1. ¿Chuqui miʼ suben Jehová jiñi mucʼʌch bʌ i chaʼ ñaʼtañob i bʌ?

 JEHOVÁ jiñʌch tsaʼ bʌ i meleyonla (pʌtʌyonla), jiñʌch jiñi xʼacʼ mandar yicʼot Juez, pero jiñʌch jaʼel lac Tat wen yujil bʌ cʼuxbiya (Sal. 100:3; Is. 33:22). Jin chaʼan, cheʼ bʌ mi lac chaʼlen mulil i mi lac chaʼ ñaʼtan lac bʌ ti jumpʼejl lac pusicʼal, mach muqʼuic jach i mejlel i ñusan lac mul, yomʌch i mel (Sal. 86:5). Jehová tsiʼ cʼʌñʌ jiñi xʼaltʼan Isaías chaʼan miʼ yʌl ili tʼan muʼ bʌ i wen ñuqʼuesan lac pusicʼal. Tsiʼ yʌlʌ: «Anquese wen chʌctsʼeran jini laʼ mul, lajal mi caj i sujtel bajcheʼ ñaʼal tsʌñal» (Is. 1:18).

2. ¿Chuqui yom mi lac mel chaʼan wen mi la cajñel la quicʼot yambʌlob?

² Ti lac pejtelel mi lac mel yicʼot mi la cʌl muʼ bʌ i low yambʌlob come luʼ xmulilonla (Sant. 3:2). Pero iliyi mach yomic i yʌl chaʼan maʼañic miʼ mejlel lac taj wem bʌ la camigojob. Yom jach la cujil i ñusʌbentel lac bʌ lac mul (Pr. 17:9, TNM; 19:11; Mat. 18:21, 22). Jehová yom chaʼan mi lac ñusʌben lac bʌ lac mul (Col. 3:13). Añʌch chucoch yom mi lac mel come Jehová miʼ ñusʌbeñonla lac mul ti jumpʼejl i pusicʼal (Is. 55:7).

3. ¿Chuqui mi caj laj qʼuel ti ili estudio?

³ Ti ili estudio mi caj laj qʼuel bajcheʼ miʼ mejlel lac lajin Jehová cheʼ mi lac ñusʌben i mul yambʌlob anquese xmulilonla. ¿Chuqui ti mulil yom mi lac suben jiñi ancianojob? ¿Chucoch yom Jehová chaʼan mi lac ñusʌben lac bʌ lac mul?  ¿I chuqui mi laj cʌn tiʼ tojlel jiñi hermanojob tsaʼ bʌ i ñusayob wocol tiʼ caj chuqui tsiʼ mele yambʌlob?

4. a) ¿Chuqui yom miʼ mel juntiquil xñoptʼan mi tsiʼ chaʼle tsʌts bʌ mulil? b) ¿Chuqui yom miʼ melob jiñi ancianojob?

⁴ Cheʼ bʌ an majqui miʼ chaʼlen tsʌts bʌ mulil yom miʼ subentel jiñi ancianojob. Ti 1 Corintios 6:9, 10, mi lac taj baqui tac bʌ jiñi mulil. Cheʼ tac bʌ mulil bajcheʼ jiñi, wen tsʌtsʌch come woli (choncol) i ñusʌntel ti pʼis i mandar Dios. Mi juntiquil xñoptʼan miʼ mel cheʼ bʌ mulil bajcheʼ jiñi, yom miʼ cʼajtiben Jehová chaʼan miʼ ñusʌben yicʼot yom miʼ pejcan jiñi ancianojob (Sal. 32:5; Sant. 5:14). ¿Chuqui añob tiʼ wenta miʼ melob jiñi ancianojob? Cojach Jehová muʼ bʌ i mejlel i junyajl ñusan lac mul, i miʼ mel come Jesús tsaʼix i yʌcʼʌ i cuxtʌlel ti lac tojlel. * Pero Dios tsiʼ yʌqʼue tiʼ wenta jiñi ancianojob chaʼan miʼ qʼuelob tiʼ coltaya jiñi Biblia mi juntiquil xmulil mucʼʌch i mejlel ti bej ajñel ti congregación (1 Cor. 5:12). Jin chaʼan, junchajp yom bʌ miʼ melob jiñʌch cheʼ miʼ ñop i yʌqʼueñob i jacʼbal ili cʼajtiya tac: ¿Tsaʼ ba i yʌlo ñaʼta i mel jiñi mulil?, ¿tsaʼ ba i ñopo i muc?, ¿jal ba tsiʼ mele? I ñumen ñuc bʌ i cʼʌjñibal, ¿tsaʼix ba i pʌsʌ chaʼan mucʼʌch i chaʼ ñaʼtan i bʌ tiʼ sujm? ¿Am ba chuqui miʼ pʌs chaʼan Jehová tsaʼix i ñusʌbe i mul? (Hech. 3:19).

5. ¿Bajcheʼ miʼ coltan jiñi congregación muʼ bʌ i melob jiñi ancianojob?

⁵ Cheʼ bʌ jiñi ancianojob miʼ tempañob i bʌ yicʼot juntiquil tsaʼ bʌ i chaʼle mulil, yomob chaʼan jiñi muʼ bʌ i cʼotelob i ñaʼtan cheʼʌch bajcheʼ jiñi tsaʼix bʌ ñaʼtʌnti yaʼ ti panchan (Mat. 18:18). ¿Bajcheʼ miʼ coltan jiñi congregación iliyi? Weno, mi jiñi xmulil maʼañic miʼ chaʼ ñaʼtan i bʌ, miʼ chojquel loqʼuel ti congregación i cheʼ bajcheʼ jiñi miʼ cʌntʌntel jiñi i wiñicob Jehová (1 Cor. 5:6, 7, 11-13; Tito 3:10, 11). Miʼ mejlel i coltan jaʼel chaʼan miʼ chaʼ ñaʼtan i bʌ yicʼot chaʼan Jehová miʼ ñusʌben i mul (Luc. 5:32). Jiñi ancianojob miʼ melob oración tiʼ tojlel i miʼ cʼajtibeñob Jehová chaʼan miʼ coltan chaʼan utsʼat miʼ yajñel tiʼ tojlel (Sant. 5:15).

6. Tsictesan mi Jehová miʼ ñusʌben i mul juntiquil expulsado.

⁶ Laʼcu lac ñaʼtan tiʼ tojlel juntiquil maxto bʌ i chaʼ ñaʼta i bʌ cheʼ bʌ miʼ tempan i bʌ yicʼot jiñi ancianojob. Mi cheʼ bajcheʼ jiñi, mi caj i chaʼlentel ti expulsar. I mi tsiʼ ñusa ti pʼis i mandar tac jiñi país, jiñi ancianojob maʼañic mi caj i coltañob chaʼan maʼañic miʼ yʌqʼuentel i toj i mul. Jehová tsiʼ yʌqʼue tiʼ wenta jiñi yumʌlob chaʼan miʼ chaʼleñob meloñel yicʼot miʼ yʌqʼueñob i toj i mul majqui jach miʼ ñusan ti pʼis jiñi mandar, mach yʌlʌyic mi tsiʼ chaʼ ñaʼta i bʌ o maʼañic (Rom. 13:4). Pero mi ti wiʼil miʼ qʼuel chaʼan tsiʼ mele mach bʌ weñic, miʼ qʼuextan i melbal (chaʼlibal) yicʼot i ñaʼtʌbal, Jehová mi caj i ñusʌben i mul (Luc. 15:17-24). Mach yʌlʌyic mi tsiʼ chaʼle tsʌts tac bʌ mulil (2 Cr. 33:9, 12, 13; 1 Tim. 1:15).

7. ¿Chuqui yom i yʌl cheʼ mi lac ñusʌben i mul tsaʼ bʌ i chaʼle mulil ti lac tojlel?

⁷ Tijicña mi la cubin cheʼ maʼañic ti lac wenta chaʼan mi la cʌl mi Jehová miʼ ñusʌben i mul juntiquil o maʼañic. Pero añʌch chuqui an ti lac wenta mi lac mel. ¿Chuqui? Tajol an muʼ bʌ i chaʼlen mulil ti lac tojlel i miʼ subeñonla chaʼan mi lac ñusʌben o tajol maʼañic miʼ mel. Mi cheʼʌch bajcheʼ jiñi, joñonla mi caj lac ñaʼtan mi mucʼʌch  caj lac ñusʌben, yom i yʌl, mi lac ñajʌtesan i maʼañic mi lac michʼ qʼuel. Tajol wocol mi la cubin chaʼan mi lac ñusʌben i mul yicʼot yom miʼ ñumel cabʌl ora, ñumento mi tsiʼ wen ticʼlayonla. Jiñi La Atalaya 15 chaʼan septiembre 1994 miʼ yʌl: «Cheʼ mi lac ñusʌben i mul juntiquil, mach yomic i yʌl chaʼan wen mi laj qʼuel tsaʼ bʌ i mele. Tiʼ tojlel jiñi xñoptʼan, jiñi i ñusʌntel mulil yom i yʌl chaʼan mi laj cʌy jiñi wocol tiʼ cʼʌb Jehová. Jiñʌch jiñi Juez tiʼ petol pañimil (mulawil) i mi caj i qʼuel chaʼan mi lac melbentel chuqui toj». ¿Chucoch yom Jehová chaʼan mi lac ñusʌben i mul yambʌlob i mi laj cʌy jiñi wocol tiʼ cʼʌb?

8. ¿Bajcheʼ mi lac pʌs chaʼan mucʼʌch laj qʼuel ti ñuc i pʼuntaya Jehová?

⁸ Cheʼ bʌ mi lac ñusʌben i mul yambʌlob, mi lac pʌs chaʼan mi laj qʼuel ti ñuc jiñi i pʼuntaya Jehová. Ti jumpʼejl parábola, Jesús tsiʼ laji Jehová bajcheʼ juntiquil rey tsaʼ bʌ i ñusʌbe i bet juntiquil i yaj eʼtel (troñel) maʼañic bʌ miʼ mejlel i tojben. Pero jiñi xyaj eʼtel maʼañic tsiʼ pʼunta juntiquil i piʼʌl mach bʌ wen cabʌlic i bet tiʼ tojlel (Mat. 18:23-35). ¿Chuqui yom i pʌsbeñonla Jesús? Mi mucʼʌch laj qʼuel ti ñuc bajcheʼ miʼ pʼuntañonla Jehová, mi caj i ñijcañonla chaʼan mi lac ñusʌben i mul yambʌlob (Sal. 103:9). Añix cabʌl jab jiñi Lac Tsictesʌbentel tsiʼ yʌlʌ chaʼan, mach yʌlʌyic jaysujtel mi lac ñusʌben i mul yambʌlob, maʼañic baʼ ora mi caj lac lajin «bajcheʼ cʼamel miʼ ñusʌbeñonla lac mul yicʼot miʼ pʼuntañonla Dios tiʼ tojlel Cristo».

9. ¿Majqui muʼ bʌ i pʼuntʌntelob ti Jehová? (Mateo 6:14, 15).

⁹ Mi mucʼʌch lac ñusʌben i mul yambʌlob, Jehová mi caj i ñusʌbeñonla lac mul. Dios miʼ pʼuntan jiñi yujiloʼ bʌ pʼuntaya (Mat. 5:7; Sant. 2:13). Jamʌ tsiquil tsiʼ pʌsʌ Jesús iliyi cheʼ bʌ tiʼ sube jiñi xcʌntʼañob i chaʼan bajcheʼ yom miʼ melob oración (pejcan Mateo 6:14, 15). Jehová tsaʼix i yʌcʼʌ ti cʌñol iliyi tiʼ yorajlel Job. Ili xucʼul bʌ i wiñic tsiʼ cuchu pejtelel tsaʼ bʌ i yʌlʌ Elifaz, Bildad yicʼot Zofar. Jehová tiʼ sube chaʼan miʼ chaʼlen oración tiʼ tojlelob. I cheʼ bʌ tsiʼ mele, Jehová tsiʼ yʌqʼue i chobejtʌbal (Job 42:8-10).

10. ¿Chucoch miʼ ticʼlañonla jiñi michʼ pusicʼal? (Efesios 4:31, 32).

¹⁰ Jiñi michʼ pusicʼal miʼ ticʼlañonla. Jiñi michʼ pusicʼal lajal bajcheʼ laj cuch, i Jehová yom chaʼan mi laj cʌy (pejcan Efesios 4:31, 32). Miʼ subeñonla: «Cʌyʌ a michʼajel. Mach yomic tsʌytsʌyña a pusicʼal» (Sal. 37:8). Ili ticʼojel miʼ coltañonla come jiñi michʼ pusicʼal miʼ ticʼlan lac bʌcʼtal yicʼot lac ñaʼtʌbal (Pr. 14:30). Cheʼ bʌ an majqui mi lac michʼ qʼuel lajal bajcheʼ woli (yʌquel) lac jap veneno: Mucʼ jach lac ticʼlan lac bʌ. Jin chaʼan, cheʼ bʌ mi lac ñusʌben i mul yambʌlob, woli la cʌqʼuen lac bʌ jumpʼejl majtañʌl (Pr. 11:17). Mi lac taj lac ñʌchʼtʌlel i miʼ mejlel lac bej melben i yeʼtel Jehová.

11. ¿Chuqui miʼ yʌl jiñi Biblia chaʼan i qʼuextʌntel chuqui mi lac tumbentel? (Romanos 12:19-21).

¹¹ Mi la cʌcʼ chaʼan Jehová miʼ chaʼ qʼuextan chuqui mi lac tumbentel. Jehová maʼañic tsiʼ yʌcʼʌ ti lac wenta chaʼan mi lac chaʼ qʼuextan chuqui miʼ tumbeñonla yambʌlob (pejcan Romanos 12:19-21). Maʼañic mi lac mejlel ti meloñel ti toj cheʼ bajcheʼ miʼ mel Jehová come xmulilonla i maʼañic mi lac luʼ taj laj qʼuel chuqui tac miʼ yujtel (Heb. 4:13). Cheʼ jaʼel, an i tajol an chuqui mi lac waʼ mel tiʼ caj bajcheʼ yubil mi la cubin lac bʌ. Santiago tiʼ tsʼijbu: «I michʼajel jiñi wiñicob maʼañic miʼ coltañonla lac mel chuqui toj cheʼ bajcheʼ  yom Dios» (Sant. 1:20). Miʼ mejlel lac ñop chaʼan Jehová mi caj i mel chuqui toj i mi caj i chʼʌm tiʼ wenta chaʼan mi lac melbentel chuqui toj.

12. ¿Bajcheʼ mi lac pʌs chaʼan mucʼʌch lac ñop chaʼan Jehová miʼ mel chuqui toj?

¹² Cheʼ bʌ mi lac ñusʌben i mul yambʌlob, mi lac pʌs chaʼan mucʼʌch lac ñop chaʼan Jehová miʼ mel chuqui toj. Cheʼ mi laj cʌy jiñi wocol tac tiʼ cʼʌb, mi lac pʌs chaʼan mucʼʌch lac ñop chaʼan mi caj i tojʼesan jiñi wocol tac am bʌ i yʌcʼʌ jiñi mulil. Yaʼ ti tsijiʼ bʌ pañimil, maʼañix mi caj i chʌn ñaʼtʌntel yicʼot maʼañix mi caj i chʌn cʼajtesʌntel jiñi muʼ tac bʌ i low lac pusicʼal (Is. 65:17). Pero ¿mucʼʌch ba i mejlel laj cʌy jiñi michʼajel yicʼot michʼ pusicʼal cheʼ bʌ an majqui miʼ ticʼlañonla? Laʼ laj qʼuel chuqui an i mele yambʌlob.

13, 14. ¿Chuqui miʼ pʌsbeñet tsaʼ bʌ ujti tiʼ tojlel Tony yicʼot José?

¹³ Cabʌl hermanojob an i ñusʌbeyob i mul yambʌlob anquese tsaʼ wen ticʼlʌntiyob. ¿Bajcheʼ tsiʼ coltayob jiñi?

¹⁴ Laʼ laj qʼuel tsaʼ bʌ ujti tiʼ tojlel Tony, * chumul bʌ ti Filipinas. Cheʼ bʌ maxto i testigo Jehová, tsaʼ tsʌnsʌnti juntiquil i yeran. Ti wiʼil tsiʼ yubi chaʼan juntiquil wiñic i cʼabaʼ José tiʼ tsʌnsa. Tony wen jontol, jin chaʼan yom i tsʌnsan jiñi wiñic. José tsaʼ otsʌnti ti cárcel tiʼ caj jiñi tsaʼ bʌ i mele. Cheʼ bʌ José tsaʼ loqʼui, Tony tsiʼ yʌlʌ chaʼan mi caj i tsʌnsan, jin chaʼan tsiʼ mʌñʌ i pistola. Pero tsaʼ caji ti estudio yicʼot jiñi i testigojob Jehová. Miʼ yʌl: «Cheʼ bʌ woliyon ti estudio, tsaʼ j cʌñʌ chaʼan yom mij qʼuextan jiñi c melbal. Yom mij cʌy jiñi michʼajel». Tsiʼ chʼʌmʌ jaʼ i ti wiʼil tsaʼ sujti ti anciano yaʼ tiʼ congregación. ¡Tsaʼ toj sajti i pusicʼal cheʼ bʌ tsiʼ yubi chaʼan José tsaʼ sujti tiʼ testigo Jehová jaʼel! Cheʼ bʌ tsiʼ tajayob i bʌ, tsiʼ meqʼueyob i bʌ i Tony tiʼ sube José chaʼan tsaʼix i ñusʌbe i mul. Tony miʼ yʌl chaʼan maʼañic bajcheʼ miʼ mejlel i tsictesan bajcheʼ cʼamel i tijicñʌyel tsiʼ yubi cheʼ bʌ tsiʼ ñusʌbe i mul José. Tony, tsiʼ ñusʌbe i mul i piʼʌl, i Jehová tsiʼ yʌqʼue i bendición chaʼan jiñi tsaʼ bʌ i mele.

15, 16. ¿Chuqui maʼ cʌn tiʼ tojlel Peter yicʼot Sue?

 ¹⁵ Ti 1985, Peter yicʼot Sue añob tiʼ tempa bʌ cheʼ bʌ tsaʼ tojmi jumpʼejl bomba tsaʼ bʌ i cʌyʌ juntiquil wiñic yaʼ tiʼ Yotlel tempa bʌ. Tiʼ caj jiñi, Sue maʼañix miʼ mejlel i yujtsʼin chuqui miʼ yujtsʼin i tsaʼ asiyi jiñi i wut yicʼot i chiquin. * Jiñi xñujpuñel miʼ chʌcʌ cʼajtibeñob i bʌ: «¿Majqui tsaʼ mejli i mel cheʼ bʌ bajcheʼ jiñi?». Cheʼ bʌ tsaʼ ñumi cabʌl jab, ili wiñic mach bʌ i testigojic Jehová, tsaʼ chujqui i tsaʼ otsʌnti ti cárcel chaʼan maʼañix baʼ ora miʼ loqʼuel. Cheʼ bʌ tsaʼ cʼajtibenti Peter yicʼot Sue mi tsaʼix i ñusʌbeyob i mul, tsiʼ jacʼʌyob: «Jehová miʼ pʌsbeñonla chaʼan jiñi michʼajel yicʼot michʼ pusicʼal miʼ mejlel i ticʼlan lac bʌcʼtal, lac ñaʼtʌbal yicʼot ti bajcheʼ yubil mi cubin lac bʌ. Jin chaʼan, cʼʌlʌl tiʼ tejchibal tsaʼ lon j cʼajtibe chaʼan miʼ coltañon lon c choc jiñi michʼ pusicʼal chaʼan wen mi lon cajñel».

¹⁶ ¿Wocol ba tsiʼ yubi jiñi xñujpuñel chaʼan miʼ ñusʌben i mul jiñi wiñic? Cheʼʌchi. Laʼ laj qʼuel chuqui miʼ yʌlob. «An i tajol miʼ tilel michʼajel cheʼ bʌ mi lon j qʼuel bajcheʼ miʼ ñusan wocol Sue tiʼ caj jiñi tsaʼ bʌ ujti. Pero mucʼ jach i waʼ ñumel come maʼañic mi lon j cʌlʌx ñaʼtan jiñi. Cheʼto jaʼel ti jumpʼejl lon c pusicʼal miʼ mejlel lon cʌl chaʼan, mi ti jumpʼejl bʌ qʼuin jiñi wiñic miʼ sujtel ti lon quermañu, utsʼat mi caj lon c chʼʌm wʌʼ tiʼ tejclum Jehová. Jiñi tsaʼ bʌ lon c ñusa an i pʌsbeyon lojon chaʼan jiñi principio tac am bʌ ti Biblia mucʼʌch i wen coltañonla. Cheʼ jaʼel, miʼ ñuqʼuesan lon c pusicʼal cheʼ lon cujil chaʼan tsʼitaʼ yom chaʼan Jehová miʼ tojʼesan jiñi wocol tac».

17. ¿Chuqui miʼ pʌsbeñet tsaʼ bʌ ujti tiʼ tojlel Myra?

¹⁷ Myra tsiʼ cʌñʌ Jehová cheʼ bʌ ñujpuñemix yicʼot cheʼ añix chaʼtiquil i yalobil, pero jiñi i ñoxiʼal maʼañic tsiʼ jacʼʌ jiñi i sujmlel. Ti wiʼil, jiñi wiñic tsiʼ sʌcla yambʌ i yijñam i tsiʼ cʌyʌ jiñi i familia. Myra miʼ yʌl: «Cheʼ bʌ jiñi c ñoxiʼal tsiʼ cʌyʌyon lon maʼañic tsaʼ c ñaʼta chuqui yom mic mel. Cheʼ tsaʼ cubi c bʌ bajcheʼ mi yubiñob i bʌ jiñi muʼ bʌ i cʌjyelob:  Maʼañic mic ñop tiʼ tojlel yambʌlob, cʼux tsaʼ cubi, chʼijyemon, michʼon yicʼot c mul tsaʼ cubi». Anquese tsaʼix jejmi jiñi i ñujpuñel bej cʼuxto tsiʼ yubi jiñi tsaʼ bʌ ujti tiʼ tojlel. Miʼ bej al: «Cabʌl uw cheʼ tsaʼ cubi c bʌ bajcheʼ jiñi, i tsaʼ j qʼuele chaʼan jiñi woliʼ ticʼlan bajcheʼ añon yicʼot Jehová i yicʼot yambʌlob». Wʌle, Myra miʼ mejlel i yʌl chaʼan maʼañic miʼ michʼ qʼuel jiñi i ñoxiʼal bʌ ti ñaxan i yom chaʼan wen miʼ yajñel. Miʼ pijtan chaʼan ti jumpʼejl bʌ qʼuin miʼ jacʼ jiñi i sujmlel. Myra miʼ ñaʼtan jiñi muʼ bʌ i mejlel i mel, i mach jiñic tsaʼ bʌ ujti. Anquese i bajñel jach tsiʼ cosa jiñi chaʼtiquil i yalobil ti jiñi i sujmlel, tijicña woliʼ melben i yeʼtel Jehová yicʼotob i yicʼotob i familia jiñi yalobilob.

18. ¿Chuqui jiñi yom bʌ mi lac ñop cheʼ la cujil chaʼan Jehová jiñʌch jiñi ñumen ñuc bʌ Juez?

¹⁸ Jehová jiñʌch jiñi Ñumen ñuc bʌ Juez, jin chaʼan mach yomic mi laj cʼojoʼtan (lac pensalin) bajcheʼ mi caj i yujtel meloñel tiʼ tojlel yambʌlob. Jiñʌch muʼ bʌ caj i chaʼlen meloñel. ¡Miʼ wen tijicñesañonla iliyi! (Rom. 14:10-12). Miʼ mejlel lac ñop chaʼan Jehová toj mi caj i chaʼlen meloñel cheʼ bajcheʼ miʼ yʌl jiñi toj tac bʌ i mandar chaʼan chuqui tac wen yicʼot mach bʌ weñic (Gn. 18:25; 1 R. 8:32). Maʼañic baʼ ora mi caj i mel mach bʌ weñic.

19. ¿Chuqui mi caj i mel Jehová ti talto bʌ qʼuin?

¹⁹ Jehová mi caj i tojʼesan pejtelel jiñi ujtem bʌ tiʼ caj jiñi mulil. ¡La comix chaʼan miʼ tsʼʌctiyel jiñi! Mi caj i jisan pejtelel jiñi cʼuxyajiyel, jiñi chʼijyemlel, michʼajel yicʼot yan tac bʌ muʼ bʌ la cubin (Sal. 72:12-14; Apoc. 21:3, 4). Maʼañix mi caj lac wis cʼajtesan. Cheʼ bʌ wolito lac pijtan jiñi, laʼ laj qʼuel ti ñuc cheʼ miʼ mejlel lac lajin Jehová cheʼ mi lac ñusʌben i mul yambʌlob.