1. Kidyelelu kyahi kibhana Jihova kwa yó adyela o ituxi yâ?

 SUMBALA Jihova mwéne o Mubhangi wetu, Mubhani-a-ngonge ni Mufundixi, mwene we Tata yetu yadyulu. (Jisá. 100:3; Iza. 33:22) Kyoso ki tuta kituxi kwa mwene anga tudyela ni muxima woso, mwene wala ni kutena ni hanji yavulu ya kutuloloka. (Jisá. 86:5) Bhukaxi ka polofeta Izaya, Jihova wabhana o kidyelelu kiki: “Né-mbé ituxi yenu ya kusuka kala husu, ya-ndu zela mukwâ ni neve (o kikulakaji).”—Iza. 1:18.

2. Se twamesena kukala ni ukamba wambote ni akwetu, ihi itwatokala kubhanga?

² Kuma tu akwa ituxi, etwenyoso twene muzwela ni kubhanga ima iluwalesa akwetu. (Tiy. 3:2) Majiphe, kiki ki kilombolola kwila etu kitutena kukala tu makamba mâ akazola. Etu tutena kukala tu makamba mâ se tukala ni ukexilu wa ku aloloka. (Jisa. 17:9; 19:11; Mat. 18:21, 22) Se muthu uzwela mba ubhanga kima kyofele ki tuluwalesa, Jihova umesena kwila tumuloloka. (Kol. 3:13) Twejiya se mukonda dyahi twatokala kubhanga kiki. Jihova “mukwa kuloloka kyavulu.”—Iza. 55:7.

3. Ihi itwandadilonga mu milongi yiyi?

³ Mu milongi yiyi, twandadilonga kyebhi o athu akwa ituxi kyatena kukayela o phangu ya Jihova yakuloloka. Ituxi yebhi itwatokala kutangela ku tufunga? Mukonda dyahi Jihova wamesena kwila tuloloka akwetu? Ni ihi itutena kudilonga bhukaxi ka phangu ya jiphange atale hadi yavulu mukonda dya ituxi ya athu engi?

4. (a) Kyoso selevende ya Jihova kyata kituxi kyadikota, ihi yatokala kubhanga? (b) Kikalakalu kyebhi kyala nakyu o tufunga kyoso kyadyongeka ni muthu wate o kituxi?

⁴ Kyoso muthu kyata kituxi kyadikota twatokala kukitangela ku tufunga. Sayi ituxi yamakota tu isanga mu mukanda wa 1 Kolindu 6:9, 10. Kuta ituxi yamakota kwalungu ni kubhukumukina o itumu ya Nzambi mu ukexilu wayibha kinene. Se Kidistá uta kituxi kala kiki, mwene watokala kusamba kwa Jihova mukubhinga o muloloki, watokala we kufisala o kituxi kyê ku tufunga mu kilunga. (Jisá. 32:5; Tiy. 5:14) Kikalakalu kyebhi kyala nakyu o tufunga? Twejiya kwila Jihova ngó wala ni ungana wakuloloka o ituxi mu ukexilu watenena, mwene ubhanga kiki bhukaxi ka sata yakukula. * Maji mwene wabhana ku tufunga o kikalakalu kya kutonginina bhukaxi ka Bibidya, se o muthu wate o kituxi utena kusuluka mu kilunga mba kana. (1 Ko. 5:12) Phala kukumbidila o kikalakalu kiki, kima kimoxi kyatokala kubhanga, o kusota kutambwijila o ibhwidisu yiyi: O kwila o kituxi wakite mu vondadi yê? O kwila o muthu wasoto kusweka o kituxi? O kwila mwene wakibhange mu veji javulu? O kyabeta dingi kota, kwala kima kixikinisa kwila mwene wadyela ni muxima woso? O kwila sayi ima ilondekesa kuma Jihova wamuloloka?—Ika. 3:19.

5. Mbote yebhi ijila mu kikalakalu kya tufunga?

⁵ Kyoso o tufunga kyadyongeka ni muthu wate kituxi, ene asota kusola o ima kala kya ibatula kyá kudyulu. (Mat. 18:18) O kiki ki kwatekesa kyebhi o kilunga? Kilanga o kilunga mu kubhangesa kwila o muthu wate o kituxi yu wakambe o kudyela amuta mukamukonde phala kabhange kyayibha ku jiselevende jamukwa ja Jihova. (1 Ko. 5:6, 7, 11-13; Tit. 3:10, 11) Kiki ki tena we kukwatekesa o mukwa ituxi kudyela ni kukatula mbote ku muloloki wa Jihova. (Luk. 5:32) O tufunga asambela o muthu wadyela o kituxi kyê mu kubhinga kwa Jihova phala ku mukwatekesa kukala dingi ni ukamba wambote ni mwene.—Tiy. 5:15.

6. Se muthu amute mu kamukonde, o kwila Jihova utena hanji ku muloloka? Jimbulula.

⁶ Xinganeka kwila o muthu ukamba kudyela o kituxi kyê kyoso o tufunga kyadyongeka nê. Se o maka abhita mu ukexilu yú, o muthu andamuta mu kamukonde. Se mwene wabhukumukina ijila ya jinguvulu, o tufunga kanda mukudila ku ibhidi yejila mu ituxi yate. Jihova wehela o jinguvulu kufundisa ni kukaxtikala muthu wosowoso ubhukumukina o kijila kya jinguvulu né mwene se wadyela mba kana. (Lom. 13:4) Kupholo dya kwenda se o muthu uxikina kwila o kima kyabhangele kyexile kima kyayibha anga ulungulula o ixinganeku ni ibhangelu yê, Jihova wala polondo phala kumuloloka. (Luk. 15:17-24) Kiki kidi, né mwene se wate ituxi yamakota.—2 Mal. 33:9, 12, 13; 1 Ti. 1:15.

7. Mu ukexilu webhi tutena kuloloka o muthu watute kituxi?

⁷ Tusanguluka kyavulu mu kwijiya kwila k’etu twala ni kikalakalu kya kusola se Jihova wandaloloka o muthu wate kituxi mba kana! Né kiki kwala hanji kima ki twabhingi kusola. Kima kyahi? Sayi ithangana, mukwetu ututa kituxi, maji mwene utubhinga muloloki. Mu ithangana yamukwá, nange mwene katubhingi muloloki. Né kiki, tutena kusola kumuloloka ni kubhanga yoso phala kitukale ni unguma mba ku mukwatela njinda. Mu kidi, kubhinga kithangana ni nguzu yavulu  phala kubhanga kiki, bengebenge se muthu watukwama kyavulu. O Mulangidi wa mbeji ya Katutu wa 1994 mu phutu, wambe: “Kyoso ki uloloka muthu wakute kituxi, ki kilombolola kwila eye waxikina o kituxi kyê. Phala o Jikidistá, o kuloloka kulombolola kweha o maka bhu maku a Jihova. Mwéne o Mufundixi wa wayuka wa ngongo yoso, mwene wandabatula o maka ni kuyuka kwoso mu kithangana kyatokala.” Mukonda dyahi Jihova wamesena kwila tuloloka akwetu ni kudyelela kwila mwene wandabatula o maka ni kuyuka kwoso?

8. Mu ukexilu webhi o kuloloka akwetu kulondekesa kwila twamubhana valolo ku muloloki wa Jihova?

⁸ Kyoso kituloloka akwetu, tulondekesa kwila tubhana valolo ku muloloki wa Jihova. Sayi kizuwa Jezú watele kifika, mwene wasokesa Jihova ni ngana waloloka o dikongo dyamutele mubhik’ê. Mwene katenene kufuta o dikongo. Maji o mubhika yú kalondekesa henda, mwene kaxikina kuloloka o dikongo dyofelefele dyamutele mubhika ni mukwâ. (Mat. 18:23-35) Ihi yamesenene kutulonga Jezú? Mu kidi se tubhana valolo ku muloloki wa Jihova kokwetu, kiki kyandatubhangesa we kuloloka akwetu. (Jisá. 103:9) Mivu kudima O Mulangidi wajimbulula o maka enyá mu ukexilu yú: “Né mwene se tuloloka akwetu mu veji javulu, o muloloki wetu nuka wandasokela ni henda ni muloloki wa Nzambi kokwetu bhukaxi ka Kidistu.”

9. Jihova ukwatela henda kwa nanyi? (Matesu 6:14, 15)

⁹ Se tuloloka akwetu, Jihova wandatuloloka we. Jihova ukwatela henda kwa yó akwatela henda ku akwâ. (Mat. 5:7; Tiy. 2:13) Jezú wajimbulula kyambote o maka enyá kyoso kyalongo o maxibulu mê kusamba. (Tanga Matesu 6:14, 15.) Jihova wazwela we o maka enyá kwa selevende yê Jobe. O selevende yiyi ya Jihova, amukwamene kyavulu ni izwelu, ku mayala atatu a exana Ilifaji, Bidade ni Zofale. Né kiki Jihova watendelesa Jobe phala kusambela o mayala yâ. Kyoso Jobe kyabhange kiki, Jihova wamubesowala kyavulu.—Jobe 42:8-10.

10. Mukonda dyahi o kubhaka unguma kutubhanga kyayibha? (Efezu 4:31, 32)

¹⁰ Kubhaka unguma kutubhanga kyayibha. O kubhaka unguma kwa difwangana ni kwambata dibunda dyaneme kyavulu. Jihova wamesena kwila, tukatula o dibunda didi ku mwenyu wetu. (Tanga Efezu 4:31, 32.) Mwene ututendelesa: “Eye-phe, ku njinda tunda-ku, u ehe o kutema.” (Jisá. 37:8) Tulondekesa unjimu, kyoso kitubelesela o kitendelesu kiki. Kubhaka unguma kutena kutubhekela maka mu kilunji ni mu mukutu. (Jisa. 14:30) Kyoso kitubhakela unguma kwa mukwetu, kiki kikyanda bhekela ibhidi kwa mwene. Kyadifwangana ni mvwenenu. Se tunwa mvwenenu, o mukwetu kandatala hadi, étu mwene twanda tala. Kyenyiki, kyoso kituloloka akwetu, twamudibhekela mbote. (Jisa. 11:17) Tukala ni kutululuka kwa muxima ni kilunji, tukala we ni nguzu phala kusuluka kusidivila Jihova.

11. Ihi ilonga o Bibidya yalungu ni kuvutwila phonzo? (Loma 12:19-21)

¹¹ O phonzo yatokala kwa Jihova. Jihova katubhana ungana wa kuvutwila phonzo kwa muthu watute kituxi. (Tanga Loma 12:19-21.) Kuma tu akwa ituxi ni kwila tukamba kwijiya o ima yoso, kitutena kufundisa o ima ni kuyuka kwoso kala kibhanga Nzambi. (Jih. 4:13) Sayi ithangana o ibanzelu yetu itena kutufidisa kufundisa mu ukexilu watokala. Bhukaxi ka nzumbi ikôla ya Jihova, Tiyaku wasoneka: “O njinda ya muthu ki ibhekela  kuyuka bhupholo ya Nzambi.” (Tiy. 1:20) Tutena kudyelela kwila Jihova wandabhanga o kima kyatokala mu kubatula o maka ni kuyuka kwoso.

12. Kyebhi kitutena kulondekesa kwila twadyelela mu ukexilu wa Jihova wakubatula o maka ni kuyuka kwoso?

¹² Kyoso kituloloka o athu, tulondekesa kwila twadyelela mu ukexilu wa Jihova wakubatula o maka ni kuyuka kwoso. Mu kweha o ima bhu maku a Jihova, tulondekesa kwila twadyelela kuma Jihova wandabhwisa o ibhidi yoso itudibhanayu mukonda dya kituxi kyatute. Ku mundu wa ubhe watukanena Nzambi, o ima yayibha yabhiti ku mwenyu wetu yatuluwalesa kyavulu, kitwanda ibanza dingi, né ngó kwizayu mu kilunji. (Iza. 65:17) Maji kyoso kyatubhanga kima kyayibha kinene, o kwila tutena kuxisa o unguma mba njinda itukala nayu ku muxima? Tumone kyebhi amoxi kyabhange kiki.

13-14. Ihi iwadilongo yalungu ni kuloloka mu phangu ya Tonyi ni Zuze?

¹³ Phange jetu javulu asolo kuloloka, né mwene kyoso kya abhange ima yayibha kinene. Mabesá ebhi atambula mukuloloka akwâ?

¹⁴ Mivu yavulu ande dya kudilonga o Bibidya, Tonyi, * watungu mu ixi ya Filipinas, wejidile kwila sayi muthu a mwixana Zuze wajibhile kota dyê dya diyala. Mu kithangana kyenyókyo Tonyi wexile kisweya, mukwa njinda, wandalele kuvutwila phonzo. Zuze a mutele mu kaleya mukonda dya kima kyabhangele. Mu kubhita mivu kyoso Zuze kya mukatula mu kaleya, Tonyi wakanene kumuxima wê kwila weji sota Zuze phala kumujibha. Phala kubhanga kiki, mwene wasumbu uta. Tonyi wamateka kudilonga o Bibidya ni Jimbangi ja Jihova. Mwene wambe: “Kyoso ki ngayi ni kudilonga, ngatendela kwila, ngabhingile kulungulula o ukexilu wami ni ibhangelu yami.” Tonyi a mubatizala, kupholo dya kwenda wakituka kafunga mu kilunga. Xinganeka kyebhi kyadivu Tonyi kyoso kyeza mu kwijiya kwila Zuze a mubatizalele we kala selevende ya Jihova! Kyoso kyadisange, kiyadi kyâ a dibhubhala ni nguzu yoso, Tonyi wambela Zuze kwila wamulolokele kyá.  Tonyi wambe kwila o kuloloka Zuze kwamubhekela kisangusangu kyadikota, kate mwene katenene kujimbulula o kusanguluka kwakexile naku. Kyene, Jihova wabesowala Tonyi mukonda dya kukala polondo phala kuloloka Zuze.

15-16. Ihi iwadilongo ku musoso wa phange Peter ni Sue yalungu ni kuloloka?

¹⁵ Ku muvu wa 1985, phange Peter ni Sue exile mu kyônge mu Kididi kya Ubhezelu kyoso o bomba yabaze bhwakexile ene. Sayi diyala watele bomba mu Kididi kya Ubhezelu! O bomba yakwama kyavulu phange Sue, katé kindala mwene katena kumona ni kwivwa kyambote. Mwene we kene mu kwivwa dingi dizumba. * Mu ithangana yavulu phange Peter ni Sue exile mudibhwidisa: ‘Mukwahi wejibhanga o kuyibha kwoso kuku?’ Mu kubhita mivu yavulu, o diyala dyatele o bomba, kexile Mbangi ya Jihova, a mu kwata, amubalakala phala kukala mu kaleya katé kyanda kufwa. Kyoso kyebhwidisa kwa phange Peter ni Sue, se a lolokele o diyala dyodyo, ene ambe: “Jihova utulonga kwila kubhaka phonzo ni unguma, ku tubhanga kyayibha mu mukutu ni mu kilunji. Kyoso kyabhiti o maka ya, etu twasambe kwa Jihova phala kutukwatekesa kuxisa o kixinganeku kya kubhaka unguma ni kuvutwila phonzo, ni tusuluke ni mwenyu wetu.”

¹⁶ O kwila ki kya abhonzele kuloloka o diyala dyodyo? Sayi ithangana kya abhonzele mwene. Ene ambe dingi: “Sayi ithangana kyoso mana Sue kyakala ni jindolo mukonda dya ibhidi yamubhekela o bomba yoyo, o ixinganeku ya unguma ibanda dingi ku muxima. Maji kitusuluka kuxinganeka mu maka yâ. Mu kidi, tutena kuzwela ni muxima wetu woso kwila, se o diyala dyodyo dyatele o bomba ukituka phang’yetu, twanda mutambulula ni kisangusangu kyoso. O musoso yú utulonga kwila o itumu ya Bibidya itubhulula, yene itubhana ufolo, itubhangesa kudivwa mu ukexilu kitutena ku uxinganeka! Etu we twatululuka mukonda twejiya kwila kwakambe  ngó bhofele Jihova wandazubha o kuyibha kwoso.”

17. Ihi iwadilongo yalungu ni kuloloka ku musoso wa phange Minga?

¹⁷ Phange Minga wadilongo o kidi kyoso kyexile kyá dikaza ni twana tuyadi twofele. Mwadi wê kaxikina kudilonga o Bibidya. Mu kusuluka mwadi wê wate phanda yu waxisa o mwiji. Phange Minga wambe “Kyoso mwadi wami kya ngixisa ni twana twetu tuyadi, nga divwile kala kyene mudivwa athu avulu kyoso kaza dyâ kyata phanda. A kala ni kikote ku muxima, a dyela, a ditatela mukonda dya ima yabhange kaza dyâ, a kala we ni njinda.” Sumbala o ukaza wâ wabhu maji o ndolo ya ku mu nganala kwa mwadi wê yaxala. Phange Minga wambe dingi: “O ixinganeku yiyi yangitatesa mu mbeji javulu, ngamono kwila yene yexile mu zozesa o ukamba wami ni Jihova ni akwetu.” Kindala phange Minga uzwela kwila, kale dingi ni ixinganeku ya unguma yalungu ni diyala dyexile mwadi wê, ni kwila mwene kakingila kuma o diyala didi ditala hadi mukonda dya ima yamubhange. Mwene wamesena kwila sayi kizuwa o diyala dikituka selevende ya Jihova. Phange Minga ulunga o muxima wê ku kidyelelu kyê ku hádya. Mwene wasase twana twê tuyadi ubheka wê, yu wa akwatekesa kukala jiselevende ja Jihova. Lelu phange Minga wasanguluka kyavulu mu kusidivila Jihova kumoxi ni twana twê ni miji ya twana twê.

18. Kuma Jihova mwéne o Mufundixi wonene, ihi itutena kudyelela?

¹⁸ O kwijiya kwila kitwala ni ungana wa kufundisa o athu, ku tutululukisa kyavulu! Kuma Jihova o Mufundixi Wonene, mwéne wandabhanga o kikalakalu kiki. (Lom. 14:10-12) Tutena kudyelela ni kidi kyoso kwila, mwene wandatufundisa jinga bhukaxi ka itumu yê yayuka ni unjimu wakwijiya kyawabha ni kyayibha. (Dim. 18:25; 1 Jis. 8:32) Mwene nuka wandabhanga kima sé kuyuka!

19. Ihi yandabhita n’etu mukonda dya Jihova kukala mufundixi wayuka?

¹⁹ Twamukingila ni hanji yoso o kithangana kyoso Jihova kyandabhwisa o kuyibha ni ibhidi yoso yatubhekela o kituxi. Mu kithangana kyenyókyo, o ndolo ni malamba moso utwala nawu ku muxima andabhwa. (Jisá. 72:12-14; Dij. 21:3, 4) Kitwanda ibanza dingi. Kyoso ki tuya ni kukingila o kithangana kiki, tusakidila kyavulu Jihova mu kutubhanga ni uhete wakukayela o phangu yê yakuloloka.