1. Ano ang ginapasalig ni Jehova sa mga nakasala nga nagahinulsol?

 SI Jehova ang aton Manunuga, Manughatag sing Kasuguan, kag Hukom. Sia man ang aton mahigugmaon nga Amay sa langit. (Sal. 100:3; Isa. 33:22) Gani kon makasala kita sa iya pero sinsero kita nga nagahinulsol, mapatawad niya kita kag gusto gid niya ini himuon. (Sal. 86:5) Paagi kay manalagna Isaias, ginapasalig kita ni Jehova nga palangga niya kita kay nagsiling sia: “Bisan pa ang inyo mga sala mapula, papution ini kaangay sang niebe.”—Isa. 1:18.

2. Kon gusto naton mangin suod sa iban, ano ang dapat naton himuon?

² Bangod indi kita tanan perpekto, may masiling kita kag mahimo nga makasakit sa balatyagon sang iban. (Sant. 3:2) Pero indi buot silingon sini nga indi na kita puede mangin suod sa ila. Puede kita gihapon mangin suod sa ila kon panikasugan naton nga magpatawad. (Hulu. 17:9; 19:11; Mat. 18:21, 22) Kon nasakitan kita bangod sang gamay nga mga sala sang iban, gusto ni Jehova nga magpatawad kita. (Col. 3:13) May maayo gid nga rason kon ngaa dapat naton ini himuon. Kay man, kinabubut-on kita nga ginapatawad ni Jehova “sing bugana.”—Isa. 55:7.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton kon paano mailog sang indi perpekto nga mga tawo si Jehova sa pagpatawad sa iban. Ano nga mga sala ang dapat naton isugid sa mga gulang? Ngaa gusto ni Jehova nga patawaron naton ang iban? Kag ano ang matun-an naton sa pila naton ka kauturan nga grabe ang pag-antos bangod sang ginhimo nga mga sala sang iban?

4. (a) Kon nakahimo sang serioso nga sala ang isa ka alagad ni Jehova, ano ang dapat niya himuon? (b) Ano ang responsibilidad sang mga gulang kon nagaistorya sila sa isa nga nakasala?

⁴ Kon may nakahimo sang serioso nga sala, dapat naton ini isugid sa mga gulang. Mabasa naton sa 1 Corinto 6:9, 10 ang pila ka halimbawa sang serioso nga mga sala. Ang nagahimo sang serioso nga sala nagalapas gid sa kasuguan sang Dios. Kon nakahimo sang serioso nga sala ang isa ka Cristiano, dapat sia magpalapit kay Jehova nga Dios paagi sa pangamuyo, kag dapat sia makig-istorya sa mga gulang sang kongregasyon. (Sal. 32:5; Sant. 5:14) Ano ang responsibilidad sang mga gulang? Matuod, si Jehova lang ang may awtoridad nga magpatawad sing bug-os, kag ginapatawad niya ang aton mga sala base sa halad-gawad. * Pero ginhatagan ni Jehova ang mga gulang sang responsibilidad nga gamiton ang Kasulatan sa pagdesisyon kon bala dapat pa magpabilin sa kongregasyon ang isa nga nakasala ukon indi. (1 Cor. 5:12) Para mahimo ini, ginatinguhaan nila nga mabal-an ang sabat sa masunod nga mga pamangkot: Hungod bala nga ginhimo sang isa ka utod ang sala? Ginplano bala niya ini? Gintinguhaan bala niya nga taguon ang iya sala? Padayon bala niya nga ginahimo ang serioso nga sala sa malawig nga tion? Labaw sa tanan, may ebidensia bala nga nagahinulsol gid sia sa iya sala? May pamatuod bala nga ginpatawad na sia ni Jehova?—Binu. 3:19.

5. Ano ang maayo nga resulta sang ginahimo sang mga gulang?

⁵ Kon nagaistorya ang mga gulang sa nakasala, ginatinguhaan nila nga makahimo sang desisyon nga pareho sa desisyon nga nahimo na ni Jehova sa langit. (Mat. 18:18) Paano makabenepisyo ang kongregasyon sa ginahimo sang mga gulang? Maamligan sini ang kongregasyon paagi sa pagsigurado nga masikway ang nakasala nga wala nagahinulsol nga posible maghalit sa hamili nga mga alagad ni Jehova. (1 Cor. 5:6, 7, 11-13; Tito 3:10, 11) Posible nga mapalig-on man sini nga maghinulsol ang nakasala para mapatawad sia ni Jehova. (Luc. 5:32) Nagapangamuyo ang mga gulang para sa nakasala nga nagahinulsol, kag nagapangabay sila kay Jehova nga buligan sia nga mangin suod liwat sa Iya.—Sant. 5:15.

6. Kon na-disfellowship ang isa ka tawo, posible pa bala nga patawaron sia ni Jehova? Ipaathag.

⁶ Ano abi kon wala nagahinulsol ang nakasala sang gin-istorya sia sang mga gulang? I-disfellowship sia sa kongregasyon. Kon may nalapas sia nga kasuguan sang gobierno, indi sia pag-amligan sang mga gulang kon silutan sia bangod sang iya sala. Ginatugutan ni Jehova ang mga gobierno nga hukman kag silutan ang bisan sin-o nga nagalapas sang kasuguan, kag wala ini nagadepende kon bala nagahinulsol sia ukon wala. (Roma 13:4) Sa ulihi, kon marealisar niya nga sala ang iya ginhimo kag sinsero sia nga maghinulsol kag maghimo sang mga pagbag-o, handa si Jehova sa pagpatawad sa iya. (Luc. 15:17-24) Patawaron sia ni Jehova bisan pa serioso gid ang iya mga sala.—2 Cron. 33:9, 12, 13; 1 Tim. 1:15.

7. Ano ang buot silingon kon ginapatawad naton ang nakasala sa aton?

⁷ Nagapasalamat gid kita kay indi kita ang magadesisyon para patawaron ni Jehova ang isa nga nakasala. Pero may dapat man kita desisyunan. Ano ini? May mga tion nga makasala sa aton ang isa ka tawo kag basi serioso pa gani ini nga sala. Posible nga mag-sorry sia sa aton kag magpangabay nga patawaron naton sia. Pero posible man nga indi niya ini paghimuon. Mag-sorry man sia ukon indi, puede kita gihapon makadesisyon nga patawaron sia. Buot  silingon, dulaon naton ang aton kaakig sa iya. Ang matuod, posible nga mabudlay ini himuon kag kinahanglan ang tion para mahimo naton ini, ilabi na kon grabe gid kasakit ang nabatyagan naton. Ang Septiembre 15, 1994, nga Ang Lalantawan nagsiling: “Kon ginapatawad mo ang isa ka makasasala, wala ini nagakahulugan nga ginatolerar mo ang sala. Para sa Cristiano, ang pagpatawad nagakahulugan sang masinaligon nga pagtugyan sang natabo sa kamot ni Jehova. Sia ang matarong nga Hukom sa bug-os nga uniberso, kag ipadapat niya ang katarungan sa nagakaigo nga tion.” Ngaa gusto ni Jehova nga magpatawad kita kag magsalig sa iya matarong nga paghukom?

8. Kon nagapasalamat kita sa kaluoy ni Jehova, ano ang ginapalig-on sini nga himuon naton?

⁸ Kon nagapatawad kita, ginapakita naton nga nagapasalamat kita sa kaluoy ni Jehova. Sa isa ka ilustrasyon ni Jesus, ginpaanggid niya si Jehova sa isa ka agalon nga wala na nagpabayad sa daku nga utang sang isa niya ka ulipon nga indi na makasarang magbayad. Pero wala naluoy ini nga ulipon sa pareho niya nga ulipon nga gamay lang ang utang sa iya. (Mat. 18:23-35) Ano ang ginatudlo ni Jesus sa aton? Kon nagapasalamat gid kita sa daku nga kaluoy ni Jehova sa aton, magapalig-on ini sa aton nga patawaron ang iban. (Sal. 103:9) Pila na ka tuig ang nagligad, Ang Lalantawan nagsiling: “Bisan pa pila ka beses naton nga patawaron ang iban, indi gid sini matupungan ang pagpatawad kag kaluoy sang Dios sa aton base sa halad sang Cristo.”

9. Sin-o ang ginapakitaan ni Jehova sing kaluoy? (Mateo 6:14, 15)

⁹ Kon ginapatawad naton ang iban, patawaron man kita ni Jehova. Ginapakitaan ni Jehova sing kaluoy ang mga maluluy-on. (Mat. 5:7; Sant. 2:13) Maathag ini sa ginsiling ni Jesus sang gintudluan niya ang iya mga disipulo kon paano mangamuyo. (Basaha ang Mateo 6:14, 15.) Pareho man sa sini ang matun-an naton sa ginsiling ni Jehova sa iya matutom nga alagad nga si Job. Nasakitan gid si Job sa masakit nga ginhambal sa iya sang tatlo ka lalaki nga sanday Elifaz, Bildad, kag Zofar. Ginsilingan ni Jehova si Job nga mangamuyo para sa ila. Sang ginhimo ini ni Job, ginpakamaayo sia ni Jehova.—Job 42:8-10.

10. Ngaa masiling naton nga ginahalitan naton ang aton kaugalingon kon indi naton pagdulaon ang aton kaakig? (Efeso 4:31, 32)

¹⁰ Ginahalitan naton ang aton kaugalingon kon indi naton pagdulaon ang aton kaakig. Ang kaakig daw pareho sa isa ka mabug-at nga palas-anon nga nagapabudlay sa aton. Gusto ni Jehova nga dulaon naton ang kaakig para magtawhay ang aton balatyagon. (Basaha ang Efeso 4:31, 32.) Ginapalig-on niya kita nga ‘isikway ang kaakig kag bayaan ang kasingkal.’ (Sal. 37:8) Kon sundon naton ini nga laygay, makabulig gid ini sa aton. Pero kon indi naton pagdulaon ang aton kaakig sa tawo nga nakasakit sa aton, posible nga may malain ini nga epekto sa aton lawas kag hunahuna. (Hulu. 14:30) Daw pareho ini sa pag-inom sang hilo. Sin-o bala ang mahalitan kon mag-inom kita sang hilo? Indi ang iban, kundi kita. Gani kon indi naton pagpatawaron ang nakasakit sa aton, indi sia ang mahalitan kundi kita. Pero kon patawaron naton sia, para ini sa aton kaayuhan. (Hulu. 11:17) Magatawhay ang aton hunahuna kag balatyagon, kag makapadayon kita sa aton pag-alagad kay Jehova.

11. Ano ang ginasiling sang Biblia parte sa pagtimalos? (Roma 12:19-21)

¹¹ Si Jehova ang may kinamatarong sa pagtimalos. Wala kita ginhatagan ni Jehova sang awtoridad sa pagtimalos sa nakasala sa aton. (Basaha ang Roma 12:19-21.) Bangod indi kita perpekto kag wala naton nabal-an ang tanan  nga impormasyon, indi naton masarangan ang ginahimo sang Dios nga husto pirme ang paghukom. (Heb. 4:13) Kag kon kaisa, posible nga daw indi kita kabalo kon ano ang dapat naton himuon bangod naimpluwensiahan kita sang aton emosyon. Gintuytuyan ni Jehova si Santiago nga magsulat: “Ang kaakig sang tawo wala nagaresulta sa paghimo sing matarong sa panulok sang Dios.” (Sant. 1:20) Makasigurado kita nga himuon ni Jehova ang husto kag siguraduhon niya nga mapatuman ang hustisya sa ulihi.

12. Paano naton mapakita nga nagasalig kita sa hustisya ni Jehova?

¹² Kon nagapatawad kita, ginapakita naton nga nagasalig kita sa hustisya ni Jehova. Kon ginatugyan naton kay Jehova ang natabo sa aton, ginapakita naton nga nagapati gid kita nga dulaon ni Jehova ang tanan nga malain nga epekto sang sala. Sa bag-o nga kalibutan nga iya ginpromisa, ‘indi na gid pagdumdumon, ukon magpabilin sa tagipusuon’ ang masakit naton nga naeksperiensiahan. (Isa. 65:17) Pero kon grabe gid kasakit ang aton nabatyagan, posible pa bala nga madula naton ang aton kaakig sa tawo nga nakasakit sa aton kag mapatawad sia? Binagbinaga kon paano ini nahimo sang iban.

13-14. Parte sa pagpatawad, ano ang natun-an mo sa eksperiensia nanday Tony kag José?

¹³ Madamo sa aton mga kauturan ang nagdesisyon nga magpatawad bisan pa grabe gid kasakit ang ila nabatyagan bangod sang ginhimo sang iban. Ano nga mga pagpakamaayo ang nabaton nila bangod nagpatawad sila?

¹⁴ Binagbinaga ang eksperiensia ni Tony * nga taga-Pilipinas. Ginpatay ang isa niya ka magulang nga lalaki sang isa ka tawo nga si José. Madugay na ini nga natabo antes pa nangin Saksi ni Jehova si Tony. Bayolente gid sadto si Tony kag gusto gid niya magtimalos kay José. Nadakpan si José kag ginpriso. Sang ulihi, sang nakagua na sa prisuhan si José, desidido gid si Tony nga pangitaon sia kag patyon. Gani nagbakal sia sang armas. Pero nagsugod sa pag-Bible study si Tony sa mga Saksi ni Jehova. Nagsiling sia, “Sa pag-Bible study ko, natun-an ko nga dapat ako maghimo sang mga pagbag-o sa akon pamatasan kag ginahimo, kag lakip sa sini ang pagdula ko sang akon kaakig.” Sang ulihi, nabawtismuhan si Tony kag nangin gulang sia sa  kongregasyon. Nakibot gid sia sang nabal-an niya nga nangin bawtismado man nga alagad ni Jehova si José. Sang nagkit-anay sila nga duha, hugot sila nga naghaksanay, kag ginsilingan ni Tony si José nga napatawad na niya sia. Nagsiling si Tony nga bangod ginpatawad niya si José, nabatyagan niya ang daku nga kalipay nga indi niya malaragway. Ginpakamaayo gid ni Jehova si Tony bangod handa sia magpatawad.

15-16. Parte sa pagpatawad, ano ang natun-an mo sa eksperiensia nanday Peter kag Sue?

¹⁵ Sang 1985, samtang naga-attend sang miting sanday Peter kag Sue sa Kingdom Hall, gulpi lang nga may naglupok sing mabaskog. May tawo gali nga nagbutang sang bomba sa sulod sang Kingdom Hall. Natam-an gid si Sue kay permanente nga nahalitan ang iya panan-awan kag palamatin-an. Indi na man sia makapanimaho. * Pirme sadto nagapamensar sanday Peter kag Sue, ‘Ano nga klase sang tawo ang makahimo sang amo sini kalain?’ Indi Saksi ni Jehova ang tawo nga nagbutang sang bomba. Pagligad sang madamo nga tinuig, nadakpan sia kag ginsentensiahan nga mapriso asta buhi sia. Sang ginpamangkot sanday Peter kag Sue kon napatawad na nila ini nga tawo, nagsiling sila: “Gintudluan kami ni Jehova nga kon indi namon pagdulaon ang amon kaakig, makahalit ini sa amon lawas, emosyon, kag hunahuna. Gani ginpangabay dayon namon si Jehova nga buligan kami nga madula ang amon kaakig para mangin malinong ang amon hunahuna.”

¹⁶ Mahapos lang bala sa ila nga magpatawad? Indi amo sina kahapos. Nagsiling pa sila: “May mga tion nga nabudlayan si Sue bangod sang epekto sa iya sang paglupok. Bangod sini, makabatyag naman kami sang kaakig. Pero wala kami nagapokus sa sini, gani madasig lang ini nga nagakadula. Sa tuod lang, masiling gid namon nga kon mag-Saksi sa ulihi ang tawo nga nagbutang sang bomba, batunon gid namon sia bilang aton utod. Bangod sang amon naeksperiensiahan, natun-an namon nga kon sundon naton ang mga prinsipio sa Biblia, mangin matawhay ang aton hunahuna. Paagi sa sini, makabatyag kita sang kakalma nga sobra pa sa maimadyin naton. Napabakod man kami kay  kabalo kami nga malapit na dulaon ni Jehova ang tanan nga malain nga epekto sang trahedya nga naeksperiensiahan namon.”

17. Parte sa pagpatawad, ano ang natun-an mo sa eksperiensia ni Myra?

¹⁷ Sang nangin Saksi si Myra, may bana na sia kag may duha sila ka gagmay pa nga bata. Indi gusto mag-Saksi sang iya bana. Sang ulihi, nagpanghilahi ang iya bana kag ginbiyaan ang ila pamilya. Nagsiling si Myra: “Sang ginbiyaan kami sang akon bana, nabatyagan ko ang ginabatyag sang kalabanan nga tawo nga ginbiyaan sang ila pinalangga. Indi ako makapati, grabe ang akon kasubo, nagbatyag ako nga kuntani may ginhimo ako, ginbasol ko ang akon kaugalingon, kag akig gid ako.” Bisan pa indi na sila mag-asawa, indi madula ang kasakit nga iya nabatyagan bangod sang pagluib sang iya bana. Nagsiling pa si Myra: “Pila ka bulan ako nga nag-antos bangod sini nga balatyagon, kag narealisar ko nga naapektuhan na sini ang akon kaangtanan kay Jehova kag sa iban.” Subong, nagsiling si Myra nga nadula na niya ang iya kaakig kag wala na sia nagadumot sa iya bana. Nagalaum sia nga magaalagad man kay Jehova ang iya bana sa ulihi. Nagapokus na si Myra sa palaabuton. Sia lang ang nagpadaku sa iya duha ka kabataan kag nabuligan niya sila nga mangin mga alagad ni Jehova. Subong, malipayon si Myra nga nagaalagad kay Jehova kaupod sang iya kabataan kag sang ila mga pamilya.

18. Bangod si Jehova ang Supremo nga Hukom, sa ano kita makasalig?

¹⁸ Nagapasalamat gid kita kay indi kita ang magadesisyon kon paano hukman ang mga tawo. Bangod si Jehova ang Supremo nga Hukom, sia ang magadesisyon. (Roma 14:10-12) Makasalig gid kita nga kon nagahukom sia, pirme ini nabase sa iya perpekto nga mga kasuguan parte sa husto kag sala. (Gen. 18:25; 1 Hari 8:32) Indi gid sia maghimo sang indi matarong.

19. Ano ang matabo kon ipatuman na ni Jehova sing bug-os ang hustisya?

¹⁹ Bangod indi perpekto ang mga tawo kag bangod sang sala, madamo kita sang mga pag-antos nga naeksperiensiahan. Gusto na gid naton mag-abot ang tion nga dulaon na ni Jehova ini tanan. Sa sina nga tion, magaayo na ang tanan naton nga pilas sa pisikal kag sa balatyagon. (Sal. 72:12-14; Bug. 21:3, 4) Indi na gid naton ini pagdumdumon. Samtang ginahulat naton ining dalayawon nga palaabuton, nagapasalamat gid kita kay Jehova bangod ginhatagan niya kita sang ikasarang nga ilugon sia sa pagpatawad.