1. Kisa Jéova di ki ka rasiré sa-ya ki péché é ki ka répanti ?

 JÉOVA sa nou Kréyatèr, Sa-la ki ka bay nou lalwa pou nou swiv, ké nou Jij. Mé i sa osi nou Papa annan syèl-a ki kontan nou (Ps. 100:3 ; Is. 33:22). Donk, non sèlman i pouvé pardonnen sa-ya ki ka répanti apré yé péché kont li, mé anplis di sa, a sa i anvi fè (Ps. 86:5). Men sa i di pou rasiré nou : « Menm si zòt péché rouj, yé ké divini blan kou lanèj » (Is. 1:18).

2. Kisa nou divèt fè si nou lé rété byen ké ròt-ya ?

² Kou nou pa parfè, nou tout ka di ouben fè bagaj ki pouvé fè ròt-ya mal (Jacq. 3:2). Mé si nou ka anprann pardonnen, nou pa ké pédi nou bon zanmi (Prov. 17:9 ; 19:11 ; Mat. 18:21, 22). Lò ròt-ya ka fè nou lapenn, Jéova lé nou pardonnen (Col. 3:13). Nou gen roun bon rézon pou fè l’ : Jéova li menm ka pardonnen nou « ké tout so tchò » (Is. 55:7).

3. Kisa nou ké wè annan sa artik-a ?

³ Annan sa artik-a, nou ké wè ki, menm si nou pa parfè, nou pouvé imité Jéova é pardonnen ròt-ya. Épi nou ké réponn sa késyon-yan : Ki kalité péché nou divèt fè ansyen-yan savé ? Poukisa Jéova ka doumandé nou pardonnen ròt-ya ? É kisa plizyèr frè ké sò ki rivé pardonnen roun bagaj ki té grav, pouvé anprann nou ?

4. a) Lò roun sèrvitèr Jéova ka fè roun péché ki grav, kisa i divèt fè ? b) Kisa ansyen-yan gen pou fè lò yé ka palé ké moun-an ki péché-a ?

⁴ Nou divèt di ansyen-yan lò roun moun fè roun péché ki grav. Nou ka trouvé sèrten annan sa péché-ya annan 1 Corinthiens 6:9, 10. Roun moun ka fè roun péché ki grav lò i ka dézobéyi lalwa Bondjé. Si roun krétyen ka fè sa kalité péché-a, i divèt priyè Jéova é i divèt alé wè ansyen-yan annan so asanblé (Ps. 32:5 ; Jacq. 5:14). Kisa ansyen-yan ké gen pou fè ? A Jéova rounso ki gen otorité pou pardonnen péché-ya, é i ka pardonnen gras a ranson-an *. Mé i ka doumandé ansyen-yan désidé, dapré sa Labib-a ka di, si moun-an ki fè péché-a pouvé rété annan asanblé-a (1 Cor. 5:12). Pou yé pouvé pran bon désizyon-an, yé ké divèt éséyé trouvé répons pou sa késyon-yan : Ès moun-an péché parèsprè ? Ès i éséyé séré so péché ? Ès i péché plizyèr kou épi pannan roun bon moman ? Pi enpòrtan ankò, ès annan sa i ka fè, i ka montré ki i ka vréman répanti ? É ès i gen prèv ki ka montré ki Jéova pardonnen l’ ? (Actes 3:19).

5. Lò ansyen-yan ka éséyé idé sa-ya ki péché, ki bénédiksyon tout asanblé-a ka jwenn ?

⁵ Lò ansyen-yan ka kontré ké moun-an ki péché-a, yé lé ki désizyon yé pran asou latè-a, a menm désizyon Bondjé ja pran annan syèl-a (Mat. 18:18). Poukisa a roun bon bagaj pou asanblé-a ? Sa ka protéjé asanblé-a paské péchèr-a ki pa ka répanti pa ka rété annan asanblé-a. I pa gen tan détenn asou brébi Jéova ki gen bokou valò pou li (1 Cor. 5:6, 7, 11-13 ; Tite 3:10, 11). Anplis di sa, sa pouvé idé roun moun ki péché répanti é Jéova pouvé pardonnen l’ (Luc 5:32). Ansyen-yan ké priyè pou roun moun ki péché é ki ka répanti é yé ké doumandé Jéova idé li ranjé so lanmityé ké li (Jacq. 5:15).

6. Lò roun moun èskominyé, ès i pa gen pyès pardon pou li ankò ?

⁶ É si lò ansyen-yan ka palé ké roun moun ki péché, moun-an pa lé répanti ? Si a konsa, ansyen-yan ké èskominyé l’. É si i dézobéyi lalwa péyi koté i ka rété-a, ansyen-yan pa ké protéjé l’. I ké trapé konsékans mové bagaj i fè-a. Jéova ka pèrmèt otorité-ya jijé é pini nenpòrt kimoun ki ka dézobéyi lalwa, ki i répanti ki i pa répanti (Rom. 13:4). Mé, si pita moun-an ka konprann ki sa i fè pa té bon, si i ka répanti ké tout so tchò épi ka chanjé so konpòrtman, Jéova ké pardonnen l’ menm si so péché té grav (2 Chron. 33:9, 12, 13 ; Luc 15:17-24 ; 1 Tim. 1:15).

7. Kisa sa lé di pardonnen roun moun ki péché kont nou ?

⁷ Nou byen kontan paské a pa nou ki ka désidé si roun moun ki péché ka mérité Jéova pardonnen l’ ! Mé lò roun moun péché kont nou, menm si sa i fè-a té grav, nou gen roun bagaj pou nou désidé. Ki bagaj ? Ki sa moun-an vini doumandé nou pardon, ki i pa vini doumandé nou pardon, nou pouvé désidé pardonnen li, sa lé di désidé pa tchenbé l’ asou nou tchò ouben pa rété faché ké li. Sa vré, sa pouvé pran tan é sa pouvé rèd, èspésyalman si moun-an fè nou  lapenn bokou. La Tour de Garde 15 sèptanm 1994 ka di : « Lò to ka pardonnen roun moun ki péché, sa pa lé di ki to dakò ké péché i fè-a. Roun krétyen ki ka pardonnen ka fè Jéova konfyans paské i savé ki i ké jijé sitiasyon-an parfètman. A li ki Jij annan tout inivèr-a é i ké fè jistis fèt o bon moman. » Poukisa Jéova ka doumandé nou pardonnen é lésé li jijé sitiasyon-an li menm ?

8. Si nou gen rékonésans pou mizérikòrd Jéova-a, kisa nou ké anvi fè ? Èspliké.

⁸ Lò nou ka pardonnen, nou ka montré ki nou gen rékonésans pou mizérikòrd Jéova-a. Annan roun èkzanp Jézi pran, i konparé Jéova ké roun mèt ki té gen roun èsklav ki té dévé l’ bokou soumaké. Mé kou sa èsklav-a pa té pouvé péyé, mèt-a di li lésé sa tonbé. Mé apré sa, sa èsklav-a pa aji ké mizérikòrd ké rounòt èsklav ki té dévé l’ lontan mwens soumaké (Mat. 18:23-35). Kisa sa ka anprann nou ? Si nou vréman gen rékonésans pou mizérikòrd Jéova-a, nou ké anvi pardonnen ròt-ya (Ps. 103:9). I gen plizyèr lannen, La Tour de Garde di roun bagaj entérésan : « Menm si nou ka pardonnen nou konpanyen roun patché fwa, nou pa ké janmen pardonnen ròt-ya menm fason Jéova ka pardonnen nou gras a Jézi Kris. »

9. Dapré Matthieu 6:14, 15, ké kimoun Jéova ka aji ké mizérikòrd ?

⁹ Jéova ké pardonnen sa-ya ki ka pardonnen. Jéova ka aji ké mizérikòrd ké sa-ya ki ka aji ké mizérikòrd (Mat. 5:7 ; Jacq. 2:13). A sa Jézi fè nou konprann lò i anprann so disip priyè (li Matthieu 6:14, 15). Nou ka wè menm lidé-a annan sa Jéova doumandé Jòb fè. Élifaz, Bildad ké Zofar té palé rèd ké Jòb, san i pa mérité sa, é sa té fè li bokou lapenn. Mé Jéova doumandé Jòb priyè pou yé. Apré Jòb fè sa, Jéova béni l’ (Job 42:8-10).

10. Poukisa nou ka randé nou kò malad lò nou ka tchenbé roun moun asou nou tchò ? (Éphésiens 4:31, 32).

¹⁰ Tchenbé roun moun asou nou tchò ka randé nou malad. Lò nou ka tchenbé roun moun asou nou tchò, a kousidiré nou té ka poté roun fardo byen lou. É Jéova lé nou jité sa fardo-a pou nou trapé roun soulajman (li Éphésiens 4:31, 32). I ka di nou : « Pa faché é pa fè mové kòlè » (Ps. 37:8). A roun bon bagaj si nou ka swiv sa konsèy-a. Lò nou ka tchenbé roun moun asou nou tchò, sa pa bon ni pou nou kò ni pou nou lèspri (Prov. 14:30). Lò to ka rété faché ké roun moun, a kousidiré to ka bwè pwézon : a pa moun-an ki péché kont to ki ka malad, a to menm ki ka malad. Parkont, lò nou ka pardonnen ròt-ya, a roun bon bagaj nou ka fè pou nou kò (Prov. 11:17). Nou ka jwenn lapè annan nou tchò é nou pouvé kontinyé sèrvi Jéova.

11. Kisa Romains 12:19-21 ka anprann nou asou lavanjans ?

¹¹ Lavanjans a di Jéova. Jéova pa ka bay nou drwa vanjé nou kò lò roun moun ka fè nou roun mové bagaj (li Romains 12:19-21). Kou nou pa parfè, nou pa ka wè tout bagaj. Donk nou pa pouvé jijé roun sitiasyon ké jistis kou Jéova ka fè l’ (Héb. 4:13). É détan, sa nou ka rousanti ka anpéché nou byen réfléchi. Jéova fè Jak ékri : « Lò roun moun kòlè, i pa ka fè sa ki jis douvan Bondjé » (Jacq. 1:20).  Nou pouvé sir ki Jéova ké fè sa ki bon é i ké fè sa ki fo pou jistis fèt.

12. Kouman nou pouvé montré ki nou sir ki Jéova ké fè sa ki jis ?

¹² Lò nou ka pardonnen, nou ka montré ki nou sir ki Jéova ké fè sa ki jis. Lò nou ka lésé tout bagaj annan lanmen Jéova, nou ka montré ki nou sir ki Jéova ké ranjé tout déga péché-a mennen. Lò nou ké annan paradi-a, ‘nou pa ké janmen sonjé’ bagaj ki fè nou lapenn ankò, « é yé pa ké vin annan nou tchò pou troumanté nou » (Is. 65:17). Mé lò roun moun fè nou soufri bokou, ès nou pouvé rivé pa rété faché ké moun-an épi pa tchenbé l’ asou nou tchò ? Annou wè èkzanp plizyèr frè ké sò ki rivé fè sa.

13-14. Kisa èkzanp Tony ké José ka anprann nou asou zafè pardonnen ?

¹³ Roun patché frè ké sò désidé pardonnen menm si yé soufri bokou akoz di bagaj ròt-ya té fè yé. Ki bénédiksyon yé trapé ?

¹⁴ Lontan anvan i divini Témwen Jéova, Tony *, ki ka rété o Filipin, vin savé ki roun mouché, yé ka aplé José, té tchwé so gran frè. A sa lépòk-a, Tony té ka faché vit é i té lé vanjé so frè. Yé arété José é yé mété l’ lajòl. Pita, lò José soti lajòl, Tony té gen rounsèl lidé an so tèt, trapé sa mouché-a épi tchwé l’. Donk i achté roun fizi. Mé i koumansé étidyé Labib-a ké Témwen Jéova-ya. I ka di : « Pannan mo té ka étidyé Labib-a, mo konprann ki mo té gen bokou bagaj pou mo chanjé. Parèkzanp, mo té divèt fini ké sa kòlè-a mo té gen annan mo tchò. » Finalman, Tony batizé é pita i divini ansyen. Imajiné kouman i té étoné lò i anprann ki José osi té divini Témwen Jéova ! Lò yé toulédé jwenn, yé kroké yé konpanyen, é Tony di José ki i té pardonnen li. Apré sa, Tony èspliké ki kou i té pardonnen José, sa fè so tchò kontan tèlman ki i pa té menm pouvé èspliké sa i té ka rousanti. Wi, Jéova béni Tony pas i té paré pou pardonnen.

15-16. Kisa èkzanp Peter ké Sue ka anprann nou asou zafè pardonnen ?

 ¹⁵ Roun jou an 1985, Peter ké Sue * té annan roun réinyon annan roun sal di Rwayonm, lò rounsèl kou roun bonm pété. Roun mouché té mété roun bonm annan sal di Rwayonm-an. Akoz di sa, Sue pa ka byen wè é i pa ka byen tandé ankò. Épi i pa ka rivé pran pyès lòdò ankò. Souvan, Peter ké Sue doumandé yé kò : « Ki kalité moun pouvé fè roun bagaj mové konsa ? » Lontan pita, yé arété mouché-a ki té mété bonm-an (a pa té roun Témwen Jéova) é yé mété l’ lajòl pou tout so lavi. Lò yé doumandé yé si yé té pardonnen mouché-a, Peter ké Sue di : « Jéova ka anprann nou ki lò nou ka tchenbé roun moun asou nou tchò, sa pa bon ni pou nou kò, ni pou nou tchò, ni pou nou lèspri. Donk bònò bònò, nou doumandé Jéova idé nou pou nou pa rété faché é pou nou kontinyé viv nou lavi annan lapè. »

¹⁶ Pannan tout sa lannen-yan, ès sa té fasil pou yé pardonnen sa mouché-a épi pa tchenbé l’ asou yé tchò ? A pa tout tan sa té fasil. Yé ka di ankò : « Détan, lò Sue ka soufri akoz di sa ki rivé li, kòlè-a ka rouvini. Mé nou ka éséyé pa sonjé sa ki pasé é kòlè-a ka chapé. Anfèt, nou pouvé di franchman ki si sa mouché-a ka divini nou frè roun jou, nou ké kontan rousouvwè li. Sa ki rivé nou anprann nou ki prensip ki annan Labib-a ka vréman libéré nou ; yé ka libéré nou plis ki sa nou pouvé imajiné ! Nou ka trapé konsolasyon osi paské nou savé ki titalò Jéova ké ranjé tout déga moun fè. »

17. Kisa èkzanp Myra ka anprann nou asou zafè pardonnen ?

¹⁷ Lò Myra divini Témwen Jéova, i té ja maryé é i té gen dé timoun piti toujou. So mari li menm pa asèpté lavérité-a.  Roun jou, i tronpé l’ épi i lésé so fanmi. Myra ka di : « Lò mo mari lésé mo ké mo dé timoun, mo rousanti sa tout moun ka rousanti lò roun moun to kontan ka trayi to : mo té choké, mo pa té lé krè sa ki té ka rivé mo, mo té gen chagren, mo té ka rigrété, mo té krè a té mo fot é mo té kòlè. » Menm apré i divòrsé ké so mari, Myra kontinyé soufri paské so mari té trayi l’. Myra ka di ankò : « Mo rété konsa pannan plizyèr mwa, épi mo konprann ki sa té ka aji asou mo lanmityé ké Jéova ké ròt-ya osi. » Aprézan, Myra pa faché dèyè so ex mari ankò é i pa gen mové santiman pou li annan so tchò ankò. I ka èspéré ki roun jou i ké adoré Jéova. I ka rivé mété so lidé asou sa dimen ké poté. I lévé so dé timoun li rounso é aprézan yé ka sèrvi Jéova. Jòdla, Myra byen kontan sèrvi Jéova ansanm ké so dé timoun ké yé fanmi.

18. Kou Jéova sa Jij-a ki pi rot-a, di kisa nou pouvé sir ?

¹⁸ Nou byen kontan a pa nou ki gen pou jijé ròt-ya ! A Jéova Jij-a ki pi rot-a ki ké fè l’ (Rom. 14:10-12). Nou pouvé sir ki i ké toujou jijé dapré sa i ka di ki bon ouben ki mové (Gen. 18:25 ; 1 Rois 8:32). I pa ké janmen fè roun bagaj ki pa jis.

19. Kisa Jéova ké fè akoz di so jistis ki parfè ?

¹⁹ Nou présé wè jou-a Jéova ké ranjé tout mové bagaj ki fèt akoz di moun ki pa parfè é akoz di péché-a. A sa moman-an, Jéova ké géri tousa ki ka fè nou mal annan nou tchò é annan nou kò (Ps. 72:12-14 ; Rév. 21:3, 4). Nou pa ké menm sonjé sa ankò. Toupannan nou ka antann sa jou-a rivé, a pou nou gen bokou rékonésans pou Jéova paské i bay nou posibilité imité l’ épi pardonnen ròt-ya !