1. Mwakamulana ni Jwakulalichila 7:20, ana Mwenye Solomoni jwasasile chichi?

 MWENYE Solomoni jwasasile kuti, “Pa chilambo chapasi pangali mundu jwakusatenda yindu yambonepe ni ngalemwa.” (Jwak. 7:20) Yeleyitu yili yisyene, ligongo lyakuti wosopewe tuli wakulemwa. (1 Yoh. 1:8) Myoyo wosopewe tukusasaka kuti Mlungu soni achimjetu atukululuchileje.

2. Ana tukusapikana uli mumtima mjetu patukululuchile?

² Komboleka kuti akukumbuchila ndaŵi jiŵamlemwechesye mjawo. Ligongo lyakuti ŵasakaga kumasya nganijo kuti aŵe paunasi ni mjawojo ŵapepesye kutyochela pasi pamtima. Ana ŵapikene uli mjawojo paŵakululuchile ni mtima wosope? Ngatukukayichila kuti ŵasangalele mnope.

3. Ana munganiji chitupate kwanga kwa yiwusyo yapi?

³ Tukusasaka kuti Yehofa aŵe mjetu jwapamtima. Nambo ndaŵi sine tukusaŵecheta kapena kutenda yindu yakumkuŵasya. Ligongo chichi tukusosekwa kuŵa ŵakusimichisya kuti Yehofa akusaŵa jwakusachilila kutukululuchila? Ana kululuchila kwa Yehofa kukusalekangana chamtuli ni kwa ŵanduwe? Ana ni ŵandu ŵapi ŵampaka Mlungu ŵakululuchile?

4. Ligongo chichi ngatukusosekwa kukayichila kuti Yehofa ali jwakoseka kutukululuchila?

⁴ Maloŵe ga Mlungu gakusatusimichisya kuti Yehofa ali jwakoseka kutukululuchila. Pandaŵi jine Yehofa jwalimanyikasisye kwa Mose pa Litumbi lya Sinayi. Jwalakwe kupitila mwa lilayika jwaŵechete kuti, “Une, AMBUJE, ndili Mlungu jwa chanasa,  ni jwambone mtima, jwangatumbila chitema, ŵakugumbala ni chinonyelo changamala, soni jwakulupichika kwa ŵandu ŵakwe. Akusalosya chinonyelo chawo changamala kwa ŵandu ŵajinji, ni akwakululuchila yakulemwa yawo, yangalumbana yawo ni ulemwa wawo.” (Eks. 34:6, 7) Yehofa ali Mlungu jwambone soni jwachanasa jwakusaŵa jwakoseka kwakululuchila ŵandu ŵakulemwa ŵapitikwiche mtima.—Neh. 9:17; Sal. 86:15.

5. Mwakamulana ni Salimo 103:13, 14, ana Yehofa akusatenda chichi ligongo lyakutumanyilila chenene?

⁵ Yehofa akusamanyilila yiliyose yakwamba uweji ligongo ni juŵatupanganyisye. Agambe ganichisya ayi. Jwalakwe akusamanyilila chilichose chakwamba mundu jwalijose pachilambopa. (Sal. 139:15-17) Ligongo lya yeleyi, jwalakwe akusamanyilila ungali umlama watwajigalile kwa achinangolo ŵetu. Kupwatika pelepa, Yehofa akusamanyilila yindu yatuŵele tuli mkusimana nayo paumi wetu yayatendekasisye kuti tukole ndamo syambone kapena syakusakala. Ana Yehofa akusatenda chichi ligongo lyakutumanyilila chenene? Jwalakwe akusatenda yindu mwakutuganichisya.—Sal. 78:39; aŵalanje Salimo 103:13, 14.

6. Ana Yehofa jwalosisye chamtuli kuti ali jwakusachilila kutukululuchila?

⁶ Yehofa jwalosisye kala kuti ali jwakusachilila kutukululuchila. Jwalakwe akusamanyilila kuti ulemwa wa Adamu watendekasisye kuti wosopewe tuŵe ŵakulemwa soni tuweje. (Alo. 5:12) Pangali chilichose champaka tutende kuti tulikulupusye kapena kwakulupusya ŵane ku ulemwa ni chiwa. (Sal. 49:7-9) Nambope Mlungu jwetu jwachinonyelo jwatulosisye chanasa mwakulinganya yakutugopola ku ulemwa ni chiwa. Ana jwatesile yeleyi chamtuli? Mpela mwalikusaŵechetela lilemba lya Yohane 3:16, Yehofa ŵapeleche Mwanache jwakwe kuti atuwombole ku ulemwa ni chiwa. (Mat. 20:28; Alo. 5:19) Yesu jwawile chiwa chakupweteka pakusaka kwawombola ŵandu wosope wakusamkulupilila jwalakwe. (Aheb. 2:9) Kusala yisyene Yehofa yampweteche mnope mumtima kumwona Mwanache jwakwe juŵamnonyelaga ali mkunyosyedwa soni kuwa chiwa chakupweteka. Yikaŵe kuti Yehofa nganasaka kutukululuchila ngamkanakunda kuti mwanache jwakwe awe.

7. Ana ni yisyasyo yine yapi ya m’Baibulo ya ŵandu ŵaŵakululuchidwe ni Yehofa?

⁷ Mu Baibulo mwana yisyasyo yejinji ya ŵandu ŵaŵakululuchidwe ni Yehofa. (Aef. 4:32)  Ana wawojo akukumbuchila ya ŵandu ŵapi? Komboleka kuti akuganichisya ya Mwenye Manase. Mwenyeju jwatesile yakusakala yejinji pameso pa Yehofa. Jwalakwe jwalongolelaga pa kulambila kwaunami. Jwawulejesoni ŵanache ŵakwe ni kwapeleka mbopesi kwa milungu jaunami. Jwalakwe jwayikene pakuŵika chiwanichisyo cha mlungu jwakusepa m’nyumba jeswela ja Yehofa. Pakwamba ya Manase Baibulo jikusati, “Ŵatesile yindu yakusakala yejinji mnope pameso pa Yehofa, pakumkuŵasya jwalakwejo.” (2 Mbi. 33:2-7, NWT.) Nambope, Manase pajwapitikwiche mtima ni kuleka yakusakala, Yehofa ŵamkululuchile. Mlungu jwayikene pakumkunda jwalakwe kuti awujile pa chitengu chakwe cha uchimwene. (2 Mbi. 33:12, 13) Komboleka akuganichisyasoni ya Mwenye Daudi, juŵatesile yakulemwa yekulungwakulungwa mpela kutenda chikululu soni kuwulaga mundu. Nambope, Daudi pajwapitikwiche mtima ni kuleka yakusakala yakwe, Yehofa ŵamkululuchile. (2 Sam. 12:9, 10, 13, 14) Yeleyitu yikutusimichisya kuti Yehofa akusaŵa jwakusachilila kwakululuchila ŵandu yakulemwa yawo. Soni mpela mwachituyiwonele munganiji, yakusati Yehofa pakululuchila yikusalekangana ni ŵanduwe.

8. Ana kuŵajilwa kwa Yehofa kuŵa Jwakulamula kukusakamulana chamtuli ni kululuchila kwakwe?

⁸ Yehofa ali ‘Jwakulamula jwa chilambo chosope chapasi.’ (Gen. 18:25) Jwakulamula jwambone akusasosekwa kugamanyilila chenene malamusi. Mwelemu ni mwaŵelele Yehofa, ligongo kupwatika pa kuŵa Jwakulamula, jwalakwe ni jwakusapeleka malamusi. (Yes. 33:22) Pangali mundu jwampaka alandane ni Yehofa pangani ja kumanyilila chachili chambone soni chakusakala. Ana chindu chine chapi chakusasosekwa jwakulamula jwambone? Jwalakwe akusasosekwa kujipikanichisya ngani josospe mkanaŵe kulamula. Myoyo, Yehofa ali jwakuŵajilwa kulamula ligongo akusamanyilila yosope.

9. Ana Yehofa akusamanyilila yindu yapi pakusagula kumkululuchila mundu kapena iyayi?

⁹ Mwakulekangana ni ŵakulamula wosope, Yehofa akusamanyilila chilichose. (Gen. 18:20, 21; Sal. 90:8) Jwalakwe jwangadalilaga yindu yapikene kutyochela kwa ŵandu. Yehofa akusamanyilila kuti mundu mpaka atende yine yakwe ligongo lya yaŵatite pakumlela achinangolo ŵakwe, majiganyo gaŵapochele, kumalo kwaŵakulile, kapena ligongo lya kaganisye kakwe. Yehofa akusamanyililasoni yayili mu mtima. Jwalakwe akusamanyilila chenene yayimtendekasisye mundu kutenda yine yakwe. Pangali chakusisika kwa Yehofa. (Aheb. 4:13) Myoyo, Yehofa akusamkululuchila mundu ligongo lyakuti akumanyilila ngani josope.

10. Ligongo chichi mpaka tujile kuti ndaŵi syosope Yehofa akusalamula mwachilungamo? (Detulonomo 32:4)

¹⁰ Ndaŵi syosope Yehofa akusalamula mwachilungamo. Jwalakwe jwangali lusagu. Yehofa pakusagula kumkululuchila mundu jwangajigalila mwakuwonechela mundujo, yipanje yakwe, udindo wakwe kapena lunda lwakwe. (1 Sam. 16:7; Yak. 2:1-4) Pangali jwampaka apeleche yipupu kwa Yehofa. (2 Mbi. 19:7) Jwalakwe jwangalamulaga ligongo lyakupya mtima. (Eks. 34:7) Yehofa ali Jwakulamula jwambone ligongo lyakuti akusamanyilila chilichose chakwamba uweji soni mwayiŵelele yindu paumi wetu.—Aŵalanje Detulonomo 32:4.

11. Ana kululuchila kwa Yehofa kuli kwapadela chamtuli?

¹¹ Ŵakulemba Malemba ga Chihebeli ŵamanyilile kuti kukululuka kwa Yehofa kuli kwapadela. Ndaŵi sine, jemanjaji ŵakamulichisyaga masengo liloŵe lya Chihebeli lyele pakulilondesya m’buku jine ŵatite, “Liloŵeli akusalikamulichisya masengo pakusala yakusati Mlungu pakwakululuchila ŵandu ŵakulemwa. Liloŵeli ŵangalikamulichisyaga masengo pakusala yakusatenda ŵandu pakwakuluchila achimjawo.”  Yehofape ni jwakwete machili gakwakululuchila yisyesyene ŵandu ŵakulemwa ŵapitikwiche mtima. Ana pakusapagwa yakuyichisya yamtuli Yehofa patukululuchile?

12-13. (a) Ana mundu akusasangalala ni yindu yapi pakululuchidwe ni Yehofa? (b) Ana yindu yikusaŵa wuli Yehofa patukululuchile?

¹² Naga tukwitichisya yakuti Yehofa atukululuchile, tuchikola “ndaŵi jakupumula.” Yeleyi yikugopolela kola mtendele wa mumtima soni chikumbumtima chambone. Kululuchila kweleku kwangatyochelaga kwa ŵandu nambo kwa Yehofape. (Mase. 3:19) Naga Yehofa atukululuchile, unasi wetu ni jwalakwe ukasaŵa mpela muwaŵelele pandanda mwamti yikusaŵa mpela nganitulemwa chilichose.

¹³ Yehofa patukululuchile, jwalakwe ngasatujamukasoni ligongo lya ulemwa welewo. (Yes. 43:25; Yel. 31:34) Yehofa akusaŵika yakulemwa yetu kutali mpela mukuŵelele “kungopoko lyuŵa kukutalikangana ni kungapilo lyuŵa.” b (Sal. 103:12) Patukuganichisya yakusati Yehofa pakululuchila, tukusaŵa ŵakusangalala. (Sal. 130:4) Nambo ana ŵani ŵampaka apindule ni kukululuchila kwa Yehofa?

14. Ana Yehofa akusakamulichisya masengo yindu yapi pakusaka kumkululuchila mundu kapena iyayi?

¹⁴ Mpela mwatuyiwonele, Yehofa jwangamkululuchilaga mundu ligongo lyakuti ulemwa watesile uli wekulungwa kapena wamwana. Tuyiwenisoni kuti Yehofa akusakamulichisya masengo yindu yakusamanyilila mpela juŵatupanganyisye, jwakupeleka malamusi, soni jwakulamula pakusaka kukumluluchila mundu kapena iyayi. Ana Yehofa pakutenda yeleyi akusaganichisya yindu yine yapi?

15. Mwakamulana ni Luka 12:47, 48, ana chindu chimo chakusaganichisya Yehofa chili chichi?

¹⁵ Chindu chimo chakusaganichisya Yehofa chili naga mundujo jwamanyililaga kuti yakutendayo uli ulemwa. Yesu jwasasile yeleyi mwakupikanika chenene pa Luka 12:47, 48. (Aŵalanje.) Mundu jwatesile chakulemwa chitamilecho ali mkumanyilila kuti yakutendayo yili yakulemwa pameso pa Mlungu nikuti atesile ulemwa wekulungwa. Yehofa mpaka asagule ngamkululuchila mundu jweleju. (Maliko 3:29; Yoh. 9:41) Ndaŵi sine mpaka yisimanikwe  kuti tuyikopochele kuti yindu yine yatwatesile munyumamo yaliji yakulemwecheka. Naga yili myoyo ana pana chembecheyo chilichose kwa uweji? Elo chipali, ligongo panasoni chindu chine chakusalola Yehofa pakusagula kuti atukululuchile kapena iyayi.

16. Ana kupitikuka mtima kukusagopolela chichi? Ligongo chichi kutenda yeleyi kuli kwakusosekwa?

¹⁶ Chindu chine chakusaganichisya Yehofa pakusaka kumkululuchila mundu jwalemwisye chili naga mundujo apitikwiche mtima yisyesyene. Ana kupitikuka mtima kukusagopolela chichi? Kupitikuka mtima kukusagopolela kuchenga kaganisye, kapena ndamo syetu.” Kukusapwatikaposoni kulitendela chanasa pa yindu yakusakala yatesile mundu kapena kumanyilila kuti nganatenda yindu yambone yasosekweje kuyitenda. Mundu jwapitikwiche mtima akusalitendela chanasa ngaŵape ligongo lyakuti atesile chakusakala nambo ligongo lyakuti unasi wakwe ni Mlungu usokonechele ligongo lya yakusakala yatesileyo. Atamose kuti Mwenye Manase soni Daudi ŵatesile yakulemwa yekulungwakulungwa, nambo Yehofa ŵakululuchile ligongo lyakuti ŵapitikwiche mtima yisyesyene. (1 Ayi. 14:8) Myoyo, kuti Yehofa amkululuchile mundu, akusasosekwa kulola kaje maumboni gakulosya kuti apitikwiche mtima. Yeleyi yikulosya kuti nganikuŵa kwakwanila kwamba kulitendela chanasa patutesile chakulemwa. Tukusasosekwa kuŵa ŵakoseka kutendapo kandu. c Yeleyi yikutuyikasya pa chindu chine chakusaganichisya Yehofa pakusagula kumkululuchila mundu kapena iyayi.

17. Ana kuchenga kusyesyene kukusagopolela chichi? Ligongo chichi kuŵambala kuwilisya yakulemwa yatwatesile kala kuli kwakusosekwa mnope? (Yesaya 55:7)

¹⁷ Kuchenga yisyesyene chili chindu chine chakusosekwa mnope chakusalola Yehofa. Kuchenga yisyesyene kukusagopolela “kuleka kutenda yakusakala.” Kasale kane, mpaka tujile kuti mundu jwatesile chakulemwa akusasosekwa kuleka yakusakala yaŵatendaga nikulingagalingaga kutenda yindu yakumsangalasya Yehofa. (Aŵalanje Yesaya 55:7.) Munduju akusasosekwasoni kuchenga kaganisye kuti atendeje yindu mwakamulana ni nganisyo sya Yehofa. (Alo. 12:2; Aef.  4:23) Jwalakwe akusasosekwa kutyosya yakusakala munganisyo mwakwe. (Akolo. 3:7-10) Kusala yisyene, kukulupilila mbopesi ja Klistu kukusatendekasya kuti Yehofa atukululuchile soni kuswejesya yakulemwa yetu. Myoyo Yehofa chachikamulichisya masengo mbopesiji kuti atukululuchile payiweni kuti tukutenda yakomboleka kuti tuleche ndamo syakusakala syatwatendaga.—1 Yoh. 1:7.

18. Ana munganiji tukambilene yamtuli yakwamba kukululuka kwa Yehofa?

¹⁸ Mwakata kwende tulolesoni mfundo syatukambilene munganiji. Yehofa ali Jwakululuchila jwamkulungwa jwa pachilambo chosope. Ligongo chichi tukuŵecheta yeleyi? Chandanda jwalakwe ali jwakoseka kutukululuchila. Chaŵili akusamanyilila chilichose chakwamba m’weji. Yeleyi yikusamtendakasya kumanyilila naga tupitikwiche mtima yisyesyene. Nambosoni chatatu, Yehofa naga atukululuchile jwangakumbuchilasoni yakulemwa yetu mwamti yikusaŵa mpela nganitutenda chakulemwa chilichose kwa jwalakwe. Yeleyi yikusatutendekasya kuti tukole chikumbumtima chambone soni kuŵa paunasi wambone ni jwalakwe.

19. Atamose kuti tuli ŵangali umlama soni tukusalemwesya pa yindu yine ligongo chichi tukusosekwa kuŵa ŵakusangalala?

¹⁹ Pakuŵa tuli ŵandu ŵangali umlama chitulemwesyejepe pa yindu yine. Nambope, maloŵe gagakusimanikwa m’buku ja Insight on the Scriptures, Volume 2, peji 771 mpaka gatulimbikasye. Maloŵega gakusati: “Yehofa ali jwachanasa soni akusamanyilila kuti ŵakutumichila ŵakwe akusalepela pa yindu yine. Myoyo jemanjaji ngakusosekwa kwambaga kudandawula ligongo lyakuti ali ŵangali umlama soni akusalemwesya pa yindu yine. (Sal. 103:8-14; 130:3) Naga akutenda yakomboleka kukuya malangiso ga Yehofa chachiŵa ŵakusangalala. (Afil. 4:4-6; 1 Yoh. 3:19-22).” Kusala yisyene maloŵega gali gakulimbikasya mnope.

20. Ana mungani jakuyichisya tuchikambilana chichi?

²⁰ Tuli ŵakusangalala mnope kumanyilila kuti Yehofa ali jwakoseka kutukululuchila yakulemwa yetu naga tupitikwiche mtima yisyesyene. Ana mpaka tutende wuli kuti tusyasyeje kululuchila kwa Yehofa? Ana kululuchila kwetu kukusalandana m’matala gapi ni kululuchila kwa Yehofa, nambi kukusalekangana chamtuli? Ligongo chichi kumanyilila yeleyi kuli kwakusosekwa mnope? Ngani jakuyichisya jichijanga yiwusyo yeleyi.