24. ČLANKO PROUČIBASE
O Jehova spremno oprostini
Tu, Jehova, hijan šukar hem spremno hijan te oprostine, pherdo verno mangipaja premalo sare kola rodena tut (PS. 86:5)
ĐILI 42 I molitva ando e Devleso sluga
SOSTAR KA VAĆERA a
1. So o kralj Solomon phenđa ko Propovednik 7:20?
O KRALJ Solomon phenđa: „Nane ki phuv pravedno manuš kova ćerela samo šukar hem niked na grešini“ (Prop. 7:20). Akala lafija tane ćaće. Sare amen grešinaja (1. Jov. 1:8). Odolese, but putija hijam ki situacija so o Devel hem o manuša valjanena te oprostinen amenđe.
2. Sar osetinđan tut ked to amal oprostinđa tuće?
2 Da li setineja tut sar osetinđan tut ked povredinđan te šukar amale? Tu na mangljan odova te rumini tumaro amalipe. Odolese sigurno molinđan le te oprostini tuće. Sar osetinđan tut ked oprostinđa tuće? Sigurno hijan le but bahtalo!
3. Sostar ka vaćera ko akava članko?
3 Amen mangaja o Jehova te ovel amaro amal. Ama, podijekh puti phenaja ja ćeraja diso sova povredinaja le. Odolese, akana ka vaćera ando trin pućiba: Sose šaj te ova sigurna so o Jehova tano spremno te oprostini amenđe? Ko so tano o Jehova averćhane ando manuša ked oprostini? Kase o Jehova oprostini?
O JEHOVA MANGELA TE OPROSTINI
4. Sose šaj te ova sigurna so o Jehova tano spremno te oprostini?
4 Prekalo po Lafi, o Jehova uverini amen soj tano spremno te oprostini amenđe. Ked ki gora Sinaj o Jehova manglja te vaćeri diso pestar e Mojsijese, prekalo jekh anđeo phenđa: „Jehova, Jehova, o Devel soj tano milosrdno hem samilosno, strpljivo, pherdo verno mangipaja hem ćaćipaja, kova mothovi o verno mangipe e hiljadenđe, oprostini o prestupija, i krivica hem o grehija“ (Izl. 34:6, 7). O Jehova tano šukar hem milosrdno Devel kova spremno oprostini okolenđe kola kajinena pe (Nem. 9:17; Ps. 86:15).
O Jehova đanela sa amendar, sar bariljam hem sar odova utičinđa upro amende (Dikh o 5. odlomko)
5. Premalo Psalam 103:13, 14, so o Jehova ćerela odolese so but šukar phenđari amen?
5 O Jehova stvorinđa amen, odolese najšukar đanela save hijam. Ov đanela svako detalji amendar (Ps. 139:15-17). Dikhela sa o mane kola nasledinđam ando amare roditeljija. Isto ađahar, đanela sar bariljam hem sar odova utičinđa upro amende. So o Jehova ćerela odolese so đanela save hijam? Ov spremno oprostini amenđe sose tano milosrdno. (Ps. 78:39; čitin Psalam 103:13, 14.)
6. Sar o Jehova mothovđa so mangela te oprostini amenđe?
6 O Jehova mothovđa so mangela te oprostini amenđe. Ov đanela so ando Adam nasledinđam o greh hem o meribe (Rimlj. 5:12). Amen kokri našti ništa te ćera te oslobodina amen ando odova niti aver manuš šaj te oslobodini amen (Ps. 49:7-9). Ama, odolese o Jehova ćerđa diso te šaj te oslobodini amen. Ko Jovan 3:16 pisini so bićhalđa pe Ćhave, e Isuse, te merel amenđe (Mat. 20:28; Rimlj. 5:19). O Isus ka phene mulo umesto amende te šaj sare kola verujinena upro leste te oven oslobodime ando greh hem meribe (Jevr. 2:9). E Jehovase na hine lokho te dikhel sar oleso Ćhavo merela. Ked na bi mangela te oprostini amenđe, ov sigurno na bi dozvolini o Isus te merel.
7. Kola primerija andi Biblija mothovena amenđe so o Jehova spremno oprostini?
7 Ki Biblija isi but primerija kola mothovena so o Jehova spremno oprostinđa e manušenđe (Ef. 4:32). Da li avela tuće disavo primer ki godi? Šaj razmislineja ando kralj Manasija. Ov hine but lošno manuš hem ćerđa but lošna buća. Služinđa e hovavne devlenđe hem ćhivđa averen te ćeren odova. Čak mudarđa pe ćhaven ađahar so dinđa len sar žrtva e hovavne devlenđe. Ov đelo odobor dur ko po lošnipe so čak ko Jehovaso hram ćhivđa jekhe idole. Ki Biblija pisini so „ćerđa but buća kola hine lošna anglo e Jehovase jaćha hem ađahar marđa lese muj“ (2. Let. 33:2-7). Ama, ked o Manasija ando vilo kajinđa pe aso odova so ćerđa, o Jehova oprostinđa lese. Čak ćhivđa le palem te ovel kralj (2. Let. 33:12, 13). Šaj razmislineja hem ando kralj David. Ov ćerđa preljuba hem naredinđa te mudari pe jekh manuš. Ama, ked priznajinđa so ćerđa hem ked ando vilo kajinđa pe, o Jehova spremno oprostinđa lese (2. Sam. 12:9, 10, 13, 14). Akala hem avera primerija mothovena so o Jehova spremno oprostini. Sar so ka dikha, ked o Jehova oprostini, ov odova ćerela averćhane ando manuša.
O JEHOVA OPROSTINI AVERĆHANE ANDO MANUŠA
8. Sose šaj te phena so o Jehova tano najšukar Sudija kova šaj te oprostini amenđe?
8 O Jehova tano „Sudija andi celo phuv“ (Post. 18:25). Jekh šukar sudija valjani but šukar te penđari o zakon. O Jehova tano baš asavko, odolese so uzo odova soj tano Sudija, ov hem dinđa o zakon (Is. 33:22). Niko pošukar olestar na đanela soj tano šukar, a soj tano lošno. So pana valjani te đanel jekh sudija? Angleder te anel disavi odluka, ov valjani te đanel sa o buća kola tane uključime ki disavi situacija. Odolese šaj te phena so o Jehova tano najšukar Sudija, sose sa đanela.
9. Sostar o Jehova razmislini angleder te oprostini nekase?
9 O Jehova na sudini sar o manuša. Ov uvek haljola sa o buća kola tane uključime ki disavi situacija (Post. 18:20, 21; Ps. 90:8). Na sudini premalo odova so dikhela ja so šunela. Ov đanela so jekh manuš nasledinđa ando pe roditeljija, kobor tano školujimo, sar barilo, kobor šaj te mothovi pe osećanja hem sar haljola o buća. Đanela soj tano olese ko vilo. Sebepi so đanela sose diso ćeraja, amen ništa našti te garava olestar (Jevr. 4:13). Odolese, ked o Jehova nekase oprostini, ov ćerela odova sose but šukar penđari le.
O Jehova pravedno sudini, na dikhela koj tano ko. Ole niko silaja našti ćhivel te ćerel diso hem te del le mito (Dikh o 10. odlomko)
10. Sose šaj te phena so o Jehova uvek pravedno sudini? (Ponovljeni zakoni 32:4)
10 O Jehova uvek sudini pravedno hem niked na dikhela koj tano ko. Olese nane važno da li odova manuš tano šužo, barvalo, da li isi le disavo baro položaj ja kobor tano sposobno (1. Sam. 16:7; Jak. 2:1-4). E Jehova niko našti silaja te ćhivel te ćerel diso ili te del le mito (2. Let. 19:7). Ked anela disavi odluka, upro leste na utičinena samo olese emocije (Izl. 34:7). Ov tano najšukar Sudija, sose but šukar haljola amen hem đanela sa andi amari situacija. (Čitin Ponovljeni zakoni 32:4.)
11. Sar tano o Jehova averćhane ando manuša ked oprostini?
11 O manuša kola pisinđe o hebrejsko deo ando Devleso Lafi haljilje so o Jehova oprostini averćhane ando manuša. Ki jekh knjiga pisini so odola manuša koristinđe jekh hebrejsko lafi „ked pisinđe ando odova so o Jehova oprostini e manušenđe, ama niked na koristinđe le te mothoven i situacija ki koja o manuš oprostini jekhe avere manušese. Odolese so o manuša našti te oprostinen odobor kobor o Jehova šaj.“ Samo o Jehova šaj potpuno te oprostini. Ama, sar upro amende utičini ked o Jehova oprostini amenđe?
12-13. (a) Sar o manuš osetini pe ked o Jehova oprostini lese? (b) Da li o Jehova irini pe ko amare grehija?
12 Ked haljovaja so o Jehova oprostinđa amenđe odova zorjaćeri amen, dela amen mir hem isi amen čisto savest. Jedino ked o Jehova oprostini amenđe, šaj te osetina amen ađahar (Dela 3:19). Ked o Jehova oprostini amenđe, palem ovaja paše oleja, ka phene niked na ćerđam greh.
13 Ked o Jehova oprostini amenđe, ov više na irini pe ko amare grehija hem na kaznini amen sebepi odova (Is. 43:25; Jer. 31:34). Ko oleso Lafi pisini: „Kobor o istok tano dur ando zapad, odobor ov cidela amare prestupija amendar“ b (Ps. 103:12). Odolese ked razmislinaja ando odova kobor o Jehova oprostini amenđe, ćaće hijam but zahvalna (Ps. 130:4). Ama, kase o Jehova oprostini?
KASE O JEHOVA OPROSTINI?
14. So utičini upro Jehova ked odlučini te oprostini amenđe?
14 Sar so dikhljam, ked o Jehova odlučini te oprostini, ov na dikhela kobor tano baro amaro greh. Isto ađahar, dikhljam so ked odlučini da li ka oprostini, ov lela ko obzir sa so đanela amendar sar amaro Stvoritelj, Sudija hem sar okova kova dinđa o zakon. Ama, ando kola buća o Jehova razmislini angleder te oprostini amenđe?
15. Premalo Luka 12:47, 48, andi koja buti o Jehova razmislini angleder te oprostini amenđe?
15 Jekh buti andi koja o Jehova razmislini tani da li o manuš đanđa so odova so ćerđa tano pogrešno. Odolestar o Isus vaćerđa ko Luka 12:47, 48. (Čitin.) Ako jekh manuš planirini te ćerel odova so o Jehova na mangela, tegani ćerela ozbiljno greh. Ki asavki situacija, o Jehova šaj te odlučini te na oprostini odole manušese (Mar. 3:29; Jov. 9:41). Ki aver strana, mora te priznajina so disavo puti đanđam so odova so ćeraja tano pogrešno. Ama, da li šaj te nadina amen so o Jehova ka oprostini amenđe? Ja, odolese so o Jehova razmislini pana disostar.
Amen šaj te ova sigurna so o Jehova ka oprostini amenđe ako ando vilo kajinaja amen (Dikh o 16. hem o 17. odlomko)
16. So značini te kajina amen hem sose valjani te ćera odova?
16 Pana jekh buti andi koja o Jehova razmislini tani da li odova manuš ćaće kajini pe. So značini neko te kajini pe? Odova značini so o manuš „menjini po način sar razmislini hem po stav.“ Odole manušese tano but žao sebepi odova so ćerđa hem sose na ćerđa o šukar buća kola valjanđa te ćerel. Tegani, ov na hine paše e Jehovaja hem sebepi odova ćerđa greh. Ma bistri so o kralj Manasija hem o kralj David ćerđe ozbiljna grehija, ama o Jehova oprostinđa lenđe sose ando vilo kajinđe pe (1. Kralj. 14:8). O Jehova šaj te oprostini amenđe samo ako ko amaro vilo dikhela so ćaće kajinaja amen. c Akana ka dikha pana jekh buti andi koja o Jehova razmislini.
17. So značini te cida amen ando lošna buća hem sose tano važno te na ponovina amare greške? (Isaija 55:7)
17 Pana jekh buti andi koja o Jehova razmislini tani, da li odija osoba cidela pe ando lošna buća hem živini ađahar sar so o Jehova rodela. (Čitin Isaija 55:7.) Oj valjani te menjini po način sar razmislini hem te počmini te razmislini sar o Jehova (Rimlj. 12:2; Ef. 4:23). Valjani palo peste te mukhel sa odova lošno so angleder ćerđa hem sar razmislinđa (Kol. 3:7-10). Ama, te šaj o Jehova te oprostini amenđe, mora te mothova vera ki Isusesi otkupno žrtva. O Jehova ka oprostini amenđe sebepi odija žrtva ked ka dikhel so daja sa amendar te menjina amen (1. Jov. 1:7).
OV SIGURNO SO O JEHOVA KA OPROSTINI TUĆE
18. Kola trin buća sikljiljam ando Jehovaso opraštanje?
18 Đi akana dikhljam nekobor buća. Niko sar o Jehova našti te oprostini. Sose šaj odova te phena? Sar prvo, o Jehova tano uvek spremno te oprostini amenđe. Sar dujto, ov đanela sa amendar, đanela sostar hijam ćerde hem šaj najšukar te dikhel da li ćaće kajinaja amen. Sar trito, ked o Jehova oprostini, ov kosela o greh, ka phene niked na grešinđam. Odolese šaj te ovel amen čisto savest hem te ova paše oleja.
19. Sose šaj te ova bahtale iako hijam nesavršena hem grešinaja?
19 Naravno, sa đi hijam nesavršena amen ka grešina. Ama utešini amen odova so ki jekh amari publikacija (Insight on the Scriptures, 2. tom, str. 771) pisini: „O Jehova tano milosrdno Devel hem đanela so hijam nesavršena. Odolese, na valjani te obeshrabrini amen o osećaj andi krivica sebepi o greh kova ćerđam sose hijam nesavršena (Ps. 103:8-14; 130:3). Ako daja sa amendar te đa ko oleso drumo, ka ova bahtale (Fil. 4:4-6; 1. Jov. 3:19-22).“ Akava šaj ćaće but te ohrabrini amen.
20. Sostar ka vaćera ko aver članko?
20 Amen hijam but zahvalna e Jehovase sose spremno oprostini amenđe ked ando vilo kajinaja amen. Ama, sar šaj hem amen te oprostina sar o Jehova? Soj tano slično ked o Jehova oprostini hem ked amen oprostinaja, a soj tano averćhane? Sose tano važno te haljova odova? Ko aver članko ka vaćera ando akava.
ĐILI 45 O mislija ando mo vilo
a Ko Devleso Lafi pisini so o Jehova spremno oprostini okolenđe kola kajinena pe aso odova so ćerđe. Ama, podijekh puti šaj te mislina so na zaslužinaja odova. Ko akava članko ka dikha, sose šaj te ova sigurna so o Jehova tano uvek spremno te oprostini amenđe ako ćaće kajinaja amen.
b Dikh ki knjiga Približite se Jehovi o 26. poglavlje o 9 odlomko, ki srpsko ćhib.
c OBJASNIME LAFIJA: O lafi „pokajanje“ odnosini pe ko odova so i osoba menjinđa po način sar razmislini hem soj tano olaće ćaće žao aso odova so angleder ćerđa hem aso odova so na ćerđa. O pokajanje kova avela ando vilo dićhola ko odova so ćeraja hem so više na ćeraja odova so angleder ćerđam.
