1. Yika Yehova analakenya kuli yivulumunyi waze akulikonyeka ni mbunge yeswe?

 CHIPWE ngwe Yehova kali Ngaji, Sakatanga yetu nawa Mukwa-kutwaha shimbi, nihindu kali nawa Tata yetu wa zango. (Samu 100:3; Iza. 33:22) Muze twakuvulumuna Yehova ni kulikonyeka ni mbunge yeswe, iye keshi kutukonekena wika, alioze kakuzanga chinji kuchilinga. (Samu 86:5) Kupalikila muli profeta Izaia, Yehova kanalakenya ngwenyi: “Chipwe milonga yenu yinachili nge, kumuyipwa yitoma ngwe neve.”—Iza. 1:18.

2. Yika twatamba kulinga mba tupwe ni usepa upema ni akwetu?

² Mumu lia kupwa yihenge, ha mashimbu amwe twakuhanjika hanji kulinga yuma yize yakulemeka akwetu ku mbunge. (Tia. 3:2) Alioze yino kuyalumbunukine ngwo, kutuchi kuhasa kupwa ni usepa upema ni akwetu. Chuma muchitukwasa kupwa ni usepa upema ni akwetu chili kwakonekena. (Yishi. 17:9; 19:11; Mateu 18:21, 22) Nyi amwe matwamba hanji matulinga chimwe chuma chikehe chize muchitulemeka ku mbunge, Yehova kanazange hanga twakonekene. (Kolo. 3:13) Tuli ni yuma yinji yize yakututwala hanga tukonekene akwetu, mumu Yehova kakutwaha ukonekeno “wa kulumbama.”—Iza. 55:7.

3. Yika mutulilongesa ha mutwe uno?

³ Ha mutwe uno, mutulilongesaho chize mutuhasa kwimbulula Yehova ha kukonekena akwetu. Mutukumbulula nawa yihula  yino: Shili yika yize atamba kutala kuli makulwana a mu chikungulwila? Mumu liaka Yehova anatwite hanga tukonekene akwetu? Nawa yika mutuhasa kulilongesa ha yilweza ya mandumbu jetu waze amwene lamba ha shili ya akwo?

4. (a) Yika atamba kulinga ndumbu hanji pangi yoze walinga shili yinene? (b) Yika makulwana akulinga nyi maliwana ndumbu yoze wavulumuna?

⁴ Nyi mutunyingika ndumbu hanji pangi yoze walinga shili yinene, twatamba kulweza makulwana a mu chikungulwila. Mba shili yinene yika? Shili yinene yili kulinga yuma yize yakulimika ni shimbi ja Zambi. Shili ya mutapu au tunayiwane ha 1 A-Korindu 6:9, 10. Nyi mukwa-Kristu malinga shili ya mutapu au, katamba kulemba kuli Yehova hanga ete ukonekeno ni kufupa ukwaso wa makulwana a mu chikungulwila. (Samu 32:5; Tia. 5:14) Chiteli chika makulwana akwete mu chikungulwila? Tunanyingika ngwetu, Yehova wika mwe uli ni ulite wa kukonekena shili, nawa kakuchilinga kupalikila mu chitapo cha ukuule wa Yesu. * Alioze, Yehova hanahane kuli makulwana chiteli chakutesa kulita ni Mbimbiliya nyi chivulumunyi manunga mu chikungulwila nyi ka. (1 Kori. 5:12) Mba akwate kanawa chiyulo chacho, chuma chimwe chize makulwana akulinga chili kukumbulula yihula yino: Ndumbu yono katesanga kulinga shili yacho? Kafupa kuswekela akwo shili yacho? Shina shili yacho kayilinga ha yisuho yinji? Chahiana ulemu, shina kanasoloka ngwo kalikonyeka ni mbunge yeswe ha yize alinga? Kuli yimwe yize yinasolola ngwo Yehova kamukonekena?—Yili. 3:19.

5. Kuchi mulimo wa makulwana wakuyukisa mandumbu eswe mu chikungulwila ni ndumbu yoze wavulumuna?

⁵ Muze makulwana akuliwana ni ndumbu yoze walinga shili yinene, nyonga lio liakupwa lia kukwata chiyulo chizechene Yehova akwata mu malilu. (Mateu 18:18) Mulimo uno wa makulwana wakuyukisa mandumbu eswe mu chikungulwila. Mumu muze chivulumunyi akumusosolola, chino chakukwasa chikungulwila ku yitanga yipi ya yivulumunyi waze keshi kulikonyeka. (1 Kori. 5:6, 7, 11-13; Titu 3:10, 11) Chikwo nawa, chino chakutwala chivulumunyi alumuke ni kulikonyeka ni mbunge yeswe ni kuzuka ukonekeno wa Yehova. (Luka 5:32) Makulwana kakulembela chivulumunyi ni kwita kuli Yehova hanga amukwase kupwa nawa ni usepa upema ni Iye.—Tia. 5:15.

6. Nyi mutu mamusosolola mu chikungulwila, shina Yehova mahasa kumukonekena? Lumbununa.

⁶ Tunyongenu ngwetu chivulumunyi muze maliwana ni makulwana masolola ngwenyi kalikonyekene. Ha chikuma chino, chivulumunyi wacho katamba kumusosolola mu chikungulwila. Nyi kalinganga yuma yize yamakuna shimbi ya nguvulu, makulwana kechi kumufunga ku ponde yize muyizako. Chipwe ngwe malikonyeka, nihindu Yehova kechi kukwika manguvulu kusopesa mutu wacho ni kumupatwila. (Roma 13:4) Alioze, nyi kulutwe chivulumunyi wacho mecha yitanga yipi ni kulikonyeka ni mbunge yeswe, Yehova mamukonekena. (Luka 15:17-24) Yino muyihasa kulingiwa chipwe ngwe mutu wacho kalingile shili yinene chinji.—2 Sango 33:9, 12, 13; 1 Timo. 1:15.

7. Kukonekena mutu yoze watuvulumuna yika chinalumbunuka?

⁷ Tunawahilila ha kunyingika ngwetu, yetu kutushi ni ulite wa kukwata chiyulo nyi Yehova makonekena umwe chivulumunyi nyi ka! Alioze kuli chimwe chize mutuhasa kulinga. Chuma chika chenacho?  Tunyongenu ngwetu, umwe katulinga yuma yipi, mba malikonyeka ni kutwita ukonekeno. Mukwo matulinga yuma yipi, alioze mahona kutwita ukonekeno. Chipwe chocho, mutuhasa kusakula kumukonekena chakuhona kumutulikila toto ni kumuvwila uli. Kwamba pundu, mba tukonekene mutu wacho ni mbunge yeswe muchihasa kumbata mashimbu ni tachi, chipi-chipi nyi katulinga chuma chipi chinji. Kaposhi wa Kutalila wa 15 ya Setembro 1994 yamba ngwo: “Kukonekena mutu yoze wakuvulumuna kuchalumbunukine ngwo, unalengulula shili yize akulinga. Kuli mukwa-Kristu, kukonekena mutu chinalumbunuka kuhichika yuma yeswe mu moko ja Yehova. Iye mwe Ngaji mungunu wa mu malilu ni hashi, nawa makapatula yuma ni ululi ha shimbu yalita.” Yehova kanatwite hanga tukonekene akwetu ni kuhichika yuma mu moko jenyi. Mumu liaka?

8. Yika mutulinga mba tusolole ngwetu twakusakwilila ha keke ya Yehova?

⁸ Twakusakwilila Yehova muze twakukonekena akwetu. Ha chimwe chishima, Yesu yatesa Yehova ni mwanangana yoze wakonekenene umwe wa kuli ndungo jenyi kongo linene lize apwile nalio. Ndungo yono te kechi kuhasa kufweta kongo liacho. Alioze hanyima, iye yahona kukonekena ndungo-ni-mukwo yoze te umuli ni kongo likehe. (Mateu 18:23-35) Yika Yesu te anambe kulongesa ha chishima chino? Nyi twakusakwilila Yehova ha chize akutukonekena, chino muchitutwala hanga ni yetu tukonekene akwetu. (Samu 103:9) Ha miaka yinji kunyima, Kaposhi wa Kutalila kalumbunwine chikuma chino ngwo: “Chipwe ngwe mutukonekena akwetu ha yisuho yinji, nihindu chino kuchichi kuhiana ukonekeno wa Yehova ni keke yize akutusolwela kupalikila muli Kristu.”

9. Aya waze Yehova akusolwela keke? (Mateu 6:14, 15)

⁹ Nyi mutukonekena akwetu, Yehova matukonekena. Yehova kapwa mukwa-keke kuli waze akusolola keke. (Mateu 5:7; Tia. 2:13) Yesu kasolwele chikuma chino zwalala muze alongesele tumbaji twenyi chize malemba. (Tanga Mateu 6:14, 15.) Longeso lioliene, lili nawa ha yize Yehova alwezele kavumbi kenyi Yombi. Lunga yono washishika, kamulemekene ku mbunge ni maliji akalu kuli malunga atatu, Elifaze, Bilidade ni Zofare. Alioze, Yehova yalweza Yombi hanga alembele malunga jacho. Hanyima lia kulemba, Yehova yamuwahisa.—Yombi 42:8-10.

10. Kutulikila akwetu toto yika muchihasa kutunehena? (A-Efwesu 4:31, 32)

¹⁰ Kutulika toto muchihasa kutunehena lamba. Yehova kazangile hanga tumone lamba lize liakwiza ha kutulika toto. (Tanga A-Efwesu 4:31, 32.) Kashika anatukolweza hanga ‘tulitwamine utenu ni ufwatulo.’ (Samu 37:8) Nyi mutukaula chiyulo chino mutuyuka chinji. Mumu kutulikila toto mutu yoze watulemeka ku mbunge, muchihasa kutunehena lamba. (Yishi. 14:30) Tunyingikenu ngwetu, kutulikila mutu toto kuchichi kumulinga upi niumwe, chili ngwe kunwa ulembe ni kushimbwila hanga mutu mweka afwe. Alioze, muze twakukonekena akwetu, yetwene e twakuyuka. (Yishi. 11:17) Twakupwa ni sambukila ya ku mbunge nawa chino chakutukwasa kununga ni kulingila Yehova.

11. Yika Mbimbiliya yinambe hakutwala ku kukala milonga? (A-Roma 12:19-21)

¹¹ Kukala milonga chambala cha Yehova. Yehova kakatuhele ulite wa kufunyishina akwetu upi uze atulinga. (Tanga A-Roma 12:19-21.) Amu kutushi uhashi wakunyingika yuma yeswe, kutushi ni ulite wa kupatwila mutu, Yehova  wika mwe mahasa kuchilinga kanawa. (Hepre. 4:13) Ha mashimbu amwe, yize tunevu ku mbunge muyihasa kututwala tuhone kunyingika yuma yalita kulinga. Kashika Yehova alwezele Tiangu asoneke ngwenyi: “Utenu wa mutu kuushi kulinga ululi wa Zambi.” (Tia. 1:20) Mutuhasa kupwa ni shindakenyo ngwetu, Yehova nihindu malinga yuma yalita ni kupatula yuma ni ululi.

12. Kuchi mutuhasa kusolola ngwetu, twakufuliela ha ululi wa Yehova?

¹² Muze twakukonekena akwetu twakusolola ngwetu tunafuliela ha ululi wa Yehova. Kuhichika yuma mu moko ja Yehova, chakusolola ngwo tunafuliela ngwetu, iye mahwisa upi weswe uze wakwiza ku shili yetu hanji ya akwetu. Mu chifuchi chaha, yuma yize yakutulemeka ku mbunge kutuchi “kayiwuluka nawa, chipwe kuyinyonga.” (Iza. 65:17) Alioze, shina mutuhasa kwehuka ufwatulo ni toto chipwe muze umwe matulinga chuma chipi chinji? Tutalenu chize amwe ahashile kuchilinga.

13-14. Yika chilweza cha Tony ni José chatulongesa hakutwala ku kukonekena?

¹³ Mandumbu jetu anji kasakwile kukonekena akwo chipwe ngwe kaalingile yuma yipi chinji. Yiwape yika ayukile ha kuchilinga?

¹⁴ Ha miaka yinji kunyima muze te kanda achipwa Chela cha Yehova, Tony * yoze watwama mu Filipinas, yanyingika ngwenyi yayo umwe kamushihile kuli lunga yoze avuluka ngwo, José. Ha mashimbu jacho, Tony kapwile ni kutenuka chinji, chocho yafupa kufunyisa upi ha upi. José yamusa mu zuwo lia ususu mumu lia yize alingile. Kulutwe, muze amutuswile, Tony yamulweza ngwenyi, neye mamushiha. Chocho, yalanda uta hanga ahase kushiha José. Shimbu Tony te kanda alinga yize atesele, yaputuka kulilongesa Mbimbiliya ni Yela ja Yehova. Mwene ngwenyi: “Mu longeso liami lia Mbimbiliya, yingunyingika ngwami te ngunafupiwa kwalumuna yitanga yami yize te yinachingi kwecha utenu.” Kulutwe Tony yamupapachisa, ha kupalika cha mashimbu yapwa mukulwana mu chikungulwila. Achinyonga chize evwile muze anyingike ngwenyi, José neye hapwa Chela cha Yehova! Muze aliwanyine yalikangayika, chocho  Tony yalweza José ngwenyi, hingunakukonekena. Tony yamba ngwenyi, kukonekena José chamuhuzulwile ni kumunehena uwahililo unji uze keshi kuhasa chipwe kuulumbununa. Ewa, Yehova kawahishile Tony mumu lia kupwa ni mbunge ya kukonekena.

15-16. Yika walilongesa ha chize ndumbu Peter ni Sue akonekenene lunga yoze walingile upi?

¹⁵ Ha mwaka 1985, Peter ni Sue te kanakunguluka mu Zuwo lia Wanangana, susumuku yimwe yiyilozeka. Umwe lunga wasele mbomba mu Zuwo lia Wanangana! Mbomba yacho yapihishile meso ja Sue, matwi ni kumupihisa uhashi wa kwivwa vumba. * Kanji-kanji, ayo te kakulihula ngwo, ‘Mutu wa mutapu uka walingile upi upwahaha?’ Ha kupalika cha miaka, chingalwe wacho yoze te hi Chela cha Yehova ko, yamukwata ni kumusa mu zuwo lia ususu ku mwono wenyi weswe. Muze ahulile Peter ni Sue nyi kakonekenene lunga wacho, ayo yamba ngwo: “Yehova kakutulongesa hanga tuhone kufunga toto ni utenu, mumu chino muchihasa kutupihisa mujimba ni manyonga. Kashika, chize ku uputukilo twalembele kuli Yehova atukwase twehuke uli ni toto hanga tununge ni sambukila ku mwono wetu.”

¹⁶ Shina chakwapwila chashi kukonekena lunga wacho? Ka, kuchishi kupwa chashi mashimbu eswe. Ene yanunga ni kwamba ngwo: “Ha mashimbu amwe, muze Sue akupinda mumu lia yikola yize mbomba yinakamukokela, twakuvwila lunga wacho uli. Alioze twakusa tachi hanga tuchine kunyonga ha yuma yacho mashimbu eswe, chino chakutukwasa twehuke uli ni kawashi. Kashika, mutuhasa kwamba ni mbunge yeswe ngwetu, nyi tangwa limwe lunga wacho mapwa Chela cha Yehova, mutukamutambula ni mbunge yimuwika. Yuma yeswe yize twapalika yatukwasa kunyingika ngwetu, kukaula shimbi ja mu Mbimbiliya chakutukwasa kulivwa kanawa! Chikwo nawa, chili utakamiso unene kunyingika ngwo, Yehova makahwisa lamba lieswe lize twakumona.”

17. Yika walilongesa ha chize pangi Myra akonekenene lunga yoze wamwechele?

 ¹⁷ Muze Myra alilongesele umwenemwene te kali ku ulo ni ana aali. Alioze, mukwo-lunga katayijile umwenemwene. Ha kupalika cha mashimbu, yalumbuka ni pwo mweka, chocho yaahichika ukawo. Myra yamba ngwenyi: “Muze mukwetu-lunga achinyine ni kunguhichika ni ana aali, nalivwile ngwe chize akwivwa atu waze akulinga yuma yipi kuli asoko jo. Chino changuvwishile yikola ku mbunge, yingunenganyana, kuliseha, kulilamikiza yami mwene ni kwivwa uli.” Chipwe hanyima lia kulilakula, nihindu te kakwivwa yikola ha yize mukwo-lunga alingile. Myra yanunga ni kwamba ngwenyi: “Nanungine ni kwivwa uli ha tukweji anji, chocho yingunyingika ngwami chino te chinapihisa usepa wami ni Yehova ni akwetu.” Alioze, haliapwila Myra keshi kwivwa nawa uli chipwe kutulikila toto lunga yoze wamwechele. Kanashimbwila hanga tangwa limwe lunga wacho alilongese umwenemwene. Haliapwila Myra kanahase kulihulikila ha yuma ya kulutwe. Iye kahasa kulela ana jenyi aali ukawenyi ni kwakwasa hanga alingile Yehova. Musono, Myra kanalingila Yehova ni ushishiko hamwe ni ana jenyi ni asoko jo.

18. Shindakenyo yika mutuhasa kupwa nayo ha upatwilo wa Yehova?

¹⁸ Tunawahilila chinji ha kunyingika ngwetu hi yetu ko twatamba kutesa chize hita mutu atamba kumupatwila! Mulimo uno wambala wa Yehova, mumu iye kali Ngaji Munene mu malilu ni hashi. (Roma 14:10-12) Mutuhasa kupwa ni shindakenyo ngwetu, nihindu Yehova makapatula yuma kulita ni chiyulo chenyi chingunu cha chipi ni chipema. (Uputu. 18:25; 1 Mia. 8:32) Yehova kechi keza kalinga nichimwe chuma cha uhenge!

19. Yika Yehova makalinga?

¹⁹ Tunashimbwila tangwa lize Yehova makahwisa yuma yeswe yipi yize yakwiza ku uhenge wa atu ni shili. Ha shimbu liacho, yikola yeswe yize twakwivwa kumuyikahwa liakulu. (Samu 72:12-14; Uso. 21:3, 4) Kutuchi kayiwuluka nawa ni limwe tangwa. Amu shimbu liacho kanda liheta, tunasakwilila chinji Yehova ha kutwaha uhashi wa kumwimbulula ha kukonekena akwetu.