1. Jehovap ajor­tulior­tut peq­qis­simisut qanoq neriorsoq­qis­saar­pai?

 JEHOVA Pin­ngor­titsisorigaluarlutigu, Inatsisilior­torigaluarlutigu Eqqar­tuus­sisorigaluarlutigulu aamma Ataatagaar­put qilam­miusoq asan­nit­toq. (Tuss 100:3; Es 33:22) Ajor­tuliorfigigaangatsinni ilumoorlutalu peq­qis­simigaangatta isumak­keerfigerusungaar­tar­paatigut. (Tuss 86:5) Pruf­fiiti Iisaaja aqqutigalugu Jehova asan­nil­luni ima neriorsueq­qis­saar­poq: “Ajor­tuliasi aap­pal­laris­sak­katut aap­palutsigigaluarunik aputitut qaqor­tigilis­sap­put.” – Es 1:18.

2. Allat eqqis­seqatigiumal­lugit susariaqar­pugut?

² Tamatta naam­mal­luin­nan­ngitsuugatta allat ajual­las­sutigisaan­nik oqaaseqar­tarlutalu iliuuseqar­tar­pugut. (Jaak 3:2) Qanimulli suli attaveqatigil­luarsin­naavagut? Aap, isumak­keerfigin­nin­nis­saq ilik­karsimagutsigu. (Uss 17:9; 19:11; Mat 18:21, 22) Annikitsutigut immitsin­nut ajual­latsik­kaangatta Jehovap isumak­keerfigeqatigiit­tar­nis­sar­put piumasaraa. (Kol 3:13) Jehova “isumak­keerfigin­nit­tuar­tarmat” taamaalior­nis­samut pis­sutis­saqarluar­pugut. – Es 55:7.

3. Allaaserisami matumani suut sam­mis­savagut?

³ Allaaserisami matumani inuit naam­mal­luin­nan­ngitsut Jehova isumak­keerfigin­nit­tar­toq qanoq ilaarsin­naagaat sam­mis­savar­put. Ajor­tuliat suut utoq­qaaner­tanut eqqaasariaqar­pagut? Sooq Jehovap isumak­keerfigin­nit­taq­quaatigut? Aamma uppeqatitta ilaat allat ajor­tulior­nerat pis­sutigalugu naal­liungaarsimasut qanoq ilin­niarfigisin­naavagut?

4. (a) Jehovap kif­faa ingasat­tumik ajor­tulior­toq susariaqar­pa? (b) Utoq­qaaner­tat eqqun­ngitsulior­tumik ataatsimeeqateqar­nerminni suna akisus­saaf­figisar­paat?

⁴ Ingasat­tumik ajor­tulior­nerit utoq­qaaner­tanut eqqaaneqar­tariaqar­put. Ajor­tuliat taamaat­tut ilaat Korintimiunut allak­kat siul­liit 6:9, 10-milu allas­simap­put. Ingasat­tumik ajor­tulior­nerit Guutip inatsisaanik sualut­tumik unioq­qutitsinerup­put. Kristumiu taamatut ajor­tulioruni Jehovamut Guutimut qinunik­kut isumak­keerfigeq­qusariaqarlunilu ilagiinni utoq­qaaner­tanut saaf­figin­nit­tariaqar­poq. (Tuss 32:5; Jaak 5:14) Utoq­qaaner­tat qanoq akisus­saaf­feqar­pat? Jehova kisimi tamak­kiisumik isumak­keerfigin­nis­sin­naavoq, pil­liullu uter­titsis­sut tun­ngavigalugu isumak­keerfigisar­paatigut. * Utoq­qaaner­talli Biibili tun­ngavigalugu ajor­tulior­tup ilagiin­niigin­narsin­naaneranik aalajangiinis­samik Jehovap akisus­saaf­filer­pai. (Kor 1. 5:12) Utoq­qaaner­tat ilaatigut uku akis­sutisiniar­tar­paat: Piaaraluni ajor­tulior­pa? Eqqun­ngitsulior­nis­sani pilersaarusior­paa? Sivisulaar­tumik ajor­tulioqat­taar­tar­pa? Pingaar­ner­tut, ilumoorluni peq­qis­simineranut upper­narsaateqar­pa? Jehovamit isumak­keerfigineqarsimaneranut takus­sutis­saqar­pa? – ApS 3:19.

5. Utoq­qaaner­tat sulinerat qanoq iluaqutaasar­pa?

⁵ Utoq­qaaner­tat eqqun­ngitsulior­toq ataatsimeeqatigigaangamikku qilammi aalajangiun­neqareersimasup malin­nis­saa anguniagarisar­paat. (Mat 18:18) Tamanna ilagiit qanoq iluaqutigisar­paat? Eqqun­ngitsulior­tup peq­qis­simin­ngitsup Jehovap savaataanik erlin­nangaar­tunik ajoqusiisin­naasup peer­neqar­neratigut illersor­neqar­tar­put. (Kor 1. 5:6, 7, 11-13; Tit 3:10, 11) Aamma ajor­tulior­tup peq­qis­siminis­saminut Jehovamillu isumak­keerfigineqar­nis­saminut iluaqutigisar­paa. (Luk 5:32) Utoq­qaaner­tat peq­qis­simisup Jehovamit anersaak­kut nakus­satsin­neqar­nis­saa qin­nutigisar­paat. – Jaak 5:15.

6. Ilaajun­naarsitaasimasoq isumak­keerfigineqarsin­naava? Nas­suiaruk.

⁶ Eqqun­ngitsulior­toq utoq­qaaner­tanik ataatsimeeqateqar­nermi peq­qis­simin­ngik­kuni ilagiin­nut ilaajun­naarsitaas­saaq. Nunami inatsisinik unioq­qutitsisimaguni iliuutsimi kingunipiluinut utoq­qaaner­tanit illersor­neqas­san­ngilaq. Jehovap oqar­tus­saasut inatsisinik unioq­qutitsisumik kimilluunniit – peq­qis­simisumik peq­qis­simin­ngitsumil­luun­niit – eqqar­tuus­sisin­naatil­lugillu pil­laatis­sin­naatip­pai. (Rom 13:4) Jehovalli ajor­tuliorsimasoq silat­tuaqilerluni ilumoorlunilu peq­qis­similerluni imminut saat­toq isumak­keerfigiumas­savaa. (Luk 15:17-24) Allaat ingasat­tumik ajor­tuliorsimagaluar­pat aamma isumak­keerfigiumas­savaa. – Nal 2. 33:9, 12, 13; Tim 1. 1:15.

7. Uagutsin­nut ajor­tulior­tumik isumak­keerfigin­nin­neq qanoq paasisariaqar­pa?

⁷ Oqilial­lan­nar­poq paasil­lugu ajor­tulior­toq Jehovamit isumak­keerfigineqas­sanersoq aalajangigas­sarinatigu. Allamilli aalajangigas­saqar­pugut. Sumik? Imaas­sin­naavoq allaat uagutsin­nut ingasat­tumik ajor­tulior­toq utoq­qatser­toq isumak­keerfigineqarumal­lunilu. Imaas­sin­naavorli taamaaliun­ngitsoq. Qanorluun­niit ikkaluar­pat narrutsas­simajun­naar­nik­kut kamas­simajun­naar­nik­kullu isumak­keerfiginiarlugu aalajangersin­naavugut. Anner­tuumilli ajual­latsin­neqarsimagutta ilimanar­poq sivisuumik tamaviaarlutalu tamanna sulis­sutigis­sagip­put. Vagttårnet  septembarip 15-iat 1994-imoor­tumi allas­simavoq: “Ajor­tulior­tumik isumak­keerfigin­nin­neq ajor­tuliamik akuersiner­tut paasisariaqan­ngilaq. Kristumiup isumak­keerfigin­nit­tup tatigisar­paa Jehova pisoq pil­lugu eqqoq­qis­saar­tumik eqqar­tuus­sis­sasoq. Qilammi nunamilu Eqqar­tuus­sisuuvoq naaper­tuil­luar­toq, naaper­tuil­luar­tumillu pineqar­nis­sar­put pif­fis­saq eqqorlugu isumagis­savaa.” Sooq Jehovap isumak­keerfigin­neq­qul­lutalu naaper­tuil­luar­tumik eqqar­tuus­siumaar­nerminik tatigin­neq­quaatigut?

8. Jehovap nal­lit­tuingaar­nera qujamasuutigigutsigu sorusus­saagut?

⁸ Isumak­keerfigin­ninneq qujamasun­nermut takus­sutis­saavoq. Jiisusip kun­ngi inus­siaatimi ilaan­nik akiitsor­pas­sualim­mik isumak­keerfigin­nit­toq pil­lugu assersuusior­nermigut Jehovap isumak­keerfigin­nit­tar­nera erseq­qis­sar­paa. Inus­sialli isumak­keerfigineqar­tup inus­siaqatini akiitsoqan­ngin­nerujus­suaq nal­lit­tun­ngilaa. (Mat 18:23-35) Jiisusip suna ilin­niar­titsis­sutigaa? Jehovap uagutsin­nik nal­lit­tuingaar­nera qujamasuutigigutsigu allat isumak­keerfigerusus­sagigut. (Tuss 103:9) Napasuliaq Alapernaarsuiffimmi tamanna ukior­pas­suit matuma siorna ima allaatigineqar­poq: “Inoqatitsin­nik isumak­keerfigin­nin­ner­pas­suagut Kristusip pil­liutaa tun­ngavigalugu Guutip uagutsin­nik isumak­keerfigin­nit­tar­nerinut nal­lit­tuisar­nerinullu sanil­liul­lugit suun­ngil­lat.”

9. Jehovap kik­kut nal­lit­tor­tar­pai? (Matiusi 6:14, 15)

⁹ Isumak­keerfigin­nittut isumak­keerfigineqas­sapput. Jehovap nal­lit­tuisut nal­lit­tor­tar­pai. (Mat 5:7; Jaak 2:13) Jiisusip ilin­niar­titani qanoq qinusar­nis­saan­nik ilin­niar­tik­kamigit tamanna erseq­qis­sar­paa. (Matiusi 6:14, 15 atuakkit). Jehovap siusin­nerusuk­kut kif­faminut Jobimut tun­ngatil­lugu tamanna aamma erseq­qis­sar­paa. Jobip aalajaatsup angutit pingasut – Elifazip, Bildadip Sofarillu – oqaasii sak­kor­tuut ajual­laatigingaar­pai. Jehovalli Jobi taak­kunin­nga qin­nus­seq­quaa. Jobilu taamaalioreerami Jehovamit akis­sarsisin­neqar­poq. – Job 42:8-10.

10. Sooq narrutsas­simajuar­neq ajoqutaava? (Efesos­simiut 4:31, 32)

¹⁰ Narrutsas­simajuarneq ajoqutaavoq. Narrutsas­simajun­naar­nik­kut oqilial­lan­nis­sar­put Jehovap kis­saatigaa. (Efesossimiut 4:31, 32 atuakkit). Ima kajumis­saar­paatigut: “Kaman­naveersaar­niarit uumitsat­tarun­naarlutillu.” (Tuss 37:8) Narrutsas­simajuar­neq timik­kut isumak­kullu peq­qis­sutsitsin­nut ajoqutaasin­naam­mat tamanna maleruarutsigu silatusaas­saagut. (Uss 14:30) Soorlu toqunar­tutor­ner­put nam­mineq ajoqutigis­sagip­put, taamatut­taaq narrutsas­simajuar­ner­put ajual­latsitsisumut sun­niuteqar­nani nam­mineq ajoqutigiin­nas­savar­put. Tassa isumak­keerfigin­nin­neq nam­mineq iluaqutigisar­par­put. (Uss 11:17) Qamuuna eqqis­sis­sal­lutalu Jehovamut kif­far­tor­nitsinni siumut ingerlaleq­qis­sin­naas­saagut.

11. Akiniaaneq pil­lugu Biibilimi qanoq allas­simasoqar­pa? (Romamiut 12:19-21)

¹¹ Akiniut Jehovap pigaa. Jehovap uagutsin­nut ajor­tulior­tunut akiniaasin­naatin­ngilaatigut. (Romamiut 12:19-21 atuakkit). Isigin­nit­taaser­put kil­leqarmat naam­mal­luin­nan­ngitsuugat­talu Guutitut eqqor­tumik eqqar­tuus­sisin­naan­ngilagut. (Hebr 4:13) Ilaan­nik­kullu misigis­sutsitsin­nit aqun­neqar­taratta naliliil­luan­ngitsoor­tar­pugut. Jehovap Jaaku isumas­sarsisil­lugu ima allatsip­paa:  “[Inuup] kaman­nera Guutip isaani eqqor­tulior­nermik kinguneqar­neq ajor­poq.” (Jaak 1:20) Jehovap pis­sutsinik naaper­tuil­luar­tumik aaq­qiinis­saa qularin­ngis­sin­naavar­put.

12. Jehovap naaper­tuil­luar­nera tatigalugu qanoq takutis­sin­naavar­put?

¹² Isumak­keerfigin­ninneq Jehovap naapertuil­luarneranik tatigin­nin­nermut takus­sutis­saavoq. Pis­sutsit Jehovamut isumagisas­san­ngor­tik­kaangatsigit takutit­tar­par­put ajor­tip kingunipiluinik tamanik aaq­qiiumaar­toq tatigalugu. Paratiisimi misigis­sutsik­kut ikit anner­nar­tut “eqqaamaneerutis­sap­put eqqaaq­qin­neqar­natil­lu”. (Es 65:17) Assulli ajual­latsin­neqar­nermi kamas­simajun­naar­toqarlunilu narrutsas­simajun­naar­toqarsin­naava? Ilaat qanoq taamaaliorsimasut paasiniariar­tigu.

13-14. Tonyp Joséllu misigisaan­nit isumak­keerfigin­nin­neq pil­lugu suna ilik­kar­piuk?

¹³ Kristumior­pas­suit allat iliuusii pis­sutigalugit ajual­latsin­neqangaarsimagaluarlutik isumak­keerfigin­nis­sin­naasimap­put. Tamanna sunik iluaqutis­sar­taqar­pa?

¹⁴ Tonyp, * Filip­pinerini najugaqar­tup, Nalunaajaasun­ngoq­qajar­nani paasivaa angajuni angum­mit Josémik atilim­mit toqutaasimasoq. Taamani Tony assut kamajal­lunilu nakuuser­tarami akiniaarusup­poq. José toqutsinini pil­lugu tigusaal­lunilu par­naarus­saavoq. Kingusin­nerusuk­kut iperagaam­mat Tony neriorsuivoq malersoriarlugu toqun­niarlugu. Taamaat­tumillu aal­laasisivoq. Tonyp Jehovap Nalunaajaasui Biibilimik misis­sueqatigisaler­pai. Ima oqar­poq: “Biibilimik misis­suininni paasivara kinaas­susera iliuutsik­kalu allan­ngor­tis­saguk­kit kamajajun­naar­tariaqarlunga.” Tony pif­fis­sap ingerlanerani imermut morsutsitaavoq naggataatigullu utoq­qaaner­tan­ngorluni. Josép Jehovamut kif­far­tor­tun­ngorsimanera tusaramiuk qanoq tupaal­latsigisoq takorlooruk! Naapik­kamik eqitaar­put, Tonyllu José oqarfigaa isumak­keerfigisimal­lugu. Tony oqar­poq isumak­keerfigin­nin­nini nuan­naalis­sutigingaaramiuk misigis­sutsini  nuan­nersut oqaasin­ngor­tik­kuminaatsil­lugit. Aap, Tony isumak­keerfigin­nik­kumam­mat Jehovap ajun­ngisaangaarfigaa.

15-16. Peterip Suellu misigisaan­nit isumak­keerfigin­nin­neq pil­lugu suna ilik­kar­piuk?

¹⁵ 1985-imi Peter Suelu ataatsimiin­nermut najuutsil­lugit tas­san­ngaan­naq sak­kor­tuumik qaar­toqar­poq. Sunaaffa qaar­tar­toq ataatsimiit­tarfim­mut inis­sin­neqarsimasoq! Sue aqqunarujus­suarami isigisin­naanera tusaasin­naaneralu katsorsar­neqarsin­naan­ngitsumik innarler­neqar­put. Aamma naamasaqarsin­naajun­naar­poq. * Peter Suelu immin­nut ima aperikulasar­put: ‘Inuk qanoq ittoq taama ajor­tigisumik iliuuseqarsin­naava?’ Ukior­pas­suit qaangium­mata qaar­tar­tumeerisoq, Jehovamut kif­far­tor­tuun­ngitsoq, tigusaavoq inuunermilu sin­nerani par­naarus­sas­san­ngor­tin­neqarluni. Peter Suelu aperineqaramik angut taanna isumak­keerfigisimanerlugu akip­put: “Jehovap ilin­niar­tip­paatigut kamas­simajuar­neq narrutsas­simajuar­nerlu timik­kut, misigis­sutsik­kut isumak­kullu ajoqutigisin­naagip­put. Taamaat­tumik aal­laq­qaam­mulli Jehova qin­nuigaar­put inuunitsinni ingerlaq­qin­nias­sagatta kamas­simajun­naar­nis­samut narrutsas­simajun­naar­nis­samullu ikioq­qul­luta.”

¹⁶ Isumak­keerfigin­nin­nis­saq ajor­nar­tin­ngilaat? Ilaan­nik­kuun­ngitsoq. Ima nangip­put: “Ilaan­nik­kut Suep aqqunarsimanera naal­liun­narsigaangat kamas­saqaler­tar­pugut. Tamak­kuli eqqarsaatigiuar­neq ajoratsigit ingerlaan­nangajak kamak­kun­naar­tar­pugut. Kisianni unneq­qaril­luta oqarsin­naavugut qaar­tar­tumeerisoq Nalunaajaasun­ngus­sagaluar­pat tikil­luaq­qus­sal­lutigu. Misigisatsin­nit ilik­kar­par­put Biibilimi najoq­qutas­siat takorloorsin­naasatsin­nit annerusumik inus­siaajun­naarsitsisar­tut. Aamma Jehovap ajor­tunik tamanik qanit­tuk­kut aaq­qiisus­saanerata ilisimanera tup­pal­lersaatigaar­put.”

17. Myrap misigisaanit isumak­keerfigin­nin­neq pil­lugu suna ilik­kar­piuk?

 ¹⁷ Myrap katereerluni marlun­nillu mikisunik meeraqalereerluni ilumoor­toq paasivaa. Uiatali ilumoor­toq upperin­ngilaa. Pif­fis­sap ingerlanerani uia allasior­poq ilaqut­tanilu qimal­lugit. Myra oqalut­tuar­poq: “Uima qimam­matigut asasamin­nit ilumoorfigineqan­ngitsut amerlasuut misigisar­tagaat aqqusaar­pakka – tuparujus­suar­neq, upperiuminaatsitsineq, aliasun­neq, pakatsineq, imminut pisuutin­neq kaman­nerlu.” Avereeraluarlutik suli misigis­sutsik­kut anniar­poq. Myra nangip­poq: “Qaam­mater­pas­suarni misigis­sutsit taakku atugaraakka, paasivaralu Jehovamut allanullu attaveqar­nin­nut sun­niuteqar­tut.” Myra oqar­poq uikuni maanna kamaan­nagulu ajor­tumik kis­saak­kun­naarlugu. Neriup­poq uikuni arlaanni Jehovamut qanil­liumaar­toq. Myrap maanna siunis­saq eqqarsaatigineruaa. Kisimiik­kaluarluni meeq­qani marluk Jehovamut kif­far­tor­tun­ngoq­qul­lugit perorsar­pai. Maan­nalu qitor­nani ilaqutaalu ilagalugit Jehovamut kif­far­tor­nini nuan­naarutigaa.

18. Jehova Eqqar­tuus­sisuul­luar­ner­paam­mat suna qularin­ngis­sin­naavar­put?

¹⁸ Qujamasuutigaar­put inuit ataasiak­kaat qanoq eqqar­tuun­neqar­nis­saat akisus­saaf­figin­ngin­natsigu. Jehova Eqqar­tuus­sisuul­luar­ner­paagami sulias­saq pingaarutilik tamanna isumagis­savaa. (Rom 14:10-12) Qularin­ngil­luin­narsin­naavar­put eqqar­tuus­seriaasia eqqor­toq eqqun­ngitsorlu pil­lugit najoq­qutas­siaanut pitsaaner­paanut naaper­tuut­tuaan­nar­toq. (Mos 1. 18:25; Kng 1. 8:32) Naaper­tuil­luan­ngitsumik iliun­ngisaan­nas­saaq.

19. Jehovap Eqqar­tuus­sisuul­luar­ner­paatut suut isumagis­savai?

¹⁹ Inuit naam­mal­luin­nan­ngis­sutaasa ajor­tiliunerisalu kingunipiluinik tamanik Jehovap aaq­qiil­luin­nar­nis­saa qilanaareqaar­put. Taamanik­kus­samut timik­kut misigis­sutsik­kullu ikigut tamarmik mamil­luin­narsimas­sap­put. (Tuss 72:12-14; Saqq 21:3, 4) Eqqaaneqaq­qin­ngisaan­nas­sap­put. Tamatuma utaq­qinerani qujamasuutigeqaar­put Jehovap imminik ilaarsisis­sin­naatil­luta isumak­keerfigin­nis­sin­naatim­matigut.