1. Kii Yéhôva a nkal i bet ba ntam béba yap?

 YÉHÔVA a yé Nhek wés, Ntéé mambén ni Nkéés, a yé ki Tata wés nugwéha. (Tjémbi 100:3; Yésaya 33:22) I ngéda di mbôk mbén yé, ndi di tam toi béba yés, a yé bebee i nwéhél bés, a gwé ki ngôñ i boñ hala. (Tjémbi 86:5) A bi gwélél mpôdôl Yésaya inyu kal bés le: “To i ba yaa le bibéba binan bi kôibak tjôôm, gw’a pôp kiki pem.”​—Yésaya 1:18.

2. Kii di nlama boñ inyu niñ ikété nsañ ni bôt bape?

² Di yé bikwéha bi bôt, jon di nla pot, di boñ ki mam ma ma ñunbaha bôt bape. (Yakôbô 3:2) Ndi hala a nsôña bé bés i nôgla ni bo. Ibale di yé bebee i nwéhél, d’a nôgla ni bôt bape. (Bingéngén 17:9; 19:11; Matéô 18:21, 22) I ngéda di mboñ bon ba dihôha, Yéhôva a nsômbôl le di nwéhlana bés ni bés. (Kôlôsé 3:13) Di kôli boñ hala. Di hôya bañ le, Yéhôva a nwéhél bés “a yaaba.”​—Yésaya 55:7.

3. Kii d’a tehe munu yigil ini?

³ I yigil ini y’a éba bés lelaa bikwéha bi bôt bi nla nwéhél kiki Yéhôva. Bimbe bibéba di nlama kena yak mimañ? Inyuki Yéhôva a nsômbôl le di nwéhél  bôt bape? Bimbe biniigana di nla ôt mu ndémbél i lôk kéé i i bi nok ndutu ngandak inyule ba bi boñ bo béba?

4. (a) I ngéda mut a mboñ béba ikeñi, kii a nlama boñ? (b) I ngéda mimañ mi nhôla mboñbéba, bôlô yap i yé le kii?

⁴ I ngéda mut a mboñ béba ikeñi, a nlama ke i tehe mimañ. Kaat 1 Korintô 6:9, 10 i ñunda kii i yé bibéba bikeñi. I ngéda mut a mboñ béba ikeñi, a mbep unbaha Djob. Ibale mut a mboñ i nya béba i, a nlama soohe Yéhôva, i mbus a kee a tehe mimañ. (Tjémbi 32:5; Yakôbô 5:14) Bôlô i mimañ i yé le kii? Ndik Yéhôva nyen a nla toi nwéhél bibéba gwés, a nwéhél bés ni njel sesema i Yésu. b Ndi Yéhôva a bi bééga mimañ mbegee le mi gwélél Bibel inyu tehe too i mut a mboñ béba ikeñi a nlama yén likoda. (1 Korintô 5:12) Ba yé le ba badba mambadga kiki bo mana le: Baa a nkôôba boñ béba? Baa a noode sôô béba yé? Baa a nômôl mu i béba yé? Kii i ñéba le a ntam toi béba yé? Kii i ñunda le Yéhôva a nwéhél nye?​—Minson mi baôma 3:19.

5. I ngéda mimañ mi nhôla mboñbéba, bimbe bisai likoda li nkôhna?

⁵ I ngéda mimañ mi nhôla mboñbéba, bôlô yap i yé le i makidik ma nyôña nyoo i ngii mon yak bo ba yoñ hana ’isi. (Matéô 18:18) Bimbe bisai likoda li nkôhna i ngéda mimañ mi nhôla mboñbéba? I mahôla ma, ma mboñ le ba héya mboñbéba nu a ntjél tam béba yé i ntôñ. (1 Korintô 5:6, 7, 11-13; Titô 3:10, 11) Ma nla ki boñ le mboñbéba a tam béba yé, Yéhôva a nwéhél nye. (Lukas 5:32) Mimañ mi nsoohe Yéhôva le a hôla mboñbéba nu a ntam béba yé i témbna maada malam ni nye.​—Yakôbô 5:15.

6. I ngéda ba mpémés mut i ntôñ, baa Yéhôva a nla ki nwéhél nye? Toñol.

⁶ Di hégda le mimañ mi noode hôla mankéé ndi a ntam bé béba yé, ba nlama pémés nye i ntôñ. Ibale a mbôk mbén i loñ yé, mimañ mi nlama bé sôña le ba kogse nye. Yéhôva a bi ti bangomin kunde i kéés ni i kogse nu ni nu a mbôk mbén to a ntam béba yé, to a ntam bé yo. (Rôma 13:4) Ndi ibale i mut nu, nyuu i nyi nye jam, a tam toi béba yé, a héñha, Yéhôva a yé bebee i nwéhél nye. (Lukas 15:17-24) To ibale a bi boñ béba ikeñi, Yéhôva a ga nwéhél nye.​—2 Miñañ 33:9, 12, 13; 1 Timôtéô 1:15.

7. Lelaa di nla nwéhél i mut a mboñ bés béba?

⁷ Di yé maséé inyule bés bé bon di nlama kit too Yéhôva a ga nwéhél i mut a mboñ bés béba! Ndi ngim makidik i yé le bés bon di nlama yoñ. Mambe makidik? Ngim mangéda, mut a nla boñ bés béba, bebek béba ikeñi, ndi a bat bés nwéhél. Ndi i nla ki pam le a bat bé bés nwéhél. To hala, di yé le di kit le di nwéhél i mut nu, hala wee di ñunbene ha bé nye. Ndi hala a ta bé jam li ntomb,  hala a nla ki yoñ bés ngandak ngéda téntén ibale a bi lôôha babaa bés. Nkum Ntat nu 15 septembre 1994 a nkal le: “I ngéda u nwéhél mut, hala a nkobla bé le u ntehe bé mam mabe a mboñ we. I ngéda kristen i nwéhél, hala a nkobla le a mbôdôl Yéhôva ñem, a bii mam i moo mé. A yé Nkéés nu a téé sép, a ga pémés mbagi i loñge ngéda.” Inyuki Yéhôva a nsômbôl le di nwéhél, di nwas ki mam i moo mé?

8. Inyuki di yé le di kal le i ngéda di nwéhél hala a ñunda le di yé maséé ni konangoo i Yéhôva?

⁸ I ngéda di nwéhél hala a ñunda le di yé maséé ni konangoo i Yéhôva. Ikété hihéga hiada, Yésu a bi éba le Yéhôva a yé kiki ñane nu a nwéhél nkol wé soso pil u u bi bum nye i saa. Ndi nkol u, u bi tjél nwéhél nkol umpe u u bé bat man pil. (Matéô 18:23-35) Kii Yésu a bé sômbôl kal? Ibale di yé maséé ni konangoo i Yéhôva, di ga ba bebee i nwéhél bôt bape. (Tjémbi 103:9) Hala a yé ngandak nwii le Nkum Ntat a bi kal le: “To di nwéhél bôt bape ngélé yañen, hala a nla bé bol nwéhél Yéhôva a bi nwéhél bés ni njel Kristô.”

9. Bonjee Yéhôva a ñunda konangoo? (Matéô 6:14, 15)

⁹ Yéhôva a nwéhél i bôt ba nwéhél. I bôt ba yé konangoo bon Yéhôva a ñunda konangoo. (Matéô 5:7; Yakôbô 2:13) Yésu a bi éba i jam li i ngéda a bi niiga banigil bé i soohe. (Añ Matéô 6:14, 15.) Yéhôva a bi bôk a unda i jam li i ngéda a bé pôdôs Hiôb. I bôt bana bo baa hala wee Élifas, Bildad, ni Zôfar ba bi babaa i ngwélél Yéhôva nunu le Hiôb ni bibuk bibe. Yéhôva a bi kal Hiôb le a soohene bo. Kiki Hiôb a bi soohene bo, Yéhôva a sayap nye.​—Hiôb 42:8-10.

10. Inyuki i yé béba i téédana mut hiun? (Éfésô 4:31, 32)

¹⁰ I ngéda di nai le di nwéhél bé, di nok ndutu. Yéhôva a nsômbôl le di nwéhél inyu boñ le di ba maséé. (Añ Éfésô 4:31, 32.) A nkal ki bés le ‘di nwas hiun, di kôm ki kundul mbus.’ (Tjémbi 37:8) I maéba ma, ma yé malam. Ibale di nai ndik le di nwéhél bé, hala a nla lona bés makon. (Bingéngén 14:30) Ibale di nai le di nwéhél bé i mut a mboñ bés béba, hala a mboñ bé nye jam jo ki jo, kiki a ta bé to le a nok ndutu ibale bés bon di nyo mbôñ. Inyu hala nyen i ngéda di nwéhél bôt bape, di mboñ bésbomede loñge. (Bingéngén 11:17) Ñem u yé bés nwee, di nke ki ni bisu i gwélél Yéhôva.

11. Kii Bibel i niiga bés inyu jam li mapuna? (Rôma 12:19-21)

¹¹ Yéhôva nyen a mpun. Yéhôva a nti bé bés kunde le di saa i ngéda ba mboñ bés béba. (Añ Rôma 12:19-21.) Kiki di yé bikwéha bi bôt, di ta bé le di kéés loñge kiki Yéhôva. (Lôk Héber 4:13) Ni le ngim mangéda, di nkéés bé loñge inyule di nkéés inoñnaga ni i yom di nhoñol. Yéhôva a bi gwélél Yakôbô inyu kal le: “Hiun hi mut binam hi nlona bé telepsép i Nyambe.” (Yakôbô 1:20) Di nlama  yi le Yéhôva a ga pémés mbagi i nya i téé sép.

12. Lelaa di nla éba le di mbôdôl Yéhôva ñem?

¹² I ngéda di nwéhél, hala a ñéba le di mbôdôl Yéhôva ñem. I ngéda di mbii mam i moo ma Yéhôva, di ñéba le di gwé botñem le a ga tibil mam momasôna. I mbok yondo, ‘di ga hoñol ha bé mam mabe ba bi boñ bés, to bigda mo i miñem.’ (Yésaya 65:17) Ndi baa i ngéda ba nlôôha babaa bés, di yé toi le di nwéhél, di hôya i jam li? Di béñge ki ndémbél i lôk kéé i i bi pam i boñ hala.

13-14. Kii ndémbél i Tony bo José i niiga bés inyu jam li nwéhél?

¹³ Ngandak lôk kéé i bôda ni i bôlôm i bi yoñ makidik i nwéhél to hala kiki ba bi lôôha babaa bo. Bimbe bisai ba bi kôhna?

¹⁴ Ngandak nwii ilole Tony c nu a yé i Filipin a nyila Mbôgi Yéhôva, a bi léba le hiloga hiada le José a bi nol manyañ nu munlôm nu mañ. Ha ngéda i, Tony a bé jo bisañ ngandak, jon a bé sômbôl saa. Ba bi gwel José, ba ha nye i mok. I mbus ngéda, José a bi pam i mok. Tony a kit le a nyéñ nye, a nol nye. Inyu hala nyen a bi somb ngaa. A bé a yii bañ, Tony a bôdôl nigil Bibel ni Mbôgi Yéhôva. A nkal le: “Mu yigil yem, me bi nok le me nlama héñha bilem gwem, me nwas hiun.” Tony a bi yik sôblana; i mbus ngéda, a yila yak mañ u likoda. Hégda maséé a bi nok i ngéda a bi léba le yak José a nyila Mbôgi Yéhôva! I ngéda ba bi bomna, ba bi samblana, Tony a kal José le a nwéhél nye. Tony a nkal le i ngéda a bi nwéhél, maséé ma bé le ma nol nye. Yéhôva a bi sayap Tony inyule a bé bebee i nwéhél.

15-16. Kii ñañ u Peter bo Sue u niiga bés inyu jam li nwéhél?

¹⁵ I nwii 1985, Peter bo Sue ba bé  i Ndap Ane, ba nok kindim a nlôs. Mut wada nyen a bi bii i kindim nu i ndap Ane! Sue a bi babaa ngandak, hala a bi boñ le a bé tehna ha bé loñge, a bé noga ha bé ki to loñge. A bé nok ha bé ki to njiñ. d Peter bo Sue ba bé béna badba le: ‘Njee a nla ban ñem a boñ i nya jam ini?’ I mbus ngandak nwii, ba bi gwel i mut nu, ba ha nye i mok niñ yé yosôna, a bé bé Mbôgi Yéhôva. I ngéda ba mbat Peter bo Sue too ba bi nwéhél i mut nu, ba timbhe le: “Yéhôva a niiga bés le i ngéda di nai le di nwéhél bé, di mboñ bésbomede béba. Jon ibôdôl yaga i bibôdle, di bi bat Yéhôva le a hôla bés i hôya i jam li ni i ke ni bisu i gwélél nye.”

¹⁶ Baa hala a bé bo jam li ntomb i nwéhél? To! Ba nkal le: “Ngim mangéda, i ngéda di nok ndutu inyu mambabaa ma Sue, hala a yé a unbaha bés. Ndi kiki di nlôôha bé hoñol i jam li, jon hiun hiés hi nhoo sôs. I maliga, ibale i mut nu a nyila Mbôgi Yéhôva yani ni noma, d’a leege nye. I jam lini li niiga bés le Bibel i nla kobol bés iloo kiki di bak le di hégda! Di yé ki maséé inyule di nyi le ndék ngéda Yéhôva a ga tibil mam momasôna.”

17. Kii ndémbél i Myra i niiga bés inyu jam li nwéhél?

¹⁷ I ngéda Myra a bi yila Mbôgi Yéhôva, a bé mbiibaga, a ban-ga disii di bon iba. Nlôm a bi tjél nigil maliga. I mbus ngéda, a ke i ndéñg, a tjôô bo. Myra a nkal le: “Ngéda nlô wem a bi tjôô me ni bon bés bo iba, me bi nok i njôghe ngandak bôt i yé i nok i ngéda bôt ba gwéhék ba nwéha bo nyuu, me bi lehel ñem, me kalak le ‘ibale me yi,’ me hoñlak le njom i yé  yem, me bak ki ñunbak.” Libii li bi mal ndi to hala Myra a bé a ngi nogok njôghe. A nkal le: “I jam li, li bi tééñga me ngandak, me yik léba le li nla ôbôs maada mem ni Yéhôva, yak ni bôt bape.” Nano, Myra a nkal le a bi waa unbene nye, a gwééne bé to nye mahoñol mabe. A mbot ñem le kel yada a ga yila ngwélél Yéhôva. Myra a nhoñol ndik mimbônga mi Yéhôva. A bi hôla bon bé nyetama i ba bagwélél ba Yéhôva. Nano, Myra a yé maséé i gwélél Yéhôva ni bon bé lôñni mahaa map.

18. Kiki di nyi le Yéhôva a yé Nkéés nu a nloo bakéés bobasôna, imbe botñem hala a nti bés?

¹⁸ Di yé maséé inyule di nyi le bés bé bon di nlama kit lelaa Yéhôva a nlama kéés bôt! Yéhôva a yé Nkéés nu a nloo bakéés bobasôna, nyen a nsal i bôlô i. (Rôma 14:10-12) Di nyi le Yéhôva a nkéés ndik loñge inoñnaga ni mambén mé. (Bibôdle 18:25; 1 Bikiñe 8:32) Kekikel, a ga boñ bé jam li téé bé sép!

19. Kiki Yéhôva a yé bañga Nkéés, kii a ga boñ i dilo di nlo?

¹⁹ Di gwé ngôñ le ngéda i kola inyu boñ le Yéhôva a mélés béba yosôna. Ha ngéda i, a ga mélés mandutu momasôna. (Tjémbi 72:12-14; Masoola 21:3, 4) Di ga hoñol ha bé mo. Ilole i ngéda i i nkola, di nti Yéhôva mayéga inyule a bi hek bés le di laa nwéhél kiki nye.