1. San Yehofa paamisi den sama di wani meke en bun anga en baka?

 A YEHOFA meke u, neen meke a sa taigi u san u mu du anga san wa mu du, neen aw kuutuman, ma en aw Dda di lobi u tu (Ps. 100:3; Yes. 33:22). Neen meke te u soi taki den sondu di u du e hati u tuutuu, anga ala piisii ai gi u paadon bika a lobi u (Ps. 86:5). A be meke polofeiti Yesaya sikiifi taki: ‘Winsi den sondu fu u lebi enke buulu, den o kon weti enke katun. Winsi den lebi enke lebi koosi, den o kon weti enke weti sikapu uwii.’​—Yes. 1:18.

2. San u mu de kabakaba fu du efu u wani libi na a wan anga taawan?

² Ala wi abi sondu, neen meke wo go e taki efuso du sani di e hati taawan son yuu (Yak. 3:2). Dati á wani taki wa poi abi bun mati. Efii de kabakaba fu gi taawan paadon ala yuu, yu anga den o poi libi na a wan (Odo 17:9; 19:11; Mat. 18:21, 22). Yehofa wani u gi taawan paadon te den taki efuso du wan sani di hati u (Kol. 3:13). A abi leti fu akisi wa sani ya, bika na ala yuu enseefi e gi u paadon fu moo gaan sani di we du.​—Yes. 55:7.

3. San wo luku aini a artikel ya?

³ Aini a artikel ya, wo luku fa sondu libisama sa gi taawan paadon leti enke Yehofa. On ten u mu tyai wan toli go a den owluman? Saide Yehofa e gi u taanga-sikin fu gi  taawan paadon? San u sa leli fu baala anga sisa di fii den takuu bakapisi fu den sani di taawan du?

4. (a) San wan Kelesten mu du te a du wan gaan sondu? (b) San na a wooko fu den owluman te wan sama du wan gaan sondu?

⁴ Te wan sama du wan gaan sondu, a mu go taki anga den owluman. Aini 1 Korentesama 6:9, 10, we si san a wantu fu den sondu ya. Te wan sama du wan gaan sondu, dati wani taki a du wan sani di Beibel e soi u kiin taki Yehofa e buuse. Efu wan Kelesten du wan gaan sondu, a mu begi Yehofa da a taigi en san a du. Baka dati a mu go taki anga den owluman fu a kemeente (Ps. 32:5; Yak. 5:14). San na a wooko fu den owluman te sowan taki doo a den? A Yehofa wawan poi gi wan sama paadon te a du wan sondu. Na a dede di a meke en Manpikin kon dede gi u, meke a poi gi u paadon. Ma a gi den owluman a wooko fu luku efu wan sama sa tan aini a kemeente ete, te den luku a sani di a du (1 Kor. 5:12). Te den owluman e kuutu a toli ya, den e meke moiti fu kon sabi a piki fu den akisi ya: A fuseefi sani a sama du? A meke moiti fu kibii a ogii di a du? Omen leisi a du en? A soi kiin taki a sani di a du e hati en tuutuu? Ai meke moiti fu aa du en moo? A fasi fa ai du sani e soi taki Yehofa gi en paadon?​—Toli 3:19.

5. Sowtu wini ai tyai te den owluman kuutu a toli fu wan sama di du wan gaan sondu?

⁵ Te den owluman e taki anga a sama di du a gaan sondu, den e meke moiti fu kuutu a toli enke fa Yehofa seefi be o kuutu en (Mat. 18:18). Sowtu wini a kemeente e fende fu a sani ya? Te den owluman taki anga wan sama da den e sabi efu a sama wani kengi. Efu a sama á wani kengi da den e puu en aini a kemeente fu aa sa tyai ogii gi den taa baala anga sisa (1 Kor. 5:6, 7, 11-13; Titesi 3:10, 11). Ma te den owluman taki anga wan sama di du wan gaan sondu, da a sama e fende a okasi fu soi efu a sani di a du e hati en tuutuu (Luk. 5:32). Efu den owluman si kiin taki a sondu di a sama du e hati en tuutuu, da den o begi Yehofa fu a sa gi a sama paadon. Den o begi Yehofa tu fu a sa yeepi a sama fu toon en mati baka.​—Yak. 5:15.

6. Yehofa sa gi wan sama paadon ete, te den baala puu en aini a kemeente?

⁶ Efu den owluman taki anga wan sama di du wan gaan sondu neen den si taki den sani di a du nai hati en, den o puu en aini a kemeente. Efu a be pasa lanti weiti, den owluman naw kibii en gi den bakapisi fu a sani di a du. Yehofa gi den tiiman pasi fu sitaafu iniiwan sama di nai holi enseefi a den weiti fu den (Rom. 13:4). Ma efu a sama soi bakaten taki a sani di a du e hati en neen a meke moiti kengi en manii, Yehofa de kabakaba fu gi en paadon (Luk. 15:17-24). A naabi toobi efu a wan gaan sondu a be du.​—2 Kolon. 33:9, 12, 13; 1 Tim. 1:15.

7. San a wani taki fu gi wan sama paadon te a du wan hati sani anga u?

⁷ Ai bigi u taki a Yehofa seefi e luku efu ao gi wan sama paadon te a du wan sondu. Ma useefi abi a okasi fu luku efu wo gi sama paadon tu. On ten u sa du a sani ya? Te wan sama du wan hati sani anga u, a useefi mu luku efu wo gi en paadon. Son leisi a sama e kon begi u paadon fu  a sani di a du, ma son leisi a sama nai akisi u paadon seefi. Toku u sa gi en paadon, da u meke moiti fu wi ati á boon neen moo fu a sani di a du anga u. A ná ala yuu a sani ya makiliki, moomoo efu a wan gaan sani a sama du anga i. A Ingiisi Wakititolen fu 15 september 1994 be taki: ‘Te i gi wan sama paadon, dati á wani taki a sani di a du anga i nai hati i. Ma ye gi en paadon fu soi taki ye fika ala sani gi Yehofa. Neen na a moo bun Sama di sa koti kuutu gi u. Ao seeka sani te a yuu fi en doo.’ Saide Yehofa e gi u taanga-sikin fu gi taawan paadon da u fika ala sani gi en?

8. Faw sa soi taki ai bigi gi u taki Yehofa e gi u paadon?

⁸ Te we gi taawan paadon, we soi taki ai bigi gi u taki Yehofa e gi u paadon. Wan leisi Yesesi be gi wan ageisitoli fu wan masaa di be taigi wan saafu taki a naabi fu pai a gaan paiman di a be meke neen moo. Ma aseefi saafu ya á be wani gi wan taa saafu paadon di be mu pai en wan pikin moni (Mat. 18:23-35). San Yesesi be wani leli wi anga a toli ya? A be wani soi u taki efu ai bigi gi u taki Yehofa e gi u paadon, wo de kabakaba fu gi taawan paadon (Ps. 103:9). Wan Wakititolen be taki: ‘Winsi omen leisi u gi u baala anga sisa paadon, toku noiti ao doo a gaan bun di Yehofa du gi u di a meke en Manpikin kon dede fu pai fu den sondu fu u.’

9. Sama Yehofa e gi paadon? (Mateyesi 6:14, 15)

⁹ Efu we gi taawan paadon, Yehofa o gi u paadon tu (Mat. 5:7; Yak. 2:13). Yesesi be soi wa sani ya kiin di a be e leli den disipel fi en fa fu begi. (Leisi Mateyesi 6:14, 15.) Fosi a ten fu Yesesi, Yehofa be soi wi anga a toli fu Yopu taki te we gi taawan paadon enseefi o gi u paadon. A omen hati sani Elifas, Bildad, anga Sofar be taigi Yopu. Toku Yehofa be taigi Yopu taki a be mu begi gi den man ya. Di Yopu du a sani ya, Yehofa belesi en.​—Yopu 42:8-10.

10. Sowtu takuu bakapisi a abi te we holi taawan na ati? (Efeisesama 4:31, 32)

¹⁰ Anga useefi we du te we holi taawan na ati. Te wi holi wan sama na ati, a leti enke u diki wan gaan ibi sani e sow. A sani ya e meke u nai piisii. Ma Yehofa sabi taki te u gi a sama paadon wo moo piisii, neen meke aa wani wi holi sama na ati. (Leisi Efeisesama 4:31, 32.) Ai taigi wi aini en Wowtu taki ‘wi ati á mu boon moo, wa mu ligei moo tu’ (Ps. 37:8). A omen wini wo fende te we wooko anga a sani di a taki ya. Efu we holi sama na ati, a sani ya sa tyai bunbun siki gi u (Odo 14:30). Efu wan sama diingi sani di e kii sama, neen a sidon e luku fu wan taa sama dede, neenseefi o kai dede, bika neen diingi a sani. A letiso a de te we holi sama na ati. A ná a sama o siki, a wi di e holi en na ati o siki. Neen meke u mu meke moiti fu gi a sama paadon da u fika a taki de, bika ao seefi o fende wini fu a sani ya (Odo 11:17). Efii gi a sama paadon yo boo. Yo man dini Yehofa anga piisii baka.

11. Te u luku san Beibel e taki, da sama abi a leti fu sitaafu sama fu den ogii di den e du? (Romesama 12:19-21)

¹¹ A Yehofa seefi o pai ala sama gi den ogii di den e du. Yehofa á gi wa wooko fu sitaafu sama, winsi den du wan hati sani  anga u. (Leisi Romesama 12:19-21.) Enke sondu libisama gaanse leisi u nai sabi fa sani de tuutuu, neen meke wa poi kuutu sani a wan letifasi (Heb. 4:13). Son leisi den fii fu we meke a taanga gi u fu denki enke fa Yehofa e denki tu. Neen meke Yehofa be meke apostel Yakowbesi sikiifi taki: ‘Te wan sama ati boon, ai du sani di Gadu á fende bun’ (Yak. 1:20). U mu e biibi taki ala yuu Yehofa o kuutu sani na a moo bun fasi.

12. Faw sa soi taki we fitoow Yehofa?

¹² Te we gi taawan paadon, we soi taki we fitoow Yehofa. A sani ya e soi taki we biibi taki Yehofa o puu ala den takuu bakapisi fu den ogii di sama e du anga u. A paamisi wi aini en Wowtu taki ‘sama naw membee den fositen sani moo. Den sani de naw kon a den pakisei moo tu’ (Yes. 65:17). Ma son leisi a wan gaan ogii wan sama e du anga u. I si enke yo poi gi a sama paadon, da i fika ala sani gi Yehofa? Wo poti pakisei a wantu sama di be poi du a sani ya, anga faw sa waka a den baka.

13-14. San a toli fu Tony anga José leli i?

¹³ A omen baala anga sisa meke moiti fu gi taawan paadon di be du wan hati sani anga den. Sowtu wini den fende di den du a sani ya?

¹⁴ Tony * a wan baala di e tan aini Filipeinikondee. Fosi a be toon wan Kotoigi, wan man den e kai José be kii wan fu den gaan baala fi en. A pisiten de Tony a be gaan ogiiman, neen meke a be de namonamo fu du wan sani anga José. Ma lanti be sooto José kaba fu a ogii di a be du. Bakaten di José komoto a sitaafu-osu Tony sweli taki a musu kii en namo. Neen meke a go bai wan goni fi en. Ma bakaten Tony bigin sutudeli Beibel anga den Yehofa Kotoigi. A taki: ‘Di mi sutudeli go wan pisi, mi kon fusutan taki mi abi fu kengi mi manii anga a fasi fa mi be e denki. Mi be leli tu taki mi be abi fu gi taawan paadon.’ Bakaten Tony dopu enke wan Yehofa Kotoigi. A meke moiti  te a toon wan owluman aini a kemeente tu. A foondoo di a yee taki José seefi toon wan Kotoigi. Di den tu man ya miti, den poolo baasa denseefi. Tony taigi José taki a gi en paadon. Tony taki di a gi en baala paadon, en ati koo. A be e fii bun. Yehofa belesi en fu di a be de kabakaba fu gi taawan paadon.

15-16. San a toli fu Peter anga Sue e leli i?

¹⁵ Aini a yali 1985 wan gaan sani miti Peter anga Sue. A komakandaa den de, neen den yee wan sani piki gbung! Wan man be poti wan bom aini a Kownukondee zaal. Sue kisi bunbun mankei neen ain anga en yesi. Aa be poi sumee sani moo tu. * Son leisi Peter anga Sue be e akisi denseefi taki: ‘Sama sa du a gaan ogii ya anga u?’ Baka wantu yali, sikowtu kisi a man di be du a sani ya. Den poti en a sitaafu-osu fi en hii libi langa. Di sama akisi Peter anga Sue efu den gi a man paadon, den taki: ‘Yehofa e leli u taki wa mu holi sama na ati, bika a sani ya sa tyai kusumi anga siki gii. Neen meke di a sani ya pasa, u begi Yehofa fu a yeepi u fu puu a atiboon aini wi ati. Na a sani ya yeepi u fu piisii baka.’

¹⁶ A be makiliki gi a toowpaa ya fu gi a man paadon? Nono. Den taki: ‘Son leisi wi ati e boon te we si sowtu bakapisi a sani ya tyai gi Sue. Ma u nai tan poti pakisei na a sani ya, neen meke a gawgaw we kisi useefi baka. Te u luku a fasi fa we fii nownow, u sabi taki efu a man ya toon wan baala fu wi aini a ten di e kon, wo bali wadaa gi en anga piisii. A sani di miti u ya leli u taki te ye wooko anga den leli fu Beibel, ye moo piisii. I nai booko yu ede naamo anga sani di i sabi taki ya poi kengi. Wan taa sani di e meke u piisii, na a sabi di u sabi taki dyonson Yehofa o puu ala den takuu bakapisi fu den sani di e miti u nownow.’

17. San a toli fu Myra e leli i?

 ¹⁷ Di Myra bigin sutudeli, a be toow kaba. En anga en man be abi tu pikin. A man á be wani yee sani fu waaleiti. Bakaten a man waka gi Myra, neen a fika en go teke wan taa uman. Myra taki: ‘Di mi man fika mi anga den tu pikin, mi fii fa sama e fii te wan sama di den lobi du ogii anga den. Mi á be poi biibi taki a sani ya miti mi. Ná pikin hati a hati mi. Son yuu mi be e kee. Son leisi na atiboon a be e gi mi. Ma i be abi dei tu pe mi be e fii enke a mi du meke a gwe.’ Winsi fa a toow booko bakaten, toku a sani di a man fu Myra be du anga en be e hati en ete. A taki: ‘A omen mun langa mi be e kusumi, mi ati be e boon neen ete. Baka wan pisiten mi kon si taki efu mi á daai wan ana, den fii ya be o poli mi anga Yehofa. Den be o poli mi anga den baala anga sisa aini a kemeente tu.’ Neen meke Myra gi a man fi en paadon aini en ati. A nai winsi ogii gi en tu. Ai howpu taki wan dei enseefi sa kon dini Yehofa. A poti ala en pakisei a den sani di Yehofa paamisi wi aini a ten di e kon. Winsi fa neen wawan de, toku a yeepi den tu pikin fi en fu dini Yehofa. Nownow neen anga den pikin anga den osufamii fu den e dini Yehofa makandaa.

18. San u sabi fu Yehofa?

¹⁸ Ai bigi gi u taki a naw Yehofa gi a faantiwowtu fu kuutu sama. Neen na a moo bun sama di sa koti kuutu gi u (Rom. 14:10-12). Neen meke u sa biibi taki a fasi fa ai kuutu sani na a moo bun wan (Gen. 18:25; 1 Kow. 8:32). Ala yuu ai du sani a wan letifasi.

19. San Yehofa o du aini a ten di e kon?

¹⁹ We angii fu a dei pe Yehofa o puu ala den takuu bakapisi fu a sondu fu Adan. A ten de nawan maiki o de aw sikin moo. U naw go e pakisei den sani di be miti u moo tu (Ps. 72:12-14; Openb. 21:3, 4). Ma winsi fa a ten de á doo ete, toku Yehofa e yeepi u fu piisii nownow winsi san e miti u. Fu di a meke wi anga den manii fi en meke useefi sa gi taawan paadon te den du wan hati sani anga u. A sani ya e meke u piisii.