1. Inga zvakatahwa pana Mucumaeri 7:20, Mambo Soromona wakananga cokwadi capi?

 MAMBO Soromona wakatara kudari: “Akuna mu nyika mundhu wakarurama, anoita bzakanaka basi, acikaxaixi.” (Mucumaeri 7:20) Izvi ndizvonadi. Tese tinoshaisha. (1 Johani 1:8) Ngo kudaro, tese tinoda kuregerehwa ndi Mwari no kuregerehwavo ngo vandhu vamweni.

2. Makajizwa kudini pamakaregerehwa ngo shamwari yenyu?

² Pacina kukana-kana, mucaceukija vhaza yamakanyangajiswa ngo shamwari yenyu. Imwimwi maidazve kuva shamwari yake, ngo kudaro makakumbira kuregerehwa. Makajizwa kudini shamwari yenyu payakamuregerera? Kunanga kuti makajizwa ushoni? Hina, zvakatoitazve kuti imwimwi mudakare.

3. Muvhunjo japi jatinozodavira pa musoro uwu?

³ Itusu tinoda kuti Jehovha ave shamwari yedu, asi nguva jimweni tingananga no kuita zviro zvinomunyangajisa. Waro tingava kudini no cokwadi cokuti Jehovha wakanasiririka kuti atiregerere? Ngowapi musiyano uripo pa manera Jehovha anotiregerera no manera atinoregereravo vamweni? Pejisire, ndiyani anoregerehwa ndi Jehovha?

4. Ngenyi tingava no cokwadi cokuti Jehovha wakanasiririka kuti atiregerere?

⁴ Bhaibheri rinogondesa kuti Jehovha wakanasiririka kuti atiregerere. Ecishandisa Ngirozi, Jehovha wakavhunja Mosi  ngo pamusoro po mugariro jake pa Dundhu ro Sinai, paakati: “Tenji Mwari! Tenji Mwari, Mwari anounyaxa no usizi, anononoka kuceneka, wakazara ngo rudo no ugondeki; anongwarira rudo hwake ku bziuru bzo mubarihwana, anokungurira uposi, uxaixi no uphambanisi.” (Exodo 34:6, 7) Jehovha wakanaka nokutizve ndi Mwari ano usizi, uwo wakanasiririka kuti aregerere vashaishi vanokhauya.—Neemia 9:17; Nduyo 86:15.

5. Mukuzwirana na Nduyo 103:13, 14, zvicinyi zvaanoita Jehovha zvecivoneka kuti anonasa kuziva vandhu?

⁵ Inga Musiki wedu, Jehovha anonasa kutiziva. Amborangariranyi basi, iyena anoziva mugariro jo vandhu vese vari pasi pano. (Nduyo 139:15-17) Ngo kudaro, anokwanisa kuvona kutama kukwana kotakagara utaka kuvha ku vabari vedu. Anozivazve zvakaitika mu upenyu hwedu kuti tive vandhu vatiri wari nyamasi uno. Waro zvicinyi zvaanoita Jehovha zvecivoneka kuti anonasa kutiziva? Iyena anotikhombijira usizi.—Nduyo 78:39; verenganyi Nduyo 103:13, 14.

6. Jehovha wakakhombijisa kudini kuti wakanasiririka kuti atiregerere?

⁶ Jehovha wakavonesa kuti wakanasiririka kuti atiregerere. Iyena anozwisisa kuti ngo ndava yo zvakaitwa ngo mwanarume wokutanga, Adhamu, tese tinoshaisha topejisira ngo kufa. (Varoma 5:12) Apana catingaita kuti titame kushaisha no kufa. (Nduyo 49:8-10) Asi Mwari wedu ano rudo wakakhombija usizi no kuita ciri cese kuti atibesere. Zvicinyi zvaakaita? Johani 3:16 inovonesa kuti Jehovha wakapa Mwana wake umwe ega kuti aviye kotifira. (Mateu 20:28; Varoma 5:19) Jesu wakatifira kuti akwanise kuponesa vese vanokhombija rutendo kwaari. (Vahebheru 2:9) Jehovha wakahwajihwa maningi paakavona mafire akaita Mwana wake. Ivanyi no cokwadi co kuti Jehovha aacaizotendera kuti Mwana wake aviye kotifira, kudari iyena aadi kutiregerera.

7. Ngojapi muezaniso munganani jatinowana mu Bhaibheri jo vandhu vakaregerehwa ndi Jehovha?

⁷ Bhaibheri rakazara ngo muezaniso jo vandhu vakaregerehwa ndi Jehovha. (Vaefeso 4:32) Ndiyani wamunorangarira? Kangaije munorangarira ndi Mambo Manasa. Mwanarume uwu, wakaita zviro zvakashatisisa pamberi pa Jehovha. Iyena wakanamata zvimwari zvokunyepa no kuvhunjavo vamweni  kuti vaite zvondhozvo. Wakauraya vana vake no kuvapira ku zvimwari zvokunyepa. Ciro cimweni cakashatisisa caakaita, ngo cokuceca cithombi co cimwari co manyepo, woenda kocidira mu themberi yakacena ya Jehovha. Bhaibheri rinonanga kudari ngo pamusoro pake: “Wakaita bziito bzakawanda bzicikadi Mwari, ecimusa kudaro uxungu hwake.” (2 Kronike 33:2-7) Asi Manasa paakakhombija kuti wainga wakhauyadi ngo mwoyo wese, Jehovha wakamuregerera. Wakatoita kuti iyena avezve mambo. (2 Kronike 33:12, 13) Mungarangariravo ngo muezaniso wa Mambo Dhavhidhi, iyena wakaita zvishaishi zvikuru maningi pamberi pa Jehovha, kubatanija kuita upombo no kuuraya. Asi Dhavhidhi paakadekeca zvishaishi zvake, wovonesa kukhauya ngo mwoyo wese, Jehovha wakamuregereravo. (2 Samueli 12:9, 10, 13, 14) Hina, tingava no cokwadi co kuti Jehovha wakanasiririka kuti atiregerere. Inga zvatavona, manera Jehovha anoregerera akasiyana no manera atinoregerera itusu.

8. Zvecivoneka kuti Jehovha ndiyena Mutongi waushoni, ngenyi tingava no cokwadi cokuti anokwanisa kuregerera?

⁸ Jehovha ndiyena “Mutongi wo nyika yese.” (Genesi 18:25) Mutongi waushoni anodikana kunasa kuzwisisa mutemo. Jehovha ndiyena Mutongi wedu, ngokuti ndiyena Mupi wo mutemo. (Isaia 33:22) Jehovha ndiyena basi anokwanisa kuziva zvakanaka no zvakashata. Mutongi waushoni anodikana kuzivenyizve? Anodikana kuziva zvese zvinobatanijwa pa shwiro acito atonga shwiroyo. Ngo kudaro, tingatonanga kuti Jehovha ndiyena Mutongi wakanakisisa, ngokuti anoziva zvese zvinobatanijwa pa shwiro iri yese.

9. Jehovha paanotema civaringo co kuregerera mundhu, anonga akacijikira pacinyi?

⁹ Matongere anoita Jehovha akasiyana no anoita vandhu. Ngokuti Jehovha nguva jese anoziva zvese zvinobatanijwa. (Genesi 18:20, 21; Nduyo 90:8) Iyena anokwanisa kuvona zvizinji kupinda zvinovoniwa ngo vandhu. Anonasa kuzwisisa kuti zviito zvo mundhu zviri kupsasiswa kudini ngo mugariro jake, mavonekero ake, kujija kwaakaita, kwaanogara pomwe no mazwiro ake. Jehovha anokwanisavo kuvona zviri mu mwoyo mo mundhu. Iyena anonasa kuzwisisa kuti ngenyi mundhu waita ciro cakati kuti. Apana cakavigika kuna Jehovha. (Vahebheru 4:13) Ngo kudaro, nguva jese Jehovha paanoregerera mundhu anonga eciziva zvese zvinobatanijwepo.

10. Ngenyi tingananga kuti kutonga kunoita Jehovha nguva jese kwakarungama? (Deuteronòmio 32:4)

¹⁰ Jehovha nguva jese anotonga mu njira yakarungama. Iyena aana mukheto. Jehovha narini aaregereri mundhu ngokuti wakanyara, wakakhupuka, anosisira maningi kana anokwanisa kuita zviro zvakawanda. (1 Samueli 16:7; Jakobo 2:1-4) Apana angamuvangirija kuti iyena aite ciri cese kana kumudhyekera. (2 Kronike 19:7) Aatemizve zvivaringo zvake naakanyangajwa kana wakacijikira pa mazwiro ake. (Exodo 34:7) Pacina kukana-kana, Jehovha ndiyena mutongi waushoni ngokuti anoziva zvese ngo pamusoro pedu no kuzwisisa mugariro wedu.—Verenganyi Deuteronòmio 32:4.

11. Ngenyi kuregerera kunoita Jehovha kwakasiyana no kunoita vandhu?

¹¹ Vandhu vakatara Matahwa o Cihebheru vakazwisisa kuti kuregerera kunoita Jehovha kwakasiyana no kunoita vandhu. Mu ndau jimweni ivona vakashandisa gama ro Cihebheru rinodurujihwa kudari ngo bhuku rimweni: “Kuregerera uku kunoitwa basi kuti kuvonese  kuregerera kunoita Mwari mundhu paanoshaisha. Kuregerera kondhoko akuezaniswi no kuregerera kucikazivi kuperera kunoitwa ngo mundhu.” Ndi Jehovha basi anokwanisa kunasa kuregerera mushaishi. Waro Jehovha paanoregerera muviyo wakona ngowapi?

12-13. (a) Mundhu paanopera kuregerehwa ndi Jehovha, anodikana kujizwa kudini? (b) Kuregerera kwaanoita Jehovha kunopeja mukuvo wakadini?

¹² Patinotendera kuti Jehovha watiregerera, ‘tinotondhojwa,’ tova no runyararo mu murangariro pamwepo no hana yakacena. Kuregerera kwakadari akuvhi ku vandhu, asi kunovha kuna “Jehovha” kamare. (Mabasa o Vapostori 3:19) Jehovha paanotiregerera, iyena anotitendera kuti tivezve shamwari jake. Zvozodari inga kuti atizivi kumboshaisha.

¹³ Jehovha paanopera kutiregerera iyena aatipumbhi kana kutipanica ngo zvishaishi zvotakaita. (Isaia 43:25; Jeremia 31:34) Iyena anodira ndhambo zvishaishi zvedu “inga kumabvazuva kuri ndhambo no kumavirira.” * (Nduyo 103:12) Patinorangarira ngo kuregerera kunoita Jehovha, tinova vandhu vanoda kubongesera no kushamaiswa ndizvona. (Nduyo 130:4) Asi ndiyani angaregerehwa ndi Jehovha?

14. Ngozvapi zvotavona mbhera wari ngo pamusoro po civaringo cinotema Jehovha co kuregerera mundhu?

¹⁴ Mbhera wari takwanisa kuvona kuti civaringo ca Jehovha co kuregerera mundhu, acicijikiri pakuti cishaishico cakakura kana kuti cidoko. Cimwenizve, takwanisa kuvona kuti Jehovha anoshandisa uzivi hwake inga Musiki wedu, Mupi wo mutemo pomwe no Mutongi kuti ateme civaringo co kuregerera mundhu. Asi ngozvapi zviro zvaanorangarira acito atema civaringo ici?

15. Mukuzwirana na Ruka 12:47, 48, ngocapi ciro cokutanga cinorangarihwa ndi Jehovha paanotema civaringo co kuregerera mundhu?

¹⁵ Ciro cokutanga cinorangarihwa ndi Jehovha paanotema civaringo co kuregerera, ndi paya po kuti mushaishi waita zvakashata ecizviziva. Jesu wakanasa kujekesa izvi, inga zvatinovona pana Ruka 12:47, 48. (Verenganyi.) Mundhu paanorangarira kuita ciro  cicikatendehwi ndi Mwari ngokuti cakashata asi wociita, anonga waita cishaishi cikuru. Jehovha angatotema civaringo co kutama kuregerera mundhu wondhowo. (Marko 3:29; Johani 9:41) Asi tingatonanga kuti nguva jimweni tingatoita ciro, perapo tozwisisa kuti zvotakaitaro zvakashata. Kunanga kuti Jehovha anotiregerera pa mugariro wakadari? Hina. Ngokuti pano ciro cimweni cinorangarihwa ndi Jehovha paanotema civaringo co kutiregerera.

16. Kukhauya icinyi? Ngenyi kunosisira kudari tecida kuregerehwa ndi Jehovha?

¹⁶ Ciro cimweni cinorangarihwa ndi Jehovha paanotema civaringo co kuregerera mundhu ngo co kuvona dangani iyena wakhauyadi kamare ngo mwoyo wese kana kuti haiwa. Waro kukhauya kunorevenyi? Kukhauya kunoreva “kucinja manera okurangarira no zviito zvo mundhu.” Kunobatanija mazwiro okusuruvara ngo zviro zvakashata zvaakaita kana kusuruvara ngo kutama kuita zviro zvakanaka zvaaidikana kuita. Mundhu wakhauya anosuruvara kuciripi ngo zviro zvakashata zvaakaita asi ngokuti iyena wakatendera kuti ushamwari hwake na Jehovha urembe wogumira pa kuita zvakashata. Ceukijanyi kuti Mambo Manasa na Dhavhidhi vakaita zvishaishi zvakashatisisa kamare. Asi Jehovha wakavaregerera ngokuti ivona vainga vakhauya ngo mwoyo wese. (1 Majimambo 14:8) Hina, Jehovha anovona kamare dangani itusu takhauya kuti akwanise kutiregerera. Asi kusuruvara ngo zvishaishi zvotakaita akukwani kuti iyena atiregerere. Tinodikana kuita ciri cese. * Izvi zvinotiita kuti tivone ciro cimweni cinorangarihwa ndi Jehovha acito aregerera mundhu.

17. Kucinja icinyi? Ngenyi kunosisira kudari itusu aticadi kuitazve zvishaishi zvotakaitaya kare? (Isaia 55:7)

¹⁷ Ciro cimweni cinosisira cinosoteseswa ndi Jehovha acito aregerera mundhu i kuvona dangani mundhuwo wacinja. Kucinja kunoreva “kutendeuka.” Ngo magama amweni, mundhu angacinja ngo kusiya kuita zvakashata, wotanga kupona mu njira inodakajisa Jehovha. (Verenganyi Isaia 55:7.) Mundhu  anodikana kucinja murangariro wake kuti atange kutungamirihwa ngo murangariro ja Jehovha. (Varoma 12:2; Vaefeso 4:23) Iyena anodikana kusiya kuita zviro zvakashata ngo murangariro no zviito. (Vakorose 3:7-10) Zvokadi kamare, rutendo hwedu ku muripo wa Jesu, hunosisira maningi kuti Jehovha aregerere zvishaishi zvedu. Jehovha anozotiregerera wakacijikira pa muripo uwu, kudari akavona kuti itusu tiri kuita zvese zvatinokwanisa kuti ticinje mufambiro wedu.—1 Johani 1:7.

18. Ngozvapi zvotavona pa jijo iyi ngo pamusoro po kuregerera ka Jehovha?

¹⁸ Ngatende tihwirijire mafundo manganani anosisira otabhuya mbhera wari. Jehovha ndiyena muezaniso mukuru wo mundhu anoregerera pasi pano no mudenga. Ngenyi tingananga zvondhozvo? Cokutanga, iyena nguva jese wakanasiririka kuti atiregerere. Cocipiri, iyena anoziva zviro zvese ngo pamusoro pedu. Anonasa kutiziva kamare, anozivazve dangani itusu takhauya ngo mwoyo wese kana kuti haiwa. Cocitatu, Jehovha paanotiregerera zvinodari inga kuti atizivi kumboshaisha. Izvi zvinotiita kuti tive no hana yakacena, tovazve tecitendehwa ndiyena.

19. Pikija atizivi kukwana no kuenderera mberi teciita zvakashata, ngenyi tingadakara?

¹⁹ Zvokadi kamare, zvecivoneka kuti itusu atizivi kukwana, tinozoenderera mberi tecishaisha. Asi tingaembezehwa ngo magama atinowana mu bhuku Estudo Perspicaz vhorume 1 pheji 210, anonanga kudari: “Zvecivoneka kuti Jehovha ngo unyasha hwese anoziva kurembejeka ko vashandiri vake, ivona avadikani kuviga bundu ngo ndava yo zvishaishi zvavakaita ngo kutama kukwana kwavo. (Nduyo 103:8-14; 130:3) Kudari ivona vakaenderera mberi veciteveja zvinoda Jehovha vangadakara ndizvona. (Vafiripi 4:4-6; 1 Johani 3:19-22).” Izvi zvinovangisa maningi.

20. Muvhunjo japi jatinozodavira pa musoro unotevera?

²⁰ Tinobonga maningi Jehovha ngokuti iyena wakanasiririka kuti atiregerere patinonga takhauya ngo mwoyo wese pa zvishaishi zvotakaita. Waro tingatevejeresa kudini kuregerera ka Jehovha? Mu njira japi kuregerera kwatinoita kwakaezana no kuregerera ka Jehovha? Asi ikona kwakasiyana papi? Ngenyi zvinosisira kuzwisisa musiyano uu? Musoro unotevera unozodavira muvhunjo iji.