1. Ni enki eki Yehova ari kuhamiza abasiisi abari kwehana?

 YEHOVA ni Omuhangi witu, natuteraho ebiragiro, ni omuramuzi witu, kandi ni Tata witu ow’omu iguru ori kutukunda. (Zab 100:3; Isa 33:22) Twakora ekibi konka tukehana tubyihire aha mutima, naba ayetegwire kutusaasira. (Zab 86:5) Birabire aha muhanuzi Isaya, Yehova akatuhamiza ati: “Ebibi byanyu n’obu byakuba nibitukura, biryayera nk’orubare.”​—Isa 1:18.

2. Twaba turi kwenda kugira obusinge n’abandi, ni enki eki tushemerire kukora?

² Ahakuba tutahikirire, hine obu turi kugamba ninga shi tukora ebintu ebiri kushasha abandi. (Yak 3:2) Eco tikiri kumanyisa ngu tituri kubasa kugira obunywani burungi na bo. Eco nikibasika twayega kusaasira. (Emi 17:9; 19:11; Mat 18:21, 22) Twashobezanya omu buryo obu ari bwo bwona, Yehova nayenda ngu tusaasirane. (Kol 3:13) Twine enshonga ndungi eri kutuma twasaasirana. Eyo nshonga, ni ahabw’okuba Yehova na we ari kutusaasirira “kimwe.”​—Isa 55:7.

3. Ni enki eki twaza kushwijuma omuri eki kicweka?

³ Omuri eki kicweka, twaza kushwijuma oku abantu abatahikirire bari kubasa kutoreza Yehova bari kusaasira. Ni biha bibi ebi tushemerire kutwarira abazehe? Ahabw’enki  Yehova ari kutushaba ngu tusaasire abandi? Kandi shi ni enki eki turi kubasa kwegera ahari bamwe omu Bakristo bagenzi bitu abashashire munonga ahabw’ebibi by’abandi?

4. (a) Omuhereza wa Yehova yakora ekibi c’amani, ni enki eki ashemerire kukora? (b) Ni guha murimo ogu abazehe bari kuba bine babugana omuntu okozire ekibi?

⁴ Twakora ekibi c’amani nituba tushemerire kubigambira abazehe b’ekibina. Ebyo bibi nibishangwa omu 1 Bakorinto 6:9, 10. Owakora ekibi c’amani naba yashisha munonga ebiragiro bya Ruhanga. Omukristo yakora ekibi nk’eco, ashemerire kubigambira Yehova omu shara kandi ashemerire n’okubigambira abazehe b’ekibina. (Zab 32:5; Yak 5:14) Ni guha murimo ogu abazehe bine? Yehova ni we oyine obushoborozi bw’okusaasira ekibi omu bwijwire birabire aha kitambo ca Yesu. * Konka, Yehova akaha abazehe omurimo g’okushwijuma omu Byahandikirwe yaba omusiisi ashemerire kuguma omu kibina. (1 Kor 5:12) Kugira ngu bakore ensharamu, nibabanza bayebuza ebi bibuzo: Mbwenu shi ogu muntu yakora ekibi akigenderire? Mbehi ogu muntu akaba akozire entebekanisa y’okukora eki kibi? Mbehi amazire obwire buringwa ari kukora ekibi? Kandi ekiri kukira byona, mbehi hariho ekihamya ekiri kwereka ku ayehanire abyihire aha mutima? Mbehi hariho ebihamya ebiri kwereka ku Yehova yamusaasire?​—Byak 3:19.

5. Ni eha migisha eri kuruga omu murimo gw’abazehe?

⁵ Abazehe babugana omuntu okozire ekibi, entego yabo ni ey’okukora ensharamu nk’eyi Yehova ari kuba akozire. (Mat 18:18) Ni bata oku eyo ntebekanisa eri kugasira ab’omu kibina? Nikituma omusiisi ori kubasa kuba ari kushisha entama za Yehova z’omuhendo kandi ari kwanga kwehana yabingwa omu kibina. (1 Kor 5:6, 7, 11-13; Tit 3:10, 11) Nambwenu nikibasa kukwasa ogo musiisi kwehana, rero Yehova amusaasira. (Luk 5:32) Abazehe nibashaba n’omuntu okozire ekibi kugira ngu ashube agire obunywani burungi na Yehova.​—Yak 5:15.

6. Mbehi omuntu yaba yabingirwe, Yehova naba acabasa kumusaasira? Shoborora.

⁶ Reka tugire ngu abazehe babugana n’omuntu okozire ekibi yayanga kwehana. Eco nikituma yabingwa omu kibina. Yaba yashishire ebiragiro by’ihanga, abazehe tibari kubishereka. Yehova nayikiririza abategeki kucwera orubanja ninga shi kuhana omuntu wena ori kushisha ebiragiro yaba ayehanire ninga shi atehanire. (Rom 13:4) Konka ogo muntu yayehana abyihire aha mutima kandi akahinduka, Yehova naba ayetegwire kumusaasira. (Luk 15:17-24) Eco Yehova nakikora n’obu ogo muntu yakuba akozire ebibi by’amani.​—2 Bus 33:9, 12, 13; 1 Tim 1:15.

7. Ni buha buryo obu turi kubasa kusaasiramu abatushobize?

⁷ Nikituhumuriza kumanya ku tutine obushoborozi bw’okusharamu yaba Yehova arasaasire omusiisi ninga ataramusaasire! Konka hariho ebindi bintu ebi turi kusharamu. Ebyo bintu ni biha? Hariho omuntu ori kubasa kutushobeza munonga, konka atushaba embabazi. Obumwe nabasa kwanga kutushaba embabazi. N’obu cakuba kiri kisyoya, nitubasa kusharamu kubyehuza, rero tumusaasira. Mazima eco nikishaba obwire n’amani mingi, na munonga  yaba yatushashire munonga. Omunara g’Omurinzi gw’aha kiro ca 15 Okwamwenda, 1994, gukagira guti: “Ku ori kusaasira omusiisi tikiri kumanyisa ngu noba washagika ekibi eki yakozire. Omukristo yasaasira naba yayereka ku yabita omu mikono ya Yehova. Ni we mucwi w’emanja ohikirire omu nsi n’omu iguru kandi nacwa emanja omu buringaniza.” Ahabw’enki Yehova ari kutushaba kusaasira kandi tukareka ebintu omu mikono yeye?

8. Ni bata oku kusaasira kiri kwereka ku nitusiima Yehova ahabw’embabazi ezi yatwerekire?

⁸ Nituba turi kwereka ku nitusiima Yehova. Omu mugani gumwe, Yesu akageranisa Yehova n’omushija owasaasire omukozi weye ibanja eri yabire atari kubasa kushashura. Konka ogo mukozi we akaremwa kusaasira omukozi mugenzi weye owabire amurimu ibanja ry’esente nce munonga. (Mat 18:23-35) Ni enki eki Yesu yabire ari kwenda kutwegesa? Kugira ngu twereke ku nitusiima Yehova ahabw’embabazi ezi yatwerekire, tushemerire kusaasira abandi. (Zab 103:9) Omunara g’Omurinzi gumwe gukagamba ngu: “Emirundi yona eyi twakusaasira Omukristo mugenzi witu, tituri kubasa kuhika aha mbabazi ezi Ruhanga yatwerekire birabire ahari Kristo.”

9. Ni baha abu Yehova ari kwereka embabazi? (Matayo 6:14, 15)

⁹ Abari kusaasira nibija kusaasirwa. Yehova nayereka embabazi abari kuzereka. (Mat 5:7; Yak 2:13) Yesu akereka ku eco kiri amazima obu yayegesize abegi beye kushaba. (Shoma omuri Matayo 6:14, 15.) Yehova akaba yacerekire obu yabire ari kugamba n’omuhereza weye Yobu. Ogo mushija w’omwesigwa akashasha munonga ahabw’ebigambo ebiri kushasha ebi banywani beye ari bo Elifazi, Biludadi, na Zofari bagambire. Yehova akagambira Yobu ngu abashabire. Kandi Yobu ku yamazire kushaba, Yehova akamuha emigisha.​—Yob 42:8-10.

10. Ni kaha kabi k’okubika enzika? (Abefeso 4:31, 32)

¹⁰ Okubika enzika nikishisha. Yehova nayenda ngu tutunge okushemererwa okuri kuruga omu kutabika enzika. (Shoma omu Befeso 4:31, 32.) Natuhiga ‘kureka kugubwa kubi n’okuruga omu kiniga.’ (Zab 37:8) Ni ec’obwenge kukuratiza obwo buhabuzi. Okubika enzika nikibasa kuba ec’akabi aha mubiri n’omu bwenge. (Emi 14:30) Twabikira omuntu enzika, ni itwe abari kushasha. Obwe rero ku turi kusaasira abandi nituba twayezimurira ebirungi. (Emi 11:17) Nitugira obusinge bw’omu mutima kandi tuhereza Yehova tushemerirwe.

11. Ni enki eki Bibuli eri kugamba aha bikwatirine n’okwehorera? (Abaroma 12:19-21)

¹¹ Okuhora enzigu ni okwa Yehova. Yehova tari kutwikiririza kwehorera aha muntu otushobize. (Shoma omu Baroma 12:19-21.) Ahakuba tutahikirire kandi obushoborozi bwitu bwine obugarukiro, tituri kubasa kucwa ge orubanja nka Ruhanga. (Heb 4:13) Kandi obumwe nitubasa kuhabisibwa n’enyehurira zituma tutasharamu ge. Yehova akakwasa Yakobo kuhandika ngu: “Ekiniga c’omuntu tikikora by’okuhikirira kwa Ruhanga.” (Yak 1:20) Nitwesiga tutari kubanganisa ku Yehova arije kukora ekihikire kandi akacwa emanja omu buringaniza.

12. Ni bata oku turi kubasa kwereka ku nitwesiga oburinganiza bwa Yehova?

¹² Twasaasira nituba twayereka ku nitwesiga  oburinganiza bwa Yehova. Twareka ebintu omu mikono ya Yehova, nituba twayereka ku nitwesiga ku arije kuboneza ebintu byona ebyashishikire ahabw’ekibi. Naturaganisa ku omu nsi ensya “ebya kare bitarijukwa n’obu kwakuba okutebwaho omutima.” Isa 65:17) Konka shi ku bakuba batushobize munonga, okureka kubika enzika nikibasika? Reba oku bamwe bakikozire.

13-14. Ni enki eki wayegera aha kusaasira oku Tony yeyerekire José?

¹³ Benetata na banyanyazi bingi bakasharamu kusaasira abantu ababire babashobize n’obu babire babakorire ebintu bibi munonga. Ni eha migisha eyi batungire?

¹⁴ Tony * otwire omuri Filipini, atakabire Omuhamya wa Yehova akamanya ku bakuru beye babire bayisirwe n’omushija ori kwetwa José. Obumwe Tony akaba nahurira ayine ekiniga ayenda kwehorera. José akasibwa ahabw’obugomi bweye. José ku yarugire omu kihome, Tony akarahira ku yabire aramuhiige kugira ngu amwite. Akagura embunda kugira ngu ahike aha ntego yeye. Bwanyima Tony akatandika kwega Bibuli n’Abahamya ba Yehova. Akagira ati: “Oku nagenzire ndi kwega ebiri kukwata ahari Yehova, ni ko narebire ku hine ebi nshemerire kuhindura, harimu n’okwerinda kugira ekiniga.” Tony akahika aho yabatizibwa kandi yaba omuzehe w’ekibina. Tekateka oku camutangarize ku yamanyire ngu José na we akabatizibwa yaba Omuhamya wa Yehova! Ku babugine bakahoberana, rero Tony yagambira José ku yamusaasire. Tony akagamba ku okusaasira kwatumire yashemererwa munonga, yabura n’oku arakigambe. Mazima, Yehova akaha Tony emigisha ahabw’okusaasira abyihire aha mutima.

15-16. Ebyahikire ahari Peter na Sue byakwegesa ki aha bikwatirine n’okusaasira?

¹⁵ Omuri 1985, Peter na Sue bakaba bari omu nterane omu Nju y’Obukama obu habarukireho ekisasi. Hine omushija owabire  ategire ekisasi omu Nju y’Obukama! Sue akatunga obuhuta bw’amani obwatumire yaba empumi kandi yafa amatu. Nambwenu akatunga obumuga bw’okutahurira akahoho k’ebintu. * Peter na Sue bakaba nibakunda kwebuza ngu, ‘omuntu owakozire ekibi nk’eki ni owa muringo ki?’ Bwanyima y’emyaka myingi ogo muntu owategire ekisasi, otari Omuhamya wa Yehova akamanywa rero yasibwa emyaka yona y’amagara geye. Peter na Sue ku babuzibwe yaba basaasire ogo mushija, bakagarukamu bati: “Yehova natwegesa ku twagirira omuntu ekiniga kandi tukamubikira enzika, kiri kubasa kutushisha aha mubiri, omu nyehurira n’omu bitekateko. Obwe rero tukaba twashabire Yehova ngu atukwase tutaguma twine ekiniga ninga shi kubika enzika.”

¹⁶ Mbwenu shi kikaba kiborobire kusaasira? Ingaha buzima. Bakagumizamu bari kugira ngu: “Na hati ku turi kureba engaruka ezahikire ahari Sue ekiniga nikigaruka. Konka ahakuba tutari kubitekatekaho munonga, ekiniga nikihika kiri kuhwa. Mazima ogo mushija owategire ekisasi yahinduka akaba mwenetata, twetegwire kumwakira. Ebyatubireho bikatwegesa ku emisinge ya Bibuli eri kutukomorora ekatwiha omu buryo obu twabire tutari kutekateka! Nambwenu nikituhumuriza twamanya ku Yehova arije kuboneza ebintu byona ebyashishikire.”

17. Ebyahikire ahari Myra byakwegesa ki aha bikwatirine n’okusaasira?

¹⁷ Myra akega amazima obu yabire yagire omu maka kandi ayine abana babiri. Omushija weye tarikirize kwega amazima. Bwanyima y’obwire, ogo mushija akashambana yabasiga. Myra akagamba ati: “Omushija wange ku yansigire n’abana bange babiri, nkagira obusaasi bwingi, nagira amaganya, nayecwera orubanja kandi nagira ekiniga kingi.” N’obu omushija weye yamurugireho, akaguma ayine obusaasi bwingi.  Myra akagumizamu ari kugamba ati: “Ezo nyehurira zikatuma namara amezi mingi nyemerize omutima kandi nyine ekiniga, zashisha n’obunywani bwange na Yehova n’abandi.” Myra akagamba ku yamaririre kwerinda ekiniga n’okubikira enzika omushija weye owamusigireho. Ayine amasiko ku omushija weye erihinduka akaba omuhereza wa Yehova. Myra nata omutima aha birije kubaho omu biro by’omu misho. Nataho amani nk’omuzire omwe kugira ngu arere abana beye babiri bakure bari kuhereza Yehova. Erizoba Myra ayine okushemererwa ahabw’okuhereza Yehova ari n’abana beye n’ab’omu maka gabo.

18. Ahabw’enki turi kubasa kwesiga Yehova nk’omuramuzi witu mukuru?

¹⁸ Nikituhumuriza kumanya ku atari itwe abari kukora omurimo gugumire g’okusharamu oku abantu baracwerwe emanja! Ahakuba Yehova ari we Omuramuzi witu mukuru ni we ori kukora ogo murimo. (Rom 14:10-12) Nitwesiga tutari kubanganisa ku arije kucwa emanja ari kugendera aha misinge yeye y’ekirungi n’ekibi. (Kut 18:25; 1 Bag 8:32) Tari kubasa kukora ekintu omu buryo obutahikirire!

19. Ni enki eki Yehova arije kuturetera ahakuba ari omuramuzi ohikirire?

¹⁹ Twine ekihika c’okureba obwire obu Yehova arije kumariraho kimwe ebibi byona ebyaresirwe n’okutahikirira n’ekibi. Omuri obwo bwire, oburwire bwona bw’omu bitekateko n’omu nyehurira nibwija kukira. (Zab 72:12-14; Kush 21:3, 4) Byona tibirigaruka kwijuka. Obu tucategerize ngu obwo bwire buhike, nimureke twereke ku nitusima Yehova ahabw’okutuha obushoborozi bw’okumutoreza turi kusaasira.