1. Lidaʋ tɔm ndʋ Yehowa heyiɣ kɩwɛɛkɩm laɖaa mba pekpiɖiɣ yɔ?

 PAA Yehowa ɛkɛ ɖa-Lɩzɩyʋ, ɖa-Paɣtʋ Ðʋyʋ, nɛ ɖɔ-Tɔm Hʋyʋ yɔ, ɛkɛ ɖɔɖɔ ɖa-Caa kʋsɔɔlʋ weyi ɛwɛ ɛsɔdaa yɔ. (Keɣa 99:3; Iza. 33:22) Alɩwaatʋ ndʋ ɖɩlakɩ kɩwɛɛkɩm nɛ ɖikpiɖi siŋŋ yɔ, ɛpɩzɩɣ nɛ ekpeɣ-ɖʋ nɛ ɛsɔɔlɩ faaa se ekpeɣ-ɖʋ. (Keɣa 85:5) Yehowa tɩŋnɩ nayʋ Izaayii yɔɔ nɛ eheyi-ɖʋ lidaʋ tɔm tʋnɛ nɛ sɔɔlɩm se: “Ye mɩ-kɩwɛɛkɩm ɛsɛ cɩɩɩ ɛzɩ calɩm yɔ yɔ, pɩkɔŋ hʋlʋmʋʋ payɩ payɩ ɛzɩ ɖɔmbɛɛ yɔ.”—Iza. 1:18.

2. Ye ɖɩsɔɔlaa se laŋhɛzɩyɛ ɛwɛɛ ɖa nɛ lalaa ɖɛ-hɛkʋ taa yɔ, ɛbɛ pɩwɛɛ se ɖɩla?

² Ðɩtɩtalɩ pilim nɛ pʋyɔɔ lɛ, ɖa-tɩŋa ɖɩyɔɔdʋʋ yaa ɖɩlakɩ mbʋ pɩɖʋʋ lalaa ɖɩwɩzɩyɛ yɔ. (Yak. 3:2) Paa mbʋ yɔ, pɩɩwɩlɩɣ se taabalɩyɛ kɩbanɖɛ ɛɛpɩzɩɣ nɛ ɖɩwɛɛ ɖa nɛ lalaa ɖɛ-hɛkʋ taa. Taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ lalaa ɖɛ-hɛkʋ taa ye ɖɩsɔɔlaa se ɖikpeɣ ɖama yɔ. (Adu. 17:9; 19:11; Mat. 18:21, 22) Alɩwaatʋ ndʋ ɖɩɖʋʋ ɖama ɖɩwɩzɩyɛ yɔ, Yehowa sɔɔlaa se ɖikpeɣ ɖama. (Kol. 3:13) Lɩmaɣzɩyɛ kɩbanɖɛ yɔɔ pɩwɛɛ se ɖɩla mbʋ. Lɩmaɣzɩyɛ nɖɩ lɛ se Yehowa kpeɣ-ɖʋ faaa nɛ ɛsɩm “kpeɣu pɩŋŋ.”—Iza. 55:7.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Tɔm ñʋʋ kʋnɛ kɩ-taa, ɖɩkaɣ naʋ ɛzɩma ɛyaa mantɩtalɩ pilimwaa pɩzɩɣ nɛ pamaɣzɩnɩ Yehowa nɛ pekpeɣ lalaa yɔ.  Kɩwɛɛkɩm mbʋ pɩwɛɛ se ɖiyele nɛ ɛgbɛyɛ taa ɛzʋtʋyaa tɩlɩ? Ɛbɛ yɔɔ Yehowa sɔɔlaa se ɖikpeɣ ɛyaa lalaa? Nɛ ɖo-koobiya Krɩstʋ ñɩma mba ɛyaa lalaa kɩwɛɛkɩm yeba nɛ pɔtɔɔ kʋñɔŋ siŋŋ yɔ, ɛbɛ ɖɩpɩzɩɣ nɛ ɖɩkpɛlɩkɩ pa-taa nabɛyɛ cɔlɔ?

4. (a) Alɩwaatʋ ndʋ Yehowa sɛyʋ nɔɔyʋ lakɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ɛla? (b) Alɩwaatʋ ndʋ ɛgbɛyɛ taa ɛzʋtʋyaa katɩɣ kɩwɛɛkɩm laɖʋ nɔɔyʋ se pɔcɔnɩ ɛ-tɔm ɖeɖe yɔ, pa-tʋmɩyɛ lɛ nɖɩ?

⁴ Alɩwaatʋ ndʋ nɔɔyʋ lakɩ kɩwɛɛkɩm sɔsɔm nabʋyʋ yɔ, pɩwɛɛ se ɖiyele nɛ ɛgbɛyɛ taa ɛzʋtʋyaa tɩlɩ. Ðɩnaɣ kɩwɛɛkɩm mbʋ pɩ-taa nabʋyʋ 1 Kɔrɛntɩ mba 6:9, 10 taa. Alɩwaatʋ ndʋ nɔɔyʋ maɣnɩ Ɛsɔ paɣtʋ yɔɔ siŋŋ yɔ, pɩkɛ kɩwɛɛkɩm sɔsɔm. Ye Krɩstʋ tʋ nɔɔyʋ ɛlabɩ kɩwɛɛkɩm sɔsɔm mbʋ pɩ-taa nabʋyʋ yɔ, pɩwɛɛ se ɛtɩmnɩ Yehowa nɛ ɛpɔzɩ-ɩ se ɛkpaɣ nɛ ekpeɣ-i, nɛ pɩwɛɛ ɖɔɖɔ se ɛyɔɔdɩnɩ ɛgbɛyɛ taa ɛzʋtʋyaa. (Keɣa 31:5; Yak. 5:14) Tʋmɩyɛ nɖɩ ɛgbɛyɛ taa ɛzʋtʋyaa lakɩ hɔɔlʋʋ ŋgʋ kɩ-taa? Yehowa ɖeke pɩzɩɣna nɛ ekpeɣ kɩwɛɛkɩm kiya, nɛ ɛtɩŋɩɣnɩ kɩhɛyʋʋ pʋʋ ñʋʋ taa kɩlaʋ yɔɔ nɛ ekpeɣ-ɖʋ ɖa-kɩwɛɛkɩm. * Ɛlɛ, Yehowa ɖʋ tʋmɩyɛ ɛgbɛyɛ taa ɛzʋtʋyaa se patɩŋnɩ Masɩ yɔɔ nɛ patazɩ tɔm taa nɛ pana se kɩwɛɛkɩm laɖʋ ɛnʋ ɛpɩzɩɣ nɛ ɛwɛɛ ɛgbɛyɛ taa yaa ɛɛpɩzɩɣ. (1 Kɔr. 5:12) Pɩsa nɛ patalɩ kaɖʋwa ŋga lɛ, mbʋ palakɩ yɔ pɩ-taa nabʋyʋ lɛ se pañakɩ pana se pocosi tɔm pɔzʋʋ pʋnɛ pɩ-yɔɔ: Ɛna faɖaɖa nɛ ɛla kɩwɛɛkɩm mbʋ? Ɛñaɣ pana se ɛmɛsɩ kɩwɛɛkɩm mbʋ ɛyaa lalaa na? Ɛlabɩ kɩwɛɛkɩm mbʋ alɩwaatʋ sakɩyɛ na? Kɔzɩ kɔzɩ lɛ, nabʋyʋ wɛɛ nɛ pɩwɩlɩɣ se ekpiɖi siŋŋ na? Nabʋyʋ wɛɛ nɛ pɩwɩlɩɣ se Yehowa kpeɣ-i?—Tʋma 3:19.

5. Tʋmɩyɛ nɖɩ ɛgbɛyɛ taa ɛzʋtʋyaa lakɩ yɔ, wazasɩ nzɩ ɖɩkɔŋna?

⁵ Alɩwaatʋ ndʋ ɛgbɛyɛ taa ɛzʋtʋyaa katɩɣ kɩwɛɛkɩm laɖʋ nɔɔyʋ se pɔcɔnɩ ɛ-tɔm ɖeɖe yɔ, pa-kaɖʋwa lɛ se lɩmaɣzɩyɛ nɖɩ pakpakɩɣ tɛtʋ yɔɔ cɩnɛ yɔ, ɖɩla nɔɔ kʋɖʋmaɣ nɛ lɩmaɣzɩyɛ nɖɩ pɛtɛm kpaɣʋ ɛsɔdaa yɔ. (Mat. 18:18) Ɛzɩma ɖʋtʋ ndʋ tɩwazɩɣ ɛgbɛyɛ? Tɩkandɩyɩɣ ɛgbɛyɛ yɔɔ, mbʋ pʋyɔɔ yɔ tiyeki se kɩwɛɛkɩm laɖaa mba paakpiɖiɣ yɔ pataawɛɛ ɛgbɛyɛ taa nɛ pɔkɔnɩ kaɖɛ Yehowa sɛyaa. (1 Kɔr. 5:6, 7, 11-13; Tiiti 3:10, 11) Tɩpɩzɩɣ ɖɔɖɔ nɛ tɩsɩnɩ kɩwɛɛkɩm laɖʋ nɛ ekpiɖi nɛ Yehowa kpeɣ-i. (Luka 5:32) Ɛgbɛyɛ taa ɛzʋtʋyaa tɩmɩɣ kɩwɛɛkɩm laɖʋ weyi ekpiɖaa yɔ ɛ-yɔɔ nɛ pɔpɔzɩ Yehowa se ɛsɩnɩ-ɩ nɛ ɛñɔɔzɩ ɛ nɛ ɩ pa-taabalɩyɛ.—Yak. 5:15.

6. Ye palɩzɩ nɔɔyʋ ɛgbɛyɛ taa yɔ, Yehowa pɩzɩɣ nɛ ɛtasɩ-ɩ kpeɣu na? Lɩzɩ pɩ-taa.

⁶ Ðɩkpaɣ se alɩwaatʋ ndʋ ɛgbɛyɛ taa ɛzʋtʋyaa katɩ kɩwɛɛkɩm laɖʋ nɔɔyʋ se pɔcɔnɩ ɛ-tɔm ɖeɖe yɔ, etikpiɖi. Ye pɩlabɩ mbʋ yɔ, palɩzɩɣ-ɩ ɛgbɛyɛ taa. Ye ɛmanɩ ɛjaɖɛ taa paɣtʋ yɔɔ yɔ, ɛgbɛyɛ taa ɛzʋtʋyaa eehuuzuu ɛ-yɔɔ se ɛ-lakasɩ lʋlɩ mbʋ yɔ pɩtaatalɩ-ɩ. Yehowa ha nʋmɔʋ komina ñʋndɩnaa se ye nɔɔyʋ ɛmanɩ paɣtʋ yɔɔ yɔ pahʋʋnɩ-ɩ tɔm nɛ pɔhɔ ɛ-nɩŋgbaaŋ, paa ekpiɖaa yaa etikpiɖi yɔ. (Roma 13:4) Ɛlɛ, ye pʋwayɩ kɩwɛɛkɩm laɖʋ ɛnʋ eɖiɣzinaa se mbʋ ɛlaba yɔ pɩtɩtʋʋzɩ nɛ ekpiɖi siŋŋ nɛ ɛlɛɣzɩ ɛ-lakasɩ yɔ, Yehowa tisiɣ nɛ ekpeɣ-i. (Luka 15:17-24) Paa ɛɛlabɩ kɩwɛɛkɩm sɔsɔm siŋŋ yɔ, Yehowa kpeɣ-i.—4 Aw. 33:9, 12, 13; 1 Tim. 1:15.

7. Ye pɔtɔm se ɖikpeɣ weyi ɛyʋsɩnɩ-ɖʋ yɔ, pʋ-tɔbʋʋ lɛ suwe?

⁷ Pɩhɛzɩɣ ɖa-laŋɩyɛ se ɖɩtɩlɩ se pɩtɩkɛ ɖa pɩpɔzʋʋ se ɖɩkpaɣ lɩmaɣzɩyɛ se Yehowa ekpeɣ kɩwɛɛkɩm laɖʋ nɔɔyʋ yaa etaakpeɣ-i! Paa mbʋ yɔ, pɩpɔzʋʋ se ɖɩkpaɣ lɩmaɣzɩyɛ  naɖɩyɛ. Lɩmaɣzɩyɛ nɖɩ? Hɔɔlɩŋ nɩɩyɩ taa lɛ, nɔɔyʋ pɩzɩɣ nɛ ɛyʋsɩnɩ-ɖʋ siŋŋ; ɛlɛ pɩtɩla pʋwayɩ lɛ, eɖiɣzina se mbʋ ɛlaba yɔ pɩfɛyɩ ɖeu nɛ ɛpɔzɩ-ɖʋ se ɖɩkpaɣ nɛ ɖikpeɣ-i. Ɛlɛ hɔɔlɩŋ lɛɛŋ taa lɛ, pɩtɩla ɛɛkpɛzɩɣ nɩŋgbaŋaɣ ŋga. Paa pɩlabɩ mbʋ yɔ, ɖɩpɩzɩɣ nɛ ɖɩlɩzɩ se ɖikpeɣ-i nɛ ɖɩɩcakɩnɩ-ɩ. Toovenim taa lɛ, pɩpɩzɩɣ nɛ pɩkpaɣ alɩwaatʋ nɛ pɩpɔzʋʋ pana ñaɣʋ, kɔzɩ kɔzɩ ye paɖʋ-ɖʋ ɖɩwɩzɩ-ɩ siŋŋ yɔ. 15 septembre 1994 tɛ Feŋuu Tilimiye Fransɩɩ ñɩnɖɛ yɔɔdaa se: “Alɩwaatʋ ndʋ ŋkpeɣ kɩwɛɛkɩm laɖʋ nɔɔyʋ yɔ, pɩtɩwɩlɩ se ŋwɛɛ nɛ ŋtɩnɩɣ ɛ-kɩwɛɛkɩm yɔɔ. Krɩstʋ tʋ weyi ekpeɣu yɔ, ɛwɩlɩɣ se ɛɖʋzɩ tɔm ndʋ Yehowa nesi tɛɛ nɛ ɛtaɣ liu se ɛlɛ kaɣ cɔnʋʋ ti-ɖeɖe. Ɛnʋ kɛnɩ kedeŋa kpeekpe Tɔm Hʋyʋ siɣsiɣ tʋ nɛ ɛkaɣ cɔnʋʋ tɔm ndʋ ti-ɖeɖe siɣsiɣ alɩwaatʋ kɩbandʋ yɔɔ.” Ɛbɛ yɔɔ Yehowa seɣtiɣ-ɖʋ se ɖɩkpaɣ nɛ ɖikpeɣ nɛ ɖɩɖʋzɩ tɔm e-nesi tɛɛ?

8. Ye ɖikpeɣ lalaa yɔ, ɛzɩma pɩwɩlɩɣ se ɖɩwɛnɩ ɛsɩmɩyɛ Yehowa pʋtɔdɩyɛ naʋ yɔɔ?

⁸ Ye ɖikpeɣ lalaa yɔ, ɖɩwɩlɩɣ se ɖɩwɛnɩ ɛsɩmɩyɛ Yehowa pʋtɔdɩyɛ naʋ yɔɔ. Eduuye naɖɩyɛ taa, Yesu kpaɣ Yehowa nɛ ɛmaɣzɩnɩ ñʋʋdʋ nɔɔyʋ. Ñʋʋdʋ ɛnʋ, e-yomaa taa nɔɔyʋ tɔɔ-ɩ kɩmɩyɛ sɔsɔɖɛ naɖɩyɛ. Yom ɛnʋ ɛtaapɩzɩɣ se ɛhɛyɩ-ɩ nɛ ɛlɛ kpaɣ nɛ ekpeɣ-i. Ɛlɛ yom weyi pekpeɣ-i yɔ, ɛtɩna yom lɛlʋ pʋtɔdɩyɛ; ŋgʋ ɛlɛ ñɔtɔɔ-ɩ kɩmɩyɛ ññɩɩ yem na. (Mat. 18:23-35) Tɔm ndʋ Yesu ñɩnaɣ se ɖɩkpɛlɩkɩ? Ye ɖɩwɛnɩ ɛsɩmɩyɛ ɛzɩma Yehowa naɣ ɖa-pʋtɔdɩyɛ yɔ pɩ-yɔɔ yɔ, pɩkaɣ-ɖʋ seɣtuu nɛ ɖikpeɣ lalaa. (Keɣa 102:9) Pɩlakɩ pɩnzɩ nasɩyɩ yɔ, Feŋuu Tilimiye lɩzɩ pɩ-taa se paa tam ɛzɩma ɖɩkpakɩɣ nɛ ɖikpeɣ ɛyaa lalaa yɔ, “pɩɩkaɣ talʋʋ tam ɛzɩma Ɛsɔ tɩŋɩɣnɩ Krɩstʋ kɩlaʋ yɔɔ nɛ ekpeɣ-ɖʋ nɛ ɛnaɣ ɖa-pʋtɔdɩyɛ yɔ kpa.”

9. Mba pʋtɔdɩyɛ Yehowa naɣ? (Maatiyee 6:14, 15)

⁹ Ye ɖikpeɣ lalaa yɔ, Yehowa kaɣ-ɖʋ kpeɣu. Mba panaɣ lalaa pʋtɔdɩyɛ yɔ, Yehowa naɣ pa-pʋtɔdɩyɛ. (Mat. 5:7; Yak. 2:13) Yesu yeba nɛ tɔm ndʋ tɩ-taa tʋ kpayɩ kpayɩ alɩwaatʋ ndʋ ɛwɩlɩ ɛ-tɔmkpɛlɩkɩyaa ɛzɩma patɩmɩ yɔ. (Kalɩ Maatiyee 6:14, 15.) Tɔm ndʋ Yehowa kaaheyi ɛ-lɩmɖʋyʋ Yɔɔb yɔ tɩkpɛlɩkɩɣ-ɖʋ tɔm kʋɖʋmtʋ ndʋ ɖɔɖɔ. Eliifaazɩ, Bilɩdaadɩ nɛ Zofaarɩ paayɔɔdɩ tɔm kɩdɛkɛdɩtʋ abalʋ siɣsiɣ tʋ ɛnʋ ɛ-yɔɔ nɛ paɖʋ-ɩ ɖɩwɩzɩyɛ siŋŋ. Yehowa heyi Yɔɔb se ɛtɩmɩ pɔ-yɔɔ. Yɔɔb labɩ mbʋ nɛ pɩtɛ lɛ, Yehowa wazɩ-ɩ.—Yɔɔb 42:8-10.

10. Ye ɖɩcakɩnɩ lalaa yɔ, ɛzɩma tɩyɛ pɩkɔŋnɩ-ɖʋ kaɖɛ? (Efɛɛzɩ mba 4:31, 32)

¹⁰ Ye ɖɩcakɩnɩ lalaa yɔ, pɩkɔŋnɩ ɖa-maɣmaɣ kaɖɛ. Ɛyaa caɣnʋʋ wɛ ɛzɩ sʋʋtʋ sɔsɔtʋ natʋyʋ yɔ, nɛ Yehowa sɔɔlaa se ɖikizi ɛyaa caɣnʋʋ nɛ ɖihiɣ laŋhɛzɩyɛ. (Kalɩ Efɛɛzɩ mba . 4:31, 32.) Ɛtasɩɣ-ɖʋ lɔŋ ɛnɛ: “Pɩtaawɩzɩ-ŋ, kʋ ñɔ-hɔyɛ.” (Keɣa 36:8) Ye ɖɩɖɔŋ lɔŋ tasʋʋ mbʋ pɩ-yɔɔ yɔ, pɩsɩɣnɩ-ɖʋ. Ye ɖɩcakɩnɩ lalaa yɔ, pɩpɩzɩɣ nɛ pɩkɔnɩ-ɖʋ kaɖɛ tomnaɣ taa nɛ maɣzɩm taa. (Adu. 14:30) Ye ɖɩñɔ sɔtʋ yɔ, pɩɩkɔŋnɩ ɛyʋ lɛlʋ kaɖɛ; mbʋ ɖɔɖɔ alɩwaatʋ ndʋ ɖɩcakɩnɩ ɛyʋ lɛlʋ yɔ, pɩɩkɔŋnɩ ɛlɛ kaɖɛ. Ɛlɛ, alɩwaatʋ ndʋ ɖikpeɣ lalaa yɔ, ɖɩwɛɛ nɛ ɖɩlakɩ ɖa-tɩ kʋjɔʋ. (Adu. 11:17) Ðihikiɣ maɣzɩm taa nɛ laŋɩyɛ taa laŋhɛzɩyɛ, nɛ ɖɩkaɣ wobu pɩ-yɔɔ nɛ ɖɩlakɩ Yehowa tʋmɩyɛ.

11. Suwe Bibl yɔɔdʋʋ pɩlɩɩnɩ kɩmɩyɛ kpaʋ yɔɔ? (Roma mba 12:19-21)

¹¹ Yehowa tɩnɩ kɩmɩyɛ kpaɣʋ. Alɩwaatʋ ndʋ nɔɔyʋ yʋsʋʋnɩ-ɖʋ yɔ, Yehowa tɩha-ɖʋ waɖɛ se ɖɩkpa-ɩ kɩmɩyɛ. (Kalɩ Roma mba 12:19-21.) Ða-lɩmaɣza tɩtalɩ pilim nɛ awɛnɩ tɩnaɣ; pʋyɔɔ lɛ, ɖɩɩpɩzɩɣ nɛ ɖɩhʋʋ tɔm camɩyɛ ɛzɩ Ɛsɔ yɔ. (Ebr. 4:13) Nɛ nabʋyʋ taa lɛ, ɛzɩma pɩlakɩ-ɖʋ yɔ, pɩpɩzɩɣ nɛ pɩwɛɛnɩ ɖoŋ ɖɔ-yɔɔ nɛ ɖɩɩhʋʋ tɔm camɩyɛ ɛzɩ pɩmʋnʋʋ yɔ.  Yehowa fezuu ɖiyi Yakubu nɛ ɛma se: “Ɛyʋ pana ɛɛlakɩ Ɛsɔ siɣsiɣ tɔm yɔɔ.” (Yak. 1:20) Ða-taa pɩzɩɣ nɛ pɩtɛ se Yehowa kaɣ labʋ mbʋ pɩtʋʋzaa yɔ nɛ ɛcɔnɩ tɔm ɖeɖe siɣsiɣ.

12. Ɛzɩma ɖɩpɩzɩɣ nɛ ɖɩwɩlɩ se ɖɩtaɣ liu Yehowa se ɛlakɩ mbʋ pɩwɛ siɣsiɣ yɔ?

¹² Ye ɖikpeɣ lalaa yɔ, ɖɩwɩlɩɣ se ɖɩtaɣ Yehowa liu se ɛlakɩ mbʋ pɩwɛ siɣsiɣ yɔ. Alɩwaatʋ ndʋ ɖɩɖʋzʋʋ tɔm Yehowa nesi tɛɛ yɔ, ɖɩwɩlɩɣ se ɖɩtaɣ-ɩ liu se ɛkaɣ hɩzʋʋ mbʋ payɩ kɩwɛɛkɩm kɔnaa yɔ. Ɛjaɖɛ kɩfaɖɛ nɖɩ ɛlabɩ tamaɣ se ɖɩkaɣ kɔm yɔ ɖɩ-taa, mbʋ pɩ-yɔɔ ɛyaa tɔzʋʋ nɛ piyeki nɛ panɩɣ siziŋ yɔ, ‘paakaɣ tasʋʋ tɔzʋʋ pɩ-yɔɔ nɛ pɩɩkaɣ tasʋʋ kpaʋ laŋɩyɛ taa kpa.’ (Iza. 65:17) Ɛlɛ alɩwaatʋ ndʋ nɔɔyʋ ɖʋʋ-ɖʋ ɖɩwɩzɩyɛ siŋŋ yɔ, toovenim taa lɛ ɖɩpɩzɩɣ nɛ ɖɩsɔɔ pana wena ɛɖʋ-ɖʋ yɔ a-yɔɔ nɛ ɖɩɩcakɩnɩ-ɩ? Iyele nɛ ɖɩna ɛzɩma ɛyaa nabɛyɛ pɩzaa nɛ pala mbʋ yɔ.

13-14. Ɛbɛ Tony nɛ José pa-kɩɖaŋ kpɛlɩkɩ-ŋ pɩlɩɩnɩ kpeɣu yɔɔ?

¹³ Ðo-koobiya Krɩstʋ mba sakɩyɛ lɩzaa se pekpeɣu halɩ pɩkpɛndɩnɩ alɩwaatʋ ndʋ lalaa lakasɩ ɖʋ-wɛ ɖɩwɩzɩyɛ siŋŋ yɔ. Palabɩ mbʋ lɛ, wazasɩ nzɩ pehiɣaa?

¹⁴ Tony * wɛ Filipiini ɛjaɖɛ taa. Pɩnzɩ sakɩyɛ pʋcɔ nɛ ɛpɩsɩɣ Yehowa Aseɣɖe Tʋ lɛ, ɛnɩwa se José kʋnɩ ɛ-ɖalʋ lɛlʋ. Alɩwaatʋ ndʋ tɩ-taa lɛ, Tony kaawɛ kañatʋ nɛ ɛtɛ ɛwɛɛ puuyaɣ siŋŋ, nɛ ɛñɩnaɣ se ɛkpa kɩmɩyɛ. Paakpa José nɛ paɖʋ-ɩ salaka mbʋ pʋyɔɔ yɔ ɛkʋ ɛyʋ. Pʋwayɩ, palɩzɩ José salaka taa lɛ, Tony ɖuu se ɛñɩnɩɣ-ɩ nɛ ɛkʋ-ɩ. Pɩsa nɛ ɛtalɩ kaɖʋwa ŋga lɛ, ɛyabɩ malɩfa. Alɩwaatʋ ndʋ tɩ-taa, Tony nɛ Yehowa Aseɣɖe Tɩnaa papaɣzɩ Bibl kpɛlɩkʋʋ. Ɛyɔɔdaa se: “Mɛwɛɛ nɛ mɛnkpɛlɩkɩɣ Bibl lɛ, mana se pɩpɔzʋʋ se mɛlɛɣzɩ mɛ-ɛyʋtʋ nɛ ma-lakasɩ, nɛ pɩ-taa nabʋyʋ lɛ se meyele ɛyaa caɣnʋʋ.” Pʋwayɩ lɛ, Tony ha ɛ-tɩ nɛ pamɩyɩsɩ-ɩ lɩm, nɛ alɩwaatʋ wɛɛ nɛ tɩɖɛɣ lɛ, paha-ɩ waɖɛ nɛ ɛkɛ ɛgbɛyɛ taa ɛzʋtʋyʋ. Alɩwaatʋ ndʋ ɛnɩwa se José ɖɔɖɔ ha ɛ-tɩ nɛ pamɩyɩsɩ-ɩ lɩm nɛ ɛpɩsɩ Yehowa Aseɣɖe Tʋ yɔ, maɣzɩ nɛ ŋna ɛzɩma pɩɩɖɩɣzɩ-ɩ kpem yɔ! Alɩwaatʋ ndʋ pa-naalɛ pakataa yɔ, palabɩ ɖama aatuu nɛ taa leleŋ, nɛ Tony heyi José se ekpeɣ-i. Tony yɔɔdaa se alɩwaatʋ ndʋ ɛnʋ kpaɣ nɛ ekpeɣ-i yɔ,  pɩɩha ɛnʋ taa leleŋ siŋŋ nɛ halɩ pɩɩwɛ-ɩ kaɖɛ se ɛkɛdɩ ɛzɩma pɩɩlabɩ-ɩ leleŋ yɔ. Ɛɛɛ, Tony tisi faaa nɛ ekpeɣ lɛ, Yehowa wazɩ-ɩ.

15-16. Ɛbɛ Peter nɛ Sue pa-kɩɖaʋ kpɛlɩkɩ-ŋ pɩlɩɩnɩ kpaɣʋ nɛ kpeɣu yɔɔ?

¹⁵ Pɩnaɣ 1985 taa, Peter nɛ ɛ-halʋ Sue paawɛ kediɣzaɣ taa Kewiyaɣ Kpaaŋ nakʋyʋ taa, nɛ tuda lɛ, bɔmbɩ nakʋyʋ tɔ. Abalʋ nɔɔyʋ kaasɩ bɔmbɩ nakʋyʋ Kewiyaɣ Kpaaŋ taa! Sue kaamʋ heŋ siŋŋ nɛ piyele nɛ ɛɛtasɩɣ naʋ camɩyɛ nɛ ɛɛtasɩɣ nɩʋ ɖɔɖɔ camɩyɛ. Ɛtaapɩzɩɣ ɖɔɖɔ se ɛtasɩ nɩʋ nabʋyʋ sɔŋ yaa sɔzɩŋ. * Peter nɛ ɛ-halʋ Sue pɔpɔzaɣ pa-tɩ ɖoŋ ɖoŋ se: ‘Ɛzɩ apɩzaa nɛ ɛla lakasɩ kɩdɛkɛdɩsɩ nzɩ?’ Pɩnzɩ sakɩyɛ wayɩ lɛ, pakpa abalʋ weyi ɛɛsɩ bɔmbɩ ŋgʋ peeɖe yɔ, nɛ pakʋ ɛ-tɔm se paɖʋʋ-ɩ salaka e-wezuu caɣʋ kpeekpe. Ɛtaakɛ Yehowa Aseɣɖe Tʋ. Alɩwaatʋ ndʋ pɔpɔzɩ Peter nɛ Sue se pekpeɣ abalʋ ɛnʋ yaa we lɛ, pocosi se: “Yehowa wɩlɩɣ-ɖʋ se ye ɖiwobi pɩ-yɔɔ nɛ ɖɩmaɣzɩɣ mbʋ piyeki nɛ ɖɩnɩɣ siziŋ yɔ pɩ-yɔɔ nɛ ye ɖɩcakɩnɩ lalaa yɔ, pɩkɔŋnɩ-ɖʋ kaɖɛ tomnaɣ yɔɔ nɛ maɣzɩm taa, nɛ piyeki nɛ ɖilesi taa leleŋ. Pʋyɔɔ bɔmbɩ ŋgʋ kɩtɔwa nɛ pitileɖi lɛ, ɖɩtɩmnɩ Yehowa se ɛsɩnɩ-ɖʋ nɛ ɖɩtaawɛɛ pana taa nɛ ɖɩtaacaɣnɩ nɔɔyʋ ɖɔɖɔ nɛ pɩsa nɛ ɖɩcaɣ wezuu laŋhɛzɩyɛ taa.”

¹⁶ Ɛzɩ pɩwɛ-wɛ kɛlɛʋ se pakpaɣ nɛ pekpeɣu? Pɩfɛyɩ kɛlɛʋ paa ɛzɩmtaa. Patasɩ yɔɔdʋʋ se: “Nabʋyʋ taa, alɩwaatʋ ndʋ Sue heŋ yeki nɛ ɛnɩɣ siziŋ yɔ, pɩwɩzɩɣ-ɖʋ. Ɛlɛ ɖɩɩkaŋ ɖa-lɩmaɣza pɩ-yɔɔ, piyeki nɛ ɖa-pana hɛɣ lɛɛ lɛɛ. Toovenim taa lɛ, ɖɩpɩzɩɣ nɛ ɖɩyɔɔdɩnɩ ɖa-laŋɩyɛ se ye wiɖiyi abalʋ ɛnʋ ɛpɩsɩ ɖo-Koobu Krɩstʋ tʋ yɔ, ɖɩkaɣ-ɩ mʋʋ camɩyɛ. Mbʋ pɩtalɩ-ɖʋ yɔ, pɩkpɛlɩkɩ-ɖʋ se toovenim taa lɛ, Bibl paɣtʋ kila holuu ɛyʋ; aholi-ɖʋ hɔɔlɩŋ sakɩyɛ taa! Pɩtasɩ lɛ pɩhɛzɩɣ ɖa-laŋɩyɛ, mbʋ pʋyɔɔ yɔ ɖɩnawa se pɩkazɩ pazɩ lɛ, Yehowa kaɣ hɩzʋʋ kʋñɔmɩŋ tɩŋa.”

17. Ɛbɛ Myra kɩɖaʋ kpɛlɩkɩ-ŋ pɩlɩɩnɩ kpeɣu yɔɔ?

¹⁷ Myra walaa nɛ ɛwɛɛnɩ piya cikpesi  naalɛ pʋcɔ nɛ ɛtɩlɩɣ toovenim. Ɛ-walʋ titisi nɛ ɛmʋ toovenim. Pʋwayɩ lɛ, ɛ-walʋ la acɛyɛ nɛ ɛɖɛɛ nɛ eyele ɛ-hɔʋ. Myra yɔɔdaa se: “Alɩwaatʋ ndʋ ma-walʋ ɖɛwa nɛ eyele ma nɛ ɖe-piya nzɩ sɩ-naalɛ yɔ, pɩlakaɣ-m ɛzɩ pɩlakʋʋ ɛyaa sakɩyɛ mba pɛ-ɛyʋ kʋsɔɔlʋ nɔɔyʋ labɩ-wɛ pɩ-tɛɛ nɛ pɩ-yɔɔ lakasɩ yɔ, piitibi-m yɔɔɔ, manpɩtaɣ, manɩɣaɣ siziŋ, menkpiɖaɣ, maakʋ man-tɩ tɔm, nɛ mancakaɣnɩ-ɩ.” Paa Myra nesi ɖɔkʋʋ kaasɩ tɩnaɣ yɔ, Myra nɩɣaɣ siziŋ mbʋ pʋyɔɔ yɔ, ɛ-walʋ labɩ-ɩ pɩ-tɛɛ nɛ pɩ-yɔɔ lakasɩ. Myra tasɩ yɔɔdʋʋ se: “Wɛtʋ ndʋ tiyeba nɛ ma-lɩmaɣza taa sidi fenasɩ sakɩyɛ, nɛ maaɖiɣzinaa se tɩwɛnɩ ɖoŋ ma nɛ Yehowa nɛ ɛyaa lalaa ɖa-taabalɩyɛ yɔɔ.” Lɛɛlɛɛyɔ lɛ, Myra yɔɔdʋʋ se ɛnʋ ɛɛtasɩɣ caɣnʋʋ ɛ-walʋ kɩbɩnʋ ɛnʋ, nɛ ɛnʋ ɛɛtasɩɣ ñɩnʋʋ se kɩdɛkɛdɩm nabʋyʋ ɛtalɩ-ɩ. Ɛtaɣ liu se wiɖiyi ɛlɛ kaɣ pɩsʋʋ Yehowa sɛyʋ. Myra kaŋ ɛ-lɩmaɣza cee wayɩ yɔɔ. E-ɖeke ɛcɔŋnɩnɩ e-piya nzɩ sɩ-naalɛ sɩ-yɔɔ nɛ ɛñaɣ pana nɛ ɛsɩnɩ-sɩ nɛ sɩkɛ Yehowa sɛyaa. Sɔnɔ, Myra taa wɛ leleŋ se ɛ nɛ e-piya nɛ pɔ-hɔŋ taa mba pɛkpɛndaa nɛ pɛsɛɣ Yehowa.

18. Ða-taa pɩzɩɣ nɛ pɩtɛ se Tɔm Hʋyʋ Kɩlɩm Yehowa kaɣ labʋ we?

¹⁸ Pɩhɛzɩɣ ɖa-laŋɩyɛ pɩdɩɩfɛyɩ se ɖɩtɩlɩ se pɩtɩkɛ ɖa-sʋʋtʋ pɩkɛnaa se ɖɩlɩzɩ ɛzɩma pɩwɛɛ se pahʋʋnɩ ɛyaa tɔm yɔ! Yehowa kɛnɩ Tɔm Hʋyʋ Kɩlɩm nɛ ɛkaɣ labʋ tʋmɩyɛ kɩcɛyɛ nɖɩ. (Roma 14:10-12) Kɩbam nɛ kɩdɛkɛdɩm hɔɔlʋʋ taa lɛ, ɛ-paɣtʋ nɛ ɛ-paɣtʋ kila talɩ pilim, nɛ ɖɩpɩzɩɣ nɛ ɖɩtaa liu kiya se paa ɛzɩmtaa lɛ, ɛkaɣ hʋʋ tɔm nɛ pɩla nɔɔ kʋɖʋmaɣ nɛ ɛ-paɣtʋ nɛ ɛ-paɣtʋ kila ana. (Kiɖe 18:25; 1 Aw. 8:32) Ɛɛkaɣ labʋ mbʋ pɩfɛyɩ siɣsiɣ yɔ kpa!

19. Yehowa kɛ tɔm hʋyʋ weyi ɛtalɩ pilim yɔ; pʋyɔɔ lɛ, ɛbɛ ɛkaɣ labʋ?

¹⁹ Yehowa kaɣ hɩzʋʋ kʋñɔmɩŋ weyi payɩ mantɩtalɩ pilim wɛtʋ nɛ kɩwɛɛkɩm pɔkɔnɩ ɛyaa yɔɔ yɔ. Nɛ ɖɩɖaŋ alɩwaatʋ ndʋ kpam. Alɩwaatʋ ndʋ tɩ-taa lɛ, ɛkaɣ waʋ ɖo-tomnaɣ yɔɔ nɛ ɖa-maɣzɩm taa heŋ caɣ caɣ. (Keɣa 71:12-14; Natʋ 21:3, 4) Wɛtʋ ndʋ, tɩɩkaɣ tasʋʋ kpaʋ ɖa-lɩmaɣza taa kpa. Ðɩɖaŋ alɩwaatʋ kɩbandʋ ndʋ kpam, nɛ ɖɩwɛnɩ ɛsɩmɩyɛ siŋŋ mbʋ pʋyɔɔ yɔ Yehowa ha-ɖʋ waɖɛ se ɖɩmaɣzɩnɩ-ɩ nɛ ɖikpeɣ lalaa.