1. Kasi Themba Solomoni likalemba fundo wuli ya unenesko pa Mupharazgi 7:20?

 THEMBA Solomoni likalemba kuti: “Pa charu chapasi palije munthu murunji uyo nyengo zose wakuchita uwemi pera kwambura kunangapo.” (Muph. 7:20) Uwu mbunenesko nadi. Tose ndise ŵakwananga. (1 Yoh. 1:8) Ntheura tose tikukhumbikwira chigowokero kufuma kwa Chiuta na ŵanthu ŵanyithu.

2. Kasi munthu wakujipulika wuli para wagowokereka na mubwezi wake?

² Tikukayika yayi kuti mukukumbuka nyengo yinyake iyo mukakhuŵazgapo mubwezi winu. Pakuti mukakhumbanga kuti vinthu vyambireso kwenda makora paubwezi winu, ntheura mukaphepiska kufumira pasi pamtima. Kasi mukajipulika wuli mubwezi winu wati wamugowokerani? Mukajipulika makora, asi nthena? Enya, ndipo mukwenera kuti mukakondwaso chomene.

3. Kasi tidumbiskanenge vichi mu nkhani iyi?

³ Tikukhumba kuti Yehova waŵe mubwezi withu wapamtima, kweni nyengo zinyake tikuyowoya panji kuchita vinthu ivyo vikumukwiyiska. Ipo chifukwa wuli pera tikwenera kugomezga kuti Yehova ngwakunozgeka kutigowokera? Kasi pali mphambano wuli pakati pa kugowoka kwa Yehova na kwa ise taŵanthu? Ndipo kasi Chiuta wakugowokera munthu wuli?

4. Chifukwa wuli tikwenera kugomezga kuti Yehova ngwakunozgeka kugowokera?

⁴ Mazgu gha Chiuta ghakutisimikizgira kuti Yehova ngwakunozgeka kugowokera. Apo Yehova wakajilongosoranga kwa Mozesi  pa Phiri la Sinayi, wakatuma mungelo kuyowoya kuti: “Yehova, Yehova, Chiuta walusungu na wachiwuravi, wakukalipa luŵiro chara, wakuzara na chitemwa, na unenesko. Wakulongora lusungu ku vikwi, wakugowokera ubudi, uheni, na kwananga.” (Eks. 34:6, 7) Yehova ni Chiuta walusungu na wachiwuravi ndipo nyengo zose wakuŵa wakunozgeka kugowokera ŵakwananga awo ŵapera.—Neh. 9:17; Sal. 86:15.

5. Kuyana na Salimo 103:13, 14, kasi Yehova wakuchita wuli vinthu chifukwa chakuti wakuŵamanya makora ŵanthu?

⁵ Pakuti ni Mlengi withu, Yehova wakumanya chilichose chakukhwaskana na ise. Ghanaghanirani waka. Iyo wakumanya kalikose kakukhwaskana na munthu waliyose pa charu chapasi. (Sal. 139:15-17) Ntheura wakuwona kwananga kose uko tili kuhara kufuma ku ŵapapi ŵithu. Kweniso, wakumanya vyose ivyo vyatichitikirapo pa umoyo withu, ivyo vyapangiska kuti tiŵe munthu uyo tili pasono. Kasi Yehova wakuchita wuli chifukwa chakuti wakutimanya makora? Wakuchita nase vinthu mwalusungu chomene.—Sal. 78:39; ŵazgani Salimo 103:13, 14.

6. Kasi Yehova walongora wuli kuti ngwakukhumbisiska kutigowokera?

⁶ Yehova walongora kuti ngwakukhumbisiska kutigowokera. Wakumanya kuti ivyo wakachita munthu wakwamba, Adamu, ndivyo vili kupangiska kuti tose tiŵe ŵakwananga kweniso tifwenge. (Rom. 5:12) Palije icho patekha tikatenge tichitenge kuti tijiwombore panji kuwombora ŵanyithu ku kwananga na nyifwa. (Sal. 49:7-9) Ndipouli, Chiuta withu walusungu wakalongora chiwuravi na kuchitapo kanthu kuti ise tiŵe ŵakufwatuka. Kasi wakachita vichi? Nga umo pa Yohane 3:16 pakulongolera, Yehova wakatuma Mwana wake wapadera kuti wazakafwe m’malo mwa ise. (Mat. 20:28; Rom. 5:19) Yesu wakafwa chifukwa cha ise mwakuti wafwature waliyose uyo wali na chipulikano mwa iyo. (Heb. 2:9) Yehova vikamuŵinya chomene kuwona mwana wake wakutemweka wakufwa yifwa yakuŵinya chomene na yakukhozga soni. Apa ntchakuwonekerathu kuti Yehova wakatenge wazomerezgenge yayi Mwana wake kufwa waŵenge kuti wakukhumba yayi kutigowokera ise.

7. Kasi Baibolo likulongora kuti mbanjani ŵanyake awo Yehova wakaŵagowokera na mtima wose?

⁷ Mu Baibolo muli viyelezgero vinandi vya ŵanthu awo Yehova wakaŵagowokera na mtima wose. (Efe. 4:32) Kasi mukughanaghanira vya njani para mwapulika fundo iyi? Panyake mukughanaghanira za Themba Manase. Munthu  muheni uyu wakachita zakwananga zikuruzikuru chomene kwa Yehova. Wakasopanga ŵachiuta ŵatesi ndipo wakachiskangaso ŵanji kuti nawo ndimo ŵachitirenge. Wakakoma ŵana ŵakubaba yekha, na kuŵapeleka sembe ku ŵachiuta ngoza. Wakafika na pakuŵika chikozgo chakuŵaja mu tempile lakupatulika la Yehova. Pakuyowoya za munthu uyu, Baibolo likuti: “Wakachita uheni ukuru chomene pamaso pa Yehova, kumukwiyiska.” (2 Mid. 33:2-7) Kweni Manase wakati wapera kufumira pasi pamtima, Yehova wakamugowokera na mtima wose. Nakuti wakamuwezgeraposo pa uthemba. (2 Mid. 33:12, 13) Panyake mungaghanaghaniraso za Themba Davide, uyo wakachita kwananga kukuru, kusazgapo uleŵi na kukoma. Kweni Davide wati wazomera kwananga kwake na kulapa kufumira pasi pamtima, Yehova nayo wakamugowokera. (2 Sam. 12:9, 10, 13, 14) Nadi, tikwenera kugomezga kuti Yehova ngwakunozgeka kugowokera. Ndipo nga umo tiwonerenge, kugowoka kwake nkhwapadera, kukupambana na kwa ŵanthu.

8. Pakuti Yehova ni Mweruzgi muwemi chomene, kasi ivi vikukhwaska wuli mtima wake wa kugowoka?

⁸ Yehova ni “Mweruzgi wa charu chose chapasi.” (Gen. 18:25) Mweruzgi muwemi wakwenera kughapulikiska makora malango. Ndimo Yehova waliri chifukwa padera pakuŵa Mweruzgi withu, ni Mupi wa Dango. (Yes. 33:22) Palije uyo wakumanya makora chomene icho ntchiwemi na chiheni kuluska Yehova. Kasi mweruzgi muwemi wakukhumbikwiraso vichi? Wakwenera kumanya dankha unenesko wose wa nkhani pambere wanderuzge. Ntheura Yehova ni Mweruzgi muwemi chomene chifukwa nyengo zose wakumanya unenesko wa nkhani.

9. Kasi Yehova wakuŵa kuti wakumanya vichi para wakusankha kugowokera munthu?

⁹ Mwakupambana na ŵeruzgi ŵa pa charu chapasi, nyengo zose Yehova wakumanya unenesko wa nkhani yiliyose. (Gen. 18:20, 21; Sal. 90:8) Iyo wakutimbanizgika na ivyo ŵanthu ŵakuwona panji kupulika yayi. Iyo wakumanya makora chomene umo mikhaliro iyo munthu wali kuhara kufuma ku ŵapapi ŵake, masambiro, umo wali kulelekera, uko wali kukulira, umo wakujipulikira kweniso umo wakughanaghanira, vikukhwaskira kachitiro kake ka vinthu. Kweniso Yehova wakumanya ivyo vili mu mtima wa munthu. Wakumanyaso makora chifukwa icho chapangiska munthu kuchita chinthu chinyake. Palije icho ntchakubisika kwa Yehova. (Heb. 4:13) Lekani para Yehova wakukagowokera munthu wakuŵa kuti wakuyimanya makora nkhani yose.

10. Chifukwa wuli tingayowoya kuti vyeruzgo vya Yehova nyengo zose ni vyaurunji? (Dotoronome 32:4)

¹⁰ Vyeruzgo vya Yehova nyengo zose ni vyaurunji. Iyo wakutemwera yayi na pachoko. Yehova wakugowokera munthu chifukwa chakuti ngwakuwoneka makora yayi nesi chifukwa cha chuma, kuzirwa panji maluso ghake. (1 Sam. 16:7; Yak. 2:1-4) Palije uyo wangamuchichizga Yehova kuchita chinthu chinyake panji kumuhonga. (2 Mid. 19:7) Wakusankha kuchita vinthu chifukwa cha ukali panji umo wakujipulikira yayi. (Eks. 34:7) Mwambura kukayika, Yehova ni Mweruzgi muwemi chomene chifukwa wakumanya makora chilichose chakukhwaskana na ise kweniso umo vinthu viliri pa umoyo withu.—Ŵazgani Dotoronome 32:4.

11. Kasi kugowoka kwa Yehova kukupambana wuli na kugowoka kwa ise taŵanthu?

¹¹ Awo ŵakalemba Malemba Ghachihebere ŵakamanyanga kuti kugowoka kwa Yehova kukupambana na kugowoka kwa ŵanthu. Chifukwa nyengo zinyake ŵakagwiliskiranga ntchito lizgu Lachihebere ilo mabuku ghanyake ghakulongosora kuti “likugwiliskirika ntchito pekha pakulongosora umo Yehova wakugowokelera ŵakwananga. Ndipo likugwiliskirika ntchito yayi para munthu wagowokera munthu munyake.” Yehova pera ndiyo wali na nkhongono  zakugowokera munthu wakwananga uyo wapera. Kasi pakuŵa uwemi wuli para Yehova watigowokera?

12-13. (a) Kasi munthu wakusanga vyandulo wuli para Yehova wamugowokera zakwananga zake? (b) Kasi vyandulo ivi vikuŵa vya nyengo yitali wuli?

¹² Para tazomerezga fundo yakuti Yehova watigowokera, tikondwenge na “nyengo yakuwezgeramo nkhongono,” iyo yikusazgapo kuŵa na mtende wa mu mtima na njuŵi yiwemi. Tingaŵa na mtende wa mu mtima na njuŵi yiwemi pekha para Yehova ndiyo watigowokera. (Mil. 3:19) Para Yehova watigowokera, wakuwezgerapo ubwezi withu na iyo ndipo vikuŵaso nga kuti tangunanga yayi.

¹³ Para Yehova watigowokera, wakukonthoraso yayi panji kutilanga chifukwa cha kwananga uko tikachita. (Yes. 43:25; Yer. 31:34) Yehova wakuŵika maubudi ghithu kutali chomene nga umo viliri “kufuma kumafumiro gha dazi kuya kumanjiliro gha dazi.” * (Sal. 103:12) Para tikughanaghanira ukuru wa umo Yehova wakugowokelera, tikuwonga chomene. (Sal. 130:4) Kweni kasi ni njani uyo Yehova wakumugowokera?

14. Kasi kufika apa, tasambira vichi vyakukhwaskana na chifukwa icho Yehova wakugowokelera munthu panji yayi?

¹⁴ Nga umo tawonera, kuti Yehova wagowokere munthu vikuthemba pa ukuru panji uchoko wa zakwananga izo wachita yayi. Kweniso tasambira kuti Yehova wakugwiliskira ntchito vinjeru vyake pakuŵa Mlengi, Mupi wa Dango, na Mweruzgi withu, para wakusankha kuti wagowokere munthu. Kweni kasi ni vinthu wuli ivyo Yehova wakughanaghanira chomene pambere wandasankhe kugowokera munthu panji yayi?

15. Kuyana na Luka 12:47, 48, kasi ni fundo wuli yimoza iyo Yehova wakuwona pambere wandasankhe kugowoka panji yayi?

¹⁵ Chinthu chimoza icho Yehova wakulaŵiska, nkhuwona usange wakwananga uyo wamanyanga kuti icho wachitanga ntchiheni. Yesu wakayowoya mwakupulikikwa makora fundo iyi, nga umo pakuyowoyera pa Luka 12:47, 48. (Ŵazgani.) Para munthu wakuchitira dala chinthu chiheni icho wakumanya kuti Yehova wakutinkha, ndikuti wachita kwananga kukuru. Munthu wanthena wakuŵa pangozi yakuti Yehova wangamugowokera yayi. (Mrk. 3:29; Yoh. 9:41) Kweni  kuyowoya unenesko, nyengo zinyake tikumanyanga kuti ivyo tanguchita vyanguŵa viheni. Kasi pali mwaŵi nthena wakuti tingagowokereka? Enya! Ndipo fundo iyi yikutifikiska pa chinthu chinyake icho Yehova wakuwona para wakukhumba kugowokera munthu.

16. Kasi kupera kukung’anamurachi, ndipo chifukwa wuli tikwenera kupera para tikukhumba kuti Yehova watigowokere?

¹⁶ Chinthu chinyake icho Yehova wakuwona ni para wakwananga uyo wapera zanadi. Kasi kupera kukung’anamurachi? Kupera kukung’anamura “kusintha kaghanaghaniro, umo munthu wakuwonera vinthu panji vilato ivyo wakuchitira vinthu vinyake.” Kweniso kukusazgapo chitima icho munthu wakuŵa nacho chifukwa cha vinthu viheni ivyo wakachita panji kuleka kuchita vinthu vyakwenelera ivyo weneranga kuchita. Munthu wakupera wakuŵa na chitima chifukwa cha vinthu viheni ivyo wachita kweniso chifukwa chakuti wakalekelera kuti ubwezi wake na Yehova uŵe wakulopwa, ndipo vikapangiska kuti wachite vinthu viheni. Kumbukani kuti Themba Manase na Davide wose ŵakachita zakwananga zikuru, kweni Yehova wakaŵagowokera chifukwa chakuti ŵakapera kufumira pasi pamtima. (1 Mathe. 14:8) Enya, Yehova wakwenera kuwona ukaboni wakuti tapera nadi kuti watigowokere. Kweni ntchakukwana yayi kuŵa waka na chitima chifukwa chakuti tachita kwananga. Tikwenera kuŵa ŵakunozgeka kuchitapo kanthu. * Fundo iyi yikutifikiska pa chinthu chinyake icho Yehova wakuwona.

17. Kasi kusintha kukung’anamurachi, ndipo chifukwa wuli ntchakuzirwa kuchita nthena usange tikukhumba kuti tileke kuwerezgaso zakwananga izo tikachita kumanyuma? (Yesaya 55:7)

¹⁷ Chinyake chakuzirwa icho Yehova wakuwona ni para munthu wasintha. Kusintha kukung’anamura “kuwerako ku mendero ghakale.” Mukayowoyero kanyake, munthu wakwenera kuleka kuchita vinthu viheni na kwamba kulondezga nthowa za Yehova. (Ŵazgani Yesaya 55:7.) Munthu wakwenera kusintha maghanoghano ghake kuti walongozgekenge na maghanoghano gha Yehova. (Rom. 12:2; Efe. 4:23) Wakwenera kuŵikapo mtima kuleka nthowa zake ziheni zakale, kaghanaghaniro kake na vyakuchita vyake. (Kol. 3:7-10) Mbunenesko kuti chipulikano chithu mu sembe ya Khristu ndicho chikovwira kuti  Yehova watigowokere na kutitozga kukwananga. Kweni Yehova watigowokerenge kwizira mu sembe iyi pekha para wawona kuti tikuŵikapo nadi mtima kuti tisinthe vyakuchita vithu.—1 Yoh. 1:7.

18. Kasi tasambira vichi vyakukhwaskana na kugowokera kwa Yehova?

¹⁸ Tiyeni mwakudumura tiweleremo fundo zakuzirwa izo tadumbiskana mu nkhani iyi. Yehova ndiyo Ngwakugowoka mukuru chomene kuluska waliyose. Chifukwa wuli tikuyowoya nthena? Chakwamba, nyengo zose ngwakunozgeka kugowokera. Chachiŵiri, wakumanya chilichose chakukhwaskana na ise. Pakuti wakumanya makora umo tili kulengekera, ntheura ndiyo pera wakumanya makora usange tapera zanadi. Ndipo chachitatu, para Yehova watigowokera, wakusisita kwananga kwithu ndipo kwa iyo vikuŵa nga tangunanga na kunanga wuwo yayi. Ivi vikutovwira kuti tiŵe na njuŵi yituŵa na kulutilira kuŵa nayo paubwezi.

19. Nangauli ndise ŵambura kufikapo ndipo tilutilirenge kwananga, kweni chifukwa wuli tingaŵa ŵakukondwa?

¹⁹ Mbunenesko kuti chifukwa chakuti ndise ŵambura kufikapo, tilutilirenge kwananga. Ndipouli, tingapembuzgika na mazgu agho tikughasanga mu buku la Insight on the Scriptures, Volume 2, peji 771, agho ghakuti: “Pakuti Yehova ngwalusungu ndipo wakumanya kuti ŵateŵeti ŵake ŵakubudiska chifukwa cha zakwananga izo ŵakababika nazo, ntheura iwo ŵakwenera yayi kukhalira kujiyimba mulandu na maubudi agho ŵachita chifukwa cha kwananga uko ŵali kuhara. (Sal. 103:8-14; 130:3) Chikuru ŵakuyezgayezga kuchita vyose ivyo ŵangafiska pa kulondezga fundo za Chiuta, ŵakwenera kukondwa. (Fil. 4:4-6; 1 Yoh. 3:19-22).” Fundo iyi njakukhozga chomene.

20. Kasi tizamudumbiskana vichi mu nkhani yakulondezgapo?

²⁰ Tikuwonga chomene kuti Yehova ngwakunozgeka kutigowokera para tapera nadi pa zakwananga izo tanguchita. Kweni kasi tingamuyezga wuli Yehova pa nkhani yakugowokera? Kasi kugowokera kwithu na kwa Yehova kukuyanako munthowa wuli, ndipo kukupambanako munthowa wuli? Chifukwa wuli kupulikiska mphambano iyo yilipo nkhwakuzirwa? Nkhani yakulondezgapo yizamuzgora mafumbo agha.