? Bõe n wilgd t’a Zeova sẽn kõt tõnd sugr to-to wã yaa toor ne ninsaal sẽn kõt a to sugr to-to wã? La sẽn na n baase, ãnd n tõe n paam Wẽnnaam sugri?
A ZEOVA SAKD N KÕTA SUGRI
4. Bõe yĩng tɩ d tõe n kɩs sɩd t’a Zeova sakd n kõta sugri?
4 Wẽnnaam Gomdã wilgdame t’a Zeova sakd n kõta sugri. A Zeova sẽn wa n vẽneg a meng ne a Moyiiz Sinayi tãngã zugã, a yeel-a-la ne malɛk maasem yaa: ‘Mam . . . yaa Sẽn-Ka-Saab sẽn yaa Wẽnnaam sẽn yaa nimbãan-zoɛta, la bark kõata. Mam sũur ka yikd tao-tao ye, la mam yaa nonglem soaba, la m maanda sɩda. La mam maanda sɩd hal tɩ ta zamaan tusri, n kõt neb sugr b beegrã ne b kɩɩsgã la b yel-wẽnã fãa yĩnga.’ (Yik. 34:6, 7) A Zeova yaa Wẽnnaam sẽn yaa nimbãan-zoɛta. Ned sẽn maan yel-wẽnd sã n tek yam n kot sugr fãa, a sakd n kõ-a-la sugri.—Nee. 9:17; Yɩɩn. 86:15.
A Zeova mii bũmba fãa tõnd zugu (Ges-y sull a 5)
5. Wa Yɩɩn-sõamyã 103:13, 14 sẽn wilgdã, a Zeova sẽn mi tõnd sõma wã kɩtame t’a maand bõe?
5 A Zeova sẽn yaa d Naandã yĩnga, a mii bũmb fãa tõnd zugu. Tags-y n ges-y-yã: Neb ka tɛk n be tẽngã zugu. La a Zeova mii bũmb fãa b ned kam fãa zugu. (Yɩɩn. 139:15-17) A miime tɩ d roagdbã sẽn pa zems zãngã yĩng kɩtame tɩ d me pa zems zãng ye. A mii bũmb nins fãa sẽn maan d vɩɩmã pʋgẽ tɩ kɩt tɩ d yaa a soab rũndã-rũndã wã. A Zeova sẽn mi tõnd sõma woto wã kɩtame t’a zoet d nimbãanega.—Yɩɩn. 78:39; Karm-y Yɩɩn-sõamyã 103:13, 14.
6. Wãn to la a Zeova wilg t’a tʋllame n kõ-d sugri?
6 A Zeova wilgame t’a tʋllame n kõ-d sugri. A miime tɩ d yaab a Ãdem sẽn maan bũmb ningã kɩtame tɩ d fãa yaa yel-wẽn-maandb la kiidba. (Rom. 5:12) Bũmb kae tõnd mengã sẽn tõe n maan n põsg yel-kãnga, bɩ n sõng neb a taabã tɩ b põs ye. (Yɩɩn. 49:8-10) La d Wẽnnaamã sẽn nong-dã zoee d nimbãanega, n maan bũmb sẽn na yɩl tɩ d wa paam d mens ne yel-wẽndã la kũumã. Bõe la a maan-yã? Wa Zã 3:16 sẽn wilgdã, a Zeova tʋma a Bi-ribl sẽn ka to wã t’a wa ki tõnd yĩnga. (Mat. 20:28; Rom. 5:19) A Zeezi reega d zĩig n nams la a ki, sẽn na yɩl tɩ ned ning fãa sẽn tẽed-a tõe n wa paam a meng ne yel-wẽndã la kũumã. (Ebre. 2:9) A Zeova sẽn yã a Bi-riblã sẽn ki kũ-toaag la yɩ ne yãndã, a sũur tog n sãama hal wʋsgo. Yaa vẽeneg t’a Zeova ra pa na n bas t’a Bi-riblã ki, sã n da mikame t’a pa rat n kõ-d sugr ye.
7. Wilg-y neb kẽer a Zeova sẽn sak n kõ-b sugri, tɩ Biiblã gomd b yelle.
7 Biiblã gomda neb wʋsg a Zeova sẽn sak n kõ sugr yelle. (Efɛ. 4:32) Yãmb tagsda ãnd yelle? Tõe tɩ y tagsda rĩm a Manaase yelle. Ra-kãngã sẽn da yaa nin-wẽngã tʋma tʋʋm-wẽns wʋsg n beeg a Zeova. A pʋʋsa wẽn-faado, la a kɩt tɩ neb a taab me maan woto. A kʋʋ a meng kamb n maan maoong n kõ wẽn-faado. A pʋd n maana wẽn-faoog bõn-naandga, n ning a Zeova roogã pʋgẽ. Biiblã goma a Manaase yelle, n yeel yaa: “A Manaase kell n kẽnga taoor n maand sẽn yaa wẽng Sẽn-Ka-Saab nifẽ, n kɩt tɩ Sẽn-Ka-Saab sũurã yiki.” (2 Kib. 33:2-7) La a Manaase sẽn wa n tek yam n kot sugr ne a sũur fãa wã, a Zeova sak n kõ-a-la sugri. A pʋd n kɩtame t’a le lebg rĩma. (2 Kib. 33:12, 13) Tõe tɩ y tagsda rĩm a Davɩɩd sẽn maan yel-wẽn-kãsems n beeg a Zeova wã me yelle. Wala makre, a sẽn yo, la a sẽn kʋ nedã. La a Davɩɩd sẽn sak n deeg a kongre, n tek yam ne a sũur fãa n kot sugrã, a Zeova sak n kõo yẽ me sugri. (2 Sãm. 12:9, 10, 13, 14) Hakɩɩka, d tõe n kɩsa sɩd t’a Zeova tʋll n kõo tõnd sugri. La wa d sẽn na n yã wã, a Zeova sugrã kũun yaa toor fasɩ ne ninsaalbã rẽnda.
A ZEOVA SUGRÃ KA TO YE
8. Wãn to la a Zeova sẽn yaa bʋ-kaood sẽn ka to wã sõngd-a sugrã kũun wɛɛngẽ?
8 A Zeova n yaa “dũniyã fãa bʋ-kaoodã.” (Sɩng. 18:25) Bʋ-kaood sẽn tʋmd a tʋʋmd sõma mii laloa wã sõma. Yaa woto me ne a Zeova. A pa d bʋ-kaood bal ye. A pʋd n kõta tõnd noya. (Eza. 33:22) Ned kae n mi sẽn yaa sõma ne sẽn yaa wẽng n bake, n ta a Zeova ye. Bõe me la bʋ-kaood sẽn tʋmd a tʋʋmd sõma maanda? Nand t’a kao bʋʋdo, a baood n bãnga yellã vɩʋʋg sõma. Dẽnd a Zeova n yaa bʋ-kaood sẽn ka to. Bala a mii yɛlã fãa vɩʋʋgo.
9. Bõe la a Zeova mi d ned kam fãa zugu, n tõe n tik rẽ n kõ-d sugri?
9 A Zeova yaa bʋ-kaood sẽn mii yɛlã fãa vɩʋʋg sõma. A pa wa ninsaalb nins sẽn yaa bʋ-kaoodbã ye. (Sɩng. 18:20, 21; Yɩɩn. 90:8) A pa tikd ninsaal nin sẽn ne, wall a sẽn wʋmdã bal zug ye. A mii zʋgd nins d sẽn dɩk d roagdbã nengẽ wã, d sẽn paam wubr ningã, d laafɩ wã, la d yel-manesmã sõma. Sẽn paase, a Zeova mii sẽn be d sũurẽ wã. A mii ned fãa tʋlsem la a yam-tagsgã sõma. Baa fʋɩ pa solg ne a Zeova ye. (Ebre. 4:13) Dẽnd a Zeova sã n wa kõ ned sugri, yaa a sẽn mi a soabã yɛlã fãa vɩʋʋgã sõma wã yĩnga.
A Zeova kaooda bʋʋd tɩrga, a pa bakd ned n sõng ye. Ned pa tõe n madg a noor me ye. (Ges-y sull 10)
10. Bõe yĩng tɩ d tõe n yeel t’a Zeova kaooda bʋʋd tɩrg wakat fãa? (Tõodo 32:4)
10 A Zeova kaooda bʋʋd tɩrg wakat fãa. A pa tol n bakd ned n sõng ye. A pʋd n pa get ned neerem, a tarem, a ziir wall a tõog n yaool n kõ-a sugr ye. (1 Sãm. 16:7; Zak 2:1-4) Ned pa tõe n modg a Zeova wall a madg a noor ye. (2 Kib. 19:7) A pa kaood bʋʋd kɛgre, sũ-yikr bɩ nimbãan-zoeer yĩng ye. (Yik. 34:7) Sãmbg kae t’a Zeova sẽn mi bũmb fãa tõnd zugu, la d yɛlã sẽn yaa to-to wã kɩtame t’a yaa bʋ-kaood sẽn ka to.—Karm-y Tõod 32:4.
11. Wãn to la a Zeova sugrã kũun yaa toor fasɩ ne ninsaalbã rẽnda?
11 Biiblã babg ning b sẽn gʋls ne Ebre wã gʋlsdbã wilgame t’a Zeova sugrã ka to ye. Biiblã zĩis kẽere, b tũnuga ne Ebre wã gom-bil a ye sẽn tar pãnga, n gom a Zeova sugrã kũun yelle. Sebr a ye goma gom-bi-kãng yelle, n yeel tɩ “b tũnugda ne rẽ n bilgd Wẽnnaam sẽn kõt ned sẽn maan yel-wẽnd sugr to-to wã, la b zɩ n tũnug ne rẽ gom ninsaalbã sẽn kõt b taabã sugr to-to wã yell ye.” Ned sã n maan yel-wẽnd n tek yam n kot sugri, a Zeova bal n tõe n kõ nin-kãng sugr fasɩ. A Zeova sã n kõ-d sugri, bõe la d paamda?
12-13. a) A Zeova sã n kõ-d sugri, bõe la d paamda? b) Bõe n wilgd t’a Zeova sugrã ka to?
12 D sã n sɩd sak n deeg t’a Zeova kõ-d-la sugri, d paamda ‘yolsgo,’ yam sẽn gãe bãane, la sũur-kaset sẽn yaa sõma. Yaa “a Zeova meng nengẽ” la d tõe n paam woto fãa la pa ninsaal nengẽ ye. (Tʋʋ. 3:19) A Zeova sã n kõ-d sugri, a sakdame tɩ d le paam zood sõma ne-a, tɩ yaa wa d zɩ n beeg-a meng ye.
13 A Zeova sã n kõ-d sugr yel-wẽnd d sẽn da maan yĩnga, a pa le ningd-d taale, bɩ n sɩbg-d yel-wẽn-kãng yĩng ye. (Eza. 43:25; Zer. 31:34) A zãagda tõnd ne d beegrã “wa yaang ne nin-taoor sẽn zãr ne taab to-to wã.” * (Yɩɩn. 103:12) D sã n tags a Zeova sugrã sẽn ka to wã yelle, d sũy nooma hal wʋsgo. (Yɩɩn. 130:4) La ãnd dãmb n tõe n paam t’a Zeova kõ-b sugr woto?
ÃND DÃMB LA A ZEOVA KÕT SUGRI?
14. Wa d sẽn zoe n yã wã, bõe n kɩt t’a Zeova tõe n bãng a sã n segd kõo ned sugri?
14 Wa d sẽn yã wã, a Zeova sã n na n kõ ned sugri, a pa get a yel-wẽndã sã n yaa kãseng bɩ bilf ye. D yãame me t’a Zeova sẽn yaa d Naanda, soab ning sẽn kõt tõnd noy la d bʋ-kaoodã yĩnga, a mii a sã n segd n kõ-d-la sugri. Bõe la a Zeova get n bãng a sã n segd n kõo ned sugri?
15. Wa Luk 12:47, 48 sẽn wilgdã, bõe la a Zeova get n bãng a sã n na n kõo ned sugri?
15 Bũmb a ye a Zeova sẽn get n bãng a sã n na n kõo ned sẽn maan yel-wẽnd sugri, yaa a soabã sã n da miime bɩ a pa mi t’a sẽn maand bũmb ningã pa sõma ye. A Zeezi wilga rẽ vẽeneg Luk 12:47, 48. (Karm-y.) Ned sã n yãk yam n maan sẽn yaa wẽnga, n yaool n da mi a sũurẽ t’a sẽn maand bũmb ningã pa noom a Zeova, yaa yel-wẽn-kãsenga. A Zeova tõeeme n pa kõ-a sugr ye. (Mark 3:29; Zã 9:41) La togs sɩdã, wakat ninga d maanda bũmbu, n yaool n da miẽ tɩ pa sõma ye. Woto wã, d tõe n paamame t’a Zeova kõ-d sugr bɩ? D gom bũmb a to a Zeova sẽn get n bãng a sã n na n kõo ned sugri.
D tõe n kɩsa sɩd tɩ d sã n sɩd tek yam n kot sugri, a Zeova na n kõ-d-la sugri. (Ges-y sull 16-17)
16. Tek yam n kot sugr rat n yeelame tɩ bõe? La bõe yĩng tɩ rẽ tar yõodo, d sã n dat t’a Zeova kõ-d sugri?
16 Bũmb a to a Zeova sẽn get n bãng a sã n na n kõo ned sẽn maan yel-wẽnd sugri, yaa a soabã sã n sɩd teka yam n kot sugri. Tek yam n kot sugr rat n yeelame tɩ bõe? Rat n yeelame tɩ f toeem yam wall yel-manesem. Ned sẽn sɩd tek yam n kot sugr sũur sãamda wʋsgo, t’a maand a bãngẽ ne wẽng ning a sẽn maanã, wall a sẽn pa tõog n maan sẽn yaa sõma wã yĩnga. A sũurã sẽn sãamã pa wẽng ning a sẽn maanã yĩng bal ye. Yaa a sẽn bas t’a tẽebã pãng boog tɩ kɩt t’a maan sẽn pa sõma wã me yĩnga. Tẽeg-y tɩ rĩm a Manaase ne rĩm a Davɩɩd fãa maana yel-wẽn-kãsemse. La baa ne rẽ, a Zeova kõ-b-la sugri, b sẽn da sɩd tek yam n kot sugrã yĩnga. (1 Rĩm. 14:8) Dẽnd nand t’a Zeova kõ ned sugri, a segd n yãa bũmb sẽn wilgd vẽeneg t’a soabã sɩd teka yam n kot sugri. D sã n maand d bãngẽ ne yel-wẽnd d sẽn da maan pĩndã, wall d sẽn maan masã, rẽ bal pa sek ye. D tog n maana sẽn yɩɩd rẽ. * Rẽ me yaa bũmb a to a Zeova sẽn get n bãng a sã n tog n kõo ned sẽn maan yel-wẽnd sugri.
17. Bõe me la a Zeova get n bãng a sã n segd n kõ-d-la sugri, la bõe yĩng tɩ d segd n maan rẽ? (Ezayi 55:7)
17 Bũmb a to me a Zeova sẽn get n bãng a sã n na n kõo ned sugri, yaa a soabã sã n wẽnemdame n bas bũmb nins a sẽn da maand pĩndã tɩ pa sõma wã fasɩ, la a vɩ tɩ zemsd ne a Zeova sẽn dat to-to wã. (Karm-y Ezayi 55:7.) A tog n toeema a yam-tagsgã fasɩ, tɩ zems ne a Zeova sẽn get yɛlã to-to wã. (Rom. 12:2; Efɛ. 4:23) A segdame me n yãk yam n bas a tags-wẽnsã la a tʋʋm-wẽnsã. (Kol. 3:7-10) Sẽn yɩɩd fãa, yaa d sã n tẽed Kiristã kũumã sẽn yɩ maoongã la d na n paam t’a Zeova tik rẽ n kõ-d sugri, la a yẽes d yel-wẽnã. A Zeova sã n neẽ tɩ d maanda d sẽn tõe fãa n na n toeem d yel-manesmã, a na n sɩd tika rẽ n kõ-d sugri.—1 Zã 1:7.
KƖS-Y SƖD T’A ZEOVA NA N KÕ-Y-LA SUGRI
18. A Zeova sugrã wɛɛngẽ, bõe la d bãng-yã?
18 D lebg n ges bũmb kẽer d sẽn bãng sõs-kãngã pʋgẽ. A Zeova n yaa sug-kõat sẽn ka to. Bõe yĩng tɩ d tõe n yeel woto? Bala pipi, a sakd n kõta sugr wakat fãa. Yiibu, a mii bũmba fãa tõnd zugu. A mii d sẽn yaa a soabã sõma, la a tõe n bãng d sã n sɩd teka yam n kot sugri. La tãabo, a Zeova kõta tõnd sugr fasɩ, tɩ yaa wa d zɩ n beeg-a meng ye. Woto kɩtdame tɩ d kell n tall sũur-kaset sẽn yaa sõma, la d paam me n ta a yam.
19. Baa ne d sẽn na n ket n maand yel-wẽn d sẽn pa zems zãngã yĩngã, bõe yĩng tɩ d tõe n maan sũ-noogo?
19 D sẽn pa zems zãngã yĩnga, sãmbg kae tɩ d na n ket n maanda yel-wẽna. La a Zeova yaa nimbãan-zoɛta, n miẽ tɩ neb nins sẽn tũud-a wã yaa pãn-komsem dãmba. Rẽ n so tɩ d pa segd n sãamd d sũur wakat fãa, d sẽn pa zems zãngã sẽn kɩt tɩ d kongdẽ wã yĩng ye. (Yɩɩn. 103:8-14; 130:3) D sã n maand d sẽn tõe fãa n vɩ tɩ zemsd ne Wẽnnaam noyã, d tõe n maana sũ-noogo. (Fili. 4:4-6; 1 Zã 3:19-22) Woto yaa bũmb sẽn kengd d raoodo.
20. Bõe la d na n bãng sõsg ning sẽn pʋgdã pʋgẽ?
20 D sũy nooma wʋsgo, d sẽn mi tɩ d sã n wa maan yel-wẽnd n sɩd tek yam n kot sugri, a Zeova sakd n kõt-d-la sugrã. Wãn to la d tõe n dɩk a Zeova togs-n-taar sugrã kũun wɛɛngẽ? Zĩ-bʋs wɛɛngẽ la a Zeova sugrã kũun ne ninsaalbã rẽnd wõnd taaba, la zĩ-bʋs wɛɛngẽ la pa wõnd taaba? Bõe yĩng tɩ tar yõod tɩ d bãng rẽ n welge? Sõsg ning sẽn pʋgdã na n sõng-d lame tɩ d paam sogs-kãensã leoore.
YƖƖLL 45 Mam sũurã tagsgo
^ A Zeova wilga a Gomdã pʋgẽ t’a tʋllame n kõ sẽn maan-b yel-wẽn n tek yam n kot sugrã sugri. La wakat ninga, d tõe n tagsame tɩ d pa zems ne a sugrã ye. Sõs-kãngã pʋgẽ, d na n yãa bũmb ning sẽn kɩt tɩ d tõe n kɩs sɩd tɩ d sã n maand d bãngẽ ne yel-wẽnd d sẽn maan fãa, a Zeova na n sak n kõ-d-la sugri.
^ GOMDÃ VÕORE: Ned sẽn “tek yam n kot sugr” maanda a bãngẽ ne a sũur fãa, a pĩnd vɩɩmã sẽn da yaa to-to wã, tʋʋm-wẽns nins a sẽn da tʋmdã, wall bũmb a sẽn da tog n maan n yaool n pa maan yĩnga. Ned sã n sɩd tek yam n kot sugri, d nee rẽ a tʋʋm-tʋmdɩ wã pʋgẽ.
