1. Ania ti impasigurado ni Jehova kadagiti agbabbabawi a nakabasol?

 URAY no ni Jehova ti Namarsua, nangted kadagiti linteg, ken Ukomtayo, isu ket naayat met a nailangitan nga Amatayo. (Sal. 100:3; Isa. 33:22) No naimpusuan nga agbabawitayo iti aniaman a nagbasolantayo kenkuana, saannatay la a kabaelan a pakawanen no di ket magagaran pay a mangaramid iti dayta. (Sal. 86:5) Babaen ken propeta Isaias, siaayat nga impasigurado ni Jehova: “Uray no nakalablabbaga dagiti basolyo, mapapurawdanto a kas iti niebe.”​—Isa. 1:18.

2. No kayattayo a natalna ti relasiontayo iti sabsabali, ania ti masapul nga aramidentayo?

² Gapu ta imperpektotayo amin, makaibaga ken makaaramidtayo kadagiti mangpasakit iti sabsabali. (Sant. 3:2) Ngem dina kayat a sawen nga imposible a maaddaantayo iti nasinged a relasion kadakuada. Posible dayta no sursuruentayo ti mamakawan. (Prov. 17:9; 19:11; Mat. 18:21, 22) No adda bassit a banag a naaramid wenno naibaga ti maysa a tao a nakasaktan wenno nakasairantayo, kayat ni Jehova nga agpipinnakawantayo. (Col. 3:13) Adda nasayaat a rason nga aramidentayo dayta. Ngamin, ‘naan-anay’ wenno dakkel ti panangpakawan ni Jehova kadatayo.​—Isa. 55:7.

3. Ania ti usigentayo iti daytoy nga artikulo?

³ Iti daytoy nga artikulo, usigentayo no kasano a matulad dagiti imperpekto a tattao ti panangpakawan ni Jehova. Ania dagiti basol a masapul nga ibagatayo kadagiti panglakayen? Apay a kayat ni Jehova a pakawanentayo ti dadduma? Ken ania ti masursurotayo iti dadduma a kapammatiantayo a nagsagaba iti kasta unay gapu iti basol ti sabsabali?

4. (a) No nakaaramid iti nadagsen a basol ti maysa nga adipen ni Jehova, ania ti masapul nga aramidenna? (b) Ania ti responsabilidad dagiti panglakayen no kasaritada ti maysa a nakabasol?

⁴ Masapul a mapakaammuan dagiti panglakayen no adda nakaaramid iti nadagsen a basol. Mabasa ti dadduma kadagita a basol iti 1 Corinto 6:9, 10. Dagiti nadagsen a basol ket nakaro a panangsukir iti linteg ti Dios. No nakaaramid ti maysa a Kristiano iti kasta a basol, masapul nga agkararag ken Jehova ken dumawat iti pammakawan, ken nasken a makisarita kadagiti panglakayen iti kongregasion. (Sal. 32:5; Sant. 5:14) Ania ti responsabilidad dagiti panglakayen? Ni laeng Jehova a Dios ti addaan iti responsabilidad a naan-anay a mangpakawan kadagiti basol, maibatay iti pangsubbot a daton. * Nupay kasta, intalek ni Jehova kadagiti panglakayen ti responsabilidad a mangtingiting babaen ti Kasuratan no ti nakabasol ket agtalinaed iti kongregasion. (1 Cor. 5:12) Tapno maaramidda dayta, ti maysa a makatulong ket ammuenda ti sungbat dagitoy a saludsod: Inggagara kadi daytoy a tao ti nagbasol? Implano ken inlimedna kadi ti dakes nga inaramidna? Nabayag kadin nga inar-aramidna dayta a basol? Kapatgan iti amin, adda kadi ebidensia a talaga nga agbabbabawi? Adda kadi pakakitaan a pinakawanen ni Jehova?​—Ara. 3:19.

5. Ania dagiti bendision nga iyeg ti trabaho dagiti panglakayen?

⁵ No kasarita dagiti panglakayen ti maysa a nakabasol, kalatda ti makaaramid iti desision ditoy daga a kapada ti desision a naaramiden idiay langit. (Mat. 18:18) Apay a pagsayaatan ti kongregasion daytoy nga urnos? Ngamin, dayta ti mangipasigurado a mailaksid ti di agbabbabawi a nakabasol a mabalin a mangdangran kadagiti napateg a karnero ni Jehova. (1 Cor. 5:6, 7, 11-13; Tito 3:10, 11) Matulongan met ti nakabasol nga agbabawi ken magunggonaan iti pammakawan ni Jehova. (Luc. 5:32) Ikararagan dagiti panglakayen ti agbabbabawi ken kiddawenda ken Jehova a tulonganna tapno maisubli ti relasionna kenkuana.​—Sant. 5:15.

6. No nailaksid ti maysa, posible pay ngata a mapakawan? Ilawlawag.

⁶ Ipapantayon a saan nga agbabbabawi ti nakabasol uray no kinasaritan dagiti panglakayen. No kasta, mailaksid isuna iti kongregasion. No linabsingna ti linteg ti gobierno, saan nga iliklik dagiti panglakayen kadagiti resulta ti inaramidna. Palpalubosan ni Jehova dagiti autoridad ti gobierno a mangukom ken mangdusa iti asinoman a manglabsing iti linteg​—agbabbabawi man wenno saan. (Roma 13:4) Ngem no makapagpampanunot inton agangay, talaga nga agbabbabawin ken nagbalbaliwen, sibubulos ti rikna ni Jehova a mangpakawan kenkuana. (Luc. 15:17-24) Aramidenna dayta uray no nakadagdagsen ti basol ti maysa.​—2 Cron. 33:9, 12, 13; 1 Tim. 1:15.

7. Iti ania a pamay-an a makuna a napakawantayon ti maysa a nakabasol kadatayo?

⁷ Anian a yamantayo ta saantayo a responsabilidad nga ikeddeng no pakawanen ni Jehova ti maysa a nakabasol! Ngem adda latta masapul nga ikeddengtayo. Ania dayta? Baka adda dagiti situasion a makabasol kadatayo ti maysa a tao. Mabalin a nadagsen pay ketdi dayta. Ngem kalpasanna, agpadispensar ken dumawat iti pammakawan. Adda met dagiti situasion a baka dina aramiden dayta. No kasta ti mapasamak, mabalin a pilientayo a pakawanen dayta a tao. Iti ania a pamay-an? Mabalintayo nga ikeddeng a palabsen ti aniaman  a sakit ti nakem ken gura a marikriknatayo kenkuana. Ngem saan a kaskarina dayta. Mabalin a tiempo ken panangikagumaan ti kasapulan, nangruna no nasaktantayo unay. Kuna Ti Pagwanawanan a Septiembre 15, 1994: “Bigbigenyo met a no pakawanenyo ti nakabasol, di kayat a sawen daytoy a pampanuynoyanyo ti basol. Para iti maysa a Kristiano, ti panangpakawan kaipapananna ti panangitalek kadagiti bambanag iti ima ni Jehova. Isu ti nalinteg nga Ukom iti intero nga uniberso, ket ipakatnanto ti hustisia iti tumutop (wenno umiso) a tiempo.” Apay a parparegtaennatayo ni Jehova a mangpakawan ken ipabiang kenkuana ti hustisia?

8. Kasano a ti panangpakawan ket pakakitaan nga ap-apresiarentayo ti asi ni Jehova?

⁸ Ti panangpakawan ket pakakitaan iti panangapresiar. Iti maysa nga ilustrasion ni Jesus, inyarigna ni Jehova iti maysa nga ari a dinan pinabayadan ti nagdakkel nga utang ti maysa nga adipenna a saan a makabayad. Ngem dayta a napakawan nga adipen ket saan a naasian iti maysa nga adipen a nakautang kenkuana iti basbassit nga amang a gatad ti kuarta. (Mat. 18:23-35) Ania ti isursuro kadatayo ni Jesus? No talaga nga ap-apresiarentayo ti nagdakkel nga asi ni Jehova kadatayo, matignaytayo a mangpakawan iti sabsabali. (Sal. 103:9) Kastoy ti kuna ti The Watchtower adu a tawenen ti napalabas: “Uray no mamin-adu a pakawanentayo ti padatayo a tattao, saanto a pulos pumada dayta iti kadakkel ti panangpakawan ken asi kadatayo ti Dios babaen ken Kristo.”

9. Siasino ti pangipakitaan ni Jehova iti asi? (Mateo 6:14, 15)

⁹ Mapakawan dagiti manangpakawan. Kaasian ni Jehova dagiti naasi. (Mat. 5:7; Sant. 2:13) Nalawag nga imbaga dayta ni Jesus idi insurona dagiti adalanna no kasano ti agkararag. (Basaen ti Mateo 6:14, 15.) Kasta met laeng ti masursurotayo iti imbaga ni Jehova iti adipenna a ni Job. Talaga a nasair dayta a matalek a tao kadagiti nasakit a sasao ti tallo a lallaki a da Elifaz, Bildad, ken Zofar. Imbaga ni Jehova ken ni Job nga ikararaganna ida. Idi inaramid dayta ni Job, binendisionan isuna ni Jehova.​—Job 42:8-10.

10. Apay a makadangran ti panagipempen iti sakit ti nakem? (Efeso 4:31, 32)

¹⁰ Makadangran ti panagipempen iti sakit ti nakem. Ti panagipempen iti sakit ti nakem ket kas iti panagawit iti nadagsen. Kayat ni Jehova nga ikkatentayo dagita tapno lumag-an ti riknatayo. (Basaen ti Efeso 4:31, 32.) Parparegtaennatayo nga isardengtayo ti “agunget” ken “agpungtot.” (Sal. 37:8) Pagsayaatantayo no surotentayo dayta a balakad. Ti panagipempen iti sakit ti nakem ket makadangran iti isip ken bagitayo. (Prov. 14:30) No nasakit latta ti nakemtayo iti nakabasol kadatayo, saan nga isuna ti maapektaran. Kasla dayta iti iyiinum iti sabidong. No inumem dayta, saan a ti nakabasol ti madangran. Ngem no mangpakawantayo, regregaluantayo ti bagitayo. (Prov. 11:17) Agbalin a natalna ti isip ken pusotayo, ken makapagtultuloytayo nga agserbi ken Jehova.

11. Ania ti kuna ti Biblia maipapan iti panagibales? (Roma 12:19-21)

¹¹ Kukua ni Jehova ti pammales. Saannatayo nga inikkan ni Jehova iti karbengan nga agibales no adda makabasol kadatayo. (Basaen ti Roma 12:19-21.) Gapu ta imperpektotayo ken limitado ti ammotayo, saantayo a kas iti Dios a kanayon nga umiso ti panangukomna. (Heb. 4:13) Ken no dadduma, ipalpalubostayo a ti emosiontayo ti mangkullaap iti umiso a  panagpampanunottayo. Impaisurat ni Jehova ken ni Santiago: “Ti pungtot ti tao ket saan a maitunos iti kinalinteg ti Dios.” (Sant. 1:20) Masiguradotayo nga umiso ti aramiden ni Jehova ken siertuenna a maipakat ti perpekto a hustisia.

12. Kasano a maipakitatayo nga agtaltalektayo iti hustisia ni Jehova?

¹² Ti panangpakawan ket pakakitaan nga agtalektayo iti hustisia ni Jehova. No ipabiangtayo ken Jehova dagiti bambanag, ipakpakitatayo nga agtaltalektayo ken Jehova nga ikkatennanto ti amin a dakes nga epekto ti basol. Iti inkarina a baro a lubong, dagiti nasaem unay a napasarantayo ket “saanton a malagip . . . , ken saanton nga agtalinaed dagita iti puso.” (Isa. 65:17) Ngem no nasaktantayo unay, talaga kadi a posible a maiwaksitayo ti pungtot ken sakit ti nakem? Kitaentayo no kasano a naaramid dayta ti dadduma.

13-14. Iti kapadasan da Tony ken José, ania ti masursurom maipapan iti panangpakawan?

¹³ Inkeddeng ti adu a kapammatiantayo ti mangpakawan uray no nasaktanda unay iti inaramid ti dadduma. Ania dagiti nasagrapda a bendision idi inaramidda dayta?

¹⁴ Taga-Pilipinas ni Tony. * Adu a tawen sakbay a nagbalin a Saksi ni Jehova, naammuanna a ti maysa kadagiti manongna ket pinatay ti lalaki nga agnagan José. Iti dayta a tiempo, nakauy-uyong ken nakarangranggas ni Tony, ket kayatna ti bumales. Naaresto ken naibalud ni José. Idi nawayawayaan ni José iti pagbaludan, determinado ni Tony a mangbirok kenkuana tapno patayenna. Gimmatang pay ketdi iti paltog nga usarenna. Kabayatanna, ni Tony ket nagpayadal iti Biblia kadagiti Saksi ni Jehova. Imbagana, “Bayat nga agad-adalak, nasursurok a masapul nga isardengko dagiti dakes nga ugalik ken iwaksik ti pungtot a marikriknak.” Idi agangay, nagpabautisar ni Tony ket di nagbayag, naapointaran kas panglakayen. Permi ti siddaawna idi naammuanna a ni José ket nagbalin metten a bautisado nga adipen ni Jehova! Idi nagkitada, naginnarakupda iti nairut, ken imbaga ni Tony ken José a pinakawannan. Imbaga ni Tony a dina madeskribir ti ragsak a nariknana gapu ta napakawannan ni José. Binendisionan ni  Jehova ni Tony gapu ta sibubulos ti riknana a nangpakawan.

15-16. Iti kapadasan da Peter ken Sue, ania ti masursurom maipapan iti panangpakawan?

¹⁵ Idi 1985, madama a makigimgimong da Peter ken Sue iti Kingdom Hall idi adda bigla a bimtak iti napigsa. Adda lalaki a nagimula iti bomba iti uneg ti Kingdom Hall! Nagkaro ti pannakadangran ni Sue nga uray la permanenten nga adda depekto ti panagkita ken panagdengngegna. Saan payen a makaangot. * Masansan nga isalsaludsod da Peter ken Sue, ‘Ania a klase a tao ti makaitured a mangaramid iti kasta a nagdakes a banag?’ Ti nangaramid iti dayta ket saan a Saksi ni Jehova. Kalpasan ti adu a tawen, naaresto dayta a lalaki ken nasentensiaan a maibalud iti inggat’ tungpal biagna. Kastoy ti imbaga da Peter ken Sue idi naisaludsod no napakawandan daytoy a lalaki: “Isursuro ni Jehova kadakami a makadangran iti bagi, emosion, ken isip ti panagipempen iti gura ken sakit ti nakem. Isu nga idi damdamo pay laeng, nagpatulongkami ken Jehova a mangiwaksi iti gura ken sakit ti nakem tapno natalna ti biagmi.”

¹⁶ Nalaka kadi para kadakuada ti mangpakawan? Saan a kanayon. Imbagada pay: “No dadduma, marigatan ni Sue kadagiti epekto ti napasamak kenkuana, isu a makapungtotkami manen. Ngem saanmi a sangkapanunot dayta, isu nga alisto la a bumaaw ti pungtotmi. Kinapudnona, no addanto aldaw nga ag-Saksi dayta a tao, naimpusuanto nga abrasaenmi. Nasursuromi iti daytoy a kapadasan a talaga a mangwayawaya dagiti prinsipio ti Biblia. Dimi pulos ekspektaren a mawayawayaankami iti nagadu a pamay-an! Maliwliwakami met ta ammomi nga asidegen nga ikkaten ni Jehova ti amin a dakes nga epekto ti napasamak.”

17. Iti kapadasan ni Myra, ania ti masursurom maipapan iti panangpakawan?

¹⁷ Naammuan ni Myra ti kinapudno idi adda asawanan ken babassit pay ti dua nga  annakda. Saan a nagbalin a Saksi ni lakayna. Idi agangay, nakikamalala ni lakayna ken pinanawanna ida nga agiina. Imbaga ni Myra: “Idi pinanawannakami ni lakayko, nariknak ti narikna ti adu a liniputan ti ay-ayatenda​—pannakabigla, panagladingit, panagbabawi, panangpabasol iti bagi, pungtot, ken di panamati a mapasamak ti kasta.” Nupay nagpatinggan ti panagasawada, marikriknana latta ti sakit ti panangliput kenkuana ni lakayna. Intuloy ni Myra: “Adu a bulan a maburburiboran ken makapungtotak, ken naamirisko a maap-apektaranen ti relasionko ken ni Jehova ken iti sabsabali.” Imbaga ni Myra a saanen a makaunget ken dinan idawdawat nga adda koma dakes a mapasamak iti dati nga asawana. Mangnamnama ni Myra nga addanto aldaw nga agserbi isuna ken Jehova. Kanayon a pampanunoten ni Myra ti masanguanan. Uray agsolsolo nga ina, napadakkelna ti dua nga annakna nga agserbi ken Jehova. Maragragsakan ita ni Myra nga agserbi ken Jehova a kadua dagiti annakna ken ti pamiliada.

18. Ania ti masiguradotayo nga aramidento ni Jehova kas ti Kangatuan nga Ukom?

¹⁸ Makapabang-ar a maammuan a dinatay inikkan ni Jehova iti autoridad a mangukom kadagiti tattao! Ni Jehova ti makaammon iti daytoy nagpateg a trabaho ta isu ti Kangatuan nga Ukom. (Roma 14:10-12) Talaga a makapagtalektayo a kanayon a mangukom maitunos kadagiti perpekto a pagalagadanna iti umiso ken di umiso. (Gen. 18:25; 1 Ar. 8:32) Nalinteg ti amin nga ar-aramidenna!

19. Gapu ta perpekto ti kinahustisia ni Jehova, anianto ti aramidenna?

¹⁹ Magagarantayo iti tiempo inton naan-anay nga ikkaten ni Jehova ti amin a dakes nga epekto ti kinaimperpekto ken basol ti tao. Permanententon a naglunit wenno immimbag ti amin a pisikal ken emosional a sugattayo. (Sal. 72:12-14; Apoc. 21:3, 4) Pulos a saantayton a malagip dagita. Bayat nga ur-urayentayo dayta a nagsayaat a tiempo, agyamantayo unay ken Jehova ta inikkannatayo iti abilidad a mangtulad iti kinamanangpakawanna.