1. ¿Xi ti cosa dxandíʼ guníʼ rey Salomón lu Eclesiastés 7:20?

 NDIʼ nga ni guníʼ rey Salomón: «Purtiʼ gastiʼ nin ti hombre justo ndaaniʼ guidxilayú riʼ ni guni puru si ni jneza sin guchee» (Ecl. 7:20). ¡Dxandíʼ ni guniʼbe ca! Guiranu nácanu binni ruchee (1 Juan 1:8). Nga runi guiranu caquiiñeʼ guni perdonar Dios ne guni perdonar binni laanu.

2. ¿Ximodo runi sentirnu ora runi perdonar ti xhamígunu laanu?

² ¿Ñee huachiichiluʼ ti xhamíguluʼ pur ni guniʼluʼ o pur ni bíʼniluʼ la? Guiranu huayúninu ni. Ne para cadi gusaana de gaca xhamígunu laabe la? de guidubi ladxidoʼno rinábanu gutiidiláʼdxibe laanu. ¿Ximodo runi sentirnu ora guni perdonar xhamígunu ca laanu yaʼ? Cadi dxandíʼ guizáʼ riéchenu la?

3. ¿Xidé chiguininu lu artículo riʼ?

³ Guiranu racaláʼdxinu gaca Jehová xhamígunu, peru stale biaje rúninu o rininu cosa ni qué riuuláʼdxibe. Yanna, ¿xiñee zanda chuʼnu seguru racaláʼdxibe guni perdonarbe laanu yaʼ? ¿Xiñee zanda guininu gadxé peʼ modo runi perdonar Jehová ne modo runi binni ni? Ne últimu, ¿tuu nga ca ni runi perdonar Dios?

4. ¿Xiñee nuunu seguru nuuca Jehová listu para guni perdonar?

⁴ Stiidxaʼ Dios cayabi laanu nuuca Jehová listu para guni perdonar laanu. Guzéʼtenu ti ejemplu. Lu dani Sinaí  que gudxi Jehová Moisés tu clase de Dios naca. Biquiiñeʼ Jehová ti ángel para gudxi laabe: «Jehová, Jehová, ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa, qué rusaana de gannaxhiibe stale mil binni, runi perdonarbe ca ni ruchee ne ca ni qué ruzuubaʼ diidxaʼ» (Éx. 34:6, 7). Naca Jehová ti Dios ni rannaxhii ne ni riá ne nuuca listu para guni perdonar ca ni maʼ bichee ne maʼ guca arrepentir (Neh. 9:17; Sal. 86:15).

5. Casi ná Salmo 103:13, 14, ¿ximodo runi tratar Jehová laanu purtiʼ runibiáʼ chaahuiʼ laanu?

⁵ Cumu Jehová nga bizáʼ laanu la? runibiáʼ chaahuibe laanu. ¿Cadi dxandíʼ ridxagayaanu ora guiníʼ íquenu runibiáʼ chaahuiʼ Jehová cada binni nabani lu Guidxilayú riʼ la? (Sal. 139:15-17). Nanna Jehová binni ruchee jñaanu ne bixhózenu ne pur nga rucheʼnu. Ne cadi ngasi, laaca nánnabe ximodo laanu pur guiráʼ ni maʼ gudídinu ne maʼ bibáninu. ¿Xi runi Jehová né guiráʼ ni nanna de laanu yaʼ? Rucaani laabe guiabe laanu (Sal. 78:39; biindaʼ Salmo 103:13, 14).

6. ¿Ximodo maʼ bisihuinni Jehová racalaʼdxiʼ guni perdonar laanu?

⁶ Maʼ bisihuinni Jehová racalaʼdxiʼ guni perdonar laanu. Nánnabe pur bichee Adán nga ralenenu pecadu ne rátinu (Rom. 5:12). Ne gastiʼ qué zanda gúninu ne ninca ni guni sti binni para guireʼnu de lu náʼ pecadu ne guendaguti (Sal. 49:7-9). Peru biá Dios laanu ne biʼniʼ xiixa para gulá laanu. Casi ná Juan 3:16, pur nadxii Jehová laanu biseendaʼ tobi lucha Xiiñiʼ para gatiʼ pur laanu (Mat. 20:28; Rom. 5:19). Guti Jesús lugar stinu para gulá guiráʼ ni gapa fe laa (Heb. 2:9). ¿Ñee ruxuíʼlunu pabiáʼ naroʼbaʼ yuubaʼ biʼniʼ sentir Jehová ora biʼyaʼ cayuni sufrir Xiiñiʼ ne cayuuticabe laa la? Yanna, pa ñaca qué racalaʼdxiʼ Jehová guni perdonar laanu, ¿xiñee biseendabe Xiiñibe para gatiʼ yaʼ?

7. ¿Tuu nga ca binni ni ruzeeteʼ Biblia biʼniʼ perdonar Jehová?

⁷ Lu Biblia riete stale binni ni biʼniʼ perdonar Jehová (Efes. 4:32). ¿Rietenaláʼdxiluʼ tobi de laacabe la? Zándaca guiníʼ íqueluʼ de rey Manasés. Guizáʼ  malu gúcabe ne naroʼbaʼ ca pecadu bíʼnibe nezalú Jehová. Bicaabe binni guni adorar dios falsu ne bitiidibe ca xiiñibe lu bele casi sacrificiu para ca dios que. Ne qué ñápabe respetu templu stiʼ Jehová, guluube ti bidóʼ ndaaniʼ lugar santo que. Sicaríʼ ruzeeteʼ Biblia de laabe: «Bíʼnibe stale cosa malu nezalú Jehová para guchiichibe laa» (2 Crón. 33:2-7). Peru ora bisihuinni Manasés dxandíʼ guca arrepentir, biʼniʼ perdonar Jehová laabe ne dede bidii lugar gácabe rey sti biaje (2 Crón. 33:12, 13). Sti binni ni zanda guietenaláʼdxinu nga rey David. Laaca guizáʼ naroʼbaʼ ca pecadu bíʼnibe, guyuunebe ti gunaa ni cadi xheelabe ne biitibe. Peru ora guníʼ David maʼ bichee ne guca arrepentir de guidubi ladxidóʼ, laaca biʼniʼ perdonar Jehová laabe (2 Sam. 12:9, 10, 13, 14). Laaca zanda chuʼnu seguru racalaʼdxiʼ Jehová guni perdonar laanu. Ne casi zadúʼyanu nagasi, maʼ gadxé modo runi perdonar Jehová que modo runi perdonar binni.

8. ¿Xiñee gástiruʼ sti juez casi Jehová, ne ximodo racané ndiʼ para guni perdonarbe laanu?

⁸ Jehová nga «Juez stiʼ guidubi naca Guidxilayú» (Gén. 18:25). Ti buen juez naquiiñeʼ gunibiáʼ chaahuiʼ ca ley stiʼ xquidxi. Ne Jehová runi cumplir né requisitu ca purtiʼ cadi Juez si stinu laabe, sínuque laabe gudíxhebe ca ley ni nápanu (Is. 33:22). Jehová si nga nanna xii nga ni jneza ne ni cadi jneza. ¿Xiruʼ runi ti buen juez yaʼ? Ante guicaabe ti decisión, ruyúbibe ganna chaahuibe xi guiráʼ bizaaca. Nga runi zanda guininu, gástiruʼ sti juez casi Jehová.

9. ¿Xi guiráʼ nanna Jehová para guʼyaʼ pa zuni perdonar tuuxa o coʼ?

⁹ Cadi casi ca juez ni nuu lu Guidxilayú nga Jehová. Ora chiguni juzgarbe xiixa nanna dxíchibe xi guiráʼ bizaaca (Gén. 18:20, 21; Sal. 90:8). Qué runi juzgarbe pur ca ni ruuyaʼ ne ni runadiaga si binni. Riénebe nuu biaje runi binni xiixa cosa pur familia stiʼ, pur modo biniisi, pur ca binni ni ridxaaga o pur napa xiixa guendahuará mental o emocional. Laaca nanna Jehová xi nuu ndaaniʼ ladxidóʼ cada binni, nánnabe xi rucaa laanu gúninu xiixa, xi riníʼ íquenu ne xi racaláʼdxinu. Guiráʼ ni nánnabe, gastiʼ cosa gaʼchiʼ nezalube (Heb. 4:13). Nga runi ora runi perdonar Jehová tuuxa, rúnibe ni purtiʼ nánnabe stale cosa ni bizaaca.

10. ¿Xiñee zanda guininu jneza guiráʼ decisión ni ricaa Jehová? (Deuteronomio 32:4).

¹⁰ Jneza guiráʼ decisión ni ricaa Jehová. Qué ribibe tu guni perdonarbe. Ne ora runi perdonarbe, qué ruuyadibe ximodo naca ti binni, pa napa bueltu o pa coʼ, pa napa ti dxiiñaʼ risaca o pa napa xiixa habilidad (1 Sam. 16:7; Sant. 2:1-4). Qué zanda siʼ tuuxa Jehová para guni xiixa cosa (2 Crón. 19:7). Ne ora cadxiichibe o nuube triste, qué raca lúgube para guni juzgarbe tuuxa (Éx. 34:7). Nga runi, nanna dxíchinu gastiʼ sti juez casi Jehová purtiʼ riene chaahuibe ximodo nácanu ne xi guiráʼ huadídinu (biindaʼ Deuteronomio 32:4).

11. ¿Xiñee gastiʼ qué zanda guchaaganu perdón stiʼ Jehová?

¹¹ Ca hombre ni bicaa Biblia lu diidxaʼ hebreu gúnnacaʼ gastiʼ qué zanda guchaaganu modo runi perdonar Jehová. Nuu biaje biquiiñecabe caadxi diidxaʼ hebreu.  Ne sicaríʼ bizeeteʼ ti libru de laani: «Biquiiñecabe ca diidxaʼ que ora si guníʼcabe modo runi perdonar Dios ti binni ni bichee». Laaca bizeeteʼ libru que: «Qué niquiiñecabe ca diidxaʼ que para guiníʼcabe modo runi perdonar binni sti binni» (Sinónimos del Antiguo Testamento, ni biʼniʼ traducir Santiago Escuain). Jehová si nga napa poder para guni perdonar ti pecador ni gaca arrepentir. ¿Ximodo runi sentirnu ora runi perdonar Jehová laanu yaʼ?

12, 13. a) ¿Xi ndaayaʼ ricaa ca binni ni maʼ biʼniʼ perdonar Jehová? b) ¿Ñee rietenaláʼdxiruʼ Jehová ca donda stinu despué de maʼ biʼniʼ perdonar laanu la?

¹² Ora maʼ biénenu maʼ biʼniʼ perdonar Jehová laanu, ratadxí ladxidoʼno. Ne racané ni laanu gápanu guendariuudxi ne ti conciencia nayá. Qué rápanu ca ndaayaʼ riʼ ora runi perdonar ti binni laanu, sínuque ora si runi Jehová ni (Hech. 3:19). Ne ora runi perdonarbe laanu rudiibe lugar gácanu xhamígube sti biaje. Ne para laabe casi ora qué lica nucheʼnu.

¹³ Despué de maʼ biʼniʼ perdonar Jehová ti binni, qué rugaanirube donda que ique ne qué runi castigarbe laa pur ni biʼniʼ (Is. 43:25; Jer. 31:34). «Biaʼca zitu nuu de ra rindani gubidxa ne dede ra riaaziʼ ni» biaʼca de zitu rundaa Jehová ca pecadu stinu (Sal. 103:12). * Ora riníʼ íquenu pabiáʼ naroʼbaʼ perdón stiʼ Jehová rucaani laanu gudiʼnu xquixe ne gápanu respetu laabe (Sal. 130:4). Peru ¿tuu nga ca binni ni runi perdonar Jehová zacá yaʼ?

14. ¿Xi maʼ bizíʼdinu de perdón stiʼ Jehová?

¹⁴ Casi maʼ bidúʼyanu, qué ruuyadxí diʼ Jehová pabiáʼ naroʼbaʼ pecadu ni bíninu para guni perdonar laanu. Ne casi maʼ bizíʼdinu, Jehová nga bizáʼ laanu, runibiaʼbe laanu, nácabe ti Juez nachaʼhuiʼ ne laabe nga riguíxhebe ca ley ni rinándanu. Nga runi, jneza modo runi juzgarbe ne nánnabe pora guni perdonarbe tuuxa o coʼ. Yanna, ¿xii nga ca cosa ni ruuyaʼ Jehová yaʼ?

15. Casi ná Lucas 12:47, 48, ¿xi ruuyaʼ Jehová ora runi decidir pa zuni perdonar tuuxa?

 ¹⁵ Sti cosa ni ruuyadxí Jehová ora guni juzgar nga pa bidii binni ca cuenta cosa malu ni cayuni. Nga peʼ nga ni guníʼ Jesús lu Lucas 12:47, 48 (biindaʼ ni). Ora runi binni xiixa cosa ni cadi jneza neca nanna maʼ guníʼ Dios malu ni, cayuni cometer ti pecadu grave. Ne pa qué gusaanabe de gúnibe ni, zándaca qué zuni perdonar Jehová laabe (Mar. 3:29; Juan 9:41). Peru pa guininu bíninu ti cosa ni cadi jneza, ¿ñee zuni perdonar Jehová laanu la? Zúnibe ni. Ne ndiʼ racané laanu gánnanu sti cosa ni ruuyaʼ Jehová.

16. ¿Xi riníʼ gaca arrepentir tuuxa, ne xiñee risaca guni ni?

¹⁶ Sti cosa ni ruuyadxí Jehová nga pa dxandíʼ cayaca arrepentir binni ni bichee ca. ¿Xi riníʼ gaca arrepentir tuuxa yaʼ? Riníʼ ni guchaa ti binni ni runi ne ni cá ique guni. Ne laaca riuu triste pur ca cosa feu ni biʼniʼ o pur qué ñuni ni jneza. Cadi nuusibe triste pur ni bíʼnibe, sínuque nuube triste purtiʼ bixélebe de Jehová ngue runi bíʼnibe cosa malu que. Guininu sti biaje de rey Manasés ne David. Neca naroʼbaʼ ca pecadu bíʼnicabe, biʼniʼ perdonar Jehová laacabe purtiʼ dxandíʼ guca arrepentírcabe (1 Rey. 14:8). Racá ridúʼyanu, runi perdonar Jehová tuuxa pa gúʼyabe dxandíʼ cayaca arrepentir. Cadi caquiiñeʼ si chuʼ tuuxa triste pur ni biʼniʼ. Naquiiñeʼ guni xiixa. * Ne ndiʼ racané laanu gánnanu sti cosa ni ruuyaʼ Jehová.

17. ¿Xi riníʼ gaca tuuxa ti binni nacubi, ne ximodo racané ni laanu cadi guibiguetaʼ gucheʼnu? (Isaías 55:7).

¹⁷ ¿Xi sti cosa risaca ruuyaʼ Jehová? Laani nga gaca tobi ti binni nacubi, ndiʼ riníʼ gusaana de guni cosa malu ne guibani modo ná Jehová (biindaʼ Isaías 55:7). Binni ni gaca nacubi ca naquiiñeʼ guchaa modo riníʼ ique ti ganda guni ni riuulaʼdxiʼ Jehová (Rom. 12:2; Efes. 4:23). Naquiiñeʼ quixhe íquebe gusaana de gúnibe ne guiníʼ íquebe cosa malu  (Col. 3:7-10). Peru cadi guiaandaʼ laanu ni racané para guni perdonar ne guxhiá Jehová ca pecadu stinu nga gápanu fe guendaguti stiʼ Jesús. Ora ruuyaʼ Jehová cayúninu stipa guchaʼnu modo nabáninu, runi perdonarbe laanu purtiʼ guti Xiiñibe pur laanu (1 Juan 1:7).

18. ¿Xi maʼ bizíʼdinu de modo runi perdonar Jehová?

¹⁸ Guzéʼtenu caadxi idea risaca ni maʼ bizíʼdinu lu artículo riʼ. Lu guidubi naca universu, guirútiruʼ runi perdonar casi runi Jehová. ¿Xiñee yaʼ? Primé, purtiʼ siempre nuube listu para guni perdonarbe. Guiropa, purtiʼ runibiáʼ chaahuibe ximodo laanu, ne pa dxandíʼ maʼ guca arrepentirnu. Ne, guionna, purtiʼ ora runi perdonar Jehová ruxhá ne rusiaandaʼ pecadu stinu. Ne pur nga zanda gápanu ti conciencia nayá ne ziuuláʼdxibe ni rúninu.

19. ¿Xiñee zanda chuʼnu nayecheʼ neca zuchéʼrunu pur nácanu binni ruchee?

¹⁹ Cumu imperfectu laanu la? zuchéʼrunu. Peru ti cosa ni riguixhedxí ladxidoʼno nga ni zeeda lu libru Perspicacia para comprender las Escrituras, volumen 1, yaza 209. Sicaríʼ nani: «Cumu riá Jehová ca xpinni la? cadi caquiiñeʼ chúʼcabe triste guiráʼ ora purtiʼ binni ruchee laacabe (Sl 103:8-14; 130:3). Pa cayúnicabe ni riuulaʼdxiʼ Jehová zanda chúʼcabe nayecheʼ (Flp 4:4-6; 1Jn 3:19-22)». ¡Guizáʼ riguixhedxí ca diidxaʼ riʼ ladxidoʼno!

20. ¿Gunáʼ nga ca pregunta zacábinu lu sti artículo ca?

²⁰ Rudiʼnu xquixe peʼ nuu Jehová listu para guni perdonar ca pecadu stinu pa gaca arrepentirnu de guidubi ladxidoʼno. Peru ¿ximodo zanda chinándanu ejemplu stibe yaʼ? Nánnanu zanda guni perdonarnu, peru ¿xiñee maʼ gadxé ni que modo runi perdonar Jehová? Ne ¿xiñee risaca guiénenu ni? Lu sti artículo ca zacábinu ca pregunta riʼ.