1. ¿Tlake kiijtok Salomón ipan Eclesiastés 7:20?

 TLANAUATIJKETL Salomón kiijtok: “Ipan nochi ni Tlaltipaktli axonka niyon se tlakatl tlen nochipa kichiua tlen kuali uan axkema tlajtlakolchiua” (Ecl. 7:20). ¡Nelia tlen kiijtok! Nochi tielij titlajtlakolejkej (1 Juan 1:8). Yeka moneki Jehová uan sekinok, ma techtlapojpoljuikaj.

2. ¿Kenijkatsa tijyolmatij kema se touampo techtlapojpoljuia?

² ¿Tijyolkokojtokej se touampo? Uelis nochi kiampa tijchijtokej. Yeka, ika nochi toyolo tikiljuiaj ma techtlapojpoljui pampa nojua tijnekij timouampojchijtosej iuaya. ¿Kenijkatsa tijyolmatij kema techtlapojpoljuia? Tlauel kuali tijyolmatij uan tlauel tiyolpakij.

3. ¿Tlake tikitasej ipan ni tlamachtili?

³ Maske nochi tijnekij kuali timouampojchijtosej ika Jehová, miakpa tijchiuaj o tikijtouaj tlen amo kipaktia. Uajka, ¿kenke uelis timotemachisej ya kineki techtlapojpoljuis? ¿Kenke kema tetlapojpoljuia amo kichiua sanse kej maseualmej? Uan, ¿ajkia inijuantij kintlapojpoljuia?

4. ¿Kenke uelis timotemachisej Jehová kineki techtlapojpoljuis?

⁴ Biblia xitlauak kiijtoua Jehová nochipa kineki tetlapojpoljuis. Se neskayotl, ipan tepetl Sinaí, kiiljuik  Moisés kenijkatsa eli ya. Ika se iluikaejketl Jehová kiijtok: “Na niDios, moTeko. Na tlen nitetlasojtla uan nijpia ueyi noyolo ika tlakamej. Ouij para nikualanis, pampa tlauel niteiknelia. Uelis timotemachis ipan na pampa senkistok nitemachtli. Nikinnextilis tlauel onpano miak tlakamej kejatsa nikiniknelia, pampa nikintlapojpoljuia inintlajtlakoljuaj kema nechuejkamajkauaj uan nechixpanoj” (Éx. 34:6, 7). Jehová katli tlauel teiknelia uan tetlasojtla, nochipa kineki kintlapojpoljuis katli moyolkuepaj (Neh. 9:17; Sal. 86:15).

5. Kej kiijtoua Salmo 103:13, 14, ¿tlake kichiua Jehová pampa kuali techixmati?

⁵ Jehová techchijchijki, yeka kuali kimati kenijkatsa tielij. Uan kema tikitaj kuali kinixmati maseualmej, kichiua tlauel ma timosentlachilikaj (Sal. 139:15-17). Ya kimati tlake tlamantli tlen amo kuali techpanoltilijkej totatauaj uan kenijkatsa techiskaltijkej, uan yeka amo tielij sanse kej sekinok. ¿Tlake kichiua Jehová ika nochi tlen kimati? Kipaleuia ma techtlasojtla (Sal. 78:39; xijpoua Salmo 103:13, 14).

6. ¿Kenijkatsa kinextijtok Jehová kineki techtlapojpoljuis?

⁶ Jehová kinextijtok kineki techtlapojpoljuis pampa kuali kimati katli tlajtlakolchijki elki Adán, yeka nama nochi tielij titlajtlakolejkej uan timikij (Rom. 5:12). Nojkia, kimati toselti amo ueltoskia timomanauisej (Sal. 49:7-9). Jehová techtlasojtlak uan yeka kinejki techmakixtis. Kej kiijtoua Juan 3:16, toTeotsij tlauel techiknelia, yeka kititlanki iKone iyojtsi ma techmakixtiki (Mat. 20:28; Rom. 5:19). Jesús mijki uan kiampa uelki kinmakixtik nochi katli motemachiaj ipan ya (Heb. 2:9). Ma timoyoliljuikaj kenijkatsa Jehová tlauel tlaijiyouik kema kiitak iKone kitlaijiyouiltijkej uan kimiktijkej. Uajka, tlaj ya amo techtlapojpoljuiskia, san tlapik kikajtoskia ma kimiktikaj iKone.

7. Xikijto ajkia inijuantij Jehová kintlapojpoljuik ika nochi iyolo.

⁷ Biblia kiijtoua Jehová kintlapojpoljuik ika nochi iyolo se keskij  itekipanojkauaj (Efes. 4:32). Uelis tikilnamiki kenijkatsa kitlapojpoljuik tlanauatijketl Manasés. Ya kichijki miak tlamantli tlen amo kuali iixpa Jehová uan kinextik amo kipiayaya kuali iyolo. Kichijki sekinok ma kinueyichiuakaj teotsitsij, kintlatik ikoneuaj uan kinmakak kej tlakajkaualistli nopa teotsitsij. Nojkia, amo pinajki kikalakis ichaj Jehová se tlaixkopinkayotl. Biblia kiijtoua: “Tlauel miak tlamantli kichijki Manasés tlen elki fiero iixpa toTeko uan yeka tlauel kikualankamakak” (2 Crón. 33:2-7). Maske kichijki nochi ni tlamantli, kema kinextik nelnelia moyolkueptoya, Jehová kitlapojpoljuik ika nochi iyolo uan sampa kikajki ma tlanauati (2 Crón. 33:12, 13). Seyok katli nojkia kitlapojpoljuik elki David, ya nojkia kichijki uejueyi tlajtlakoli pampa momekatik uan temiktik. Uan kema moyolkuepki ika nochi iyolo, Jehová nojkia kitlapojpoljuik (2 Sam. 12:9, 10, 13, 14). Yeka, uelis timotemachisej toTeotsij kineki techtlapojpoljuis. Uan kej tikitasej, Jehová amo sanse tetlapojpoljuia kej maseualmej kichiuaj.

8. ¿Kenke san Jehová tlauel kuali tetlajtolsenkaua uan kenijkatsa kipaleuia ma tetlapojpoljui?

⁸ Jehová eli katli tetlajtolsenkaua ipan nochi Tlaltipaktli (Gén. 18:25). Se kuali tetlajtolsenkajketl moneki kuali kiixmatis nochi tlanauatili. Uan Jehová kiampa kichiua pampa amo san tetlajtolsenkaua, nojkia techmaka tlanauatili (Is. 33:22). San Jehová ueli kiijtoua tlake eli kuali uan tlake amo. ¿Tlake seyok tlamantli moneki kinextis se tetlajtolsenkajketl? Kema ayamo tetlajtolsenkaua, moneki kuali kiitas tlake nelnelia panotok. Uan ni san Jehová ueli kichiua.

9. ¿Tlake tlamantli kipaleuia Jehová ma kimati tlaj tetlapojpoljuis?

⁹ Jehová amo tetlajtolsenkaua kej maseualmej kichiuaj. Ya kuali kimati tlake tlamantli uelis kichiuas ma tlaixpano se akajya (Gén. 18:20, 21; Sal. 90:8). Amo tetlajtolsenkaua san ika tlen maseualmej kiitaj uan kikakij. Ya kuali kikuamachilia kenijkatsa eli itlakayo uan ieso se maseuali, kej kiiskaltijkej, kampa moskaltik, kenijkatsa eltok itsontekuich uan tlen kiyolmati. Nojkia, Jehová kuali kimati tlake nelnelia eltok ipan iyolo se akajya, kenke kichiua se tlamantli uan tlen kineki kichiuas. ¡Ya nochi kimati uan tlauel kuali techixmati! (Heb. 4:13). Kej tikitaj, Jehová tetlapojpoljuia pampa kuali kimati nochi tlen panotok.

10. Kej kiijtoua Deuteronomio 32:4, ¿kenke tlen Jehová kitlapejpenia nochi eli xitlauak?

¹⁰ Jehová nochipa kuali kitlapejpenia tlen kichiua uan amo techikoita. Amo kitlapojpoljuia se akajya pampa kuali nesi, tlapijpia, kipia se kuali tekitl, o pampa tlauel tlalnamiki (1 Sam. 16:7; Sant. 2:1-4). Ya amo uelis kichiualtisej yon kimakasej se tlenijki uan kiampa tetlapojpoljuis (2 Crón. 19:7). Nojkia, amo kichiua san pampa tlauel kitetsopaj o pampa kiita se maseuali tlauel moyolkuesoua (Éx. 34:7). Kej tikitaj, san Jehová tlauel kuali kej tetlajtolsenkaua pampa tlauel kuali techixmati (xijpoua Deuteronomio 32:4).

11. ¿Kenke san Jehová ueli tetlapojpoljuia ika nochi iyolo?

 ¹¹ Katli kiijkuilojkej Escrituras Hebreas kuali kimatiyayaj san Jehová tetlapojpoljuia ika nochi iyolo. Se amochtli kiijtoua inijuantij kemantika kitekiuijkej se tlajtoli ika hebreo “tlen san motekiuia kema Jehová kintlapojpoljuia katli tlaixpanotokej. Nopa tlajtoli amo motekiuia kema se maseuali kitlapojpoljuia seyok” (Sinónimos del Antiguo Testamento, traducción y adaptación de Santiago Escuain). San Jehová nelia ueli kitlapojpoljuia se akajya katli moyolkueptok. ¿Kenijkatsa tijyolmatij pampa kiampa kichiua?

12, 13. 1) ¿Kenijkatsa kiyolmati se akajya kema Jehová kitlapojpoljuia? 2) ¿Techtlapojpoljuia toTeotsij san se keski tonali?

¹² Kema timotemachiaj Jehová ya techtlapojpoljuik, nelnelia tlauel kuali tijyolmatij, tijpiaj tlaseuilistli uan ayokmo techyolkokoua totlalnamikilis. San Jehová uelis kichiuas kiampa ma tijyolmatikaj, uan amo kema maseualmej techtlapojpoljuiaj (Hech. 3:19). Kema techtlapojpoljuia, techpaleuia sampa ma timouampojchiuakaj iuaya. Uan kiita kejuak amo kema tikixpanokej.

¹³ Kema Jehová techtlapojpoljuia, ayokmo kiilnamiki tlen tijchijkej yon techtlatsakuiltia (Is. 43:25; Jer. 31:34). Ya kitlalia uejka totlajtlakoljuaj “keja iuejkaka kampa kisa Tonati uan hasta kampa onkalaki” (Sal. 103:12). * Kema tikitaj kenijkatsa Jehová tetlapojpoljuia ika nochi iyolo, kichiua ma tijtlaskamatikaj uan ma tijuejkapantlalikaj (Sal. 130:4). Uan, ¿ajkia inijuantij kiampa kintlapojpoljuia?

14. Kej tikitstokej, ¿kenijkatsa Jehová tetlapojpoljuia?

¹⁴ Ipan tlen timomachtijtokej, tikitakej Jehová kitlapojpoljuia se akajya maske kichijki se ueyi tlajtlakoli. Nojkia, tikitakej ya ueli kiijtoua tlaj techtlapojpoljuis pampa ya techchijchijki,  techmaka tlanauatili uan techtlajtolsenkaua. Uajka, ¿tlake tlamantli kiita Jehová?

15. Kej kiijtoua Lucas 12:47, 48, ¿tlake kiita Jehová kema tetlapojpoljuia?

¹⁵ Kema Jehová tetlapojpoljuia, ya kiita tlaj nopa maseuali kimatiyaya amo kuali tlen kichijki. Jesús kiampa kiijtok ipan Lucas 12:47, 48 (xijpoua). Kema se akajya kichiua se tlamantli maske kimati Jehová amo kipaktia, kichiua se ueyi tlajtlakoli. Uan uelis toTeotsij amo kitlapojpoljuis (Mar. 3:29; Juan 9:41). Uan tlaj teipa tikitaj tlen tijchijkej eli se tlajtlakoli, ¿Jehová techtlapojpoljuis? Kena. Uan ni techpaleuia ma tikitakaj tlake seyok tlamantli kiita Jehová.

16. ¿Tlake kiijtosneki timoyolkuepasej, uan kenke moneki tijchiuasej?

¹⁶ Jehová nojkia kiita tlaj katli tlajtlakolchijki nelia moyolkueptok. Kema se akajya moyolkuepa kipatla tlen moiljuia, kej monejnemiltia uan tlen kinekiyaya kichiuas. Nojkia, tlauel moyolkokoua uan tlauel mokuesoua pampa kichijki tlen amo kuali o amo kichijki tlen kinamikiyaya. Amo san kiyolkokoua pampa tlajtlakolchijki, nojkia pampa ayokmo kuali tlaneltokak uan yeka tlaixpanok. Sampa ma tikilnamikikaj tlen kichijkej Manasés uan David. Maske kichijkej uejueyi tlajtlakoli, Jehová kintlapojpoljuik pampa nelia moyolkuepkej (1 Rey. 14:8). Uajka, Jehová kitlapojpoljuia san katli nelia kinextia moyolkueptok. Amo kinamiki san tikijtosej techyolkokoua tlen tijchijkej, moneki tijnextisej. * Nama ma tikitakaj tlake seyok tlamantli kiita Jehová.

17. 1) Kej kiijtoua Isaías 55:7, ¿tlake kichiua se akajya kema kipatla inemilis? 2) ¿Kenijkatsa techpaleuia amo sampa ma titlajtlakolchiuakaj?

¹⁷ Seyok tlamantli tlen Jehová nojkia kiita, eli kema se maseuali kipatla inemilis. Katli kiampa kichiua, kikaua tlen kichiuayaya  uan peua monejnemiltia kej Jehová kipaktia (xijpoua Isaías 55:7). Katli kipatla inemilis moneki kipatlas itlalnamikilis uan kikauas Jehová ma kiyakana (Rom. 12:2; Efes. 4:23). Nojkia, moneki kichiuas kampeka kikauas tlen amo kuali kichiuayaya uan tlen moiljuiyaya (Col. 3:7-10). Maske tijchiuasej ni tlamantli, moneki timotemachisej ipan Jesús imikilis uan kiampa Jehová techtlapojpoljuis. Kema kiita nelia tijchiuaj kampeka tijpatlaj tonemilis, ya techtlapojpoljuia pampa kimati iKone motemaktilik uan techmakixtik (1 Juan 1:7).

18. ¿Tlake tijyekojtokej pampa Jehová tetlapojpoljuia?

¹⁸ Ipan ni tlamachtili tikitstokej san Jehová tetlapojpoljuia ika nochi iyolo. ¿Kenke kiampa tikijtouaj? Se, pampa ya nochipa kineki techtlapojpoljuis. Ome, tlauel kuali techixmati uan san ya ueli kiita tlaj nelia timoyolkueptokej. Uan eyi, kema tetlapojpoljuia, ayokmo kiilnamiki tlen tijchijkej. Nochi tlen Jehová kichiua techpaleuia ma tijpiakaj kuali totlalnamikilis uan sampa kuali ma timouikakaj iuaya.

19. ¿Kenke nojua uelis tiyolpakisej maske titlajtlakolejkej?

¹⁹ Ipan ni tonali, nojua timokuapolosej pampa tielij titlajtlakolejkej. Maske kiampa pano, tlauel techyolchikaua tlen kiijtoua Perspicacia para comprender las Escrituras, volumen 1, iamayo 209: “Jehová techtlasojtla pampa kimati timokuapolouaj. Yeka, amo kinamiki nochipa timoyolkuesojtosej pampa titlajtlakolchijkej (Sl 103:8-14; 130:3). Tlaj nochipa timonejnemiltiaj kej Jehová kineki, techpaleuis ma tiyolpakikaj (Flp 4:4-6; 1Jn 3:19-22)”. ¡Nelnelia tlauel techyolchikaua tlen kiijtoua!

20. ¿Tlake tikitasej ipan seyok tlamachtili?

²⁰ Tlauel tijtlaskamatij pampa Jehová techtlapojpoljuia kema kiita nelnelia timoyolkueptokej. ¿Kenijkatsa uelis tijchiuasej kej ya? ¿Kenke kema Jehová tetlapojpoljuia amo eli sanse kema maseualmej tetlapojpoljuiaj? ¿Kenke tlauel moneki tijkuamachilisej ni? Ipan tlamachtili 25 tijnankilisej ni tlajtlanili.