1. Cosa asiguranza el ta dale si Jehova con el maga pecador quien ya arripinti?

 MASKIN pa si Jehova el diaton Creador, el quien kanaton ta dale Ley y el diaton Juez, ele tambien el diaton amable Tata na cielo. (Sal. 100:3; Isa. 33:22) Si ta culpa kita con ele y deverasan ta arripinti, gendeh lang le basta puede perdona kanaton sino bien quierre le se hace. (Sal. 86:5) Por medio con profeta Isaias, si Jehova ya dale kanaton este amable asiguranza: “Maskin pa el de ustedes maga culpa bien colorao, este hay queda blanco igual na nieve.”​—Isa. 1:18.

2. Para tene kita buen relacion con otro, cosa kita debe hace?

² Ciendo maga imperfecto kita, todo kita ta puede habla o hace maga cosas que ta hace sinti duele con otro. (Sant. 3:2) Pero, gendeh se quierre decir que gendeh mas kita puede tene buen relacion kanila. Posible siempre se si sabe kita perdona. (Prov. 17:9; 19:11; Mat. 18:21, 22) Si ta puede kita hace sinti duele con uno y otro na diutay manera, quierre si Jehova que perdona kita. (Col. 3:13) Tiene kita buen razon para hace con ese cay si Jehova ta perdona kanaton “completamente.”​—Isa. 55:7.

3. Cosa kita considera na este articulo?

³ Na este articulo, hay considera kita si paquemodo el maga imperfecto gente puede imita con el perdon de Jehova. Cosa maga culpa el debe kita habla con el maga anciano? Porque  quierre si Jehova que perdona kita con otro? Y cosa kita puede aprende con el cuanto del diaton maga hermano y hermana quien grabe ya sufri por causa na culpa del otro?

4. (a) Si el un siervo de Jehova ya comete serioso culpa, cosa le debe hace? (b) Cosa el responsibilidad del maga anciano si man cuento sila con el quien ya comete culpa?

⁴ Debe habla con el maga anciano si tiene quien ya comete serioso culpa. El cuanto ejemplo de ese maga culpa puede incuntra na 1 Corinto 6:9, 10. Serioso el maga culpa si grabe este ya viola con el ley del Dios. Si el un Cristiano ya comete ansina clase de culpa, debe le atraca con Jehova na rezo y debe le anda con el maga anciano na congregacion. (Sal. 32:5; Sant. 5:14) Cosa el responsibilidad del maga anciano? Solamente si Jehova el tiene autoridad para completamente perdona con el maga culpa y posible se por medio na rescate de Jesus. * Pero, ya dale si Jehova el responsibilidad con el maga anciano para determina base na Biblia si puede ba esta na congregacion el quien ya comete culpa. (1 Cor. 5:12) El uno del maga cosas que necesita sila hace amo que pricura contesta con el siguiente pregunta: Intencional ba ya hace con el culpa? El persona ba ya plaña adelantao que hace con el culpa y ya pricura esconde con ese? Ya continua ba le hace con el culpa por largo tiempo? El mas importante, tiene ba evidencia que deverasan le ta arripinti? Tiene ba indicacion que ya perdona con ele si Jehova?​—Act. 3:19.

5. Cosa el maga buen resulta por causa na cosa ta hace el maga anciano?

⁵ Si tan cuento el maga anciano con el quien ya culpa, el diila goal amo que hace decision igual na decision que ya hace na cielo. (Mat. 18:18) Na cosa manera el congregacion ta beneficia na este arreglamiento? Ta asigura este que hay quita con aquellos quien ya comete culpa que nuay arripinti para gendeh sila causa peligro con el maga precioso carnero de Jehova. (1 Cor. 5:6, 7, 11-13; Tito 3:10, 11) Puede tambien este ayuda con el quien ya culpa para arripinti y ricibi el perdon de Jehova. (Luc. 5:32) El maga anciano ta reza para con el quien ya arripinti y ta pidi con Jehova que ayuda con ele para queda otravez enbuenamente el de suyu espiritualidad.​—Sant. 5:15.

6. Si yan disfellow el un persona, posible ba siempre con ele perdona? Explica.

⁶ Pone kita que nuay arripinti el persona cuando yan cuento con ele el maga anciano. Si ansina, hay man disfellow con ele na congregacion. Si ya viola le con el ley del gobierno, gendeh con ele protege el maga anciano na maga mal resulta del cosa le ya hace. Ta permiti si Jehova con el maga gobierno que juzga y castiga con maskin quien que ya viola con el ley​—ya arripinti man le o nuay. (Roma 13:4) Pero si na uliji este persona ya realiza que mali el cosa le ya hace, sincero ya arripinti y ya hace maga cambio, preparao con ele perdona si Jehova. (Luc. 15:17-24) Deverasan se maskin pa bien serioso el de suyu maga culpa.​—2 Cron. 33:9, 12, 13; 1 Tim. 1:15.

7. Cosa kita ta hace si ta perdona kita con el un persona quien ya culpa kanaton?

⁷ Alegre kita cay gendeh kita el responsable para decidi si hay perdona ba si Jehova con el un pecador! Maskin pa ansina, tiene un cosa que necesita kita decidi. Cosa se? Na cuanto situacion, posible el un persona hay culpa kanaton​—tiene vez, serioso pa gane—​pero posible pidi le kanaton despensa y perdon. Na  otro situacion, posible gendeh se hace el persona. Maskin pa ansina, puede kita iscuji que perdona con ele y gendeh man sentimiento o guarda agrabio con ele. El deverasan, posible necesita este tiempo y esfuerzo especialmente si ya sinti gayot kita duele. El The Watchtower de Septiembre 15, 1994, ta habla: “Si ta perdona tu con el un persona, gendeh se quierre decir que ta consinti tu con el culpa que ya hace le. El un Cristiano quien ta perdona ta confia que hay juzga enbuenamente si Jehova. Si Jehova el recto Juez na entero universo y hay asigura le que ricibi kita justicia na justo tiempo.” Porque quierre si Jehova que perdona kita y confia que hay juzga le con justicia?

8. Na cosa manera ta dale kita mira apresacion na lastima de Jehova si ta perdona kita?

⁸ Si ta perdona kita, ta dale kita mira apresacion. Na un ilustracion, ya compara si Jesus con Jehova na un amo quien ya cancela con el bien grande debe del un esclavo que gendeh este ta puede paga. Maskin pa ansina, este esclavo nuay dale mira lastima con el otro esclavo quien tiene con ele diutay debe. (Mat. 18:23-35) Cosa kanaton ta enseña si Jesus? Si deverasan kita ta aprecia con el grande lastima de Jehova para kanaton, hay perdona kita con otro. (Sal. 103:9) El The Watchtower ya habla cuanto año ya el ya pasa: “Maskin pa cuanto beses kita ta perdona con el diaton projimo, gendeh se puede compara si cuanto beses kanaton ta perdona si Jehova por medio del Cristo.”

9. Con quien si Jehova ta dale mira lastima? (Mateo 6:14, 15)

⁹ Si ta perdona kita, hay perdona tambien kanaton. Ta dale mira lastima si Jehova con aquellos lastimoso. (Mat. 5:7; Sant. 2:13) Ya hace se claro si Jesus cuando ya enseña le con el de suyu maga dicipulo si paquemodo reza. (Le con el Mateo 6:14, 15.) Puede tambien kita aprende semejante leccion na cosa ya habla si Jehova con el de suyu siervo, si Job. Este fiel gente ya sinti gayot duele na cosa ya habla con ele el tres hombre​—si Elifaz, Bildad y Zofar. Ya manda si Jehova con Job que reza para kanila. Despues quel hace si Job, ya bendici con ele si Jehova.​—Job 42:8-10.

10. Porque peligroso que guarda agrabio? (Efeso 4:31, 32)

¹⁰ Peligroso si ta guarda kita agrabio. Igual na un pesao carga el rabia. Quierre si Jehova que larga kita con ese para tene kita paz. (Le con el Efeso 4:31, 32.) Ya anima le kanaton que “quita con el rabia y evita queda bien rabiao.” (Sal. 37:8) Si sigui kita con ese consejo, puede gayot se ayuda kanaton. Si ta guarda kita agrabio, puede este tene mal efecto na diaton fisical y mental salud. (Prov. 14:30) Si tiene kita agrabio, gendeh se afecta con el persona con quien rabiao kita, igual si paquemodo gendeh afecta con ele si toma kita veneno. Pero, si ta perdona kita con otro, dol aquel ta dale kita regalo con el diaton mismo cuerpo. (Prov. 11:17) Ta tene kita paz na pensamiento y corazon, y ta puede kita continua na diaton servicio con Jehova.

11. Cosa ta habla el Biblia acerca na vengganza? (Roma 12:19-21)

¹¹ De Jehova el vengganza. Si Jehova nuay kanaton dale el derecho para vengga con el un persona quien ya culpa kanaton. (Le con el Roma 12:19-21.) Ciendo imperfecto kita y limitao el diaton entendimiento, gendeh kita puede juzga na justo manera igual con Dios. (Heb. 4:13) Y tiene vez por causa na diaton emocion, tan dificil kita sabe si cosa el justo  que hace. Ya guia si Jehova con Santiago para escribi: “El rabia del gente gendeh ta hace el trabajo de justicia de Dios.” (Sant. 1:20) Puede kita asigura que hay hace si Jehova si cosa el justo y ta promete le que hay tene justicia na uliji.

12. Paquemodo kita dale mira que ta confia kita con el justicia de Jehova?

¹² Si ta perdona kita, ta dale kita mira que ta confia kita con el justicia de Jehova. Si ta deja kita que si Jehova el juzga, ta dale kita mira que ta confia kita que hay quita le con el todo mal efecto que ya causa el culpa. Na de suyu nuevo mundo, el maga mal cosas que ya experiencia kita “gendeh mas [kita] acorda y perde ya este na corazon.” (Isa. 65:17) Pero si ya sinti gayot kita duele, posible ba gayot que quita con el rabia y agrabio que tiene kita na diaton corazon? Considera si paquemodo el cuanto ya puede hace con ese.

13-14. Cosa tu ya aprende na experiencia de Tony y José acerca na perdon?

¹³ Manada del diaton maga hermano y hermana el ya decidi perdona maskin pa ya sinti gayot sila duele na cosa ya hace el otro. Cosa maga bendicion sila ya experiencia cay ya hace sila se?

¹⁴ Manada año antes le ya sabe el verdad, si Tony, * quien ta queda na Pilipinas, ya sabe que el un hombre que si José ya mata con el uno del de suyu maga mayor hermano. Na aquel tiempo, bien agresivo y violente si Tony y quierre le man balus. Ya arresta con José y ya hace con ele preso. Despues sale na preso si José, determinao si Tony que busca y mata con ele. Gane, ya cumpra le pusil. Despues, si Tony ya principia estudia con el Biblia junto na maga Testigo de Jehova. Ele ya habla, “Mientras ta estudia yo, ya aprende yo que necesita yo cambia con el de mio personalidad y accion, y necesita yo quita con el de mio rabia.” Despues de cuanto tiempo, ya bautiza si Tony y na uliji, ya queda un anciano na congregacion. Imagina si cosa le ya sinti cuando ya sabe le que si José ya queda tambien un bautizao siervo de Jehova! Cuando yan mirajan sila, ya abraza sila con uno y otro, y ya habla si Tony con José que  ya perdona le con este. Ya habla si Tony que por causa na cosa le ya hace, ya queda le bien alegre y dificil para con ele que pone na palabra el cosa le ta sinti. Claro gayot que ya bendici si Jehova con Tony cay preparao le perdona.

15-16. Cosa tu ya aprende na experiencia de Peter y Sue acerca na perdon?

¹⁵ Del 1985, ta atende na un miting na Kingdom Hall kanda Peter y Sue cuando bigla lang tiene cosa ya rebenta. El un hombre ya pone bomba adentro del Kingdom Hall! Por causa con ese, ya queda afectao el vista y oida de Sue. Gendeh mas tambien le ta puede ole. * Pirmi ta puede pensa kanda Peter y Sue, ‘Cosa clase de gente el hace con este mal cosa?’ Despues de cuanto año, ya arresta con el quien ya pone bomba que gendeh un siervo de Jehova y ya sentencia con ele que man preso na de suyu entero vida. Cuando ya pregunta con Peter y Sue si ya perdona sila con este gente, sila ya habla: “Ta enseña kanaton si Jehova que si esta kita rabiao y guarda agrabio, tiene se mal efecto na diaton fisical, emocional y mental salud. Poreso despues de aquel suceso, ya pidi kame con Jehova que ayuda kanamon que quita con el rabia y agrabio para puede kame continua vivi que tiene paz.”

¹⁶ Facil ba para kanila que perdona? Gendeh. Ya habla sila: “Si ta sufri si Sue por causa na de suyu maga injury, ta queda kame rabiao otravez. Pero, gendeh kame ta continua pensa con ese poreso ta perde lang dayun el cosa kame ta sinti. Gane, puede gayot kame habla que si aquel gente hay queda diaton hermano, alegre kame con ele acepta. Este experiencia ya enseña kanamon que si aplica kita con el maga principio na Biblia, hay sinti kita alivio. Gane, ta ayuda este kanamon na maga manera que gendeh kame ta expecta! Ta dale tambien kanamon comforta cay sabe kame que gendeh mas dura hay quita si Jehova con el todo negativo cosas que ya experiencia kame.”

17. Cosa tu ya aprende na experiencia de Myra acerca na perdon?

 ¹⁷ Ya aprende si Myra con el verdad cuando casao ya le y tiene dos diutay anak. Pero, el de suyu marido nuay acepta con el verdad. Despues de cuanto tiempo, ya comete este adulterio y ya abandona con el familia. Si Myra ya habla: “Cuando el de mio marido ya deja conmigo y con el diamon dos anak, ya sinti yo el cosa ya sinti el manada despues kanila traiciona​—espantao, gendeh maka-creé, triste, yan mahay, rabiao y ya disculpa yo con el de mio mismo cuerpo.” Maskin pa ya termina ya el diila matrimonio, nuay siempre perde el dolor. Ya habla si Myra: “Ya continua yo sinti malingasa y rabiao por cuanto meses, y ya realiza yo que aquel maga sentido ya afecta con el de mio relacion con Jehova y con otro.” Ya habla si Myra que ahora ya puede ya le quita con el de suyu rabia y no quierre le que tiene cosa malo sucede con el de suyu marido de antes. Ta esperanza le que llega el tiempo, hay sirvi tambien este con Jehova. Si Myra gendeh mas tan focus na cosa ya sucede con ele de antes. Como un solo mayores, ya hace le engranda con el de suyu dos anak para queda maga siervo de Jehova. Ahora, alegre si Myra que sirvi con Jehova junto con el de suyu maga anak y el diila maga familia.

18. Cosa kita asigurao que hace si Jehova como el Supremo Juez?

¹⁸ Alegre kita cay nuay kita el responsibilidad para decidi si paquemodo juzga con el maga gente! Como el Supremo Juez, si Jehova el quien hace con ese. (Roma 14:10-12) Puede gayot kita confia que pirmi le juzga asegun na de suyu perfecto principio acerca si cosa el justo y mali. (Gen. 18:25; 1 Rey 8:32) Nunca le hace maga cosas que gendeh justo!

19. Cosa puede cumpli si Jehova como el perfecto Juez?

¹⁹ Ta espera gayot kita con el tiempo cuando hay completamente quita si Jehova con el todo mal efecto del imperfeccion y pecado. Na ese tiempo, nuay mas ya gayot el maskin cosa negativo que ya experiencia kita na fisical y na emocional. (Sal. 72:12-14; Rev. 21:3, 4) Gendeh ya gayot kita acorda con ese. Mientras ta espera kita con ese tiempo, ta rindi gayot kita gracias con Jehova cay puede kita imita si paquemodo ele ta perdona.