1. Kai janji si bereken Jahwe man kalak si ertobat?

 JAHWE kap Si Nciptaken kita, Si Mereken Undang-Undang, ras Hakimta. Ia pe Bapakta si perkeleng. (Ms. 100:3; Jes. 33:22) Sanga silakoken dosa janah tuhu-tuhu kita ertobat, labo saja banci ampuni Jahwe kita, tapi nggit ka Ia ngampuni kita. (Ms. 86:5) Arah Nabi Jesaya, ipetetap Jahwe ukurta, bagenda nina, “Amin gia dosa-dosa kena megara bagi dareh, iban pagi mbentar bagi salju.”​—Jes. 1:18.

2. Kai si arus silakoken gelah dame hubungenta ras kalak si deban?

² Kita la sempurna, emaka rananta bage pe perbahanenta banci erban kitik ukur kalak. (Jak. 3:2) Tapi, banci mehuli hubungenta ras kalak adi nggit kita ngampuni. (Kua. 17:9; 19:11; Mat. 18:21, 22) Ate Jahwe siampuni min kesalahen-kesalahen si sepele si ilakoken kalak man banta. (Kol. 3:13) Salah sada alasen engkai maka perlu kita ngampuni eme gelah ‘tuhu-tuhu pagi ampuni Jahwe kita.’​—Jes. 55:7.

3. Kai kari sibahas bas artikel enda?

³ Bas artikel enda sibahas kari uga kalak si la sempurna banci ngusih Jahwe alu nggit ngampuni kalak si deban. Dosa si uga nge si arus situriken man pertua? Engkai maka iahken Jahwe kita guna ngampuni kalak si deban? Janah kai si banci sipelajari arah piga-piga turang senina si susah kel kapna perban kesalahen kalak si deban?

4. (a) Adi lit umat Jahwe si ngelakoken dosa si serius, kai si arus lakokenna? (b) Kai si arus lakoken pertua adi lit kalak si ngelakoken dosa si serius?

⁴ Dosa si serius arus ipeseh man pertua-pertua. Contoh-contoh kerna dosa si serius lit bas 1 Korinti 6:9, 10. Dosa si bage eme pelanggaren si serius man undang-undang Dibata. Adi lit kalak Kristen si ngelakoken dosa si serius, arus ia ertoto gelah ampuni Jahwe ia, janah arus turikenna e man pertua-pertua. (Ms. 32:5; Jak. 5:14) Kai si arus ilakoken pertua? Memang, Jahwe ngenca si lit hakna guna tuhu-tuhu ngampuni kalak si erdosa. Banci lakokenNa e perban korban tebusen Jesus. * Tapi, bereken Jahwe tanggung jawap man pertua guna nentuken kalak si erdosa e banci denga tetap bas runggun ntah lang. Ipereksa pertua Pustaka guna nentukenca. (1 Kor. 5:12) Selain si e, arus ka ukuri pertua penungkunen-penungkunen enda: Sengaja nge lakokenna dosana e? Bunikenna nge dosana e arah kalak si deban? Mulih-ulih nge lakokenna dosana e piga-piga waktu dekahna? Lit nge buktina maka tuhu-tuhu ia ertobat? Lit nge buktina maka enggo ampuni Jahwe ia?​—Perb. 3:19.

5. Adi dalanken pertua-pertua tanggung jawapna alu mehuli, kai gunana man runggun?

⁵ Sanga jumpa pertua ras kalak si erdosa e, tujun kalak e eme gelah keputusen kalak e seri bagi keputusen si enggo iban Jahwe i surga. Guna ngelakoken si e, ertoto kalak e, ukurina prinsip-prinsip Pustaka, janah ikutkenna petunjuk si erpalasken Pustaka. (Mat. 18:18) Adi bage ban kalak e, kerina kalak bas runggun banci ndatken manpaat. Kalak si erdosa si la nggit robah, ipedarat me arah runggun. Alu bage, lanai banci pengaruhina umat Jahwe si meherga. (1 Kor. 5:6, 7, 11-13; Tit. 3:10, 11) Kalak si erdosa e pe banci teriahken guna ertobat ras dungna iampuni Jahwe. (Luk. 5:32) Itotoken pertua me kalak si erdosa e janah pindona gelah sampati Jahwe ia mpehuli hubungenna ras Jahwe.​—Jak. 5:15.

6. Adi lit kalak si ipedarat arah runggun, banci denga nge ia iampuni Jahwe? Jelasken.

⁶ Uga adi idah pertua-pertua maka kalak si erdosa e la nggit ertobat? Kalak si bage, ipedarat me arah runggun. Selain si e, adi enggo langgarna undang-undang pemerentah, pertua-pertua la banci ngelindungi ia arah akibat perbahanenna e. Sebap ibereken Jahwe tanggung jawap man pemerentah guna ngakimi ras ngukum ise pe si ngelanggar undang-undang pemerentah, la soal ia ertobat ntah pe lang. (Rom. 13:4) Tapi, adi bas pudi wari sadar ia maka salah kai si lakokenna e janah ubahna cara rukurna bage pe perbahanenna, pasti ampuni Jahwe ia. (Luk. 15:17-24) Nggit Jahwe ngampuni ia amin pe serius kel dosana e.​—2 Kro. 33:9, 12, 13; 1 Tim. 1:15.

7. Kai maksudna ngampuni kalak si ersalah man banta?

⁷ Pasti ngata bujur kel kita perban labo kita si nentuken sekalak jelma banci iampuni ntah lang, tapi Jahwe me si nentukenca. Amin pe bage, lit denga si arus kita si nentukenca. Kai e? Banci saja lit kalak si ersalah man banta janah serius salahna e. La soal mindo maap ia ntah lang, kita si nentuken ngampuni ia  ntah lang. Kita si nentuken lanai kita merawa man bana ntah lang. Memang, perlu waktu ras usaha, apai ka adi ceda kel pusuhta ibanna. Ikataken bas sada artikel i Menara Pengawal 15 September 1994, “Adi siampuni kalak si erdosa, e labo ertina setuju kita man dosana. Man kalak Kristen, ngampuni ertina tek kita man Jahwe, janah siserahken masalahta man baNa. Jahwe kap Hakim si adil ras benar bas alam semesta enda. Janah pasti berekenNa keadilen man banta bas waktu si tepat.” Engkai maka iahken Jahwe kita ngampuni kalak si deban? Janah engkai maka arus siserahken masalahta man baNa?

8. Kai hasilna adi siergai perkuah ate Jahwe?

⁸ Adi nggit kita ngampuni, e buktina siergai perkuah ate Jahwe. Bas sada perumpaman, ipeseri Jesus Jahwe ras sekalak raja si perkuah. Imasapken raja e utang budakna si seh kel belinna si la ngasup ia nggalarisa. Tapi la cidahken budak e perkuah atena man budak si deban si rutang sitiken asangken ia. (Mat. 18:23-35) Kai pelajarenna man banta? Adi tuhu-tuhu siergai perkuah ate Jahwe si luar biasa, nggit kita ngampuni kalak si deban. (Ms. 103:9) Puluhen tahun si lewat, bagenda ikataken bas Sora Ermomo, “La soal uga buena kita enggo ngampuni kalak si deban, buen nge pengampunen ras perkuah ate Jahwe man banta arah korban tebusen Kristus.”

9. Man ise saja cidahken Jahwe perkuah ateNa? (Matius 6:14, 15)

⁹ Adi nggit kita ngampuni, kita pe iampuni. Cidahken Jahwe perkuah ateNa man kalak si perkuah. (Mat. 5:7; Jak. 2:13) Jelas kel iban Jesus kerna si e sanga ajarkenna murid-muridna kerna uga carana ertoto. (Baca Matius 6:14, 15.) Banci ka sipelajari kerna si e arah perentah Jahwe man Jop, pelayanNa si setia. Ceda kel ukur Jop perban ranan telu temanna eme Elipas, Bildat, ras Sopar. Tapi, suruh Jahwe totoken Jop kalak e. Kenca bage ban Jop, ipasu-pasu Jahwe ia.​—Jop 42:8-10.

10. Kai akibatna adi tetap kita merawa? (Epesus 4:31, 32)

¹⁰ Adi tetap kita merawa, kita si rugi. Merawa e bali bagi baban si mberat. Ate Jahwe, siambekken baban e gelah ula silatihi banta. (Baca Epesus 4:31, 32.) IahkenNa kita gelah ‘ula nggit ikuasai ate segat ras merawa-rawa.’ (Ms. 37:8) Adi siikutken nasehat e, e banci nampati kita. Adi tetap kita merawa, e banci erban kita sakit janah lanai tenang perukurenta. (Kua. 14:30) Adi tetap kita merawa, kita nge si rugi, labo ia. Bali bagi adi siinem racun, kita nge si sakit, labo kalak si deban. Tapi, sanga siampuni kalak si deban, kita nge si runtung. (Kua. 11:17) Engkai? Perban banci dame pusuh ras perukurenta janah banci tetap silayani Jahwe alu ermeriah ukur.

11. Kai si ikataken Pustaka kerna balas dendam? (Roma 12:19-21)

¹¹ Jahwe ngenca si lit hakna guna mbalas perbahanen kalak. La bereken Jahwe man banta hak guna mbalas kalak si ersalah banta. (Baca Roma 12:19-21.) Pengangkanta terbatas janah banci ka salah. Emaka, la banci kita ngakimi bagi Jahwe tepatna. (Heb. 4:13) Mon-mon perasanta erban salah keputusenta. Emaka, itegu-tegu Jahwe Jakup guna nulis  kata-kata enda, “Rawa manusia labo maba kai si benar i lebe-lebe Dibata.” (Jak. 1:20) Tek kita pasti lakoken Jahwe kai si benar janah penghakimenNa pasti adil.

12. Kai nge buktina maka tek kita perbahanen Jahwe e adil?

¹² Adi nggit kita ngampuni, e buktina tek kita maka Jahwe pasti adil. Adi siserahken masalahta man Jahwe, sicidahken maka tek kita maka pasti imasapken Jahwe pagi kerina si la mehuli perban dosa. Erjanji Ia maka bas doni si mbaru pagi, kerina si erban kita sakit hati “lanai pagi iinget, ntah pe turah bas pusuh.” (Jes. 65:17) Tapi sanga sakit hati kel kita, banci nge kita lanai merawa janah la dendam? Banci. Mari sibahas uga cara piga-piga kalak banci berhasil.

13-14. Arah pengalamen Tony ras José, kai nge si banci sipelajari kerna ngampuni?

¹³ Melala turang senina nggit ngampuni amin pe sakit hati kel ia perban perbahanen kalak si deban. Kai pasu-pasu si dungna dat kalak e?

¹⁴ Lit turang seninata si gelarna Tony, * si tading i Filipina. Ertahun-tahun dekahna sope ia erlajar kebenaren, ibunuh José abangna. Perban si e, ipenjaraken me José. Paksa si e, Tony kejam kel kalakna, janah balas dendam atena. Sanga José ibebasken, ersumpah Tony maka pasti daramina José janah bunuhna. Emaka, tukurna pistol. Tapi bas paksa si e ka, mulai Tony erlajar Pustaka ras Saksi Jahwe. Bagenda nina Tony, “Sanga aku erlajar, sadar aku maka perlu aku robah. E termasuk lanai aku banci dendam.” Iperidiken me Tony, janah bas pudi wari ilantik ia jadi pertua bas runggun. Cuba bayangken uga senggetna Tony sanga tehna José enggo jadi sekalak Saksi Jahwe. Sanga jumpa kalak e duana, sidakepen kalak e. Kataken Tony man José maka enggo ampunina ia. La terturiken Tony uga riahna ukurna perban enggo ampunina José. Jelas me  ipasu-pasu Jahwe Tony perban nggit ia ngampuni.

15-16. Arah pengalamen Peter ras Sue, pelajaren kai si banci sidat kerna ngampuni?

¹⁵ Bas tahun 1985, sanga Peter ras Sue pulung bas Bale Kerajan, rempet lit ledaken si mbelin. Kepeken, lit si namaken bom bas Bale Kerajan. Mekelek kel akibatna e man Sue, pemegina ras pengidahna enggo ceda janah la tertambari. Lanai ka ia banci nganggeh. * Rusur tersungkun-sungkun Peter ras Sue, ‘Uga nge maka bage jahatna perbahanen kalak?’ Ertahun-tahun kenca si e, itangkap ras ipenjaraken me kalak si namaken bom e. Ia labo Saksi Jahwe. Sanga isungkun kalak Peter ras Sue kerna ampuni kalak e nge dilaki e ntah lang, bagenda nina, “Enggo ajari Jahwe kami maka adi tetap kami merawa janah dendam, e banci erban kami sakit janah lanai tenang perukuren kami. Emaka la ndekah kenca ledaken e, pindo kami penampat Jahwe gelah la tetap merawa ras dame akap kami.”

¹⁶ Menukah nge akap kalak e ngampunisa? Mon-mon lang. Bagenda nina, “Mesui kenca akap Sue, nembeh ka ate kami mulihi. Tapi labo e lalap si ukuri kami. Emaka dungna lanai ate kami nembeh. Situhuna, bicara jadi Saksi Jahwe pagi kalak si namaken bom e, pasti alo-alo kami ia. Pengalamen enda ngajari kami maka adi sidalanken prinsip-prinsip Pustaka, bebas kita arah baban si mberat. Kedamen si gejapken kami ndauh belinen asangken si arapken kami. Terapuli ka kami perban ntisik nari, imasapken Jahwe kerina si la mehuli.”

17. Arah pengalamen Myra, pelajaren kai si banci sidat kerna ngampuni?

¹⁷ Erlajar kebenaren Myra kenca ia enggo erjabu, janah enggo lit dua anakna. Dilakina la nggit jadi Saksi Jahwe. Bas sada paksa, erlua-lua dilakina e janah  tadingkenna kalak e. Bagenda nina Myra, “Sanga tadingken dilakiku aku ras dua anak kami. Perasanku bagi kalak si deban si ihianati kalak si ikelengina. Sengget aku, la kuakap mungkin enda terjadi. Getem kel pusuhku, nyesal kel aku. Lalap kusalahken bangku, janah merawa ka aku.” Amin pe ia enggo cerai, tetap denga getem kel pusuhna perban ihianati. Nina Myra ka, “Erbulan-bulan dekahna kuatir aku janah merawa aku. Tapi dungna sadar aku maka perasanku enda enggo mpengaruhi hubungenku ras Jahwe bage pe kalak si deban.” Gundari lanai Myra merawa janah lanai ia dendam man mantan dilakina e. Ngarap kel ia bas sada wari pagi mantan dilakina e banci rembak ras Jahwe. Gundari, si lalap ukuri Myra eme kerna masa depanna labo masa lalu. Pebelinna dua anakna gelah banci ngelayani Jahwe. Gundari ermeriah ukur Myra ngelayani Jahwe radu ras anak-anakna bage pe keluarga kalak e.

18. Perban Jahwe e Hakim Si Meganjangna, kai si pasti lakokenNa?

¹⁸ Pasti meriah kel ukurta perban siteh labo kita si nentuken uga sekalak jelma ihakimi. Selaku Hakim Si Meganjangna, Jahwe me si nentukenca. (Rom. 14:10-12) Tek kel kita maka penghakimen Jahwe lalap adil perban sesuai ras patokenNa si sempurna kerna si benar ras si salah. (Kej. 18:25; 1 Raj. 8:32) Keputusen si iban Jahwe labo pernah salah!

19. Perban Jahwe lalap adil, uga nge kari masa depanta?

¹⁹ Pasti tertima-tima kel kita sanga imasapken Jahwe kerina akibat perban manusia la sempurna ras perban dosa. Paksa si e pagi, malem kerina penakit bage pe kai pe si erban ceda ukurta. (Ms. 72:12-14; Ket. 21:3, 4) Kerina e lanai pagi siinget. Amin pe si e lenga terjadi, ngata bujur kel kita perban bereken Jahwe kita gegeh gelah ngasup ngusih Ia bas ngampuni.