1. Ki promes Zeova i fer avek bann ki’n repantir senserman?

 MENM si Zeova i nou Kreater, sa Enn ki donn nou lalwa e sa enn ki nou Ziz, i osi nou Papa ki kontan nou. (Ps. 100:3; Iza. 33:22) Ler nou fer pese e repantir senserman, Zeova i kapab pardonn nou. Me Zeova i osi vreman anvi pardonn nou. (Ps. 86:5) Atraver profet Izai, Zeova ti dir sa bann parol ankourazan: “Menm si zot pese i byen rouz, zot pou vin blan parey lanez.”​—Iza. 1:18.

2. Ki nou bezwen fer si nou anvi annan bann bon lanmitye avek lezot?

² Vi ki nou enparfe, nou tou nou dir e fer bann keksoz ki ofans lezot. (Zak 3:2) Me sa pa vedir ki nou pa kapab annan bann bon lanmitye avek lezot. Nou kapab annan bann bon zanmi si nou aprann pardonnen. (Prov. 17:9; 19:11; Mat. 18:21, 22) Ler nou fer bann pti keksoz ki ofans lezot, Zeova i anvi nou pardonn kanmarad. (Kol. 3:13) Nou annan bann bon rezon pour fer sa parski apre tou, Zeova i “pare pour pardonnen.”​—Iza. 55:7.

3. Ki nou pou vwar dan sa lartik?

³ Dan sa lartik nou pou vwar sa bann kestyon swivan: Ki mannyer bann imen enparfe i kapab swiv legzanp Zeova e pardonn lezot? Ki kalite pese ki nou bezwen koz avek bann ansyen lo la? Akoz Zeova i anvi nou pardonn  lezot? Ki nou kapab aprann avek serten frer ek ser ki’n soufer en kantite akoz pese ki lezot in fer?

4. (a) Ler en serviter Zeova i fer en pese grav, ki i bezwen fer? (b) Ler bann ansyen i zwenn avek en dimoun ki’n fer en pese grav, ki zot bezwen fer?

⁴ Bann ansyen i bezwen ganny enformen ler en dimoun i fer en pese grav. Dan 1 Korentyen 6:9, 10 i annan en lalis serten pese grav. Bann pese grav i bann aksyon ki kont lalwa Bondye. Si en Kretyen i fer en pese grav, i bezwen priye e demann Zeova pardon. I osi bezwen koz avek bann ansyen dan kongregasyon. (Ps. 32:5; Zak 5:14) Zis Zeova ki kapab pardonn pese konpletman e sa i posib akoz sakrifis Zezi. * Me ki responsabilite bann ansyen i annan? Zeova in donn bann ansyen sa responsabilite pour servi Labib pour vwar si en dimoun ki’n fer en pese grav i kapab reste dan kongregasyon. (1 Kor. 5:12) Parmi bann keksoz ki zot bezwen fer i rod larepons sa bann kestyon swivan: Eski sa dimoun ti plàn davans pour fer en pese? Eski in esey kasyet sa pese? Eski i pe fer sa pese pour en pe letan? Pli enportan, eski i montre ki i’n repantir senserman? Eski bann ansyen i vwar laprev ki Zeova in pardonn li?​—Akt 3:19.

5. Ki byenfe travay ki bann ansyen i fer i anmennen?

⁵ Ler bann ansyen i zwenn avek sa dimoun ki’n fer en pese grav, zot lobzektif i pour tonm lo menm desizyon ki’n deza ganny fer dan lesyel. (Mat. 18:18) Ki byenfe sa laranzman i anmennen lo kongregasyon? Sa laranzman i fer sir ki en dimoun ki pa oule repantir i ganny tire dan kongregasyon pour ki i pa fer ditor lezot serviter Zeova. (1 Kor. 5:6, 7, 11-13; Tit 3:10, 11) I kapab osi ed en dimoun ki’n fer en pese grav pour repantir pour ki Zeova i kapab pardonn li. (Lik 5:32) Bann ansyen i priy pour li e zot demann Zeova pour ed sa dimoun aranz son lanmitye avek Li.​—Zak 5:15.

6. Si en dimoun in ganny ekskli dan kongregasyon, eski i posib pour li ganny pardonnen? Eksplike.

⁶ Ki pou arive si ler bann ansyen i zwenn avek en dimoun, sa dimoun pa’n repantir? Dan sa ka, i pou ganny ekskli dan kongregasyon. Si i’n kas lalwa en pei, bann ansyen pou les li ganny konsekans son move aksyon. Zeova i permet bann gouvernman pour ziz e pini nenport dimoun ki kas lalwa ki swa i’n repantir oubyen non. (Rom. 13:4) Me si pli tar sa dimoun i realize ki sa ki i’n fer i mal, i sanz son fason panse e i aret fer sa keksoz mal, Zeova i pare pour pardonn li. (Lik 15:17-24) Zeova pou pardonn li menm si sa ki i ti’n fer ti vreman mal.​—2 Kron. 33:9, 12, 13; 1 Tim. 1:15.

7. Dan ki sans nou kapab pardonn en dimoun ki’n fer pese kont nou?

⁷ Nou soulaze pour konnen ki i pa nou responsabilite pour deside si Zeova pou pardonn en dimoun ki’n fer en pese grav. Me i annan en keksoz ki nou bezwen deside si nou pou fer. Kwa sa keksoz? I kapab arive ki en dimoun i fer en pese grav kont nou e sa dimoun i demann nou pardon. Me i kapab osi arive ki sa dimoun pa demann nou pardon. Kantmenm sa, nou kapab deside pour  pardonn sa dimoun e pa gard rankin avek li. Sa i kapab pran letan e i demann bokou zefor sirtou si sa ki sa dimoun in fer in bles nou en kantite. Latour Veyer le 15 Septanm 1994 an Angle i dir: “Ler ou pardonn en dimoun ki’n fer en pese, sa pa vedir ki ou krwar ki sa ki i’n fer ti byen. En Kretyen ki pardonn lezot i annan konfyans ki Zeova pou ziz keksoz dan en fason ki parfe. Zeova i sa Ziz ki drwat e i pou fer sir ki nou ganny lazistis dan sa bon moman.” Akoz Zeova i demann nou pour pardonn lezot e annan konfyans ki i pou ziz keksoz dan en fason ki parfe?

8. Ki mannyer ler nou pardonnen sa i montre ki nou rekonesan ki Zeova i pran pitye pour nou?

⁸ Ler nou pardonnen, nou montre ki nou rekonesan ki Zeova i pran pitye pour nou. Dan en legzanp ki Zezi ti donnen, i ti konpar Zeova avek en met ki ti kennsel en gro det ki enn son lesklav ti drwa li. Me sa lesklav pa ti pran pitye pour en lesklav ki ti drwa li pli ptigin larzan. (Mat. 18:23-35) Ki Zezi ti pe ansenny nou? Si nou vreman rekonesan pour lafason ki Zeova i pran pitye pour nou, sa pou motiv nou pour pardonn lezot. (Ps. 103:9) Detrwa lannen pase, en Latour Veyer ti dir: “Nenport kantite fwa nou pardonn lezot, nou pa pou zanmen kapab pardonn lezot sa kantite fwa ki Zeova i pardonn sakenn parmi nou lo baz sakrifis Kris.”

9. Anver lekel ki Zeova i pran pitye? (Matye 6:14, 15)

⁹ Bann ki pardonnen pou ganny pardonnen. Zeova i pran pitye pour bann ki pran pitye pour lezot. (Mat. 5:7; Zak 2:13) Zezi ti montre sa ler i ti ansenny son bann disip ki mannyer pour priye. (Lir Matye 6:14, 15.) Nou aprann en leson en pe parey avek sa ki Zeova ti dir Zob. Trwa zonm ki ti apel Elifaz, Bildad ek Zofar ti’n dir Zob bann parol blesan. Zeova ti dir Zob priy pour zot. Apre ki Zob ti’n priy pour zot, Zeova ti beni li.​—Zob 42:8-10.

10. Akoz ler nou gard rankin nou fer nou lekor ditor? (Efezyen 4:31, 32)

¹⁰ Ler nou gard rankin, nou fer nou lekor ditor. Lakoler i parey en fardo. Zeova i anvi ki nou debaras nou avek lakoler pour ki nou ganny lape lespri ek leker. (Lir Efezyen 4:31, 32.) I ankouraz nou pour “rezet lakoler ek firer.” (Ps. 37:8) I ti pou saz si nou swiv sa konsey. Ler nou gard rankin avek en dimoun, nou fer nou lekor ditor fizikman e mantalman. (Prov. 14:30) I parey si nou ti pou bwar pwazon, sa pa fer sa dimoun ditor me zis nou ki soufer. Alor ler nou pardonn lezot, nou pe fer nou lekor dibyen. (Prov. 11:17) Nou annan lape lespri ek leker e nou kapab kontinyen servi Zeova.

11. Ki Labib i dir konsernan revanze? (Romen 12:19-21)

¹¹ Zeova ki kapab revanze. Zeova pa’n donn nou lotorite pour fer revanz lo en dimoun ki’n fer pese kont nou. (Lir Romen 12:19-21.) Vi ki nou enparfe e nou pa konn tou keksoz, nou pa kapab ziz dan en bon fason. Zis Zeova ki kapab ziz dan en bon fason. (Ebr. 4:13) Parfwa nou les nou lemosyon kontrol nou e sa i fer li difisil pour nou konnen kwa ki byen. Zeova ti enspir Zak pour ekrir: “Ler en dimoun i pran lakoler, i pa azir  an armoni avek ladrwatir Bondye.” (Zak 1:20) Nou kapab asire ki Zeova pou fer sa ki byen e i pou fer sir ki i rann lazistis.

12. Ki mannyer nou kapab montre ki nou annan konfyans ki Zeova pou rann lazistis?

¹² Ler nou pardonnen, nou montre ki nou annan konfyans ki Zeova pou rann lazistis. Ler nou annan konfyans ki Zeova pou ziz tou keksoz dan en fason ki zis, nou montre ki nou annan konfyans ki Zeova pou retir tou domaz ki pese in anmennen. Bondye in promet ki dan nouvo lemonn, nou “pa pou rapel” bann souvenir ki fer nou soufer e zot “pa pou reste dan nou leker.” (Iza. 65:17) Me eski i posib pour aret ankoler e aret gard rankin ler sa ki en dimoun in fer in vreman bles nou? Annou vwar ki mannyer serten frer ek ser in kapab fer sa.

13-14. Ki ou’n aprann konsernan pardonnen avek leksperyans Tony ek José?

¹³ En kantite nou bann frer ek ser in deside pour pardonnen, menm ler lezot in fer en keksoz ki’n vreman bles zot. Ki byenfe zot in gannyen ler zot in fer sa?

¹⁴ Tony i en frer ki reste Filipin. * Plizyer lannen avan i ti vin en Temwen Zeova, i ti aprann ki en msye ki apel José ti’n touy enn son gran frer. Sa letan, Tony ti en dimoun ki ti agresiv e vyolan e i ti anvi revanze. José ti ganny met dan prizon pour sa krim. Pli tar ler José ti sorti dan prizon, Tony ti promet ki i ti pou rod li e touy li. I ti aste en fizi pour li kapab fer sa. Me apre Tony ti konmans etidye Labib avek Temwen Zeova. Tony i dir: “Ler mon ti pe etidye Labib, mon ti aprann ki mon ti bezwen sanz mon personnalite ek mon aksyon. Sa ti vedir ki mon ti bezwen aret gard rankin.” Pli tar, Tony ti batize e avek letan i ti ganny apwente konman en ansyen dan kongregasyon. Zis mazinen ki mannyer i ti soke pour konnen ki José osi ti’n vin en Temwen Zeova. Ler zot ti zwenn, zot ti may kanmarad e Tony ti dir José ki in  pardonn li. Tony i dir ki ler i ti pardonn José, sa ti fer li sitan zwaye ki i pa ti ni menm kapab dekri sa santiman. Zeova ti beni Tony parski i ti pare pour pardonnen.

15-16. Ki ou’n aprann konsernan pardonnen avek leksperyans Peter ek Sue?

¹⁵ An 1985, Peter ek Sue ti pe asiste renyon kot Lasal Rwayonm ler i ti annan en gro leksplozyon. En zonm ti’n met en bonm kot Lasal Rwayonm. Sue ti ganny bann blesir grav ki’n afekte son zorey ek son lizye. I’n osi perdi son abilite pour santi. * Souvandfwa, Peter ek Sue ti demann zot lekor, ‘Ki kalite dimoun ki pou fer en keksoz sitan move koumsa?’ Plizyer lannen pli tar, sa msye, ki pa en serviter Zeova, ti ganny met dan prizon. Ler Peter ek Sue ti ganny demande si zot in pardonn sa msye, zot ti dir: “Zeova i ansenny nou ki ler nou reste ankoler e gard rankin sa i fer nou ditor fizikman, emosyonnelman e mantalman. Alor, deswit apre sa leksplozyon, nou ti demann Zeova pour ed nou pardonn sa msye, pour ki nou kapab viv anpe.”

¹⁶ Eski in fasil pour zot pardonn sa msye? Pa toultan. Zot dir: “Parfwa nou ankoler ler Sue i soufer akoz son bann blesir. Me nou pa kontinyen mazin lo sa sityasyon e sa i fer sa lakoler ale. Onnetman nou kapab dir ki si sa msye i vin enn nou frer en zour, nou pou akeyir li. Sa ki ti arive i ansenny nou ki ler nou aplik bann prensip Labib, nou santi nou lib. Annefe bann prensip Labib i liber nou dan bann fason ki nou pa kapab imazinen. Nou osi ganny rekonforte parski nou konnen ki Zeova pou byento retir tou soufrans.”

17. Ki ou’n aprann konsernan pardonnen avek leksperyans Myra?

¹⁷ Ler en ser ki apel Myra ti konn laverite, i ti’n fini marye e i ti annan de zanfan.  Son msye pa ti aksepte laverite. Pli tar, son msye ti komet adilter e i ti kit son fanmir. Myra i dir: “Ler mon msye ti kit mwan ek nou de zanfan, mon ti santi parey bokou dimoun i santi ler en dimoun ki zot kontan i trai zot. Mon ti dan sok, mon pa ti oule krwar ki sa ti’n arive. Mon ti sagren, mon ti blanm mon lekor e mon ti ankoler.” Menm si son maryaz ti’n fini, Myra ti ankor soufer akoz sa traizon. Myra i dir: “Pour plizyer mwan, mon ti enkyet e ankoler. Me mon ti realize ki sa bann santiman ti annan en lefe lo mon lanmitye avek Zeova e avek lezot.” Myra i dir ki aprezan in aret ankoler e i pa swet maler pour son msye avan. I swete ki en zour son msye avan i aprann konn Zeova. Myra i konsantre lo lavenir. Konman en manman tousel, in kapab ed son de zanfan vin bann serviter Zeova. Ozordi Myra i zwaye parski i pe servi Zeova ansanm avek son bann zanfan ek zot fanmir.

18. Ki nou asire Zeova pou fer konman sa Ziz Siprenm?

¹⁸ Nou soulaze pour konnen ki nou pa bezwen deside ki mannyer en dimoun i devret ganny zize. Zeova i nou Ziz Siprenm alor li ki pou fer sa travay enportan. (Rom. 14:10-12) Nou kapab asire ki i pou toultan ziz dapre son bann standar parfe konsernan sa ki byen ek sa ki mal. (Zen. 18:25; 1 Rwa. 8:32) I pa pou zanmen azir dan en fason ki enzis.

19. Ki nou Ziz parfe pou akonpli?

¹⁹ Nou enpasyan pour sa letan ler Zeova pou retir tou bann move keksoz ki’n arive akoz lenperfeksyon ek pese. Sa letan, tou nou bann blesir fizik e emosyonnel pou ganny geri konpletman. (Ps. 72:12-14; Rev. 21:3, 4) Nou pa pou zanmen rapel zot ankor. Anmezir ki nou esper sa letan, nou rekonesan ki Zeova in donn nou sa abilite pour swiv son legzanp e pardonn lezot.