1. Njengobe kubhalwe embhalweni weMshumayeli 7:20, nguliphi liciniso iNkhosi Solomoni leyalisho?

 INKHOSI Solomoni yatsi: “Kute umuntfu lolungile emhlabeni lohlale enta lokuhle futsi lokungenteki one.” (Shu. 7:20) Lamavi aliciniso! Sonkhe siyona. (1 Joh. 1:8) Ngako sonkhe siyakudzinga kucolelwa nguNkulunkulu nekucolelwa ngulabanye bantfu.

2. Utiva njani nawucolelwe ngumngani wakho?

² Kungenteka usakhumbula ngesikhatsi umvise buhlungu umngani wakho. Bewufuna kusilungisa lesimo, kuze niphindze nibe bangani, ngako wacolisa ngalokusuka enhlitiyweni. Wativa njani ngesikhatsi akucolela? Kwatsi hhemu, futsi wajabula!

3. Sitawucoca ngani kulesihloko?

³ Sifuna Jehova abe nguMngani wetfu lomkhulu, kepha ngalesinye sikhatsi sisho tintfo letimvisa buhlungu nobe sente tintfo letimphatsa kabi. Kodvwa yini lengasenta siciniseke kutsi Jehova uyafuna kusicolela? Ngumuphi umehluko lokhona endleleni Jehova lasicolela ngayo nasendleleni lesicolela ngayo labanye? Ngetulu kwaloko, bobani Nkulunkulu langabacolela?

4. Yini lengasenta siciniseke kutsi Jehova ukulungele kusicolela?

⁴ LiVi laNkulunkulu liyasicinisekisa kutsi Jehova ukulungele  kusicolela. Ngesikhatsi atichaza kuMosi eNtsabeni iSinayi, asebentisa ingilosi, watsi: “NginguJehova, nginguJehova, nginguNkulunkulu lonesihawu neluvelo, lowephuta kutfukutsela futsi lochichima lutsandvo lolucotfo neliciniso, lokhombisa lutsandvo lolucotfo etinkhulungwaneni tetitukulwane, acolele emaphutsa netiphambeko kanye netono.” (Eks. 34:6, 7) Jehova unguNkulunkulu lonemusa nesihawu, lohlale akulungele kucolela toni letiphendvukako.—Neh. 9:17; Hla. 86:15.

5. Ngekusho kweTihlabelelo 103:13, 14, yini Jehova layentako ngenca yekutsi usati kahle?

⁵ Njengobe Jehova anguMdali wetfu, wati konkhe ngatsi. Cabanga nje, uyati kutsi bonkhe bantfu labasemhlabeni bakheke njani. (Hla. 139:15-17) Uyawabona onkhe emaphutsa etfu, langumphumela wesono lesasitfola kubatali betfu. Ngetulu kwaloko, uyakwati loko lokwenteke ekuphileni kwetfu lokusente saba ngulabantfu lesingibo nyalo. Yini Jehova layentako ngenca yekutsi usati kahle? Usikhombisa umusa.—Hla. 78:39; fundza Tihlabelelo 103:13, 14.

6. Jehova ukhombise njani kutsi ufuna mbamba kusicolela?

⁶ Jehova ukhombisile kutsi ufuna mbamba kusicolela. Uyati kutsi sonkhe satfola umphumela wesono nekufa ngenca yaloko lokwentiwa ngu-Adamu. (Rom. 5:12) Bekute indlela yekutsi sitikhulule tsine nobe labanye esonweni nasekufeni. (Hla. 49:7-9) Nobe kunjalo, Nkulunkulu wetfu lositsandzako wasikhombisa luvelo futsi wenta lokutsite kuze sikhululeke. Wentani? Umbhalo waJohane 3:16 usitjela kutsi Jehova watfumela iNdvodzana yakhe lekuphela kwayo kuze isifele. (Mat. 20:28; Rom. 5:19) Jesu wasifela kuze akhulule nobe ngubani lokhombisa kukholwa kuye. (Heb. 2:9) Jehova weva buhlungu kakhulu nakabona iNdvodzana yakhe layitsandzako ifa kabuhlungu nangendlela lelihlazo! Siyaciniseka kutsi Jehova bekangeke avume kutsi iNdvodzana yakhe ife nangabe bekangafuni kusicolela.

7. Ngutiphi letinye tibonelo letiseBhayibhelini tebantfu labacolelwa nguJehova?

⁷ LiBhayibheli linetibonelo letinyenti tebantfu labacolelwa nguJehova. (Ef. 4:32)  Ngubani lomkhumbulako? Kungenteka ucabanga ngeNkhosi Manase. Lendvodza lembi yamvisa buhlungu kakhulu Jehova. Beyihola ekukhonteni kwemanga. Yabulala bantfwana bayo, yanikela ngabo kubonkulunkulu bemanga. Ayigcinanga lapho, yenta lokubi kakhulu ngesikhatsi ibeka sithico sankulunkulu wemanga ethempelini lelingcwele laJehova. Nalikhuluma ngaye, liBhayibheli litsi: “Wenta lokubi emehlweni aJehova ngelizinga lelikhulu kuze amvise buhlungu.” (2 Khr. 33:2-7) Kodvwa ngesikhatsi Manase aphendvuka ngalokusuka enhlitiyweni, Jehova wamcolela. Waze wambuyisela nekutsi abe yinkhosi. (2 Khr. 33:12, 13) Kungenteka ucabanga nangeNkhosi Davide, leyenta tono letinkhulu letifaka ekhatsi kuphinga nekubulala. Nobe kunjalo, ngesikhatsi Davide aphendvuka mbamba futsi alivuma liphutsa lakhe, Jehova wamcolela naye. (2 Sam. 12:9, 10, 13, 14) Ngako, singaciniseka kutsi Jehova ufuna mbamba kusicolela. Njengobe sitawubona, indlela lacolela ngayo ayifani nendlela bantfu labacolela ngayo.

8. Njengobe Jehova anguMehluleli lowehlukile, loko kulitsintsa njani likhono lakhe lekucolela?

⁸ Jehova “unguMehluleli wemhlaba wonkhe.” (Gen. 18:25) Umehluleli lokahle kufanele awati kahle umtsetfo. Jehova unjalo, ngobe ngetulu kwekuba nguMehluleli wetfu, uphindze abe nguMnikimtsetfo wetfu. (Isa. 33:22) NguJehova kuphela lokwati kahle lokulungile nalokungakalungi. Yini lenye ledzingekako ngemehluleli lokahle? Kufanele awati onkhe emaciniso endzaba ngaphambi kwekutsi ehlulele. Ngako Jehova unguMehluleli lokahle kakhulu ngobe uhlale awati onkhe emaciniso endzaba.

9. Ngumiphi imininingwane Jehova lasuke anayo nakancuma kucolela lotsite nobe kungamcoleli?

⁹ Ngalokwehlukile kubehluleli lababantfu, Jehova uhlale awati kahle onkhe emaciniso endzaba. (Gen. 18:20, 21; Hla. 90:8) Akafani nebantfu labehlulela ngaloko labakuvako nobe labakubonako. Uyati kutsi loko umuntfu lakwentako kuya ngelufuto lalutfole kubatali bakhe, indlela lakhule ngayo, lapho akhulele khona, nekutsi utiva njani nangekutsi uphilile yini engcondvweni. Ngetulu kwaloko, Jehova ufundza inhlitiyo. Ukwati kahle loko lokwenta umuntfu ente intfo letsite. Kute lokufihlakele kuJehova. (Heb. 4:13) Ngako Jehova nakacolela umuntfu, usuke asati kahle simo lebekakuso.

10. Sisho ngani kutsi indlela Jehova lehlulela ngayo ihlale ilungile futsi ikahle? (Dutheronomi 32:4)

¹⁰ Indlela Jehova lehlulela ngayo ihlale ilungile futsi ikahle. Akakhetsi. Nakacolela lotsite akayi ngendlela labukeka ngayo, ngekutsi unjingile yini, ngekutsi ubalulekile yini nobe ngemakhono lanawo. (1 Sam. 16:7; Jak. 2:1-4) Kute longacindzetela Jehova kutsi ente intfo letsite nobe amfumbatsise. (2 Khr. 19:7) Tincumo takhe atiyi ngekutsi utfukutsele yini nobe ngendlela lativa ngayo. (Eks. 34:7) Siyaciniseka kutsi Jehova unguMehluleli lokahle kakhulu ngobe wati konkhe ngatsi nangesimo setfu.—Fundza Dutheronomi 32:4.

11. Yehluke njani indlela Jehova lacolela ngayo?

¹¹ Babhali bemiBhalo yesiHebheru bebati kutsi Jehova ucolela ngendlela leyehlukile. Kuletinye timo, bebasebentisa ligama lesiHebheru lenye incwadzi letsi “belisetjentiswa kuphela nakuchazwa indlela Nkulunkulu lacolela ngayo toni. Leligama alisetjentiswa nakuchazwa indlela bantfu labacolela ngayo labanye.” NguJehova kuphela lonemandla  ekucolela ngalokuphelele soni lesiphendvukako. Uba yini umphumela nasicolelwa nguJehova?

12-13. (a) Utfolani umuntfu nakacolelwe nguJehova? (b) Ngemuva kwekutsi Jehova sekasicolele, uba yini umphumela?

¹² Nasemukela kutsi Jehova usicolele, siba ‘netikhatsi tekuvuseleleka,’ letifaka ekhatsi kuthula kwengcondvo nanembeza lohlantekile. Intsetselelo lenjalo angeke siyitfole kubantfu kodvwa siyitfola “kuJehova” kuphela. (Imis. 3:19) Jehova nakasicolela uphindze asivumele kutsi sibe bangani bakhe, kube ngatsi asikake senta sono.

¹³ Ngemuva kwekutsi Jehova sekasicolele, akayuze asisole ngesono setfu nobe asijezise ngenca yaso. (Isa. 43:25; Jer. 31:34) Njengobe “imphumalanga ikhashane kakhulu nenshonalanga, naye utikhweshisa kangako-ke tono tetfu kitsi.” * (Hla. 103:12) Nasicabanga ngendlela Jehova lasicolela ngayo, sijabula kakhulu futsi sisala sibambe wangentasi. (Hla. 130:4) Kodvwa bobani Jehova langabacolela?

14. Yini lesesiyifundzile mayelana naloko lokwenta Jehova acolele lotsite nobe angamcoleli?

¹⁴ Njengobe sibonile, Jehova nakancuma kucolela lotsite akayi ngekutsi lesono besisincane nobe besisikhulu. Sesifundzile nekutsi Jehova usebentisa lwati lanalo njengobe anguMdali wetfu, anguMnikimtsetfo wetfu, neMehluleli wetfu kuze ancume kutsi amcolele yini lotsite nobe angamcoleli. Ngutiphi tintfo Jehova lacabanga ngato ngaphambi kwekutsi ancume kucolela lotsite nobe kungamcoleli?

15. Njengobe kusho Lukha 12:47, 48, yini lenye Jehova layibukako ngaphambi kwekutsi asicolele?

¹⁵ Lokunye Jehova lakubukako kutsi lona lowonile bekati yini kutsi loko lakwentako kubi. Jesu wakwenta kwacaca loko kuLukha 12:47, 48. (Fundza.) Umuntfu lohlela kwenta lokubi abe ati kahle kutsi kutamtfukutselisa Jehova, wenta sono lesikhulu. Umuntfu lonjalo utibeka engotini yekungacolelwa nguJehova. (Mak. 3:29; Joh. 9:41) Kuliciniso kutsi ngaletinye tikhatsi sisuke sibona kutsi sente intfo lembi. Singacolelwa yini esimeni lesinjalo? Yebo! Nyalo asesicoce ngekutsi  yini lenye Jehova layibukako ngaphambi kwekutsi ancume kucolela lotsite nobe kungamcoleli.

16. Kusho kutsini kuphendvuka, futsi kubaluleke ngani nasifuna Jehova asicolele?

¹⁶ Lokunye Jehova lakubukako ngaphambi kwekutsi acolele lotsite kutsi lesoni siphendvuke mbamba yini. Kusho kutsini kuphendvuka? Kusho “kushintja indlela locabanga ngayo naloko lokuhlosile.” Kufaka ekhatsi kutisola nebuhlungu lobukhulu lobuviwa ngulomuntfu ngenca yetintfo letimbi latentile nobe ngetintfo letikahle lokufanele ngabe utentile. Umuntfu lophendvukile akagcini nje ngekuva buhlungu ngenca yalesono lasentile, kodvwa uva buhlungu nangekutsi uvumele buhlobo bakhe naJehova baba butsakatsaka, lokumbangele kutsi ente lesono. Khumbula kutsi lamakhosi lamabili, lokunguManase naDavide, enta tono letinkhulu; nobe kunjalo, Jehova wawacolela ngobe aphendvuka mbamba. (1 Khos. 14:8) Jehova kufanele abone bufakazi bekutsi siphendvukile ngaphambi kwekutsi asicolele. Kodvwa akukeneli kuva buhlungu ngesono lesisentile. Kufanele sente lokutsite. * Asesicoce ngekutsi yini lenye Jehova layibukako ngaphambi kwekutsi ancume kucolela lotsite nobe kungamcoleli.

17. Kusho kutsini kushintja, futsi kubaluleke ngani nangabe singafuni kuphindza tono lesike satenta? (Isaya 55:7)

¹⁷ Lenye intfo Jehova layibukako ngaphambi kwekutsi ancume kucolela lotsite nobe kungamcoleli kutsi lomuntfu ushintjile yini. Kushintja kusho “kugucuka.” Ngalamanye emagama, lomuntfu kufanele ayekele kwenta tintfo letimbi futsi aphile ngendlela Jehova lafuna kutsi bantfu baphile ngayo. (Fundza Isaya 55:7.) Lomuntfu kufanele ashintje indlela lacabanga ngayo, icondziswe yindlela Jehova lacabanga ngayo. (Rom. 12:2; Ef. 4:23) Kufanele atimisele kushintja indlela lembi lebekacabanga ngayo futsi ayekele netintfo letimbi lebekatenta. (Khol. 3:7-10) Kuliciniso  kutsi kukholwa kwetfu emhlatjelweni waKhristu ngiko lokwenta Jehova akhone kusicolela futsi asuse tono tetfu. Jehova usebentisa lomhlatjelo waJesu nakabona kutsi setama mbamba kushintja indlela lebesiphila ngayo.—1 Joh. 1:7.

18. Yini lesesiyifundzile mayelana nendlela Jehova lacolela ngayo?

¹⁸ Asesibukete kafishane emaphuzu lesesicoce ngawo. NguJehova lohamba embili ngekucolela. Sisho ngani? Kwekucala, uhlale akulungele kucolela. Kwesibili, usati kahle. Uyati kahle indlela lesakheke ngayo futsi uyakhona kubona nasiphendvuke mbamba. Kwesitsatfu, Jehova usicolela ngalokuphelele, kube ngatsi asikake sona. Loku kusenta sibe nanembeza lohlantekile futsi semukelwe nguye.

19. Yini lengasenta sijabule nanobe sinesono futsi sichubeka senta emaphutsa?

¹⁹ Kuliciniso kutsi njengobe sinesono, sitawuchubeka sona. Nobe kunjalo, angasidvudvuta emavi laku-Insight on the Scriptures, Umculu 2, likhasi 771, latsi: “Jehova unemusa futsi uyati kutsi bantfu bakhe babutsakatsaka. Ngako akukafaneli sive buhlungu ngaso sonkhe sikhatsi ngenca yekutsi sinesono futsi senta emaphutsa. (Hla. 103:8-14; 130:3) Nangabe senta konkhe lokusemandleni etfu kuze sente loko Nkulunkulu latsi asikwente, singajabula. (Fil. 4:4-6; 1 Joh. 3:19-22).” Lamavi asikhutsata mbamba!

20. Sitawucoca ngani esihlokweni lesilandzelako?

²⁰ Sijabula kakhulu ngekutsi Jehova ukulungele kusicolela nasitisola mbamba ngetono lesitentile. Kodvwa singamlingisa njani Jehova nakutiwa endzabeni yekucolela? Indlela Jehova lacolela ngayo ifana njani nendlela lesicolela ngayo, kodvwa ngesikhatsi lesifanako yehluke njani? Kubaluleke ngani kwati lomehluko? Sihloko lesilandzelako sitayiphendvula lemibuto.