1. Kʼaru naxye li Jehobʼa rehebʼ li nekeʼxyotʼ xchʼool?

 LI JEHOBʼA aʼan laj Yobʼtesinel qe, laj Kʼehol Chaqʼrabʼ ut laj Raqol Aatin, abʼan aʼan ajwiʼ li qachoxahil Yuwaʼ (Sal. 100:3; Is. 33:22, 23). Wi nokoomaakobʼk chiru ut naqayotʼ qachʼool, moko kaʼaj tawiʼ naru xkuybʼal qamaak, naraj ajwiʼ xbʼaanunkil (Sal. 86:5). Li Jehobʼa kixye jun li naʼlebʼ re li propeet Isaías li naxkʼojobʼ qachʼool: «Us ta kaqebʼ leemaak kamaʼ li kikʼ ut li kaqi bʼon, abʼan saq chik teʼkanaaq joʼ […] li ratzʼamke» (Is. 1:18).

2. Kʼaru tento tqabʼaanu wi naqaj wank saʼ usilal rikʼinebʼ li junchʼol?

² Joʼ aj maak naqaye ut naqabʼaanu junaq li naʼlebʼ li naxtochʼ xchʼool ebʼ li qas qiitzʼin (Sant. 3:2). Abʼan aʼin moko naraj ta xyeebʼal naq maakʼaʼaqebʼ li qamiiw. Tento tqatzol kuyuk maak (Prov. 17:9; 19:11; Mat. 18:21, 22). Li Jehobʼa naraj naq tqakuy qamaak chiqibʼil qibʼ (Efes. 4:32). Ut wank xyaalal kʼaʼut tqabʼaanu. Xbʼaan naq li Jehobʼa naxkuy qamaak chi anchal xchʼool (Is. 55:7).

3. Kʼaru tqatzʼil rix saʼ li tzolom aʼin?

³ Saʼ li tzolom aʼin tqatzʼil rix chanru tooruuq xkʼambʼal  qe rikʼin li Jehobʼa naq naqakuy xmaak ebʼ li junchʼol usta aj maako. Kʼaru li maak tento tqaye rehebʼ li cheekel winq? Kʼaʼut naraj li Jehobʼa naq tqakuy qamaak chiqibʼil qibʼ? Ut, kʼaru naqatzol rikʼinebʼ li qechpaabʼanel li xeʼrahobʼtesiik xbʼaanebʼ li junchʼol?

4. a) Kʼaru tento tixbʼaanu li kimaakobʼk? b) Kʼaru tenebʼanbʼil saʼ xbʼeenebʼ li cheekel winq?

⁴ Naq junaq namaakobʼk tento tixye rehebʼ li cheekel winq. Saʼ 1 Corintios 6:9, 10, naqataw wiibʼ oxibʼ rehebʼ li maak aʼin. Aʼin naxqʼet li xchaqʼrabʼ li Jehobʼa. Wi junaq aj paabʼanel naxbʼaanu jun rehebʼ li maak aʼin, tento naq ttijoq chiru li Jehobʼa re xpatzʼbʼal xkuybʼal xmaak ut t-aatinaq rikʼinebʼ li cheekel winq (Sal. 32:5; Sant. 5:14). Kʼaru tenebʼanbʼil saʼ xbʼeenebʼ li cheekel winq? Kaʼajwiʼ li Jehobʼa naru xkuybʼal xmaak li kimaakobʼk, ut naxbʼaanu saʼ xkʼabʼaʼ li xkamik li Jesús. * Abʼanan, li Yos kixkanabʼ saʼ ruqʼebʼ li cheekel winq rilbʼal ma t-isiiq saʼ li chʼuut li kimaakobʼk (1 Cor. 5:12, 13). Jun li naʼlebʼ li nekeʼxbʼaanu aʼan xkʼoxlankil rix ebʼ li patzʼom aʼin: ma yal kiraj maakobʼk?, ma kixyal xmuqbʼal?, ma ak naabʼal sut kixbʼaanu li maak aʼin? Ut, li aajel ru, ma kixkʼutbʼesi naq relik chi yaal kixyotʼ xchʼool?, ma naʼilmank naq kikuyeʼk xmaak xbʼaan li Jehobʼa? (Hech. 3:19).

5. Kʼaru rusilal naxtaw li chʼuut rikʼin li nekeʼxbʼaanu li cheekel winq?

⁵ Naq ebʼ li cheekel winq nekeʼaatinak rikʼin li kimaakobʼk, li nekeʼraj xbʼaanunkil aʼan li ak xkʼubʼamank saʼ choxa (Mat. 18:18). Kʼaru rusilal naxtaw li chʼuut? Wi li kimaakobʼk inkʼaʼ naxyotʼ xchʼool, naʼisiik saʼ li chʼuut, ut chi joʼkaʼin nekeʼkoleʼk li xkarneer li Jehobʼa (1 Cor. 5:6, 7, 11-13; Tito 3:10, 11). Natenqʼaak ajwiʼ li kimaakobʼk re naq tixyotʼ xchʼool ut re naq tkuyeʼq xmaak xbʼaan li Jehobʼa (Luc. 5:32). Ebʼ li cheekel winq nekeʼtijok saʼ xkʼabʼaʼ li kixyotʼ xchʼool ut nekeʼxpatzʼ re li Jehobʼa naq tixtenqʼa re naq twanq wiʼ chik saʼ amiiwil rikʼin (Sant. 5:15).

6. Ma naru tkuyeʼq xmaak li kiʼisiik saʼ li chʼuut xbʼaan li Jehobʼa? Cholobʼ.

⁶ Wi li kimaakobʼk inkʼaʼ naxyotʼ xchʼool naq naʼaatinak rikʼinebʼ li cheekel winq, t-isiiq saʼ li chʼuut. Ut, wi kixqʼet xchaqʼrabʼ li tenamit, ebʼ li cheekel winq inkʼaʼ naru teʼxkol rix. Li Jehobʼa kixkʼe xwankilebʼ li awabʼej re naq teʼraqoq aatin saʼ xbʼeen li nekeʼxqʼet li chaqʼrabʼ, usta kixyotʼ xchʼool malaj inkʼaʼ (Rom. 13:4). Abʼan wi saʼ xnumikebʼ li kutan, tixkʼe reetal naq moko us ta kinaʼlebʼak, tixyotʼ xchʼool, tixjal li xkʼaʼuxl ut li xnaʼlebʼ, li Jehobʼa tixkuy xmaak (Luc. 15:17-24). Maakʼaʼ naxye kʼaru li maak kixbʼaanu (2 Crón. 33:9, 12, 13; 1 Tim. 1:15).

7. Kʼaru naraj xyeebʼal xkuybʼal xmaak li kimaakobʼk chiqu?

⁷ Nasahoʼk saʼ qachʼool naq moko laaʼo ta yal qe ma tkuyeʼq xmaak xbʼaan li Jehobʼa li kimaakobʼk. Usta joʼkan, wank kʼaru tento tqabʼaanu. Kʼaru? Maare wank ani tixpatzʼ xkuybʼal xmaak chiqu malaj inkʼaʼ, abʼan naru naqakuy xmaak. Aʼin naraj xyeebʼal naq inkʼaʼ tqaxok saʼ qachʼool ut inkʼaʼ yooq qajosqʼil rikʼin.  Abʼan wi qʼaxal xooxrahobʼtesi, maare tchʼaʼajkoʼq chiqu xkuybʼal xmaak. Laj Kʼaakʼalehom 15 re septiembre 1994, maakʼaʼ saʼ qʼeqchiʼ, naxye: «Xkuybʼal xmaak li kimaakobʼk moko naraj ta xyeebʼal naq tqakubʼsi xwankil li maak li kixbʼaanu. Tento bʼan tqakanabʼ chixjunil saʼ ruqʼ li Jehobʼa. Aʼan aj Raqol Aatin saʼ choxa ut saʼ Ruuchichʼochʼ, ut tixbʼaanu saʼ xhoonalil». Kʼaʼut naraj li Jehobʼa naq tqakuy qamaak chiqibʼil qibʼ ut xkanabʼankil saʼ ruqʼ re naq traqoq aatin?

8. Chanru naqakʼutbʼesi naq naqoxloqʼi li ruxtaan li Jehobʼa?

⁸ Naq nokookuyuk maak, naqakʼutbʼesi naq naqoxloqʼi li ruxtaan li Jehobʼa. Saʼ jun li jaljokil ru aatin, li Jesús kixjuntaqʼeeta li Jehobʼa rikʼin jun laj echal kʼanjel li kixkuy jun li xnimla kʼas li xmoos. Abʼan li moos aʼin moko kiruxtaana ta ru li rechmoosil, li moko naabʼal ta li xkʼas rikʼin (Mat. 18:23-35). Kʼaru kiraj xkʼutbʼal li Jesús? Wi qʼaxal oxloqʼ chiqu li ruxtaan li Jehobʼa, tqakuyebʼ xmaak li junchʼol (Sal. 103:9). Li hu Laj Kʼaakʼalehom kixye naq maakʼaʼ naxye jarubʼ sut naqakuy xmaak ebʼ li junchʼol, moko naxtaw ta xwankil «li ruxtaan li Jehobʼa ut chanru naxkuy qamaak saʼ xkʼabʼaʼ li Kriist».

9. Anihebʼ naruxtaana ru li Jehobʼa? (Mateo 6:14, 15).

⁹ Wi nokookuyuk maak, li Jehobʼa tixkuy ajwiʼ qamaak. Aʼan naruxtaana ru li nekeʼuxtaanank u (Mat. 5:7; Sant. 2:13). Li Jesús kixkanabʼ chi chʼolchʼo ru aʼin naq kixkʼut chiruhebʼ li xtzolom chanru teʼtijoq (taayaabʼasi Mateo 6:14, 15). Li Jehobʼa ak kixkʼut aʼin saʼ xkutankil laj Job. Laj Job kirahobʼtesiik rikʼin li kixye laj Elifaz, laj Bildad ut laj Zofar. Li Jehobʼa kixye re laj Job naq ttijoq saʼ xkʼabʼaʼebʼ li winq aʼin. Ut naq kixbʼaanu, kiʼosobʼtesiik (Job 42:8-10).

10. Kʼaʼut nokooxrahobʼtesi naq naqaxok saʼ qachʼool li xqakʼul? (Efesios 4:31, 32).

¹⁰ Xxokbʼal saʼ qachʼool li xqakʼul nokooxrahobʼtesi. Aʼin chanchan jun li nimla iiq, ut li Jehobʼa naraj naq tqisi saʼ qabʼeen (taayaabʼasi Efesios 4:31, 32). Naxye qe: «Matpoʼk, chakanabʼ laajosqʼil» (Sal. 37:8). Xyuʼaminkil aʼin nokooxtenqʼa xbʼaan naq moko us ta choʼq re li qajunxaqalil ut li qakʼaʼuxl (Prov. 14:30). Xxokbʼal saʼ qachʼool li xeʼxbʼaanu qe chanchan rukʼbʼal li bʼeneen: kaʼajwiʼ naqarahobʼtesi qibʼ qajunes. Joʼkan bʼiʼ, naq naqakuyebʼ xmaak li junchʼol, sa ajwiʼ naqekʼa qibʼ (Prov. 11:17). Nokoowank saʼ tuqtuukilal ut nokooruuk chi kʼanjelak chiru li Jehobʼa.

11. Kʼaru naxye li Santil Hu chirix xkʼebʼal reqaj li xeʼxbʼaanu qe? (Romanos 12:19-21).

¹¹ Qakanabʼaq saʼ ruqʼ li Jehobʼa li xeʼxbʼaanu qe. Li Jehobʼa moko xkʼe ta saʼ quqʼ xkʼebʼal reqaj li nekeʼxbʼaanu qe (taayaabʼasi Romanos 12:19-21). Saʼ xkʼabʼaʼ naq laaʼo aj maak, moko tooruuq ta chi raqok aatin joʼ naxbʼaanu li Jehobʼa (Heb. 4:13). Wank sut naq li naqekʼa naxbʼaanu naq moko us ta toonaʼlebʼaq. Laj Santiago kixtzʼiibʼa: «Li josqʼ aj winq inkʼaʼ naxbʼaanu li tiikilal li naraj li Yos» (Sant. 1:20). Chʼolchʼooq  chiqu naq li Jehobʼa traqoq aatin saʼ tiikilal.

12. Chanru naqakʼutbʼesi naq naqapaabʼ naq li Yos traqoq aatin?

¹² Naq nokookuyuk maak, naqapaabʼ naq li Yos traqoq aatin. Wi naqakanabʼ chixjunil saʼ ruqʼ li Jehobʼa, tqakʼutbʼesi naq chʼolchʼo chiqu naq tixtuqubʼ ru li rahilal li naqakʼul saʼ xkʼabʼaʼ li maak. Saʼ li akʼ ruuchichʼochʼ, inkʼaʼ chik «taajultikamanq li kʼaru xkʼulmank» ut inkʼaʼ chik tqakʼe saʼ qachʼool (Is. 65:17). Wi wank ani xrahobʼtesink qe, ma naru tqisi saʼ qachʼool li josqʼil? Qilaq kʼaru xeʼxbʼaanu wiibʼ oxibʼ li hermaan naq xeʼxkʼul aʼin.

13, 14. Kʼaru nakaatzol rikʼin laj Tony ut laj José?

¹³ Naabʼalebʼ li qechpaabʼanel xeʼkuyuk maak usta jwal ra li xeʼbʼaanuuk rehebʼ. Kʼaru rusilal keʼxtaw?

¹⁴ Qilaq li kixkʼul laj Tony, * li wank Filipinas. Naq toj maajiʼ naʼok joʼ aj testiiw re li Jehobʼa, kikamk jun li ras. Kixnaw naq kikamsiik xbʼaan laj José. Laj Tony qʼaxal josqʼ joʼkan kiraj xkamsinkil laj José. Abʼan laj José kikʼeheʼk saʼ tzʼalam. Naq laj José kiʼelk saʼ tzʼalam, laj Tony kixye naq tixsikʼ ut tixkamsi, joʼkan naq kixloqʼ jun li xpuubʼ. Abʼan kiʼok xtzolbʼal li Santil Hu rikʼinebʼ laj testiiw re li Jehobʼa. Aʼan naxye: «Naq yookin chi tzolok, xinkʼe reetal naq tento tinjal linnaʼlebʼ. Aajel ru naq tinkanabʼ li josqʼil». Laj Tony kikubʼeek xhaʼ ut moqon kiʼok joʼ cheekel winq. Kisach xchʼool xnawbʼal naq laj José kiʼok ajwiʼ joʼ aj testiiw re li Jehobʼa! Naq xeʼxtaw ribʼ, xeʼxqʼalu ribʼ ut laj Tony kixye re laj José naq kixkuy xmaak. Laj Tony naxye naq qʼaxal kisahoʼk saʼ xchʼool naq kixkuy xmaak laj José. Saʼ xkʼabʼaʼ aʼin kiʼosobʼtesiik xbʼaan li Jehobʼa.

15, 16. Kʼaru nakaatzol rikʼin laj Peter ut li xSue?

¹⁵ Saʼ li chihabʼ 1985, laj Peter ut li xSue wankebʼ saʼ chʼutam naq xkʼulmank jun nimla rahilal. Jun li winq kixkanabʼ jun li bomba saʼ li Chʼutlebʼaal  Kabʼl. Xbʼaan aʼin, li xSue inkʼaʼ chik naʼilok, naʼabʼink ut naʼutzʼuk. * Kokʼaj xsaʼ nekeʼxye: «Ani kibʼaanunk re li nimla rahilal aʼin?». Naq kinumeʼk naabʼal chihabʼ, keʼxchap li kibʼaanunk re, li maawaʼ aj Testiiw, ut xeʼxkʼe saʼ tzʼalam toj saʼ xkamik. Keʼpatzʼeʼk re laj Peter ut li xSue ma ak keʼxkuy xmaak, ut keʼxye: «Li Jehobʼa kixkʼut chiqu naq li josqʼil ut xxokbʼal saʼ qachʼool li kʼaru xeʼxbʼaanu qe, moko us ta choʼq re li qajunxaqalil, li naqekʼa ut li qakʼaʼuxl. Naq xqakʼul aʼin, xqatzʼaama re li Jehobʼa naq tooxtenqʼa re naq inkʼaʼ tqaxok saʼ qachʼool li xqakʼul re naq sa toowanq».

¹⁶ Ma kichʼaʼajkoʼk chiruhebʼ li sumal aʼin kuyuk maak? Joʼkan. Qilaq li nekeʼxye. «Naq li xSue jwal ra narekʼa ribʼ xbʼaan li kixkʼul, nachalk wiʼ chik qajosqʼil. Abʼan, naq inkʼaʼ naqakʼoxla rix li kikʼulmank, maakʼaʼ naqekʼa. Abʼan, wi saʼ jun kutan li winq aʼan t-oq saʼ li xtenamit li Jehobʼa, tqakʼul chi sa saʼ qachʼool. Aʼin naxkʼut chiqu naq xyuʼaminkil li naʼlebʼ li naxye li Santil Hu, narisi jun li mamaʼ iiq saʼ qabʼeen. Naxkʼe xsahil qachʼool joʼ maajunwa xqakʼoxla. Joʼkan ajwiʼ, naxkʼojobʼ qachʼool xnawbʼal naq li Jehobʼa chi seebʼ trisi chixjunil li rahilal li naqakʼul».

17. Kʼaru nakaatzol rikʼin li xMyra?

¹⁷ Li xMyra kixnaw ru li Jehobʼa naq ak sumsu chik ut wank wiibʼ xkokʼal, abʼan li xbʼeelom inkʼaʼ kixkʼulubʼa li yaal. Saʼ xnumikebʼ li kutan, li xbʼeelom kixmux li xsumlajik ut kixkanabʼ li xjunkabʼal. Li xMyra naxye: «Naq xinxkanabʼ linbʼeelom, kisach inchʼool rilbʼal aʼin. Ut joʼkaʼin xwekʼa wibʼ: maaʼani chik ninpaabʼ, ra inchʼool, nachalk injosqʼil ut xinkʼoxla naq laaʼin wank we». Usta kixraq li xsumlajik, toj ra saʼ xchʼool rikʼin  li kixkʼul. Li xMyra naxye ajwiʼ: «Chiru naabʼal po xwekʼa aʼin ut xinkʼe reetal naq aʼin yook innajtobʼresinkil rikʼin li Jehobʼa ut rikʼinebʼ li junchʼol». Abʼanan, li xMyra naxye naq inkʼaʼ chik najosqʼoʼk xbʼaan aʼin ut inkʼaʼ naraj naq tixkʼul junaq li maaʼusilal li kiwank choʼq xbʼeelom. Naraj bʼan naq saʼ jun kutan tixtzol li yaal. Li xMyra inkʼaʼ naxkʼe xchʼool chirix li xkʼulmank, naxkʼe bʼan xchʼool chirix li tkʼulmanq moqon. Usta xjunes kixkʼiresi li wiibʼ chi xkokʼal saʼ li yaal, anaqwan sa saʼ xchʼool chi xloqʼoninkil ru li Jehobʼa rochbʼenebʼ li xkokʼal ut ebʼ li xjunkabʼal.

18. Saʼ xkʼabʼaʼ naq li Jehobʼa aʼan Xnimal ru aj Raqol Aatin, kʼaru chʼolchʼooq chiqu?

¹⁸ Saʼ xkʼabʼaʼ naq li Jehobʼa aʼan li Xnimal ru aj Raqol Aatin, moko aajel ta ru naq t-oq qakʼaʼuxl chanru traqoq aatin saʼ xbʼeenebʼ li junchʼol. Aʼan tbʼaanunq re aʼin. Xnawbʼal aʼin naxkʼe xsahil qachʼool (Rom. 14:10-12). Chʼolchʼooq chiqu naq traqoq aatin chi tzʼaqal re ru joʼ naxye li xchaqʼrabʼ chirix li us ut li inkʼaʼ us (Gén. 18:25; 1 Rey. 8:32). Maajunwa tixbʼaanu li inkʼaʼ us.

19. Kʼaru tixbʼaanu li Jehobʼa li naraqok aatin chi tzʼaqal re ru?

¹⁹ Li Jehobʼa trisi li chʼaʼajkilal li naxkʼam chaq li maak. Qʼaxal naqoybʼeni naq twulaq li hoonal aʼan! Aʼan trisi chixjunil li rahilal li naqekʼa saʼ li qajunxaqalil (Sal. 72:12-14; Apoc. 21:3, 4). Relik chi yaal naq maajunwa chik tjultikamanq. Naq toj maaʼani nawulak li hoonal aʼan, qoxloqʼiq naq li Jehobʼa naxkʼut chiqu chanru xkuybʼalebʼ xmaak ebʼ li junchʼol.