1. Gǎnjɛwú tɛ́ Jehovah ka ná hwɛhutɔ́ ɖěɖěe lɛ́ kɔ sín hwɛ yětɔn lɛ́ gúdo lɛ́ é?

 JEHOVAH nyí Gbɛɖótɔ́ mǐtɔn, Sɛ́ndótɔ́ mǐtɔn bo lɛ́ nyí Hwɛɖɔtɔ́ mǐtɔn có, é wɛ lɛ́ nyí Tɔ́ jǐxwé tɔn mǐtɔn wǎnyíyínɔ ɔ. (Ðɛh. 100:3; Eza. 33:22, nwt) Ényí mǐ hu hwɛ dó Jehovah bo ka lɛ́ kɔ sín hwɛ mǐtɔn lɛ́ gúdo bǐ mlɛ́mlɛ́ ɔ, é ɖó acɛ, bo lɛ́ ɖó jlǒ ɔ, bo ná sɔ́ hwɛ kɛ mǐ. (Ðɛh. 86:5) Jehovah ná mǐ gǎnjɛwú élɔ́ e wǎnyíyí kpé é gbɔn Gbeyíɖɔ Ezayíi jí: “Ényí hwɛ mitɔn lɛ́ ná bo myá cɛ́cɛ́ ɔ, yě ná wé tété avɔkanfún ɖɔhun.”—Eza. 1:18.

2. Ényí mǐ jló ná nɔ fífá mɛ xá mɛ ɖěvo lɛ́ ɔ, étɛ́ mǐ ka ɖó ná wa?

² Ðó mǐ nyí hwɛhutɔ́ wútu ɔ, mǐ mɛ bǐ wɛ nɔ jɛ do nú mɛ ɖěvo lɛ́ ɖo xó kpó walɔ kpó mɛ. (Ja. 3:2) Amɔ̌, énɛ́ wɛ ná zɔ́n bɔ xɔ́ntɔn zunzun xá yě ná gló ǎ. Mǐ sixú kpé wú, ényí mǐ kplɔ́n bo nɔ sɔ́ hwɛ kɛ mɛ ɔ nɛ́. (Nǔx. 17:9; 19:11; Mat. 18:21, 22) Jehovah jló ɖɔ mǐ ní nɔ sɔ́ agɔ kléwún kléwún e mǐ nɔ jɛ dó mǐɖée lɛ́ é kɛ mǐɖée. (Koló. 3:13) Mǐ ɖó hwɛjijɔ ɖagbe e wú mǐ ná nɔ wa mɔ̌ é. È ná ɖɔ ɔ, “hwɛsɔ́kɛmɛ nɔ cikɔ nú [Jehovah] ǎ.”—Eza. 55:7.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná ɖɔ xó dó lěe gbɛtɔ́ hwɛhutɔ́ lɛ́ sixú nɔ sɔ́ hwɛ kɛ mɛ Jehovah ɖɔhun gbɔn é jí. Hwɛ ɖětɛ́ lɛ́ mǐ ka ɖó ná nɔ ɖɔ nú mɛxó agun tɔn lɛ́? Étɛ́wú Jehovah ka jló ɖɔ mǐ ní nɔ sɔ́ hwɛ kɛ mɛ ɖěvo lɛ́? Étɛ́ kpɔ́ndéwú nǔɖitɔ́ hǎtɔ́ mǐtɔn e se wǔvɛ́ tawun ɖó nǔwanyido mɛ ɖěvo lɛ́ tɔn wú é ɖé lɛ́ tɔn ka sixú kplɔ́n mǐ?

4. (a) Ényí mɛsɛntɔ́ Jehovah tɔn ɖé hu hwɛ syɛ́nsyɛ́n ɔ, étɛ́ é ka ɖó ná wa? (b) Ényí mɛxó agun tɔn lɛ́ jínjɔ́n ayǐ xá hwɛhutɔ́ ɖé ɔ, azɔ̌ tɛ́ yě ka nɔ wa?

⁴ Ényí mɛɖé hu hwɛ syɛ́nsyɛ́n ɔ, mǐ ɖó ná ɖɔ nú mɛxó agun tɔn lɛ́. 1 Kɔlɛ́ntinu lɛ́ 6:9, 10 ɖɔ hwɛ syɛ́nsyɛ́n mɔ̌hun ɖé lɛ́ xó. Hwɛ syɛ́nsyɛ́n lɛ́ huhu ɔ, afɔ tɛ sɛ́n Mawu tɔn lɛ́ jí ɖo ali e nylá tawun lɛ́ é nu wɛ nɔ nyí mɔ̌. Ényí klisánwun ɖé hu hwɛ mɔ̌hun ɔ, é ɖó ná xo ɖɛ sɛ́dó Jehovah Mawu dó byɔ́ hwɛsɔ́kɛ, lobo lɛ́ yi ɖɔ nú mɛxó agun tɔn lɛ́. (Ðɛh. 32:5; Ja. 5:14) Azɔ̌ tɛ́ mɛxó agun tɔn lɛ́ ka nɔ wa? Jehovah kɛ́ɖɛ́ wɛ ɖó acɛ bo nɔ sɔ́ hwɛ kɛ mɛ bǐ mlɛ́mlɛ́ gbɔn vɔ̌sísá gbɛxɔnúmɛ tɔn ɔ jí. * Amɔ̌, Jehovah sɔ́ azɔ̌ d’así nú mɛxó agun tɔn lɛ́, énɛ́ wɛ nyí ɖɔ yě ná zán Biblu dó wá gbeta ɔ kɔn ɖɔ hwɛhutɔ́ ɔ sixú kpo ɖo agun ɔ mɛ alǒ gbɔ. (1 Kɔ. 5:12, 13) Bo ná dó kpé azɔ̌ énɛ́ wú ɔ, nǔ e yě nɔ wa lɛ́ é ɖokpó wɛ nyí ɖɔ yě nɔ ba xósin nú nǔkanbyɔ́ élɔ́ lɛ́: É ka tuun bo hu hwɛ ɔ wɛ a? Mɛ ɔ ka ko ɖo linlin wɛ bá wa nǔ nyanya ɖ’ayǐ wɛ a? Sín hwenu línlín ɖíe wɛ é ko ɖo hwɛ syɛ́nsyɛ́n ɔ hu wɛ a? Tají hú gǎn ɔ, kúnnuɖenú ɖé lɛ́ ka xlɛ́ ɖɔ é lɛ́ kɔ sín hwɛ tɔn lɛ́ gúdo nǔgbó a? Nǔɖé lɛ́ ka ɖe bo xlɛ́ ɖɔ Jehovah sɔ́ hwɛ kɛ ɛ a?—Mɛ. 3:19.

5. Nyɔ̌ná tɛ́ lɛ́ azɔ̌ e mɛxó agun tɔn lɛ́ nɔ wa é ka nɔ hɛn wá?

⁵ Ényí mɛxó agun lɛ́ jínjɔ́n ayǐ xá hwɛhutɔ́ ɖé ɔ, nǔ e gbé yě nɔ nya é wɛ nyí ɖɔ yě ní wá gbeta ɖé kɔn bónú é ní sɔgbe xá gbeta e kɔn Jehovah ko wá dó hwɛhutɔ́ ɔ wú é. (Mat. 18:18) Nɛ̌ tuto énɛ́ ka nɔ wa ɖagbe nú agun ɔ gbɔn? Tuto énɛ́ nɔ d’alɔ bɔ è nɔ mɔ nǔ jɛ wú ɖɔ è ɖe hwɛhutɔ́ ɖěɖěe gbɛ́ kɔ lɛ́ sín hwɛ yětɔn lɛ́ gúdo, bo sixú wa nǔ dó lɛ̌ngbɔ́ xɔ akwɛ́ Jehovah tɔn lɛ́ wú lɛ́ é sín agun ɔ mɛ. (1 Kɔ. 5:6, 7, 11-13; Ti. 3:10, 11) Énɛ́ sixú lɛ́ d’alɔ hwɛhutɔ́ ɔ, bɔ é ná lɛ́ kɔ sín hwɛ tɔn lɛ́ gúdo, lobo ɖu hwɛsɔ́kɛmɛ Jehovah tɔn sín le. (Luk. 5:32) Mɛxó agun tɔn lɛ́ nɔ xo ɖɛ dó hwɛhutɔ́ e lɛ́ kɔ sín hwɛ tɔn lɛ́ gúdo é tamɛ, bo nɔ byɔ́ Jehovah ɖɔ é ní d’alɔ ɛ bónú é ní lɛ́ jɛ ganjí ɖo gbigbɔ lixo.—Ja. 5:15.

6. Ényí è ɖe mɛɖé sín agun mɛ ɔ, Jehovah ka sixú lɛ́ wá sɔ́ hwɛ kɛ ɛ a? Tínmɛ.

⁶ Mǐ ní ɖɔ ɖɔ hwɛhutɔ́ ɖé kún ko lɛ́ kɔ sín hwɛ tɔn lɛ́ gúdo hwenu e mɛxó agun tɔn lɛ́ jínjɔ́n ayǐ xá ɛ é ó. Ðo ninɔmɛ énɛ́ mɛ ɔ, è ná ɖe e sín agun ɔ mɛ. Ényí to ɔ sín sɛ́n ɖé wɛ é gba ɔ, mɛxó agun tɔn lɛ́ ná cyɔ́n alɔ jǐ tɔn bónú é ná gɔn wǔvɛ́ nǔ e é wa lɛ́ é tɔn se ǎ. Jehovah ná acɛ acɛkpikpa e ɖo to nu lɛ́ é bónú yě ná ɖɔ hwɛ, lobo lɛ́ dɔn tó nú mɛ ɖěbǔ e gba sɛ́n é; é lɛ́ kɔ sín hwɛ tɔn lɛ́ gúdo alǒ gbɔ ɔ nɛ́. (Hlɔ̌. 13:4) É ɖo mɔ̌ có, ényí hwɛhutɔ́ ɔ wá mɔ ɖɔ nǔ e émí wa é nylá, bo ɖyɔ́ linlin tɔn kpó nǔwalɔ tɔn lɛ́ kpó ɔ, Jehovah ɖo gbesisɔmɛ bo ná sɔ́ hwɛ kɛ ɛ. (Luk. 15:17-24) Ényí hwɛ e mɛ ɔ hu lɛ́ é ná bo tlɛ syɛ́n tawun ɔ, nǔ ná nyí mɔ̌.—2 Tan 33:9, 12, 13; 1 Tim. 1:15.

7. Ali tɛ́ nu mǐ ka sixú sɔ́ hwɛ kɛ mɛ e hu hwɛ dó mǐ é ɖe?

⁷ Tuun e mǐ tuun ɖɔ é kún nyí mǐ wɛ ná wá gbeta ɔ kɔn ɖɔ Jehovah ná sɔ́ hwɛ kɛ hwɛhutɔ́ ɖé alǒ gbɔ ó é zɔ́n bɔ agbɔ̌n mǐtɔn jɛ do tawun. É ka ɖo mɔ̌ có, gbeta ɖé ɖe bɔ mǐdɛɛ lɛ́ wɛ ɖó ná wá kɔn. Ðětɛ́ ka wɛ? Ðo ninɔmɛ ɖé lɛ́ mɛ ɔ, é sixú nyí ɖɔ mɛɖé wɛ hu hwɛ dó mǐ, é tlɛ sixú nyí hwɛ syɛ́nsyɛ́n, bo ka sa vo lobo byɔ́ hwɛsɔ́kɛ. Ðo ninɔmɛ ɖěvo lɛ́ mɛ ɔ, mɛ ɔ sixú gɔn mɔ̌  wa. É ná bo tlɛ nyí mɔ̌ ɔ, mǐ sixú wá gbeta ɔ kɔn bo ná sɔ́ hwɛ kɛ mɛ ɔ, énɛ́ wɛ nyí ɖɔ mǐ sixú wá gbeta ɔ kɔn bo ná gɔn hinhɛn ɛ dó xomɛ, lobo lɛ́ jó xomɛsin dó. Nǔgbó ɔ, énɛ́ sixú byɔ́ hwenu kpó gǎndídó kpó, tají ɔ, ényí nǔ ɔ vɛ́ nú mǐ tawun ɔ nɛ́. Atɔxwɛ (Flanségbe) 15 septembre 1994 ɖɔ: “Ényí mǐ sɔ́ hwɛ kɛ mɛ e hu hwɛ dó mǐ é ɖé ɔ, xlɛ́xlɛ́ wɛ énɛ́ ɖe ɖɔ mǐ myɔ́ nukún dó hwɛ e é hu dó mǐ é ǎ. Klisánwun e sɔ́ hwɛ kɛ mɛ é nɔ gán jɛ wú ɖɔ Jehovah ná ɖɔ hwɛ ɔ, bɔ nǔ bǐ ná vɔ ɖ’é wú. É wɛ nyí mɛ e nɔ ɖɔ hwɛ jlɔ́jlɔ́ ɖo wɛ̌kɛ́ ɔ bǐ mɛ é, bo ná ɖɔ hwɛ jlɔ́jlɔ́ nú mǐ ɖo hwetɔnnu.” Étɛ́wú Jehovah ka nɔ dó wǔsyɛ́n lanmɛ nú mǐ ɖɔ mǐ ní nɔ sɔ́ hwɛ kɛ mɛ, bo nɔ lɛ́ ɖeji dó émí wú ɖɔ émí ná ɖɔ hwɛ jlɔ́jlɔ́ nú mǐ?

8. Nɛ̌ hwɛ sísɔ́ kɛ mɛ ka nɔ xlɛ́ ɖɔ nǔbláwǔkúnúmɛ Jehovah tɔn nɔ su nukún mǐtɔn mɛ gbɔn?

⁸ Hwɛ sísɔ́ kɛ mɛ nɔ xlɛ́ ɖɔ nǔ nɔ su nukún mǐtɔn mɛ. Ðo lǒ Jezu tɔn lɛ́ ɖokpó mɛ ɔ, é sɔ́ Jehovah jlɛ́ dó gǎn ɖé wú; gǎn énɛ́ sɔ́ axɔ́ ɖaxó e mɛsɛntɔ́ tɔn lɛ́ ɖokpó ɖu d’è, bo ma sixú sú ǎ é kɛ ɛ. É ɖo mɔ̌ có, mɛsɛntɔ́ énɛ́ e è sɔ́ axɔ́ tɔn kɛ ɛ é kú nǔbláwǔ nú mɛsɛntɔ́ e ɖu axɔ́ kpɛví tíwúntíwún ɖé d’è é ǎ. (Mat. 18:23-35) Étɛ́ kplɔ́n mǐ wɛ Jezu ka ɖe? Ényí nǔbláwǔ ɖaxó e Jehovah nɔ kú nú mǐ é nɔ su nukún mǐtɔn mɛ nǔgbó nǔgbó ɔ, énɛ́ ná nɔ sísɛ́ mǐ bɔ mǐ ná nɔ sɔ́ hwɛ kɛ mɛ ɖěvo lɛ́. (Ðɛh. 103:9) Atɔxwɛ ɖɔ xó dó énɛ́ wú gbɔn lě ɖo xwe ɖé lɛ́ ɖíe: “Ényí mǐ ná bo tlɛ nɔ sɔ́ hwɛ kɛ nɔzo mǐtɔn lɛ́ azɔn nabí ɖěbǔ ɔ, é sixú sɔ azɔn nabí e Mawu nɔ sɔ́ hwɛ kɛ mǐ, bo nɔ lɛ́ kú nǔbláwǔ nú mǐ gbɔn Klísu jí é gbeɖé ǎ.”

9. Mɛ̌ mɛ̌ e Jehovah ka nɔ kú nǔbláwǔ ná? (Matíe 6:14, 15)

⁹ È ná sɔ́ hwɛ kɛ mɛ ɖěɖěe nɔ sɔ́ hwɛ kɛ mɛ lɛ́ é. Jehovah nɔ kú nǔbláwǔ nú mɛ ɖěɖěe nɔ kú nǔbláwǔ nú mɛ lɛ́ é. (Mat. 5:7; Ja. 2:13) Hwenu e Jezu kplɔ́n ahwanvú tɔn lɛ́ lěe yě ná nɔ xo ɖɛ gbɔn é ɔ, é ɖe énɛ́ xlɛ́ céɖécéɖé. (Xa Matíe 6:14, 15.) Nǔ e Jehovah ɖɔ nú mɛsɛntɔ́ tɔn Jɔbu é kplɔ́n nǔ mɔ̌hun ɖé mǐ. Xógbe vɛ́sin ɖěɖěe Elifázi, Biludádi kpó Sofáa kpó dó nú nya gbejínɔtɔ́ énɛ́ é vɛ́ n’i tawun. Jehovah ɖɔ nú Jɔbu ɖɔ é ní xo ɖɛ dó ta yětɔn mɛ. Ée Jɔbu wa mɔ̌ gúdo é ɔ, Jehovah kɔn nyɔ̌ná dó jǐ tɔn.—Jɔb. 42:8-10.

10. Étɛ́wú mɛ hinhɛn dó xomɛ ka nɔ wa nǔ dó mɛ wú? (Efɛ́zinu lɛ́ 4:31, 32)

¹⁰ Mɛ hinhɛn dó xomɛ nɔ wa nǔ dó mɛ wú. Mɛ hinhɛn dó xomɛ cí agban kpinkpɛn ɖé ɖɔhun, bɔ Jehovah nɔ ba ɖɔ mǐ ní zlɔ́n agban énɛ́ bá mɔ tɛn dó ɖu vǐví fífá e mɔ̌ wiwa nɔ hɛn wá é tɔn. (Xa Efɛ́zinu lɛ́ 4:31, 32.) É byɔ́ mǐ ɖɔ mǐ ní ‘jó xomɛsin dó, bo jó hunnylánylá dó.’ (Ðɛh. 37:8) Nǔnywɛ́nú wɛ é nyí ɖɔ mǐ ní xwedó wěɖexámɛ énɛ́. Mɛ hinhɛn dó xomɛ sixú wa nǔ dó agbaza mǐtɔn wú, bo lɛ́ wa nǔ dó mǐ wú ɖo taglomɛ. (Nǔx. 14:30) Ényí mǐ hɛn mɛ e wa nǔ nyi do nú mǐ é dó xomɛ ɔ, é nɔ wa nǔ ɖě n’i ǎ, lěe ényí mǐ nu nǔ e ɖó aɖǐ é ɔ, é ma ná wa nǔ ɖě n’i ǎ gbɔn é. Ényí mǐ ka nɔ sɔ́ hwɛ kɛ mɛ ɖěvo lɛ́ ɔ, ɖagbe wa nú mǐɖée wɛ mǐ ɖe nɛ́. (Nǔx. 11:17) Mǐ nɔ ɖó fífá ayi mɛ tɔn, lobo nɔ lɛ́ kpé wú bo nɔ kpo ɖo sinsɛnzɔ́ mǐtɔn wa nú Jehovah wɛ.

11. Étɛ́ Biblu ka ɖɔ dó hlɔnbiba wú? (Hlɔ̌manu lɛ́ 12:19-21)

¹¹ Jehovah wɛ nɔ ba hlɔn. Jehovah ná mǐ acɛ bónú mǐ ná ba hlɔn hwenu e mɛɖé hu hwɛ dó mǐ é ǎ. (Xa Hlɔ̌manu lɛ́ 12:19-21.) Ðó nukúnnúmɔjɛnǔmɛ mǐtɔn ɖó dogbó, bo ma ka nɔ lɛ́ sɔgbe hwebǐnu ǎ  wútu ɔ, mǐ sixú ɖɔ hwɛ bɔ nǔ bǐ ná vɔ ɖ’é wú Mawu ɖɔhun ǎ kpowun bɔ xó fó. (Ebl. 4:13) Gɔ́ ná ɔ, hweɖélɛ́nu ɔ, mǐ nɔ ná tɛn lěe nǔ nɔ cí nú mǐ é bɔ é nɔ xlɛ́ ali mǐ nyi do; énɛ́ sixú zɔ́n b’ɛ ná vɛ́ wǔ nú mǐ bɔ mǐ ná tuun nǔ ɖagbe e mǐ ná wa é. Jehovah sɔ́ dó ayi mɛ nú Jaki, bɔ é wlán ɖɔ: “Mɛ e sin xomɛ ɔ nɔ wa nǔ e sɔgbe ɖo Mawu nukúnmɛ é ǎ.” (Ja. 1:20) Mǐ sixú kú d’é jí ɖɔ Jehovah ná wa nǔ kpó hwɛjijɔ kpó, bo ná mɔ nǔ jɛ wú ɖɔ è ɖɔ hwɛ jlɔ́jlɔ́ nú mǐ.

12. Nɛ̌ mǐ ka sixú xlɛ́ ɖɔ mǐ ɖeji dó hwɛjijɔ Jehovah tɔn wú gbɔn?

¹² Hwɛ sísɔ́ kɛ mɛ nɔ xlɛ́ ɖɔ mǐ ɖeji dó hwɛjijɔ Jehovah tɔn wú. Mǐ nɔ xlɛ́ ɖɔ mǐ ɖeji dó Jehovah wú ɖɔ é ná jlá nǔ e hwɛhuhu hɛn gblé lɛ́ é bǐ ɖó, ényí mǐ jó xó ɔ dó alɔ mɛ n’i ɔ nɛ́. Ðo gbɛ yɔ̌yɔ́ e sín akpá é dó nú mǐ é mɛ ɔ, mǐ sɔ́ ná flín akpa e è dó mǐ wú ɖo lěe nǔ nɔ cí nú mɛ é linu lɛ́ é ǎ; “yě sɔ́ ná wá ayi mɛ nú [mǐ gbeɖé] ǎ.” (Eza. 65:17) Amɔ̌, ényí nǔ ɔ vɛ́ nú mǐ tawun ɔ, é ka sixú nyɔ́ bló ɖɔ mǐ ní jó xomɛsin dó, bo lɛ́ gɔn mɛ hɛn dó xomɛ dóó a? Mǐ ní ɖɔ xó dó lěe mɛɖé lɛ́ kpé wú bo wa mɔ̌ gbɔn é jí.

13-14. Étɛ́ hwɛ e Tony sɔ́ kɛ José é ka kplɔ́n we?

¹³ Nɔví súnnu kpó nɔví nyɔ̌nu kpó mǐtɔn lɛ́ gěgé ko wá gbeta ɔ kɔn bo sɔ́ hwɛ kɛ mɛ, ényí nǔ e mɛ ɖěvo lɛ́ wa nyi do nú yě é ná bo tlɛ vɛ́ nú yě tawun ɔ nɛ́. Ée yě wa mɔ̌ é ɔ, nyɔ̌ná tɛ́ lɛ́ sín vǐví yě ka ɖu?

¹⁴ Xwe mɔ̌kpán jɛ nukɔn nú hwenu e Tony * e nɔ nɔ Philippines é mɔ nǔgbó ɔ é ɔ, é se ɖɔ nya e nɔ nyí José é hu fofó émítɔn lɛ́ ɖokpó. Hwe ɔ nu ɔ, Tony nɔ sin xomɛ tawun, bo nɔ lɛ́ xo dǎka, énɛ́ wú ɔ, é jló ná ba hlɔn. È wlí José, bo dó è gan ɖó dǎka e é xo é wú. Nukɔnmɛ hwenu e è ɖe José tɔ́n sín gankpá mɛ é ɔ, Tony kán ɖ’é jí bo ná ba ɛ mɔ, lobo hu i. Énɛ́ wú ɔ, é xɔ tú ɖokpó. Hwe ɖokpó ɔ nu ɔ, Tony jɛ Biblu kplɔ́n xá Kúnnuɖetɔ́ Jehovah tɔn lɛ́ jí. É ɖɔ: “Ée un ɖo Biblu kplɔ́n wɛ é ɔ, un kplɔ́n ɖɔ un ɖó ná húzú mɛ alɔkpa e un nyí é kpó lěe un nɔ wa nǔ gbɔn é kpó; énɛ́ byɔ́ ɖɔ má jó xomɛsin dó.” Hwenu ɖo yiyi wɛ é ɔ, Tony bló batɛ́mu, bɔ  nukɔnmɛ ɔ, é wá húzú mɛxó agun tɔn. Hwenu e é se ɖɔ José lɔ bló batɛ́mu é ɔ, dǒ nukún lěe é ná ko jí wǔ n’i sɔ é mɛ kpɔ́n! Ée yě mɛ we lɛ́ mɔ yěɖée é ɔ, yě zunfán yěɖée bɔ Tony ɖɔ nú José ɖɔ émí sɔ́ hwɛ kɛ ɛ. Tony ɖɔ ɖɔ hwɛ e émí sɔ́ kɛ José é zɔ́n bɔ émí ɖ’awǎjijɛ tawun, bo kún tlɛ sixú tínmɛ lěe nǔ cí nú émí é ó. É ɖo wɛn ɖɔ Jehovah kɔn nyɔ̌ná dó jlǒ e Tony ɖó bo sɔ́ hwɛ kɛ mɛ é jí.

15-16. Étɛ́ hwɛ e Peter kpó Sue kpó sɔ́ kɛ mɛ ɖo nǔ e gbo yě é mɛ é ka kplɔ́n we?

¹⁵ Ðo 1985 ɔ, Peter kpó Sue kpó ɖo kplé jí ɖo kpléxɔ Axɔ́súɖuto ɔ tɔn ɖé mɛ, bɔ ajijimɛ kpowun ɔ bɔ̌nbu ɖé wú. Nya ɖé wɛ sɔ́ bɔ̌nbu ɔ dó kpléxɔ ɔ mɛ. Sue se wǔvɛ́ tawun. É tlɛ sɔ́ sixú nɔ lɛ́ se nǔ wán ǎ. * Peter kpó Sue kpó nɔ kanbyɔ́ yěɖée hwɛhwɛ ɖɔ: ‘Mɛ nǎhún ka dó nǔ baɖabaɖa énɛ́ sin?’ Xwe mɔ̌kpán gúdo ɔ, è wá wlí nǔdósintɔ́ énɛ́ e ma nyí Jehovah sɛntɔ́ ǎ é, bɔ é ná sɛn gan nú gbɛhwenu tɔn bǐ. Ée è wá kanbyɔ́ Peter kpó Sue kpó ɖɔ yě ka sɔ́ hwɛ kɛ nya ɔ a jí é ɔ, yě ɖɔ: “Jehovah kplɔ́n mǐ ɖɔ ényí mǐ nɔ sin xomɛ, bo nɔ lɛ́ hɛn mɛ dó xomɛ ɔ, é sixú wa nǔ dó mǐ wú ɖo agbaza kpó lěe nǔ nɔ cí nú mǐ é kpó linu, bo lɛ́ wa nǔ dó mǐ wú ɖo taglomɛ. Énɛ́ wú ɔ, nǔ ɔ jɛ gúdo tlóló é ɔ, mǐ byɔ́ Jehovah ɖɔ é ní d’alɔ mǐ bónú mǐ ná jó xomɛsin dó, lobo zán gbɛ mǐtɔn ɖo fífá mɛ.”

¹⁶ É ka bɔ wǔ nú yě bónú yě ná sɔ́ hwɛ kɛ nya énɛ́ a? É bɔ wǔ nú yě hwebǐnu ǎ. Yě ɖɔ gɔ́ ná ɖɔ: “Káká jɛ din ɔ, ényí Sue jɛ wǔvɛ́ se jí ɖó wǔ e é gblé lɛ́ é wú ɔ, xomɛ nɔ lɛ́ sin mǐ. Amɔ̌, mǐ nɔ ɖo tamɛ lin d’é wú wɛ magbokɔ ǎ, énɛ́ wú ɔ, linlin énɛ́ lɛ́ nɔ yá wǔ bú. Nǔgbó ɔ, mǐ sixú ɖɔ kpó ayi bǐ kpó ɖɔ ényí nǔdósintɔ́ ɔ wá húzú nɔví mǐtɔn gbeɖé ɔ, mǐ ná yí i kpó akpakpa sɔ́ mɛ kpó. Nǔ énɛ́ e jɛ é kplɔ́n mǐ ɖɔ ényí mǐ nɔ xwedó nǔgbódodó Biblu tɔn lɛ́ ɔ, mǐ nɔ jɛ mǐɖée sí. Nǔgbó ɔ, nǔgbódodó Biblu tɔn lɛ́ zɔ́n bɔ mǐ jɛ mǐɖée sí ɖo ali gěgé nu hú gǎn lěe mǐ sixú ɖó nukún tɔn gbɔn é! Tuun e mǐ tuun ɖɔ zaanɖé din ɔ,  Jehovah ná ɖe wǔvɛ́ lɛ́ bǐ síin é lɔ nɔ dó gbɔ nú mǐ.”

17. Étɛ́ hwɛ e Myra sɔ́ kɛ mɛ ɖo nǔ e gbo è é mɛ é ka kplɔ́n we?

¹⁷ Myra ko d’asú bo lɛ́ ɖó vǐ we cóbó wá kplɔ́n nǔgbó ɔ. Asú tɔn yí gbe nú nǔgbó ɔ ǎ. É wá su hweɖénu bɔ é ba nyɔ̌nu ɖěvo, bo jó xwédo ɔ dó. Myra ɖɔ: “Hwenu e asú ce jó nyi kpó vǐ mǐtɔn we lɛ́ kpó dó é ɔ, lěe nǔ nɔ cí nú mɛ gěgé hwenu e mɛvívɛ́ yětɔn ɖé flú yě é wɛ é cí nú nyi lɔ; ayi ce xo akpa, un nɔ xo nǔ kpɔ́n, bo byɔ́ aluwɛ mɛ; un nɔ dó hwɛ nyiɖée bo nɔ ɖɔ un ko nywɛ́ ɔ, lobɔ xomɛ nɔ lɛ́ sin mì.” Yě gbɛ́ yěɖée có, é kpo ɖo wǔvɛ́ se wɛ ɖó flú e è flú i é wútu. Myra ɖɔ gɔ́ ná ɖɔ: “Un nɔ linkpɔ́n mɛ nú sun mɔ̌kpán, bo nɔ lɛ́ sin xomɛ; un wá ɖ’ayi wú ɖɔ énɛ́ wa nǔ dó xɔ́ntɔn e un zun xá Jehovah kpó mɛ ɖěvo lɛ́ kpó é wú.” Myra ɖɔ ɖɔ émí jó xomɛsin dó, bo kún ba nú nǔ nyanya ɖě ní jɛ dó asú émítɔn xóxó ɔ jí ó. Nukúnɖíɖó tɔn wɛ nyí ɖɔ gbe ɖokpó ɔ, é ní wá sɛn Jehovah. Myra kpé wú bo sɔ́ ayi ɖó sɔgúdo jí. É nyí nɔ goɖokpónɔ có, é kplɔ́n vǐ tɔn we lɛ́ bɔ yě ɖo Jehovah sɛn wɛ. Égbé ɔ, Myra kpó vǐ tɔn lɛ́ kpó gɔ́ nú xwédo yětɔn lɛ́ ɖo Jehovah sɛn wɛ kpó awǎjijɛ kpó.

18. Ðó Jehovah wɛ nyí Hwɛɖɔtɔ́ Ðaxó bǐ ɔ wútu ɔ, jiɖe tɛ́ mǐ ka sixú ɖó dó wǔ tɔn?

¹⁸ Tuun e mǐ tuun ɖɔ é kún nyí mǐdɛɛ lɛ́ wɛ ná wá gbeta lěe è ná ɖɔ hwɛ mɛ ɖokpó ɖokpó tɔn gbɔn é tɔn kɔn ó é nɔ zɔ́n bɔ agbɔ̌n mǐtɔn nɔ jɛ do! Ðó Jehovah wɛ nyí Hwɛɖɔtɔ́ Ðaxó bǐ ɔ wútu ɔ, é ná kpé nukún dó azɔ̌ tají énɛ́ wú. (Hlɔ̌. 14:10-12) Mǐ sixú ɖeji bǐ mlɛ́mlɛ́ ɖɔ é ná ɖɔ hwɛ sɔgbe xá nǔgbódodó jlɔ́jlɔ́ tɔn e kúnkplá nǔ ɖagbe kpó nǔ nyanya kpó é hwebǐnu. (Bǐb. 18:25; 1 Axɔ́. 8:32) É ná wa nǔ agɔ gbeɖé ǎ!

19. Le tɛ́ lɛ́ hwɛ e Jehovah nɔ ɖɔ bɔ nǔ bǐ nɔ vɔ ɖ’é wú é ka ná hɛn wá?

¹⁹ Nǔ e hwɛhuhu gú e mǐ ɖu é hɛn gblé dó mǐ wú lɛ́ é ɔ, Jehovah ná ɖe bǐ síin mlɛ́mlɛ́. Mǐ ɖo te kpɔ́n hwenu e nǔ ná nyí mɔ̌ é kpó akpakpa sɔ́ mɛ kpó. Hwenɛ́nu ɔ, wǔvɛ́ e mǐ nɔ mɔ ɖo agbaza kpó lěe nǔ nɔ cí nú mɛ é kpó lixo lɛ́ é bǐ sín xó ná fó. (Ðɛh. 72:12-14; Nǔɖe. 21:3, 4) Yě sɔ́ ná wá ayi mɛ nú mǐ kpɔ́n gbeɖé ǎ. Ée mǐ ɖo te kpɔ́n hwenu ɖaaɖagbe énɛ́ é ɔ, é su nukún mǐtɔn mɛ tawun ɖɔ Jehovah ná mǐ nǔwúkpíkpé ɔ bɔ mǐ sixú xwedó kpɔ́ndéwú tɔn bo nɔ sɔ́ hwɛ kɛ mɛ.