1. Anong asigurasyon an itinatao ni Jehova sa nagsusulsol na mga parakasala?

 DAWA ngani si Jehova an satong Kaglalang, Paratao nin Katugunan, asin Hukom, siya man an satong mamumuton na Ama sa langit. (Sal. 100:3; Isa. 33:22) Pag nagkasala kita saiya asin tunay na nagsusulsol, bako lang na kaya niya kitang patawadon kundi gustong-gusto man niyang gibuhon iyan. (Sal. 86:5) Paagi ki propeta Isaias, itinao ni Jehova an mamumuton na asigurasyon na ini: “Dawa pa an mga kasalan nindo kakulor nin iskarlata, papapution iyan na garo niyebe.”—Isa. 1:18.

2. Kun gusto ta nin matuninong na relasyon sa iba, ano an dapat tang gibuhon?

² Dahil bako kitang perpekto, gabos kita nakakataram asin nakakagibo nin mga bagay na nakakakulog sa buot nin iba. (Sant. 3:2) Pero, dai iyan nangangahulugan na dai na kita magkakaigwa nin dayupot na relasyon sa sainda. Magigibo ta iyan kun magigin mapagpatawad kita. (Tal. 17:9; 19:11; Mat. 18:21, 22) Pag nakukulgan ta an buot nin lambang saro dawa sa sadit na bagay, gusto ni Jehova na magpatawad kita. (Col. 3:13) May marahay kitang dahilan na gibuhon iyan ta si Jehova ‘bulaos kitang pinapatawad.’—Isa. 55:7.

3. Ano an pag-uulayan ta sa artikulong ini?

³ Sa artikulong ini, pag-uulayan ta kun paano maaarog kan bakong perpektong mga tawo an pagpapatawad ni Jehova. Anong mga pagkakasala an dapat tang sabihon sa mga elder? Taano ta dinadagka kita ni Jehova na patawadon an iba? Asin ano an manunudan  niyato sa nagkapirang kapagtubod ta na naapektaran na marhay dahil sa pagkakasala nin iba?

4. (a) Pag an sarong lingkod ni Jehova makagibo nin magabat na pagkakasala, ano an dapat niyang gibuhon? (b) Ano an papel kan mga elder pag kinaulay ninda an sarong nagkasala?

⁴ An magabat na mga pagkakasala dapat na sabihon sa mga elder. An mga halimbawa kan siring na mga pagkakasala mababasa sa 1 Corinto 6:9, 10. An magabat na pagkakasala iyo idtong grabeng pagbalga sa pagbuot nin Diyos. Pag an sarong Kristiyano makagibo nin siring na pagkakasala, dapat na mamibi siya sa Diyos na Jehova, asin dapat siyang makipag-ulay sa mga elder kan kongregasyon. (Sal. 32:5; Sant. 5:14) Ano an papel kan mga elder? Si Jehova sana an may awtoridad na lubos na magpatawad nin mga kasalan, na pinagin posible niya basado sa atang na pantubos. * Alagad, ipinagkatiwala ni Jehova sa mga elder an paninimbagan na determinaran base sa Kasuratan kun baga an nagkasala magdadanay sa kongregasyon. (1 Cor. 5:12) An saro sa mga bagay na kaipuhan nindang gibuhon iyo na aramon an simbag sa minasunod na mga hapot: Tinuyo daw an pagkakasala? Plinano daw kan nagkasala an nagibo niyang kasalan? Pauruutro daw niyang nagibo an pagkakasala sa laog nin huruhalawig na panahon? An pinakaimportante, igwa daw nin nahihiling na patunay na siya tunay na nagsusulsol? Igwa daw nin indikasyon na pinatawad na siya ni Jehova?—Gibo 3:19.

5. Ano an mga bendisyon na resulta kan ginigibo kan mga elder?

⁵ Pag kinakaulay kan mga elder an nagkasala, an pasuhan ninda iyo na makagibo nin desisyon digdi sa daga na kapareho kan nainot nang nagin desisyon sa langit. (Mat. 18:18) Paano nakikinabang an kongregasyon sa areglong ini? Sinisigurado kaiyan na mahahali sa kongregasyon an dai nagsusulsol na mga nagkasala na tibaad makadanyar sa mahalagang marhay na mga karnero ni Jehova. (1 Cor. 5:6, 7, 11-13; Tito 3:10, 11) Posible man na matabangan kaiyan an nagkasala na magsulsol asin makinabang sa pagpapatawad ni Jehova. (Luc. 5:32) Mamimibi an mga elder para sa nagsusulsol asin hahagadon ki Jehova na tabangan siya na maibalik an marahay na relasyon sa saiya.—Sant. 5:15.

6. Kun matiwalag an nagkasala, posible daw na mapatawad pa siya? Ipaliwanag.

⁶ Ipamugtak na dai nagsusulsol an nagkasala kan kaulayon siya kan mga elder. Sa arog kaiyan na kamugtakan, ititiwalag siya sa kongregasyon. Kun binalga niya an ley kan gobyerno, dai siya poprotektaran kan mga elder sa mga konsekwensiya kaiyan. Tinutugutan ni Jehova an mga awtoridad nin gobyerno na magtao nin hatol asin padusa sa siisay man na nagbabalga kan ley—nagsusulsol man siya o dai. (Roma 13:4) Pero, kun pag-abot nin panahon makapag-isip-isip siya asin tunay na magsulsol saka magbakli, andam si Jehova na patawadon siya. (Luc. 15:17-24) Totoo iyan dawa pa magabat na marhay an mga pagkakasala niya.—2 Cron. 33:9, 12, 13; 1 Tim. 1:15.

7. Sa anong paagi puwede tang mapatawad an saro na nagkasala sa sato?

⁷ Nakakaginhawa nanggad na maaraman na dai ta kaipuhan magdesisyon kun papatawadon ni Jehova an sarong nagkasala! Pero, may kaipuhan pa man giraray kitang desisyunan. Ano iyan? May mga pagkakataon na an nagkasala sa sato—dawa pa magabat an pagkakasala—tibaad maghagad sato nin dispensa asin pagpapatawad. Pero sa ibang mga pagkakataon, tibaad an saro na nagkasala sato dai maghagad nin tawad. Dawa arog kaiyan, puwede kitang magdesisyon na patawadon siya paagi sa paghali kan ano man na kulog nin buot asin kaanggutan sa  saiya. An totoo, tibaad mangaipo ini nin panahon asin paghihinguwa, lalo na kun nakulgan kitang marhay. An Torrengbantayan na Setyembre 15, 1994, nagsasabi: “Kun talagang pinapatawad nindo an sarong nagkasala, dai ini nangangahulugan na kinokonsinte nindo an kasalan. Para sa Kristiyano, an kapatawadan nangangahulugan nin biyong tiwalang pagwalat kan bagay sa mga kamot ni Jehova. Siya an matanos na Hukom sa bilog na uniberso, asin gigibuhon niya an hustisya sa tamang panahon.” Taano ta dinadagka kita ni Jehova na magpatawad asin ipabaya an hustisya sa saiyang mga kamot?

8. Paano an pagigin mapagpatawad nagpapahiling na nagpapasalamat kita sa pagkahirak ni Jehova?

⁸ An pagpapatawad pagpahiling nin pagigin mapagpasalamat. Sa sarong parabula, ikinumparar ni Jesus si Jehova sa sarong kagurangnan na pinatawad an dakulaon na utang na dai kayang bayadan kan saro sa saiyang mga uripon. Pero, an pinatawad na uripon dai nagpahiling nin pagkahirak sa sarong uripon na may utang saiyang kuwarta na saditon man sana an kantidad. (Mat. 18:23-35) Ano an itinutukdo kaini sa sato ni Jesus? Kun talagang nagpapasalamat kita sa dakulang pagkahirak ni Jehova sa sato, mapapahiro kita na patawadon an iba. (Sal. 103:9) Manungod diyan, dakul na taon na an nakaagi, sinabi kan The Watchtower an arog kaini: “Gurano man kadakul na beses na patawadon niyato an satong kapwa, dai lamang kaiyan mapapantayan an pagpapatawad asin pagkahirak nin Diyos sa sato paagi ki Cristo.”

9. Sairisay an pinapahilingan ni Jehova nin pagkahirak? (Mateo 6:14, 15)

⁹ An mga nagpapatawad papatawadon. Si Jehova nagpapahiling nin pagkahirak sa mga mahihirakon. (Mat. 5:7; Sant. 2:13) Lininaw iyan ni Jesus kan tukduan niya an saiyang mga disipulo kun paano mamibi. (Basahon an Mateo 6:14, 15.) Mahihiling man niyato an kaparehong punto sa sinabi ni Jehova kaidto may koneksiyon sa lingkod niyang si Job. Nakulgan na marhay an buot kan maimbod na lalaking iyan kan makulog na mga tataramon na sinabi kan tulong lalaki na si Elifaz, Bildad, asin Zofar. Pinagbutan ni Jehova si Job na ipamibi sinda. Pakatapos na gibuhon iyan ni Job, binendisyunan siya ni Jehova.—Job 42:8-10.

10. Taano ta nakakadanyar an pagtanom nin kulog nin buot? (Efeso 4:31, 32)

¹⁰ An pagtanom nin kulog nin buot nakakadanyar. Gusto ni Jehova na mamatian niyato an kaginhawahan na resulta kan paghali niyato kan nakakapagabat sato na kulog nin buot. (Basahon an Efeso 4:31, 32.) Sinasadol niya kita na ‘halion an pagkaanggot asin bayaan an grabeng kaanggutan.’ (Sal. 37:8) Makikinabang kita kun susunudon ta an sadol na iyan. An pagtanom nin kulog nin buot puwedeng magkaigwa nin maraot na epekto sa satong pisikal asin mental na salud. (Tal. 14:30) An padagos na pagtanom ta nin kulog nin buot dai magkakaigwa nin maraot na epekto sa nakakulog sa buot ta, garo man lang iyan nag-iinom kita nin hilo na kita mismo an nadadanyaran bako an nakakulog sa satong buot. Pero, kun pinapatawad ta an iba, tinatawan ta nin regalo an sadiri ta. (Tal. 11:17) Magkakaigwa kita nin matuninong na isip asin kalmadong puso, asin makakapagpadagos kita sa paglilingkod ta ki Jehova.

11. Ano an sinasabi kan Bibliya manungod sa pagbalos? (Roma 12:19-21)

¹¹ Ki Jehova an pagbalos. Dai kita tinawan ni Jehova nin awtoridad na magbalos pag an saro nagkasala sato. (Basahon an Roma 12:19-21.) Dahil sa limitado asin bakong perpektong pagmansay sa mga bagay-bagay, mayo kita sa kamugtakan na husgaran nin tama an mga bagay-bagay, arog kan kayang gibuhon nin Diyos. (Heb. 4:13) Asin kun minsan, naaapektaran kan satong emosyon an satong marahay na paghusgar.  Pinasabngan ni Jehova si Santiago na isurat: “An kaanggutan nin sarong tawo dai minaresulta sa pagigin matanos sa paghiling nin Diyos.” (Sant. 1:20) Makakasiyerto kita na gigibuhon ni Jehova an tama asin sisiguraduhon niya na maipautob an perpektong hustisya.

12. Paano ta maipapahiling na nagtitiwala kita sa hustisya ni Jehova?

¹² An pagpapatawad pagpahiling kan satong pagtitiwala sa hustisya ni Jehova. Paagi sa pagpabaya kan mga bagay-bagay sa mga kamot ni Jehova, ipinapahiling ta na nagtitiwala kita na hahalion ni Jehova an gabos na danyos na resulta kan kasalan. Sa ipinanuga niyang bagong kinaban, an makulog na mga eksperyensiya “dai na masabong pa sa isip, asin an mga iyan dai na mapapasapuso.” (Isa. 65:17) Pero pag nakulgan kitang marhay, posible daw talaga na mahali an kaanggutan asin kulog nin buot na tibaad yaon pa sa satong puso? Aramon ta kun paano iyan nagibo kan nagkapira.

13-14. Ano an nanudan mo sa eksperyensiya ni Tony asin Jose manungod sa pagpapatawad?

¹³ Dakul sa satong mga tugang na Kristiyano an nagdesisyon na magpatawad dawa pa nakulgan na marhay an buot ninda huli sa ginibo sainda kan iba. Anong mga bendisyon an naeksperyensiyahan ninda sa paggibo kaiyan?

¹⁴ Haloy pa bago nanudan an katotoohan ni Tony, * na nakaistar sa Pilipinas, naaraman niya na an saro sa saiyang matuang tugang na lalaki ginadan nin sarong lalaki na an pangaran Jose. Kan panahon na idto, arangguton na marhay saka bayolenteng tawo si Tony, asin gusto niya na magbalos. Naarestar si Jose asin napreso huli sa nagibo niyang krimen. Pag-abot nin panahon, kan makaluwas na si Jose sa presuhan, isinumpa ni Tony na hahantingon niya ini asin gagadanon. Nagbakal pa ngani siya nin badil para magibo niya iyan. Kan mga panahon na iyan, nagpuon na makipag-adal nin Bibliya sa mga Saksi ni Jehova si Tony. Sabi niya: “Mantang nakikipag-adal ako, nanudan ko na kaipuhan kong gumibo nin mga pagbabago, asin kaiba na diyan an paghali kan sakong kaanggutan.” Pag-abot nin panahon, nabawtismuhan si Tony asin kan huri nanombrahan bilang elder sa kongregasyon. Imahinara na sana an saiyang pagkabigla, kan maaraman niya na si Jose saro na man bawtisadong lingkod ni Jehova! Kan  magkahilingan an duwa, maugma nindang kinugos an lambang saro, asin sinabi ni Tony ki Jose na pinatawad na niya siya. Sinabi ni Tony na an pagpapatawad na ini nagtao saiya nin grabe nanggad na kaugmahan kaya dai niya ngani mailadawan an pambihirang namatian niya. Iyo, binendisyunan ni Jehova an pagigin andam ni Tony na magpatawad.

15-16. Ano an nanudan mo sa eksperyensiya ni Peter asin Sue manungod sa pagpapatawad?

¹⁵ Kan 1985, nasa pagtiripon kaidto sa Kingdom Hall si Peter asin Sue kan biglang may mangyaring makusugon na pagsabog. Sarong lalaki an nagbugtak kan bomba sa laog kan Kingdom Hall! Grabe an sinapar ni Sue, kaya naapektaran an saiyang paghiling saka pandangog. Nawaran man siya nin pamarong. * Parating naihahapot ni Peter asin Sue sa saindang sadiri, ‘Anong klaseng tawo an magibo nin arog kaiyan karaot na bagay?’ Pakalihis nin dakul na taon, an lalaking nagbugtak kan bomba, na bakong lingkod ni Jehova, naarestar asin nasentensiyahan nin habangbuhay na pagkapreso. Kan haputon si Peter asin Sue kun napatawad na ninda an lalaki, sinabi ninda: “Tinukduan kami ni Jehova na an pagtanom nin kaanggutan asin kulog nin buot puwedeng makadanyar samo sa pisikal, emosyonal, asin mental na paagi. Kaya pakatapos tulos kan insidenteng idto, hinagad mi ki Jehova na tabangan kaming halion an kaanggutan asin kulog nin buot saka magpadagos sa buhay.”

¹⁶ Nagin madali daw sainda na magpatawad? Bako pirmi. Sinabi pa ninda: “Sa pana-panahon, pag nasasakitan si Sue huli sa epekto kan insidenteng idto sa samong buhay, nakakamati kami nin kaanggutan. Pero dai mi pigpaparaisip iyan, kaya madali lang iyan na mawara. Sa totoo lang, masasabi mi na kun mag-abot an panahon na magin tugang ta an lalaking idto na nagbugtak kan bomba, maugma mi siyang aakuon. Naitukdo samo kan eksperyensiyang ini na an mga prinsipyo sa Bibliya talagang nakakapatalingkas; pinatalingkas nanggad kami kaiyan sa paaging dai mi lubos maisip! Nararanga man kami sa pakaaram na dai na mahahaloy hahalion ni Jehova an gabos na danyos kaiyan.”

17. Ano an nanudan mo sa eksperyensiya ni Myra manungod sa pagpapatawad?

 ¹⁷ Nanudan ni Myra an katotoohan kan siya may agom na asin may duwang sadit na aki. Dai inako kan saiyang agom an katotoohan. Pag-abot nin panahon, nakakomiter ini nin pagsambay asin binayaan an pamilya. Sinabi ni Myra: “Kan bayaan kaming mag-irina kan sakong agom, namati ko an arog kan namatian kan dakul na pigloko kan saindang namumutan—pagkabigla, dai makapaniwala, kamunduan, pagbasol, asin kaanggutan.” Dawa ngani tapos na an relasyon ninda bilang mag-agom, yaon pa man giraray an kulog huli sa pangloloko. Sinabi pa ni Myra: “An mga pagmating iyan padagos na nagpasakit sa sako sa laog nin dakul na bulan, asin narealisar ko na naaapektaran na palan kaiyan an sakong relasyon ki Jehova asin sa iba.” Sinabi ngunyan ni Myra na mayo na siyang kaanggutan asin dai na siya nagtatanom nin raot nin buot sa saiyang dating agom. Naglalaom siya na marani ini ki Jehova pag-abot nin panahon. Nakakapagpokus na si Myra para sa maabot na panahon. Bilang nagsosolong ina, pinadakula niya an duwa niyang aki na magin mga lingkod ni Jehova. Ngunyan may kaugmahan na naglilingkod ki Jehova si Myra kaiba an saiyang mga aki asin an saindang pamilya.

18. Sa ano kita makakapagtiwala ki Jehova bilang an Kahuruhalangkawing Hukom?

¹⁸ Nakakaginhawa nanggad na maaraman na dai ta kaipuhan na magdesisyon kun paano huhusgaran an mga indibidwal! Bilang an Kahuruhalangkawing Hukom, si Jehova an maasikaso kan importanteng gibuhon na ini. (Roma 14:10-12) Lubos kitang makakapagtiwala na pirmi siyang maghuhusgar kauyon kan saiyang perpektong mga pamantayan nin tama asin sala. (Gen. 18:25; 1 Ha. 8:32) Dai nanggad siya magibo nin ano man na bakong matanos!

19. Ano an maisasagibo kan perpektong hustisya ni Jehova?

¹⁹ Hinahalat-halat ta na an panahon na biyo nang hahalion ni Jehova an gabos na maraot na epekto kan pagkabakong perpekto asin kasalan nin tawo. Sa panahon na iyan, an gabos niyatong lugad sa pisikal asin emosyon permanente nang mapipila. (Sal. 72:12-14; Kap. 21:3, 4) Dai na nuarin man iyan masabong pa sa isip. Mantang hinahalat ta na mag-abot an magayunon na panahon na iyan, nagpapasalamat nanggad kita ki Jehova na tinawan niya kita nin kakayahan na arugon siya paagi sa pagigin mapagpatawad.