1. Ni kakasya lyahi eryo Yehova akaha abakolha-nabi abakayisubamu?

 NOMWAKINE indi Yehova ya Muhangiki wethu, yukathuha ebilhaghiro, n’Omutsweri, iyo kandi ni Thatha wethu w’olhwanzo ow’elhubulha. (Esy. 100:3; Isa. 33:22) Thwamamusoberya kandi thukayisubamu erilhua okwa muthima, akathughanyira kandi anzire kutsibu erikolha ekyo. (Esy. 86:5) Erilhabira omu muminyereri Isaya, Yehova akathuha erikakasya eryuwene lino: “Nomo ebibi byenyu byangabya ng’engulha, byasyabya byeru ng’esyonzururu.”​—Isa. 1:18.

2. Thwamabya thwanzire eribya buholho n’abandi, thutholere ithwakolhaki?

² Kundi sithuhikene, ithwe bosi thukabugha n’erikolha ebikahithanaya abandi. (Yak. 3:2) Aliwe, ekyo sikirimanyisaya kithi sithwanga thasyabya bughuma nabu. Thwanganabya bughuma nabu thwam’igha erighanyira. (Emi. 17:9; 19:11; Mt. 18:21, 22) Thwamasoberania omwa myatsi mike-mike, Yehova akanza ithwaghanyirana. (Kol. 3:13) Thuwithe enzumwa mbuya ey’erikolha ekyo. Kundi nibya Yehova akathughanyira “ndeke.”​—Isa. 55:7.

3. Thukendi kania okuki omo mwatsi ono?

³ Omo mwatsi ono, thukendi lebya abandu abathahikene nga banga gherererya bathi erighanyira lya Yehova. Ni malholho wahi agho thutholere ithwabwirako abasyakulhu? Busana naki Yehova akathuhira mw’omuhwa w’erighanyira abandi? Ni byahi ebya thwang’ighira okwa balikyethu ababiriaghalhwa kutsibu busana n’amalholho w’abandi?

4. (a) Omughombe wa Yehova amakolha erilholho erikalire, atholere iniakolhaki? (b) Abasyakulhu bawithe lhukwamirwaki bakakania n’omukolha-nabi?

⁴ Thutholere ithwabwira abasyakulhu okwa malholho awakalire.  Eby’erileberyako by’amalholho ng’ayo bine omwa 1 Abanya Korinto 6:9, 10. Amalholho awakalire akathwa kutsibu ebihano bya Nyamuhanga. Omukristayo amakolha erilholho ng’eryo, atholere iniakania na Yehova Nyamuhanga omwa musabe, kandi atholere iniahika okwa basyakulhu b’ekithunga. (Esy. 32:5; Yak. 5:14) Abasyakulhu bawithe lhukwamirwaki? Yehova musa yuwithe obuthoki bw’erighanyira ighuma ebibi, ekindu ekikathokekana busana n’ekihongo ky’endongolya. * Aliwe, Yehova abiriha abasyakulhu b’olhukwamirwa lhw’erithwamu erikwamana n’Amasako omukolha-nabi ng’anasighale omwa kithunga. (1 Kor. 5:12) Okwa bya banga lengekaniako, batholere ibabya ibangana subirya ebibulyo nga bino: Mbwino alyakolererera ekibi? Mbwino abya iniabirisangwa athegheka erikolha ekibi? Mbwino amabirighunza buthuku buuli inianemukolha ekibi ekyo? Ekikulhu kutsibu, mbwino hane ebikakanganaya kw’abiriyisubamu erilhua okwa muthima? Mbwino hane ebikakanganaya ngoku Yehova abirimughanyira?​—Emib. 3:19.

5. Ni mighisa yahi eyikalhua omwa mubiiri w’abasyakulhu?

⁵ Abasyakulhu bakabya bakakania n’omukolha-nabi, ekilhubirirwa kyabu hano okwa kihugho ly’erihika okw’ithwamu eryabirisangwa lyakolhwa elhubulha. (Mt. 18:18) Endegheka eyi yikaghasira yithi ekithunga? Yikathukakasaya ngoku abakolha-nabi abatheyisubamu abanga tsandya esyombuli sya Yehova esy’obughuli bakalhusibawamu. (1 Kor. 5:6, 7, 11-13; Tito 3:10, 11) Kandi yangana wathikya omukolha-nabi eriyisubamu n’erighasirwa omw’ighanyira lya Yehova. (Lk. 5:32) Abasyakulhu bakasaba busana n’omukolha-nabi oyuwabiriyisubamu kandi bakasaba Yehova bathi amuwathikaye alhame bunyakirimu.​—Yak. 5:15.

6. Omundu amahighithwa, mbwino kikinathokekene iyo erighanyirwa? Soborera.

⁶ Thubughe thuthi omukolha-nabi syathakangania eriyisubamu abasyakulhu bakakania nayu. Aho iniakendi highithwa omwa kithunga. Amabya iniabirithwa ebilhaghiro by’ekihugho ekyo ikeremu, abasyakulhu isibendi mutheya okwa byanga lhwiririramu. Yehova akalighira abanya gavumente eritswera n’erisuyira owosi-wosi oyukathwa ebilhaghiro​—mbulha abiriyisubamu kutse eyihi. (Abar. 13:4) Aliwe enyuma waho omundu amabuka kw’obulengekania kandi akayisubamu erilhua okwa muthima, Yehova akabya inianayitheghekire erimughanyira. (Lk. 15:17-24) Ekyo ni kwenene ebibi biwe nomubyangabya ibilhue bikalire kutsibu.​—2 Emy. 33:9, 12, 13; 1 Tim. 1:15.

7. Thukaghanyira thuthi oyuwabirithusoberya?

⁷ Kikahumulikanaya eriminya ngoku sithuli b’erithwamu Yehova ng’anaghanyire omukolha-nabi kutse eyihi! Aliwe, hane ekya thutholere erithwamu. Ni kyahi? Hanganayira omundu iniathusoberya​—nibya iniathusoberya kutsibu—​aliwe iniathusaba ekighanyiro. Okwa bundi buthuku, iniangana ghana erikolha ekyo. Kyamabya kithya, ithwangana thwamu erimughanyira omw’ithwamu erithendi bika ekinigha kyosi-kyosi ekyo thumuwitheko. Omo kwenene, eki kyangana yithagha obuthuku n’akaghalha, kutsibu-tsibu thwamabya imuthukahithanibawa kutsibu. E Watchtower ey’Okwomwenda 15, 1994, muyabugha yithi: “Wukabya wukaghanyira omukolha-nabi, ekyo sikirimanyisaya kithi wukasighika ekibi. Oko Mukristayo, erighanyira likamanyisaya eriyikethera Yehova  omw’imulekera emyatsi. Omwa buhangwa bwosi ya Mutsweri oyuthunganene, kandi akendi syakangania obulingirirania okwa buthuku obutholere.” Busana naki Yehova akathuhira mw’omuhwa w’erighanyira n’eriyikethera ku yukendi tswera omwa bulingirirania?

8. Eribya abakabuyira kikakanganaya kithi ku thukasima obughanyiri bwa Yehova?

⁸ Eribya abakaghanyira kikakanganaya erisima. Omwa musyo mughuma, Yesu mwalinganisya Yehova n’omukama oyuwaghanyira omughuma w’okwa baghombe biwe y’eribanza linene eryo abya isyanga thoka erithuha. Aliwe, omughombe oyuwaghanyirawa mwalemwa erighanyira owundi mughombe oyuwabya mw’eribanza liwe like kutsibu. (Mt. 18:23-35) Yesu abya iniali kuthukangiriryaki? Thwamabya ithukasima kwenene obughanyiri bunene obwa Yehova abirithukangania, ikikendi thuhira mw’omuhwa w’eribuyira abandi. (Esy. 103:9) Myaka mirebe kera Akaleberyo mukakibughako omwa nzira eno: “Nomuthwanga buyira balikyethu mirundi mingahi, sikyang’ingana n’eribuyira n’obughanyiri ebyo Nyamuhanga abirithukangania erilhabira omu Kristo.”

9. Ni bahi abo Yehova akakanganaya obughanyiri? (Matayo 6:14, 15)

⁹ Abakaghanyira bakendi syaghanyirwa. Yehova akakanganaya obughanyiri okwa bakakanganaya obughanyiri. (Mt. 5:7; Yak. 2:13) Yesu mwakangania ekyo kya ndeke akakangirirya abigha biwe ngoku banga saba. (Soma Matayo 6:14, 15.) Kera, Yehova abya iniabiribugha ikyan’ekyo omwa binywe ebyo abwira omughombe wiwe Yobu. Ebinywe ebikatsimitha ebya balhume basathu ya Elifasi, Bildadi, na Zofari byabya ibyabirihithania kutsibu omulhume omuthaleghulha oyo. Yehova mwabwira Yobu athi asabe busana nabu. Yobu abere abirikolha ekyo, Yehova mwamutsumulha.​—Yobu 42:8-10.

10. Busana naki eribika ekinigha ni yihuthalya? (Abanya Efeso 4:31, 32)

¹⁰ Eribika ekinigha ni yihuthalya. Yehova anzire ithwabana obuholho obukasa busana n’eriyilhusya kw’omuheke w’eribika ekinigha. (Soma Abanya Efeso 4:31, 32.) Akathubwira athi ‘thuleke erihithana; thuleke eriaghalirwa!’ (Esy. 37:8) Ni ky’amenge erighendera okw’ihabulha eryo. Eribika ekinigha kyangana hamba nabi okwa maghalha wethu kinyamubiri n’omwa bulengekania. (Emi. 14:30) Eribika ekinigha liri ng’erinywa obutwa kundi thwamabika ekinigha oko yulyathuhithanaya, n’ithwe thukabya ithukayihuthalhaya. Omwakanya k’eyo, thukabya thukaghanyira abandi thukabya ithukayiha ekihembo. (Emi. 11:17) Thukathunga erithekana omwa bulengekania n’omwa muthima, kandi ithwathoka erilholha embere omwa mubiiri wa Yehova.

11. E Biblia yikabugha yithiki okw’ithuhulya? (Abanya Roma 12:19-21)

¹¹ Erikisya ni rya Yehova. Yehova syali athathuha ehamuli y’eriyithuhulirya omundu amathusoberya. (Soma Abanya Roma 12:19-21.) Busana n’amalengekania wethu make kandi awathahikene, sithwanga thoka eritswera ndeke emyatsi ngoku Nyamuhanga akakolha. (Ebr. 4:13) Kandi hanganayira ithwalighira eriyowa lyethu erihamba nabi okw’itswera lyethu eryuwene. Yehova mwasondolha Yakobo erihandika athi: “Erihithana ly’abandu siririyira erithunganene lya Nyamuhanga.” (Yak. 1:20) Thwangana yikethera ngoku Yehova akendi kolha ekihikire n’erilhangira athi obulingirirania obuhikene bukakanganibawa.

12. Thwanga kangania thuthi ku thuyikethere obulingirirania bwa Yehova?

 ¹² Erighanyira likakanganaya ngoku thukayikethera obulingirirania bwa Yehova. Omw’isigha emyatsi omwa byalha bya Yehova, thukakanganaya ku thuyikethere ngoku Yehova akendi syaghunzaho ebitsibu byosi ebikasa busana n’ekibi. Omwa kihugho kiwe kihya-kihya ekyo abirilhagha, eriaghalirwa eryabya likathulethera obulhumi siryendi “syasibukwa, kutse erihika oko muthima.” (Isa. 65:17) Aliwe thwamabya ithwabirihithanibwa kutsibu, kwenene ikyanathokekana erithendi bika ekinigha ekyangabya omwa mithima yethu? Thulebaye abandi ng’ababirithoka bathi erikolha ekyo.

13-14. Ekyalholirweko kya Tony na José kyamakweghesyaki okw’ighanyira?

¹³ Abangyi b’okwa balikyethu babirithwamu erighanyira nibya ibabirihithanibwa kutsibu busana n’ebya bandi balyabakolera. Ni mighisa yahi eyo babiribana omw’ikolha ekyo?

¹⁴ Kera, Tony * oyuwikere e Philippines abere athali aminya ekwenene, mwaminya ngoku omulhume oyukahulhawamo José yuwitha omughuma w’okwa baghalha babu abakulhu. Okwa buthuku obo, Tony abya mutsururu kandi mutsurumi, neryo mwanza erithuhulya. José mwahambwa n’erihirwa omwa ngomo busana n’olhubanza olho. Enyuma waho, José abere abirilhusibwa omwa ngomo, Tony mwalhahirya athi akendi musondya n’erimwitha. Ekyo mukyaleka iniaghulha embundu. Ebyo bine aho, Tony mwatsuka erigha Biblia n’Abema ba Yehova. Akabugha athi, “Nabere ngane mw’igha, munaminya ngoku ngatholere eribindulha emibere yaghe, kandi ekyo mwabya imwamuli erithendi bika ekinigha.” Endambi muyahika Tony amabatizibwa n’erighunzerera amasombolhwa ng’omusyakulhu w’ekithunga. Thalengekania nga mwasweka bungahi akaminya ngoku José nayu abiribatizibwa n’eribya mughombe wa Yehova! Babere bakasanga-ngana, mubawanako, neryo Tony mwabwira José ngoku abirimughanyira. Tony akabugha athi erighanyira eri mulyamulethera etseme nene erihika okw’ibya imukyamukalira erisoborera eriyowa eryuwene kutsibu eryo. Omo kwenene, Yehova mwatsumulha  Tony busana n’eribya inianayitheghekire erighanyira.

15-16. Ekyalholirweko kya Peter na Sue kyamakweghesyaki okw’ighanyira?

¹⁵ Omwa 1985, Peter na Sue babya ibane okwa mihindano omwa Kisenge ky’Obwami ebbomu yikathulika kitsumbukirania. Omulhume abya iniabirithegha ebbomu omwa Kisenge ky’Obwami! Sue mwahuthalha kutsibu ekyabirileka iniabya isyanga thasyalhangira n’eriowa ndeke. Kandi mwabya isyanga thasyabeherwa. * Peter na Sue ibakabera eriyibulya, ‘Ni mundu oyuli athi oyuwangabya imwakolha ekibi ekiri ng’eki?’ Enyuma w’emyaka mingyi, oyuwathegha ebbomu, oyuthabya mughombe wa Yehova, mwahambwa n’eribohwa maisya. Babere bakabulibwa ng’ababirighanyira omulhume oyu, Peter na Sue mubabugha bathi: “Yehova akathukangiriraya athi eribika ekinigha lyangana thuhambako nabi kinyamubiri, omw’iyowa, n’omwa bulengekania. Buthuku buke enyuma waho, muthwasaba Yehova thuthi athuwathikaye erithendi bika ekinigha kandi thulhole embere n’engebe.”

¹⁶ Mbwino kyanabiribanguhira erighanyira? Si mughulhu wosi. Bakathasya bugha bathi: “Okwa bundi buthuku, Sue akabya akaghalhwa busana n’ebyabirimubyako ebyo, thukathasyahithana. Aliwe sithuli hweraya okw’ekyo kw’amalengekania, neryo eriyowa eryo likalhuaho iryayihwera. Omo kwenene, thwangana bugha erilhua okwa muthima thuthi, kiro kighuma, oyuwathegha ebbomu oyo amabya mulikyethu, ithukendi mwangirira. Ekyalholirweko eki kyabirithweghesya ngoku emisingyi ye Biblia yikathuyira mo b’obwiranda; yikathuyira bwiranda omo nzira nyingyi esyo thuthalengekenie! Kandi thukahumulikana omw’iminya ngoku Yehova akisiya iniaghunzaho ebyosi ebikathwaghalhaya.”

17. Ekyalholirweko kya Myra kyamakweghesyaki okw’ighanyira?

¹⁷ Myra aminya ekwenene iniabirithahibwa kandi inianawithe abaana babiri abalere-balere.  Mwira wiwe mwathaligha ekwenene. Endambi muyahika, amasingira n’erisighania eka yiwe. Myra akabugha athi: “Mwira waghe abere akanyisighania n’abaana babiri, munathunga eriyowa eryo abangyi bakathunga abanze babu bakabaghoberya​—erisweka, erithika, obulighe, eriyikubyabwomo, eriyitsweba, n’ekinigha.” Nomwakine indi obutheke mubwahwa, mwasighalha iniane omwa bulhumi bw’erighoberibwa. Myra akathasyabugha athi: “Munaghunza amezi ingane muyowa nabi kutsibu, kandi munaminya ngoku ekyo kinemuhamba okwa bughuma bwaghe na Yehova n’abandi.” Lino Myra akabugha athi syakikwire ekinigha kandi athi syakisunzira oyuwabya mwira wiwe ya nabi. Awithe amaha athi kiro kighuma oyuwabya mwira wiwe akendisya yithunda hakuhi na Yehova. Myra abirithoka erihira amalengekania okwa buthuku obukasa. Nga mama oyukalembera abaana b’eyuwene, abirikulya abaana biwe babiri eribya baghombe ba Yehova. Munabwire, Myra awithe etseme y’erikolera Yehova n’abaana biwe haghuma n’esyofamile syabu.

18. Ni yikethera lyahi eryo thwanga thunga omu Yehova ng’Omutsweri Mukulhu?

¹⁸ Ka kikahumulikanaya eriminya ngoku si lhukwamirwa lhwethu erithwamu abandu nga batholere ibatswerwa bathi! Iyo ng’Omutsweri mukulhu, Yehova akendi syakolha omubiiri mukulhu oyo. (Abar. 14:10-12) Thwangana yikethera ighuma ngoku mughulhu wosi akendi syabya iniane mutswera erikwamana n’ebihano biwe ebihikene ebihambire okwa kihikire n’ekithahikire. (Enz. 18:25; 1 Bam. 8:32) Syanga kolha ekyosi-kyosi ekithathunganene.

19. Obulingirirania bwa Yehova obuhikene bukendi syaberereryaki?

¹⁹ Thukakandira omughulhu Yehova akendi syaghunziraho ighuma ebindu bibi ebyosi ebikalhwiririra omwa buthahikana bw’abandu n’ekibi. Oko buthuku obo, ebyosi ebikathwaghalhaya kinyamubiri n’omw’iyowa bikendisyahweraho ighuma. (Esy. 72:12-14; Erib. 21:3, 4) Sibyendi syaswibukwa nahake. Thunalindirire obuthuku obuwene obo, thukasima Yehova eribya iniabirithuha amaaka w’erimugherererya omw’ibya abakaghanyira.