1. Ekhaikhai heeni mwene Salomoni olempaawe va Koheleti 7:20?

 MWENE Salomoni olempe ha: “Vekhaikhai variyari vatthu khavo namaloka onera sorera pahi ahipahulaka etthu.” (Koh. 7:20) Eyo ekhaikhai! Ootheene hiyo anamattheka. (1 Yoh. 1:8) Ti vawonto ootheene hiyo nintthunaahu oleveleliwa ni Muluku, naari ni atthu akina.

2. Nyuwo moonenle hayi vaavo nyuwo mwaaleveleliwaanyu?

² Apaale nyuwo munnupuwela nihuku mwamunyoonyihaanyu mukhwiinyu. Nyuwo mwaaxupeya ni mwaha ole mwannatthuna opaka etthu weera mureherere. Mwa yeeyo, nyuwo mwaavekela nlevelelo ni murima wootheene. Moonenle hayi vaavo nyuwo mwaaleveleliwaanyu? Nyuwo mwaari ootaphuwa ni oohakalala!

3. Eheeni ninrowaahu woona mwa yoosoma ela?

³ Hiyo nintthuna weera Yehova akhale nthamwene ahu, mwaha wookhala atthu oohimalela nnoopaka naari wuuluma etthu enrowa omunyoonyiha. Ninrowa ororomela hayi weera Yehova onnatthuna onlevelela? Mwaha wa heeni nneerahu nroromeleke weera olevelela wa Yehova ti wootepa ovirikana ni moota nnalevelelaahu akhwiihu? Taani amphwanela oleveleliwa ni Yehova?

4. Ninsuwela hayi weera Yehova ori oolikaneene weera anlevelele?

⁴ Masu a Muluku annanroromeliha weera Yehova, ori oolikaneene weera anlevelele. Yehova aaruma nlaika weera nuulume ni Mose omwaako Sinai, avarelaka muteko nlaika nne, owo  aahimme ha woohima sa yoowo: “Yahvéh, Yahvéh Muluku opixa murima ni osapwaneya otxerewa òsarasareya ni osareya mahala ni ororomeleya yowo onasunka mahala awe wa irukulu miloko sene miloko muloko (1000) onalevelela mulattu yopahula ni yottheka.” (Ott. 34:6, 7) Yehova Muluku ooreera murima ni oomoriwa ikharari, owo ori oolikaneene weera aalevelele anamattheka oottharuwa.—Neh. 9:17; Nsal. 86:15.

5. Moovarihana ni Nsalmu 103:13, 14, eheeni Yehova ompakaawe mwaha woonisuwela nnene?

⁵ Mwaha wookhala mpattuxa ahu, Yehova onnanisuwela nnene. Ti wootikiniha osuwela weera Yehova, onnanisuwela nnene mutthu ti mutthu a hiyo. (Nsal. 139:15-17) Owo onnawera woona yoottheka hiyo nivanlaahu wa asitithihu, opwaha wa yeeyo, Yehova osuwela itthu sootheene nivirihaahu mweekumini mwahu. Ni oosuwela moota itthu iyo nivirinhaahu sinvolelaaya omutthu nraahuno. Okhala weera owo oonisuwela nnene, etthu eyo ennamweeriha onimorela ikharari.—Nsal. 78:39; musome Nsalmu 103:13, 14.

6. Yehova onoonihera hayi weera onnatthuna onlevelela?

⁶ Yehova ohoonihera weera onnatthuna onlevelela. Owo oosuwela weera hiyo na anamattheka, ni nohuulumeliwa okhwa mwaha wa yoottheka ya Adamu. (Arom. 5:12) Khiyaavo nneeraahu nipake weera nitaphule naari nimutaphule mutthu mukina mwa yoottheka ni okhwa. (Nsal. 49:7-9) Mwaha wa nsivelo na Muluku ahu, owo oopaka etthu ennitaphula mwa yoottheka ni okhwa. Opanke eheeni? Ntoko onnooniheraawe Yohani 3:16, Yehova oomurumiha mwanawe weera anikhwele hiyo. (Math. 20:28; Arom. 5:19) Yesu ohookhwa—weera awere waatapula ale—ammuroromela. (Aheb. 2:9) Nkuupuwelani moota waaraaya wooxupa, Yehova omoona mwanawe amusivelaawe akhwaaka mooripiha murima! Nyuwo munuupuwela weera Yehova ammuhiya mwanawe onikhwela hiyo, ahitthunaka onlevelela.

7. Matakihero heeni anoonihera weera Yehova onnatthuna onlevelela?

⁷ Mbiblyani aakhalamo matakihero aatthu antxipale, yaawo Yehova aalevelenlaawe. (Aef. 4:32) Apaale mutthu oopatxera mummuupuwelaanyu mwene Manase mulopwana owo aari oowuuma murima ni aanapaka soottheka itokotokoru. Owo annakokhorela  miluku sa ethiru ni annawooperera atthu akina opaka etthu emoharu. Mpakana owo aaphiyera waavaha anamwane awe ntoko mukuttho wa amuluku a ethiru. Mpakana Manase aaphiyera waahela amuluku a ethiru mutemplu mwa Yehova. Biblya onnahima woohima sa Manase: “Ahera yeyo yari yonanara vamaithoni va Yahvéh.” (2 Sow. 33:2-7) Nto Manase attharuwakaru ni murima wootheene, Yehova aamulevelela. Muluku amwaakhulela tho weera Manase ahokoleele okhala mwene. (2 Sow. 33:12, 13) Apaale nyuwo tho munnamuupuwela mwene Davidi, owo aamutthekela Yehova, yoottheka yeeyo yaari oraruwa ni wiiva. Mene vaavo Davidi aakhulenlaawe yoottheka awe ni woonihera ottharuwa ni murima wootheene, Yehova aamulevelela. (2 Sam. 12:9, 10, 13, 14) Matakihero ala meeli anoonihera weera Yehova, onnatthuna onlevelela. Ni ntoko ninrowaahu woona, moota Yehova onaalevelelaawe atthu, onnavirikana moota hiyo nnalevelelaahu akhwiihu.

8. Mwaha wa heeni nihimaahu weera Yehova mphuki oorerela waapwaha aphuki ootheene?

⁸ Yehova “namathoriha a elapo yootheene.” (Eph. 18:25) Mphuki ooreera onatthuneya osuwela nnenesene malamulo. Hiyo pooti weera Yehova mphuki oosuwela. Mwaha wa heeni? Ohiya mwaha wookhala mphuki ahu, mene tho owo topanke malamulo ari mBiblyani. (Yes. 33:22) Khaavo onsuwela yooreera ni yoonanara ompwaha Yehova. Owo onnasuwela itthu sootheene sinhela mpuwa ahinnakuve opaka yoothanla. Mwaha wa yeeyo, Yehova mphuki a miruku waapwaha atthu ootheene, mwaha wooweera owo onnasuwela itthu sootheene sinhela mpuwa.

9. Eheeni Yehova onhelaawe mpuwa athanla omulevelela mutthu?

⁹ Ophuki wa Yehova, khonlikana ni waatthu. Owo onnasuwela itthu sootheene sinhela mpuwa. (Eph. 18:20, 21; Nsal. 90:8) Ophuki wa atthu onwehexexa ele anoonaaya ni ele aniwaaya. Moovirikana ni Yehova onniwexexa moomalela mikhalelo sootheene sa mutthu, ntoko egenetika, moota owo opakiwaawe, nipuro onkhalaawe nitho makhalelo awe ammuupuweloni. Opwaha wa yeeyo, Yehova onnawera osuwela mirima. Nave onnaiwexexa nnenesene etthu enneriha opaka etthu eri poothe. Yehova onnawera woona itthu sootheene. (Aheb. 4:13) Vaavo Yehova omulevelelaawe mutthu, owo onnasuwela itthu sootheene sineereya ni mutthu owo.

10. Eheeni enneeriha ororomela weera othoriha wa Yehova ti waxariya? (Olaleya 32:4)

¹⁰ Yehova Muluku oohikhanleno nthalu, nto ophukela wawe ti waxariya. Yehova amulevelelaka mutthu khanweha ophwaneliwa wawe, muhakhu awe, itthu osuwenlaawe naari aarene mutthu oosuweliwaxa. (1 Sam. 16:7; Yak. 2:1-4) Khaninwera omukhanyerera Yehova weera apake etthu, naari omuttiya makhwankwa weera anilevelele. (2 Sow. 19:7) Vaavo Yehova onthanlaawe omulevelela mutthu, khampaka eyo moohupuwela. (Ott. 34:7) Khaninhovela weera Yehova, mphuki oreerela a elapo yootheene, mwaha woowera owo onnanisuwela nnenesene ni onnasuwela makhalelo ahu.—Mmusome Olaleya 32:4.

11. Heeni nneeraahu weera oleveleliwa ni Yehova ti wooreeraxa ni khonlikana ni etthu?

¹¹ Soolepa sa eHeberi sinnaiwanyeiha weera oleveleliwa ni Yehova ti wooreraxa ni khonlikana ni etthu. Iparte ikina, “aavareliwa masu a eHeberi ni moovarihana ni Dicionário a Biblya annavareliwa muteko weera nihimwe nlevelelo, nenlo Yehova onwoniheraawe  atthu, masu ala khaninhimmwa nlevelelo mutthu onamooniheraawe mukhwaawe. Nenlo nri noohikwanela nalikanxera ni nlevelelo na Yehova.” Nave Yehova paahi torinono owera woomulevelela mutthu ottharunwe. Olevelela wa Yehova ontaphulela eheeni wa hiyo?

12-13. (a) Vaavo Yehova onnilevelelaawe niweherereke waakhela eheeni? (b) Neereke Yehova onoonittaruxa mwaha wa yoottheka onlevelenlaawe?

¹² Vaavo nnaakhulelaahu ni nniiwexexaahu weera nooleveleliwa ni Yehova ninnaphwanya “omalelaya mmupuweloni” ni okhalano yoosuweliha ya murima yooreera. Owo mukhalelo nimphwanyaahu, “naleveleliwa vale ni Yehova.” (Mit. 3:19) Yehova anlevelela, owo onnaakhulela-tho onthamwene ahu onakhala ntoko khanimutthekenleru.

¹³ Yehova anlevelela, khanrowa-tho onittaruxa mwaha wa yoottheka onlevelenlaawe. (Yes. 43:25; Yer. 31:34) Yehova onnattiwala soottheka sahu “ntoko ohitto onarakamelaya siso owo onnarakameliha otthayi ni hiyo soxulula sahu.” * (Nsal. 103:12) Nuupuwelaka nlevelelo na Yehova mirima sahu sinnasareya otikhina ni oxukurela. (Nsal. 130:4) Taani omphwanela oleveleliwa ni Yehova?

14. Eheeni nixuttenraahu mpaka va, woohima sa olevelela wa Yehova?

¹⁴ Ntoko hiyo noonnahu nneveleo na Yehova khaninlipa ni wuunnuwa wa yoottheka hiyo nipankaahu. Nave ntoko noonnahu-tho, Yehova mpattuxa ahu, mphuki ahu ni tiyoowo onivanhe malamulo ninttharaahu. Yehova tori mutokhweene ni oophwanela othanla waatthuneyaka omulevelela mutthu. Eheeni Yehova onhelaawe mpuwa weera athanle omulevelala mutthu?

15. Moovarihana ni Luka 12:47, 48, vaavo Yehova omulevelelaawe mutthu eheeni onhelaawe mpuwa?

¹⁵ Etthu emoha Yehova onhelaawe mpuwa, ori osuwela waari weera namattheka aapaka etthu ele yoonanara asuwelaka. Yesu ahiwanyeiha masu ala va Luka 12:47, 48. (Mmusome.) Vaavo mutthu onuupuwelaawe opaka etthu yoottheka, mutthu owo ompaka yoottheka etokotoko ni pooti ohilelveleliwa  ni Yehova. (Mar. 3:29; Yoh. 9:41) Ekhaikhai weera ootheene hiyo, nootoko opaka etthu naasuwelaahu weera ti yoonanara vamaithoni va Yehova. Wakhala weera noopaka eyo, neereke nnoleveleliwa? Aani! Mwaha wooweera yookhala etthu ekina Yehova onhelaawe mpuwa.

16. Ottharuwa ti heeni, ni heeni oraaya wootthuneya weera Yehova anlevelele soottheka?

¹⁶ Etthu ekina Yehova onhelaawe mpuwa ori woona waari weera namattheka ole oottharuwa mweekhaikhai. Mutthu onsuwanyeya hayi weera oottharuwa mweekhaikhai? Mutthu onnasuwanyeya weera oottharuwa mweekhaikhai, “atxentxaka muupuwelo awe, makhalelo awe ni mweettelo awe.” Eyo tho ennahela mpuwa moota mutthu onooniheraawe oripiwa murima mwaha woopaka etthu yoottheka, naari mwaha woohiya opaka etthu aatthuneyaawe opaka. Mutthu oottharuwa mweekhaikhai, khanripiwa murima mwaha wa yootthekaru opankaawe nave-tho mwaha woowera onanariha onthamwene awe ni Yehova. Muupuweleke weera Mase ni Davidi, yaapaka soottheka itokotoko, mene naari vareene hiiho, Yehova ahaalevelela mwaha wooweera yaattharuwa ni murima wootheene. (1 Mam. 14:8) Onooneya weera Yehova, onanlevelela oona weera noottharuwa ni murima wootheene. * Mene oripiwa murima mwaha wa yoottheka nipankaahu, eyo khenkwana etthu onnatthuneya opaka etthu. Yookhala etthu ekina-tho Yehova onhelaawe mpuwa.

17. Eheeni ontaphulelaaya ottharuwa, ni heeni oraaya wootthuneya opaka eyo, hiyo naahitthunaka otthikela opaka yoottheka? (Yesaya 55:7)

¹⁷ Etthu ekina yootthuneya Yehova onhelaawe mpuwa, ori emaara namattheka onttharuwaawe naari neere mutthu vaavo “onhiyaawe opaka itthu soottheka” apakaka matxentxo mweekumini. Nave anapaka itthu seiye Yehova onhimaawe weera ti sooreera. Mutthu ontthuneya otxentxa muupuwelo awe weera eettihiweke ni nyuupuwelo sa Yehova. (Mmusome Yesaya 55:7.) Mutthu onnatthuneya opaka itthu sootheene weera, ohiya paahi ohiya opaka itthu soottheka, mene weera ahiye okhalano minyuupuwelelo soonanara.  (Arom. 12:2; Aef. 4:23) Ekhaikhai weera mukuttho wa Yesu, Yehova tonvarelaawe muteko weera anlevelele ni onitteeliha yootthekaahu. (Akol. 3:7-10) Yehova onrowa ovarela muteko mukuttho, wakhala weera owo ohoona weera hiyo ninnilipihera ohiya mukhalelo woonanara.—1 Yoh. 1:7.

18. Eheeni hiyo nixuttenraahu woohima sa olevelela wa Yehova?

¹⁸ Nrowe nuulule itthu nixutenraahu, Yehova mutthu oolevelela waapwaha atthu ootheene. Mwaha wa heeni nihimaahu hiiho? Yoopatxera, mwaha wooweera Yehova ori oolikaneene weera anlevelele. Opwaha mwa yeeyo, owo oonisuwela waapwaha atthu ootheene. Oosuwela itthu sootheene woohima sa hiyo, ni khaavo onwera onisuwela ompwaha Yehova wakhala weera noottharuwa ni murima wootheene. Omamaliheroni nohoona weera Yehova anlevelela, onnatxipiha soottheka sahu sootheene. Ni eyo ennanikhavihera okhalano yoosuweliha ya murima yooreera ni waakhuleliwa ni yoowo.

19. Naari nreene atthu oohimalela ni nivirelelaka ottheka mwaha wa heeni nneeraahu nihakalaleke?

¹⁹ Ekhaikhai weera hiyo mwaha wookhala atthu oohimalela, nneereke ovirelela ottheka. Mene etthu enrowa onimaaliha masu nimphwanyaahu eliivuru ya Estudo Perspicaz das Escrituras, Volume 1 epaaxina 210: “Woona weera Yehova moomoriwa ikharari onnahela mpuwa ottettheya wa arumeyi awe, awo khantthuneya okhala ootthukeya mwaha wa yoottheka niranvaahu. (Nsa 103:8-14; 130:3) Wakhala weera animweetta moororomeleya mwa iphiro sa Yehova, eneereke ohakalala. (Af 4:4-6; 1Yoh 3:19-22).” Ti woolipiha wuupuwelela etthu ela!

20. Eheeni ninrowaahu oxuttera yoosoma enttharelana?

²⁰ Hiyo pooti weera asantte wa Yehova, vaavo onnilevelelaawe napaka yoottheka nnattharuwa ni murima wootheene. Ninrowa otakiha hayi moota Yehova onlevelelaawe? Onlikana moota heeni olevelala wa Yehova ni olevelala wahu? Moota heeni oraaya woovirikana? Heeni oraaya wootthuneya wiiwexexa ovirikana iwo? Yoosoma enttharelana enoorowa waakhula makoho ala.