1. Nemene la hnei Iehova hna qaja kowe la itre ka ietra?

 NYIPICI laka, Iehova la Atre Xup me Atre Acili Wathebo me Atre Iameköti, ngo Nyidrëti fe la Keme së ka tru ihnimin. (Sal. 100:3; Is. 33:22) Ame la easa ngazo koi Nyidrë me ietra, tru la aja i Nyidrë troa nue la ngazo së. (Sal. 86:5) Nyidrëti a ithuecatre koi së jëne Isaia perofeta, me hape: “Maine tune la ka palulu la ite ngazo i nyipunie, tro ha wië tune la kiona.”—Is. 1:18.

2. Nemene la nyine tro sa kuca matre tro sa nyisinee itre xan?

² Pine laka, itre atr ka tha pexeje kö së, easa qaja maine kuca la itre ewekë ka akötrë itre xan. (Iako. 3:2) Tha kolo kö lai a qaja ka hape, tha ijiji së kö troa hane nyisinee i angatr. Ijiji së hi e tro sa atreine nu la itre ngazo i angatr. (Ite edomë 17:9; 19:11; Mat. 18:21, 22) Maine tro ketre a tria koi easë, aja i Iehova tro sa nue la ngazo i angeic. (Kol. 3:13) Hetre kepin matre loi e tro sa nue la ngazo i itre xan. Ame la pane kepin, ke Iehova a “nyipi köle tij” la itre ngazo së.—Is. 55:7.

3. Nemene la hne së hna troa ce wang ngöne la tane mekun celë?

³ Ame ngöne la tane mekune celë, tro sa ce wang la aqane tro la itre atr ka tha pexeje kö a nyitipu Iehova. Nemene la itre ngazo nyine tro sa qaja kowe la itre qatre thup? Hnauëne la Iehova a ajan tro sa nue la ngazo i itre xan?  Nemene la itre ini nyine tro sa xom qaathene la itre trejin hna akötrën hnei itre xan?

4. (a) Nemene la nyine troa kuca hnene la trejin ka kuca la ketre ngazo ka tru? (b) Nemene la nyine troa kuca hnene la itre qatre thup ngöne la kola tria la ketre trejin?

⁴ Maine hetre ka kuca la ketre ngazo ka tru ngöne la ekalesia ke, loi e troa atre hnene la itre qatre thup. Kola qaja la itre ngazo cili ngöne la tusi 1 Korinito 6:9, 10. Ame la atr ka kuca la itre ewekë cili, ke angeic a ena la itre wathebo i Iehova. Maine tro la ketre trejin a kuca la ketre ngazo ka tru, loi e tro angeic a thith koi Iehova me wang la itre qatre thup ne la ekalesia. (Sal. 32:5; Iako. 5:14) Nemene la hna troa kuca hnene la itre qatre thup? Iehova hmekuje hi la ka ijij troa nue la itre ngazo së, nge hna jëne la thupene mel. * Ngo hnei Iehova hna nue kowe la itre qatre thup la hnëqa troa amekötine la trejin ka kuca la ngazo, thenge la hna qaja ngöne la Tusi Hmitrötr. (1 Kor. 5:12) Loi e tro la itre qatre thup a pane hnying ka hape: Hnei angeice kö hna thë troa kuca la ngazo? Hnei angeice kö hna thel troa juetrëne la ngazo i angeic? Ekö hë angeic kuca la ngazo? Hetre ka amamane kö ka hape, angeic a nyipi ietra? Nemene la ka amamane ka hape, ase hë Iehova nue la ngazo i angeic?—Itre hu. 3:19.

5. Nemene la eloine la huliwa ne la itre qatre thup?

⁵ Ame la itre qatre thup a ithanata memine la trejin ka kuca la ngazo, loi e tro angatr a axecië mekun tui Iehova. (Mat. 18:18) Nemene la eloin kowe la ekalesia e tro angatr a ujë tun? Tro angatr a upetröneë la trejin ka xele ma ietra matre troa thupëne la ekalesia i Iehova. (1 Kor. 5:6, 7, 11-13; Tito 3:10, 11) Tro fe angatr a xatuane la trejin ka kuca la ngazo troa ietra me bëeke hmaca koi Iehova. (Luka 5:32) Tro mina fe la itre qatre thup a thithi san la trejin ka ietra me sipo Iehova troa xatua angeic troa imelekeu hmaca me Nyidrë.—Iako. 5:15.

6. Ijije kö troa nue la ngazo ne la atr hna upetröneë?

⁶ Tune kaa e tha ietra kö la ketre trejin ngöne la kola wai angeic hnene la itre qatre thup? Ame e cili tro ha upetröneë angeic. Maine hnei angeic hna ena la wathebo i mus, tha tro kö la itre qatre thup a juetrëne la ngazo i angeic. Hnei Iehova hna nue kowe la itre mus troa amekötine la itre atr ka eni wathebo, ngacama ka ietra ju hë maine waea. (Rom. 13:4) Ngo, e tro la atre cili a trotrohnine laka, ngazo la hnei angeic hna kuca, nge tro angeic a saze, tro Iehova lai a nue la ngazo i angeic. (Luka 15:17-24) Ngacama tru catre ju hë la itre ngazo hnei angeic hna kuca, ngo tro kö Iehova lai a seng la itre ngazo i angeic.—2 A. l. ite jo. 33:9, 12, 13; 1 Tim. 1:15.

7. Nemene la aqane tro sa nue la ngazo ne la ketre atr ka ngazo koi së?

⁷ Easa madrine laka, tha hnëqa së kö troa amekötine la itre atr ka kuca la ngazo! Ngo, ame pe, hetre nyine tro sa kuca. Ame itre xaa ijin, tro la ketre atr a ngazo koi easë, ngo e thupen, tro angeic a qeje menu. Ngo e tha qeje menu kö angeic, ijije hi tro sa nue la ngazo i angeic. Kolo lai a hape, tha easë kö a lapa fë trenge  hni koi angeic. Nyipici laka, tha tro kö a canga patr la elëhni easë, ngo loi e tro sa nue trengecatr, ngacama tru la hna akötrë së. Kola qaja ngöne la Ita Ne Thup ne 15 Semitrepa 1994 (qene Wiwi) ka hape: “Ame la easa nue la ngazo ne la atr ka kuca la ngazo, tha kolo kö lai a hape, easa wangacone la ngazo i angeic. Ame la keresiano a nue la ngazo, ke kolo hi lai a hape, angeic a nue Iehova troa ameköti ewekë. Nyidrëti la Atre Iameköti, matre tro kö Nyidrëti a të la ngazo ngöne la nyipi ijin.” Pine nemene matre Iehova a ajan tro sa nue la ngazo i itre xan, me nue koi Nyidrë troa amekötine la atr?

8. Tune kaa la aqane tro sa olene koi Iehova la hnei Nyidrëti hna nue la itre ngazo së?

⁸ Ame la easa nue la ngazo i ketre, ke ketre aqane tro hi së lai a olene koi Iehova. Ame ngöne la ketre ceitun, hnei Iesu hna aceitunë Iehova memine la ketre joxu ka nue la gufa ne la ketre hlue i nyidrë, ke thatreine kö angeic troa të. Ngazo pe, tha ase kö la hlue cili nue la gufa ne la ketre hlue, ngacama co hi lai gufa. (Mat. 18:23-35) Nemene la ini hne së hna xom qa ngöne la ceitune i Iesu? E tro sa wangatrune la aqane nue Iehova la itre ngazo së, ke tro lai a xatua së troa nue la ngazo i itre xan. (Sal. 103:9) Hane hi la hna qaja hnene la ketre Ita Ne Thup: “Ngacama anyimua nue ju hë së la ngazo i itre xan, ngo thatreine kö së wej la aqane nue la itre ngazo së hnei Iehova, hna jëne Iesu Keriso.”

9. Drei la itre hnei Iehova hna troa utipin? (Mataio 6:14, 15)

⁹ Ame la itre ka nue la ngazo ne la itre xan, ke tro fe a nue la itre ngazo i angatr. Tro Iehova a utipine la itre ka utipi itre xan. (Mat. 5:7; Iako. 2:13) Celë hi hnei Iesu hna qaja lo nyidrëti a inine la itretre dreng troa thith. (E jë la Mataio 6:14, 15.) Celë fe hi hnei Iehova hna amaman ekö koi Iobu. Ngacama hna akötrë Iobu hnene la hna qaja hnei Elifaza, Biledad, me Zofar, ngo hnei Iehova hna upi angeic troa thithi sai angatr. Nge thupene la hnei Iobu hna thith, hnei Iehova hna amanathithi angeic.—Iobu 42:8-10.

10. Pine nemene matre ka ngazo catr troa lapa fë trenge hni? (Efeso 4:31, 32)

¹⁰ Ka ngazo catr troa lapa fë trenge hni. Ceitune hi la easa lapa fë trenge hni memine la easa thu la ketre ehnef. Iehova a ajane tha tro kö sa lapa fë trenge hni, ke nyine loi lai koi së. (E jë la Efeso 4:31, 32.) Nyidrëti a upi së troa nuetrij la ‘elëhni me iwesitrë.’ (Sal. 37:8) Ka inamacan la atr ka ujë tune lai. Ame la troa lapa fë trenge hni, ke ka hetre thangan ka ngazo kowe la ngönetrei me mekuna së. (Ite edomë 14:30) Ame la easa lapa fë trenge hni kowe la ketre atr, kösë easë lai a iji poizin, ka pëkö thangane lai koi angeic. Ngo easë kö la ka troa xeni pun. Matre ame la easa nue la ngazo i itre xan, tro kö sa sipu kepe eloin. (Ite edomë 11:17) Tro ha tingeting la hni me mekuna së, nge tro sa catre nyihlue i Iehova.

11. Nemene la hna qaja hnei Tusi Hmitrötr göne la troa itëkeun? (Roma 12:19-21)

¹¹ Qa i Iehova troa të la ngazo. Tha ase kö Iehova a nue koi së troa të la ngazo. (E jë la Roma 12:19-21.) Pine laka, itre atr ka tha pexeje kö së, nge ka nyi ifegone  la hne së hna trotrohnin, thatreine kö së troa ameköti ewekë tui Iehova. (Heb. 4:13) Ame itre xaa ijin, tro sa a nue la itre aliene hni së troa ajeanyi së qa ngöne la meköt. Celë hi matre hnei Iehova hna qaja jëne Iakobo ka hape: “Ame la elëhni ne la atr, tha eje kö a eatrëne la meköti Akötresie.” (Iako. 1:20) Xecie koi së laka, ka meköti Iehova, nge tro kö Nyidrëti a amekötine hnyawane lai jol.

12. Tro sa amamane tune kaa ka hape, easa mejiun kowe la aqane ameköti ewekë i Iehova?

¹² Ame la easa nue la ngazo i ketre, easë hi lai a amamane ka hape, easa mejiun kowe la aqane ameköti ewekë i Iehova. Ame la easa nue koi Iehova troa amekötine la jol, easë hi lai a amamane la mejiune së laka, tro kö Nyidrë a apatrene la itre akötr ka xulu qa ngöne la ngazo. Ame ngöne la fen ka hnyipixe, ‘tha tro hmaca kö sa mekun, me amejën qa kuhu hni së’ la itre ewekë ka akötrë së ekö. (Is. 65:17) Ngo e tru palaha la hna akötrë së, ijije kö tro sa xometrij qa kuhu hni së la elëhni me pi iwesitrë? Tro sa ce wang la hna melën hnene la itre xaa trejin.

13-14. Nemene la ini hne së hna xom qa ngöne la hna melën hnei Tony me José?

¹³ Nyimutre la itre trejin ka nue la ngazo i itre xan, ngacama tru catr la hna akötrë angatr. Nemene la itre manathith hnei angatr hna kapa?

¹⁴ Qëmekene troa atre Iehova hnei Tony, * ka mel e Philippines, hnei angeic hna dreng ka hape, hna humuth la mama i angeic hnei José. Ame ekö, ka pi isi lae Tony, nge angeice fe a pi humuthi José. Ame e thupen, hna akalabusi José. Ngo ame ju hi la kola nue José qa kalabus, hnei Tony hna thelejën troa humuthi angeic. Matre hnei Tony hna itö kuqa. Ame pe, hnei angeic hna nyiqane ini Tus memine la itre Temoë Iehova. Öni angeic, “Jëne la ini Tusing, trotrohnine hë ni laka, loi e tro ni a saze, me nue la elëhning.” Ame hë e thupen, hna bapataiso Tony, nge hna acili angeic troa qatre thup. Ketre, kolo fe a sesëkötr hnei Tony ka hape, ase hë bapataiso José!  Ame hë la nyidro a iöhny, hnei nyidro hna pane ihaluth me imadri. Nge öni Tony koi José ka hape, pëhë iwesitrë i nyidro. Öni Tony, thatreine kö angeic qejepengöne la madrin ka ej thei angeic thupene la hna nue la ngazo i José. Eje hi, hnei Iehova hna amanathithine la trenge aja i Tony troa nue la ngazo.

15-16. Nemene la ini hne së hna xom qa ngöne la hna melën hnei Peter me Sue?

¹⁵ Ame lo 1985, hnei Peter me Sue hna sine la icasikeu ngöne la Uma Ne Baselaia. Nge sesëkötre ju hi angatr la kola keciqa la ketre ibob. Hnene la ketre trahmanyi hna amë la ibob e hnine la Uma Ne Baselaia. Ngazo pe, hna eatre hnei Sue matre tha öhne hnyawa ha angeic koilo. Ketre, simi hë la hnangenyë i angeic, nge thatreine hë angeic drei punepun. * Hnei Peter me Sue hna isa hnying ka hape, ‘Drei hmo la ka ujë tun?’ Itre macatre thupen, hna akalabusine lai atr ka ami bob. Ame la kola hnying koi Peter me Sue ka hape, ase kö nyidro nue la ngazo ne lai atre cili, öni nyidro jë hi: “Hnei Iehova hna ini nyio ka hape, ame la troa lapa fë trenge hni ke, ka hetre thangan ka ngazo kowe la ngönetrei, me hni me mekuna së. Matre hnei nyio hna canga sipo Iehova troa xometrij qaathei nyio la elëhni, nge hnei nyio hna thel troa thëthëhmine la itre ewekë ka traqa me mele tingeting.”

¹⁶ Ka hmaloi kö koi nyidro troa nue la ngazo? Waea! Öni nyidro: “Ame la kola akötr hnei Sue ke, nyio hmaca mekun lo itre ewekë ka traqa, nge kola amejëne la elëhni nyio. Ngo nyio a canga saze mekun matre tha tro kö nyio a elëhni. Ame enehila, ijije tro nyio a qaja ka hape, e tro la ka ami bob a Temoë Iehova, tro hë nyio a kepe angeic. Hnei nyio hna öhne laka, hetre thangane catr la itre trepene meköt, itre ej a xatua së troa  mele tingeting! Kola akeukawanyi nyio troa atre laka, easenyi hë tro Iehova a apatrene la itre akötr.”

17. Nemene la ini hne së hna xom qa ngöne la hna melën hnei Myra?

¹⁷ Ame la Myra a atre Iehova, ka faipoipo hë angeic, nge lue nekö i angeic. Xele kö la föi angeic troa atre Iehova. E thupen, hnei nyidrë hna nyixetë me trotrij la hnalapa. Öni Myra: “Ame la kola trotriji hun hnene la föeng, hna traqa la itre mekun ka ngazo koi ni. Eni a akötr me elëhni. Nge kösë ame koi ni, eni la atrekë zön. Ngacama ase hë nyio seihnacil, ngo akötre palahi ni pine la hnei nyidrëti hna kuca. Nyimu treu hnenge hna pane lapa fë trenge hni. Ngo hnenge hna öhne laka, hetre thangane ka ngazo kowe la imelekeung me Iehova, me itre xan.” Ame enehila, ase hë Myra nue la elëhni, nge tha angeic hmaca kö a methinëne la föi angeic. Angeic a ajan tro nyidrë a hane nyihlue i Iehova elany. Tha Myra kö a goeëne la mele i angeic ekö. Matre hnei angeic hna hetrun casine la lue nekö i angeic, me ini nyidro troa hnimi Iehova. Ame enehila, madrine Myra troa nyihlue i Iehova memine la lue nekö i angeic me fami nyidro.

18. Pine nemene matre tro sa mejiun koi Iehova, Atre Iameköti Katru?

¹⁸ Easa madrin, ke tha hnei Iehova kö hna nue koi easë troa amekötine la itre atr! Iehova kö la atrekë hnëqane lai, ke Nyidrë la Atre Iameköti Katru. (Rom. 14:10-12) Loi e tro sa mejiun koi Iehova laka, tro kö Nyidrëti a ameköti ewekë thenge la itre trepene meköti Nyidrë göi loi me ngazo. (Gen. 18:25; 1 Ite jo. 8:32) Ka meköti palahi la aqane ameköti ewekë i Nyidrë!

19. Nemene la aqane tro Iehova a ameköti ewekë elany?

¹⁹ Easa lapa treqene la ijin tro Iehova a apatrene asë la itre thangane la ngazo. Ame hë e cili, troa ameun paluane la nöjei pengöne akötre së. (Sal. 72:12-14; Hna ama. 21:3, 4) Tha tro hmaca kö sa mekun la itre akötre së hnapan. Qëmekene troa traqa la ijine cili, easa olene koi Iehova la hna aijijë së troa hane nyitipu Nyidrë, ene la troa nue la ngazo i itre xan.