1. Pafeliay ci Yihofa to maanan a sakiˈok i mikifalocoˈay pasasiyor a tamdaw?

 CI YIHOFA o Misangaˈay kitaanan a Tatapangan, Patirengay to Rikec ato Misawkitay, kawra o sidaˈitay a Wama ita Cingra i kakarayan. (ˈOlic 100:3; Isaya 33:22) Pakayni kita i raraw no niyah mikifalocoˈ a pasasiyor i, iraay ko fadangalan Ningra a misodod kitaanan, iraayho ko ciˈicelay a kalim sapihaenaw to demak. (ˈOlic 86:5) Pakaynian Ningra i pairasolay ci Isaya pafeli kitaanan tonini a padihkoay to falocoˈ a sakiˈok: “Talacowa matiya o macengelay no kahngangay ko nika ciraraw namo, nikawrira, sawsawen Ako kamo ta matiya o soeda a kohcal kamo.”—Isaya 1:18.

2. Ano makalimay kita ira ko ngaˈayay a kalalaˈed to tao, sasamaan ko pidemak hani?

² O tamdamdaw cowa ko malefotay, mararaway ko sowal, mararaway ko demak, masasipakararaway. (Yakop 3:2) Sakoniya sowal cowa ko ngangaˈay kita ira ko ngaˈayay kalalaˈed to tao cowa ka saan, samanen ngaˈayay kita minanam makahi misodod. (Taneng 17:9; 19:11; Matay 18:21, 22) Itini mimingay demak ano pakararaw ko tao kitaanan, makalimay ci Yihofa kitaanan makahi a misodod cangranan. (Kolosay 3:13) Iraay ko lalangian ita mihaen ko demak, samanen kita maemin milifokay to ‘taˈangayay a sasodod’ ni Yihofa.—Isaya 55:7.

3. Onini a lalakaw mamilengo to maanan?

³ Onini a lalakaw mamilengo, o cowa ka lefot a tamdaw sasamaan mitodong ci Yihofaan makahi a misodod to tao. Mamananamho ita: O maanan a raraw o fafanaˈen ko malohemay malitengay? Hano pakalalok ci Yihofa kitaanan misodod to tao? Roma i, o roma salikaka na pakayniay nano raraw no tao  taˈangayay ko kadokaˈ, mikitini i tireng no hatiniay salikaka mamananam ita ko maanan?

4. (1) Ano pakidem ko raraw no Krisciyang, sasamaan ko pidemak hani? (2) Mafanaˈ ko malohemay malitengay iraay ko pakidemay ko raraw a tamdaw i, sasamaan ko pidemak hani?

⁴ O roma waywayan pakidemay ko pisafelit to rikec no Kawas, o pakidemay a raraw, o fafanaˈen ko malohemay malitengay. Itini 1 Korinto 6:9, 10 mihadakay to pina tinakoan. O cecay Krisciyang ano midemak to mahaenay a raraw, o papasayra ci Yihofaan a mitolon, micangacang to sasodod Ningra, o papasowalenho ko malohemay malitengay tonini a demak. (ˈOlic 32:5; Yakop 5:14) Mamidemak ko malohemay malitengay to maanan hani? Soˈlin edengan ci Yihofa ko iraay ko fadangalan pakayni sapatefoc ni Yis Kristo a misongilaˈ misodod to raraw no cecay tamdaw. * Kawra, pafelian ni Yihofa ko malohemay malitengay to cecay ˈinorong, misaali cangranan mikitini safalod no Fangcalay Cudad a misawkit to mararaway tamdaw ngangaˈay materek i kasakopang hokira. (1 Korinto 5:12) Sapisawkitaw, adihayay ko hademak no malohemay malitengay, tinakoen o mamisongilaˈ cangra misimsim to laenoay salicay: Onini a tamdaw o padetengay a mararaw han? Mihalakaay cingra mihaen to demak han? Marariday cingra a mararaw, hanaca padotocay to cecay liyad han? Sakakaay i, iraay ko wacay to paihkalay to mikifalocoˈay cingra a pasasiyor? Iraay ko tahapinangan to maharekayto ci Yihofa a misodod cingranan han?—Dmak 3:19.

5. O tayal no malohemay malitengay papaira to maanan a haepoc hani?

⁵ Ano masasiˈayaw ko malohemay malitengay a masasowal to mararaway a tamdaw i, o patosokan nangra o sapahecadaw to i kakarayan ko misaˈosian. (Matay 18:18) O malohemay malitengay misongilaˈ midemak toniya ˈinorong, wa samaan palemed to kasakopang hani? O kasakopang wa ngaˈay milifok to sadipot, samanen caay kakahi pasasiyor a tamdaw cowa kangaˈay materek i kasakopang mipalak to kalimlaan a siri ni Yihofa. (1 Korinto 5:6, 7, 11-13; Titus 3:10, 11) O malohemay malitengay mihaen ko demak wa ngaˈay padama to mararaway a tamdaw pasasiyor, milifok to sasodod ni Yihofa. (Luka 5:32) Patado ko malohemay malitengay to mararaway tamdaw a mitolon, micangacang ci Yihofaan padama cingranan ‘patikol a tanektek.’—Yakop 5:15.

6. Ano mafalahay ko cecay tamdaw, wa ngaˈayho cingra milifok to sasodod no Kawas han? Tadtaden.

⁶ Ano masasiˈayaw a masasowal ko malohemay malitengay to mararaway tamdaw i, mahapinang to cowa pasasiyor konini a tamdaw, o fafalahen cingra. Ano misafelitay konini a tamdaw to holic no hekal, cowa ko papaˈading ko malohemay malitengay cingranan, samanen pafelian no Kawas ko sifo to fadangalan misawkit ato misayfang to polong mararaway tamdaw. Ano pasasiyoray konini a tamdaw anca cowa i, o mamicada cingra to pitefoc no holic. (Loma 13:4) Kawra, ikorto ano talipaˈelalay konini a tamdaw, soˈliˈlin a pasasiyor hanaca patatikol, o mamakahi ci Yihofa a misodod cingranan. (Luka 15:17-24) Soˈlin pakidemay ko raraw ningra, o sasidaˈit ko Kawas cingranan.—2 Rayray 33:9, 12, 13; 1 Timoti 1:15.

7. Samaan ko pidemak ita, o misododay to pakararaway kitaanan a tamdaw?

⁷ O sasododen no Kawas ko cecay tamdaw hokira cowa ko kita ko mamisaˈosi, mafanaˈ tonini tada parihadayay kitaanan. Kawra, iraay ko cecay sasaˈosien o kita ko mamidemak. O maanan a saˈosi hani? Latekay pakararaway ko tao kitaanan, taˈangayay ko pidokaˈ  kitaanan. Miliˈay cingra kitaanan alatek, misaali to sasodod ita, anca cowa pihaen ko demak ningra alatek, ano samaanto ko pakayraan, o ngangaˈay mipiliˈ kita misodod cingranan, tatodong i, misaˈosi kita ecato ka ˈinteh ko falocoˈ, ecato ka keter cingranan. Manaokaniw, sapisawadaw a ˈinteh misaaliay to toki ato pisaˈicel, ano taˈangayay ko macadaay a pidokaˈ kitaanan, mangalefay mahaen. Mikecolay 1994 miheca 9 folad 15 romiˈad sanay: “Misodod to mararaway tamdaw cowa ko pakiyadiay to raraw. Pakaynien i Krisciyang, tatodong no misododay o papatoroden ko demak i kamay ni Yihofa misarocod a mitadiˈec Cingranan. Ci Yihofa o moecelay a Misawkitay toniya dohaw, wa itini Cingra i matatodongay a tatokian midemak to masadafdafay.” Hano pakalalok ci Yihofa kitaanan misodod to tao, hanaca patorod to demak i kamay Ningra hani?

8. Ano miakoˈiday kita ci Yihofaan hano mamakahito misodod to tao?

⁸ Misodod kita to tao paihkalay to miakoˈiday ko niyah ci Yihofaan. Itini ci Yis i cecay sapatinako, patinakoay ci Yihofaan to cecay a tawki. Onini a tawki palasawadan ko adihayay a tadah no cecay a koli, onini a tadah ano tahadaˈocto cowa ko mamapatikol nonini a koli. Kawra onini a koli caay kakahi misodod to roma citadahay cingraanan a koli, soˈlin o tadah nora tamdaw cingraanan cowa ka hakowa, kawra cowa kakahi cingra misodod. (Matay 18:23-35) Mikitini sapatinako ni Yis mananamay ita ko maanan hani? O paihkalan ni Yihofa kitaanan a siniˈada awaay ko pakaliniay, ano soˈlin kita miakoˈid Cingraanan, o mamakahi misodod to tao. (ˈOlic 103:9) O iˈayaway a Mikecolay sanay ko sowal: “Ano kinapinato kita misodod to tao, cowa ko papakalini to nano demak ni Yihofa kitaanan, samanen pakaynian Ningra ci Yis Kristoan taˈangay ko pisodod to raraw ita, paihkal to taˈangayay a siniˈada kitaanan.”

9. Siniˈadaay ci Yihofa to masamaanay a tamdaw hani? (Matay 6:14, 15)

⁹ Misodod to tao, o mamilifok ko niyah to sasodod. Siniˈadaay ci Yihofa to siniˈadaay to tao a tamdaw. (Matay 5:7; Yakop 2:13) Itini sapasifanaˈ ni Yis to nisawawaan a satolon i, mitadtaday tonini. (ˈOsien ko Matay 6:14, 15.) Mikitini kita i papidemak ni Yihofa ci Yopuan a demak, wa ngaˈay mananam ita ko malecaday a kimad. Ci Ilifac, Piltat aci Cofar oniya tatoloay tamdaw somowalay to adihayay a mariˈangay a sowal, tangongolay ko pidokaˈ to madimadiay a Yopuan, kawra palimoˈotan ni Yihofa ci Yopu patado cangranan mitolon. Mihaen ko demak ni Yopu ikor, milifokay to sapalemed ni Yihofa.—Yopu 42:8-10.

10. ˈInteh ko falocoˈ hano o tatiihay hani? (Ifiso 4:31, 32)

¹⁰ ˈInteh ko falocoˈ midokaˈay to niyah. O ˈintehay o karetengay a ˈinorong, makalimay ci Yihofa kitaanan mihepol tonini a ˈinorong. (ˈOsien ko Ifiso 4:31, 32.) Palimoˈotay Cingra kitaanan ‘palasawaden ko keter, falahen ko mangolaway.’ (ˈOlic 37:8) Tada citanengay konini a sapatalipaˈelal, samanen ano caka fasaw ko keter o mamipalak to tireng ato no haratengan no mita. (Taneng 14:30) Ano padadotoc kita a maketer, o mamidokaˈ to niyah, cowa ko mamifiyor to midokaˈay kitaanan a tamdaw, malecaday o komaenay to warak o niyah aca ko madokaˈay. Masafelitay, ano misodod kita to tao malecaday o pafeliay to sapatelong to niyah. (Taneng 11:17) Mamilifok kita to rihadayay falocoˈ, wa ngaˈay padadotoc misarocod matayal saki Yihofaan.

11. Pakayni miˈodisay, samanay ko sowal no Fangcalay Cudad? (Loma 12:19-21)

¹¹ Papaikenen ci Yihofa a misayfang. Cowa pafeli ci Yihofa kitaanan to fadangalan miˈodis to  pakararaway kitaanan a tamdaw. (ˈOsien ko Loma 12:19-21.) Cowa ko malefotay kita, caay ka songilaˈ ko pinengneng to demak, mihaenay awaay ko pakayraan ita malecad to Kawas matatodong ko pisawkit to demak. (Hipray 4:13) Nolatekay o nafalocoˈan ita micaraay to sapisawkit ita a inaneng. Itini sakayat ni Yihofa, sanay ci Yakop: ‘O keter no tamdaw cowa ka ngaˈay patalahkal to moecelay no Kawas.’ (Yakop 1:20) Wa ngaˈay pakasoˈlin kita, o mamatatodong ko midemakan ni Yihofa, salikor mapatalahkal ko moecelay.

12. Samaan paihkal to pakasoˈlinay kita o masadafdafay ci Yihofa hani?

¹² Misodod kita to tao, paihkalay to pakasoˈlinay ko niyah o masadafdafay ko Kawas. Patoroden ita ko demak i kamay ni Yihofa, paihkalay to pakasoˈlinay kita ci Yihofaan o papalahdaw to pairaan no raraw a kihcod a roray. Itini faelohay hekal, o malifaay a masakenaay a roray isaˈayaw “o mamatawalto ko iˈayaway a demak a maemin.” (Isaya 65:17) Kawra samaanay anini hani? Ano tangongolay ko kadokaˈ ita, wa soˈlin ngaˈay eca ka ˈinteh, ecato ka keter han? Nengnengen ita ko romaroma salikaka samaanay pakaremo tonini.

13-14. Pakayni misododay, mikitini nalifetan ni Toni aci Hosay mananamay iso ko maanan hani?

¹³ ˈAlomanay salikaka na tangongolay ko pidokaˈ no tao, kawra misaˈosiay cangra misodod to tao, mihaen ko demak nangra pairaay to maanan a sapalemed i niyah hani?

¹⁴ Ci Toni * itiniay i Filiping. ˈAyaw no pina miheca caho pinanam cingra to Fangcalay Cudad i, o cecay faˈinayan kaka ningra mipatayan no cecay ci Hosay hananay a tamdaw. Itiya o mariˈangay hinaketeray ci Toni, ciharatengay cingra sapiˈodisaw. Ikor, pakayni i raraw no niyah mapalitay ci Hosay. Matedal ci Hosay ikor, miketonay to sowal ci Toni ano samaanto o kakilimen cingra, mipatay cingraanan, pakayni tonini miˈacaay to cecay a kowang. Toniya tatokian, misatapangay ci Toni malacafay to Misawacayay Tamdaw ni Yihofa minanam to Fangcalay Cudad, sanay cingra: “Minanam to Fangcalay Cudad ikor, mahapinangay ako mamifalic ko niyah, mahawpay ko pifalah to ˈinteh no falocoˈ.” Ikor micadaay to paputisem ci Toni, hanaca malo malohemay malitengay. Haratengen hena, tiya mafanaˈ ci Toni to malo  Misawacayay Tamdaw ni Yihofa ci Hosay i, hakowaay ko kacekid ningra! Tiya masasoˈaraw cangra i, mahemekay a matatakec, pasowalan ni Toni ci Hosay maherekayto ko niyah misodod cingranan. Sowal ni Toni, misodod cingra ci Hosayan ikor tada mahemekay, o hatiniay a nafalocoˈan tada makapahayto, awaay ko pakayraan tano sowal a paihkal. Samanen makahiyay ci Toni misodod, soˈlinay a milifok to sapalemed ni Yihofa.

15-16. Pakayni misododay, mikitini nalifetan ni Pitiro aci Su mananamay iso ko maanan hani?

¹⁵ 1985 miheca, ci Pitiro aci Su itini Hongti Kitakit Kasaˈopoan mirienang to saˈopo i, fahal sanay mifekad ko taˈangayay a fakohac. ˈArawhan mitelian no tamdaw ko fakotang i Kasaˈopoan. Pakayni tonini a fakohac, malahdaway ko sapihanek, sapinengneng ato sapitengil ni Su pakidemay ko pidokaˈ. * Tocerid miharateng ci Pitiro aci Su: “O masamaanay a tamdaw ko midemakay to hatiniay tada tatiihay a demak?” O miteliay to fakotang a tamdaw cowa ko Misawacayay Tamdaw ni Yihofa, ikor no pina miheca malepelayto cingra hakelong no ˈorip a mapalit. Ira ko milicayay ci Pitiro aci Suan maherekayto misodod toya mararaway tamdaw hokira, sanay ko sowal nangra: “Pasifanaˈay ci Yihofa tamiyanan, ˈinteh ko falocoˈ wa mipalak to tireng, nafalocoˈan ato harateng niyam. Mihaenay ikor no mafakohac i, kalikiay kami micangacang ci Yihofaan, padama tamiyanan mifalah to ˈintehay, padadotoc ngaˈay ko kaˈorip.”

¹⁶ Sapisododaw cangra toya tamdaw madoloay han? Latekay cowa ko madoloay. Sanay cangra: “Ano mifiyor to kaˈorip niyam ko adada no pairaan no fakohac i, cato ka ˈemet ko keter niyam. Kawra cowa ka haharateng sa kami tonini a demak, mihaenay oniya masofaway harateng kahnayay malahdaw. Oya miteliay to fakotang a tamdaw ano malo salikaka ita, o mamahemek kami mihamham cingranan. O nai falocoˈay niyam a sowal konini. Mikitini toniya nalifetan mahapinangay niyam, o safalod no Fangcalay Cudad pairaay to pasalat niyam, o hatiniay a pasalat mataˈlifay ko maharatengay niyam. Mafanaˈay kami, cato ka halafin papalahdawento ni Yihofa ko kihcod a  dokaˈ niyam, onini tada pairaay to sahinom tamiyanan.”

17. Pakayni misododay, mikitini nalifetan ni Mira mananamay iso ko maanan hani?

¹⁷ Misatapang ci Mira minanam to Fangcalay Cudad i, tosaayto ko wawa. Cowa picada to soˈlinay kimad ko faˈinay ningra, ikor maˈaˈodangay to tao, hanaca mifalahay cingranan ato wawa. Sanay ci Mira: “Tiya falahen no faˈinay kako ato tatosa wawa i, malecaday kako to iraay ko malecaday nalifetan a tamdaw, macekiday ko harateng, pasangaray pakasoˈlin, adadaay ko falocoˈ, makesemay, mirikec to niyah ato maketeray.” Soˈlin mahererekayto ko ramod, kawra o pairaan no pisafelit no faˈinay a adada caay ka mapawan. Sanay ci Mira: “Pinaay a folad, o hatiniay masofaway a harateng padotocay pasemsem takowanan, mafanaˈay kako o hatiniay a harateng mifiyoray to kalalaˈed ako ci Yihofaan ato roma tamdaw.” Sowal ni Mira cowato ka keter cingra nohatini, cowato ka ˈinteh to saˈayaway a faˈinay, ngaˈayay cingra talaˈayaw ko pinengneng, makalimayho noikor ngaˈay miingid ci Yihofaan koya iˈayaway a faˈinay. O cingra aca ko palahaday to tatosa a wawa, hanaca padama cangranan malo midokoay ci Yihofaan a tamdaw. Nohatini iraayto ko niyah a paro no lomaˈ noya tatosaay wawa, lipahakay ci Mira malacafay cangranan midoko ci Yihofaan.

18. O Saˈakawangay a Misawkitay ci Yihofa o sasamaan ko pidemak?

¹⁸ O cecay tamdaw mamicada to masamaanay a pisawkit, cowa ko kita ko mamisaˈosi. Mafanaˈ tonini tada parihadayay kitaanan. O Saˈakawangay a Misawkitay ci Yihofa, o Cingra ko caciˈinorong tonini a kalimlaan a demak. (Loma 14:10-12) Wa ngaˈay rihaday ko falocoˈ ita, o patirengan Ningra a palinian o malefotay, hanaca o tatooren Ningra konini a palinian a misawkit. (Satapangan 18:25; 1 Hongti 8:32) Cowa ko mamisakakinih ko demak Ningra!

19. O masadafdafay a Yihofa papalaˈosi to maanan a demak noikor?

¹⁹ Noikor, o sasongilaˈen ni Yihofa palahdaw ko pairaan no raraw a kihcod a roray, o macadaay ita a dokaˈ no tireng ato falocoˈ o mamasongilaˈ a maadah. Tada halamhamay kita to sakairaaw nonini a toki! (ˈOlic 72:12-14; Paˈarawan 21:3, 4) O mamatawalto ko karorayan a demak isalakat. ˈAyaw nonini, tada miakoˈiday kita ci Yihofaan, padama kitaanan mitodong Cingranan misodod to tao.