1. Mɛni si nɛ Yehowa wo yayami peeli nɛ a tsake a tsui?

 E NGƐ mi kaa Yehowa ji wa Bɔlɔ, Mlaa Wolɔ kɛ Kojolɔ mohu lɛɛ, se e ji wa Tsɛ nɛ ngɛ suɔmi hulɔ. (La 100:3; Yes. 33:22) Ke wa tɔ̃ e nɔ nɛ wa tsake wa tsui niinɛ ɔ, e ma nyɛ maa ngɔ wa yayami ɔ kɛ ke wɔ, nɛ e suɔ nɛ e pee jã hulɔ. (La 86:5) Yehowa gu gbalɔ Yesaya nɔ kɛ wo wɔ he wami ke: “Ke nyɛ he yayami ɔ tsu kaa mɛni po, ma ha e ma hiɛ futaa kaa snoo.”​—Yes. 1:18.

2. Ke wa suɔ nɛ huɛ bɔmi kpakpa nɛ hi waa kɛ nihi wa kpɛti ɔ, mɛni e sa kaa waa pee?

² Akɛnɛ wa yi mluku he je ɔ, wɔ tsuo wa tɔ̃ɔ nihi a nɔ kɛ guɔ wa ní peepee kɛ wa munyu tumi nɔ. (Yak. 3:2) Lɔ ɔ tsɔɔ we kaa huɛ bɔmi kpakpa be nyɛe maa hi waa kɛ nihi nɛ wa tɔ̃ a nɔ ɔ wa kpɛti. Huɛ bɔmi kpakpa ma nyɛ maa hi waa kɛ mɛ wa kpɛti ke waa kɛ tɔmi keɔ. (Abɛ 17:9; 19:11; Mat. 18:21, 22) Ke nɔ ko pee ní nyafinyafi komɛ nɛ e dɔ wɔ ɔ, Yehowa suɔ nɛ waa ngɔ jamɛ a nɔ ɔ tɔmi kɛ ke lɛ. (Kol. 3:13) Wa ngɛ yi mi tomi kpakpa he je nɛ e sa kaa waa pee jã. Wa le kaa be fɛɛ be ɔ, Yehowa ‘ngɔɔ tɔmi kɛ keɔ faa.’​—Yes. 55:7.

3. Mɛni he wa ma susu ngɛ ní kasemi nɛ ɔ mi?

³ Ngɛ ní kasemi nɛ ɔ mi ɔ, wa ma susu bɔ nɛ adesahi nɛ a yi mluku ɔ maa kase Yehowa konɛ a ngɔ nihi a tɔmihi kɛ ke mɛ ɔ he. Mɛni yayamihi nɛ e sa nɛ wa wo asafo mi nikɔtɔma amɛ a  tue nɔ ngɛ he? Mɛni he je nɛ Yehowa woɔ wɔ he wami kaa waa kɛ nihi a tɔmi nɛ ke mɛ ɔ? Wa nyɛmimɛ komɛ na nɔ́ wawɛɛ akɛnɛ nihi pee ní komɛ kɛ si mɛ ɔ he je. Mɛni wa ma nyɛ maa kase kɛ je wa nyɛmimɛ nɛ ɔmɛ a ngɔ?

4. (a) Ke Yehowa sɔmɔlɔ ko pee yayami nɛ hɛdɔ ngɛ he ɔ, mɛni nɛ e sa nɛ e pee? (b) Ke asafo mi nikɔtɔmahi kɛ yayami peelɔ ko kpe ɔ, mɛni ji a blɔ nya ní tsumi?

⁴ Ke nɔ ko pee yayami nɛ hɛdɔ ngɛ he ɔ, e sa nɛ e bɔ asafo mi nikɔtɔma amɛ amaniɛ. Wa maa na yayamihi nɛ hɛdɔ ngɛ he ɔ ekomɛ ngɛ 1 Korinto Bi 6:9,10. Ke nɔ ko pee yayami nɛ hɛdɔ ngɛ he ɔ, e tɔ̃ Mawu mlaa a nɔ. Ke Kristofo no ko pee yayami nɛ hɛdɔ ngɛ he ɔ, e sa nɛ e sɔle ngɛ he ha Yehowa Mawu, nɛ e ya na asafo mi nikɔtɔma amɛ hulɔ. (La 32:5; Yak. 5:14) Mɛni ji asafo mi nikɔtɔma amɛ a blɔ nya ní tsumi? Yehowa pɛ lɛ ngɛ he blɔ nɛ e kɛ yayami keɔ, nɛ e peeɔ jã kɛ guɔ kpɔmi afɔle sami ɔ nɔ. * Se Yehowa ha asafo mi nikɔtɔma amɛ he blɔ kaa a da Ngmami ɔ nɔ kɛ hyɛ kaa e sa nɛ yayami peelɔ ɔ nɛ e ya nɔ nɛ e hi asafo ɔ mi loo a je lɛ ngɛ mi. (1 Kor. 5:12) Bɔ nɛ pee nɛ a nyɛ nɛ a tsu ní tsumi nɛ ɔ saminya a, a bɔɔ mɔde kaa a ma ha sane bimihi nɛ nyɛɛ se nɛ ɔmɛ a heto: Anɛ nɔ ɔ je blɔ nɛ e pee yayami ɔ lo? Anɛ nɔ ɔ bɔ mɔde kaa e maa laa e yayami ɔ nɔ lo? Anɛ nɔ ɔ ya nɔ nɛ e pee yayami ɔ be babauu lo? Nɛ nɔ́ nɛ he hia pe kulaa a, odase ngɛ nɛ tsɔɔ kaa nɔ ɔ je e tsui mi nɛ e pia e he niinɛ lo? Anɛ odase ko ngɛ nɛ tsɔɔ kaa Yehowa ngɔ nɔ ɔ he yayami ɔ kɛ ke lɛ niinɛ lo?​—Níts. 3:19.

5. Mɛni jɔɔmi nɛ jeɔ asafo mi nikɔtɔma amɛ a ní tsumi ɔ mi kɛ baa?

⁵ Ke asafo mi nikɔtɔmahi kɛ yayami peelɔ ko kpe ɔ, oti nɛ a kɛ maa a hɛ mi ji kaa a maa ma sane ɔ nya si ngɛ zugba nɛ ɔ nɔ kaa bɔ nɛ a ma nya si momo ngɛ hiɔwe ɔ. (Mat. 18:18) Kɛ asafo ɔ náa blɔ nya tomi nɛ ɔ he se ha kɛɛ? Blɔ nya tomi nɛ ɔ haa nɛ a jeɔ yayami peelɔ nɛ e tsakee we e tsui, nɛ́ e ma nyɛ maa ye Yehowa jijɔ ɔmɛ nɛ a he jua wa a eko awi ɔ, kɛ jeɔ asafo ɔ mi. (1 Kor. 5:6, 7, 11-13; Tito 3:10, 11) Jehanɛ hu ɔ, blɔ nya tomi nɛ ɔ ma nyɛ maa ye bua yayami peelɔ ɔ nɛ́ e tsake e tsui konɛ Yehowa nɛ ngɔ e yayami ɔ kɛ ke lɛ. (Luka 5:32) Asafo mi nikɔtɔma amɛ sɔleɔ kɛ haa yayami peelɔ nɛ e tsake e tsui ɔ, nɛ a biɔ Yehowa konɛ e ye bua lɛ nɛ e dla e kɛ lɛ a kpɛti.​—Yak. 5:15.

6. Ke a fiee nɔ ko kɛ je asafo ɔ mi ɔ, anɛ Yehowa ma nyɛ maa ngɔ e yayami ɔ kɛ ke lɛ lo? Moo tsɔɔ nya.

⁶ Waa ngɔ lɛ kaa benɛ asafo mi nikɔtɔma amɛ kɛ yayami peelɔ ɔ kpe ɔ, a na kaa nɔ ɔ tsakee we e tsui. Ke e ba jã a, a maa fiee lɛ kɛ je asafo ɔ mi. Ke yayami peelɔ ɔ tɔ̃ ma a mlaa ko nɔ ɔ, asafo mi nikɔtɔma amɛ be e nɔ lae, a maa ngmɛɛ e he nɛ ma a kɛ lɛ nɛ ye. Yehowa ha ma nɔ yeli ɔmɛ he blɔ kaa ke nɔ ko tɔ̃ ma a mlaa nɔ ɔ, a kojo nɔ ɔ nɛ a gbla e tue, ke nɔ ɔ tsake e tsui jio, e tsakee we e tsui jio. (Rom. 13:4) Se ke pee se ɔ, nɔ ɔ yɔse kaa nɔ́ nɛ e pee ɔ hí, nɛ e tsake e susumi kɛ e ní peepee ɔ, Yehowa pee klaalo kaa e kɛ e yayami maa ke lɛ. (Luka 15:17-24) Ke yayami nɛ nɔ ɔ pee ɔ kle kaa mɛni po, Yehowa ma nyɛ maa ngɔ e tɔmi kɛ ke lɛ.​—2 Kron. 33:9, 12, 13; 1 Tim. 1:15.

7. Mɛni si fɔfɔɛ mi nɛ e ma bi nɛ waa kɛ nɔ ko nɛ tɔ̃ wa nɔ ɔ e yayami nɛ ke lɛ?

⁷ Pi wɔ nɛ wa maa tsɔɔ kaa Yehowa kɛ nɔ ko yayami maa ke lɛ loo e kɛ be lɛ kee! E hi  wawɛɛ kaa wa le enɛ ɔ. Se kɛ̃ ɔ, nɔ́ kpa ko ngɛ nɛ e sa nɛ waa mwɔ yi mi kpɔ ngɛ he. Mɛni ji jamɛ a nɔ́ ɔ? Be komɛ ɔ, nɔ ko ma nyɛ maa pee yayami nɛ hɛdɔ ngɛ he kɛ si wɔ, nɛ eko ɔ, e ma kpa wɔ pɛɛ nɛ e de wɔ kaa waa ngɔ e yayami ɔ kɛ ke lɛ. E ma nyɛ maa ba hu kaa nɔ ɔ be wɔ pɛɛ kpae. Ke e ba jã po ɔ, wa ma nyɛ maa mwɔ yi mi kpɔ kaa waa kɛ e yayami ɔ maa ke lɛ, nɛ waa ngmɛɛ abofu ɔ kɛ dɔdɔɛ ɔ tsuo he. Ngɛ anɔkuale mi ɔ, enɛ ɔ ma nyɛ ma he be, nɛ e biɔ mɔde bɔmi hulɔ, titli ke nɔ́ nɛ nɔ ɔ pee ɔ dɔ wɔ wawɛɛ nitsɛ. September 15, 1994 Blɛfo gbi Hwɔɔmi Mɔ ɔ de ke: “Ke o ngɔ yayami peelɔ ko e yayami kɛ ke lɛ ɔ, lɔ ɔ tsɔɔ we kaa o kplɛɛ nɔ́ nɛ nɔ ɔ pee ɔ nɔ. Ke Kristofo no ngɔ yayami kɛ ke ɔ, lɔ ɔ tsɔɔ kaa nɔ ɔ ngmɛɛ sane ɔ he kɛ ha Yehowa konɛ e kojo ngɛ dami mi. Lɛ ji Kojolɔ nɛ maa kojo je ɔ tsuo ngɛ dami mi, nɛ e maa kojo sane ɔ ngɛ be nɛ sa mi.” Mɛni he je nɛ Yehowa woɔ wɔ he wami kaa waa kɛ yayami nɛ ke, nɛ́ wa si sane ɔ ha lɛ nɛ e kojo ngɛ dami mi ɔ?

8. Mɛni blɔ nɔ ke wa ngɔ yayami kɛ ke ɔ, e tsɔɔ kaa wa hɛ sa mɔbɔ nami nɛ Yehowa je kpo kɛ tsɔɔ wɔ ɔ?

⁸ Ke waa kɛ yayami ke ɔ, lɔ ɔ tsɔɔ kaa wa hɛ sa mɔbɔ nami nɛ Yehowa jeɔ kpo kɛ tsɔɔ wɔ ɔ. Ngɛ nɔ́ he tomi nɔ́ ko mi ɔ, Yesu ngɔ Yehowa kɛ to matsɛ ko he. Matsɛ nɛ ɔ ngɔ e nyɔguɛ ko nɛ e ye lɛ hiɔ agbo nɛ e nyɛ we nɛ e wo ɔ e hiɔ ɔ kɛ ke lɛ. Se jamɛ a nyɔguɛ ɔ je we mɔbɔ nami kpo kɛ tsɔɔ nyɔguɛ kpa nɛ e ye lɛ hiɔ nyafii ko ɔ. (Mat. 18:23-35) Mɛni Yesu ngɛ wɔ tsɔɔe? Ke wa hɛ sa mɔbɔ nami agbo nɛ Yehowa je kpo kɛ tsɔɔ wɔ ɔ, lɔ ɔ ma ha nɛ waa kɛ nihi a tɔmi maa ke mɛ. (La 103:9) Jeha komɛ nɛ be ɔ, Hwɔɔmi Mɔ ɔ de ke: “Ke waa kɛ nihi a tɔmi ke mɛ si abɔ po ɔ, e kɛ si abɔ nɛ Mawu ngɔ wa tɔmi kɛ ke wɔ nɛ e je mɔbɔ nami kpo kɛ tsɔɔ wɔ kɛ gu Kristo nɔ ɔ be sɔe.”

9. Mɛnɔmɛ nɛ Yehowa naa mɛ mɔbɔ? (Mateo 6:14, 15)

⁹ Ke waa kɛ nihi a yayami ke mɛ ɔ, Yehowa hu maa ngɔ wa yayami kɛ ke wɔ. Yehowa jeɔ mɔbɔ nami kpo kɛ tsɔɔ nihi nɛ a naa ni kpahi mɔbɔ ɔ. (Mat. 5:7; Yak. 2:13) Yesu ha nɛ oti nɛ ɔ pee heii benɛ e tsɔɔ e kaseli ɔmɛ bɔ nɛ a sɔle ha a. (Kane Mateo 6:14, 15.) Yehowa sɛ hlami nɛ e ma jamɛ a oti ɔ nɔ mi ngɛ e kɛ e sɔmɔlɔ Hiob a sane ɔ mi. Munyuhi nɛ Elifaz, Bildad, kɛ Zofar tu ɔ dɔ anɔkualetsɛ Hiob wawɛɛ nitsɛ. Yehowa fã Hiob kaa e sɔle kɛ ha mɛ. Benɛ Hiob pee jã a, Yehowa jɔɔ lɛ.​—Hiob 42:8-10.

10. Mɛni blɔ nɔ nɛ ke wa ngmɛɛ we abofu he ɔ, e ma nyɛ maa ye wɔ nitsɛmɛ awi? (Efeso Bi 4:31, 32)

¹⁰ Ke wa ngɔ dɔdɔɛ kɛ wo wa mi ɔ, e yeɔ wɔ nitsɛmɛ awi. Abofu ngɛ kaa tlomi ko nɛ e mi jiɔ. Yehowa suɔ nɛ wa je tlomi nɛ ɔ ngɛ wa kuɛ nɔ konɛ wa tue mi nɛ jɔ wɔ. (Kane Efeso Bi 4:31, 32.) E wo wɔ he wami ke: Wa “ha abofu se nɛ po, nɛ́ [waa] ngmɛɛ mi mi fumi he.” (La 37:8, NW) Ke waa kɛ ga womi nɛ ɔ tsu ní ɔ, e maa ye bua wɔ. Ke wa ya nɔ nɛ wa ná nɔ ko nɛ e tɔ̃ wa nɔ ɔ he abofu ɔ, e ma nyɛ maa ye wa nɔmlɔ tso ɔ awi. (Abɛ 14:30) Kaa bɔ nɛ ke o nu nɔ́ ko nɛ duɔ ngɛ mi ɔ, e maa ye mo awi ɔ, jã kɛ̃ nɛ ke nɔ ko tɔ̃ o nɔ nɛ o hɛɛ abofu ɔ mi ɔ, e ma nyɛ maa ye mo awi, se pi nɔ nɛ e tɔ̃ o nɔ ɔ. Enɛ ɔ he ɔ, ke waa kɛ nihi a yayami ke mɛ ɔ, e maa ye bua wɔ nitsɛmɛ wawɛɛ. (Abɛ 11:17) Wa tue mi maa jɔ wɔ, nɛ wa ma nyɛ maa ya wa hɛ mi ngɛ Yehowa sɔmɔmi mi.

11. Mɛni Baiblo ɔ de ngɛ lue yemi he? (Roma Bi 12:19-21)

¹¹ Yehowa nɔ́ ji lue yemi. Yehowa ha we wɔ  he blɔ kaa ke nɔ ko tɔ̃ wa nɔ ɔ, waa gbla e tue. (Kane Roma Bi 12:19-21.) Akɛnɛ wa yi mluku he je ɔ, wa be nyɛe maa kojo sane ko saminya kaa bɔ nɛ Mawu maa kojo ɔ. (Heb. 4:13) Be komɛ ɔ, wa daa wa he numi nɔ kɛ kojoɔ, nɛ lɔ ɔ ha we nɛ waa kojo ngɛ dami mi. Yehowa ngɔ e mumi ɔ kɛ wo Yakobo he wami nɛ e ngma ke: “Adesa mi mi fumi ɔ ngɔɛ Mawu dami kɛ bɛ.” (Yak. 1:20) Wa ma nyɛ ma ná nɔ mi mami kaa Yehowa maa pee nɔ́ nɛ da, nɛ e maa ye dami sane.

12. Mɛni wa ma nyɛ maa pee kɛ tsɔɔ kaa wa ngɛ hemi kɛ yemi ngɛ blɔ nɔ nɛ Yehowa guɔ kɛ kojoɔ ɔ mi?

¹² Ke waa kɛ yayami ke ɔ, lɔ ɔ tsɔɔ kaa wa ngɛ nɔ mi mami kaa Yehowa kojoɔ ngɛ dami mi. Ke wa he ye kaa Yehowa maa kojo sanehi tsuo ngɛ dami mi ɔ, lɔ ɔ tsɔɔ kaa wa ngɛ nɔ mi mami kaa Yehowa ma nyɛ ma je nyagbahi nɛ yayami ngɔ kɛ ba a kɛ je. Ngɛ e je e ehe ɔ mi ɔ, ní yayamihi nɛ wa gblee mi ɔ, ‘wa be kaie hu; wa hɛ maa je a nɔ pɛsɛpɛsɛ.’ (Yes. 65:17) Se ke nɔ ko pee wɔ nɔ́ ko nɛ e dɔ wɔ wawɛɛ ɔ, anɛ wa ma nyɛ ma je abofu ɔ kɛ dɔdɔɛ ɔ ngɛ wa tsui mi lo? Wa maa hyɛ blɔ nɔ nɛ ni komɛ gu kɛ pee jã.

13-14. Mɛni o kase ngɛ yayami nɛ o kɛ maa ke ɔ he kɛ je Tony kɛ José a níhi a si kpami ɔ mi?

¹³ Wa nyɛmimɛ fuu ngɛ nɛ nihi pee mɛ níhi nɛ e dɔ mɛ wawɛɛ, se a mwɔ a yi mi kpɔ kaa a kɛ tɔmi ɔ maa ke. Benɛ a pee jã a, mɛni jɔɔmihi nɛ a ná?

¹⁴ Tony * nɛ e ngɛ Philippines ɔ ba ná le kaa nyumu ko nɛ a tsɛɛ lɛ José ɔ lɛ gbe e nyɛminyumu nikɔtɔma amɛ a kpɛti nɔ kake. Nɔ́ nɛ ɔ ya nɔ jeha komɛ a se loko Tony ba pee Yehowa Odasefo no. Jamɛ a be ɔ, Tony ji nɔ ko nɛ e hɛ mi jɔɛ kulaa, nɛ e suɔ nɛ e pee José nɔ́ ko kɛ to nane mi. A nu José nɛ a wo lɛ tsu ngɛ nɔ́ nɛ e pee ɔ he. Pee se nɛ a je José ngɛ tsu womi mi ɔ, Tony fia e pɛɛ si kaa e ma hla lɛ nɛ e gbe lɛ. Enɛ ɔ he ɔ, e ya he tu kɛ fɔ si. Pee se ɔ, Tony kɛ Yehowa Odasefohi ba bɔni Baiblo ɔ kasemi. E de ke: “Kɛ gu Baiblo ɔ kasemi nɔ ɔ, i ba na kaa e sa nɛ ma tsake ye ní peepee nɛ ma ngmɛɛ abofu he hulɔ.” Bɔɔbɔɔbɔɔ ɔ, a baptisi Tony, nɛ nyagbenyagbe ɔ, a hla lɛ kaa  asafo mi nɔkɔtɔma. E pee lɛ nyakpɛ wawɛɛ benɛ e ba le kaa a baptisi José hu kaa Odasefo no ɔ. Benɛ mɛ ni enyɔ ɔmɛ a kpe ɔ, a fua a sibi, nɛ Tony de José kaa e ngɔ e tɔmi ɔ kɛ ke lɛ. Tony tsɔɔ kaa yayami ɔ nɛ e kɛ ke ɔ ha nɛ e ná bua jɔmi wawɛɛ nitsɛ. Ngɛ anɔkuale mi ɔ, bua jɔmi nɛ e ná a hí kalemi. Niinɛ, Yehowa jɔɔ Tony akɛnɛ e je e tsui mi nɛ e kɛ yayami ke ɔ he je.

15-16. Mɛni o kase ngɛ Peter kɛ Sue a níhi a si kpami nɛ kɔɔ tɔmi nɛ waa kɛ maa ke ɔ he?

¹⁵ Ngɛ jeha 1985 ɔ mi ɔ, Peter kɛ Sue ya asafo mi kpe ngɛ Matsɛ Yemi Asa a nɔ. Benɛ a hɛ be a he nɔ ɔ, si kake too ɔ, a nu nɛ oplɛmi ko pɛ. Nyumu ko nɛ e ngɔ oplɛmi nɛ ɔ kɛ ya wo Matsɛ Yemi Asa a nɔ. Sue plaa wawɛɛ, nɛ enɛ ɔ ha nɛ e nyɛ we nɔ́ hyɛmi nɛ e nui nɔ́ hulɔ. Enɛ ɔ ha nɛ e nyɛ we níhi a he fu numi saminya. * Peter kɛ Sue ya nɔ nɛ a bi a he ke, ‘Mɛnɔ kulaa nɛ e pee yi wu tso ní kaa kikɛ?’ Ngɛ jeha komɛ a se ɔ, a nu awi yelɔ nɛ e pi Yehowa sɔmɔlɔ ɔ, nɛ a wo lɛ tsu e wami jehahi tsuo. Benɛ a bi Peter kɛ Sue kaa a ngɔ nyumu ɔ tɔmi kɛ ke lɛ lo ɔ, a de ke: “Yehowa tsɔɔ wɔ kaa ke waa kɛ abofu wo wa mi ɔ, e ma nyɛ maa ye wa nɔmlɔ tso ɔ awi. Jehanɛ se hu ɔ, e ma nyɛ maa sa bɔ nɛ wa peeɔ wa ní kɛ bɔ nɛ wa susuɔ níhi a he ha a he. Benɛ oplɛmi ɔ pɛ ɔ, be bɔɔ ko se ɔ, wa bi Yehowa konɛ e ha nɛ waa ngmɛɛ abofu nɛ ngɛ wa mi ɔ he, konɛ wa nyɛ nɛ waa hi si ngɛ tue mi jɔmi mi.”

¹⁶ Anɛ a ná lɛ gbɔjɔɔ kaa a maa ngɔ nyumu ɔ tɔmi kɛ ke lɛ lo? Pi fɛɛ be. A tsa nɔ ke: “Be fɛɛ be nɛ Sue maa nu yeyee he ngɛ e nɔmlɔ tso mi ɔ, kɛkɛ abofu ɔ nya pa wa ekohu. Se waa kɛ wa juɛmi mɛ nyagba nɛ ɔ nɔ, lɔ ɔ be bɔɔ se ɔ, kɛkɛ dɔdɔɛ ɔ je. Ngɛ anɔkuale mi ɔ, wa ma nyɛ ma de ngɛ wa tsui mi kaa ke awi yelɔ nɛ ɔ ba pee wa nyɛmi ligbi ko ɔ, wa ma nya e he. Níhi a si kpami nɛ ɔ ha nɛ wa na kaa Baiblo sisi tomi mlaahi a he ngɛ se nami. A haa nɛ wa he jɔɔ wɔ pe bɔ nɛ wa ma nyɛ ma susu! Enɛ ɔ haa nɛ wa tsui nɔɔ wa mi  hulɔ, ejakaa wa le kaa e be kɛe nɛ Yehowa ma je yi wu tso níhi kɛ je wa si himi mi.”

17. Mɛni o kase ngɛ Myra níhi a si kpami ɔ mi ngɛ tɔmi nɛ waa kɛ maa ke ɔ he?

¹⁷ Nyɛmiyo ko nɛ a tsɛɛ lɛ ke Myra sɛ gba si himi mi nɛ e fɔ bimɛ tsɔwi enyɔ loko e na anɔkuale ɔ. Se e huno ɔ bua jɔɛ anɔkuale ɔ he. Be komɛ a se ɔ, nyumu ɔ bɔ ajuama nɛ e kua e weku ɔ. Myra de ke: “Benɛ nyumu ɔ je i kɛ jokuɛwi ɔmɛ wa he ɔ, e dɔ mi, nɛ i nu he kaa ye huno ɔ sisi mi. I he we yi, ye nya kpɛ ye he, i ye aywilɛho, nɛ i ná abofu. I nu he kaa imi nɛ i ha nɛ ye huno ɔ pee jã.” E ngɛ mi kaa a gba a se po mohu lɛɛ se e ya nɔ nɛ e nu dɔdɔɛ ɔ he. Myra tsa nɔ ke: “I pee yeyeeye, nɛ ye mi mi fu nyɔhiɔhi babauu. I ba yɔse kaa ye si fɔfɔɛ ɔ sa huɛ bɔmi nɛ ngɛ i kɛ Yehowa kɛ ye nyɛmimɛ ɔmɛ wa kpɛti ɔ he.” Myra tsɔɔ kaa e ngmɛɛ abofu ɔ he, nɛ e sume nɛ nɔ́ yaya ko nɛ ba e huno momo ɔ nɔ. Myra ngɛ blɔ hyɛe kaa e huno momo ɔ ma ba le Yehowa ligbi ko. Myra ngɔ e juɛmi kɛ ma ní kpakpahi nɛ Yehowa wo si kaa e maa pee hwɔɔ se ɔ nɔ. Kaa fɔlɔ kake ɔ, e tsɔse e bimɛ enyɔ ɔmɛ nɛ a ba pee Yehowa sɔmɔli. Mwɔnɛ ɔ, Myra ngɛ Yehowa sɔmɔe kɛ bua jɔmi, nɛ e bimɛ enyɔ ɔmɛ kɛ a weku ɔmɛ hu ngɛ jã pee.

18. Mɛni hɛ kɛ nɔ fɔmi wa ma nyɛ ma ná ngɛ Yehowa mi kaa Kojolɔ nɛ e yeɔ dami sane?

¹⁸ E ji bua jɔmi kaa a ha we wɔ he blɔ kaa waa kojo wa nyɛmimɛ ejakaa Yehowa ji Kojolɔ Ngua, nɛ e maa hyɛ ní tsumi nɛ he hia wawɛɛ nɛ ɔ nɔ. (Rom. 14:10-12) Wa ma nyɛ ma ná hɛ kɛ nɔ fɔmi nitsɛ kaa e ma nyɛ maa kojo ngɛ blɔ nɛ da nɔ ngɛ nɔ́ nɛ da kɛ nɔ́ nɛ dɛ tsuo he. (1 Mose 18:25; 1 Ma. 8:32) E be nɔ́ ko nɛ dɛ blɔ pee kɔkɔɔkɔ!

19. Mɛni nɛ Yehowa dami sane yemi ɔ ma tsu he ní?

¹⁹ Wa ngɛ mlɛe kɛ ya si be nɛ Yehowa ma je ní yayamihi tsuo nɛ mluku nɛ adesa yi ɔ ngɔ kɛ ba a. Jamɛ a be ɔ, Yehowa ma je nyagbahi tsuo nɛ waa kɛ kpeɔ ɔ kɛ je. (La 72:12-14; Kpoj. 21:3, 4) Ní nɛ ɔmɛ be wa juɛmi mi bae hu. Be mi nɛ wa ngɛ mlɛe nɛ jamɛ a bua jɔmi be ɔ nɛ ba a, wa bua jɔ kaa Yehowa ha wɔ he wami kɛ nyɛmi konɛ wa nyɛ nɛ waa kase lɛ nɛ waa ngɔ nihi a tɔmihi kɛ ke mɛ.