1. Etthu xeeni mwene Salomoni oniixuttinhe awe Musuweli 7:20?

 MWENE Salomoni aalempe so: “Mulaponi khavo onìra sa xariya mahiku othene, ahiweryaka ovonya”. (Mus. 7:20) Moolumo ala teekeekhai, maana ootheene ahu na anatampi. (1 Yoh. 1:8) Ootheene ahu ninniphavela oleveleliwa ni Muluku vamosa ni atthu akina.

2. Munoonela sai okathi munileveleliwa anyu ni mpatthani anyu?

² Woonasa wene, nyuwo munnuupuwela okathi mwaamunyoonyihale anyu mpatthani anyu muulupale. Tthiri nyuwo mwaaniphavela ophuka muxankiho owo ni onvekela wira ooleveleleni wira mutthikele okhala apatthani. Moonenle sai nuumala mpatthani anyu woolevelelani ni murima wootheene? Niireke kimwaaxukhurenle? Moohaanyiherya, nyuwo mwaahimuxukhurela ni mwaahihakalala vanceene!

3. Mwaha ola, makoho xeeni ninrowa ahu waakhula?

³ Ootheene ahu, ninniphavela okhala apatthani aalupale a Yehova. Masi okathi mukina hiyo pooti ohimya aahiiso opaka etthu enrowa omunyoonya vanceene Yehova. Mwaha ola, ninrowa waakhula makoho mararu. Noopacerya, xeeni vanireerela aya okupali wira Yehova onniphavela onilevelela? Na nenli, ovirikana xeeni okhale enamuna Yehova onnilevelela awe ni moota hiyo nnaalevelela ahu atthu akina? Nookiserya, atthu xeeni Muluku onaalevelela awe?

4. Etthu xeeni ennikupaliha wira Yehova onniphavela onilevelela?

⁴ Biibiliya onnooniherya wira Yehova onniphavela onilevelela. Okathi Yehova aisoonihenrye awe ohoolo wa Moise omwaako Sinayi, orumaka nlaikha Yehova aahimmye so: “Miyo k’Apwiya, Apwiya Muluku òmoriwa ikharari ni òvilela, òpisa  onanariwa, òrera murima ni òroromeleya. Miyo kinnarerela murima atthu n’an’aya n’osulu aya mpakha oholo onkelelahu; miyo kinnileva sottheka saya n’uhìwelela waya n’itampi saya”. (Okhum. 34:6, 7) Yehova, Muluku ooreera murima, oomoriwa ikharari ni okathi wootheene onniphavela waalevelela anatampi anittharuwa ni murima wootheene. — Neh. 9:17; Esal. 86:15.

5. Moovarihana ni Esalimo 103:13, 14, okhala wira Yehova onnisuwela oratteene, etthu xeeni onipaka awe?

⁵ Okhala wira tonipattunxe, Yehova onninsuwela oratteene. Nkahaya muupuwele ela! Yehova onnisuwela mikhalelo sa khula mutthu onikhala elapo ela. (Esal. 139:15-17) Nto owo onniweha itthu sootheene soohiloka nravihiwe ahu ni anamuyari ahu Adamu ni Eva. Nave Yehova onnisuwela itthu sinikhumelenle mookumini mwahu, seiyo sinikhalihenrye olokiherya mikhalelo sahu ni omutthu ahu. Okhala wira Yehova onninsuwela oratteene, etthu xeeni onipaka awe? Owo onninimorela ikharari. — Esal. 78:39; Musome Esalimo 103:13, 14.

6. Yehova oonihenrye sai wira onniphavela onilevelela?

⁶ Yehova ohooniherya oratteene wira onniphavela onilevelela. Maana onnisuwela wira mwaha wa oohiiwelela wa Adamu, ootheene ahu noorava etampi ni ninnookhwa. (aRom. 5:12) Nto khaninwerya wiisoopola mmensihu ni khuuvo pinaatamu aawerya onoopola etampi ni okhwa. (Esal. 49:8-10) Masi Muluku ahu ophenta, oonimorela ikharari ni opaka etthu wira noopoliwe etampi ni okhwa. Etthu xeeni opanke awe? Ntoko enooniherya aya yoolepa ya Yohani 3:16, Yehova oomuruma mwanawe mmoseene wira onikhwele. (Math. 20:28; aRom. 5:19) Yesu ohookhwa wira owoopole atthu ootheene animwaamini. (aHeeb. 2:9) Tthiri Yehova aahoona owereya vanceene onweha mwanawe amphentexa awe, okhwaaka mwa enamuna yoowereya ni yoowooniha othunku! Vannooneya wira Yehova khaarowa weemererya wira mwanawe okhwe, vaakhanle wira khoniphavela onilevelela.

7. Atthu xeeni Yehova aalevelenle awe?

⁷ Mbiibiliyani aakhala matakiheryo manceene a atthu Yehova aalevelenle awe ni murima awe wootheene. (aEef. 4:32) Mutthu xeeni munimuupuwela anyu aaleveleliwe ni Yehova? Woonasa wene, nyuwo munnimuupuwela mwene Manase. Mulopwana ole otakhala murima, aahimutthekela vanceene Yehova.  Maana aanaakokhorela amuluku eethiru ni aanaatumererya atthu akina opaka etthu emosaru. Nave aahaapaha anaawe aavahaka mukuttho amuluku eethiru. Ohiya-vo, owo aahikuxa elatarato ya muluku eethiru opweha mutemplo yoowaarya ya Yehova. Omuhimyaka Manase, Biibiliya onihimya so: “Owo ahìra sotakhala vamaithoni v’Apwiya”. (2 Wah. 33:2-7) Nuumala Manase wooniherya wira aahittharuwa ni murima awe wootheene, Yehova aahimulevelela. Nave Muluku aaheemererya wira Manase otthikele okhala mwene. (2 Wah. 33:12, 13) Pooti wira nyuwo munnimuupuwela mwene Davidi, owo aahimutthekela vanceene Yehova, maana aahipaka itampi suulupale oohela muhina oraruwa ni wiiva. Hata vari siiso, nuumala Davidi weemererya itampi sawe ni ottharuwa ni murima wootheene, Yehova aahimulevelela. (2 Sam. 12:9, 10, 13, 14) Nto nikupaliki wira Yehova, onniphavela onilevelela ni murima wootheene. Ntoko ninrowa ahu oweha, enamuna Yehova onaalevelela awe atthu, yoovirikana vanceene ni moota apinaatamu aanaalevelela aya akhwaaya.

8. Okhala wira Yehova mphuki ooloka, eyo enivarihana sai ni olevelela wawe?

⁸ Yehova ‘tonilamula elapo yothene’. (Maph. 18:25) Mphuki ooloka ohaana osuwela oratteene nlamulo. Yehova tori mphuki ahu, nto onnisuwela oratteene malamulo, mwaha woowi owo tonipaka malamulo awo. (Yes. 33:22) Khuuvo mutthu onisuwela ele eri yooloka ni yoohiloka onvikana Yehova. Etthu xeeni ekina mphuki ooloka onireerela awe osuwela? Owo ohaana osuwela itthu sootheene sa mwaha owo ohinatthi opaka yoothanla. Nuupuwelaka eyo, Yehova tori mphuki ooloka maana okathi wootheene onnisuwela itthu sootheene sa khula mwaha.

9. Itthu xeeni Yehova onisuwela awe akhala wira pooti omulevelela mutthu aahiiso nnaari?

⁹ Moovirikana ni aphuki apinaatamu, okathi wootheene Yehova onnisuwela itthu sootheene sa khula mwaha onileeliwa awe. (Maph. 18:20, 21; Esal. 90:8) Owo khoniwehexexa paahi itthu apinaatamu aniweha aya aahiiso aniiwa aya. Nave Yehova onnisuwela wira itthu mutthu onipaka awe sinnivarihana ni moota ohuuwale awe, makhalelo a anamuyari awe, osoma wawe, opuro onikhala awe ni mukhalelo wa mmuupuweloni mwawe. Ohiya-vo, Yehova onniwerya osoma mirima sa atthu. Onnisuwela oratteene mikhalelo sa atthu ootheene ni itthu sinimwiiriha mutthu opaka etthu. Khiivo etthu envitheya vamaithoni va Yehova, maana owo onniweha itthu sootheene. (aHeeb. 4:13) Nto owo onnimulevelela mutthu mwaha woosuwela itthu sootheene siiraneyale.

10. Etthu xeeni enniiriha ohimya wira okathi wootheene Yehova onnaaphukela atthu mwa xariya? (Otumererya 32:4)

¹⁰ Okathi wootheene, Yehova onnaaphukela atthu mwa xariya. Owo khonaathanla atthu. Yehova khonimulevelela mutthu mwaha wookhala ooreera, oothaaciri, okhalana efaita mmuttettheni aahiiso osuwela itthu sinceene. (1 Sam. 16:7; Yak. 2:1-4) Khuuvo mutthu okhanle omukhanyererya Yehova aahiiso omukunyari. (2 Wah. 19:7) Yehova khonipaka soothanla mwaha woonyoonyiheya aahiiso moota onimoonela awe mutthu owo. (Okhum. 34:7) Yehova mphuki ooloka, mwaha woowi onnisuwela itthu sootheene ni myaha sootheene. — Mmusome Otumererya 32:4.

11. Enamuna Yehova onalevelela awe atthu ovirikanne sai ni moota apinaatamu aanaalevelela aya akhwaaya?

¹¹ Atthu alempe soolempwa sa eheeberi yaanisuwela wira enamuna Yehova onalevelela awe atthu yoovirikana vanceene ni apinaatamu. Ikwaha sikina, awo yaanirumeela nuulumo na eheeberi nenlo eliivuru emosa enihimya  aya wira “ninrumeeliwa paahi ophavelaka ohimmwa enamuna Muluku onaalevelela awe anatampi. Nuulumo nno khaninrumeeliwa ephavelaka ohimmwa enamuna apinaatamu aanaalevelela akhwaaya”. Yehova paahi toniwerya omulevelela moomalela natampi ottharunwe ni murima wootheene. Etthu xeeni eniiraneya okathi Yehova onnilevelela awe?

12-13. (a) Etthu xeeni enikhumelela okathi mutthu onilevelele awe ni Yehova? (b) Mareeliho anikhumela mwaha wa oleveleliwa ni Yehova, aniviriha okathi mikavi?

¹² Okathi ninkupali ahu wira Yehova onninlevelela, ninnikhalana “mahiku a murettele” ni murima wooloka. Enamuna eyo ya oleveleliwa, khenikhuma wa apinaatamu masi enikhuma wa “Yehova paahi”. (Mit. 3:19) Okathi Yehova onnilevelela awe, hiyo ninnitthikela okhala apatthani awe, vanakhala ntoko wira khanitonko opaka etampi.

¹³ Nuumala Yehova onilevelela, owo khonikhala-khala uupuwelaka etampi eyo, nnakhala onihukhumu. (Yes. 43:25; Yer. 31:34) Yehova onnirihela ottaiwene itampi sahu, “ntoko vanirakamelanaya onikhuma n’unikela nsuwa”. b (Esal. 103:12) Okathi ninweha ahu moota Yehova onnilevelela awe ninnimuxukhurela vanceene ni omoova. (Esal. 130:4) Masi atthu xeeni Yehova onalevelela awe?

14. Mpakha-va, itthu xeeni niixuntte ahu sinimwiiriha Yehova omulevelela mutthu aahiiso nnaari?

¹⁴ Ntoko niwenhe ahu, Yehova khonimulevelela mutthu mwaha woowi etampi awe yuulupale aahiiso yaamukhaani. Nave ntoko niixuntte ahu, Yehova onnirumeela osuwela wawe ntoko mpattuxa, mulipa onipaka malamulo ni mphuki wira owehe akhala wira onoomulevelela mutthu aahiiso nnaari. Masi, itthu xeeni Yehova onithokorerya awe wira omulevelele mutthu aahiiso nnaari?

15. Moovarihana ni Luka 12:47, 48, etthu xeeni Yehova onithokorerya awe?

¹⁵ Yoopacerya, Yehova onniweha akhala wira mutthu awo aanisuwela wira etthu opanke awe ti yoohiloka. Yesu aahooniherya eyo oratteene ntoko ninweha ahu Luka 12:47, 48. (Mmusome.) Akhala wira mutthu onnimpakela palano opaka etthu onisuwela awe wira Muluku khoniphavela ni ti yootakhala, mutthu owo onipaka etampi yuulupale. Nto mutthu owo pooti ohileveleliwa ni Yehova. (Mar. 3:29;  Yoh. 9:41) Hata vari siiso, okathi mukina hiyo ninnisuwela wira etthu nimpaka ahu ti yoohiloka. Nto akhala wira ninnisuwela, niireke nnooleveleliwa? Aayo! Nto eyo enniniiriha oweha etthu ekina Yehova onithokorerya awe.

16. Ottharuwa onitaphulela exeeni, ni xeeni vari aya vooloka ottharuwa wira nileveleliwe ni Yehova?

¹⁶ Ya nenli, Yehova onniweha akhala wira mutthu owo oottharuwa ni murima wootheene. Ottharuwa onitaphulela exeeni? Ottharuwa onitaphulela “oturuka moonelo ni muupuwelo aahiiso yoophavela ya mutthu owo”. Nave onihela muhina mutthu oxanka aahiiso oriipiwa murima mwaha wa itthu soohiloka opanka awe ni mwaha woohipaka itthu sooloka asuwela awe wira aahaana opaka. Mutthu ottharunwe ni murima wootheene, onniriipiwa murima oohiya paahi mwaha wa itthu soohiloka opanka awe, masi-tho mwaha woohonona ompatthani awe ni Yehova, weiwo omwiirihe opaka itthu soohiloka. Muupuweleke wira mwene Manase ni Davidi yaahipaka itampi suulupale, masi Yehova aahaalevelela okhala wira yaahittharuwa ni murima aya wootheene. (1 Mam. 14:8) Vannooneya wira Yehova onnimulevelela mutthu akhala wira onniweha itthu sinooniherya wira mutthu owo ottharuwa ni murima wootheene. Khivaniphiyerya paahi oriipiwa murima mwaha wa etampi nimpanke ahu. Hiyo nihaana opaka etthu. c Nto eyo enniniiriha ooweeha etthu ekina Yehova onithokorerya awe.

17. Orukunuxa murima onitaphulela xeeni, ni xeeni vari aya vooloka orukunuxa murima wira nihitthikele opaka itampi naapanke ahu khalai? (Yesaya 55:7)

¹⁷ Ya neeraru, Yehova onniweha akhala wira mutthu owo oorukunuxa murima. Masi orukunuxa murima ontaphulela exeeni? Orukunuxa murima ontaphulela otthikela ottuli, niire so, mutthu owo ohaana ottharuwa mweettelo awe woohiloka ni opacerya okhalana mweettelo Yehova oniphavela awe wira atthu awe akhalaneke. (Mmusome Yesaya 55:7.) Mutthu owo ohaana orukunuxa muupuwelo awe wira weettihiweke ni muupuwelo wa Yehova. (aRom. 12:2; aEef. 4:23) Nave mutthu owo ohaana ottharuwa ni murima wootheene itthu soohiloka apaka awe khalai. (aKol. 3:7-10) Tthiri waamini wahu mukuttho wowoopola wa Kristu, tonimwiiriha Yehova onilevelela ni ottipiha  itampi sahu. Yehova onoonilevelela orumeelaka mukuttho wowoopola wa Kristu akhala wira onniweha wiimananiha ahu ohiiya mweettelo woohiloka. — 1 Yoh. 1:7.

18. Itthu xeeni nithokorenrye ahu voohimya sa olevelela wa Yehova?

¹⁸ Nrowe nuuluule iponto suulupale nithokorenrye ahu. Yehova onniphavela vanceene onilevelela. Etthu xeeni enniiriha ohimya siiso? Yoopacerya, okathi wootheene Yehova onniphavela onilevelela. Ya nenli, Yehova onninsuwela oratteene. Okhala wira onninsuwela oratteene, owo onnisuwela akhala wira noottharuwa ni murima wootheene aahiiso nnaari. Ya neeraru, Yehova onninlevelela ni okathi onipaka awe eyo, vanikhala ntoko wira khanitonko opaka etampi. Owo onninikhaliherya okhalana murima wooloka ni okhalana ompatthani woolipa ni yena.

19. Hata niyariwe ene ni etampi ni nipakaka itampi, xeeni vanireerela ahu ohakalala?

¹⁹ Okhala wira niyariwe ni etampi, nnoopakaka itampi. Masi moolumo ari Estudo Perspicaz Das Escrituras, evolume 1 epaaxina 210, anninimaaliha vanceene. Moolumo awo anihimya so: “Okhala wira Yehova toomoriwa ikharari, owo onniweha sootteettheya sa arumeyi awe, nto khivanreerela oriipiwa murima ni wiikhupanyerya mwaha wa soovonya anipaka aya, seiyo sinikumiheriwa ni etampi aravihiwe aya. (Esal. 103:8-14; 130:3) Akhala wira animweettela malamulo a Muluku, awo ahaana ohakalala. (aFil. 4:4-6; 1 Yoh. 3:19-22)”. Tthiri moolumo ala toolipiha vanceene!

20. Makoho xeeni ninrowa ahu waakhula mwaha onittharelana?

²⁰ Ninnihakalala osuwela wira Yehova onniphavela onilevelela akhala wira nnoottharuwa itampi sahu ni murima ahu wootheene. Nto ninrowa otakiha sai olevelela wa Yehova? Mwa enamuna xeeni olevelela wahu onlikana aya ni wa Yehova? Mwa enamuna xeeni olevelela wahu ovirikana aya ni olevelela wa Yehova? Xeeni varya aya vooloka osuwela ovirikana iwo? Mwaha onittharelana, ninrowa waakhula makoho awo.