1. ¿Jeowabara kʼãrẽ bedʼea biata jarasi yi ẽbẽra nemitia odata soiduba jẽda wua oẽãra?

 JEOWARA dayirã parãna, dayirã ley diabʉ akʉza juez. Adewara iyira dayirã Zeze kãga ũdubibʉ dayirã (Sal. 100:3; Is. 33:22). Dayirã abaʉba nekayirua odata soiduba wua jẽda oẽbʉrʉ Jeowabara kĩrãduakĩrãbʉ akʉza kĩrãduaseabʉ maʉ̃ nemitiara (Sal. 86:5). Jeowabara maʉ̃ bedʼeara ũdubisi propeta Isaíasdeba, iya jarasi: «Mara nemitiara purrubʉmina eskarlata kĩrãkʼa torro bayi niewe kĩrãkʼa» (Is. 1:18).

2. ¿Wuabemarabawara aduʼa bakĩrãpanʉbʉrʉ kʼãrẽta odaibara?

² Dayirã jõmaʉ̃ta nekayirua omia baera jaraseapanʉ mawũã ẽ bʉrʉ krĩchaseapanʉ awuru sopʉabibʉta (Sant. 3:2). Mamina maʉ̃ba jarakĩrãkʉ ẽ dayirãba kĩrãdua ẽ baita wuabemaraba nekayirua odata, awuarabʉrʉ kĩrãduaibara iya nekayirua odara mawũã iyiʉ̃me bia bʼaita (Prov. 17:9; 19:11; Mat. 18:21, 22). Dayirãta awuruba wikabida sopʉabidara Jeowabara kãgabʉ kĩrãduamarẽã maʉ̃ra (Col. 3:13). Dayirãba nemitia obʉrʉdera Jeowabara kĩrãduabʉ maʉ̃ra, maʉ̃ kʼarea dayirãbida wuabemaraba nemitia obʉrʉdera kĩrãduaibara (Is. 55:7).

3. ¿Kʼãrẽta kʼawuadai naʉ̃ artikulodera?

³ Naʉ̃ artikulode kʼawuadayi, sãwũã yumakẽrãra nekayirua omiamina Jeowaba kĩrãduabʉ kĩrãkʼa dayirãbida sãwũã kĩrãduaseabʉta awuruba nekayirua obʉrʉde. Adewara panʉnañi, ¿kʼãrẽ kayirua odata jaraibara zõrãrã? akʉza ¿kʼãrẽa Jeowabara kãgabʉta kĩrãduamarẽã wuabemaraba nekayirua odara? Atia akʉdayi ʉ̃kʉrʉ mebẽrã yizata, sãwũã ãyi mejãcha zʉbʉriasita awurura nemitia kʼarea.

4. (1). ¿Kristiano abaʉba nemitia zromata osibʉrʉ, kʼãrẽta oibara? (2). ¿Kʼãrẽta krĩchaseabʉ zõrãrãbara nemitia odaʉ̃me ãba yi jʉrebʉrʉdera?

⁴ Dayirãba kʼawuara mebẽã abaʉba nekayirua zromata obʉta, zõrãrãʼa kongregasionebema jaraibara. 1 Corintios 6:9, 10ba jara ũrĩbibʉ ʉ̃kʉrʉ nemitia zroma ʉ̃rʉ. Nekayirua zroma obʉba Daizeze ley ʉ̃rʉ babibʉ. Kristiano abaʉba nekayirua zromata osibʉrʉ nãã yiwidʼibara Daizezeʼa kĩrãduamarẽã iyi nekayiruata, maʉ̃ jĩrʉare bedʼeaibara zõrãrã kongregasionebemaʉ̃me (Sal. 32:5; Sant. 5:14). ¿Kʼãrẽta oibara zõrãrãbara? Jeowabʉrʉ ẽbẽra nekayirua zroma odara jipa kĩrãduaseabʉ Jesuta dayirãbari beisi baera. * Mamina Jeowabara iduaribibʉ zõrãrãba kʼawua odamarẽã Daizeze Bedʼeadeba yi ẽbẽra nekayirua odata, mawũã eda kongregasione baseabʉ kʼawuaita (1 Cor. 5:12). Maʉ̃ kʼarea zõrãrãbara naʉ̃ ʉ̃rʉ krĩchadaibara, ¿maʉ̃ nekayirua odabara krĩña osika maʉ̃ra? ¿Yi ẽbẽra nekayirua oibara nãã biʼia krĩcha kʼãrãpe mawũã osika? ¿Iya nemitia odara ewari bio ozebʉrʉka? ¿Naʉ̃ ẽbẽrabara wãrĩnu soiduba ũdubibʉka iya nekayirua odara wua oẽãta akʉza jẽda Jeowa neũdukʼawua bakĩrãbʉka? ¿Wãrĩnu Jeowabara maʉ̃ ẽbẽraba nekayirua odara jipa kĩrãduasika? (Hech. 3:19).

5. ¿Kʼãrẽ nebiata ũdubʉ kongregasionbara zõrãrã kongregasionebemaba kʼawua opanʉ kʼarea?

⁵ Jeowabʉrʉ kʼawua jidabʉ kʼairata kongregasione baseabʉta akʉza babe ẽãta. Maʉ̃ kʼarea zõrãrã ãba yi jʉrebʉrʉdera yi nemitia odaʉ̃me, jʉrʉpanʉ abarika krĩchaita Daizezeba ʉ̃tʉ krĩchada kĩrãkʼa (Mat. 18:18). ¿Sãwũã kʼarebabʉ naʉ̃ba kongregasionʼra? Maʉ̃bara kʼarebabʉ kongregasionta bia wã marẽã. Yi nemitia obʉba maʉ̃ta idubʉ ẽ bʉrʉ ãĩ bʉepanʉ kongregasioneba, mawũã wuabemara kʼarebaita (1 Cor. 5:6, 7, 11-13; Tito 3:10, 11). Maʉ̃ba kʼarebaseabʉ jẽda krĩchamarẽã yi nemitia obʉta, mawũã Jeowaba kĩrãduaseabʉ iyi nekayiruara (Luc. 5:32). Zõrãrãra yiwidʼipanʉ ẽbẽra nekayirua jẽda oẽ bada ʉ̃rʉ akʉza Jeowaʼa kʼareba widipanʉ iyaʼa kʼarebamarẽã jẽda iyi neũdukʼawua bʼaita (Sant. 5:15).

6. ¿Ẽbẽra abaʉta kongregasioneba ãĩ wãra Jeowabara kĩrãduaseabʉka iya nemitia odara?

⁶ Krĩchara zõrãrãta ãba yi jʉrebarabʉta ẽbẽra nekayirua odaʉ̃me. Maʉ̃ ẽbẽrata ãya ũdubʉde jẽda krĩchakĩrã ẽ bʉrʉ iya nemitia odata, maʉ̃ra kongregasionebara ãĩ bʉeibara. Naʉ̃ ẽbẽrabara aña osibʉrʉ leyba jarabʉta zõrãrãra maʉ̃are bedʼea ẽ baibara. Naʉ̃ ẽbẽraba iya nemitia oda jẽda krĩchasimina mawũã ẽ bʉrʉ idubʉ ẽ mina iduaribidaibara iya nemitia odara pagamarẽã leyba jarabʉ kĩrãkʼa. Jeowabara iduaribibʉ nokʼoraba kʼawua omarẽã badu ẽbẽraba nokʼora leyba jarabʉta ũrĩ ẽã. Ẽbẽrarã iya nemitia oda wãrĩnu jẽda krĩchabʉmina (Rom. 13:4). Maʉ̃ tẽã iya nemitia odata jẽda soiduba krĩchabʉbʉrʉ akʉza wua oẽ bʉrʉ Jeowaba kĩrãduaseabʉ iya odara (Luc. 15:17-24). Naʉ̃ra wãrĩnu (2 Crón. 33:9, 12, 13; 1 Tim. 1:15).

7. ¿Awuruba kayirua oda kĩrãduaibara kʼãrẽta jarakĩrãkʉ ẽ?

⁷ Dayirãra aduʼapanaibara ẽbẽra abaʉba kayirua obʉrʉdera nesida ẽ baera Jeowaʼa jaraita kĩrãduamarẽã, mawũã ẽ bʉrʉ kĩrãdua ẽ marẽã maʉ̃ kayiruata. Mamina dayirãbara nei oibara, ¿kʼãrẽta? Edaʉde ẽbẽra abaʉba dayirã ʉ̃rʉ kayirua obʉrʉdera  widiseabʉ kĩrãduamarẽã iya kayirua odata. Mamina edaʉde ʉ̃kʉrʉba widi ẽ kĩrãduamarẽã maʉ̃ kayirua odata. Mawũã berabaribʉrʉdera dayirãbara jidaseabʉ kĩrãduaita maʉ̃ kayiruara mawũã iyiʉ̃me kĩrʉ ẽ baita. Edaʉde maʉ̃ kayirua kĩrãduaira zarea oibara akʉza maʉ̃ba dayita mejãcha sopʉabisibʉrʉ ewarita nesidabʉ kĩrãduaita. La Atalaya 15 septiembre 1994ba jarabʉ: «Ẽbẽra abaʉba kayirua odata kĩrãduabʉrʉdera naʉ̃bara jarakĩrãbʉ ẽ bʉa iyi kayiruata kĩrãduasita, awuarabʉrʉ jarakĩrãbʉ kĩrãduabʉta yi ẽbẽra kayirua odata. Kristianoitara kĩrãduaibara jarakĩrãbʉ jõma Jeowa juwade ameita iya kʼawua omarẽã. Naʉ̃ drʉa jõmaʉ̃nẽra iyitrʉ abapai juez yibia. Maʉ̃ba iya kʼawuabʉ sõbede ara oibarata maʉ̃ bedʼeara». ¿Kʼãrẽa Jeowaba kãgabʉ dayirãba kĩrãduamarẽã awuru kayiruata akʉza ĩjãmarẽã iyabʉrʉ kʼawuabʉta sõbede ara oita?

8. ¿Kʼãrẽta jaradiakĩrãbasi Jesubara nebʉra abaʉdeba?

⁸ Dayirãba kĩrãduabʉrʉdera biga diapanʉta ũdubipanʉ Jeowaba iyi so borekeata ũdubibʉ baera. Nebʉra abaʉde Jesuba jarasi nokʼo abaʉba kĩrãduasita iyi nezokʼaba iyaʼa debe mejãcha erbadata, mamina naʉ̃ne zokʼabara awuruba iya wiña debebasimina kĩrãdua ẽ basi. Jeowara naʉ̃ nokʼo kĩrãkʼabʉ (Mat. 18:23-35). ¿Kʼãrẽta jaradiakĩrãbasi Jesubara? Biga diakĩrãpanʉbʉrʉ Jeowaba dayirã so zʉbʉria ũdubibʉ kʼarea naʉ̃ba kʼarebayi dayirãba kĩrãduaita awururaba kayirua obʉrʉde (Sal. 103:9). Dããrabade Jarakabʉ kartaba naʉ̃ta jarasi dayirãba awuruba kayirua odata mejãcha kĩrãduabʉmina, naʉ̃ra abarikabʉ ẽ Jeowaba odaira, «iya dayirã so zʉbʉria ũdubibʉ daucha zokʼasi yi warrata dayirã kayirua kĩrãduaita».

9. ¿Jeowabara kʼairaʼa so zʉbʉria ũdubisi? (Mateo 6:14, 15).

⁹ Dayirãba wuabemarata kĩrãduadara Jeowabida kĩrãduayi dayirã kayiruata. Jeowabara so zʉbʉria ũdubibʉ yi awuruaʼa so zʉbʉria ũdubibʉara (Mat. 5:7; Sant. 2:13). Jesuba naʉ̃ta jaradiasi iyi kʼaidubemara jaradiaside sãwũã yiwidʼibarata (akʉra Mateo 6:14, 15). Maʉ̃ ʉ̃rʉ audre kʼawuaseapanʉ krĩchabʉrʉde Jeowaba Jobʼa kʼãrẽ jaradadeba. Iya ĩjãta zarea erbasimina mejãcha sopʉasi Elifazba, Bildadba akʉza Zofarba iyaʼa jaradadeba. Mamina Jeowaba jarasi ãyi bari yiwidʼimarẽã, Jobʼba naʉ̃ oda tẽã Jeowaba nebiata diasi (Job 42:8-10).

10. ¿Awuruʉ̃me kĩrʉ kikibaribara sãwũã zʉbʉriabiseabʉ dayirãra? (Efesios 4:31, 32).

¹⁰ Dayita awuruʉ̃me kĩrʉ kiki kʼawuabʉrʉ dayikʉza zʉbʉriabʉ. Kĩrʉbira ne zʉgʉa kĩrãkʼabʉ, maʉ̃ kʼarea Jeowabara kãgabʉ maʉ̃ta idubʉdamarẽã (akʉra Efesios 4:31, 32). Mawũã sobia aduʼa panaita (Sal. 37:8). Dayirãta kĩrʉ kiki kʼawuabʉrʉ naʉ̃bara kayabiyi dayirã krĩchata akʉza dayirã kakuata (Prov. 14:30). Adewara dayita ẽbẽra abaʉ̃me kĩrʉ kiki kʼawuabʉrʉ naʉ̃bara zʉbʉriabi ẽ ababema ẽbẽrarã yi kayirua odara, naʉ̃ra beneno doi kĩrãkʼabʉ. Bʉa benenota dora ababema ẽbẽrarã kʼãrẽ berabari ẽ bayi, bʉtrʉ zʉbʉriayi. Maʉ̃ba dayirãba kĩrãduadara awuruba kayirua odata naʉ̃ra nebia kĩrãkʼa bʉ dayirãita (Prov. 11:17). Maʉ̃ta odara aduʼa panañi akʉza Jeowaba zokʼabʉta opanañi.

11. ¿Daizeze Bedʼeabara kʼãrẽta jarabʉ awuruba kayirua obʉrʉde daya abarika oi ʉ̃rʉra? (Romanos 12:19-21).

¹¹ Yara kʼawua oira Jeowadeʼa. Awuruba  kayirua obʉrʉdera Jeowabara iduaribi ẽ dayirãba abarika oita maʉ̃ ẽbẽrata (akʉra Romanos 12:19-21). Dayirãra Jeowa kĩrãkʼa krĩchabʉ ẽ baera akʉza kayirua omia baera adewara jõma kʼawua bʉ ẽ baera, kʼawua jarabe ẽ ẽbẽra abaʉba kayirua obʉrʉdera kʼãrẽta berabarita (Heb. 4:13). Edaʉde dayirãba sãwũã sentibʉba biʼia jidabe ẽ. Jeowaba Santiagoʼa bʉbisi: «Ẽbẽra kĩrʉbʉba iduaribi ẽ Jeowade kĩrãkʼa aripe omarẽã» (Sant. 1:20). Dayirãbara ĩjãibara Jeowaba jõma aripe oita akʉza iyabʉrʉ kʼawua oita yi kayirua odara.

12. ¿Sãwũã ũdubipanʉ ĩjãbʉta Jeowaba jõma ara oita?

¹² Nemitia odata kĩrãduapanʉbʉrʉ ũdubidayi ĩjãbʉta Jeowaba obʉra aripe obʉta. Dayirãba ĩjãpanʉbʉrʉ Jeowaba jõmaʉ̃ta daucha kʼawua oita, mawũãra dayirãitara zare ẽ bayi iyi juwade amaeita awuru ẽbẽraʉ̃me bedʼea zroma erbʉra. Ẽjũã kĩrãwãreãnẽra dayirã zʉbʉriabibʉra «wua kĩrãbeda ẽ bayi akʉza wua sopʉa ẽ bayi» (Is. 65:17). Maʉ̃ jẽda kĩrãbe kʼãrãpe mejãcha kĩrʉ kiki kʼawuara, ¿dayideba ãĩ bʉeseabʉka? Akʉdaya ʉ̃kʉrʉ mebẽrãba sãwũã osidata.

13, 14. ¿Kʼãrẽta kʼawuapanʉ Tony akʉza Josédeba awuruba nemitia oda kĩrãduai ʉ̃rʉ?

¹³ Mebẽrã mejãchaʉba ãyi ʉ̃rʉ nemitia odara jipa kĩrãduasida ãyi mejãcha sopʉabasimina, ãya mawũã oda kʼarea, ¿kʼãrẽ nebiata ũdusida?

¹⁴ Tony * Filipinasdebemaba, ewari aba kʼawuasi iyi mebẽãta beasita ẽbẽra yi trʉ̃ Joséba. Maʉ̃ kʼarea Tonyʼra tẽã yõmiabasi adewara iya jʉrʉsi yi mebẽã beadara abarika oita. Joséba Tony mebẽãta beasi baera iyira karsel eda bʉesida. Mamina tẽã mamaʉ̃ba ẽdrʉbʉrʉde Tonyba jarasi beaita, maʉ̃ kʼarea edasi põgata. Maʉ̃ne Tonybara Daizeze Bedʼeata kʼawua jʉ̃drʉsi, iya jarabʉ: «Mʉ̃a Daizeze Bedʼeadeba kʼawuasi mʉ̃a krĩchabʉta awuara erbaibarata akʉza mʉ̃a obʉsida idubʉibarata, maʉ̃ kʼarea Joséba oda kʼarea mejãcha kĩrʉ kiki kʼawuara idubʉibarabasi». Maʉ̃  tẽã Tonyʼra buru kʼoesi adewara zõrãrã kongregasionebema basi. Mamina krĩchara sãwũã sentisita Tonyba kʼawuaside Josésida buru kʼoesita, mawũã Daizeze ode kʼẽrẽpa bʼaita. Ãyi yi daucha zesidade ãyira yi bʉrasida akʉza Tonyba Joséʼa jarasi iya odara jipa kĩrãduasita. Tonyba jarabʉ Joséba odata iya jõma kĩrãduasidera iyira arigʉ sobiabasita. Jeowabara Tonyʼa nebiata diasi, iya kĩrãduasi baera awuruba nemitia odata.

15, 16. ¿Bʉara kʼãrẽta kʼawuabʉ Peter akʉza Sue berabaridadebara?

¹⁵ 1985de Peter akʉza Sueʉ̃me ãba yi jʉrebarimae panasi. Maʉ̃ne jẽzasi bombata, ẽbẽra abaʉba bʉesi baera bombata mama. Sue maʉ̃ bomba jẽza wãnaba yi kĩrãta ãrĩsi akʉza yi kĩbʉbida wua ʉ̃ ẽ besi. Peter akʉza Sueʉ̃mebara badua krĩchapanasi ãyi zʉbʉria berabaridata. * Maʉ̃ta poaga bio berabarida tẽã yi bomba bʉedara jidasida akʉza karsel eda bʉesida ewari jõmaʉ̃nẽ iyi beiyeda. Tẽã ãya widisidade naʉ̃ ẽbẽraba odara ãya jipa kĩrãduai kʼawuaita ãya jarasida: «Jeowabara daiʼa jaradia zebʉrʉ awuruba nemitia oda kʼarea mejãcha kĩrʉ kiki kʼawuabʉrʉ, naʉ̃bara kayaita dayi krĩchade akʉza dayi kakuata. Maʉ̃ kʼarea mawũã bomba jẽza berabarida tẽã Jeowaʼa yiwidʼisida kʼarebamarẽã maʉ̃ ẽbẽraba oda kʼarea iyiʉ̃me kĩrʉ kiki kʼawua ẽ baita akʉza iya nemitia odata kĩrãduabimarẽã, mawũã aduʼapanaita».

¹⁶ ¿Edaʉde ãyitara zareabʉka kĩrãduaita? Mawũã. Ãya jarabʉ: «Sueta pʉpʉka zebʉrʉza bomba jẽza wãna kʼarea jẽda kĩrãbepanʉ kʼãrẽ berabaridata maʉ̃ kʼarea mejãcha kĩrʉbʉ, mamina zarea opanʉ maʉ̃ta badua krĩcha ẽ baita, mawũã jĩgara wãbʉ maʉ̃ krĩcha mitiara». Adewara ãya jarapanʉ: «Naʉ̃ ẽbẽra bomba bʉedata Jeowa ode wãra ãyara bia edadaita kʼãrẽ krĩcha ẽã. Dai kʼãwũã zʉbʉria zebʉrʉra Daizeze Bedʼeaba mejãcha kʼareba zebʉrʉ biode krĩcha ẽ bʼaita maʉ̃ ẽbẽraba  odata mawũã aduʼa panaita. Wãrĩnu Daizeze Bedʼeabara daira kʼareba zebʉrʉ adewara kʼawuapanʉ wuabemaba oda kʼarea dai kʼawua zʉbʉriabʉra Jeowaba jõma jõbita».

17. ¿Kʼãrẽta jaradiabʉ Myra berabaridabara?

¹⁷ Myraba Daizeze ʉ̃rʉ kʼawuasidera iyara wũãwũã ũme erbasi adewara juwa jidabasi. Mamina yi kimabara kãga ẽ basi Daizezera, adewara ãĩbasi akʉza yi mebẽrãsida amaesi. Myraba jarabʉ: «Mʉ̃ kimaba idubʉsidera mʉ̃ra arigʉ sopʉa sentisi, mʉ̃a iyita mejãcha kãgabasi baera. Mawũã berabaribʉrʉra mʉ̃a ĩjã ẽ basi adewara krĩchasi iya mʉ̃ra idubʉsita mʉ̃ kʼarea adewara mejãcha kĩrʉbasi». Myraba jarabʉ: «Mʉ̃ra jedeko bio bayeda mejãcha kĩrʉbasi, naʉ̃ba mʉ̃ Jeowa neũdukʼawuata aduabibasi adewara wuabemara ẽbẽrabawarabida». Idi ewadera Myrara mejãcha kĩrʉ ẽ yi kima badaʉ̃me adewara jʉ̃ãbʉ ewari abaʉde iyabida jʉrʉmarẽã Jeowa ota. Idi ewadera Myrara abapaibʉ baera iyira zarea obʉ yi wũãwũãrasida Daizeze ode dapʉẽita. Idi ewadera Myrata yi wũãwũãrabawara Jeowa ode sobiapanʉ.

18. Jeowara Juez bia baera, ¿kʼãrẽta ĩjãseapanʉ?

¹⁸ Dayirãra aduʼa panʉ ẽbẽrarãta daya kʼawua oẽ baera. Naʉ̃ra Jeowabʉrʉ kʼawua obʉ baera. Jeowata abapai juez baera iya jõma daucha obʉ (Rom. 14:10-12). Dayirãbara wãrĩnu iyide ĩjãbʉta ũdubiseabʉ, Jeowabara kʼawuabʉ baera kʼãrẽta biata akʉza kʼãrẽta zeri ẽãta (Gén. 18:25; 1 Rey. 8:32). Adewara iyara nekʼãrẽra aña oka.

19. ¿Jeowara juez bia baera dayirãbara kʼãrẽta ũdudayi?

¹⁹ Dayirã jõmaʉ̃ba sobiade jʉ̃ãpanʉ aranʉ Jeowaba jõma jõbimarẽã kʼawua dayirã nemitia omianeba zʉbʉriabʉta. Mawũã berabaribʉrʉdera wua kĩrãbeda ẽ bayi maʉ̃ zʉbʉriara akʉza maʉ̃ba kayabi ẽ bayi dayi krĩchata akʉza dayi kakuata (Sal. 72:12-14; Apoc. 21:3, 4). Maʉ̃ ewari zeiyedara dayirãbara sobiade jʉ̃ãpanʉ akʉza Jeowaʼa biga diapanʉ awuruba nemitia obʉra iyide kĩrãkʼa kĩrãduaseapanʉ baera.