1. Јеһова төвбә едән ҝүнаһкара һансы әминлији верир?

 ЈЕҺОВА Јараданымыз, Ганунверәнимиз вә Һакимимиз олмагла јанашы, мәһәббәт долу сәмави Атамыздыр (Зәб. 100:3; Әшј. 33:22). Биз Јеһоваја гаршы ҝүнаһ ишләјәндә вә сәмими-гәлбдән төвбә едәндә О, нәинки бизи бағышламаға гадирдир, һәм дә буну үрәкдән истәјир (Зәб. 86:5). Јеһова Әшија пејғәмбәр васитәсилә белә бир әминлик вермишди: «Ҝүнаһларыныз ал-гырмызы олса да, онлары гар кими ағаппаг едәҹәјәм» (Әшј. 1:18).

2. Башгалары илә јахын мүнасибәтимизин олмасы үчүн нә етмәлијик?

² Биз гејри-камил олдуғумуз үчүн истәр-истәмәз сөз вә һәрәкәтләримизлә бир-биримизин гәлбинә дәјирик (Јаг. 3:2). Амма бу, о демәк дејил ки, бизим арамызда јахын мүнасибәтләр ола билмәз. Әҝәр бағышламағы баҹарсаг, бу, мүмкүндүр (Мәс. 17:9; 19:11; Мәт. 18:21, 22). Јеһова истәјир ки, биз бир-биримизә гаршы кичик сәһвләр едәндә бир-биримизи бағышлајаг (Кол. 3:13). Буну етмәк үчүн әсаслы сәбәбимиз вар. Ахы Јеһова бизи ҹомәрдликлә әфв едир (Әшј. 55:7).

3. Бу мәгаләдә нәји арашдыраҹағыг?

³ Бу мәгаләдә нөвбәти суаллары арашдыраҹағыг: «Гејри-камил инсан Јеһовадан бағышламағы неҹә өјрәнә биләр? Һансы ҝүнаһлары ағсаггаллара демәлијик? Нәјә ҝөрә  Јеһова бир-биримизи бағышламағымызы истәјир? Башгаларынын сәһвләри уҹбатындан бөјүк зәрәр ҝөрмүш бәзи диндашларымыздан нә өјрәнә биләрик?»

4. а) Ҹидди ҝүнаһ ишләјән мәсиһи нә етмәлидир? б) Ҝүнаһ ишләјән кәсин мәсәләсинә бахан ағсаггалларын мәсулијјәти нәдән ибарәтдир?

⁴ Ҹидди ҝүнаһлары ағсаггаллара демәк лазымдыр. 1 Коринфлиләрә 6:9, 10 ајәләриндә бу ҝүнаһларын бәзиләри јазылыб. Ҹидди ҝүнаһ Аллаһын ганунунун кобуд шәкилдә позулмасыдыр. Әҝәр мәсиһи ҹидди ҝүнаһа јол верәрсә, о, Јеһоваја дуа етмәлидир вә бу ҝүнаһы барәдә ағсаггаллара демәлидир (Зәб. 32:5; Јаг. 5:14). Бу мәгамда ағсаггалларын ролу нәдән ибарәтдир? Ҝүнаһкары тамамилә бағышламаға јалныз Јеһованын сәлаһијјәти вар вә О, буну фидјә гурбанлығы әсасында едир *. Амма Јеһова ағсаггаллара Мүгәддәс Китаб әсасында ҝүнаһкарын јығынҹагда галыб-галмајаҹағыны мүәјјән етмәк сәлаһијјәти вериб (1 Кор. 5:12). Бунун үчүн онлар мүәјјән аддымлар атырлар. Онлардан бири нөвбәти суаллары мүзакирә етмәкдир: «О, бу ҝүнаһы гәсдән, планлы шәкилдә едиб? О, узун мүддәтдир бу ҝүнаһы едир? Ән әсасы, Јеһоваја гаршы ҝүнаһ етдијинә ҝөрә пешман олдуғу ајдын ҝөрүнүр? Јеһованын ону бағышладығы гәнаәтинә ҝәлмәјә әсас вар?» (Һәв. 3:19).

5. Ағсаггалларын ҝөрдүјү ишин фајдалары нәләрдир?

⁵ Ағсаггаллар ҝүнаһ ишләјән адамла сөһбәт едәркән мәгсәдләри артыг ҝөјдә верилмиш гәрарла ејни гәрары вермәкдир (Мәт. 18:18). Бу тәдбирин јығынҹаға һансы фајдасы вар? Бу, Јеһованын гузуларыны төвбә етмәјән ҝүнаһкарын пис тәсириндән горујур (1 Кор. 5:6, 7, 11—13; Тит. 3:10, 11). Бу һәмчинин ҝүнаһкара көмәк едә биләр ки, төвбә етсин вә Јеһованын әфвини газансын (Лука 5:32). Ағсаггаллар төвбә едән инсан үчүн дуа едирләр вә онун руһән дирчәлмәси үчүн Јеһовадан көмәк истәјирләр (Јаг. 5:15).

6. Әҝәр инсан јығынҹагдан кәнар едиләрсә, Јеһованын ону бағышлајаҹағына үмид вар? Изаһ един.

⁶ Тутаг ки, инсан ағсаггалларла ҝөрүш заманы төвбә етмир. Белә һалда о, јығынҹагдан кәнар едиләҹәк. Әҝәр о, дөвләтин ганунуну позубса, ағсаггаллар ону бунун нәтиҹәсиндән горумајаҹаг. Јеһова һөкумәт органларына сәлаһијјәт вериб ки, мәсиһинин төвбә едиб-етмәмәсиндән асылы олмајараг, гануну позан истәнилән кәси мүһакимә етсин вә ҹәзаландырсын (Ром. 13:4). Амма һәмин инсан бир мүддәт сонра сәһвини баша дүшүб үрәкдән төвбә едирсә, дүшүнҹә вә әмәлләрини дәјиширсә, һәтта о, ҹидди ҝүнаһ етмиш олса да, Јеһова ону бағышламаға һазырдыр (2 Салн. 33:9, 12, 13; Лука 15:17—24; 1 Тим. 1:15).

7. Бизә гаршы ҝүнаһ ишләјән инсаны һансы мәнада бағышлајырыг?

⁷ Нә јахшы ки, ҝүнаһ ишләјән инсанын әфвә лајиг олуб-олмадығыны биз гәрарлашдырмырыг. Бу гәрары Јеһова верир. Амма бизим дә гәрар вермәли олдуғумуз бир мәгам вар. Сөһбәт нәдән ҝедир? Олур ки, бизә гаршы ҹидди ҝүнаһ едән инсан биздән үзр истәјир. Амма бәзән дә елә олур ки, инсан биздән үзр истәмир. Һәтта белә һалда белә, ола билсин, биз ону бағышламаг гәрарына ҝәләҹәјик, јәни үрәјимиздән кини вә гәзәби чыхарыб атаҹағыг.  Дүздүр, дәрин гәлб јарасы аланда буну етмәк асан олмур. Бунун үчүн инсан сәј ҝөстәрмәлидир вә бир аз вахт лазым ҝәлә биләр. «Ҝөзәтчи гүлләси» журналынын 1994-ҹү ил 15 сентјабр сајында дејилирди: «Ҝүнаһкары бағышламаг ҝүнаһа ҝөз јуммаг демәк дејил. Мәсиһи үчүн бағышламаг Јеһоваја етибар едиб, мәсәләни Онун өһдәсинә бурахмаг демәкдир. Јеһова бүтүн Каинатын адил Һакимидир вә вахты чатанда әдаләти бәргәрар едәҹәк». Ҝөрәсән, Јеһова нәјә ҝөрә бујурур ки, ҝүнаһкары бағышлајаг вә мәсәләни әдаләтли әлләрә — Она тапшыраг?

8. Јеһованын мәрһәмәтини гијмәтләндирдијимизи неҹә ҝөстәрә биләрик?

⁸ Бағышламагла Јеһованын мәрһәмәтинә ҝөрә миннәтдар олдуғумузу ҝөстәририк. Иса Мәсиһ бир мәсәл чәкмишди. Мәсәлдә бир аға бир гулунун һеч вахт өдәјә билмәјәҹәји күлли мигдарда борҹуну бағышлајыр. Амма һәмин гул она ҹүзи мигдарда борҹу олан бир гулла рәһмсиз давраныр (Мәт. 18:23—35). Иса бу мәсәллә бизә нә өјрәтмәк истәјирди? Әҝәр биз Јеһованын бизә ҝөстәрдији мәрһәмәти һәгигәтән гијмәтләндиририксә, онда биз дә башгаларыны бағышлајаҹағыг (Зәб. 103:9). «Ҝөзәтчи гүлләси» журналында илләр әввәл белә сөзләр дејилмишди: «Бәшәр өвлады олан бизләр бир-биримизи нә гәдәр бағышласаг да, бу, Јеһованын Мәсиһин фидјә гурбанлығы әсасында ҝөстәрдији мәрһәмәтин вә әфвин бөјүклүјүнә чата билмәз».

9. Јеһова кимләрә мәрһәмәт ҝөстәрир? (Мәтта 6:14, 15).

⁹ Биз башгаларыны бағышласаг, Јеһова да бизи бағышлајаҹаг. Јеһова мәрһәмәтли оланлара мәрһәмәт ҝөстәрир (Мәт. 5:7; Јаг. 2:13). Иса шаҝирдләринә дуа етмәји өјрәдәркән буну ачыг шәкилдә демишди. (Мәтта 6:14, 15 ајәләрини охујун.) Һәлә лап гәдимдә Јеһова садиг бәндәси Әјјуба бунун ваҹиблијини баша салмышды. Әлифәз, Билдад вә Сөфәр кәскин сөзләри илә Әјјубу чох инҹитмишдиләр. Јеһова Әјјуба тапшырмышды ки, онлар үчүн дуа етсин. Әјјуб буну едәндән сонра Јеһова она немәтләр бәхш етди (Әјј. 42:8—10).

10. Кин сахламаг нәјә ҝөрә зәрәрлидир? (Ефеслиләрә 4:31, 32).

¹⁰ Кин сахламаг чох зәрәрлидир. Кин, гәзәб ағыр јүк кимидир; Јеһова истәјир ки, биз бунлардан гуртулуб раһатлыг тапаг. (Ефеслиләрә 4:31, 32 ајәләрини охујун.) О бизә дејир: «Гәзәби бурах, һиддәтдән чәкин» (Зәб. 37:8). Бу мәсләһәтә әмәл едән һикмәтлә давраныр. Хәтримизә дәјән инсана гаршы аҹыглы галмаг бизә физики вә емосионал ҹәһәтдән зәрәр вура биләр (Мәс. 14:30). Зәһәр ичмәк инсанын өзүнә зијан вурдуғу кими, кин сахламаг да, хәтримизә дәјән инсана јох, өзүмүзә зијандыр. Гаршы тәрәфи бағышламаг исә бизим хејримизәдир (Мәс. 11:17). Бу заман гәлб раһатлығы дујуруг, сакитлик тапырыг вә ибадәтимизи давам етдирә билирик.

11. Гисас алмагла бағлы Мүгәддәс Китабда нә дејилир? (Ромалылара 12:19—21).

¹¹ Гисас Јеһоваја мәхсусдур. Јеһова бизә ихтијар вермәјиб ки, бизә гаршы сәһв едән адамдан гисас алаг. (Ромалылара 12:19—21 ајәләрини охујун.) Биз гејри-камилик вә вәзијјәти һәр тәрәфли ҝөрмүрүк. Буна ҝөрә дә Јеһова кими дүзҝүн мүһакимә јүрүтмәк габилијјәтимиз јохдур (Ибр. 4:13). Бәзән исә һиссләримиз дүзҝүн дүшүнмәјә мане олур. Јагуб  Јеһованын илһамы илә нөвбәти сөзләри јазмышды: «Инсанын гәзәби ону Аллаһ гаршысында салеһ етмир» (Јаг. 1:20). Әмин ола биләрик ки, Јеһова салеһликлә давранаҹаг вә камил әдаләти бәргәрар едәҹәк.

12. Јеһованын әдаләтинә етибар етдијимизи неҹә ҝөстәрә биләрик?

¹² Бағышламагла Јеһованын әдаләтинә етибар етдијимизи ҝөстәририк. Мәсәләни Јеһованын өһдәсинә бурахмагла биз ҝөстәририк ки, Јеһованын ҝүнаһын вурдуғу бүтүн зәрәри арадан галдыраҹағына инанырыг. Онун вәд етдији јени дүнјада әзаблы хатирәләр «јада дүшмәјәҹәк, даһа хатырланмајаҹаг» (Әшј. 65:17). Бәс үрәјимиздәки гәзәб вә киндән индидән гуртулмаг мүмкүндүр? Ҝәлин ҝөрәк бәзиләри буну неҹә баҹарыблар.

13, 14. Тони вә Хосенин һадисәсиндән бағышламагла бағлы нә өјрәндиниз?

¹³ Бир чох мәсиһиләр кимләринсә һәрәкәтләриндән бөјүк зәрбә алсалар да, сонра онлары бағышлајыблар. Онлар бунун һансы хејрини ҝөрүбләр?

¹⁴ Ҝәлин Филиппиндә јашајан Тони * адлы бир гардашын һадисәсинә бахаг. О, Јеһованын Шаһиди олмамышдан хејли әввәл Хосе адлы бир шәхс онун бөјүк гардашларындан бирини гәтлә јетирмишди. Бундан хәбәр тутан Тони гәзәб вә гисас һисси илә алышыб-јанырды. Төрәтдији ҹинајәтә ҝөрә Хосе һәбс олунду. Хосе һәбсдән чыхандан сонра Тони өзүнә сөз верди ки, ону тапыб өлдүрәҹәк. Һәтта бундан өтрү силаһ алды. Һәмин вахтларда Тони Јеһованын Шаһидләри илә Мүгәддәс Китабы өјрәнмәјә башлады. О дејир: «Мүгәддәс Китаб дәрсләри кечдикҹә өјрәндим ки, мән хасијјәтими вә һәрәкәтләрими дәјишмәлијәм. Еләҹә дә гәзәб һиссиндән гуртулмалыјам». Тони вәфтиз олунду. Бир мүддәтдән сонра исә јығынҹагда ағсаггал тәјин олунду. Бир ҝүн Тони өјрәнди ки, Хосе дә Јеһованын Шаһиди олуб. Ҝөрүн инди о неҹә тәәҹҹүбләнмишди! Онлар үз-үзә ҝәләндә бәрк-бәрк гуҹаглашыб ҝөрүшдүләр вә Тони Хосејә деди ки, ону бағышлајыб. Тони гејд едир: «Хосени бағышлајанда дахилимдә елә бөјүк  севинҹ дујдум ки, бу мөһтәшәм һисси сөзлә ифадә етмәк мүмкүн дејил». Бәли, Јеһова Тонинин бу давранышыны мүкафатсыз гојмады.

15, 16. Питерлә Сјудан бағышламагла бағлы нә өјрәндиниз?

¹⁵ 1985-ҹи илдә Питерлә Сју ибадәт евиндә ҝөрүшдә оларкән гәфил бөјүк бир партлајыш баш вермишди. Бир киши ибадәт евинин ичинә бомба јерләшдирмишди! Бу партлајыш нәтиҹәсиндә Сју ағыр јараланмышды, онун ҝөрмә вә ешитмә габилијјәтинә галыҹы хәсарәт дәјмишди. Һәмчинин о, ијбилмә габилијјәтини итирмишди *. Питер вә Сју һеј фикирләширдиләр: «Нә ҹүр инсан оласан ки, белә бәдхаһлыг едәсән?!» Јеһованын Шаһиди олмајан бу ҹинајәткар илләр сонра һәбс олунду вә она өмүрлүк һәбс ҹәзасы кәсилди. Питер вә Сјудан ону бағышлајыб-бағышламадыгларыны сорушанда онлар белә демишди: «Јеһова өјрәдир ки, гәзәб вә кин бәсләмәк инсанын өзүнә физики, емосионал вә әгли ҹәһәтдән зәрәр јетирә биләр. Буна ҝөрә дә биз елә илк вахтлардан Јеһоваја дуа етдик ки, гәзәби, кини үрәјимиздән силмәјә вә һәјатымызы гәлб раһатлығы илә јашамаға көмәк етсин».

¹⁶ Онлар үчүн бағышламаг вә үрәкләриндән гәзәби чыхармаг һәмишә асан олуб? Һеч дә јох. Питерҝил дејир: «Сју алдығы хәсарәтләрдән әзијјәт чәкәндә бәзән ичимиздә гәзәб јенидән аловланыр. Амма чалышырыг бу барәдә чох дүшүнмәјәк, онда бу һиссләр тез өтүб кечир. Там сәмимијјәтлә дејә биләрик ки, әҝәр бир ҝүн һәмин адам бизим гардашымыз олса, биз ону үрәкдән гәбул едәрик. Бу һадисәдән өјрәндик ки, Мүгәддәс Китаб принсипләри инсана әсл азадлыг бәхш едир. Онлара әмәл етмәјин сајәсиндә тәсәввүр белә етмәдијимиз саһәләрдә азадлыг дујдуг. Һәмчинин Јеһованын тезликлә бүтүн зәрәрләри арадан галдыраҹағыны билмәк бизә тәсәлли верир».

17. Мајрадан бағышламагла бағлы нә өјрәндиниз?

 ¹⁷ Мајра һәгигәти өјрәнәндә артыг аиләли иди вә ики балаҹа өвлады вар иди. Онун әри һәгигәти гәбул етмәди. Бир мүддәт сонра о зина етди вә аиләсини тәрк етди. Мајра дејир: «Әрим мәни вә ики ушағымы атыб ҝедәндә чох сарсылмышдым. Өзүмү гынајырдым. Дахилимдә етибарсызлыг, кәдәр, пешманчылыг, гәзәб кими һиссләр баш галдырмышды. Бу һиссләр әзизләри тәрәфиндән хәјанәтә уғрајан чохларына јахшы танышдыр». Никаһларына сон гојулса да, хәјанәтин ағрысы һәлә кечмәмишди. Мајра сөзүнә давам едир: «Бу һиссләр мәнә ајларла аман вермирди вә мән ҝөрүрдүм ки, бу мәним Јеһова илә, башгалары илә мүнасибәтимә пис тәсир едир». Мајра инди дејир ки, артыг о, кечмиш һәјат јолдашына гаршы аҹыглы дејил, һеч онун пислијини белә истәмир. Үмид едир ки, бир ҝүн о да Јеһованын хидмәтчиси олаҹаг. Артыг Мајра диггәтини ҝәләҹәјә ҹәмләмәји баҹарыр. О, тәкҹанына ики өвладыны Јеһованын јолунда бөјүдүб. Һал-һазырда Мајра өвладлары вә онларын аиләләри илә бирликдә Јеһоваја севинҹ ичиндә хидмәт едир.

18. Нәјә ҝөрә Али Һаким олан Јеһоваја етибар едә биләрик?

¹⁸ Нә јахшы ки, бизим киминләсә бағлы һөкм чыхармаг кими ағыр мәсулијјәтимиз јохдур. Али Һаким олан Јеһова бу иши Өз өһдәсинә ҝөтүрүб (Ром. 14:10—12). Биз тамамилә архајын ола биләрик ки, Јеһова һәмишә нәјин пис, нәјин јахшы олдуғуна даир гојдуғу мүкәммәл ганунлары әсасында һөкм чыхарыр (Јар. 18:25; 1 Пад. 8:32). О, һеч вахт һагсызлыг етмир!

19. Јеһованын камил әдаләти сајәсиндә нәләр мүмкүн олаҹаг?

¹⁹ Биз Јеһованын гејри-камиллијин вә ҝүнаһын бүтүн пис тәсирләрини тамамилә арадан галдыраҹағы вахты сәбирсизликлә ҝөзләјирик. Һәмин вахт бүтүн физики вә мәнәви јараларымыз һәмишәлик сағалаҹаг (Зәб. 72:12—14; Вәһј 21:3, 4). Онлар даһа һеч вахт јадымыза дүшмәјәҹәк. О мөһтәшәм дөврә гәдәр исә бир шејә шүкүр едирик: нә јахшы ки, Јеһова бизә Ондан өрнәк ҝөтүрүб бир-биримизи бағышламаг габилијјәти вериб.