1. Ka füramasei ladügübei Heowá houn afigouhatiña ha asakürihabaña?

 LAU sun Heowá lan Adügübaliwa, ligía wánibei Aguseragüdüti, ligía Íchugubei lúrudu woun ani ligía giñe Wáguchi hínsiñehabuti le siélubei (Sal. 100:3; Isa. 33:22). Ligíati, ánhawa afigouha ligibugiñe ani aba wasakürihan tídangiñe sun wanigi, gabafuti ani busenti lun feruduna lániwa (Sal. 86:5). Yusu lumuti Heowá profeta Isaíasi, lun líchugun aban füramasei le íchugubei dǘgüdaguaü woun. Ariñagati: “Íbini anhein funa lubéi hifigoun kei lagumuhóun ífunani, náharudagüdübei kei niewe” (Isa. 1:18).

2. Ka lunbei wadügüni lun ñein lan darangilu hama amu?

² Kei gafigoun wabéi, súngubei wagía adügatiwa katei o ariñagatiwa katei le adügübei lun hasandiragun amu houngua wuriba (Sant. 3:2). Úati mini lan lira siñá lan gamadagua wamá gürigia buítiña. Le lunbei wadügüni, lun wafurendeirun lun ferudunagua wamá wámagua (Ari. 17:9; 19:11; Mat. 18:21, 22). Agurabahati Heowá lun feruduna wamani lirahüñü charati le asuseredubei wádangua (Kol. 3:13). Anihein buiti resun wama lun wadügüni. Ladüga mánginti lun feruduna lániwa (Isa. 55:7).

3. Kaba wakutihan lidan aturiahani le?

³ Lidan aturiahani le wakutihaba ida luba lan wáyeihani lani Heowá hénpulu, lau feruduna wamaniña amu lau sun chará wamá. Ka luwuyeri figóu lunbei wariñaguni houn wéiyaaña lidan afiñeni? Ka uagu labusenra Heowá lun ferudunagua wamá wámagua? Ka gayaraabei wafurendeirun hámagiñe fiu íbirigu ha asufurirubaña saragu ladüga hafigouhan amu?

4. a) Ka lunbei ladügüni aban kristiánu le adügaalibei aban figóu wéiriti? b) Ka lunbei hadügüni wéiyaaña lidan afiñeni dan le hóundaragun luma aban afigouhati?

⁴ Súdiniti lun lariñawagún houn wéiyaaña lidan afiñeni, dan le ladügün aban íbiri aban figóu wéiriti. Lidan 1 Korintuna 6:9, 10, daritiwa fiu hénpulu luagu figóu wéiriti. Figóu libe burí le dürügua lumuti lilurudun Bungiu. Anhein adügaali lubéi aban kristiánu aban figóu libe le, lunti lafurieidun lun Heowá lun feruduna lani ani mosu layanuhan hama wéiyaaña lidan afiñeni (Sal. 32:5; Sant. 5:14). Ka lunbei hadügüni wéiyaaña lidan afiñeni? Heowarügüñein gabafu lun feruduna lani figóu sunsuinagubei, ani adüga lumuti ladüga lani Hesusu sákürifisiu. * Gama lumoun, ru hali Heowá ubafu houn wéiyaaña lidan afiñeni lun hanúadirun lau tídehan lererun anhein lerederuba lubéi afigouhati lidan damuriguaü o labugúba lan (1 Ko. 5:12). Lun lira, mosu hadariruni óunabagülei lun álügüdahani burí le: lau san lichú lau lafigouha?, álugati san lun laramuduni?, barühali san saragu dan aramudei figóu ligía? Ani le súdinitimabei, arufuda laali san asakürihaali lan tídangiñe sun lanigi?, arufuda laali san Heowá feruduna laali lan gürigia ligía? (Adü. 3:19).

5. Ida luba hasagarun lílana damuriguaü buiti lídangiñe le hadügübei wéiyaaña lidan afiñeni?

⁵ Dan le hóundaragun wéiyaaña lidan afiñeni luma afigouhati, le lunbei hadügüni mosu hanúadiruni ligiaméme katei le anúadirubei sielu (Mat. 18:18). Ida luba hasagarun lílana damuriguaü buiti lídangiñe aransehani le? Anhein masakürihan afigouhati tídangiñe sun lanigi, siñati lerederun lidan damuriguaü, mosu labugún, ítara luba hounigirún lumutuniña Heowá luéi luriban lani hénpulu (1 Ko. 5:6, 7, 11-13; Titu 3:10, 11). Anhein adügǘwa katei le lídehaba lun lasaküriha gürigia le afigouhabei luma lun feruduna lani Heowá lifigoun gürigia le (Luk. 5:32). Furíeitiña wéiyaaña lidan afiñeni luagu íbiri le asakürihabei ani amuriahatiña luma Heowá lun labuiduragüdüni lumadagua luma (Sant. 5:15.).

6. Afuranguagüda huméi anhein gayara lubéi feruduna lani Heowá gürigia le bugawaalibei lídangiñe damuriguaü?

⁶ Samina wamá luagu aban afigouhati le masakürihanbei dan le hóundaragun wéiyaaña lidan afiñeni luma. Lidan kesi le, labugúba lídangiñe damuriguaü. Ani anhein ladüraagua lilurudun aban ageiraü, móunigirun habéi wéiyaaña lidan afiñeni luéi le lunbei lasuseredun lun. Ru hali Heowá ubafu houn gumadimatiña lun haguseragüdün ani lun habeichuni furumiñeguarügü le adüraaguti lúrudu, meberesenga anhein asakürihaali lubéi o masakürihan lan (Rom. 13:4). Lau lásügürün dan anhein íchiga íbiri ligía fe wuriba lan le ladügübei, ani lárigiñe aba lasaküriha tídangiñe sun lanigi ani aba lasansiruni lisaminan luma ligaburi, aranseñu luba Heowá lun feruduna lani (Luk. 15:17-24). Anihán le lunbei ladügüniwa íbini anhein adügaali lubéi íbiri ligía figóu wéiriti (2 Kro. 33:9, 12, 13; 1 Tim. 1:15).

7. Ka mini lubéi lun feruduna wamani aban gürigia le adügübei wuribani woun?

⁷ Ma inarüni ru lan awalidaguni woun dan le wasubudiruni mámaba lan wagía anúadira anhein feruduna lubéi lan Heowá aban afigouhati? Íbini ítara, anihein somu katei le yuubei woun lun wanúadiruni. Ka katei? Másiñati adüga lan aban gürigia somu katei wuribati woun, íbini figóu wéiriti, lárigiñe aba lariñagun woun sarí lani ani aba lamuriahan ferudun wama. O gayaraati mamuriahan lan ferudun wama. Lidan ámuñegueinarügü kesi, gayaraati wanúadirun lun feruduna wamani, lidan amu  dimurei, lun mareidun wamá igarihabu luba ani lun wáfaagun lun magañidun wamá luma. Inarüni lanügüba lan saragu dan ani hénrengubei lan lun feruduna wamani, dántima weiri lan wuribani le adügǘbei woun. Ariñagatu garüdia La Atalaya to lánina 15 lidan nefu-hati irumu 1994: “Dan le feruduna wamani afigouhati úati mini lan mariban lan le ladügübei. Lun aban kristiánu, mini lan ferudun, lígiruni sun katei lúhaburugu Heowá lau afiñeni. Lugundun ligía aguseragüdüti le richabei lidan sun ubóu, ani larufudubei irichaü lidan lidaani”. Ka uagu busén lubéi Heowá lun feruduna wamaniña amu luma lun wígiruni sun katei lúhaburugu, lidan amu dimurei, wafiñerun luagu liricha?

8. Ida liña warufuduni geteingiradi wamá lun lugudemehabu Heowá?

⁸ Dan le feruduna wamaniña amu, arufuda wamuti geteingiradi wamá luagu lugudemehabu Heowá. Lidan aban hénpulu, agoubaguagüda lumuti Hesusu Heowá luma aban urúei le ferudunabalin aban lumusun le maseinsunbei lun lafayeiruni ladúeihan. Gama lumoun marufudunti musu ligía gudemehabu lun musu líledi le adúeirubalin murusun seinsu (Mat. 18:23-35). Ka labusenrunbei Hesusu larufudahan woun? Ánhawa arufuda geteingiradi luagu gudemehabu le larufudubei Heowá woun, línchahabadiwa lun feruduna wamaniña amu (Sal. 103:9). Afuranguagüdatu aban garüdia La Atalaya átiri dan guentó, meberesenga átiri lan wéiyaasu feruduna wamaniña amu, mítaranti feruduna wamaniña amu lumoun “gudemehabu le larufudubei Heowá woun luma feruduna lániwa lídangiñe lani Hesusu sákürifisiu”.

9. Ka un larufuda Heowá gudemehabu? (Matéu 6:14, 15).

⁹ Anhein feruduna wamá amu, feruduna lubadiwa giñe Heowá. Arufudati Heowá gudemehabu houn ha gudemehabubaña (Mat. 5:7; Sant. 2:13). Furanguti larufuduni Hesusu hénpulu le dan le larufudahanbei houn lani disipulugu ida luba lan hafurieidun (aliiha huméi Matéu 6:14, 15). Furendeihadiwa aban katei libe le, luagu le lariñagubei Heowá lidan lidaani Hobu. Mosu meha lafurendeirun lubúein Bungiu úaraguati le awanda dimurei gáriti le hariñagubei ǘrüwa wügüriña ha: Elifási, Bilüdádü luma Sofarü. Ariñagati Heowá lun Hobu lun lafurieidun hawagu. Dan le ladügünbalin Hobu aba labiniruni Heowá (Hob. 42:8-10).

10. Ka uagu adüga lubéi dañu woun dan le wareidahan iyereehabúni? (Éfesuna 4:31, 32).

¹⁰ Adügati iyereehabúni wuribani woun. Ítara liña iyereehabúni kei aban ihürügu, ani busenti Heowá lun wagidaruni ihürügu le wawariua (aliiha huméi Éfesuna 4:31, 32). Ru lumuti Heowá adundehani le woun: “Ígirabei igañi, magañidabá” (Sal. 37:8). Sagatiwa buiti dan le wasigiruni adundehani le ladüga wuribati iyereehabúni lun wátuadi, dandu lun wágubu kei lun wasaminan (Ari. 14:30). Dan le wareidun iyereehabúni houn amu ítara liña kamá hamuga wátuña péisini, wéiritimati wuribani le wadügübei wóuniwagua. Ligíati, dan le feruduna wamaniña amu, adügatiwa buiti wóuniwagua (Ari. 11:17). Sanditiwa darangilaü ani gayaraati wasigirun wabaruaguóun eseriwida lun Heowá.

11. Ka tariñagubei Bíbülia luagu wafayeiragüdüniña gürigia luagu wuribani le hadügübei woun? (Rómana 12:19-21).

¹¹ Ígira wamá lun Búngiuba lan afayeiragüdaaña gürigia luagun hariban. Míchuti Heowá üma woun lun wáfayeiragüdüniña gürigia luagu figóu le hadügübei woun (aliiha huméi Rómana 12:19-21). Kei gafigoun wabéi ani marihín wamuti katei kei larihini Heowá, úati ubafu wawagu kei le luágubei Heowá lun waguseragüdün  buidu (Ebü. 4:13). Anihein dan, adügati le wasandirubei lun hénrengu lan wadügüni katei keisi lubudubu. Abürühati Santiagu: “Lugundun gürigia le gáñibei, madügün lumuti le aubei lagundaara Bungiu” (Sant. 1:20). Gayaraati wachoururuni ladügübei lan Heowá le buídubei ani ladügüba lun ñein lan irichaü.

12. Ida liña warufuduni afiñe wamá luagu liricha Heowá?

¹² Dan le feruduna wamaniña amu, arufudahatiwa afiñen wamá luagu liricha Heowá. Ánhawa ígirei sun katei lúhaburugu, warufuduñein chouru wamani ligíaba lan aranserei dañu le ladügübei figóu. Lídanme iseri ubóu le füramasei lubéi, “labulieidúaba sun le sügühalibei úaalime aritaguti luagun” sun wuribani luma íruni le wasufurirubei uguñe weyu (Isa. 65:17). Inarüni san gayara lan wígiruni iyereehabúni luma igañi dántima le weiri lan wuribani le adügübei woun? Ariha waméi ida liña hadügüni fiu íbirigu.

13, 14. Ka larufudahabei lani Tony luma José sügǘ hun?

¹³ Saragu hádangiñe wábirigu arufudaaña ferudun íbini houn ha adügübaña saragu wuribani houn. Ka buiti hibihibei lau hadügüni?

¹⁴ Ariha waméi likesin Tony, * le awinwandubei Filipína. Saragu irumu lubaragiñe gefén lan luagu Heowá, aba lounwen aban hádangiñe líbugañanu. Aba líchugun Tony fe aban lan wügüri le gíribei José áfarubalin líbugaña hilagubei. Kei fasi lubéi Tony ani furunde ligía, busenti meha lafayeiragüdüni José luagu le ladügübei. Aba ladaürün José luagu le ladügübei. Dan le láfuridunbei José furisunrugúgiñe, aba láfiñurun Tony danme lan ladariruni láfarubei lan hilagubei, ligía lagañeihabei aban bisilédu. Gama lumoun, lidan dan ligía aba lagumeserun aturiahoun Bíbülia hama gefentiña luagu Heowá. Ariñagati: “Eibu nawanserun lidan naturiahan, furendeitina mosu lan nasansiruni nigaburi. Mosu meha nígiruni igañi”. Aba labadiseirun Tony ani lau lásügürün dan ábanhali wéiyaali lidan afiñeni. Aba taweiridun lanigi Tony dan le líchugubei fe ábanhali lan giñe gefenti luagu Heowá José! Dan le hadunragunbei, aba hóuburagu houngua ani ariñagati Tony lun José feruduna laali lan. Ariñagati Tony ua lan dimurei lun lafuranguagüdüni  óunwenbu ugundani le lasandirubei dan le líchugubei ferudun lun José. Biní lumuti Heowá Tony ladüga aranseñu liña lan lun feruduna lániña amu.

15, 16. Ka larufudahabei le lásügürübei Peter tuma Sue woun?

¹⁵ Lidan irumu 1985, dan le tídanñein lubéi Luban Adamuridaguni Peter tuma Sue lidan aban adamuridaguni, sódini aba laduurun somu katei. Ígirati meha aban wügüri aban bonba tidan Luban Adamuridaguni. Ladüga le asuseredubei, féridi tumuti Sue tirimichun ani siñaali meha tarihin ni taganbun buidu. * Súnwandan meha lálügüdagun Peter tuma Sue houngua: “Ka funa san adügübalin katei wuribati le?”. Saragu irumu lárigiñe, aba larügüdǘn wügüri le adügübalin wuribani le ani mama Gefenti aba ladaürǘn lun sun libagari. Aba lálügüdawagun Peter tuma Sue anhein feruduna habéi lubéi gürigia ligía, aba hóunabun: “Arufudahati Heowá woun ánhawa lan agañida o wareidun igarihabu wuribabei lan lun wátuadi luma lun wasaminan ani gayaraabei weferidiruni wagundan. Ligíati, lúmagiñe lasuseredun katei ligía, amuriahatiwa luma Heowá lun wagidaruni igañi luma iyereehabúni wawariua lun wawinwandun lau darangilaü”.

¹⁶ Ménrenguti funa san houn íbirigu ha feruduna hamá? Anihein dan hénrengu lan. Ariha waméi le hariñagubei: “Anihein dan sanditiwa igañi ladüga le asuseredubei tun Sue dántima le laribadun tasandiragun tungua. Kei le áfaagua wabéi lun masaminarun wamá saragu luagu le asuseredubei, aba lagidarun igañi wawéi lau lóufudagun. Ligíati, gayaraati wariñagun tídangiñe sun wanigi, anhein lan adügagua wügüri ligía lungua gefentime luagu Heowá, wíchuguba aban buiti achülürüni lun. Arufudahati sügǘ le woun dan lan le gaganbadi wamá lun inarüni méiniti le tídanbei Bíbülia huáliguati wasandiragun woungua. Adügati katei le lun buidu lan wasandiragun woungua. Ruti giñe dǘgüdaguaü woun wasubudiruni yarafa madise laransehabei lan Heowá sun dañu le adügǘbei woun”.

17. Ka larufudahabei le tásügürübei Myra hun?

 ¹⁷ Furendei tumuti Myra inarüni dan le maríeiharu ani gasaani tugía bián irahüñü, gama lumoun máhati tani weiriei lun inarüni. Lau lásügürün dan, aba lagabarahanu ani aba lígirunu hau sun tirahüñü. Ariñagatu Myra: “Dan le lígirunbalina nani weiriei, aba nasandiragun nungua, kei hasandiragun saragu gürigia ha agabarahoubaña hougua. Sanditina igarigu, igañi, aba níchuguni duru nuougua, ani mafiñentina yebe lasusereduba lan aban katei ítarati nun”. Lau sun ígiraguaaña lan, sandítagili igarigu le lanügübei lagarabaagun tun. Ariñagatu giñe: “Sandiguatina nungua ítara luagu saragu hati, aba níchugun fe lagadeiruñein lan le nasandirubei numadagua luma Heowá luma hama amu”. Guentó, gayara hali tariñagun Myra masandiharu lan igañi ani mabusenrúntu lun lasuseredun ni kata wuribati lun le meha tani weiriei. Lubaragiñe lira, agurabatu lun lachülürün dan lun lánharun lun inarüni. Ténitu Myra lun le lunbei tadügüni, mama lun le sügühalibei. Lau sun tábugua lan tagüriahaña bián tisaanigu lidan inarüni, gúndaatu lidan teseriwidun lun Heowá úara hama tisaanigu hau haduheñu.

18. Kei Heowá lubéi aguseragüdüti le íñutimabei, ka lunbei gayara lan wachoururuni?

¹⁸ Kei Heowá lubéi Aguseragüdüti le Íñutimabei, mama mosu wadiheridun luagu ida luba lan haguserawagüdün amu, Heowaba etenira lun lira. Ma ruti le awalidaguni woun! (Rom. 14:10-12). Gayaraati wachoururuni laguseragüdüba lan Heowá súnwandan luagu ka lan buídubei luma ka lan wuribabei según lilurudun le macharabei (Agu. 18:25; 1 Uru. 8:32). Maweiyasunbei Heowá adüga ni kata le marichabei.

19. Kaba libiha liricha Heowá le úabei mégeiti luagu?

¹⁹ Ayumahatiwa lun laranseruni Heowá sunsuinagubei dañu le ladügübei figóu. Lareidaguagüdübei lun súnwandan sun igarigu le wasandirubei dandu wágubu kei ligaburi wasandiragun woungua (Sal. 72:12-14; Aruf. 21:3, 4). Le linarün katei, wabulieidúbei sun igarigu le. Lidan awanha lan agurabahei weyu ligía gebegi lan iyaraani le líchugubei Heowá woun lau wasigiruni lani hénpulu lau feruduna wamaniña amu.