1. Eeghe okuphom owol kụ edị aZihova angọ buḍighinhom ikarạph dị okiton?

 AZIHOVA kụ Olemhiạ ayira, Ongoọm Iilhogh, r’Oogboom Iiruẹn ayira, kuolọ odị kẹn ni Odẹ ephomhoghiạn k’akẹ ayira. (Ps. 100:3; Isa. 33:22) Mem dị yira oḍighi ikarạph oghị esi odị kụ okiton k’ekpom, odị amoọgh ni iikpọ r’aḍiḅeraạn osạr owilhenhaạn ayira. (Ps. 86:5) Dị eego esi oyil phọ Aizaya, aZihova ukparamhị iyira mọ: “Ghalhamọ nyinha mebiphighạ ikarạph dị etọgh idiphọ oodor, mị kiitol inyinha idiphọ ibikpo.”—Isa. 1:18.

2. Eḍighi maạr dị yira rowạ oghelhọm eephọ r’abunhọn, yira omoọgh oḍighi eeghe?

² Loor e/munughan phọ, yira rokaạph ghan ni koḅilhẹ oḍighi raraạr dị kepin esi abunhọn. (Jems. 3:2) Kuolọ ipẹ phọ re/mạ ghan mọ yira ko/tue okelhọm siya arighirị r’abidị. Yira kotue ni eḍighi maạr dị yira otuughạ osạr ghan owilhenhaạn. (Prov. 17:9; 19:11; Mat. 18:21, 22) Mem dị oniin aḍighi nyoniin ilọ i/nighẹ, aZihova rawạ mọ osạr ghan owilhenhaạn. (Kọl. 3:13) Yira omoọgh ni igey ariphigh otuạn oḍighi iduọn phọ. AZihova rasạr ghan ni kuwilhenhaạn iyira oopho “eten dị ebụgh.”—Isa. 55:7.

3. Yira kooḅeghiọn eeghe siẹn emhuoghaạph phọ ephẹn phọ?

³ Siẹn emhuoghaạph phọ ephẹn phọ, yira kooḅeghiọn idị yira kotue otuughaạny osạr owilhenhaạn phọ aZihova etigheri e/munughan phọ ayira. Eeghe ikarạph kụ edị yira koḍighi  idị ikumor awe phọ kolegheri? Eeghe kụ iḍighi kụ aZihova uromha bọ iyira osạr ghan owilhenhaạn abunhọn? Yira kotuughạ eeghe esi abumor r’abumaranhi dị omhiinhọm iboom loor esi ikarạph abunhọn?

4. (a) Ewạ mọ ebenhẹ aZihova dị aḍighi igbogh ikarạph aḍighi ika? (b) Eeghe kụ oḍighi ikumor awe phọ mem dị bidị ophạm raghaạph oye dị aḍighi ikarạph?

⁴ Yira oḅenhị ghan ikumor awe phọ mem dị oye aḍighi igbogh ikarạph. Iniin odọ ikarạph phọ iphẹn phọ ogẹ ni siphẹ 1 Korịnt 6:9, 10. Igbogh ikarạph pọ amem dị okạ olhogh Enhaạn. Eḍighi maạr dị onyọ aKristẹn aḍighi igbogh ikarạph, odị amoọgh ooḅereghị oḅenhị aZihova r’ikumor awe ookpomhoghan phọ. (Ps. 32:5; Jems. 5:14) Eeghe kụ oḍighi ikumor awe phọ? AZihova bịn kụ akạr amhoọgh iikpọ osạr ghan ikarạph owilhenhaạn, kụ odị raḍighi ghan iduọn phọ dị eego esi ekiạ etagharạn phọ. * Toroboiperolbọ, aZihova mangọ ikumor awe phọ oḍighi osighẹ Igẹ Iigbia phọ kụ ophoghom ghan mughumọ oye dị aḍighi ikarạph akpẹ ni orọl isiẹn ookpomhoghan phọ. (1 Kọr. 5:12) Orue oḍighi iduọn phọ, ikumor awe phọ rooḅeghiọn ghan ni sipuru phọ iphẹn: Oye phọ alhegheri ni kụ aḍighi bọ ikarạph phọ ḍughụm? Odị akparaghạ ghan ni aaghị ikarạph phọ ḍughụm? Odị arolhonhaạn ni oḍighi ikarạph phọ esi eedoọny amem ḍughụm? Edị emhạn maạr, areeghe edi ni dị eḍeenhaan mọ odị akiton ni k’ekpom ḍughụm? Areḍeenhaan edi ni dị emạ emiteom mọ aZihova masạr awilhenhaạn nyodị ḍughụm?—Iiḍighi 3:19.

5. Eeghe aḍisẹph kirokirọ kụ edị oḍighi ikumor awe phọ ramiteom ghan?

⁵ Mem dị ikumor awe phọ ophạm raghaạph r’oḍighinhom ikarạph phọ, aḍiigbu abidị pọ osopha aani iniin phọ ipẹ mosopha bọ ni epẹ k’akẹ. (Mat. 18:18) Ika kụ idị iikolhobian phọ iphẹn phọ rengọ ghan suọ ookpomhoghan phọ? Ophorogh oḍighinhom ikarạph phọ rekoph ghan ookpomhoghan phọ obọ odị kapuẹ ghan bọ bunhọn. (1 Kọr. 5:6, 7, 11-13; Taitọs 3:10, 11) Etue kẹn eloghonhaạn ḍighaạgh oḍighinhom ikarạph phọ okiton r’omhooghọm asuọ osạr owilhenhaạn phọ aZihova. (Luk 5:32) Ikumor awe phọ rooḅereghinhaạn ghan oḍighinhom ikarạph phọ kolhọm mọ aZihova aḅilhẹ aḅulhemhi nyodị.—Jems. 5:15.

6. Koḅilhẹ ni otue osạr obilhenhaạn oye lọ mophorogh ḍughụm? Gbạ.

⁶ Eḍighi maạr dị oye phọ u/meera ukiton mem mọ ikumor awe phọ omhạgh bọ nyodị, pọ koporogh ni nyodị. Eḍighi maạr dị odị asoor olhogh agomẹnt, ikumor awe phọ ko/koph nyodị esi ilioghọm agomẹnt phọ. AZihova angọ ni iikpọ gomẹnt oogbo ghan iiruẹn r’olhiọm ghan atorobọ oye dị asoor olhogh—mughumọ akiton ni obobọ o/kiton. (Rom. 13:4) Kuolọ eḍighi maạr dị oye phọ alhoghoma loor kụ aaghiraan aḅula esi aZihova, pọ odị kasạr ri abilhenhaạn. (Luk 15:17-24) Ghalhamọ iḍighi ni igbogh ikarạph.—2 Chron. 33:9, 12, 13; 1 Tim. 1:15.

7. Eghẹn eten kụ edị yira kotue osạr obilhenhaạn oye dị uḍighi iyira ikarạph?

⁷ P’eeghe iyaạr iidereghị olhegheri mọ i/lo esi ayira osopha mughumọ aZihova kasạr ri abilhenhaạn oḍighinhom ikarạph! Toroboiperolbọ, iyaạr edi ni dị yira kụ kosopha. Eeghe iyaạr? Ibadị amem oye atue ni upiomạn iyira—eeni uḍighi iyira eboom iyaạr—kụ atu uuḅereghiạn iyira. Iini amem oye phọ ka/tu uuḅereghiạn iyira. Eḍighi idiphọ, yira kotue ni osopha osạr owilhenhaạn oye phọ esi owilhẹ oghaghạm odị olhoghi. Okạr oghaạph, oḍighi  iphẹn phọ etue ni esighẹ mem r’inyaạm, ekạr ekpaariọm mem dị iyaạr phọ oye phọ uḍighi bọ iyira ephin esi ayira iboom. AWatchtower aSeptember 15, 1994, aḅẹm mọ: “Mem dị nạ asạr awilhenhaạn oye dị aḍighi iyaạr dị i/nighẹ pọ re/mạ ghan mọ iyaạr phọ odị aḍighi bọ eḅeraạn aani nyinhạ. Mem dị onyọ aKristẹn asạr awilhenhaạn, pọ odị maḅọgh iiḅaghamhị phọ alọgh ḍighaạgh aZihova. Odị kụ ogey Oogboom Iiruẹn siẹn oomo aḅirinhi phọ, kụ kamiteom ni elhiom ooruẹn mem mọ opọ ekpeanhaạn bọ.” Eeghe kụ iḍighi kụ aZihova uromha bọ iyira osạr ghan owilhenhaạn r’okori dị odị kụ kasoph ooruẹn?

8. Ika kụ idị osạr ghan owilhenhaạn eḍeenhaan osereghiạn onmạ ighirigiir phọ aZihova?

⁸ Osạr ghan owilhenhaạn raḍeenhaan ghan osereghiạn onmạ ighirigiir phọ aZihova. Ḍiniin aḍidogh aZizọs, odị amaaniọm aZihova odẹ-otu dị asạr awilhenhaạn ebenhẹ odị dị alhe oboom omhụgh kụ u/tue ukpẹ. Ebenhẹ phọ ophọn phọ o/mheera oḍeenhaan aani onmạ ighirigiir onhọn ebenhẹ dị alhe oọny omhụgh ḍighaạgh odị, kụ u/tue ukpẹ. (Mat. 18:23-35) AZizọs rutughemhị ghan iyira eeghe siẹn phọ? Eḍighi maạr dị yira okạr ri osereghiạn oboom onmạ ighirigiir phọ aZihova ruḍeenhaan ghan bọ iyira r’aloor, pọ kinyu ni iyira osạr ghan owilhenhaạn abunhọn. (Ps. 103:9) Siạ dị meten, AWatchtower phọ aḅẹm mọ: “Etigheri onhụ amem dị yira mosạr ghan owilhenhaạn bunhọn, ko/tue otomaạm osạr owilhenhaạn r’onmạ ighirigiir phọ Enhaạn eego bọ esi aKraist.”

9. Anhiạn kụ edị aZihova ranmạ ghan ighirigiir? (Matiu 6:14, 15)

⁹ Kosạr ri obilhenhaạn bulọ rosạr ghan kowilhenhaạn. AZihova ranmạ ghan ighirigiir bulọ ronmạ ghan ighirigiir. (Mat. 5:7; Jems. 2:13) AZizọs aagholhomhi ni ephigh phọ ephẹn phọ mem mọ atughemhị bọ bumatuạn phọ odị ilọ ooḅereghị. (Bạl Matiu 6:14, 15.) Epẹ omhạn, aZihova aghaạph ni iniin phọ idị egbolhomaam ebenhẹ phọ odị Job. Ikpo onhụ iraạr arighirị phọ aJob Eliphaz, Bildad, r’aZophar ikạr kụ ephin esi aJob. Kuolọ aZihova aromha nyodị ooḅereghinhaạn abidị. AJob aḍighi ni iduọn phọ, kụ aZihova asẹph nyodị.—Job 42:8-10.

10. Uḍighi ika kụ olhọgh ghan iyaạr olhoghi eḍighi bọ ooto r’osooromineen? (Efesọs 4:31, 32)

¹⁰ Olhọgh ghan iyaạr olhoghi eḍighi ni ooto r’osooromineen. AZihova rawạ mọ yira oḍuạ esi adool olhọgh ghan iyaạr olhoghi. (Bạl Efesọs 4:31, 32.) Odị uromha iyira mọ ‘ibilẹ oghạgh olhoghi r’ofughughuuny.” (Ps. 37:8) Eḍighi ni osụ olhoghi odaphạn oromha phọ ophọn phọ. Olhọgh iyaạr olhoghi ketue ni engọ iiḅaghamhị loor phọ r’iitughiạn phọ ayira. (Prov. 14:30) Oye lọ aphughọl okarạph ooghọ kụ kaḍighima iyaạr k/onhọn oye. Igina phọ kẹn kụ edị yira oghiọm ghisigh oghaghạm olhoghi oye, yira kụ komiinhọm, k/oye phọ. Kụ iḍighi kụ, mem dị yira osạr owilhenhaạn bunhọn pọ yira roḍighinhaan ghan loor ayira iiḅi. (Prov. 11:17) Yira romoọgh ghan eephọ olhoghi, koḅilhẹ oghị ghisigh siẹn arukumuan phọ aZihova.

11. ABaibul phọ akaạph eeghe ilọ oḍighi oḅulhemhian? (Rom 12:19-21)

¹¹ Oḍighi oḅulemhian olọ aZihova. AZihova iyira u/ngọ elhiom oḍighi oḅulhemhian ghan oye lọ uḍighi iyira ikarạph. (Bạl Rom 12:19-21.) Loor egbem olhegheri iyaạr phọ r’iitughiạn phọ ayira i/munughan bọ, yira ko/tue osoph ooruẹn dị aaleeny idiphọ Enhaạn. (Hib. 4:13) Kụ eeni amem olhoghoma phọ r’inyuughiom mọ ayira repuẹ ghan ni ooruẹn  phọ ayira. AZihova aphum ni Jems ogẹ mọ: “Oghạgh ologhi ra/loghonaạn ghan ḍighaạgh mọ oye aḍighi ipẹ Enaạn rewạ bọ.” (Jems. 1:20) Yira kotue ni okuphom owol mọ aZihova kaḍighi ni raraạr elhiom aḅilhẹ aḍighi idị ogey ooruẹn kamite.

12. Ika kụ idị yira koḍeenhaan mọ yira oḍuom ni olhoghi iiruẹn phọ aZihova?

¹² Osạr owilhenhaạn raḍeenhaan ghan mọ yira oḍuom ni olhoghi iiruẹn phọ aZihova. Mem dị yira owilhẹ mọ aZihova kụ aalemhi raraạr, pọ yira oḍuomolhoghi mọ aZihova kaaḍighion ni iiḅaghamhị phọ ikarạph mekọm bọ. Siphẹ omhoom aḅirinhi phọ, raraạr phọ ipẹ rekọm ghan bọ eephinha ekpom mọ “koo/tughiạn ghan mun.” (Isa. 65:17) Edugh ni dị yira ko/kạgh olhoghi ḅilhẹ ko/lọgh olhoghi iyaạr, mem dị oye uḍighi iyira idị repin esi ayira ḍughụm? Uguạ, ooḅeghiọn idị abunhiin morue oḍighi.

13-14. Nạ atuughạ eeghe ilọ osạr owilhenhaạn esi eḍeenhaan phọ aTony r’aJosé?

¹³ Ibadị abumor r’abumaranhi mosopha osạr ghan owilhenhaạn ghalhamọ uḍighi ni bidị iyaạr dị ebụgh iboom. Eeghe aḍisẹph kirokirọ kụ edị bidị omhoọgh esi oḍighi iduọn phọ?

¹⁴ Kụ aTony * agbi bọ otuughạ igey phọ, odị arọl ghan epẹ Philippines, kụ oye dị oghol mọ José aghị aghiigh umor odị. Mem mọ amuphẹ phọ, aTony aḍighi oye oghạgh olhoghi r’iigamaniạn, odị anyạ oḅulhemhian. Usiph ni José olhọgh ikoli. Mem mọ oseere bọ José ikoli phọ, aTony aghunyian m’onọ ra/bilenhaạn. Kụ atuạn iduọn phọ aghị agho laagbạ. ATony amhiigh ni otuughạ aBaibul phọ r’Abugbaanhaạn AZihova. Odị aḅẹm mọ, “Iduọn mị ratuughạ bọ, mị umhiịn ni mọ ewạ mọ mị unme eten adọl aghuḍum mọ r’oghạgh olhoghi phọ amhị.” ATony roḍiiny muụm, esighẹ rekị bịn omạ nyodị okumor oye ookpomhoghan. P’eeghe idị eḍighi unmam esi odị olhegheri mọ aJosé maḍighi aani onyọ Ogbaanhaạn AZihova dị maḍiiny muụm! Mem mọ iyạl phọ abidị oozuanhaan bọ, bidị uḅolan ni, kụ aTony aḅenhị José m’onọ masạr awilhenhaạn nyodị. ATony aḅẹm mọ osạr owilhenhaạn phọ angọ nyodị iboom ibo dị anem ke/tue ekaạph.  AZihova asẹph ni eegharạ osạr owilhenhaạn phọ aTony.

15-16. Nạ atuughạ eeghe esi aPeter r’aSue ilọ osạr ghan owilhenhaạn?

¹⁵ Lhạ phọ 1985, aPeter r’aSue ughị ituughạ Kindọm Họl bịn abọmb aḅạ ekperenhom. Oye kụ aghị bịn aseere bọmb siphẹ aKindọm Họl phọ! ASue aḍighima yogh ni raraạr, odị aḅaaghạph ni ḅilhẹ o/mhiịn ghan mun eten. Odị o/nhaghạn ghan mun kẹn edu iyaạr. * APeter r’aSue upuruan ghan ni loor mọ, ‘Anhiạn kụ aḍighi ekarạph iyaạr dị erọl iduọn?’ Oye phọ k/onyọ Ogbaanhaạn AZihova. Kụ asiạ reten bịn osophonhaan nyodị ikoli. Mem dị opuru Peter r’aSue mughumọ bidị mosạr obilhenhaạn oye phọ, bidị uḅẹm mọ: “AZihova utughemhị iyoor mọ olhọgh iyaạr olhoghi ḅilhẹ r’oghạgh olhoghi rekọm ghan iiḅaghamhị kengọ loor phọ r’iitughiạn phọ ayira. Kụ iḍighi kụ, k’emhiighom mọ yoor ulhọm mọ aZihova ulhoghonhaạn iyoor ḍighaạgh dị yoor ko/lọgh olhoghi iphẹn phọ ḅilhẹ ko/kaghạm oye phọ olhoghi, pidị aghuḍum mọ ayoor arọl r’eephọ.”

¹⁶ Idughanhaan ni bidị osạr owilhenhaạn oye phọ ḍughụm? k/oomo amem. Bidị uḅẹm mọ: “Eeni amem, mem dị aSue aḅilhẹ alhoghoma eephinha phọ, ophin olhoghi phọ ayoor aḅilhẹ ghan ni amite. Kuolọ yoor u/tolhonhaạn ghan ootughiạn ghan ilọ iiḅaghamhị phọ. Esi iduọn phọ, ophin olhoghi phọ ayoor anhuụn ghan ni aḍuạ. Okạr oghaạph, eḍighi maạr dị oye phọ aseere bọ bọmb phọ akiton aḍighi onyọ umor, yoor kokuraam ni nyodị. Iphẹn emite bọ mitughemhị iyoor mọ asinhị iilhogh aBaibul phọ retagharạn ghan ni oye; ritagharạn ghan iyira ibadị areten dị yira u/seere olhoghi! Yoor omoọgh kẹn iidereghị iduọn yoor olhegheri bọ mọ moọny amem aZihova kaaḍighion ni iiḅaghamhị phọ.”

17. Nạ atuughạ eeghe esi aMyra ilọ osạr ghan owilhenhaạn?

¹⁷ AMyra atuughạ igey phọ mem dị odị m’aạl li ilhom amhạr iyạl ibạm anmụny. Olom  mọ odị o/sighẹ aani igey phọ. Esighẹ rekị bịn alhe emhạ aḅilhẹ aḅitonhaạn eghunotu phọ. AMyra aḅẹm mọ: “Mem mọ olom mọ amhị uwilhẹ bọ imhị r’ibạm anmụny phọ, mị ukạr kụ alhoghoma ipẹ ibadị rologhoma ghan bọ mem dị oye ephomhoghiạn abi bidị. Esi omaạm, iḍighi unmam esi amhị, mị akururu, akpalhạm ghan loor, aḅilhẹ aghạgh olhoghi.” Ii, apinien phọ abidị makạ, kuolọ eephinha amabi phọ edi ni. AMyra aghiọm ghisigh aḅẹm mọ: “Iphẹn mị alhoghoma ghan bọ ingọ ni imhị iiḅaghamhị esi ibadị arunwanyụ, kụ mị aru amhiịn mọ retir siya phọ amhị r’aZihova ḅilhẹ r’abunhọn.” AMyra aḅẹm mọ nyiidiphọ onọ o/ghaghạm mun olhoghi ogbaany olom mọ odị, ḅilhẹ mọ onọ o/mhooghonhaạn mun nyodị ikarạph iitughiạn. Odị aḍuom olhoghi mọ ḍiniin aḍio ogbaany olom mọ odị kaḍuraan aani ni atuman aZihova. AMyra agbon nyiidiphọ ilọ aghisigh phọ. Idiphọ onhiin dị ogina odị kụ raakonhom ibạm anmụny phọ, odị maakonhom iyạl phọ anmụny phọ odị okumu aani aZihova. Rodon aMyra aḅaạl li olhoghi iduọn odị rakumu bọ ni aZihova r’iyạl phọ anmụny phọ odị ḅilhẹ r’arughunotu phọ abidị.

18. Eeghe kụ edị yira okuphom owol ilọ aZihova idiphọ Oogboom Iiruẹn dị apelheghiom?

¹⁸ Useere ni iyira dool olhegheri mọ i/lo esi ayira osopha ilọ koogbonhaan we iiruẹn. Oogboom Iiruẹn phọ apelheghiom bọ aZihova kapạm ni oḍighi oogbo iiruẹn phọ agey. (Rom. 14:10-12) Yira okạr kụ oḍuomolhoghi mọ oomo amem aZihova kaagbo ni iiruẹn eten dị eḅọph r’asiigbu igey r’ikarạph phọ odị eeleeny bọ. (Gen. 18:25; 1 Ki. 8:32) R’amem r’amem odị ka/ḍighi idị ii/leeny!

19. Elhiom ooruẹn phọ aZihova emhunhughan bọ keḍighi eeghe kụ emuneni?

¹⁹ Yira opogh ni rokiọm ghisigh omhiịn amem dị aZihova kaaḍighion oomo iiḅaghamhị phọ e/munughan r’ikarạph mekọm bọ. Mem mọ amuphẹ phọ, oomo ariiphinha r’iitughiạn dị eḍighi ilọ oḅonyonhu ozuan kesi ni eekunha. (Ps. 72:12-14; Ogan. 21:3, 4) Kụ koo/tughiạn ghan mun. Iduọn yira rokori bọ muukiạ amem mọ amuphẹ phọ, ekạr kụ eḍighi iyaạr aḍiḅeraạn iduọn aZihova munyaamhị bọ iyira ilọ otuughaạny odị esi osạr ghan owilhenhaạn abunhọn.