1. Unsang pasalig ang gihatag ni Jehova sa mahinulsolong makasasala?

 BISAG si Jehova ang atong Maglalalang, Tighatag ug Balaod, ug Maghuhukom, siya pod ang atong mahigugmaon nga Amahan sa langit. (Sal. 100:3; Isa. 33:22) Dihang makasala ta niya ug sinserong maghinulsol, naa siyay awtoridad nga pasayloon ta, ug gusto gyod nâ niyang himoon. (Sal. 86:5) Pinaagi kang propetang Isaias, si Jehova naghatag niining mahigugmaong pasalig: “Bisan tuod ang inyong mga sala hayag-pula, kini papution sama sa niyebe.”​—Isa. 1:18.

2. Aron maayo tag relasyon sa uban, unsay angay natong himoon?

² Kay dili ta perpekto, kitang tanan makasulti ug makabuhat ug mga butang nga makapasakit sa uban. (Sant. 3:2) Pero wala nâ magpasabot nga dili na ta puwedeng masuod nila. Masuod gihapon ta nila kon kamao tang mopasaylo. (Prov. 17:9; 19:11; Mat. 18:21, 22) Kon masakitan ta sa ginagmayng butang nga nahimo sa uban, gusto ni Jehova nga pasayloon nato sila. (Col. 3:13) Ug angay gyod nato nang himoon kay si Jehova ‘madagayaong nagpasaylo’ nato.​—Isa. 55:7.

3. Unsay atong hisgotan niining artikuloha?

³ Niining artikuloha, atong hisgotan kon unsaon nato pagsundog ang pagpasaylo ni Jehova bisag dili ta perpekto. Unsang mga sala ang angay natong isulti sa mga ansiyano?  Nganong gusto ni Jehova nga magpasaylo ta? Ug unsay atong makat-onan sa ubang igsoon nga nag-antos pag-ayo tungod sa sala sa uban?

4. (a) Kon ang alagad ni Jehova makahimog seryosong sala, unsay angay niyang himoon? (b) Unsay responsibilidad sa mga ansiyano dihang makig-estorya sila sa nakasala?

⁴ Ang seryosong mga sala angayng isulti ngadto sa mga ansiyano. Ang pananglitan niini nga mga sala makita sa 1 Corinto 6:9, 10. Ang seryosong mga sala maoy grabeng paglapas sa balaod sa Diyos. Kon ang Kristohanon makahimo niana nga sala, kinahanglan siyang moampo kang Jehova nga Diyos ug moduol sa mga ansiyano sa kongregasyon. (Sal. 32:5; Sant. 5:14) Unsay responsibilidad sa mga ansiyano? Si Jehova lang ang naay katungod nga bug-os magpasaylo sa mga sala, ug iya ning himoon base sa halad lukat. * Pero gihatagan ni Jehova ang mga ansiyano ug responsibilidad sa pagdesisyon base sa Kasulatan kon ang makasasala angay pa bang magpabilin sa kongregasyon. (1 Cor. 5:12) Apil sa ilang himoon mao ang pagtubag sa mosunod nga mga pangutana: Gituyo o giplano ba sa maong tawo ang sala? Gisulayan ba ni niyag tago? Balikbalik ba ni niyang gihimo sa taastaas nga panahon? Ug ang pinakaimportante, naa bay ebidensiya nga kinasingkasing siyang naghinulsol? Naa bay mga timailhan nga napasaylo na siya ni Jehova?​—Buh. 3:19.

5. Unsang mga kaayohan ang moresulta tungod sa buluhaton sa mga ansiyano?

⁵ Dihang ang mga ansiyano makig-estorya sa nakasala, tumong nila nga ang ilang desisyon dinhi sa yuta parehas sa nadesisyonan na sa langit. (Mat. 18:18) Unsay kaayohan ani sa kongregasyon? Maprotektahan ang kongregasyon kay ang mga nakasala nga wala maghinulsol dili tugotan nga magpabilin sa kongregasyon ug makahimog kadaot sa pinanggang mga alagad ni Jehova. (1 Cor. 5:6, 7, 11-13; Tito 3:10, 11) Makatabang pod ni aron ang nakasala maghinulsol ug mapasaylo ni Jehova. (Luc. 5:32) Ang mga ansiyano mag-ampo para niya ug maghangyo kang Jehova nga tabangan siya nga mabalik ang iyang espirituwalidad.​—Sant. 5:15.

6. Kon ang nakasala ma-disfellow, pasayloon pa ba siya ni Jehova? Ipatin-aw.

⁶ Ibutang ta nga ang nakasala dili mahinulsolon dihang giestorya siya sa mga ansiyano. Kon mao, i-disfellow siya. Kon naa siyay nasupak nga balaod sa nasod, dili siya protektahan sa mga ansiyano sa silot sa iyang sala. Gitugotan ni Jehova ang mga gobyerno sa paghukom ug pagsilot kang bisan kinsa nga nagsupak sa balaod—naghinulsol man siya o wala. (Roma 13:4) Pero kon sa ulahi ang nakasala makaamgo ug kinasingkasing nga maghinulsol ug magbag-o, pasayloon siya ni Jehova. (Luc. 15:17-24) Pasayloon siya bisan pag seryoso kaayo ang iyang nahimong mga sala.​—2 Cron. 33:9, 12, 13; 1 Tim. 1:15.

7. Unsay gipasabot sa pagpasaylo niadtong nakasala nato?

⁷ Makapahupay gyod nga dili kita ang kinahanglang modesisyon kon pasayloon ba ni Jehova ang nakasala. Pero naa tay kinahanglang himoon nga desisyon. Unsa man? Naay mga panahon nga ang igsoon nakasala nato, ug grabe ang iyang gihimo, pero  nangayo siyag pasaylo. Naa poy mga panahon nga ang nakasala wala mangayog pasaylo. Bisan pa ana, puwede gihapon nato siyang pasayloon. Unsay gipasabot ani? Puwede tang modesisyon nga dili na maghambin ug kasuko. Ang tinuod, nagkinahanglan nig panahon ug paningkamot, ilabina kon nasakitan kaayo ta. Ang Septiyembre 15, 1994 nga Bantayanang Torre nag-ingon: “Kon pasayloon mo ang usa ka makasasala, kini wala magpasabot nga ikaw nagapalabay sa sala. Alang sa Kristohanon, ang pagpasaylo nagapasabot nga masaligong nagatugyan sa butang diha sa mga kamot ni Jehova. Siya mao ang matarong nga Maghuhukom sa tibuok uniberso, ug siya mopahamtang sa hustisya sa hustong panahon.” Nganong gusto man ni Jehova nga pasayloon nato ang nakasala ug itugyan Kaniya ang pagpahamtang sa hustisya?

8. Nganong ang pagpasaylo nagpakitag apresasyon sa kaluoy ni Jehova?

⁸ Ang pagpasaylo nagpakitag apresasyon. Sa usa ka ilustrasyon, gipakasama ni Jesus si Jehova sa usa ka hari nga nagpapas sa dako kaayong utang nga dili kayang bayran sa iyang ulipon. Pero ang gikaluy-an nga ulipon wala magpakitag kaluoy sa ulipon nga nakautang niyag mas gamayng kantidad. (Mat. 18:23-35) Unsang leksiyon ang gitudlo ni Jesus kanato? Kon giapresyar gyod nato ang dakong kaluoy ni Jehova kanato, mapalihok ta sa pagpasaylo sa uban. (Sal. 103:9) Mao ni ang giingon sa Bantayanang Torre daghang tuig na ang milabay: “Bisag kapila pa nato pasayloon ang uban, di gyod nato matumbasan ang kadako sa pagpasaylo ug kaluoy sa Diyos kanato pinaagi sa Kristo.”

9. Kinsay pakitaag kaluoy ni Jehova? (Mateo 6:14, 15)

⁹ Kadtong magpasaylo pasayloon. Si Jehova magpakitag kaluoy niadtong maluluy-on. (Mat. 5:7; Sant. 2:13) Gipasiugda nâ ni Jesus dihang gitudloan niya ang iyang mga tinun-an kon unsaon pag-ampo. (Basaha ang Mateo 6:14, 15.) Mao pod ni ang atong makat-onan sa giingon ni Jehova sa iyang alagad nga si Job. Kining matinumanon nga tawo nasakitan pag-ayo sa giingon sa tulo ka lalaki nga si Elipaz, Bildad, ug Zopar. Gisugo ni Jehova si Job nga iampo sila. Dihang gihimo nâ ni Job, gipanalanginan siya ni Jehova.​—Job 42:8-10.

10. Nganong makadaot ang paghambin ug kasuko? (Efeso 4:31, 32)

¹⁰ Ang paghambin ug kasuko makadaot. Ang kasuko bug-at pas-anon, maong gusto ni Jehova nga ato ning buhian aron mogaan ang atong pamati. (Basaha ang Efeso 4:31, 32.) Gidasig ta niya nga ‘isalikway ang kasuko ug biyaan ang kapungot.’ (Sal. 37:8) Makahatag ug kaayohan ang pagsunod ani nga tambag. Kon dili nato wad-on ang kasuko, makadaot ni nato sa pisikal ug mental. (Prov. 14:30) Ang paghambin ug kasuko samag pag-inom ug hilo; kitay madaot, dili ang tawo nga nakapasakit nato. Pero kon pasayloon nato ang uban, naghimo tag maayo para sa atong kaugalingon. (Prov. 11:17) Naa tay kalinaw sa hunahuna ug kasingkasing, ug makapadayon ta sa pag-alagad kang Jehova.

11. Unsay giingon sa Bibliya bahin sa pagpanimalos? (Roma 12:19-21)

¹¹ Si Jehova ang manimalos. Wala ta hatagi ni Jehova ug katungod nga manimalos niadtong nakasala nato. (Basaha ang Roma 12:19-21.) Kay limitado ug dili perpekto ang atong hunahuna, dili ta makahukom sa sakto nga paagi, dili sama sa Diyos. (Heb. 4:13) Ug usahay, maglabaw ang atong emosyon maong  dili ta makahimog saktong desisyon. Gigiyahan ni Jehova si Santiago sa pagsulat: “Ang kasuko sa tawo dili moresultag pagkamatarong nga iya sa Diyos.” (Sant. 1:20) Makaseguro ta nga himoon ni Jehova kon unsay husto ug seguroon niya nga mahatag ang hustisya.

12. Unsaon nato pagpakita ang atong pagsalig sa hustisya ni Jehova?

¹² Ang pagpasaylo nagpakita sa atong pagsalig sa hustisya ni Jehova. Kon atong itugyan kang Jehova ang tanan, atong gipakita ang atong pagsalig nga wad-on niya ang tanang kadaot nga resulta sa nahimong sala. Sa iyang gisaad nga bag-ong kalibotan, ang sakit nga mga kaagi “dili na hinumdoman, ug dili na kini motungha sa kasingkasing” hangtod sa hangtod. (Isa. 65:17) Pero kon nasakitan kaayo ta, posible ba gyod nga mawala nato sa atong kasingkasing ang kasuko? Hisgotan nato karon kon giunsa nâ paghimo sa uban.

13-14. Unsay imong nakat-onan bahin sa pagpasaylo gikan sa eksperyensiya ni Tony ug José?

¹³ Daghang igsoon ang midesisyon nga magpasaylo bisag nasakitan kaayo sila sa gihimo sa uban. Unsang mga panalangin ang ilang nadawat tungod ana?

¹⁴ Sa wala pa ma-Saksi si Tony, * nga taga-Pilipinas, nahibaloan niya nga ang iyang magulang nga lalaki gipatay ni José. Adtong panahona, si Tony isog ug bayolente kaayo, ug gusto siyang manimalos. Si José gidakop ug gipriso tungod sa krimen nga iyang nahimo. Dihang nakagawas na si José sa prisohan, nanumpa gyod si Tony nga iya siyang pangitaon ug patyon, maong mipalit siyag pusil. Dayon si Tony giestadihan sa mga Saksi ni Jehova. Siya miingon, “Adtong nag-study na ko, nakat-onan nako nga kinahanglan kong magbag-o ug dili na maghambin ug kasuko.” Si Tony nabawtismohan ug sa ulahi nahimong ansiyano. Puwerte niyang kurata pagkahibalo niya nga Saksi na pod diay si José! Pagkita nila, naggakos sila, ug giingnan ni Tony si José nga gipasaylo na niya siya. Si Tony miingon nga ang iyang pagpasaylo nakahatag niyag dakong kalipay, nga maglisod gani siyag explain kon unsa nâ ka nindot nga pagbati.  Gipanalanginan gyod ni Jehova si Tony kay kinabubut-on siyang nagpasaylo.

15-16. Unsay imong nakat-onan bahin sa pagpasaylo gikan sa eksperyensiya ni Peter ug Sue?

¹⁵ Niadtong 1985, si Peter ug Sue nagtambong ug tigom sa Kingdom Hall dihang naay kalit nga kusog kaayong pagbuto. Naa diay nagbutang ug bomba sulod sa Kingdom Hall! Grabe kaayo ang mga injury ni Sue nga tungod ana, nadaot ang iyang panan-aw ug pangdungog. Dili na pod siya makapanimaho. * Si Peter ug Sue pirmeng makahunahuna, ‘Grabe pod tong tawhana nga makahimo siyag ingon adto ka daotan nga butang.’ Paglabayg daghang tuig, ang nagbutang sa bomba, nga dili Saksi, nadakpan ug gisentensiyahan nga mapriso sa tibuok niyang kinabuhi. Dihang gipangutana si Peter ug Sue kon napasaylo na ba nila ang tawo, sila miingon: “Gitudloan ta ni Jehova nga ang paghambin ug kasuko makadaot nato sa pisikal, emosyonal, ug mental. Maong sa sugod pa lang, gihangyo na namo si Jehova nga tabangan mi nga mawala ang among kasuko ug makapadayon sa among kinabuhi.”

¹⁶ Sayon ba pirme para nila ang pagpasaylo? Dili. Sila miingon: “Usahay kon mag-antos gani si Sue tungod sa iyang mga injury, mobati na pod mig kasuko. Pero wad-on dayon namo ni sa among hunahuna maong mawala ra pod dayon ang among kasuko. Gani, makaingon mi nga kon ang nagbutang sa bomba ma-Saksi, amo gyod siyang dawaton ingong igsoon. Kini nga eksperyensiya nagtudlo namo nga ang pagpadapat sa mga prinsipyo sa Bibliya makapagaan gyod sa atong gibati; mahuwasan ta sa daghang kabug-at nga atong gipas-an! Nahupay pod mi kay kabalo mi nga hapit nang wad-on ni Jehova ang tanang kadaot.”

17. Unsay imong nakat-onan bahin sa pagpasaylo gikan sa eksperyensiya ni Myra?

¹⁷ Si Myra na-Saksi dihang minyo na siya  ug naa nay duha ka gagmayng anak. Ang iyang bana wala modawat sa kamatuoran. Sa ulahi, nanapaw ang iyang bana ug gibiyaan sila. Si Myra miingon: “Dihang gibiyaan mi sa akong bana, di ko katuo, ug nakuratan ko, nasakitan, naguol, nasuko, ug gibasol nako ang akong kaugalingon—nga maoy sagad bation niadtong giluiban sa ilang kapikas.” Nagbulag sila, pero nasakitan gihapon siya sa gihimo sa iyang bana. Si Myra midugang: “Pila ka bulan kong naguol ug naglagot, ug nakita nako nga naapektohan na ang akong relasyon kang Jehova ug sa uban.” Karon, si Myra miingon nga wala na siya masuko ug maglagot sa iyang kanhing bana. Nanghinaot siya nga moabot ang panahon nga ang iyang kanhing bana moalagad kang Jehova. Nagpokus na siya sa kon unsay iyang mahimo, dili sa nahitabo. Gipadako niya ang iyang duha ka anak ug nahimo silang mga alagad ni Jehova. Karon, si Myra malipayong nag-alagad kang Jehova uban sa iyang mga anak ug sa ilang pamilya.

18. Nganong makasalig ta kang Jehova ingong Kinalabwang Maghuhukom?

¹⁸ Malipay gyod ta nga dili kita ang naay responsibilidad nga mohukom sa mga tawo! Ingong Kinalabwang Maghuhukom, si Jehova ang mohimo niining importanteng responsibilidad. (Roma 14:10-12) Makasalig gyod ta nga ang iyang paghukom kanunayng uyon sa iyang hingpit nga sukdanan sa husto ug sayop. (Gen. 18:25; 1 Hari 8:32) Dili gyod siya mohimog bisan unsa nga dili matarong!

19. Unsa unyay mahitabo dihang ipahamtang na ni Jehova ang hingpit nga hustisya?

¹⁹ Nangandoy gyod ta sa panahon nga wad-on na ni Jehova ang tanang dili maayong epekto sa sala ug pagkadili-hingpit sa tawo. Mawala na unya ang tanang pisikal nga kadaot nga atong naagoman ug ang mga kasakit nga atong naeksperyensiyahan. (Sal. 72:12-14; Pin. 21:3, 4) Dili na gyod ni hinumdoman. Samtang nagpaabot ta nianang nindot kaayo nga panahon, mapasalamaton kaayo ta nga gitabangan ta ni Jehova nga sundogon siya pinaagi sa atong pagpasaylo sa uban.