MUTWE WA KUFUNDA 25
Yehoba Upesha Bantu Balekelako Bakwabo Mambo
“Byonkatu Yehoba byo emulekejileko mambo, ne anweba byo byo mwafwainwa kubanga.”—KOLO. 3:13.
LWIMBO 130 Ilekelaingako Mambo
BIJI MU UNO MUTWE *
1. Ñanyi byambo Yehoba byo alaya bandengamambo balapila?
YEHOBA ye Shetu wa mwiulu wa butemwe, ye Mulenga wetu, ye Witupa Mizhilo kabiji Mutonyi. (Sala. 100:3; Isa. 33:22) Inge twalenga mambo ne kulapila kufuma panshi ya muchima, Yehoba kechi ukebatu kwitulekelako mambo ne, bino uji ne na luusa lwa kufuukulapo kwitulekelako mambo nangwa ne. (Sala. 86:5) Yehoba waingijishe ngauzhi Isaya kwitutekenesha’mba: “Nangwa kya kuba mambo enu achilatu ngee nobe mashi, akatokatu too nobe mabebe.”—Isa. 1:18.
2. Twafwainwa kuba ka pa kuba’mba bulunda bwetu na bakwetu butwajijile?
2 Na mambo a kuba’mba twibambulwa kulumbuluka, atweba bonse twamba ne kuba bintu bizhingijisha bakwetu. (Yako. 3:2) Pano bino, kino kechi kibena kulumbulula’mba po papwila bulunda bwetu ne. Bulunda bwetu bwakonsha kutwajijila inge ke twibalekeleko mambo. (Maana. 17:9; 19:11; Mat. 18:21, 22) Inge mukwetu waamba nangwa wauba kintu kitukozha ku muchima, Yehoba ukeba’mba tulekeleko mambo mukwetu. (Kolo. 3:13) Kyanema bingi kuba bino, mambo ne atweba Yehoba witulekelako mambo etu “onsetu.”—Isa. 55:7.
3. Ñanyi bintu byo tusakufunda mu uno mutwe?
3 Mu uno mutwe tusakwisamba pa bantu bambulwa kulumbuluka byo bafwainwa kulekelangako bakwabo mambo byonka byuba Yehoba. Ñanyi mambo o twafwainwa kubuula bakulumpe mu kipwilo? Mambo ka Yehoba o akebela’mba tulekelengako bakwetu mambo? Kabiji ñanyi bintu byo twafwainwa kufunjilako ku balongo ne banyenga pa byaubile bakwabo bibafichishe ku muchima?
UMVWE MWINA KILISHITU WALENGA MAMBO AKATAMPE
4. (a) Umvwe mwina Kilishitu walenga mambo akatampe wafwainwa kuba ka? (b) Ñanyi mwingilo uji na bakulumpe mu kipwilo inge babena kutotolwesha muntu walenga mambo?
4 Twafwainwa kubuula bakulumpe mu kipwilo umvwe muntu walenga mambo akatampe. Pa kinembelo kya 1 Kolinda 6:9, 10 baambapo ano mambo akatampe. Mambo akatampe alengela muntu kulala mizhilo ya Lesa. Umvwe mwina Kilishitu walenga ano mambo, wafwainwa kulomba kwi Yehoba Lesa kumulekelako mambo kabiji wafwainwa kubuula bakulumpe mu kipwilo. (Sala. 32:5; Yako. 5:14) Ñanyi mwingilo uji na bakulumpe mu kipwilo? Yehoba ye yenkatu uji na luusa lwa kulekelako mambo muntu nangwa ne. Kabiji aye witulekelako mambo kwingijisha bukuzhi. * Nangwa byonkabyo, Yehoba wapa bakulumpe mu kipwilo mwingilo wa kumona inge muntu walenga mambo wafwainwa kutwajijila kwikala mu kipwilo nangwa ne. Boba bino kwingijisha Binembelo. (1 Ko. 5:12) Kabiji bintu bikwabo byo boba ke kwiipuzha mepuzho nabiji a kuba’mba: Nanchi muntu walengejilemotu mambo kya nshiji nyi? Nanchi wafile mambo o alengele nyi? Nanchi walengele mambo pa kimye kyabaya nyi? Ne kyakilapo kunema, beipuzha’mba nanchi kujipo bishinka bibena kumwesha’mba walapila kya kine kabiji ubena kukeba kuwamisha bulunda bwanji ne Yehoba jikwabo nyi? Nanchi kujipo bibena kumwesha’mba Yehoba wamulekelako mambo nyi?—Byu. 3:19.
5. Kipwilo kimwenamo byepi mu mwingilo wingila bakulumpe mu kipwilo?
5 Umvwe bakulumpe mu kipwilo babena kutotolwesha muntu walenga mambo, bafwainwa kumona’mba byo bafuukula bebitabizha ne mwiulu. (Mat. 18:18) Kipwilo kimwenamo byepi mu luno lunengezho? Kupanga mu kipwilo ndengamambo wabula kulapila kulengela baji mu kipwilo kuzhikijilwa. (1 Ko. 5:6, 7, 11-13; Titu. 3:10, 11) Kabiji kukwasha muntu walenga mambo kulapila ne kumulekelako mambo kwi Yehoba. (Luka 5:32) Bakulumpe mu kipwilo balombelako muntu walapila ne kumukwasha kuwamisha bulunda bwanji ne Yehoba.—Yako. 5:15.
6. Nanchi kyakonsheka kulekelako mambo muntu ye bapanga mu kipwilo nyi? Lumbululai.
6 Bakulumpe mu kipwilo bakapanga ndengamambo wabula kulapila. Kabiji kechi bakazhikijila muntu walala mizhilo ya kafulumende ne. Yehoba wapa luusa bakulumpe balama kyalo kuchibila mambo muntu yense walala mizhilo ne kumuzhachisha inge walapila nangwa ne. (Loma 13:4) Nangwa byonkabyo, umvwe mu kuya kwa moba muntu walapila ne kupimpula byubilo byanji, Yehoba ukamulekelako mambo. (Luka 15:17-24) Byo byo kikala nangwatu inge walengele mambo a bulala.—2 Moba. 33:9, 12, 13; 1 Timo. 1:15.
7. Ñanyi kintu kyo twakonsha kuba pa kuba’mba tulekeleko mambo muntu witulenga mambo?
7 Kitutekenesha bingi kuyuka’mba kechi tuji na luusa lwa kubuula Yehoba inge wafwainwa kulekelako mambo ndengamambo nangwa ne. Nangwa byonkabyo, kuji kuntu kimo kyo twafwainwa kuba. Ñanyi kintu kyonkakyo? Kimye kimo, muntu wakonsha kwituzhingijisha nangwatu kwitukozha ku muchima. Pano bino wakonsha kulomba lulekelo lwa mambo nangwa ne. Nangwa byonkabyo, twakonsha kufuukulapo kumulekelako mambo ne kubula kumuzhingijila. Kechi kyapeela kuba bino ne. Kabiji pakonsha kupita kimye kyabaya, kikatakata inge witukozhezhe bingi ku muchima. Kyamba kya Usopa kya September 15, 1994, kyaamba’mba: “Kulekelako muntu mambo kechi kulumbulula’mba waswisha bubi bwanji ne. Mwina Kilishitu ulekelako bakwabo mambo ushiila byonse mu maboko a Yehoba. Mambo aye uchibila mambo monka mo aolokela mu kimye kyanji mwine.” Mambo ka Yehoba o etutundaikila kulekelangako bakwetu mambo ne kushiila byonse mu maboko anji?
ENE MAMBO YEHOBA O ETUTUNDAIKILA KULEKELANGAKO BAKWETU MAMBO
8. Kulekelako bakwetu mambo kumwesha byepi amba tusanta pa lusa lwa Yehoba?
8 Kulekelako mambo bakwetu kumwesha’mba tusanta pa lusa lwa Yehoba. Mu kishimpi kimo, Yesu waambile pa nkambo ye aesakenye kwi Yehoba, walekejileko muzha wanji wakankelwe kubwezha nkongole. Nangwa byonkabyo, muzha ye balekejileko mambo, wakankelwe kubila lusa muzha mukwabo wakongwele mali acheche kwi aye. (Mat. 18:23-35) Ñanyi kishinka kyafunjishenga Yesu? Inge tusanta pa lusa lukatampe Yehoba lo etumwesha, ne atweba tukalekelangako bakwetu mambo. (Sala. 103:9) Pa myaka yapitapo, Kyamba kya Usopa kyaambile’mba: “Nangwa kyakuba tulekelako bakwetu mambo kechi tukesakana na byauba Yehoba pa kwitulekelako mambo kwingijisha kitapisho kya kwa Kilishitu ne.”
9. Bañanyi Yehoba bo obila lusa? (Mateo 6:14, 15)
9 Umvwe ke tulekelako bakwetu mambo Yehoba naye uketulekelako mambo. Yehoba ubila lusa bantu bobila bakwabo lusa. (Mat. 5:7; Yako. 2:13) Kino kyo kishinka kyaambilepo ne Yesu byo afunjishenga baana banji ba bwanga bya kulomba. (Tangai Mateo 6:14, 15.) Yehoba naye waambile pa kino kishinka byo aambilenga na kalume wanji aye Yoba. Uno mwanamulume wa kishinka bamukozhezhe bingi ku muchima na byambo byatama byamwambijilenga banabalume basatu abo ba Elifwaza, Bilidada ne Zofwala. Yehoba waambijile Yoba kwibalombelako. Yoba byo aubile bino, Yehoba wamupesheshe bingi.—Yoba 42:8-10.
10. Mambo ka o kyatamina kutwajijila kuzhingila? (Efisesa 4:31, 32)
10 Umvwe twatwajijila kuzhingila mufuma byatama. Kutwajijila kuzhingila kujitu nobe twasenda kintu kyanema. Yehoba ukeba atweba kubula kutwajijila kuzhingila pa kuba’mba twikale na lusekelo. (Tangai Efisesa 4:31, 32.) Yehoba witukambizha’mba: “Kange uzhingile nangwa kubuuka bukaji ne.” (Sala. 37:8) Tukamwenamo bingi inge twalondela luno lujimuno. Inge twatwajijila kuzhingijila muntu wituzhingijishe twakonsha kukolwa ne kuleka kulanguluka bulongo. (Maana. 14:30) Inge twatwajijila kuzhingila, atweba yetu twikala mu lukatazho, kechi muntu wituzhingijisha ne. Kijitu nobe kutoma bulembe. Watoma bulembe ye wikala mu lukatazho. Onkao mambo, umvwe ke tulekeleko bakwetu mambo, tumwenamo byawama bingi. (Maana. 11:17) Twikala mu mutende kabiji tutwajijila kwingijila Yehoba na lusekelo.
11. Baibolo waambapo amba ka pa kushinkanya? (Loma 12:19-21)
11 Kushinkanya ko kwa Yehoba. Yehoba kechi wituswisha kushinkanya na muntu wituba byatama ne. (Tangai Loma 12:19-21.) Atweba javula tukankalwa kuchiba mambo monka mo aolokela na mambo a kuba’mba twibambulwa kulumbuluka kabiji kechi tuyuka byonse ne. Onkao mambo, Yehoba ye yenkatu wakonsha kuchibila mambo monka mo aolokela. (Hebe. 4:13) Kabiji kimye kimo, kizhingijisha kyakonsha kwitulengela kubula kuba bintu bulongo. Yehoba watangijile Yakoba kunemba’mba: “Bukaji bwa muntu kechi buleta bololoke bwa Lesa ne.” (Yako. 1:20) Twafwainwa kuyuka’mba Yehoba ukoba kyawama kabiji ukachiba mambo monka mo aolokela.
Kange mutwajijilenga kuzhingila ne. Shiilainga byonse mu maboko a Lesa. Ukafumyapo bintu byonse byatama byaleta bundengamambo (Monai jifuka 12)
12. Twakonsha kumwesha byepi amba twaketekela mu bunchibamambo bwa Yehoba bwaoloka?
12 Kulekelako bakwetu mambo kumwesha’mba twaketekela mu bunchibamambo bwa Yehoba bwaoloka. Inge twashiila byonse mu maboko a Yehoba, tumwesha’mba twaketekela’mba ukafumyapo bintu byonse byatama byaleta bundengamambo. Mu ntanda ipya itulaya Yehoba, bintu byatama “kechi [tukebivulukapo] jibiji ne, kabiji kechi bikeyapo jibiji mu michima [yetu] ne.” (Isa. 65:17) Pano nanchi kyakonsheka kuleka kuzhingila ne kubula kushikwa muntu witubile kyatama nyi? Twayai twisambe pa bantu bamo byo baubile.
BYAWAMA BIFUMA MU KULEKELAKO BAKWETU MAMBO
13-14. Ñanyi bintu byo mwafunjilako kwi Tony ne José pa kwilekelako mambo?
13 Balongo ne banyenga bavula bafuukulapo kulekelako bakwabo mambo nangwa kyakuba bebakozhezhe bingi ku muchima. Ñanyi bintu byawama byo bamwenamo?
14 Tony * wikala mu kyalo kya Philippines, saka akyangye kwikala Kamonyi wa kwa Yehoba waishile kuyuka’mba kolojanji umo bamwipayile ku mwanamulume umo aye José. Pa kyokya kimye Tony washinchile bingi kabiji wakebelenga kushinkanya. Palutwe kacheche, José bamukwachile ne kumukasa mu kaleya pa mambo o alengele. José byo afumine mu kaleya, Tony wamufumpijilenga’mba kanatu akamwipaye. Wapotele ne buta amba akamwipaileko. Pano bino, Tony watendekele kufunda Baibolo na Bakamonyi ba kwa Yehoba. Waambile’mba: “Byo natatwile kufunda Baibolo, namwene kuba’mba nafwainwa kupimpula byubilo byami nabiji kusankilapo bukaji.” Mu kuya kwa moba, Tony wabatizhiwe kabiji bamutongwele kwikala mukulumpe mu kipwilo. Fwanyikizhai byo ajinga na lusekelo byo ayukile’mba José naye wabatizhiwa ne kwikala kalume wa Yehoba. Byo bamonañene bepakachijilemo. Kabiji Tony wabuujile José amba wamulekelako mambo. Tony waambile’mba wajinga bingi na lusekelo byo amulekejileko mambo. Yehoba wapesheshe Tony mambo walekejileko mambo José.
Byaubile ba Peter ne ba Sue bimwesha’mba twakonsha kuleka kutwajijila kuzhingila (Monai mafuka 15-16)
15-16. Ñanyi bintu byawama byo tubena kufunjilako ku byapichilemo ba Peter ne ba Sue pa kulekelako mambo?
15 Mu 1985, ba Peter ne ba Sue byo bapwijilenga pa Nzubo ya Bufumu, baumvwine jibomba jatubikile. Mwanamulume umo wabikile jibomba mu Nzubo ya Bufumu. Ba Sue bekozhezhe bingi kabiji kino kibalengejile kuleka kumona ne kumvwa. Kabiji baleke ne kumvwa bwema bwa bintu. * Ba Peter ne ba Sue bejizhañanya’mba: ‘Ñanyi muntu wakonsha kuba kintu kyatama bibye?’ Byo papichile myaka yavula, uno mwanamulume mbanzhi wabulanga kwingijila Yehoba, bamukwachile ne kumutaya pa kazhima. Ba Peter ne ba Sue byo bebepwizhe umvwe kyakuba bamulekelako mambo uno mwanamulume, baambile’mba: “Yehoba witufunjisha’mba kutwajijila kuzhingila mufuma bintu byatama bingi nabiji kukolwa ne kubula kulanguluka bulongo. Onkao mambo, twalombanga kwi Yehoba amba etukwashe kubula kutwajijila kuzhingila pa kuba’mba twikale na lusekelo.”
16 Nanchi kibapelejile kulekelako mambo uno mwanamulume nyi? Ine. Batwajijila kwamba’mba: “Kimye kimo, umvwe ba Sue byo bekozhezhe ke bikole, bivulumuna bingi bukaji. Nangwa byonkabyo, kechi tutwajijila kulangulukapo ne. Kino kitulengela kulubako. Twakonsha kwamba kufuma panshi ya muchima kuba’mba uno mwanamulume wabikile jibomba mu Nzubo ya Bufumu, inge waikala Kamonyi wa kwa Yehoba twakonsha kumutambwila. Kino kyamwekele kitufunjisha’mba kulondela mafunde a mu Baibolo kwitukwasha bingi kabiji kwitukasulula mu mashinda avula bingi. Kabiji kuyuka kuba’mba Yehoba ukafumyapo byonse byatama kwitutekenesha bingi.”
17. Ñanyi bintu byo mwafunjilako ku byapichilemo ba Myra pa kwilekelako mambo?
17 Ba Myra bafunjile bukine saka basongolwa kala kabiji saka baji ne na baana babiji. Bamwatawabo abo kechi bakebelenga kufunda bukine ne. Mu kuya kwa moba, baubile bukende ne kusha kisemi. Ba Myra baamba’mba: “Bamwatawami byo banshile na baana bami babiji, naumvwine byonka byumvwa bantu bo bafutukamo ku bena kwabo nabiji kukankamana, kwilangulusha, kwilengulula, bulanda ne kuzhingila.” Nangwa kyakuba masongola apwile, pano bino kyatwajijile kwibakola ku muchima. Ba Myra batwajijila kwamba’mba: “Natwajijile kwikala na bijikila kabiji nazhingijile pa bañondo bavula. Kino kyalengejile bulunda bwami ne Yehoba ne na bakwetu kwikala mu kizumba.” Ba Myra luno kechi batwajijila kuzhingila ne, kabiji kechi bakeba kyatama kiji kyonse kumwekela bamwatawabo ne. Baketekela kuba’mba juba jimo bamwatawabo nabo bakafuukulapo kwingijila Yehoba. Ba Myra batatu muchima pa bintu byawama biji kulutwe, kukomesha baana babo babiji ne kwibakwasha kufuukulapo kwingijila Yehoba pamo na bamwatawabo. Lelo jino, ba Myra baji bingi na lusekelo mambo babena kwingijila Yehoba pamo na baana babo ne bisemi byabo.
YEHOBA YE NCHIBAMAMBO WAOLOKA
18. Twaketekela’mba Yehoba ukachibanga byepi mambo byo aji Mutonyi Wakila?
18 Kitusangajika bingi kuyuka’mba kechi tuji na luusa lwa kuzhachisha bakwetu ne. Yehoba byo aji Mutonyi Wakila, ye uji na uno mwingilo wa kuchibila bantu mambo. (Loma 14:10-12) Twashiinwa kuba’mba ukachibanga mambo monka mwayila mizhilo yanji yaoloka yaamba pa kyawama ne kyatama. (Nte. 18:25; 1 Mfu. 8:32) Kechi wakonsha kuchibila mambo mo abula kolokela ne.
19. Ñanyi bintu nchibamambo aye Yehoba byo akoba?
19 Tubena kutengela bingi kimye Yehoba kyo akafumyapo bintu byonse byatama byaleta bumbulwa kulumbuluka ne bundengamambo. Pa kyokya kimye, bintu byonse byatama bakebifumyapo. (Sala. 72:12-14; Lum. 21:3, 4) Kechi tukebivulukapo jibiji ne. Byo tubena kutengela kyokya kimye kyawama kya kulutwe, tumusanchila bingi Yehoba mambo witufunjisha kulekelako bakwetu mambo byonka byo oba.
LWIMBO 18 Twasanta Bingi pa Kwitupa Bukuzhi
^ Yehoba ukeba kulekelako mambo bandengamambo balapila. Byo tuji bena Kilishitu, ne atweba twafwainwa kulekelangako bakwetu mambo byonkatu Yehoba byo etulekelako mambo. Mu uno mutwe, tusakwisamba pa mambo o twafwainwa kulekelangako bakwetu atweba bene ne pa mambo o twafwainwa kubuula bakulumpe mu kipwilo. Kabiji tusakwisamba pa ene mambo Yehoba o akebela’mba tulekelengako bakwetu mambo ne byawama bifumamo mu kuba bino.
^ Monai “Mepuzho Afuma ku Batanga” mu Kyamba kya Usopa kya April 15, 1996.
^ Mazhina amo apimpulwa.
^ Monai Labainga! wa January 8, 1992, ma. 9-13. Kabiji monai vidyo wa kuba’mba, Ba Peter ne ba Sue Schulz: Mwakonsha Kuleka Kuvuluka Bintu Byatama Bimumwekejile, uji pa mutanchi wa JW Broadcasting®.
