1. ?Wanem promes blong Jehova long man we i tanem tingting from sin blong hem?

 NATING se Jehova i Krieta blong yumi, i Man Blong Givim Loa, mo i Jaj, be hem i Papa blong yumi long heven we i lavem yumi. (Sam 100:3; Aes. 33:22) Taem yumi mekem sin agensem hem mo yumi rili tanem tingting blong yumi, hem i gat paoa mo i wantem tumas blong fogivim yumi. (Sam 86:5) Tru long profet Aesea, Jehova i talem se: “Nating se ol sin blong yufala oli olsem kala we i laet red, be bambae oli kam waet olsem sno.”—Aes. 1:18.

2. Sipos yumi wantem frengud wetem narafala, ?yumi mas mekem wanem?

² From we yumi sinman, yumi evriwan i talem o mekem sam samting we i mekem narafala i harem nogud. (Jem. 3:2) Be hemia i no min se yumi no save frengud wetem olgeta. Yumi save frengud wetem olgeta sipos yumi lanem blong fogif. (Prov. 17:9; 19:11; Mat. 18:21, 22) Sipos wan man i talem o mekem wan smol samting we i mekem yumi harem nogud, Jehova i wantem se yumi fogivim hem. (Kol. 3:13) Sipos yumi mekem olsem, Jehova bambae i fogivim yumi “long wan fasin we i bigwan.”—Aes. 55:7.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot olsem wanem yumi ol sinman yumi save folem fasin blong Jehova blong fogivim narafala. Mo tu, bambae yumi tokbaot ol kwestin ya, ?wanem ol sin we yumi mas talemaot long ol elda? ?From wanem Jehova i enkarejem yumi blong fogivim narafala? ?Mo yumi lanem wanem  long sam brata mo sista we oli safa bigwan from ol sin blong narafala?

4. (1) Taem wan man blong Jehova i mekem wan bigfala sin, ?hem i mas mekem wanem? (2) ?Wanem wok blong ol elda, taem oli dil wetem man we i mekem sin?

⁴ Taem wan man i mekem wan bigfala sin, yumi mas talemaot long ol elda. Sam long ol bigfala sin ya, hemia i stap long 1 Korin 6:9, 10. Taem wan Kristin i mekem wan bigfala sin, hemia i agensem loa blong God. Long taem olsem, man ya i mas prea long Jehova blong i fogivim hem mo i mas toktok long ol elda long kongregesen. (Sam 32:5; Jem. 5:14) ?Wanem wok blong ol elda? Jehova nomo i gat paoa blong fogivim fulwan ol sin, mo hem i mekem samting ya tru long ransom sakrefaes. * Be Jehova i givim wok ya long ol elda blong oli save yusum Baebol blong luk sipos man we i mekem sin i save gohed blong stap long kongregesen o nogat. (1 Kor. 5:12) Blong mekem olsem, fastaem oli mas traehad blong faenem ansa blong ol kwestin ya: ?Man ya i bin plan blong mekem wan sin? ?Hem i traem blong haedem long ol narafala? ?Hem i mekem sem sin ya plante taem? ?I gat pruf se hem i rili tanem tingting blong hem? ?I gat pruf se Jehova i fogivim hem?—Wok 3:19.

5. ?Wanem blesing i kamaot from wok we ol elda oli mekem?

⁵ Taem ol elda oli stap dil wetem man we i mekem sin, mak blong olgeta hemia blong mekem sem desisen long wol ya olsem we oli bin mekem finis long heven. (Mat. 18:18) ?Olsem wanem desisen ya i givhan long kongregesen? Hem i protektem kongregesen, taem ol elda oli meksua se oli putumaot man we i mekem sin, blong hem i no spolem ol narafala man blong Jehova. (1 Kor. 5:6, 7, 11-13; Taetas 3:10, 11) Mo tu, hemia i givhan long man we i mekem sin blong i tanem tingting blong hem mo Jehova i save fogivim hem. (Luk 5:32) Ol elda oli prea long bihaf blong man ya, mo oli askem long Jehova blong i givhan long hem blong i save frengud bakegen wetem hem.—Jem. 5:15.

6. Sipos kongregesen i putumaot wan man, ?i posibol yet blong Jehova i fogivim hem? Yu eksplenem.

⁶ ?Olsem wanem sipos wan man i no tanem tingting blong hem, taem ol elda oli storian wetem hem? Long taem olsem, kongregesen bambae i putumaot hem. Mo sipos hem i mekem wan sin we i brekem loa blong gavman, ol elda oli no save blokem nogud frut we i save kamaot from sin blong hem. Jehova i letem ol haeman blong gavman blong jajem mo panisim eniman we i brekem loa, nomata sipos man ya i tanem tingting o nogat. (Rom 13:4) Be biaen, sipos man ya i luksave se samting we hem i mekem i rong, mo i jenisim tingting mo aksen blong hem, Jehova i rere blong fogivim hem. (Luk 15:17-24) Mo hemia i tru, nomata sipos sin blong man ya i bigwan we i bigwan.—2 Kron. 33:9, 12, 13; 1 Tim. 1:15.

7. ?Olsem wanem yumi save fogivim wan man we i mekem sin agensem yumi?

⁷ !Yumi glad tumas blong save se i no wok blong yumi blong mekem desisen se Jehova bambae i fogivim wan man o nogat! Be i gat wan desisen we yumi mas mekem. ?Wanem desisen ya? Samtaem wan man i mekem sin agensem yumi, be biaen maet hem i talem sore mo i askem blong yumi fogivim hem. Sam narafala taem, man i no mekem olsem, nating se i olsem, yumi save jusum blong fogivim hem mo traem blong no kros long hem. Blong talem stret, maet hemia i tekem taem mo paoa, speseli sipos hem i  mekem yumi harem nogud tumas. Wajtaoa blong 15 Septemba 1994, i talem se: “Taem yu fogivim wan man we i mekem sin, i no minim se yu agri long sin ya we hem i bin mekem. Long saed blong ol Kristin, fasin fogif i minim se yumi trastem Jehova mo livim bisnes ya long han blong Hem. Hem nao i stap jajem olgeta man long heven mo wol long stret fasin, mo bambae Hem i stretem olgeta samting long stret taem blong hem.” ?From wanem Jehova i enkarejem yumi blong fogif mo trastem hem se bambae hem i stretem bisnes ya long fasin we i stret?

8. ?Yumi soemaot olsem wanem se yumi glad we Jehova i gat sore?

⁸ Taem yumi fogif, yumi soemaot se yumi glad we Jehova i gat sore. Long wan parabol, Jisas i komperem Jehova long wan masta we i kanselem bigfala kaon blong wan long ol slef blong hem we i no save pembak. Be slef ya i no sore long wan slef we i gat smol kaon nomo long hem. (Mat. 18:23-35) ?Jisas i wantem tijim yumi long wanem? Sipos yumi rili glad se Jehova i gat bigfala sore long yumi, bambae yumi wantem fogivim ol narafala. (Sam 103:9) Plante yia i pas, wan Wajtaoa i talem se: “Nomata hamas taem yumi fogivim ol narafala, be bambae yumi neva fogivim olgeta olsem we God i fogivim yumi wanwan tru long sakrefaes blong Kraes.”

9. ?Jehova i soem sore long wanem kaen man? (Matiu 6:14, 15)

⁹ Sipos yumi fogivim ol narafala, Jehova bambae i fogivim yumi. Jehova i gat sore long olgeta we oli soemaot sore. (Mat. 5:7; Jem. 2:13) Jisas i makem klia samting ya taem hem i tijim ol disaepol blong hem blong prea. (Ridim Matiu 6:14, 15.) Yumi lanem semfala lesen ya long ol tok we Jehova i talem long gudfala man blong hem Job. Job i bin harem nogud bitim mak from ol rabis tok blong trifala man ya Elifas, Bildad, mo Jofara. Jehova i talem long Job blong i prea from olgeta. Afta we Job i prea, Jehova i blesem hem.—Job 42:8-10.

10. Taem yumi holemtaet kros, ?olsem wanem hemia i spolem yumi wan? (Efesas 4:31, 32)

¹⁰ Yumi spolem yumi wan taem yumi holemtaet kros. Fasin blong kros i olsem wan hevi baden, mo Jehova i wantem se yumi sakemaot fasin ya, blong yumi save gat pis. (Ridim Efesas 4:31, 32.) Hem i talem long yumi blong ‘livim fasin blong kros, mo fasin blong kros bitim mak.’ (Sam 37:8) Sipos yumi folem advaes ya, bambae yumi harem gud. Sipos yumi gohed blong kros long man we i mekem yumi harem nogud, hemia i save spolem tingting mo bodi blong yumi. (Prov. 14:30) Yes, taem yumi holemtaet kros, hemia i sem mak olsem we yumi dring posen, mo hemia i spolem yumi wan be i no narafala. Be taem yumi fogivim narafala, yumi stap mekem i gud long yumi wan. (Prov. 11:17) Yumi gat pis long tingting mo hat blong yumi, mo yumi naf blong gohed long wok blong Jehova.

11. ?Baebol i talem wanem long saed blong fasin ya blong givimbak? (Rom 12:19-21)

¹¹ Jehova nomo i gat raet blong givimbak. Jehova i no givim raet long yumi blong panisim man we i mekem sin agensem yumi. (Ridim Rom 12:19-21.) From we yumi sinman mo yumi gat ol tingting we i no stret, yumi no naf blong jajem stret wan bisnes olsem God. (Hib. 4:13) Mo samtaem, yumi save letem ol filing blong yumi oli lidim yumi gorong, mo i had blong mekem samting we i stret. Jehova i pulum Jemes blong talem se: “Taem man i kros, hem i no save mekem samting we i stret long fes blong God.” (Jem. 1:20) Yumi save sua se  Jehova bambae i mekem samting we i stret mo i meksua se i gat jastis.

12. ?Yumi soemaot olsem wanem se yumi trastem se Jehova bambae i mekem se i gat jastis?

¹² Taem yumi fogif, yumi soemaot se yumi trastem se Jehova bambae i mekem se i gat jastis. Taem yumi lego wan samting i stap long han blong Jehova, yumi soemaot se yumi trastem hem se bambae hem i naf blong finisim olgeta nogud samting we i kamaot from sin. Hem i promes se long niufala wol, ol samting we i mekem ol man oli harem nogud, ol man bambae ‘oli no moa tingbaot, mo bambae oli no kam nating long hat blong olgeta’ bakegen. (Aes. 65:17) ?Be olsem wanem sipos yumi harem nogud tumas? ?I posibol blong yumi no moa kros long man we i mekem yumi harem nogud? Traem luk olsem wanem samfala oli naf blong mekem olsem.

13-14. ?Yu lanem wanem long ekspiriens blong Tony mo José?

¹³ Plante Kristin brata mo sista oli jusum blong fogivim ol narafala, nating se oli rili harem nogud from samting we ol narafala ya oli mekem long olgeta. ?Wanem blesing oli kasem taem oli mekem olsem?

¹⁴ Tony, * we i laef long Filipin, i faenemaot se wan man we nem blong hem José, i kilim i ded bigfala brata blong hem. Hemia plante yia bifo we Tony i kam wan Witnes blong Jehova, mo long taem ya, Tony i wan man blong kros mo i raf tumas. Taswe hem i wantem givimbak long man ya. Be oli arestem José mo oli putum hem long kalabus. Biaen, taem hem i kamaot long kalabus, Tony i gat strong tingting blong faenem hem mo kilim hem i ded, ale hem i pem wan masket. Be long semtaem ya, hem i stat blong stadi Baebol wetem ol Witnes blong Jehova. Tony i talem se: “Long Baebol stadi blong mi, mi lanem se mi mas jenisim ol fasin mo ol aksen blong mi, mo hemia i minim tu se mi mas lego fasin blong kros.” Plante yia afta, Tony i baptaes mo biaen i kam wan elda long kongregesen. Traem tingbaot olsem wanem Tony i sapraes bigwan, taem hem i save se José tu i baptaes mo i kam wan man blong Jehova. Taem tufala i mit, tufala i hangem tufala, mo Tony i talem long José se hem i fogivim hem. Tony i talem  se taem hem i fogivim José, hemia i mekem hem i harem gud tumas we hem i no save olsem wanem blong eksplenem filing ya. Yes, Jehova i blesem Tony from we hem i rere blong fogif.

15-16. ?Yu lanem wanem long ekspiriens blong Peter mo Sue?

¹⁵ Long 1985, Peter mo Sue i stap long wan miting long Haos Kingdom, taem wan bigfala bom i bosta. !Wan man i bin putum bom insaed long Haos Kingdom! Taem bom ya i bosta, Sue i kasem bigfala kil we i mekem se hem i no moa save lukluk mo harem samting. Mo tu, hem i no save smelem eni samting. * Oltaem Peter mo Sue i stap asaskem long tufala se: ‘?Wanem kaen man ya we i mekem wan krangke samting olsem?’ Plante yia biaen, oli arestem man ya we i no wan Witnes blong Jehova, mo oli putum hem long kalabus. Taem oli askem long Peter mo Sue, sipos tufala i fogivim man ya, tufala i talem se: “Jehova i tijim mitufala se sipos mitufala i gohed blong harem nogud mo kros, hemia i save spolem bodi, tingting, mo filing blong mitufala. So smoltaem afta we bom ya i bosta, mitufala i askem Jehova blong i halpem mitufala blong fogivim man ya, blong mitufala i save laef we mitufala i gat pis.”

¹⁶ ?Olsem wanem? ?I isi long tufala blong fogivim man ya? Nogat. Tufala i gohed se: “Samtaem, taem Sue i harem nogud from kil we hem i kasem, mitufala i kam kros bakegen. Be from we mitufala i no stap tingbaot samting ya oltaem, kwiktaem nomo filing ya blong kros i godaon. Mitufala i save talem stret se sipos wan dei, man ya i kam wan brata blong yumi, bambae mitufala i welkamem gud hem. Ekspiriens ya i tijim yumi se taem yumi folem gud ol rul blong Baebol long laef blong yumi, oli mekem yumi kam fri long plante rod we yumi neva tingbaot. Mo tu, oli mekem yumi harem gud from we yumi save se i no longtaem, Jehova bambae i finisim olgeta samting we i stap spolem yumi.”

17. ?Yu lanem wanem long ekspiriens blong Myra?

 ¹⁷ Myra i lanem trutok afta we hem i mared mo i gat tu pikinini. Be hasban blong hem i no akseptem trutok. Samtaem biaen, hem i mekem stap adaltri mo i lego famle. Myra i talem se: “Taem hasban blong mi i lego mi mo tufala pikinini, mi gat sem filing olsem olgeta ya we wan we oli lavem hem i lego olgeta. Mi harem nogud, mi sek, mi no save bilivim, mi rigret, mi blemem mi wan, mo mi kam kros.” Nating se mared blong tufala i brok, Myra i stil harem nogud from hasban blong hem i lego hem. Myra i gohed se: “Blong plante manis, mi gohed blong wari mo kros, mo mi luksave se ol nogud filing ya oli stap afektem frensip blong mi wetem Jehova mo ol narafala.” Naoia Myra i talem se hem i no moa kros, mo hem i no wantem nating se wan nogud samting i hapen long hasban ya blong hem bifo. Hem i hop se wan dei man ya bambae i kam fren blong Jehova. Myra i lukluk i go nomo long fiuja. Olsem wan singel mama, hem i tijim tufala pikinini blong hem blong tufala i kam man blong Jehova. Naoia Myra i glad blong mekem wok blong Jehova wetem tufala pikinini blong hem, mo famle blong tufala.

18. ?From wanem yumi save trastem ol jajmen blong Jehova?

¹⁸ !Yumi harem gud taem yumi save se i no yumi we yumi mas disaed olsem wanem Jehova bambae i jajem wan man! From we Jehova i Jaj We i Hae Olgeta, hem nao bambae i mekem impoten wok ya. (Rom 14:10-12) Yumi save sua fulwan se taem hem i jajem man, oltaem jajmen blong hem bambae i folem ol rul blong hem long samting we i stret mo samting we i no stret. (Jen. 18:25; 1 King 8:32) !Bambae hem i neva mekem wan samting we i no stret!

19. From we Jehova i beswan jaj, ?bambae hem i mekem wanem?

¹⁹ Yumi wantem tumas blong luk taem ya we Jehova bambae i finisim fulwan olgeta nogud samting we i kamaot from sin, mo from we yumi no stret gud. Long taem ya, bambae yumi no moa harem nogud long bodi mo filing blong yumi. (Sam 72:12-14; Rev. 21:3, 4) Bambae yumi no moa tingbaot olgeta bakegen. Naoia we yumi stap wet long taem ya blong i kamtru, yumi wantem talem bigfala tangkiu long Jehova from we hem i mekem se yumi naf blong folem fasin blong hem, hemia blong fogivim narafala.