1. Ino Yehova wakashomesha ayi alaakucita nshi kubamucita shibiibi abo baana cancinencine?

 NABI kwaamba ayi Yehova ngu Mulengi wesu, Shikutupa milawo alimwi Moomboloshi, ngu Ishiwesu wakwiculu shilusuno. (Kulu. 100:3; Isa. 33:22) Na twamubishisha lyalo twaana cancinencine, Yehova taacitebo nkusu shakutulekelela sombi alisunishishi akucita boobo. (Kulu. 86:5) Kwiinda mumushinshimi Isaya, Yehova wakatushomesha ayi: “Nabi shibiibi shanu shilibo pyupyupyu anga ngumuswa malowa, shilaakuboolabo tuu anga mbutonje.”​—Isa. 1:18.

2. Ino nciinshi ncotweelete kucita kwaamba ayi tucikoonshe kuba abushicibusa buyumu abamwi?

² Mukwiinga tatumaninite, soonse tulaamba akucita shintu sheenga shakalasha bamwi. (Jemu. 3:2) Nacibi boobo, ici tacaambi ayi inga tacikonsheki kuba abushicibusa buyumu ambabo. Inga cakonsheka na katubalekelela. (Tus. 17:9; 19:11; Mate. 18:21, 22) Na muntu umwi waamba na kutucitila cilubo citeshi cinene, Yehova alisuni kwaamba ayi tumulekelele. (Kolo. 3:13) Tulyeelete kucita boobo mukwiinga Yehova alatulekelela ‘cakumaninina.’​—Isa. 55:7.

3. Ino nshiinshi nsheshi twiiye mumutwi uyu?

³ Mumutwi uyu, tutobandika mbweenga twakonkela cakubonenaako cakwe Yehova cakulekelela bamwi. Ino nshilubo shabuyani nshotweelete kulwiita bamanene? Ino nceebonshi Yehova alisuni ayi tunoolekelela bamwi? Alimwi ino nshiinshi nsheenga tweeya kushakubonenaako sha bashominyineesu abo bakeenda mumapensho anene abuumbi ceebo cakubisha kwa bamwi?

4. (a) Ino nciinshi musebenshi wakwe Yehova ncaeelete kucita na wacita cilubo cinene? (b) Ino bamanene balicite mukuli nshi ndyebatokoombolosha muntu wacita cilubo?

⁴ Tulyeelete kulwiita bamanene na muntu wacita cilubo cinene. Shilubo shimwi shinene nsheesho shaambwa palilembo lya 1 Bene Kolinto 6:9, 10. Shilubo shinene nkupwaya mulawo wakwe Lesa kwiinditewo. Na Mwineklistu wacita cilubo ca mushobo uyu, alyeelete kupaila kuli Yehova Lesa, alimwi akulwiita bamanene mulibungano. (Kulu. 32:5; Jemu. 5:14) Ino bamanene balicite mukuli nshi? Yehova eenkabo ngoocite nkusu shakulekelela shilubo cakumaninina, alimwi ici cilakonshekabo kwiinda mumulambu wacilubula. Nacibi boobo, Yehova wakapa bamanene mukuli wakusebensesha Malembo kubona na muntu wacita cilubo inga watolelela kuba mulibungano. (1 Koli. 5:12) Cintu comwi ncobacita kwaamba ayi bacikoonshe kucita boobo, nkweelesha kucana shikumbulo kumiipusho itokonkelaawo: Sa muntu uyo wakacita cilubo mukashanga? Sa wakeelesha kushisa cilubo ico kubamwi? Sa wakatolelela kucita cilubo ico kwaciindi cilaamfu? Alimwi ciyandika abuumbi, sa atoocita shitootondesha ayi waana cancinencine alimwi alisuni kuboosha bushicibusa bwakwe a Yehova? Sa kuli bumboni butotondesha kwaamba ayi Yehova wamulekelela?​—Milimo 3:19.

5. Ino mukuli usebensa bamanene ulacafwa buyani?

⁵ Bamanene ndyebatokoombolosha muntu wacita cilubo cinene, luyaando lwabo ndwakoombolosha kweelana a Yehova mbwaoombolosha kale kwiculu. (Mate. 18:18) Ino bubaambo ubu bulacafwa buyani libungano? Bulashitilisha libungano kwiinda mukushinisha kwaamba ayi bamucita shibiibi batasuni kwaana bakushikwa mulibungano, kwaamba ayi batayungi mbelele shakwe Yehova shiyandika abuumbi. (1 Koli. 5:6, 7, 11-13; Taitasi 3:10, 11) Alimwi bulacafwa muntu uyo wacita cilubo kwaana kwaamba ayi Yehova amulekelele. (Luka 5:32) Bamanene balamupaililaako muntu uyo wacita cilubo kwaamba ayi Yehova amucaafwe koola lwakumushimu.​—Jemu. 5:15.

6. Sa Yehova inga walekelela muntu wakakushikwa mulibungano? Amusansulule.

⁶ Ino mbuyani na muntu watondesha ayi taana kwaana bamanene ndyebatomoombolosha? Na caba boobo, nkokwaamba ayi inga wakushikwa mulibungano. Na wakapwaya mulawo wa mfulumeende, bamanene inga tabamufuninini kwaamba ayi ataanishikwi pacilubo ncaakacita. Nabi muntu waana na sobwe, Yehova alasuminisha mfulumeende koombolosha akwaanisha muntu uli woonse wapwaya mulawo. (Loma. 13:4) Nacibi boobo, na mukuya kwaciindi muntu uyo wesa mukushiba ayi ncaakacita ncilubo, lyalo waalula miyeeyo yakwe anshaacita, Yehova alilibambite kumulekelela. (Luka 15:17-24) Ubu mbocibete nabi kwaamba ayi wakacita cilubo cinene buyani.​—2 Maka. 33:9, 12, 13; 1 Timo. 1:15.

7. Ino muntu watubishisha inga twamulekelela kwiinda mukucita buyani?

⁷ Tulikondetwe kushiba kwaamba ayi Yehova ngoocite mukuli wakulekelela muntu wacita cilubo cinene! Nacibi boobo, aswebo kuli mukuli ngotucite. Ino ngu mukuli nshi? Cimwi ciindi muntu inga watubishisha mpashi akusenga ayi tumulekelele. Alimwi mpashi cimwi ciindi inga taasengi kulekelelwa. Sombi inga twamulekelela kwiinda mukutamubikila mfundilishi. Kucita boobo teshi cuubu, bunene bunene na cilubo ico cakatucisa abuumbi. Aboobo kulayandika kusebensa cankusu.  Njashi Yamulindilishi ya September 15, 1994, yakaamba ayi: “Na mwalekelela muntu wakamubishisha teshi kwaamba ayi ico ncaakacita cakalingabo kabotu. Mwineklistu ulekelela alashoma ayi Yehova ngweshi akoomboloshe mubululami. Ngo Moomboloshi ululeme mububumbo boonse, alimwi alaakoombolosha mubululami paciindi ceelete.” Ino nceebonshi Yehova alisuni ayi tunoolekelela bamwi akushoma ayi ngweshi akoomboloshe mubululami?

8. Ino Yesu wakalinga kwiisha nshi ndyaakaamba cikoshanyo ca mwaami wakalekelela musebenshi wakwe?

⁸ Kulekelela bamwi kulatondesha ayi tulalumba Yehova pankumbu shakwe. Mucikoshanyo Yesu ncakaamba, wakakoshanisha Yehova ku mwaami wakalekelela musebenshi wakwe wakalinga kucite nkongole inene njatakalinga kucikonsha kuboosha. Nacibi boobo, musebenshi uyo taakwe kunyumfwila nkumbu musebenshinyina, uyo wakalinga kumucitile nkongole ya maali aniinibo. (Mate. 18:23-35) Ino Yesu wakalinga kwiisha nshi ndyaakaamba cikoshanyo ici? Na tulalumba Yehova mbwatunyumfwila nkumbu, tulaakunoolekelela bamwi. (Kulu. 103:9) Njashi Yamulindilishi imwi yakale kale yakaamba ayi: “Nabi twalekelela bamwi mankanda aanji buyani, inga twatweelaniiwo a Yehova mbwaatulekelela akutunyumfwila nkumbu kwiinda muli Klistu.”

9. Ino mbaani Yehova mbaanyumfwila nkumbu? (Mateyo 6:14, 15)

⁹ Yehova alaakutulekelela na katulekelela bamwi. Yehova alanyumfwila nkumbu abo banyumfwila bamwi inkumbu. (Mate. 5:7; Jemu. 2:13) Ici Yesu ncaakaiisha bashikwiiya bakwe ndyaakalinga kubaiisha bwakupaila. (Amubelenge Mateyo 6:14, 15.) Ici ncotwiiya apamakani Yehova ngaakalwiita Jobo musebenshi wakwe. Shakaamba Elifasi, Biludadi a Sofa shakamucisa kumoyo abuumbi musankwa uyu ushomeka. Yehova wakamulwiita ayi abapailileeko. Jobo ndyaakacita boobo, Yehova wakamupa shoolwe.​—Jobo 42:8-10.

10. Ino nceebonshi kubikila mfundilishi takubete kabotu? (Bene Efeso 4:31, 32)

¹⁰ Kubikila mfundilishi takubete kabotu. Kubikila bamwi mfundilishi kulibo anga nkunyamuna mukuli ulemu. Yehova alisuni kwaamba ayi tulinyumfwe kuubilwa nkweenga twalinyumfwa na twalekelela bamwi. (Amubelenge Bene Efeso 4:31, 32.) Alatuyuminisha ayi, “talamuka kukwaanga mikonya, ee, leka kukalala.” (Kulu. 37:8) Kukonkela kuyuminisha uku kulaakutucafwa. Kubikila mfundilishi inga kwatupa kuciswa akutalinyumfwa kabotu mumiyeeyo. (Tus. 14:30) Alimwi kutolelela kuba amfundilishi takumuleteliiwo mapensho uyo watubishisha, bweenka mbweenga tatulangili ayi muntu watubishisha ngweshi afwe na swebo twanwa poisoni. Aboobo kulekelela bamwi nkulipa shoolwe sobeene. (Tus. 11:17) Tulaanguluka mumiyeeyo amumoyo alimwi akutolelela kusebensela Yehova.

11. Ino Baibo ilaamba nshi pamakani akuboosha cishole? (Bene Loma 12:19-21)

¹¹ Kuboosha cishole nkwakwe Yehova. Yehova taakwe kutupa nkusu sha kuboosha cishole na muntu umwi watubishisha. (Amubelenge Bene Loma 12:19-21.) Mukwiinga tatumaninite tulabona shintu munshila ipusene a Lesa mbwaashibona. (Ebu. 4:13) Alimwi cimwi ciindi inga twaalilwa kubona shintu munshila yeelete ceebo ca mbotutoolinyumfwa. Yehova wakatanjilila Jemusi kulemba ayi: “Bukali bwa muntu tabukoonshi kuleta shiluleme isho nshaasuni Lesa.” (Jemu. 1:20) Inga twashoma kwaamba ayi mukuya kwaciindi Yehova  alaakushinisha ayi shintu shacitwa mubululami.

12. Ino inga twatondesha buyani ayi tulashoma mubululami bwakwe Yehova?

¹² Kulekelela bamwi kulatondesha ayi tulashoma mubululami bwakwe Yehova. Inga twatondesha ayi tulashoma ayi Yehova alaakumana mapensho oonse esa ceebo cakubisha, na katushoma kwaamba ayi lakwe eenkabo ngweenga woombolosha mubululami. Mucishi cipya ncaakashomesha, shintu shicisa nshotwakeendaamo “shilaakulubwa alimwi teshi shikeebalukweewo.” (Isa. 65:17) Ano sa inga twacikonsha kulubaako na cintu cimwi muntu ncaakatucitila cakatucisa abuumbi? Amuleke tubandike bamwi mbobakacikonsha kulubaako.

13-14. Ino mweeya nshi pamakani akulekelela kuswa kucakubonenaako caba Tony aba José?

¹³ Bamakwesu abenankashi baanji bakasalawo kulekelela baabo bakababishisha nabi kwaamba ayi nshobakacita shakabacisa kumoyo abuumbi. Ino nshoolwe nshi nshobakacana ceebo cakucita boobo?

¹⁴ Mukwesu waliina lya Tony *ukala kucishi ca Philippines kaatana kwiiya cancine, wakesa mukunyumfwa ayi munene wakwe musankwa wakacaikwa kumusankwa waliina lya José. Paciindi ici ba Tony bakalinga bakali abuumbi alimwi beshinkondo, aboobo bakalinga kusuni kuboosha cishole. Ba José bakaangwa akubikwa mujeele ceebo ca mulandu ngobakacita. Mukuya kwaciindi bakabakusha. Ba Tony bakalumbila ayi balaakubalangoola ba José, lyalo na bakabacaane balaakubacaya. Aboobo bakoola mfuti. Paciindi ici, ba Tony bakatalika kwiiya Baibo a Bakamboni Bakwe Yehova. Bakaamba ayi: “Ndyendakalinga kwiiya ndakesa mukushiba kwaamba ayi ndyeelete kwaalula mibo yangu, ici cakalinga kwiilikaawo akucileka kubikila mfundilishi.” Mukuya kwaciindi ba Tony bakabombekwa, lyalo ndipakeenda ciindi bakasalwa kuba munene mulibungano. Ano amuyeeyebo mbobakakankamana ndibakesa mukushiba ayi ba José abalo bakaba musebenshi wakwe Yehova wakabombekwa! Ndibakakumana bakakumbatana  calusuno, lyalo ba Tony bakalwiita ba José ayi bakabalekelela. Ba Tony bakaamba ayi kulekelela ba José kwakabapa kulinyumfwa lusangalalo abuumbi cakwaamba ayi cakalinga ciyumu kusansulula kukondwa nkobakalinyumfwa. Ncakwiila, Yehova wakabapa shoolwe ba Tony ceebo cakuba balibambite kulekelela.

15-16. Ino mweeya nshi pamakani akulekelela kuswa kushakacitikila ba Peter aba Sue?

¹⁵ Mu 1985 ba Peter aba Sue ndyebakalinga kumabungano ku Ŋanda ya Bwaami, kwakalila boomu yakanyonyoola shintu shiinji abuumbi. Musankwa umwi ngowakabika boomu iyo mu Ŋanda ya Bwaami! Ba Sue bakalicisa abuumbi cakwaamba bakaba alipenshi lyakubona akunyumfwa. Alimwi bakaba alipenshi lyakutanyumfwa bweema. Lyoonse ba Peter aba Sue bakalinga kulipusha ayi, ‘Ino ngu muntu wa mushobo nshi weenga wacita cintu cibiibi abuumbi mbuli ceeci?’ Ndipakeenda myaaka iinji, musankwa uyo wakabika boomu watakalinga musebenshi wakwe Yehova, wakacatwa akwaangwa kwa buumi bwakwe boonse. Ba Peter aba Sue ndyebakabeepusha na bakamulekelela musankwa uyo bakaamba ayi: “Yehova alatwiisha ayi kubikila mfundilishi inga kwatupa kuciswa akutalinyumfwa kabotu mumiyeeyo. Aboobo ndyeshakacitikabo, twakasenga Yehova kwaamba ayi atucaafwe kutabikila mfundilishi, kwaamba ayi tutolelele kukala muluumuno.”

¹⁶ Sa cakalinga cuubu kumulekelela musankwa uyo? Kuteshi lyoonse. Bakatolelela akwaamba ayi: “Cimwi ciindi na ba Sue batalika kunyumfwa shakucisa ceebo ca kulicisa nkobakalicisa, tulalinyumfwa cibiibi alimwi. Sombi tatutoleleli kuyeeyawo, aboobo tulacileka kulinyumfwa cibiibi. Alimwi inga twaamba kuswa panshi lya moyo ayi na musankwa uyo wakalinga wabika boomu akabe mukwesu, tulaakumutambula. Ici cakatucitikila cakatucafwa kwiiya kwaamba ayi kukonkela njiisho shamu Baibo kulatwaangulula munshila shiinji! Alimwi tulayuminishikwa mukwiinga tulishi kwaamba ayi conoonobo Yehova alaakukushaawo shibiibi shoonse.”

17. Ino mweeya nshi pamakani akulekelela bamwi kuswa kushakacitikila ba Myra?

 ¹⁷ Ba Myra bakeeya cancine kabeebetwe kale alimwi kabacite abaana baniini bobilo. Sombi beebaabo tabakwe kwiiya cancine alimwi mukuya kwaciindi bakacita bulale akushiya mukwashi wabo. Ba Myra bakaamba ayi: “Beebaangu ndyebakanshiya abana bangu bobilo, ndakalinyumfwa bweenka baanji mbobalinyumfwa na muntu ngobasuni wacileka kushomeka. Cakankankamika, ndakalinyumfwa buumba, ndakakalala akulipa mulandu.” Nabi kwaamba ayi cikwati cakamana, ba Myra bakatolelela kulinyumfwa cibiibi ceebo cakutashomeka kwa beebaabo. Bakatolelela akwaamba ayi: “Ndakatolelela kulisukama akulinyumfwa cibiibi kwa myeenshi iinji, alimwi ndakabona kwaamba ayi ishi shakatalika kukuma bushicibusa bwangu a Yehova abantu bamwi.” Ano pacecino ciindi ba Myra balaamba ayi bakacileka kubikila mfundilishi alimwi tabayeeyiiwo shibiibi pabakalinga beebaabo. Balalangila ayi bushiku bumwi balaakwiiya cancine. Ba Myra balabikila maano kubuumi bwakunembo. Alimwi mbuli mushali uteebetwe, bakacikonsha kucafwa bana babo bobilo kuba basebenshi bakwe Yehova. Pacecino ciindi ba Myra batosebensela Yehova calusangalalo pomwi abana babo amikwashi yabo.

18. Ino nciinshi nceenga twashoma cakutatoonsha ayi Yehova Moomboloshi Wiinditewo alaakucita?

¹⁸ Tulikondetwe kushiba kwaamba ayi Yehova ngoocite mukuli wakushiba muntu mbwaeelete koomboloshekwa! Mukwiinga ngu Moomboloshi Wiinditewo, Yehova alaakwiilama kabotu incito iyi iyandika. (Loma. 14:10-12) Inga twashoma cakutatonsha kwaamba ayi lyoonse Yehova aloombolosha kweelana anjiisho shakwe shiluleme. (Mata. 18:25; 1 Baam. 8:32) Teshi akacitewo cintu citaluleme!

19. Ino Yehova alaakucita nshi kunembo ceebo ca boomboloshi bwakwe bululeme?

¹⁹ Tutoolangila kuciindi Yehova ndyeshi akakusheewo shintu shoonse shibiibi shicitika ceebo cakuba batamaninite alimwi akubisha. Paciindi ico mapensho oonse ngotwiindaamo ceebo cakucisa akutalinyumfwa kabotu mumiyeeyo teshi akabeeko alimwi. (Kulu. 72:12-14; Ciyu. 21:3, 4) Teshi akeebalukweewo alimwi. Kushikila ciindi cibotu ico cikashiike, tulalumba Yehova kwaamba ayi wakatulenga ankusu shakucikonsha kukonkela cakubonenaako cakwe kwiinda mukulekelela bamwi.