1. Ngera el klemerang a lolekoi er ngii a King Salomon el ngar er a Olisechakl 7:20?

 A KING Salomon a dilu el kmo: “Ng meral diak a tal chad er a beluulchad el di ungil omerellel el diak a tal le mekngit er ngii.” (Oli. 7:20) Ngmera el uaisei! Kid el rokui a di uldiukes er a klengit. (1 Jn. 1:8) Me kede ousbech a klausubes er a Dios me a rechad.

2. Ngua ngera uldesuem sel lousubes er kau a sechelim?

² Ke locha sebechem el melatk er a taem el mtilemellii a rengul a sechelim. Ngmle soam el sumechii a deleuill er kemiu me kullengit a klausubes er ngii. Ngmlo uangerang a uldesuem er a lousubes er kau? Ke mlo omelechesiu er kau el mla mo kebekakl? Chochoi, e locha kmal mle dmeu a rengum el dirrek!

3. Ngera kede mo mesaod er tia el suobel?

³ Ngsoad a Jehovah a bo le ngike el kot el kmeed el Sechelid me nguaisei engdi ngngar ngii aike el taem el de dilu me a lechub e kede riruul a tekoi el tomellii a rengul. Engdi ngngera uchul me ngulterekokl a rengud el kmo a Jehovah a kmal soal lousubes er kid? Ngera klekakerous er sel lousubes er kid a Jehovah er sel kid ousubes er a rechad? E techa sebechel nguu a klausubes er a Dios?

4. Ngera uchul me ngsebechel el mo ulterekokl a rengud el kmo, a Jehovah a kltmokl el ousubes?

⁴ A Tekingel a Dios a olterekokl er a rengud el kmo a Jehovah a kltmokl el ousubes. A Jehovah milsaod el kirel el mora  Moses er a Rois Sinai loeak a anghel el kmo: “Ngak ngii el RUBAK el Dios el mui er a blekokuii ma klechubechub, el diak le mereched el ngmasech a renguk, e olecholt er a blechoel bltikerreng ma blakerreng. Ak ultaut er a telbilek el mor a re betok el telael el chad e ousubes a chelebirukel, ma teluchakl, ma klengit.” (Exo. 34:6, 7) A Jehovah chubechub e ungil a blekerdelel Dios el kmal kltmokl el mo ousubes er tirke el obult er a kngterir.​—Neh. 9:17; Psa. 86:15.

5. A doltirakl er a Psalm 103:13, 14, a klemedengei er a Jehovah el kired, ngrullii el mo mekerang?

⁵ Jehovah el Ulemeob er kid a medengei a rokui el tekoi el kired. Ka di molatk! Ngmera el mechas a rengud e le ngii a medengei a rokui el kirir a rederta el chad er tia el beluulechad. (Psa. 139:15-17) Me ngsebechel mes a blekeradel el dengilai er a rechad er a blid. Me a lmuut kung, ngmedengei aike el tekoi el dilubech er a klengar er kid el luchul me nguaisei a blekerdeled er chelechang. A klemedengei er a Jehovah el kired ngrullii el mo mekerang? Ngrullii el mo olecholt a klechubechub el mei er kid.​—Psa. 78:39; monguiu er a Psalm 103:13, 14.

6. Ngmekera Jehovah e mla ochotii el kmo ngkmal kltmokl el ousubes?

⁶ A Jehovah mla ochotii el kmo ngkmal kltmokl el ousubes. Ngmedengei el kmo ngkngtil ngike el kot el chad el Adam a uchul me kede mla medebeakl er a klengit me a kodall. (Rom 5:12) Ngkmal diak a rolel e dengebtid me a lechub e dengebteterir a rebebil er tia el dellebeakl. (Psa. 49:7-9) Me nguaisei engdi a Dios er kid er a bltikerreng ulechotii a klechubechub er a leketmeklii a rolel e bo demimokl er ngii. Ngmilekerang? A Johanes 3:16 ochotii el kmo ngulderechii a di ta el Ngelekel el me mad el kired. (Mt. 20:28; Rom 5:19) A Jesus a mlad el kirir a rechad me bo lsebechir tirke el olecholt a klaumerang er ngii el mo mimokl. (Heb. 2:9) Ngkol uangerang el ringel a lulemelechesiu er ngii a Jehovah er a lomes er a Ngelekel el mad er a meringel el kodall! Me a Jehovah diak bo lebecherei a Ngelekel me lemad a lemlak el soal lousubes er kid.

7. Ngera bebil ocholt er a Biblia er a rechad el Jehovah uluusubes er tir?

⁷ A Biblia betok er ngii omesodir a rechad el Jehovah kilengei el ousubes er tir. (Efe. 4:32) Ngtecha mora uldesuem? Ke  locha melatk er a King Manase. Ngika el kmal mekngit el chad a riruul a oberaod el klengit el lomtok er a Jehovah. Ngika millisiich a klsuul omengull. Ngmilekodeterir a rengelekel el tenget el mora reklsuul el chelid. E rirellii a bleob el chelid e otungii er a chedaol templo er a Jehovah. A Biblia melekoi el kirel el kmo: “Ng mirruul a betok el mekngit el kmal ulengeschii a rengul a RUBAK.” (2 Kr. 33:2-7) Me nguaisei engdi a Jehovah uluusubes er ngii er a lochotii el kmo ngmla obult. Ngdirrek el liluut el msa kleking. (2 Kr. 33:12, 13) Ke locha dirrek el mo melatk er a King David el riruul oberaod el klengit el omtok er a Jehovah el ngii a uldimukl er ngii a laokreng me a omekoad er a rechad. Me nguaisei engdi Jehovah a mle kltmokl lousubes er ngii er a louchais a kngtil e lobult. (2 Sa. 12:9, 10, 13, 14) Chochoi, ngmeral sebechel el mo ulterekokl a rengud el kmo a Jehovah a kmal kltmokl el ousubes. E ua bo desang, ngkmal ileakl er a rechad a rolel a lousubes.

8. Ngmekera deruchellel a Jehovah el chad er a kerrekeriil e ngar ngii a lerellii er a rolel a lousubes?

⁸ A Jehovah “ngikel oukerrekeriil er a beluulchad el rokir.” (Gen. 18:25) A ungil chad er a kerrekeriil a kirel lungil medengelii a llach. Tia kmal klemerang el kirel a Jehovah e le ngika diak di lechad er a kerrekeriil ngdirrek el ngike el omeskid a llach. (Isa. 33:22, NW) Ngdiak a medengelii a ungil me a mekngit el ua Jehovah. Ngera dirrek el usbechall er a ungil chad er a kerrekeriil? Ngkirel mo medengei a rokui el tekoi el dilubech er a uchei er a lerellii a kerrekerilel. Me a Jehovah ngike el kot el ungil chad er a kerrekeriil e le ngii a medengei a rokui el tekoi.

9. Ngerang ngmedengei a Jehovah el ngosukii el mo ousubes er a chad me a lechub e ngdiak?

⁹ A Jehovah a diak el ua rechad el loukerrekeriil e le ngii a medengei a rokui el tekoi el dilubech. (Gen. 18:20, 21; Psa. 90:8) Ngdiak el ua rechad el di medengei a tekoi el leues e remenges. Ngkmal medengei el kmo a chad a ngar ngii a blekerdelel el lengilai er a delal me a demal, blekerdelel el uaisei le ngulekurulel a uchul, me a basio el lekiei er ngii me a dirrek el secherel a uldesuel me a rengul a uchul a bebil blekerdelel. A Jehovah a dirrek el menguiu a reng. Ngkmal ungil medengelii a moktek er a rechad e meruul a tekoi. Ngdiak a ngerang el lobart er ngii. (Heb. 4:13) Me a Jehovah ousubes er a chad e le ngii el medengei a rokui el tekoi el dilubech.

10. Ngera uchul me ngsebeched el melekoi el kmo a kerrekerilel a Jehovah a blechoel el melemalt? (Duteronomi 32:4)

¹⁰ A kerrekerilel a Jehovah a blechoel el melemalt. Ngdiak longetukel. A klausubes er ngii a diak lultuil er osengel er a chad er a ikrel, kerruul, klengarbab er ngii, me a lechub e ngduch er ngii. (1 Sa. 16:7; Jak. 2:1-4) A Jehovah diak el sebechel morrimel me a lechub e ngmecheluch el mo meruul er a tekoi. (2 Kr. 19:7) Ngdiak lechecherd a rengul me a lechub el lerurt er a soal sel loruul a tekoi. (Exo. 34:7) Klemedengei er a Jehovah a uchul me ngii ngike el kot lungil chad loukerrekeriil.​—Monguiu er a Duteronomi 32:4.

11. Ngera uchul me a rolel a Jehovah a lousubes a kmal ileakl?

¹¹ Tirke el milluches aike el Bades el tekoi er a Hebru a miltebengii el kmo a rolel a Jehovah lousubes a kmal ileakl. A lebebil te ousbech er a tekoi er a Hebru el losaod er ngii a ta el reference el kmo, “tia el tekoi a di dousbech er ngii el mesaod er a rolel a Dios a ousubes er a chad el mlora klengit, e kmal diak  dousbech er ngii el mesaod er a rolel a chad a lousubes er a ta er a chad.” Ngdi ta el Jehovah a ngar ngii a klisichel smuld el mo diak a kngtil a chad lobult. Ngera duubech sel lousubes er kid a Jehovah?

12-13. (a) Ngera ngmo omelechesiu a chad sel lousubes er ngii a Jehovah? (b) A Jehovah ngousubes a kngtid el mo oingerang?

¹² Sel dekengei el kmo a Jehovah a mla ousubes er kid e kede mo melechesuar a “blsechel omelisiich” el ngii a uldimukl er ngii a budech el uldasu me a klikiid el uklatk. Chouaitia el klausubes a diak el sebeched el nguu er a rechad ngdi sebeched el nguu “er a Jehovah.” (Rel. 3:19, NW) A Jehovah sel lousubes er kid e nglmuut el toketekii a deleuill er ngii me kid el mo ua sera dimlak dengar er a klengit.

¹³ A Jehovah sel lousubes a kngtid e ngkmal diak el lluut el mo oukerrekeriil er kid me a lechub e lomals er kid el kirel. (Isa. 43:25; Jer. 31:34) Jehovah a mengeroid a kngtid er kid “el ua cherridel a delongelel ongos ma ngebard.” * (Psa. 103:12) Sel dolatk er a rolel a Jehovah lousubes a kngtid e ngkmal rutechii a rengud e rullid el moba omereng el saul. (Psa. 130:4) Engdi ngtecha sebechel mo nguu tia el klausubes er a Jehovah?

14. Ngngera kede mla suub el kirel a rolel a Jehovah lolilt el mo ousubes?

¹⁴ Ngua bla desang, a Jehovah diak lolilt el mo ousubes loltirakl er a klungel a klengit el mirruul. Kede dirrek el mla mesa el kmo a Jehovah ousbech er a klemedengei er ngii el Ulemeob, ngike el omeskid a llach, e chad er a kerrekeriil el melilt el kmo, ngmo ousubes er a chad me a lechub e ngdiak. Engdi ngngera el tekoi a lolatk a Jehovah sel lorriter er a kmo ngmo ousubes er a chad me a lechub e ngdiak?

15. Ngua losaod a Lukas 12:47, 48, ngera ta er a tekoi el lolatk er ngii a Jehovah sel lorriter er a mo ousubes er a chad?

¹⁵ A ta er a tekoi el lolatk er ngii a Jehovah a kmo ngike el chad el mlora klengit, ngmle medengei el kmo a tekoi el loruul er ngii a mekngit? A Jesus a mileketeklii tiang el ngar er a Lukas 12:47, 48. (Monguiu.) A chad el durengul el mo meruul er a mekngit el  ouketui a Jehovah, a rullii a oberaod el klengit. Tia kengaol e le Jehovah sebechel melilt el diak bo lousubes er ngii. (Mk. 3:29; Jn. 9:41) Nguaisei, kede locha di bleketakl el melekoi el kmo kede medengei el kmo tekoi el derirellii a mekngit. Ngar ngii omelatk el kmo kede mo musubes? Chochoi! E tiakid a dirrek el ta er a tekoi el lolatk er ngii a Jehovah.

16. Ngngera bulterreng, e ngera uchul me tia kmal klou a ultutelel a lsoad a Jehovah a lousubes er kid?

¹⁶ A dirrek el ta er a tekoi el lolatk er ngii a Jehovah a kmo, a chad e ngmera el mla obult. Ngera belkul a bulterreng? A bulterreng a belkul a kmo, “kede ngodechii a uldesued, rengud, me a moktek er kid.” A uldimukl er ngii, a chad a kirel ouuchel er a rengul e mekngit a rengul el kirel a mekngit el leriruul me a lechub e ngtekoi el dimlak leruul. A chad lobult a diak di lemekngit a rengul el kirel a mekngit el leriruul e ngdirrek el kmal mekngit a rengul le ngii el milecherei a deleuill er ngii me a Jehovah me ngmlo mechitechut luchul me ngmlo remuul aika el tekoi. Molatk el kmo a King Manase me a David a riruul a kmal oberaod el klengit engdi Jehovah uluusubes er tir e le te ulebult er a kngterir. (1 Ki. 14:8) Nguaisei, a Jehovah kirel mes olechotel a bulterreng e seikid e ngmo ousubes er kid. Engdi ngdiak el sebeched el di ouuchel er a rengud el kirel a klengit el deriruul. Ngngar ngii a tekoi el kired el kltmokl el mo meruul. * Tia dirrek el ta er a tekoi el lolatk er ngii a Jehovah.

17. Ngera ngkirel meruul a chad me bo lsebechel kiei el oltirakl er a soal a Jehovah? E ngera uchul me ngkirel meruul el uaisei a lsekum e ngdiak el soal lmuut el mo meruul a klengit lurruul? (Isaia 55:7)

¹⁷ A dirrek el ta er a tekoi el lolatk er ngii a Jehovah a kmo, ngika el chad ngmla stob el meruul a mekngit e kiei el loltirakl er a soal. (Monguiu er a Isaia 55:7.) A chad a kirel ngodechii a uldesuel el mo oltirakl er a uldesuel a Jehovah. (Rom 12:2; Efe. 4:23) Ngkirel rullii er a rengul a choitii a mekngit el rolel a uldasu me a omeruul el lemla er ngii. (Kol. 3:7-10) Nguaisei, a uchetemel a klausubes er a Jehovah me a omengikiid er kid er a klengit a klaumerang er kid er a tengetengel a Kristus.  A Jehovah mo ousubes er kid el loltirakl er tia el tenget sel lesa el kmo kede meringel el oureor el melodech omerelled.​—1 Jn. 1:7.

18. Ngera kede mla smaod el kirel a rolel a Jehovah a lousubes?

¹⁸ Me de review a bebil er aike el meklou a ultutelel tekoi el dulsaod. A Jehovah ngike el kot el ngarbab lousubes. Ngera uchul me ngsebeched el melekoi el uaisei? A kot, e ngii a kltmokl el ousubes. Ongerung, ngika ngkmal ungil medengei a rokui el tekoi el kired. E ngii ngike el ungil medengei el kmo kede mera el mla obult me a lechub e ngdiak. Me a ongedei, a Jehovah sel lousubes e ngsmuld a rokui el kngtid. Tia uchul me ngsebechel klikiid a ukltked e oba kengei er ngii.

19. Alta ngdiak demecherrungel me kede mo remuul a cheleuid, engdi ngera uchul me ngsebechel mo dmeu a rengud?

¹⁹ Nguaisei, ngdiak demecherrungel me kede mo remuul a cheleuid. Me nguaisei engdi ngsebechel mechelaod a rengud er a tekoi el debetik er a Insight on the Scriptures, Volume 2, er a 771 el llel: “A Jehovah loba klechubechub el melatk a chelitecheterir a remesiungel a uchul me ngdiak el kirir el di mekngit a rengrir el kirel a cheleuid el leriruul le tir el diak el mecherrungel. (Psa 103:8-14; 130:3) A lsekum te mora tkurrebab el sebechir el loltirakl a rolel, e ngsebechir el mo dmeu a rengrir. (Fil 4:4-6; 1Jn 3:19-22).” Tia kmal melisiich er kid!

20. Ngngera kede mo mesaod er a ongingil suobel?

²⁰ Kede kmal oba omereng el saul le Jehovah a kltmokl el mo ousubes er kid sel douuchel er a rengud el kirel a kngtid. Engdi ngmekera sebeched loukerebai er a rolel a Jehovah a lousubes? Ngoeak a ngera rolel e a klausubes er kid osisiu er a Jehovah, e oeak a ngera el rolel e ngkakerous? Ngera uchul me ngklou a ultutelel a bo dodengelii a klekakerous? A ongingil suobel a mo onger aika el ker.