1. Bulangalire buhe Yehova ahere abanya-byaha bahungamire?

 CHIRO akaba oku Yehova ye Mulemi werhu, yenarhuheberaho n’amarhegeko, anali Muzuzi werhu, kandi ali Darha w’embingu w’obuzigire. (Zb. 100:3; Isa. 33:22) Amango rhwamamugomera, n’okuhungama n’omurhima goshi, arhaherhe obuhashe b’okurhubabalira konyine, s’aliko analonzeze kujira ntyo. (Zb. 86:5) Kugerera omulebi wage Isaya, Yehova aliderhere ebila binwa biyerekene obuzigire binahebere omurhima: “Chiro akaba ebyaha byenyu bili nka muduku guhumbugulire, byajirwa mweru nka lubula.”​—Isa. 1:18.

2. Akaba rhulonzeze kugwarha omurhula haguma n’abandi, bichi rhukwanene kujira?

² Bulala rhurhashinganene, rhweshi rhunaderha n’okujira ebintu bigayisize abandi. (Yak. 3:2) Aliko echola chirhaderhere oku rhurhakachigwarha obwira bukomere haguma nabo. Rwakagenderera kugwarha obwira bukomere haguma nabo, amango rhwamayiga kubabalira. (Mez. 17:9; 19:11; Mt. 18:21, 22) Amango omuntu amaderha changwa amajira ehintu hya busha-busha higayisize, Yehova alonzeze rhumubabalire. (Kol. 3:13) Rhugwerhe empanvu zinja z’okujira ntyo. Okuderha okuli, Yehova anarhubabalira “bwenene” oku bulonza.​—Isa. 55:7.

3. Bichi rhwaganirako mu gunola mwazi?

³ Mu gunola mwazi, rhwashambala oku kuntu abantu barhashinganene bakayiganya Yehova omu kubabalira abandi. Byaha bihe rhukwanene menyesa abashamuka? Bulagurhe Yehova arhuhebere omurhima rhubabalire abandi? Na bichi rhwakayiga kugerera ebi bene-berhu na bali-berhu baguma balibukire bwenene eju y’ebyaha by’abandi?

4. a) Amango omukozi wa Yehova amajira echaha chikomere, bichi akwanene kujira? b) Kasi kahe abashamuka bagwerhe amango bali bashambala n’omuntu wajirire echaha?

⁴ Ebyaha bikomere bikwanene kumenyeswa oku bashamuka. Omufano gw’ebyaha bili nk’ebyola bili omu 1 Wakorinto 6:9, 10. Echaha chikomere kuli kujira echintu chibi chivunire amarhegeko ma Mungu. Nk’Omukristu amajira echaha chili nk’echola, akwanene kusalira emwa Yehova Mungu, anakwanene kujilola abashamuka b’echibaga. (Zb. 32:5; Yak. 5:14) Kasi kahe abashamuka b’echibaga bagwerhe? Yehova yenyine ye gwerhe obuhashe b’okubabalira burundu ebyaha, na kandi, anarhubabalira ebyaha byerhu kugerera enterekero y’enchungu. * Aliko Yehova ahere abashamuka akasi k’okugerereza kugerera Amandiko, bamenye akaba owakolere echaha akabera omu chibaga changwa nanga. (1 Ko. 5:12) Yi bagala kujira ntyo, chintu chiguma omu bibakwanene kujira, kuli kugwarha ebishubizo kw’ebila bibazo: Ajiraga echaha oku bulonza? K’oyula muntu alilonzeze kubisha echaha chage oku bandi? K’aligalukire echola chaha mu mango manene? Ech’akamaro bwenene, ka hali echintu chiyerekene oku ahungamire eby’okuli? Ka hali ebiyerekene oku Yehova amubabalire?​—Mdo. 3:19.

5. Akasi k’abashamuka kanalerha nyungu zihe?

⁵ Amango abashamuka bali bashambala n’owajirire echaha, omuhigo gwabo, kuli kuhikira esimikiro hanola oku gulu, eli kuguma n’eyabaga yarholerwe omu mbingu. (Mt. 18:18) Nka gurhe ogola mupango gunalerhera echibaga enyungu? Gunalanga echibaga omu kuchizera oku abanya-byaha barhahungamire barhaberere omu chibaga n’okuhanyagaza abakozi ba Yehova. (1 Ko. 5:6, 7, 11-13; Tit. 3:10, 11) Okola kwashuba rhabala owajirire echaha ahungame n’okuyunguka n’obubabale bwa Yehova. (Lu. 5:32) Abashamuka banasalira eju y’omuntu wahungamire n’okuhema Yehova ashube agalule obwira haguma naye.​—Yak. 5:15.

6. Akaba omuntu amachibwa omu chibaga, ka byakachigalikana ababalirwe? Fasiriya.

⁶ Rhuderhe ok’omuntu arhahungamire amango abashamuka bali bashambala naye. Nka byamaba ntyo, anachibwa omu chibaga. Akaba avunire amarhegeko m’echihugo, abashamuka barhamulanga oku ngaruka z’ebijiro byage bibi. Yehova alekere abakulu b’echihugo bache olubanja n’okuhana owa vunire amarhegeko, abe ey’ahungamire changwa nanga. (Ro. 13:4) Aliko, akaba buzinda oyola muntu amachishubako n’okuhungama eby’okuli n’okuhindamuka, Yehova ali tayari kumubabalira. (Lu. 15:17-24) Obola buli bukweri chiro akaba ebyaha byage byalikomere bwenene.​—2 Ny. 33:9, 12, 13; 1 Ti. 1:15.

7. Mu njira nchi rhwakababalira owa rhugoseze?

⁷ Rhugwerhe eshukurani y’okumenya oku arhali rhwabo rhwerhwakaderha akaba Yehova ababalire omunya-byaha changwa nanga! Aliko, hali chintu chiguma rhukwanene kujira. Chintu chihe echola? Mango maguma, byakaba ey’omuntu arhugomere, nkabaga anarhugomere bwenene; aliko anayunva ababezwe n’echola n’okurhuhema rhumubabalire. Hali n’amango arhakajira ntyo. Chiro akaba ntyo, rhwakachishoga kubabalira oyola muntu k’okuderha oku rhwakarhola esimikiro y’okurhamubikira omujinya n’okurhamuyunvira oburhe. Okuderha okuli, byakahema akasanzi n’emisi, ahanene akaba rhwagayisizwe bwenene. Omunara g’Omulanzi  gwa Siku 15, Mwezi 9, 1994 guderhere ntya: “Amango rhwamababalira owarhugoseze, arhali kuderha oku rhuli rhwalekerera obubi. Omukristu wababalire analangalira oku Yehova yi nji wacha olushinja oku bushinganyanya. Ye Muzuzi w’okunali omu mahanga moshi, nj’anajira rhukolerwe oku kunali omu kasanzi kakwanene.” Bulagurhe Yehova arhuhebere omurhima rhubabalire n’okulangalira oku acha olubanja omu kunali?

8. Nka gurhe okubabalira abandi kunayerekana oku rhugwerhe eshukurani oku lukogo lwa Yehova?

⁸ Amango rhwamababalira, rhunayerekana oku rhugwerhe eshukurani oku lukogo lwa Yehova. Omu mufano muguma, Yesu alihuzenye Yehova na waliha muguma wababaliraga omuja wage deni linene bwenene arhakagalire kujuha. Aliko oyola muja wababalirwaga, afunda kubabalira owabo muja walimugwerhe deni ligeke bwenene ly’efuranga kulusha ezi bamubabaliraga. (Mt. 18:23-35) Bichi Yesu aliri arhuyigiriza? Akaba kweri rhusimisizwe n’olukogo lunene Yehova arhuyerekere, echola charhushunika nerhu rhubabalire abandi. (Zb. 103:9) Omunara g’Omulanzi gwaliderhere echola ntya omu myaka yagerere: “Chiro akaba oku rhwababalire abandi kangana gurhe, rhurhakagala kubabalira haba n’akatyu nk’oku Mungu arhubabalire kugerera enterekero y’enchungu ya Yesu.”

9. Bande Yehova anayereka olukogo? (Matayo 6:14, 15)

⁹ Rhukababalira abandi, Yehova naye nj’arhubabalira. Yehova anayereka olukogo ku balala banayerekana olukogo oku bandi. (Mt. 5:7; Yak. 2:13) Yesu aliyerekene bwinja echola amango ayigirizaga abanafunzi bage kusalira. (Osome Matayo 6:14, 15.) Embere w’ahola, Yehova abaga ayerekene echola kugerera ebinwa abwiraga omukozi wage Yubu. Oyola mulume mwimana abaga agayisizwe bwenene n’ebinwa bivunire omurhima balume basharhu bayirikirwe Elifazi, Bildadi, na Zofari bamubwiraga. Yehova abwira Yubu asalire eju yabo. Yubu amalire kujira ntyo, Yehova amugisha.​—Yob. 42:8-10.

10. Mu njira nchi rhwakaba rhuli rhwachibabaza amango rhuli rhwagenderera kubikira omuntu omujinya? (Waefeso 4:31, 32)

¹⁰ Rhunachibabaza rhwenyine amango rhwamabikira abandi omujinya. Yehova alonzeze rhusiimire echirhulirizo chirhengene n’okuleka kubikirana omujinya. (Osome Waefeso 4:31, 32.) Arhuhanwire oku “rhulekane n’omujinya rhunakabulire ebisirani.” (Zb. 37:8) Bili by’obwengehe okukulikira elyola hano. Rhukagenderera kubikira omujinya omuntu warhugosezaga, rhwahanyagaza omubiri gwerhu n’obwenge bwerhu. (Mez. 14:30) Aliko, rhukagenderera kubikira omuntu omujinya, ntacho byamuhumako konakuguma n’okunywa obulozi, arhali yewe yibwayirha. Aliko, amango rhwamababalira abandi, eyi rhuli rhwachiha oluhembo. (Mez. 11:17) Rhwagwarha omurhula n’okugala kugenderera omu kasi ka Yehova.

11. Bichi Ebiblia ederhere oku bilolere okuchiholera? (Waroma 12:19-21)

¹¹ Okuhoola kuli kwa Yehova. Yehova arharhuhaga oruhusa l’okuhana omuntu warhugoseze. (Osome Waroma 12:19-21.) Bulala rhurhashinganene, obuhashe bwerhu buherhe aha bugalukire, che chirhumire rhurhakagala kucha olubanja bwinja nk’oku Mungu akajirire. (Ebr. 4:13) Kandi, okuntu rhuli rhwachiyunva kwakarhushumika kurhume byarhukomerera kumenya echintu chinja rhwakajira. Yehova alifuherere Yakobo ayandike ntya: “Oburhe b’omuntu burhayeneza okunali kwa Mungu.” (Yak. 1:20) Rhwakachizera  oku Yehova nj’ajira ebintu by’okunali n’okuchizera ok’okunali kwajirirwe.

12. Gurhe rhwakayerekana oku rhuchizerere okunali kwa Yehova?

¹² Amango rhwamababalira, rhwanayerekana oku rhulangalire okunali kwa Yehova. Omu kuleka olubanja omu maboko ma Yehova, rhwanachizera oku Yehova nj’amala ebintu bibi byoshi byalerhwaga n’echaha. Omu gulu lihyahya arhulaganyize, rhurhakachiyibuka ebintu bibabeze rhwagereremo “birhakachigaluka omu bwenge bwerhu changwa kugaluka omu murhima gwerhu” haba n’akatyu. (Isa. 65:17) Aliko si, amango rhwababezwe bwenene, ka byakashobokana rhurhagendereraga kugwarha oburhe n’okubikira omuntu warhugoseze omujinya? Rhulole gurhe baguma bagalire kujira ntyo.

13-14. Bichi wayigire oku bilolere omufano g’okubabalira gwa Tony na José?

¹³ Bene-berhu na bali-berhu banene bachishogere okubabalira chiro akaba oku balibabezwe bwenene n’ebijiro by’abandi. Migisho ehe balipatire bulala balijirire ntyo?

¹⁴ Myaka minene embere Tony, * olamire omu Philippines abe Muhamirizi wa Yehova, amenya oku mulume muguma oyirikirwe José yi wayirhaga mukulu wage. Amola mango, Tony aliri mukali bwenene na mubandi analonza kuchiholera. José abaga afarhirwe n’okushwekwa omu pirizo eju y’egosa lyage. Enyuma w’ahola amango José ashwekulwa, Tony ahigirira kumuhiga mpaka amuyirhe. Echola charhuma agula ebunduki mpu yi nj’amuyirha. Amo mango, Tony arhondera kuyiga Ebiblia haguma n’Abahamirizi ba Yehova. Aderhere ntya: “Efunzo lye Biblia lyantabala menye oku nkwanene mpindamule oborhere n’ebijiro byani. N’okola kwaliheberemo okuleka kubikira abandi omujinya.” Hagera amango Tony abatizwa anashimikwa aba mushamuka w’echibaga. Na José naye abaga abere Muhamirizi wa Yehova obatizwe! Amango bombi babuganana, bahoberana n’omwishingo gunene, na Tony abwira José oku ali mubabalire. Tony aderhere oku echola chijiro ch’okubabalira chalimulerhere omwishingo gunene n’oku arhakanagala kuderha okuntu aliri achiyunva asimire. Nechi, Yehova aligishire obulonza bwa Tony b’okubabalira.

15-16. Bichi wayigire oku bilolere obubabale kugerera omufano gwa Peter na Sue?

 ¹⁵ Omu mwaka gwa 1985, Peter na Sue baliri oku mbuganano z’echibaga oku Chumbi ly’Obwami amango bayunvaga omulenge gw’echibombe chinene chabereka. Hali mulume muguma walirhegere echibombe omu Chumbi ly’Obwami! Sue alikoromekere bwenene omu kuntu arhakachigalire kubona changwa kuyunva. Analihezeze obuhashe bwage b’okuyunva empumulo. * Peter na Sue buli mango baliri bachibaza: ‘Muntu nyabachi walivire ajira echintu chibi ntya?’ Enyuma wa myaka minene, olala muntu warhegaga echola chibombe, orhaliri Muhamirizi wa Yehova, afarhwa, banamuchiira olubanja oku ashwekwa akalamo kage koshi. Amango bababaza akaba bababalire oyola mulume, Peter na Sue bashubiza ntya: “Okugenderera kugwarha oburhe n’okubika omujinya kwakalwaza omubiri gwerhu, kwanarhulerhera amalwala m’omu bwenge, n’okuyinja rhwachiyunva kubi. Bobola ebyola byamalire rhengerera ntya, rhwahuna Yehova arhurhabale rhumenye rhwabika omujinya, rhubabalire yirhugala kulama akalamo kagwerhe omwishingo.”

¹⁶ Ka byalibayorohere kubabalira oyola muntu wajiraga echola chijiro? Nanga. Bagenderere kuderha ntya: “Mango maguma nka Sue amashuba kuyunva amalumwa eju y’okuntu akoromekaga, rhunashuba kuyunva ebisirani. Aliko rhurhagenderera kubiwazako n’echola chanarhuma rhwashuba kurhulera juba-juba. Kweri, nka lusiku luguma olala muntu warhegaga echibombe amaba Muhamirizi, rhwakamuyegereza omu chibaga n’omwishingo. Amango wamakolesa amakanuni me Biblia, wachiyunva oli huru. Kweri amakanuni me Biblia marhukulire omu buja mu njira zinene orhakalola! Kandi, rhunashuba kuyunva rhurhulirizwe omu kumenya oku hanola hofi Yehova nj’amala ebintu bibi byoshi.”

17. Bichi wayigire oku bilolere obubabale kugerera ebi Myra ageragamo?

¹⁷ Myra amenyaga okuli amango abaga ashabirwe  ey’anagwerhe bana babiri badorho. Eba arhayemeraga ayiga okuli. Hagerere esiku, eba ajira obugonyi anajahika omulala gwage. Myra aderhere ntya: “Amango bani andeka n’abana berhu babiri, nachiyunva nk’oku banene banazigana kuchiyunva amango omuzigirwa wabo amabahemukira, nayunva mbabere bwenene, okurhachinihira abandi, okuchiganya, okuchibona munya-magosa, n’okuyunva oburhe.” Chiro akaba oku obuhya bwabo burhachigendereraga, omukazi agenderera kuyunva amalumwa bulala eba alimuhemukire. Myra agenderere kuderha ntya: “Okuchiyunva ntyo, kwaligenderere kumbabaza bwenene mu myezi minene, na narhegera okw’echola chaliri chahuma oku bwira bwani haguma na Yehova n’abandi.” Zene, Myra aderhere oku arhachibikire eba wa mira omujinya changwa kumushulira amabi. Alangalire oku lusiku luguma oyola eba nj’agalukira Yehova. Myra akala agalire kuseza obwenge bwage oku mango mayinjire. Chiro akaba oku aliri alemba abana bage babiri yenyine, abarhabere babe bakozi ba Yehova. Zene Myra agwerhe omwishingo g’okukolera Yehova haguma n’abana bage n’emilala yabo.

18. Bwizere buhe rhugwerhe mu Yehova yewe nka Muzuzi Mukulu Bwenene?

¹⁸ Rhugwerhe murhula gunene bulala arhali rhwabo rhwerhurhola esimikiro elolere kuntu abandi bakwanene kuchirwa olubanja! Bulala Yehova ye Muzuzi Mukulu Bwenene ku Boshi, yewe yinji wakola akola kasi k’akamaro. (Ro. 14:10-12) Rhwakachizera loshi oku buli mango nj’acha olushinja omu njira efarhene n’amakanuni mage mashinganyanya m’okumenya ebinja n’ebibi. (Mwa. 18:25; 1 Fa. 8:32) Nta lusiku nj’ajira echintu chirhafarhene n’okunali!

19. Bichi okunali kushinganyanya kwa Yehova nji kwayeneza?

¹⁹ Rhulingirize oku nyorha nene bwenene amango Yehova nj’akula amabi moshi malerherwe n’okurhashinganana kw’abantu n’echaha. Mu amola mango, amalumwa merhu moshi m’omubiri n’am’omu bwenge, nji makulwaho burundu. (Zb. 72:12-14; Ufu. 21:3, 4) Rhurhakachimayibuka haba n’akatyu. Oku rhunali rhwalingiriza oku akola kasanzi kahika, rhugwerhe eshukurani nene bwenene emwa Yehova bulala arhuhere obuhashe b’okumuyiganya omu kubabalira abandi.