1. Iehova ese helalo-kerehai taudia dekenai dahaka hagoadaia herevana ia henia?

 ENA BE Iehova be iseda Havaraia Tauna bona Taravatu Henia Tauna, to danu ia be iseda lalokau guba Tamana. (Sal. 100:3; Isa. 33:22) Kara dika badana ta ita karaia bona ita helalo-kerehai momokani neganai, Iehova be ia hegeregere iseda dika ia gwauatao bona ia ura bada unai bamona ia karaia. (Sal. 86:5) Iehova be peroveta tauna Isaia amo inai hagoadaia herevana ia henia, ia gwau: “Ena be emui kara dika be kakakaka momokani, to do ia kurokuro momokani, sinou bamona.”​—Isa. 1:18.

2. Ma haida ida hetura karana namona ita moalelaia totona dahaka ita karaia be namo?

² Ita be goevadae lasi taudia dainai, iseda hereva bona kara amo ma haida ita hahisia diba. (Iam. 3:2) To, bema ma haida edia dika ita gwauatao, hetura karana namona do ita moalelaia. (Aon. 17:9; 19:11; Mat. 18:21, 22) Bema ta ese ia karaia o herevalaia gau maragina dainai ita lalohisihisi, Iehova ia ura dika ita gwauatao. (Kol. 3:13) Badina namodia dainai unai bamona ita karaia. Laloatao, Iehova be mai kudouna ibounai ida iseda dika ia “gwauatao momokani.”​—Isa. 55:7.

3. Inai atikol ai dahaka do ita herevalaia?

³ Inai atikol ai, do ita itaia edena dala ai goevadae lasi taudia ese Iehova idia tohotohoa bona ma haida edia dika idia  gwauatao. Elda taudia dekenai edena bamona kara dikadia ita gwauraia be namo? Dahaka dainai Iehova ia ura ma haida edia dika ita gwauatao? Bona ma haida edia kara dika dainai idia hisihisi bada tadikaka taihu amo dahaka do ita dibaia?

4. (a) Iehova ena hesiai tauna be kara dika badana ta ia karaia neganai, dahaka ia karaia be namo? (b) Elda taudia be kerere tauna ida idia hebou neganai, dahaka idia karaia be namo?

⁴ Ta be kara dika badana ia karaia neganai, elda taudia ita hadibaia be namo. Korinto Ginigunana 6:9, 10 ese unai bamona kara dika badadia haida ia herevalaia. Dirava ena taravatu ia utua karadia be kara dika badadia. Bema Keristani tauna be unai bamona kara dikana ia karaia, namona be Iehova Dirava dekenai ia guriguri, bona elda taudia ia hadibaia. (Sal. 32:5; Iam. 5:14) Elda taudia be dahaka do idia karaia? Iehova sibona be mai ena maoro kara dika ibounai ia gwauatao totona, bona Keriso ena mauri davana amo unai ia karaia. * To Iehova ese elda taudia dekenai maduna ia henia, Baibel ena hakaua dalana hegeregerena abia hidi idia karaia, kara dika tauna be kongrigeisen ai do ia noho eiava lasi. (1 Kor. 5:12) Elda taudia ese unai idia karaia totona inai henanadai edia haere idia tahua be namo: Ia be palani ia karaia kara dika badana ia karaia totona, a? Ia ura ma haida amo kara dika ia hunia, a? Nega daudau lalonai unai kara dika ia karaia loulou, a? Mai anina bada gauna be, ia hahedinaraia ia helalo-kerehai momokani, a? Gau haida ese idia hamomokania Iehova ese ena dika ia gwauatao vadaeni, a?​—Kara 3:19.

5. Elda taudia edia gaukara ese dahaka namo ia havaraia?

⁵ Elda taudia be kerere tauna ida idia hebou neganai, edia tahua gauna be Dirava ese ia karaia vadaeni disisen idia badinaia. (Mat. 18:18) Edena dala ai unai ese kongrigeisen ia durua diba? Ia helalo-kerehai lasi tauna be kongrigeisen amo idia atoa siri neganai, Iehova ena hesiai taudia ia gimaia. (1 Kor. 5:6, 7, 11-13; Tito 3:10, 11) Danu unai ese kara dika tauna ia durua ia helalo-kerehai bona Iehova ese ena dika do ia gwauatao. (Luka 5:32) Elda taudia be helalo-kerehai tauna totona idia guriguri bona Iehova idia noia do ia durua ena hetura karana Ia ida ia hanamoa lou totona.​—Iam. 5:15.

6. Bema ta be kongrigeisen amo idia atoa siri, Iehova ese ena dika do ia gwauatao, a? Herevalaia.

⁶ Bema elda taudia ida ia hebou tauna ia helalo-kerehai lasi be edena bamona? Ia be kongrigeisen amo do idia atoa siri. Bema ia be gavamani ena taravatu ia utua, ena kerere ena davana ia abia totona elda taudia ese do idia gimaia lasi. Iehova ese gavamani dekenai maoro ia henia taravatu utua tauna ta idia hahemaoro henia bona panisia totona, ena be ia helalo-kerehai eiava lasi. (Roma 13:4) To, bema unai tauna be gabeai ia laloparara ia karaia karana be kerere bona ena kara ia haidaua momokani, Iehova be mai ura ida ena dika ia gwauatao diba. (Luka 15:17-24) Oibe, ena be kara dika badana ia karaia, to Iehova ese ena dika do ia gwauatao.​—2 Siv. 33:9, 12, 13; 1 Tim. 1:15.

7. Edena dala ai ita ia kara dika henia tauna ena dika ita gwauatao diba?

⁷ Ita be abia hidi ita karaia lasi Iehova ese ta ena dika do ia gwauatao totona! To, gau ta dekenai abia hidi ita karaia diba. Unai be dahaka? Nega haida, ta be ita dekenai kara dika ia karaia, to reana ia sori bona ita ia noia  ena dika ita gwauatao totona. Nega haida, unai bamona ia karaia lasi. Unai neganai, disisen ita karaia diba iena dika ita gwauatao bona ita badu noho lasi. Momokani, bema ita ia hahisia bada, reana do ia auka unai bamona ita karaia totona. September 15, 1994 Gima Kohorona ia gwau: “Kara dika tauna ena dika oi gwauatao neganai, unai anina be oi gwau lasi unai dika be namo. Keristani tauna dekenai, dika gwauatao karana ena anina be mai emu abidadama danu Iehova ena imana dekenai oi atoa. Ia be guba bona tanobada ibounai ena Hahemaoro maoromaoro Tauna, bona nega korikori dekenai hahemaoro maoromaoro do ia karaia.” Dahaka dainai Iehova ese ita ia hagoadaia dika ita gwauatao bona ita abia dae Ia ese hahemaoro maorona do ia karaia?

8. Edena dala ai dika gwauatao karana ese ia hahedinaraia Iehova ena hebogahisi karana ita laloa bada?

⁸ Dika ita gwauatao neganai, Iehova ena hebogahisi karana ita laloa bada. Parabole ta lalonai, Iesu ese Iehova be biaguna ta ida ia hahegeregerea. Unai biaguna be ena hesiai tauna ena abitorehai badana ia gwauatao. To, hesiai tauna ma ta be unai hesiai tauna amo moni sisina ia abitorehai neganai, hebogahisi karana ia hahedinaraia lasi. (Mat. 18:23-35) Iesu ese ita dekenai dahaka ia hadibaia? Bema Iehova ese ita dekenai ia hahedinaraia hebogahisi bada karana ita laloa bada, unai ese ita do ia hagoadaia ma haida edia dika ita gwauatao totona. (Sal. 103:9) Lagani momo gunanai, Watchtower ta ia gwau: “Herevana nega momo ma haida edia dika ita gwauatao, to Keriso ena boubou gauna amo Dirava ese iseda dika ia gwauatao karana ese unai ia hereaia.”

9. Iehova ese daika dekenai hebogahisi karana ia hahedinaraia? (Mataio 6:14, 15)

⁹ Dirava ese dika gwauatao taudia edia dika do ia gwauatao. Iehova ese hebogahisi idia hahedinaraia taudia ia hebogahisi henia. (Mat. 5:7; Iam. 2:13) Iesu ese hahediba taudia dekenai guriguri dalana ia hadibaia neganai unai ia gwauraia. (Mataio 6:14, 15 duahia.) Iehova ese ena hesiai tauna Iobu dekenai ia herevalaia gaudia amo unai ita dibaia danu. Unai abidadama tauna be ia lalohisihisi bada badina Elipasa, Biledada, bona Sopara be lalona hahisia herevadia idia gwauraia. Iehova ese Iobu ia hamaoroa idia totona ia guriguri. Iobu be unai bamona ia karaia murinai, Iehova ese ia hanamoa.​—Iobu 42:8-10.

10. Dahaka dainai badu noho karana ese dika ia havaraia diba? (Efeso 4:31, 32)

¹⁰ Badu noho karana ese dika ia havaraia. Badu karana be gau metauna ta bamona, bona Iehova ia ura unai kara ita dadaraia bona lalomaino ita abia. (Efeso 4:31, 32 duahia.) Ia ese ita ia noia ‘badu karana bona dagedage karana ita rakatania’ totona. (Sal. 37:8) Unai sisiba herevana ita badinaia be mai ena namo. Badu noho karana ese iseda tauanina bona laloa dalana ia hadikaia diba. (Aon. 14:30) Ita badu noho neganai, ita ia hahisia tauna ia hadikaia lasi to ita sibona ita hadikaia, unai be hegeregere poisini gauna ta ita inua bona ita ia hadikaia bamona. To, ma haida edia dika ita gwauatao neganai, ita dekenai namo ia havaraia. (Aon. 11:17) Oibe, lalomaino ita abia bona Iehova ita hesiai henia noho.

11. Dika davana haloua karana dekenai Baibel be dahaka ia gwau? (Roma 12:19-21)

¹¹ Iehova ese dika davana do ia henia. Iehova ese ita dekenai maoro ia henia lasi, ita ia  kara dika henia tauna ena dika davana ita haloua totona. (Roma 12:19-21 duahia.) Ita be goevadae lasi taudia dainai, ita hegeregere lasi gau ta ita hamaoromaoroa totona, to Dirava sibona ese unai ia karaia diba. (Heb. 4:13) Bona nega haida, iseda hemami ese ita ia biagua dainai ia auka kara maorona ita karaia totona. Iehova ena heduru amo Iamesi be inai ia torea: “Tau ta ena badu ese Dirava ena kara maoromaoro ia havaraia diba lasi.” (Iam. 1:20) Ita diba momokani, Iehova be kara maorona do ia karaia bona hahemaoro goevana do ia karaia.

12. Edena dala ai ita abia dae Iehova be hahemaoro do ia karaia?

¹² Dika ita gwauatao neganai, ita abia dae Iehova be hahemaoro do ia karaia. Iehova ena imana dekenai gau ibounai ita rakatania neganai, ita abia dae momokani kara dika dainai idia vara dika ibounai do ia kokia. Iehova ese ia gwauhamatalaia tanobada matamatana ai, gau dikadia do ita “laloa lou lasi, eiava do ita laloaboio momokani.’ (Isa. 65:17) To ta ese ita ia hahisia bada neganai, do ita badu noho lasi, a? Mani haida ese unai idia karaia dalana ita itaia.

13-14. Tony bona José edia ekspiriens amo dika gwauatao karana dekenai dahaka oi dibaia?

¹³ Iseda tadikaka bona taihu momo be ma haida edia kara ese idia hahisia bada neganai, edia dika idia gwauatao. Unai bamona idia karaia dainai dahaka namo idia davaria?

¹⁴ Philippines ai ia noho tauna ta ladana Tony * be hereva momokani ia do dibaia lasi neganai, ia diba ena kakana be tau ta ladana José ese ia alaia. Unai nega ai, Tony ia badu dikadika bona ia ura dika davana ia haloua. José be ena kara dika dainai idia arest bona dibura ruma ai idia atoa. Gabeai, José idia ruhaia neganai, Tony be ena lalona ia hadaia ia do ia tahua bona hamasea. Unai dainai ipidi ta ia hoia. To unai nega ai, Tony be Iehova ena Witnes taudia ida Baibel ia stadilaia matamaia. Ia gwau, “Baibel lau stadilaia noho lalonai, lau laloparara egu kara lau haidaua bona egu badu karana lau rakatania be namo.” Gabeai, ia bapatiso bona elda ta ai ia lao. Tony ia kamonai José be Iehova ena hesiai tauna ta ai ia lao neganai, ia hoa! Idia ruaosi idia  hedavari neganai, ta ta idia rosia bona Tony ese José ia hamaoroa iena dika ia gwauatao vadaeni. Ia gwau José ena dika ia gwauatao karana dainai ia mamia moalena be idau momokani. Oibe, Tony be mai ura ida dika ia gwauatao dainai Iehova ese ia hanamoa.

15-16. Peter bona Sue edia ekspiriens amo dika gwauatao karana dekenai dahaka oi dibaia?

¹⁵ Lagani 1985 ai, Peter bona Sue be Kingdom Hall ta dekenai idia hebou noho neganai, bomu ta ia pou. Tau ta ese Kingdom Hall dekenai bomu ia atoa! Sue be bero badana ia davaria dainai ena itaia bona kamonai karana ia dika. Bona gau idauidau bonaia karana ia dika danu. * Nega momo Peter bona Sue idia laloa, ‘Dahaka dainai unai tauna be unai bamona kara dikana ia karaia?’ Lagani momo murinai, bomu ia atoa tauna idia arest bona dibura ruma ai idia atoa, ia be Iehova ena hesiai tauna lasi. Peter bona Sue idia nanadaia bema unai tauna ena dika idia gwauatao vadaeni neganai, idia gwau: “Iehova ese ai ia hadibaia, bema ai abia hisihisi ai laloa momo bona ai badu noho, unai ese emai tauanina, hemami, bona lalohadai ia hadikaia diba. Unai dainai hekwakwanai ia vara bona daudau lasi murinai, Iehova ai noia ai do ia durua ai badu noho lasi, unai amo maino dekenai do ai noho.”

¹⁶ Unai tauna ena dika idia gwauatao be auka, a? Oibe. Idia gwau: “Nega haida, Sue be ia davaria bero dainai ia hisihisi neganai, ai lalohisihisi lou. To ia vara gauna ai laloa loulou lasi, unai dainai unai hemami ia ore haraga. Oibe, mai momokani ida ai gwau diba, dina ta unai tauna be tadikaka ta ai ia lao neganai, do ai welkam henia. Ia vara gauna amo ai diba Baibel ena hakaua herevadia badinaia karana be mai ena namo, bona dala idauidau dekenai ai ia durua! Danu ai diba, Iehova ese kahirakahira dika ibounai do ia haorea bona unai ese ai ia hagoadaia.”

17. Myra ena ekspiriens amo dika gwauatao karana dekenai dahaka oi dibaia?

¹⁷ Myra ia headava bona ena natudia maragidia be rua neganai, hereva momokani ia dibaia.  Iena adavana be hereva momokani ia abia dae lasi. Gabeai, ia heudahanai bona idia ia rakatania. Myra ia gwau: “Egu adavana ese lau bona natudia rua ia rakatania neganai, momo be edia lalokau taudia ese idia rakatania murinai idia abia hemamina lau abia, hegeregere lau hoa, ia vara gauna lau abia dae lasi, lau lalohisihisi, sibona lau bleim, bona lau badu.” Ena be Myra ena headava ia doko, to ena tau ese ia koia dainai ia do lalohisihisi noho. Myra ma ia gwau: “Hua momo lalonai lau lalohekwarahi bona lau badu, bona lau laloparara unai ese egu hetura karana Iehova bona ma haida ida ia hadikaia.” Hari, Myra ia badu noho lasi bona ia ura lasi ena adavana gunana dekenai dika ta ia vara. Ia ura ena adavana gunana be dina ta Iehova kahirakahira do ia lao. Myra be vaira nega ai do idia vara gau namodia sibona ia laloa. Ia ese ena natudia rua ia durua Iehova idia hesiai henia totona. Hari Myra be mai moale ida ena natudia bona edia ruma bese ida Iehova idia hesiai henia noho.

18. Ita abia dae Hahemaoro Tauna Badana, Iehova, be dahaka do ia karaia?

¹⁸ Ita be abia hidi do ita karaia lasi Iehova ese ta ia hahemaoro henia totona! Ia be Hahemaoro Tauna Badana dainai, ia sibona ese unai mai anina bada gaukarana do ia karaia. (Roma 14:10-12) Ita abia dae momokani Iehova be ena hahemaoro karana lalonai, nega ibounai maoro bona kerere dekenai ena taravatu goevadia do ia badinaia. (Gen. 18:25; 1 Kin. 8:32) Ia be hanaihanai kara maorona do ia karaia!

19. Iehova ena hahemaoro goevana dainai dahaka do ia vara?

¹⁹ Ita ura bada Iehova ese kara dika ibounai do ia haorea negana ita itaia. Unai negai, ita davaria hisihisi ibounai do idia ore momokani. (Sal. 72:12-14; Apok. 21:3, 4) Unai gaudia do ita laloa lou lasi. Unai nega namona ita naria noho lalonai, Iehova ita tanikiu henia badina ita ia hagoadaia ma haida edia dika ita gwauatao, unai amo ia ita tohotohoa diba.