1. Йаһоԝа чь соз дьдә ԝан, йед кӧ тʹобә дькьн?

 ХЕНЩИ ве йәке кӧ Йаһоԝа Әʹфьрандар, Ԛанундар у Һʹакьме мә йә, әԝ ӧса жи Баве мәйи дьлован ә (Зәбур 100:3; Ишайа 33:22). Гава әм гӧнә дькьн, ле жь дьл тʹобә дькьн, әԝ һьм дькарә һьм жи дьхԝазә бьбахшиньнә мә (Зәбур 86:5). Бь сайа Ишайа пʹехәмбәр, Йаһоԝа бь дьлгәрми ӧса готийә: «Һәгәр сущед ԝә мина ԛьрмьз [соре гәвәз] бьн жи ԝе мина бәрфе сьпи бьбьн» (Ишайа 1:18).

2. Сәва кӧ әм тʹәви мәрьва әʹдьлайеда бьн, гәрәке әм чь бькьн?

² Әм гьшк ԛьсурдар ьн, ләма жи әм дьле мәрьва щарна бь готьн у кьред хԝә дешиньн (Аԛуб 3:2). Диса жи, һәгәр әм һин бьн ԝәки бьбахшиньнә һәв, әм дькарьн тʹәви мәрьва әʹдьлайеда бьн (Мәтʹәлок 17:9; 19:11; Мәтта 18:21, 22). Гава әм дьле һәвдӧ бь шашийед бьчʹук дешиньн, Йаһоԝа дьхԝазә кӧ әм бьбахшиньнә һәв (Колоси 3:13). Һәгәр Йаһоԝа мә «бь зедәбари» дьбахшинә, гәло нә лазьм ә ԝәки әм жи бьбахшиньнә һәв? (Ишайа 55:7, ИМ).

3. Ве готареда, әме дәрһәԛа чь хәбәр дьн?

³ Ве готареда, әме бьвиньн кӧ мәрьвед ԛьсурдар чаԝа дькарьн чʹәʹв бьдьнә бахшандьна Йаһоԝа. Гәло әм гәрәке дәрһәԛа кʹижан гӧна рʹуспийарʹа бежьн? Йаһоԝа чьрʹа дьхԝазә кӧ әм бьбахшиньнә мәрьва?  Гәло әм дькарьн жь һьнә хушк-бьра, йед кӧ жь бо гӧнед кәсед дьн гәләк еш кʹьшандьнә, чь һин бьн?

4. (а) Гава хьзмәткʹарәки Йаһоԝа гӧнәки гьран дькә, әԝ гәрәке чь бькә? (б) Гава кәсәки гӧнәки гьран кьрийә, рʹуспи чь дькьн?

⁴ Лазьм ә дәрһәԛа гӧнед гьран рʹуспийарʹа бежьн. Дәрһәԛа һьнә жь ван гӧна 1 Корьнтʹи 6:9, 10-да те готьне. Гава кәсәк гӧнәки гьран дькә, әԝ ԛануна Хԝәде дьтʹәрʹьбинә. Әԝ мәрьв гәрәке һьм жь Йаһоԝа бахшандьне бьхԝазә, һьм жи дәрһәԛа ве йәке рʹуспийед щьватерʹа хәбәр дә (Зәбур 32:5; Аԛуб 5:14). Гәло рола рʹуспийа чь йә? Тʹәне Йаһоԝа дькарә гӧна бь тʹәмами бьбахшинә, у әԝ ве йәке ль сәр һʹиме ԛӧрбана Иса дькә. * Ле Йаһоԝа дьхԝазә ԝәки рʹуспи ль гора Ньвисаред Пироз тедәрхьн һәла кәсе кӧ гӧнә кьрийә дькарә щьватеда бьминә йан на (1 Корьнтʹи 5:12). Ләма жи, гәрәке әԝана жь хԝә ӧса бьпьрсьн: Гәло ви кәси бь һʹәмде хԝә гӧнә кьр? Гәло кәсе кӧ гӧнә кьрийә, пешда әв нет кьрьбу дьле хԝә ԝәки хьрабийе бькә? Гәло әԝи бәрдәԝам дькьр ви гӧнәйи бькә? Ле йа һәри фәрз әв ә, гәло әԝ жь дьл тʹобә дькә йан на? Гәло избати һәнә кӧ Йаһоԝа бахшандийә ԝи? (Кʹаред Шандийа 3:19).

5. Шьхӧле рʹуспийа чь кʹаре дьдә щьвате?

⁵ Гава рʹуспи тʹәви кәсе кӧ гӧнә кьрийә хәбәр дьдьн, нета ԝан әв ә кӧ сафикьрьнәкә ӧса бькьн, йа кӧ ида сәр әʹзмана һатийә сафикьрьне (Мәтта 18:18). Гәло щьват жь ви шьхӧле рʹуспийа чаԝа кʹаре дьстинә? Жь аликива, кәсед кӧ тʹобә накьн у дькарьн зьраре бьдьн пәзед Йаһоԝа, жь щьвате тенә дәрхьстьнә (1 Корьнтʹи 5:6, 7, 11-13; Тито 3:10, 11). Жь алийе дьнва жи, дьбәкә кәсе кӧ гӧнә кьрийә тʹобә бькә у жь алийе Йаһоԝава бе бахшандьне (Луԛа 5:32). Рʹуспи бона кәсе кӧ тʹобә кьрийә дӧа дькьн у жь Йаһоԝа рʹәща дькьн ԝәки әԝ али ви кәси бькә, ԝәки әԝ рʹӧһʹанида диса ԛәнщ бә (Аԛуб 5:15).

6. Һәгәр кәсәк жь щьвате бе дәрхьстьне, гәло әԝ диса жи дькарә бе бахшандьне?

⁶ Мәсәлә, чахе ԝәʹде хәбәрдана тʹәви рʹуспийа әԝ гӧне хԝә тʹобә накә, әԝ гәрәке жь щьвате бе дәрхьстьне. Һәгәр әԝи ԛанунед ԝәлат тʹәрʹьбандийә, рʹуспи ԝе ԝи жь щәза хԝәй нәкьн. Фьрԛи тʹӧнә әԝ тʹобә бькә йан на, Йаһоԝа изьне дьдә ԝәки дәԝләт диԝана һәр кәси бькә, йе кӧ ԛануне дьтʹәрʹьбинә, у ԝана щәза кә (Рʹомайи 13:4). Диса жи, һәгәр һʹьше ԝи кәсе гӧнәкʹар бе сәре ԝи у әԝ жь дьл тʹобә бькә у хԝә рʹаст кә, Йаһоԝа һазьр ә ԝәки гӧне ԝи бьбахшинә (Луԛа 15:17-24). Гӧне ԝи чьԛас гьран бә жи, Йаһоԝа дькарә бьбахшинә ԝи (2 Дирок 33:9, 12, 13; 1 Тимотʹейо 1:15).

7. Әм чаԝа дькарьн бьбахшиньн кәсе кӧ мьԛабьли мә гӧнә кьрийә?

⁷ Чьԛас баш ә ԝәки әм сафи накьн һәла Йаһоԝа ԝе бьбахшинә кәсәки йан на. Әԝ сафикьрьна ԝи йә, нә кӧ йа мәрьва. Ле тьштәк һәйә кӧ гәрәке әм хԝәха сафи кьн. Гәло әԝ чь йә? Щарна, дьбәкә кәсәки мьԛабьли мә гӧнәки гьран кьрьбә, ле паше дьбәкә әԝ  жь мә бахшандьне бьхԝазә. Щарна жи дьбәкә әԝ бахшандьне нахԝазә. Диса жи, әм дькарьн бьбахшиньнә ԝи кәси у һерсе дьле хԝәда хԝәй нәкьн. Һәгәр әԝи дьле мә гәләк ешандийә, дьбәкә бона ве йәке мәрʹа ԝәхт лазьм бә. Чәнд сал пешда, журналәкә мәда ӧса һатьбу готьне: «Гава тӧ дьбахшини кәсәки, әв йәк найе һʹәсабе ԝәки тӧ чʹәʹве хԝә сәр гӧне ԝи дадьди. Бона Мәсиһийа бахшандьн те һʹәсабе ԝәки әм ве проблеме дьдьнә дәсте Йаһоԝа. Һʹакьме һәԛ йе тʹәмамийа гәрдуне Әԝ ә, у әԝе ԝәхта рʹастда һәԛийе бинә сери» («Бьрща Ԛәрәԝьлийе» йа 15 Илоне, сала 1994). Гәло Йаһоԝа чьрʹа дьхԝазә кӧ әм бьбахшиньн мәрьва, у һәр тьшти һивийа ԝива бьһельн?

8. Рʹәʹма Йаһоԝа мә һелан дькә кӧ әм чь бькьн?

⁸ Гава әм дьбахшиньн мәрьва, әм нишан дькьн кӧ әм рʹәʹма Йаһоԝа ԛимәт дькьн. Мәтʹәлокәкеда, Иса бәʹса пʹадшаки кьр, йе кӧ дәйнәки мәзьн бахшандьбу хӧламәки хԝә. Ле әв хӧлам һьндава хӧламәки дьн рʹәʹмти нәда кʹьфше, йе кӧ һьнә пʹәрә дәйндаре ԝи бу (Мәтта 18:23-35). Гәло әв йәк бона мә чь дәрс ә? Йаһоԝа мина ви пʹадше жь мәтʹәлоке йә. Һәгәр әм жь дьл рʹәʹма Йаһоԝайә мәзьн ԛимәт дькьн, әме һазьр бьн кӧ бьбахшиньн мәрьва (Зәбур 103:9). Гәләк сал пешда, журнала «Бьрща Ԛәрәԝьлийеда» ӧса һатьбу готьне: «Әм чьԛас жи дьбахшиньн мәрьвед дьн, йәкә әв тʹӧ щар бәрамбәри бахшандьна жь Хԝәде набә, кʹижан кӧ сәр һʹиме ԛӧрбана Мәсиһ йә».

9. Йаһоԝа һьндава кʹеда рʹәʹм ә? (Мәтта 6:14, 15)

⁹ Һәгәр әм дьбахшиньн кәсед дьн, Йаһоԝа жи ԝе бьбахшинә мә. Йаһоԝа рʹәʹм ә һьндава кәсед дьлрʹәʹм (Мәтта 5:7; Аԛуб 2:13). Дӧайе кӧ Иса һин кьр, дина мә дькʹьшинә сәр ве йәке (Мәтта 6:14, 15 бьхунә). Чәнд ԛьрʹна пешда, һʹәта кӧ Иса һатә сәр әʹрде, Йаһоԝа нишани хьзмәткʹаре хԝәйи амьн Ибо кьрьбу, ԝәки бахшандьн чьԛас фәрз ә. Готьнед Әлифаз, Билдад у Зофар дьле Ибо гәләк ешандьбун. Диса жи, Йаһоԝа ԝирʹа гот ԝәки әԝ бона ԝан дӧа бькә. Паши кӧ Ибо әв йәк кьр, Йаһоԝа әԝ кʹәрәм кьр (Ибо 42:8-10).

10. Чьрʹа фәрз ә ԝәки әм кʹине жь дьле хԝә дәрхьн? (Әфәси 4:31, 32)

¹⁰ Гава әм кʹине дьле хԝәда хԝәй дькьн, әм зьраре дьдьнә хԝә. Кʹин барәки гьран ә, у Йаһоԝа дьхԝазә ԝәки әм ви бари сәр хԝә бавежьн (Әфәси 4:31, 32 бьхунә). Әԝ мәрʹа ӧса дьбежә: «Һерс нәкʹәвә . . . бинтәнг нәбә» (Зәбур 37:8). Әв йәк бь рʹасти жи ширәтәкә бь билани йә. Кʹин дькарә сьһʹәт-ԛәԝата мә ча физикида ӧса жи психикида хьраб кә (Мәтʹәлок 14:30). Чаԝа кӧ кәсәк жәʹре вәдьхԝә зьраре дьдә хԝә, нә кӧ кәсед дьн, бь ви щурʹәйи кәсе кӧ кʹине дажо, зьраре тʹәне дьдә хԝә. Ле кәсе кӧ дьбахшинә мәрьва, хԝәха хԝәрʹа кʹаре тинә (Мәтʹәлок 11:17). Һәгәр әм бьбахшиньнә мәрьва, әʹдьлайи ԝе бькʹәвә дьле мә у әме бькарьбьн бь дьләки рʹьһʹәт Йаһоԝарʹа хьзмәт бькьн.

11. Кʹьтеба Пироз дәрһәԛа һʹәйфһьлдане чь дьбежә? (Рʹомайи 12:19-21)

¹¹ Һʹәйфһьлдан йа Йаһоԝа йә. Гава кәсәк мьԛабьли мә гӧнә дькә, Йаһоԝа изьне надә кӧ әм һʹәйфе һьлдьн (Рʹомайи  12:19-21 бьхунә). Хԝәде һәр тьшти дьвинә, ле әм нькарьн бьвиньн. Әм гӧнәкʹар ьн у һәр тьшти ньзаньн (Ибрани 4:13). Щарна жи, емосийед мә дькарьн сәр ньһерʹандьна мә һʹӧкӧм кьн. Ләма жи Аԛуб жь бина бәр Хԝәде ӧса ньвисибу: «Һерса мерьв рʹастийа Хԝәде найнә сери» (Аԛуб 1:20). Әм дькарьн баԝәр бьн кӧ Йаһоԝа ԝе һәԛийе у диԝана рʹаст бькә.

12. Әм чаԝа дькарьн нишан кьн ԝәки әм итʹбарийа хԝә һәԛийа Йаһоԝа тиньн?

¹² Гава әм дьбахшиньнә мәрьва, әм нишан дькьн кӧ әм итʹбарийа хԝә һәԛийа Йаһоԝа тиньн. Хԝәде соз дайә ԝәки ԝе һʹәму зьраре кӧ мә жь бо гӧнә стандийә, бь тʹәмами бьдә һьлдане. Ләма жи ԝе баш бә кӧ әм проблемед хԝә бьдьнә дәсте ԝи. Дьнйа тʹәзәда, бьринед емосийали у дәрдед бәре ԝе ида «нәйен биранин у нәйен сәр һʹьша» (Ишайа 65:17, ИМ). Ле һәгәр дьле мә зәʹф ешандьнә, гәло дьбә ԝәки әм кʹин у һерсе жь дьле хԝә дәрхьн? Ԝәрә әм бьньһерʹьн кӧ һьнә мәрьва ча карьбунә ве йәке бькьн.

13-14. Сәрһатийа Тони у Хосе дәрһәԛа бахшандьне чь мә һин дькә?

¹³ Гәләк хушк-бьред мә сафи кьрьнә, ԝәки бьбахшиньн ԝан мәрьва, йед кӧ гәләк дьле ԝан ешандьнә. Гәло ԝана жь ве йәке чь кʹар стандийә?

¹⁴ Тони, * йе кӧ Филипинеда дьжи, гәләк сал пешда һʹәта кӧ бу Шәʹде Йаһоԝа, пеһʹәсийа ԝәки мерәки бь наве Хосе бьре ԝийи мәзьн кӧштьбу. Һьнге Тони йәки зӧлм у зордар бу, у әԝи дьхԝәст һʹәйфе һьлдә. Хосе сәва гӧне хԝә кʹәтә кәле. Чахе Хосе жь кәле дәркʹәт, Тони сонд хԝар кӧ әԝе пәй ԝи кʹәвә у ԝи бькӧжә. Жь бо ве йәке, әԝи хԝәрʹа чʹәк кʹьрʹи. Ле паше Тони тʹәви Шәʹдед Йаһоԝа дәстпекьр Кʹьтеба Пироз һин бә. Әԝ дьбежә: «Гава мьн леколин дькьр, әз пеһʹәсийам кӧ гәрәке жийина хԝә бьгӧһезьм у кʹине жь дьле хԝә дәрхьм». Ԝәʹдә шунда, Тони һатә ньхӧмандьне у паше ча рʹуспи һатә  кʹьфшкьрьне. Рʹожәки, әԝи бьһист кӧ Хосе жи буйә Шәʹде Йаһоԝа! Гава әԝ рʹасти һәв һатьн, ԝана һәвдӧ һʹәмез кьр, у Тони Хосерʹа гот кӧ әԝ дьбахшинә ԝи. Ахьрийеда, әʹдьлайи у шабунәкә мәзьн кʹәтә дьле Тони. Бәле, Йаһоԝа Тони кʹәрәм кьр, чьмки әԝ һазьр бу бьбахшинә Хосе.

15-16. Сәрһатийа Питер у Сйуйе дәрһәԛа бахшандьне чь мә һин дькә?

¹⁵ Рʹожәке, сала 1985, Питер у Сйу чубунә Ода Щьвате. Гава әԝ ԝедәре рʹуньшти бун, ньшкева одеда бомбә тʹәԛийа. Мерәки бомбәк данибу һʹӧндӧре Ода щьвате. Сйу ԛайим бьриндар бу, у һʹәта рʹожа иро әԝ рʹьнд навинә у набьһе. Ӧса жи, Сйу ида нькарә бине һьлдә. Питер у Сйуйе гәләк щара жь хԝә дьпьрсин: «Гәло кʹе дькарә тьштәки һаԛас хьраб бькә?» Гәләк сал шунда, кәсе кӧ бомбә данибу һатә гьртьне, щәза данә ԝи у сәр тʹәмамийа әʹмьре ԝи, әԝ кьрьнә кәле. Гава Питер у Сйуйе пьрсин һәла ԝана бахшандийә ԝи мәрьви йан на, ԝана ӧса гот: «Йаһоԝа мәрʹа дьбежә кӧ һәгәр әм һерс у кʹине дьле хԝәда хԝәй кьн, әв йәк дькарә сьһʹәт-ԛәԝата мә у психика мә хьраб кә. Ләма жи мә сәре-серида жь Йаһоԝа аликʹари дьхԝәст кӧ әм кʹин у һерсе жь дьле хԝә дәрхьн у бь дьләки рʹьһʹәт бьжин».

¹⁶ Гәло ԝанрʹа һеса бу кӧ бьбахшиньнә ԝи мәрьви? Щарна на. Әԝана дьбежьн: «Щар-щара, гава Сйу жь бо сьһʹәт-ԛәԝата хԝәйә хьраб дьчәрчьрә, диса һерса мә рʹадьбә. Ле әм бь зедәйи сәр ван тьшта нафькьрьн, ләма һерса мә зу датинә. Әм дькарьн бь һʹәлали бежьн, кӧ һәгәр рʹожәке, әԝ мерьк бьбә Шәʹде Йаһоԝа, әме ԝи ча бьре хԝә ԛәбул кьн. Әве ԛәԝьмандьне әм һин кьрьн, ԝәки принсипед Кʹьтеба Пироз бь рʹасти жи азайе тиньн. Бь сайа ван принсипа мә гәләк алийада азайи станд! Ԝәхтәкә незикда, Йаһоԝа ԝе һʹәму зьрара кӧ мә стандийә бьдә һьлдане, у әв йәк жи дьле мә рʹьһʹәт дькә».

17. Сәрһатийа Мирайе дәрһәԛа бахшандьне чь мә һин дькә?

 ¹⁷ Гава Мира бу Шәʹда Йаһоԝа, әԝ ида меркьри бу, у дӧ зарʹед ԝейә бьчʹук һәбун. Мере ԝе нәһатә сәр рʹийа рʹастийе. Ԝәʹдә шунда мере ԝе бенамуси кьр у ле һишт. Мира дьбежә: «Гава мере мьн әз тʹәви дӧ зарʹа һиштьм чу, мина гәләк кәсед кӧ рʹасти мьхәнәтийе тен, әз жи шашмайи мам. Мьн баԝәр нәдькьр кӧ әв йәк һатә сәре мьн, әз хәмгин дьбум, мьн хԝә сущдар дькьр у әз һерс дькʹәтьм». Чахе әԝана жь һәв ԛәтийан, еша мьхәнәтийе жь дьле Мирайе дәрнәдькʹәт. Әԝ дьбежә: «Дьле мьн гәләк мәһа тʹәвльһәв бу у әз дьчәрчьрим. Һьнге мьн фәʹм кьр, ԝәки әԝ һәстед негатив сәр достийа мьн тʹәви Йаһоԝа у тʹәви кәсед дьн, хьраб һʹӧкӧм дькьр». Иро, Мира дьбежә кӧ әԝе һерса хԝә бәрʹдайә у хьрабийе мере хԝәйи бәрерʹа нахԝазә, у һевийа ԝе һәйә кӧ рʹожәке әԝе жи бьбә досте Йаһоԝа. Мира ида бона жийина хԝәйә бәре дьлтәнг набә. Әԝе дӧ зарʹед хԝә тʹәне, ча хьзмәткʹаред Йаһоԝа мәзьн кьрьнә. Иро Мира тʹәви зарʹед хԝә у малбәтед ԝан, бь шабуне Йаһоԝарʹа хьзмәт дькә.

18. Чьрʹа әм дькарьн баԝәр бьн, кӧ Һʹакьме һәри мәзьн Йаһоԝа, ԝе диԝана һәри баш бькә?

¹⁸ Әм чьԛас ша нә кӧ щабдарийа мә нинә, ԝәки әм диԝана мәрьва бькьн. Һʹакьме мәзьн, Йаһоԝа, ԝе хԝәха ве йәке бькә (Рʹомайи 14:10-12). Йаһоԝа жь мә баштьр занә кӧ чь рʹаст ә у чь на, у әм дькарьн бь тʹәмами баԝәр бьн, кӧ Әԝе һәртʹьм ль гора принсипед хԝәйи беԛьсур диԝане бькә (Дәстпебун 18:25; 1 Пʹадшати 8:32). Әԝ тʹӧ щар нәһәԛийе накә!

19. Йаһоԝа соз дайә кӧ әԝе чь бькә?

¹⁹ Әм һʹьзрәта ԝе рʹоже нә, гава Йаһоԝа ԝе һʹәму зийанед кӧ жь ԛьсурдарийе у гӧнә тен, бьдә һьлдане. Һьнге һʹәму бьринед мәйә физики у емосийали ԝе ида ԛәнщ бьн (Зәбур 72:12-14; Әʹйанти 21:3, 4). Әме ԝана ида нәйньн бира хԝә. Һʹәта кӧ әв рʹожа хԝәш бе, ԝәрә әм мина Йаһоԝа рʹәʹм бьн у бьбахшиньнә мәрьва!