1. ¿Kasa nümaka Jehová namüin na ayaawajaakana suulia naainjala?

 NIA JEHOVÁ kakumalakai waya, nia kasalajanaka atuma saainjala wayuu otta nia aikaleʼeraka pütchi süsalainjatka atuma saainjala wayuu. Akaʼaya Jehová nia chi Washi aipüraikai maʼin (Sal. 100:3; Is. 33:22). Kaainjarale waya jee shiimainre wayaawajaain suulia, moteerü shia naaʼin Jehová, naaʼinreein maʼin tia (Sal. 86:5). Anuu tü nümakat namüin na kaainjalashiikana nükajee Isaías wanee nünüikimaajachi: «Jaʼitairü müin ishokai saaʼin tü jaainjalakat, kasuujeerü shia tatuma maʼaka saaʼin nieve» (Is. 1:18).

2. ¿Kasa waaʼinrajatka süpüla aleewajiraain waya namaa na waneinnua?

² Süka nnojoluin lotuin maʼin wakuwaʼipa, eesü waküjale jee waaʼinrüle kasa jashicheenaka atuma na waneinnua (Sant. 3:2). Mayaainjeʼe müin tia, eeshii süpüla aleewajiraain waya namaa motule waaʼin tü aainjünakat wamüin (Prov. 17:9; 19:11; Mat. 18:21, 22). Süküjünüle jee saainjünüle wanee kasa nnojotka anain wamüin, keeʼireesü naaʼin Jehová motuinjatüin shia waaʼin (Col. 3:13, TNM). Motusü naaʼin Jehová waainjala, wayaleekajaʼa nnojoleemaatüin motuin aaʼin naainjala na waneinnua (Is. 55:7).

3. ¿Kasa wekirajaainjatka anain sünain ekirajaayakat tüü?

³ Sünain ekirajaayakat tüü, wekirajaajeerü anain eein süpüla washatüin nukuwaʼipa Jehová sünain motuin waaʼin saainjala wayuu mayaainjeʼe nnojoluin lotuin maʼin wakuwaʼipa. ¿Jarat tü aainjalaa nakumajüinjatka akuwaʼipaa na laülaashiikana? ¿Jamüsü motuinjatka waaʼin naainjala na waneinnua naashin Jehová? ¿Kasa watüjaka nanainjee waneinnua wawalayuu aainjünaka amüin kasa mojusü?

4. (1) ¿Kasa naaʼinrajatka wanee anoujashi kaainjarale nia? (2) ¿Kasa naaʼinrajatka na laülaashiikana kaainjarale wanee anoujashi?

⁴ Eesü kaainjalaa nakumajüinjatka akuwaʼipaa na laülaashiikana maʼaka saaʼin tü aküjünakat suluʼu 1 Corinto 6:9, 10. Kaainjalashi wanee wayuu noʼuluʼu Maleiwa nülatüle sooʼopünaa tü nümakat. Jamüshijaʼa kaainjarale wanee anoujashi, oʼuraajüinjachi nia süpüla nuchuntuin kaalinwaa nümüin Jehová otta aashajaainjachi nia namaa na laülaashiikana (Sal. 32:5; Sant. 5:14). Nia neʼe Jehová motoko aaʼin saainjala wayuu sükajee outuin Cristo. * ¿Kasa niʼitaaka apüla Jehová na laülaashiikana? Niʼitaain naya süpüla naneeküinjatüin wanaapünaa sümaa tü sümakat tü Bibliakat nojuʼitirüinjachire jee nnojolinjachire nojuʼitirüin wanee kaainjalashi naʼakajee na wawalayuukana (1 Cor. 5:12, 13). Süpüshi tü kasa naaʼinrajatkat na laülaashiikana shia nasakireʼerüinjatüin naaʼin sünain tüü nüchiki chi kaainjalashikai: ¿naaʼinrüinche tia kasa mojusükat sümaa nütüjaain saaʼu mojuin shia?, ¿nuunjulajuinche tia kasa mojusükat?, ¿kakaliaichiche nia sünain aaʼinraa tia?, ¿jaʼyasüche naaʼu shiimain niyaawajaain suulia naainjala?, ¿jaʼyasüche naaʼu motuin naaʼin Jehová naainjala? (Aluw. 3:19).

5. ¿Kasa anasü eeka sünainjee tü naaʼinrakat na laülaashiikana?

⁵ Soʼunnaa naashajaain na laülaashiikana nümaa chi kaainjalashikai, nachajaainjatü sukuwaʼipa süpüla nayaawatüin saaʼu tü nüneeküitpakat Jehová süpüla nükaalinjain chia wayuukai (Mat. 18:18). ¿Kasa anasü eeka sünainjee tia? Ojuʼitinneechi chi anoujashi nnojoikai ayaawajaain suulia naainjala suulia numojujain nanoula na wawalayuukana (1 Cor. 5:6, 7, 11-13; Tito 3:10, 11). Akaʼaya chi kaainjalashikai, eeshi süpüla niyaawajaain suulia naainjala jee motuin naaʼin Jehová naainjala (Luc. 5:32). Achuntushii na laülaashiikana naaʼu chi anoujashi ayaawajaakai suulia naainjala süpüla anainjatüin nukuwaʼipa nüchikuaʼa nümaa Jehová (Sant. 5:15).

6. Nujuʼitinnüle wanee anoujashi naʼakajee na wawalayuukana, ¿eesüche süpüla motuin naaʼin Jehová naainjala?

⁶ Jamüshijaʼa nnojoire niyaawajaain wanee anoujashi suulia naainjala, ojuʼitinneechi nia naʼakajee na wawalayuukana. ¿Jama kaainjarale nia noulia na sülaülashiikana mma? Nnojoishi süpüla nakaalinjain nia na laülaashiikana suulia niʼrüin nümüliala, nu walaajüinjatü naainjala noulia na sülaülashiikana mma. Niʼitaain Jehová na sülaülashiikana mma süpüla süsalainjatüin saainjala wayuu natuma, jaʼitashii nayaawajaain suulia tü naaʼinrakat (Roma 13:3, 4). Jamüshijaʼa niyaawajaale wanee wayuu jee nuuyantaalee suulia naainjala, moteerü naaʼin Jehová naainjala (Luc. 15:17-24). Naaʼinreerü tia Jehová jaʼitairü mojuin maʼin tü naaʼinrakat (2 Crón. 33:9, 12, 13; 1 Tim. 1:15).

7. ¿Kasa eeka süpüla waneeküin saainjünapa kasa mojusü wamüin?

⁷ Anataʼaleeshiijaʼa waya süka nnojoliin wayain aneeküin jaraliinjanain motuin naaʼin Jehová naainjala. Eepejeʼe wanee kasa eeka süpüla waneeküin. ¿Kasa wayu tia? Eesü süpüla waneeküin motuin waaʼin tü aainjünakat wamüin. «Nnojotsü taaʼinjeein», eeshijaʼa nümüle wamüin chi aainjakai kasa mojusü wamüin. Eepejeʼe süpüla nnojoluin naaʼinrüin tia wanee wayuu. Sülatüle tia, eesü süpüla waneeküin nnojoluin üttakuʼu müin waaʼin nünain jee jashichikuʼu müin waya saalinjee tü naaʼinrakat wamüin. Eesüjaʼa kakaliale süpüla  motuin waaʼin tü naaʼinrakat wamüin. Anuu wanee pütchi ashajünaka suluʼu Aapiria Wayuu ojuʼitaka settienpüroʼu 15 soʼu 1994: «Wanaa sümaa motuin waaʼin naainjala wanee wayuu, nnojotsü shiain sutuma nnojoluin mojuin maʼin tü naaʼinrakat wamüin. Motopa naaʼin wanee anoujashi naainjala wanee wayuu, nüpütüin shia najapuluʼu Jehová. Niajaʼa chi kasalajanainjachikai atuma saainjala wayuu soʼu tü kaʼi anakalü oʼu shia». ¿Jamüsü motuinjatka waaʼin naainjala na waneinnua naashin Jehová? ¿Jamüsü keeʼireeka naaʼin wapütüin tia najapuluʼu?

8. ¿Jamüsü kojutuka maʼin wamüin nümüliajüin waya Jehová motule waaʼin naainjala na waneinnua?

⁸ Motule waaʼin naainjala na waneinnua, jaʼyeerü waaʼu kojutuin wamüin nümüliajüin waya Jehová. Soʼu wanee kaʼi aashajaashi Jesús nüchiki wanee laama nnojoika achekajüin nümüin wanee nüchepchia tü wainmakat nujuyaala nuulia. Aashajaashi nia süchiki tia süpüla nikirajüin nümüliajülin Jehová. ¿Kasa naaʼinraka mapa chi achepchieekai? Nnojoishi nümüliajüin wanee nüchepchia palitchonkai nujuyaala nuulia (Mat. 18:23-35). Tü nikirajeekalü achiki Jesús sükajee tia shia moteerüin waaʼin naainjala na waneinnua kojutule wamüin nümüliajüin waya Jehová (Sal. 103:9). Anuu wanee pütchi kakaliairü ashajünüin suluʼu Aapiria Wayuu: «Jaʼitairü wainmatuain motuin waaʼin naainjala na waneinnua, nnojoleerü antapünaain sünain tü naaʼinrakat Jehová süpüla motuinjatüin naaʼin waainjala nükajee Cristo jee nümüliajüin waya».

9. ¿Jaralii na nümüliajakana Jehová? (Mateo 6:14, 15).

⁹ Motule waaʼin naainjala na waneinnua, moteerü naaʼin Jehová waainjala. Nümüliajüin Jehová na amüliajüliikana (Mat. 5:7; Sant. 2:13) Nüküjain tia Jesús soʼu nikirajüin na nikirajüinkana sünain oʼuraajaa (paashajeʼera Mateo 6:14, 15). Wayaawatüin maʼin saaʼu müin nukuwaʼipa Jehová sünainjee tü nüküjakat nümüin Job, wanee wayuu anakai akuwaʼipa noʼuluʼu. Wanaa sümaa süküjünüin pütchi airuʼulu nümüin nutuma Elifaz, Bildad otta Zofar, nüküjain Jehová nümüin Job nuchuntajachin naaʼu. Naaʼinrapa tia Job, anakuwaʼipaishi nia nutuma Jehová (Job 42:8-10).

10. ¿Jamüsü mojuka üttakuʼu müle waaʼin? (Éfeso 4:31, 32).

¹⁰ Motule waaʼin naainjala na waneinnua, nnojoleerü mojuin wakuwaʼipa sutuma üttakuʼu müin waaʼin. Keeʼireesü naaʼin Jehová anainjatüin waaʼin suulia üttakuʼu müin waaʼin (paashajeʼera Éfeso 4:31, 32). «Puuʼulaa suulia jashiee. Nnojo paashichijaain suulia paaʼinrüin kasa mojusü», müshi Jehová wamüin (Sal. 37:8). Anasü maʼin waaʼinrüle tia. Üttakuʼu müle waaʼin, eeshii süpüla ayuulin waya jee mojuin waaʼin (Prov. 14:30). Üttakuʼu müle waaʼin, müsü aka saaʼin wasüle weneena, nnojoleerü anain wakuwaʼipa. Eekajasaʼa motule waaʼin naainjala wanee wayuu, aneerü waaʼin (Prov. 11:17). Ayateenakalaka aʼyataain waya nümüin Jehová süka anakalü akuwaʼipa jama jutateerüin waaʼin.

11. ¿Jamüshii nnojoliinjanaka pasalaain waya? (Roma 12:19-21).

¹¹ Motule waaʼin naainjala na waneinnua, nieechi weʼitaaka ajapuluʼu Jehová kasalajanain atuma saainjala wayuu. Nnojotsü naapüin Jehová wamüin shikii kasalajanainjatüin saainjala wayuu watuma (paashajeʼera Roma 12:19-21). Lotusü nutuma Jehová sukuwaʼipa tü kasa naaʼinrakat süsalapa saainjala wayuu nutuma. Isapejeʼe wachiki waaʼinrüin tia süka nnojoluin wayaawatüin saaʼu süpüshuaʼa tü alatakat nümüin wanee wayuu otta süka nnojoluin lotuin maʼin wakuwaʼipa (Heb. 4:13).  Eesü isawaire wachiki wayaawatüin saaʼu tü waaʼinrajatkat sutuma jashiee jee mojuu aaʼin. Anuu tü nüshajiralakat Jehová nükajee Santiago: «Chi eekai jashichin nümüin chi nuwalakai, iseerü nüchiki aaʼinraa tü kasa anasü nüchekakat chi Maleiwakai nüpüleerua» (Sant. 1:20). Wayaawatakalaka saaʼu loteerüin nutuma Jehová süpüshuaʼa tü naaʼinrakat otta nieechin pasalaain atuma tü aainjünakat wamüin.

12. ¿Kasa waaʼinrajatka weʼitaale waaʼin sünain lotuin süpüshuaʼa tü kasa naaʼinrakat Jehová?

¹² Motule waaʼin naainjala na waneinnua, jaʼyeerü waaʼu weʼitaain waaʼin sünain lotuin süpüshuaʼa tü kasa naaʼinrakat Jehová. Wapütüle najapuluʼu Jehová tü aainjünakat wamüin, jaʼyeerü waaʼu weʼitaain waaʼin sünain najaʼlajeʼerüinjatüin süpüshuaʼa tü kasa mojusü eekat sünainjee tü kaainjalaakat. Suluʼu tü paʼaraiisü naapüinjatkat wamüin Jehová, nnojoleerü mojuin waaʼin süka nnojoleerüin sotuin waaʼin tü kasa alatüitpakat (Is. 65:17). ¿Eesüche süpüla nnojoluin üttüin waaʼin nünain wanee wayuu aainjaka kasa mojusü wamüin? Wekirajaa sünain tü naaʼinrakat waneinnua wawalayuu süpüla nountuin tia.

13, 14. ¿Kasa watüjaka sünainjee motuin naaʼin Tony naainjala José?

¹³ Wainma na wawalayuu motokana aaʼin tü kasa mojusü aainjünakat namüin mayaainjeʼe neʼrüin maʼin müliaa otta mojuin maʼin naaʼin sutuma. ¿Kasa anasü neʼraka naya wawalayuukana sutuma tü naneekakat?

¹⁴ Tony, * nia wanee wayuu kepiakai chaa Filipinas. Nnojoliiwaʼaya nunoujain, aküjünüsü nümüin suʼutunüin naaʼin wanee nuwala nutuma wanee wayuu kanüliashi José. Tony, niapuʼushi wanee wayuu jashichikai maʼin otta katkaaraikai maʼin. Pasalaweeshi nia. Ataʼünüshi José otta apüreesajinnüshi nia saaʼujee naainjala. «Tachajaweechi achiki nia süpüla toʼutuin naaʼin», müshi Tony nütüjaapa saaʼu nüjütünüin achiki José. Niyaʼlajakalaka naʼapüla. Kakalia mapa, oʼttushi Tony sünain ekirajawaa sünain tü Bibliakat namaa na aküjaliikana pütchi nüchiki Jehová. Anuu nünüiki: «Sutuma tü tekirajaakalü anain suluʼujee tü Bibliakat tayaawata aaʼu tanouteʼerüinjatüin takuwaʼipa otta tooʼulaainjachin suulia jashiee».  Woutiisakalaka nia mapa jee aneekünüshi nia süpüla laülaainjachin nia suluʼu tü outkajaaleekat. Ponokajasaʼa naaʼin Tony nütüjaapa naaʼu José nüküjalin pütchi nüchiki Jehová wanaa nümaa. Neʼraajiraapa, akoʼojiraashii naya. Nüküjaka Tony nümüin José motuin naaʼin naainjala. Miyoʼushaata tü talataa aaʼin sulujutkat naaʼin Tony. Isasü nüchiki nüküjain tü anaa eekat sünainjee tia. Anakalaka nukuwaʼipa Tony nutuma Jehová saaʼujee motuin naaʼin naainjala José.

15, 16. ¿Kasa watüjaka sünainjee motuin naaʼin Peter sümaa Sue tü aainjünakat namüin?

¹⁵ Soʼu 1985 yalajachi Peter sümaa Sue suluʼu tü Piichi Outkajaaleekat soʼunnaa susotooin wanee wonpa. Nia asoteetka tia wanee wayuu. Sünainjee tü alatakat, mojuleesia Sue, müsatsü suʼupaluʼu tü kasakalüirua otta nnojotsü saapüin maʼin tü pütchikat jee müsia nnojotsü saatüin seejuu wanee kasa. * «Mojulaakaiche chi wayuu makai aainjala», müshi Peter sümaa Sue. Sülatapa maʼaka jeʼra juya, ataʼünüshi chi kaainjalashikai, nnojoishi Aküjalin pütchi nia otta müichimaʼale mojuʼitüin nia suluʼujee kaatse. Anuu nünüiki Peter sümaa Sue nasakinnapa süchiirua motule naaʼin naainjala chi kaainjalashikai: «Nüküjain wamüin Jehová nnojoleerüin kasain weʼrüin sutuma üttakuʼu müin waaʼin jee jashichikuʼu müle waya, eeshii süpüla ayuulin waya jee mojuin waaʼin sutuma neʼe tia. Müsüjeseʼe wachuntuin nümüin Jehová süpüla nüsünneʼerüin suluʼujee waaʼin tü üttaakalü aaʼin otta tü jashieekat süpüla ayatüinjatüin anain waaʼin».

¹⁶ ¿Mapüleesatche namüin motuin naaʼin tü alatakat? Nnojo, nnojotsü mapüleein namüin. Anuu sooʼomüin nanüiki: «Eesü kaʼi sülakuupa oʼu Sue sutuma tü sülioʼukot. Soʼu tia üttajaasü maʼin waaʼin sotopa waaʼin tü alatakat. Süka nnojoluin jülüjakuʼu müin waaʼin tia, wasünneʼeramaatüin suluʼujee waaʼin tü üttaakalü aaʼin. Nüküjaire pütchi nüchiki Jehová soʼu wanee kaʼi chi kaainjalashikai, talateena waya nümaa. Sünainjee tü alatakat wamüin, wayaawata aaʼu anain maʼin waaʼin sutuma waaʼinrüin tü sümakat  tü Bibliakat. Aneetkalaka waaʼin najaʼttirapa Maleiwa süpüshuaʼa tü kasa müliakalü atuma waaʼin».

17. ¿Kasa watüjaka sünainjee motuin saaʼin Myra tü aainjünakat sümüin?

¹⁷ Kasaatsü Myra jee piamashii süchonnii nnojoluiwaʼaya sunoujain, niyoutuin chi suʼwayuusekai tü anoujaakat. Mapa, kawalaʼatasü shia nutuma otta nüpütüin shia namaa na piamashiikana süchonnii. Anuu sünüiki Myra: «Aishaatasü tamüin tia maʼaka alin namüin na kawalaʼatakana natuma naʼwayuuse, mojushaatasü taaʼin, jülüjasü taaʼin tayain kasirüin tü alatakat otta jashichishaatasü taya. Üttashaatasü taaʼin süka nüpütüin taya tamüiwaʼa namaa na tachonniikana». Mayaainjeʼe nakumajüin sukuwaʼipa nooʼulaajiraain laülaapialuʼu, ayatüsia alin sümüin Myra kawalaʼatain shia nutuma. Anuu sooʼomüin sünüiki: «Alatüsü kojuya kashi sümaa üttashaatain maʼin taaʼin. Tayaawataka saaʼu sumojujaweein takuwaʼipa nümaa Jehová otta namaa na waneinnua». Saashin Myra süsünneʼerüitpa suluʼujee saaʼin tü üttaakalü aaʼin otta nnojoluichipa kanain saaʼin chi suʼwayuusepuʼukai. Shiʼree amüinchi nia nunoujain soʼu wanee kaʼi. Shia saaʼinmaaka tü kasa anasü eejeetkat mapeena. Sükaalinjain na süchonniikana süpüla naʼyataainjanain nümüin Jehová. Talatüsü saaʼin Myra maaʼulu süka shiʼyataain nümüin Jehová namaa na süchonniikana ooʼulaka namaa na süpüshikana süchonnii.

18. ¿Jamüsü eeka süpüla weʼitaain waaʼin sünain loteerüin nutuma Jehová tü naaʼinrakat süsalapa saainjala wayuu nutuma?

¹⁸ Anataʼaleeshiijaʼa waya süka nnojoluin saapünüin wamüin shikii kasalajanainjatüin saainjala wayuu watuma. Nia Jehová kasalajanainjachikai atuma saainjala wayuu (Roma 14:10-12). Wayaawata aaʼu loteerüin tü naaʼinrakat süsalapa saainjala wayuu nutuma. Naaʼinreerü tia wanaapünaa sümaa tü pütchi nüikaleʼerakat süpüla tia (Gén. 18:25; 1 Rey. 8:32). Nnojoleerü naaʼinrüin kasa eekai mojuin.

19. ¿Kasa eejeetka sutuma lotuin süpüshuaʼa tü kasa naaʼinrakat Jehová?

¹⁹ Waʼatapajüin maʼin tü kaʼi najaʼttirüinjatkalü oʼu Maleiwa süpüshuaʼa tü kasa eekat sünainjee tü kaainjalaakat. Soʼu kaʼikat tia, müiria nnojoluin müliain waaʼin sutuma tü kasa alatakat wamüin (Sal. 72:12-14; Alat. Map. 21:3, 4). Nnojoleerü shia sotuin waaʼin piantua. Sümaʼinruʼu waʼatapajüin süntüin tia kaʼikat, kojutusü maʼin wamüin süka nükaalinjain waya Jehová süpüla motuin waaʼin saainjala wayuu maʼaka naaʼinrüin shia.