مطالعے دا مضمون نمبر 24
یہوواہ—معاف کرن دی سب توں ودھیا مثال
اَے یہوواہ توں بھلا ایں تے معاف کرن لئی تیار رہنا ایں تے اوہناں لئی بڑی شفقت وکھانا ایں جیہڑے تیرے کولوں دُعا کردے نیں۔—زبور 86:5۔
گیت نمبر 42: خدا دے خادم دی دُعا
مضمون تے اِک نظر a
1. واعظ 7:20 چ بادشاہ سلیمان نے کیہڑی سچائی دَسی؟
بادشاہ سلیمان نے لکھیا: زمین تے ایہو جیہا کوئی نیک انسان نئیں جیہڑا ہمیشاں صحی کم کرے تے کدی گُناہ نہ کرے۔ (واعظ 7:20) ایہہ گل بالکل سچ اے۔ گُناہگار ہون دی وجہ توں سانوں ساریاں نُوں خدا تے دُوجے انساناں توں معافی دی ضرورت ہوندی اے۔—1-یوحنا1:8۔
2. جدوں ساڈا کوئی قریبی دوست سانوں معاف کر دیندا اے تے سانوں کیہو جیہا لگدا اے؟
2 یقیناً توانوں کوئی ایہو جیہا وقت یاد ہوئے گا جدوں تُسی اپنے کسے قریبی دوست دا دل دُکھایا سی۔ تُسی معاملے نُوں حل کر کے اپنی دوستی نُوں بچانا چاہندے سو ایس لئی تُسی اوہدے توں دلوں معافی منگی۔ جدوں تواڈے دوست نے توانوں معاف کر دِتا تے توانوں کیہو جیہا لگیا؟ یقیناً تواڈے دل توں بوجھ ہٹ گیا ہوئے گا تے توانوں بڑی خوشی مِلی ہوئے گی۔
3. ایس مضمون چ اَسی کیہہ کیہہ سکھاں گے؟
3 اَسی چاہنے آں کہ یہوواہ ساڈا سب توں قریبی دوست ہووے۔ پر کدی کدی اَسی کجھ ایہو جیہا کہہ دینے آں یاں کر دینے آں جدی وجہ توں یہوواہ دُکھی ہوندا اے۔ ایس مضمون چ اَسی ویکھاں گے: اَسی ایہہ یقین کیوں رکھ سکنے آں کہ یہوواہ سانوں معاف کرنا چاہندا اے؟ یہوواہ دے معاف کرن چ تے انساناں دے معاف کرن چ کیہہ فرق اے؟ نالے آخر چ اَسی ویکھاں گے کہ یہوواہ کِنہاں نُوں معاف کردا اے؟
یہوواہ معاف کرن لئی تیار رہندا اے
4. اَسی ایہہ یقین کیوں رکھ سکنے آں کہ یہوواہ سانوں معاف کرن لئی تیار رہندا اے؟
4 خدا دے کلام چ سانوں یقین دَوایا گیا اے کہ یہوواہ سانوں معاف کرن لئی تیار رہندا اے۔ کوہِسینا تے یہوواہ خدا نے اِک فرشتے دے ذریعے موسیٰ نبی نُوں ایہہ کہیا: یہوواہ، یہوواہ، رحمدل تے مہربان خدا۔ غصہ کرن چ دھیما تے شفقت تے وفا چ غنی۔ تے ہزاراں تے فضل کرن والا۔ گُناہ تے غلطی تے خطا بخشن والا۔ (خروج 34:6، 7) یہوواہ بڑا شفیق تے رحمدل اے تے اوہ اوہناں لوکاں نُوں ہمیشاں معاف کرن لئی تیار رہندا اے جیہڑے اپنے گُناہواں توں دلوں توبہ کردے نیں۔—نحمیاہ 9:17؛ زبور 86:15۔
یہوواہ جان دا اے کہ ساڈے نال زندگی چ کیہہ کجھ ہویا اے تے ایہدا ساڈی شخصیت تے کیہہ اثر پیا اے۔ (پیراگراف نمبر 5 نُوں ویکھو۔)
5. زبور 103:13، 14 دے مطابق سانوں چنگی طرحاں جانن دی وجہ توں یہوواہ کیہہ کرن لئی تیار رہندا اے؟
5 یہوواہ نے سانوں بنایا اے ایس لئی اوہ ساڈی رَگ رَگ توں واقف اے۔ ذرا سوچو، یہوواہ زمین تے رہن والے ہر انسان بارے سب کجھ جان دا اے۔ (زبور 139:15-17) ایس لئی اوہ ویکھ سکدا اے کہ سانوں اپنے ماں پیو وَلّوں کیہڑے کیہڑے عیب ملے نیں۔ یہوواہ ایہہ وی جان دا اے کہ ساڈے نال زندگی چ کیہہ کجھ ہویا اے تے ایہدا ساڈی شخصیت تے کیہہ اثر پیا اے۔ انساناں نُوں چنگی طرحاں جانن دی وجہ توں اوہ کیہہ کرن لئی تیار رہندا اے؟ اوہ اوہناں تے رحم کرن لئی تیار رہندا اے۔—زبور 78:39؛ زبور 103:13، 14 نُوں پڑھو۔
6. یہوواہ نے کیویں ثابت کیتا اے کہ اوہ سانوں معاف کرنا چاہندا اے؟
6 یہوواہ جان دا اے کہ پہلے انسان آدم دے کماں دی وجہ توں اَسی سارے گُناہگار بن گئے تے ایسے وجہ توں اَسی مرنے آں۔ (رومیوں 5:12) ساڈے وچوں کوئی وی انسان سانوں گُناہ تے موت دی لعنت توں آزاد نئیں کرا سکدا سی۔ (زبور 49:7-9) پر ساڈے شفیق خدا نے ساڈے تے رحم کیتا تے سانوں ایس لعنت توں چھڈان دا بندوبست کیتا۔ اِنج اوہنے ثابت کیتا کہ اوہ سانوں معاف کرنا چاہندا اے۔ یوحنا 3:16 چ دَسیا گیا اے کہ اوہنے اپنے اکلوتے پُتر نُوں زمین تے گھلیا تاکہ اوہ ساڈے لئی اپنی جان قربان کر دَوے۔ (متی 20:28؛ رومیوں 5:19) یسوع مسیح نے ساڈی خاطر دردناک موت سہی تاکہ جیہڑا وی اوہدے تے ایمان لیاوے اوہ موت دی لعنت توں آزاد ہو سکے۔ (عبرانیوں 2:9) ذرا سوچو کہ یہوواہ نُوں اوہدوں کِنّاں دُکھ ہویا ہوئے گا جدوں اوہدے پیارے پُتر نُوں بےعزت کیتا گیا تے بےرحمی نال مار دِتا گیا۔ یقیناً جے یہوواہ سانوں معاف نہ کرنا چاہندا تے اوہ کدی وی اپنے پُتر نُوں مرن نہ دیندا۔
7. یہوواہ نے کِنہاں نُوں کُھلے دل نال معاف کیتا؟
7 بائبل چ ایہو جہے بوہت سارے لوکاں بارے دَسیا گیا اے جنہاں نُوں یہوواہ نے کُھلے دل نال معاف کیتا۔ (اِفسیوں 4:32) شاید تواڈے ذہن چ بادشاہ منسّی آیا ہوئے۔ اوس بھیڑے بادشاہ نے بوہت ای وڈے گُناہ کیتے۔ اوہنے بُتاں دی عبادت کیتی تے دُوجیاں نُوں وی اِنج کرن دی ہلاشیری دِتی۔ اوہنے تے جھوٹھے دیوتاواں دے اَگے اپنے بچیاں تک نُوں قربان کر دِتا تے یہوواہ دی پاک ہیکل چ اِک بُت وی بنوایا۔ منسّی بارے بائبل چ لکھیا اے کہ اوہنے یہوواہ دی نظر چ بڑی بدکاری کیتی تے اوہنوں غصہ دَوایا۔ (2-تواریخ 33:2-7) پر جدوں منسّی نے اپنے گُناہواں توں دلوں توبہ کیتی تے یہوواہ نے اوہنوں معاف کر دِتا، ایتھوں تک کہ یہوواہ نے اوہنوں فیر توں بادشاہ بنا دِتا۔ (2-تواریخ 33:12، 13) شاید تواڈے ذہن چ بادشاہ داؤد وی آیا ہوئے جنہے حرامکاری تے قتل ورگے وڈے گُناہ کیتے۔ پر جدوں اوہنے دلوں اپنے گُناہواں توں توبہ کیتی تے اپنی غلطی من لئی تے یہوواہ نے اوہنوں وی معاف کر دِتا۔ (2-سموئیل 12:9، 10، 13، 14) ایہناں مثالاں توں پتہ چلدا اے کہ یہوواہ انساناں نُوں معاف کرنا چاہندا اے۔ ہُن اَسی ویکھاں گے کہ یہوواہ تے انساناں دے معاف کرن چ کیہہ فرق ہوندا اے۔
یہوواہ معاف کرن چ بےمثال اے
8. یہوواہ اِنصاف کرن چ بےمثال کیوں اے؟
8 یہوواہ ساری دُنیا دا انصاف کرن والا خدا اے۔ (پیدایش 18:25) انصاف کرن لئی اِک جج نُوں قانوناں توں چنگی طرحاں واقف ہونا چاہی دا اے۔ یہوواہ توں بہتر قانوناں بارے ہور کوئی نئیں جان دا کیونکہ ساری کائنات لئی اوہنے ای قانون بنائے نیں۔ (یسعیاہ 33:22) اوہ ہمیشاں انصاف نال فیصلے کردا اے کیونکہ صحی تے غلط بارے اوہدے توں بہتر ہور کوئی نئیں جان دا۔ ایہدے علاوہ صحی فیصلے کرن لئی اِک جج چ ہور کیہڑی خوبی ہونی چاہی دی اے؟ اوہنوں کسے مُقدمے دا فیصلہ سُنان توں پہلاں معاملے دی ساری حقیقت نُوں سمجھنا چاہی دا اے۔ یہوواہ نُوں ہمیشاں ساری سچائی پتہ ہوندی اے ایس لئی اوہ اِنصاف کرن چ بےمثال اے۔
9. یہوواہ کیہڑیاں گلاں دی بِنا تے کسے نُوں معاف کرن یاں نہ کرن دا فیصلہ کردا اے؟
9 کسے انسانی جج توں اُلٹ یہوواہ معاملے دی ساری حقیقت توں واقف ہوندا اے۔ (پیدایش 18:20، 21؛ زبور 90:8) انسان ہمیشاں اوہناں گلاں دی بِنا تے فیصلہ کردے نیں جیہڑیاں اوہ ویکھدے یاں سُن دے نیں۔ پر یہوواہ پوری طرحاں سمجھدا اے کہ کسے نے کوئی کم کیہڑی وجہ توں کیتا اے۔ اوہ جان دا اے کہ اوس بندے نُوں اپنے ماں پیو توں کیہڑیاں عادتاں ورثے چ ملیاں نیں، اوہدی پرورش کیہو جہے ماحول چ ہوئی اے تے ہُن اوہدے حالات کیہو جہے نیں۔ نالے اوہ اوہدے جذباتاں تے سوچ نُوں وی جان دا اے۔ اوہنوں پتہ ہوندا اے کہ ایہناں ساریاں گلاں دا اوس بندے دے کماں تے کیہہ اثر پیندا اے۔ یہوواہ اوہدے دل نُوں وی پڑھ سکدا اے ایس لئی اوہ جان دا اے کہ کسے نے کوئی کم کیہڑی نیت یاں ارادے نال کیتا اے۔ یہوواہ دی نظر توں کوئی وی چیز لکی ہوئی نئیں اے۔ (عبرانیوں 4:13) ایس لئی جدوں اوہ کسے نُوں معاف کرن دا فیصلہ کردا اے تے اوہنوں ہر معاملے بارے پوری گل پتہ ہوندی اے۔
یہوواہ اِنصاف پسند اے تے کسے دی وی طرفداری نئیں کردا۔ کوئی اوہنوں رشوت نئیں دے سکدا۔ (پیراگراف نمبر 10 نُوں ویکھو۔)
10. اَسی ایہہ کیوں کہہ سکنے آں کہ یہوواہ ہمیشاں اِنصاف نال فیصلہ کردا اے؟ (اِستثنا 32:4)
10 یہوواہ ہمیشاں اِنصاف نال فیصلہ کردا اے۔ اوہ کدی وی کسے دی طرفداری نئیں کردا۔ اوہ کسے نُوں معاف کردے ہوئے اوہدی شکل صورت، دولت، حیثیت تے صلاحیتاں نُوں نئیں ویکھدا۔ (1-سموئیل 16:7؛ یعقوب 2:1-4) یہوواہ تے کوئی وی فیصلہ کرن دا دباؤ نئیں پا سکدا تے نہ ای کوئی اوہنوں رشوت دے سکدا اے۔ (2-تواریخ 19:7) یہوواہ غصے یاں جذبات چ آ کے کوئی فیصلہ نئیں کردا۔ (خروج 34:7) بے شک یہوواہ انصاف کرن چ بےمثال اے کیونکہ اوہ ساڈے بارے تے ساڈے حالاتاں بارے ہر گل جان دا اے۔—اِستثنا 32:4 نُوں پڑھو۔
11. یہوواہ تے انساناں دے معاف کرن چ کیہہ فرق اے؟
11 عبرانی صحیفے لکھن والے چنگی طرحاں جان دے سن کہ یہوواہ جیس طرحاں معاف کردا اے، اوہ انساناں دے معاف کرن توں فرق اے۔ یہوواہ دی معافی بارے لکھدے ویلے اوہناں نے عبرانی زبان دا اِک خاص لفظ استمال کیتا۔ایس لفظ بارے اِک کتاب چ دَسیا گیا اے: ”ایہہ صرف اوہدوں استمال ہویا اے جدوں یہوواہ نے کسے گُناہگار نُوں معاف کیتا اے۔ ایہہ لفظ انساناں دے اِک دُوجے نُوں معاف کرن لئی استمال نئیں ہویا جیہڑے صرف اِک حد تک ای اِک دُوجے نُوں معاف کر سکدے نیں۔“ صرف یہوواہ کول ای اوس گُناہگار نُوں مکمل طور تے معاف کرن دا اِختیار اے جیہڑا دلوں توبہ کردا اے۔ جدوں یہوواہ سانوں معاف کردا اے تے سانوں کیہو جیہا لگدا اے؟
12، 13. (الف) جدوں یہوواہ کسے نُوں معاف کردا اے تے اوس بندے نُوں کیہڑی برکت مِلدی اے؟ (ب) یہوواہ سانوں کیس حد تک معاف کردا اے؟
12 جدوں اَسی ایہہ من لینے آں کہ یہوواہ نے سانوں معاف کر دِتا اے تے سانوں تازگی مِلدی اے یعنی ساڈے دل نُوں سکون مِلدا اے۔ نالے ساڈا ضمیر صاف ہو جاندا اے۔ سانوں ایہو جہی معافی کسے انسان توں نئیں سگوں صرف یہوواہ وَلّوں مل سکدی اے۔ (اعمال 3:19) سانوں معاف کرن دے بعد اوہ ساڈے نال دُبارہ ایس طرحاں دوستی کر لیندا اے جیویں اَسی گُناہ کیتا ای نئیں سی۔
13 جدوں یہوواہ ساڈا گُناہ معاف کر دیندا اے تے اوہ سانوں کدی وی دُبارہ اوہدا احساس نئیں دَواندا تے نہ ای اوہدی سزا دیندا اے۔ (یسعیاہ 43:25؛ یرمیاہ 31:34) اوہ ساڈے گُناہ نُوں اینی دُور سُٹ دیندا اے جِنّاں دُور ”مشرق مغرب توں اے۔“ (زبور 103:12) جدوں اَسی سوچنے آں کہ یہوواہ سانوں کیس حد تک معاف کر دیندا اے تے ساڈا دل شکرگزاری نال بھر جاندا اے۔ (زبور 130:4) پر یہوواہ کِنہاں نُوں معاف کر دا اے؟
یہوواہ کِنہاں نُوں معاف کردا اے؟
14. ہُن تک یہوواہ دے معاف کرن بارے اَسی کیہہ سکھیا اے؟
14 ہُن تک اَسی ویکھیا اے کہ یہوواہ کسے نُوں ایس بِنا تے معاف نئیں کردا کہ اوہدا گُناہ کِنّاں وڈا یاں چھوٹا اے۔ نالے اَسی ویکھیا اے کہ یہوواہ ساڈا خالق، قانون بنان والا تے جج اے۔ ایس لئی اوہدے کول اوہ ساری معلومات ہوندی اے جدی بِنا تے اوہ کسے نُوں معاف کرن یاں نہ کرن دا فیصلہ کردا اے۔ پر ایہہ فیصلہ کرن توں پہلاں یہوواہ کیہڑیاں خاص گلاں تے غور کردا اے؟
15. لُوقا 12:47، 48 دے مطابق یہوواہ کیہڑی گل تے غور کردا اے؟
15 یہوواہ ایس گل تے غور کردا اے کہ کیہہ گُناہ کرن والے نُوں پتہ سی کہ اوہنے جو کیتا اوہ غلط سی؟ ایہہ گل لُوقا چ لکھی یسوع دی گل توں صاف پتہ چلدی اے۔ (لُوقا 12:47، 48 نُوں پڑھو۔) جے کوئی ایہو جیہا کم کردا اے جیہڑا اوہنوں پتہ اے کہ یہوواہ دی نظر چ غلط اے تے اوہ سنگین گُناہ کردا اے۔ ہو سکدا اے کہ یہوواہ اوہنوں معاف نہ کرے۔ (مرقس 3:29؛ یوحنا 9:41) پر کیہہ ایہہ سچ نئیں کہ کدی کدار اَسی کوئی ایہو جیہا کم کرنے آں جیہڑا سانوں پتہ ہوندا اے کہ غلط اے؟ تے فیر کیہہ اَسی ایس گل دی اُمید رکھ سکنے آں کہ یہوواہ ایہو جہیاں غلطیاں معاف کر دَوے گا؟ جی بالکل۔ پر آؤ ویکھئے کہ ایہو جہیاں غلطیاں معاف کرن توں پہلاں یہوواہ ہور کیہڑی گل تے غور کردا اے۔
اَسی پکا یقین رکھ سکنے آں کہ جے اَسی دلوں توبہ کراں گے تے یہوواہ سانوں معاف کر دَوے گا۔ (پیراگراف نمبر 16، 17 نُوں ویکھو۔)
16. (الف) توبہ کرن دا کیہہ مطلب اے؟ (ب) یہوواہ توں معافی پان لئی توبہ کرنا ایناں ضروری کیوں اے؟
16 یہوواہ اِک ہور گل تے وی غور کردا اے کہ کیہہ گُناہ کرن والے بندے نے دلوں توبہ کیتی اے یاں نئیں۔ پر توبہ کرن دا کیہہ مطلب اے؟ ایہدا مطلب اے اپنی سوچ، رویے تے اِرادیاں نُوں بدل لینا۔ ایہدے چ ایہہ وی شامل اے کہ اوس بندے نُوں ایس گل دا دِلی افسوس ہوئے کہ اوہنے غلط کم کیتا اے یاں فیر اوہنے اوہ کم نئیں کیتا جیہڑا اوہنوں کرنا چاہی دا سی۔ توبہ کرن والے نُوں صرف اپنی غلطی تے پچھتاوا نئیں ہوندا سگوں اوہنوں ایس گل دا وی دُکھ ہوندا اے کہ یہوواہ نال اوہدی دوستی کمزور ہو گئی سی جدی وجہ توں اوہنے ایہہ غلط کم کیتا۔ یاد کرو کہ منسّی تے داؤد نے سنگین گُناہ کیتے سن۔ پر یہوواہ نے اوہناں نُوں فیر وی معاف کر دِتا کیونکہ اوہناں دونواں نے دلوں توبہ کیتی سی۔ (1-سلاطین 14:8) یہوواہ کسے نُوں اوہدوں ای معاف کردا اے جدوں اوہ ویکھدا اے کہ اوس بندے نے دلوں توبہ کیتی اے۔ پر اپنے گُناہ تے دُکھی ہونا ای کافی نئیں ہوندا سگوں سانوں اپنے کماں توں ثابت کرنا چاہی دا اے کہ اَسی دلوں توبہ کیتی اے۔ b آؤ ویکھئے کہ ہور کیہڑی چیز دی بِنا تے یہوواہ کسے نُوں معاف کرن یاں نہ کرن دا فیصلہ کردا اے۔
17. (الف) یہوواہ وَل مُڑن دا کیہہ مطلب اے؟ (ب) جے اَسی چاہنے آں کہ اَسی فیر توں اوہی گُناہ نہ کرئیے تے ساڈے لئی اپنے آپ نُوں بدلنا ضروری کیوں اے؟ (یسعیاہ 55:7)
17 یہوواہ ایس گل تے وی غور کردا اے کہ گُناہ کرن والا بندہ اوہدے وَل مُڑیا اے کہ نئیں۔ ایہدا مطلب ایہہ وے کہ اوہنے بُرے کماں نُوں چھڈ دِتا اے تے یہوواہ دی مرضی مطابق زندگی گزارن دی کوشش کر رہیا اے۔ (یسعیاہ 55:7 نُوں پڑھو۔) اوہنوں اپنی سوچ دا رُخ موڑ کے اپنے آپ نُوں پوری طرحاں بدلنا ہوئے گا تے یہوواہ دی سوچ مطابق زندگی گزارنی ہوئے گی۔ (رومیوں 12:2؛ اِفسیوں 4:23) اوہنوں اپنی سوچ تے بُرے کماں نُوں چھڈن دا پکا ارادہ کرنا ہوئے گا۔ (کُلسّیوں 3:7-10) بے شک،سب توں اہم گل جدی وجہ توں یہوواہ سانوں معاف کردا اے اوہ یسوع مسیح دی قربانی تے ساڈا ایمان اے۔ ایس قربانی دی بِنا تے یہوواہ سانوں پاک کر دیندا اے۔ جدوں یہوواہ ویکھدا اے کہ اَسی سچے دل نال اپنے آپ نُوں بدلن دی کوشش کر رہے آں تے ایسے قربانی دی بِنا تے اوہ سانوں معاف کر دیندا اے۔—1-یوحنا 1:7۔
بھروسہ رکھو کہ یہوواہ سانوں معاف کر دَوے گا
18. اَسی یہوواہ وَلّوں مِلن والی معافی بارے کیہہ سکھیا اے؟
18 آؤ اوہناں اہم گلاں دی دہرائی کرئیے جیہڑیاں اَسی ایس مضمون چ سکھیاں نیں۔ یہوواہ دُوجیاں نُوں معاف کرن دی سب توں ودھیا مثال اے۔اَسی ایہہ کیوں کہہ سکنے آں؟ پہلی وجہ ایہہ وے کہ یہوواہ معاف کرن لئی ہمیشاں تیار رہندا اے۔ دُوجی وجہ ایہہ وے کہ اوہ ساڈی رَگ رَگ توں واقف اے۔ اوہ جان دا اے کہ ساڈی شخصیت تے کیہڑیاں کیہڑیاں گلاں دا اثر اے۔ نالے اوہ ساڈے دل نُوں پڑھ سکدا اے ایس لئی اوہ ویکھ سکدا اے کہ اَسی سچے دلوں توبہ کیتی اے کہ نئیں۔ تیجی وجہ ایہہ وے کہ جدوں یہوواہ سانوں معاف کردا اے تے اوہ ساڈے گُناہ نُوں اِنج مٹا دیندا اے جیویں کہ اَسی ایہہ گُناہ کیتا ای نئیں سی۔ ایہدی وجہ توں ساڈا ضمیر صاف رہندا اے تے اَسی اوہدے قریب رہ سکنے آں۔
19. بھانویں کہ گُناہگار ہون دی وجہ توں اَسی غلطیاں کردے رہواں گے پر فیر وی اَسی کیہڑی وجہ توں خوش ہو سکنے آں؟
19 جدوں تک اَسی گُناہگار آں اَسی غلطیاں کردے رہواں گے۔ پر سانوں اوس گل توں بڑی تسلی مِلدی اے جیہڑی کتاب ”اِنسائٹ آن دی سکرپچرز“ جِلد نمبر 2، صفحہ نمبر 771 چ لکھی اے: ”یہوواہ بڑا رحمدل اے تے اوہ جان دا اے کہ اوہدے بندیاں کولوں غلطیاں ہوندیاں رہن گیاں۔ ایس لئی سانوں ہر ویلے ایس گل دی وجہ توں دُکھی نئیں رہنا چاہی دا کہ اَسی عیبدار آں تے غلطیاں کرنے آں۔ (زبور 103:8-14؛ 130:3) جے اَسی یہوواہ دی مرضی مطابق چلن دی پوری کوشش کر رہے آں تے اَسی خوش رہ سکنے آں۔ (فِلپّیوں 4:4-6؛ 1-یوحنا 3:19-22) ایس گل توں سانوں واقعی بڑی تسلی مِلدی اے۔
20. اگلے مضمون چ اَسی کیہڑے سوالاں تے غور کراں گے؟
20 اَسی یہوواہ دے بڑے شکرگزار آں کہ جدوں اَسی اپنے گُناہواں توں دلوں توبہ کرنے آں تے اوہ سانوں معاف کر دیندا اے۔ پر جدوں دُوجیاں نُوں معاف کرن دی گل آندی اے تے اَسی یہوواہ دی مثال تے کیویں عمل کر سکنے آں؟ جیس طریقے نال یہوواہ سانوں معاف کردا اے تے جیس طریقے نال اَسی دُوجیاں نُوں معاف کرنے آں اوہدے چ کیہڑیاں گلاں مِلدیاں جلدیاں نیں تے کیہڑیاں گلاں فرق نیں؟ ایس فرق نُوں سمجھنا ضروری کیوں اے؟ ایہناں سوالاں دے جواب اَسی اگلے مضمون چ جاناں گے۔
گیت نمبر 1: یہوواہ خدا دِیاں صفتاں
a یہوواہ اپنے کلام چ سانوں یقین دَواندا اے کہ اوہ اوہناں نُوں معاف کرن لئی تیار اے جیہڑے اپنے گُناہواں توں دلوں توبہ کردے نیں۔ پر فیر وی شاید سانوں کدی کدی لگے کہ اَسی اوہدی معافی دے لائق نئیں آں۔ ایس مضمون چ اَسی ویکھاں گے کہ اَسی ایہہ یقین کیوں رکھ سکنے آں کہ جے اَسی اپنے گُناہواں توں دلوں توبہ کراں گے تے ساڈا اسمانی باپ سانوں ضرور معاف کر دَوے گا۔
b اِصطلاح دی وضاحت: دلوں توبہ کرن دا مطلب اے کہ اَسی اپنی سوچ نُوں بدلئے تے ایس گل تے دلوں پچھتائیے کہ اَسی غلط کم کیتے نیں تے اوہ کم نئیں کیتے جیہڑے سانوں کرنے چاہی دے سن۔ دلوں توبہ کرن والا انسان غلط کماں نُوں چھڈ کے صحی کم کرن لگ پیندا اے۔
