1. N’nga Yohova unaasikimizelan’ni atu odawa tachinyuwile?

 VOWENJEDHELA vokala namapanduchi-u, utoniva-a malamulo thitho namatongi-u Yohova ngu Babi-u waudhivela. (Sal. 100:3; Esaya 33:22) Namdawela i-yo chinyuwa kumela vathi va rima, liye unonilevelela thitho unoira vyevi mofunechecha. (Sal. 86:5) Dhela mwa namaongela Esaya Yohova unonisikimizela mwaudhivela ira: “Angalive ira vyodawa vinyu vikale vyofila maningi, vinodha chena maningi.”—Esaya 1:18.

2. N’nga ninofwanela iran’ni akala ninofuna ira nikalenga mwarendele naatu enango?

² Namwasa oi kanili olongomana, i-yo othene ninoonga venango ira vyongo vinasukwali-e atu enango. (Tiy. 3:2) Mbwenye vyevi kavinothapulela ira kaninaode vwelana naatwao. Ninooda avwelananao akala ninovilimbi-edha kaana rima olevelela. (Sang. 17:9; 19:11; Mat. 18:21, 22) Yohova unofuna ira nilevelelengana unango na fwee va vyongo ving’onoving’ono vyevyo vinodawelana i-yo. (Akol. 3:13) Nitokaana mwasa ovweya oirela vyevi. Namwasa oi Yohova unonilevelela na “rima wethene.”—Esaya 55:7.

3. N’nga ninofuna nitapanyen’ni muyofunjedha yei?

³ Muyofunjedha yei, ninoona mwemo i-yo vano aatu odawa munamsazi-edhe i-yo Yohova va mwasa olevelela. N’nga ndi vyodawa viivi vyevyo vinofwanela i-yo idhiwi-a andimuwa avapingoni? Mwasiwa ngwan’ni Yohova unonilimbi-a ira nilevelelenga atu enango? N’nga ninofunjedhavon’ni wa Makristau enango aguman’nena nyarwa dhilukulu namwasa wa vyodawa vyaatu enango?

4. a) N’nga rumiwi wa Yohova unofwanela iran’ni aira yodawa ilukulu? b) N’nga andimuwa avapingoni tagumanana mutu uirile yodawa izo yiwa inokala yoi a-vi?

⁴ Ninofwanela aidhiwi-a andimuwa avapingoni mutu unango aira yodawa ilukulu. Vinango mwa vyodawa vyevi ndi viongiwile va lemba la 1 Akoritiyo 6:9, 10. Mutu uirile vyodawa vilukulu unokala ira utoira vyodawa vyothakala maningi, vyo-ovwelana na malamulo a Nlungu. Vyaira e-no, mutuo unofwanela lobela wa Yohova Nlungu thitho wandela andimuwa avapingoni. (Sal. 32:5; Tiy. 5:14) N’nga andimuwa avapigoni anokaana izo yoi a-vi? Yohova ekene ngun’na izo yolevelela vyodawa thitho unoirana vyevyo vo-indi-edha basa sembe yoombolana. * Mbwenye liye atova-a andimuwa avapingoni izo yosakula vo-indi-edha basa malemba akala mutu odauo unofwanela kalave pingoni. (1 Akor. 5:12) Mwa vyongo vinango andimuwa anofwanela fwanya vyowakula vyavyofukavi: N’nga mutuo ate kozeela ira aire yodawiyo? N’nga unolokotedha yodawiyo atu enango? N’nga ukanle airanga yodawiyo wa hora yolapela? Thitho yofuka yofuneya maningi choi: N’nga vatokala umboni othonyi-edha ira utochinyuwa kumela vathi va rima? N’nga vatokala umboni oi Yohova utomlevelela?—Mayir 3:19.

5. N’nga vinoira andimuwa avapingoni mutu adawa, vinokaana upama oi a-vi?

⁵ Andimuwa avapingoni tagumanana mutu uirile yodawa, anofwanela sakula ira vyongo movwelana na visakuliwile dhulu walelene. (Mat. 18:18) N’nga irana vyevi unokami-a a-vi pingo? Pingo unokala ovuneleya namwasa oi ale anododomi-a mabila a Yohova a pereso yavadhulu anokumi-iwamo. (1 Akor. 5:6, 7, 11-13; Titu 3:10, 11) Vinooda mkami-a mulimbo dauo ira achinyuwe thitho ira Yohova amlevelele. (Luka 5:32) Andimuwa avapingoni anomlobelela mutu ochinyuuo thitho anomvepha Yohova ira amkami-e ila mwauzimu.—Tiy. 5:15.

6. N’nga Yohova unomlevelela mutu ukumi-iwile pingoni? Onganimo.

⁶ Nifwanafwani-edhele ira mutu kathonyi-edhile chinyuwa viguman’nena liye andimuwa avapingoni. Vyaira ee-no, unokumi-iwa pingoni. Akala utepwanya malamulo aanamatonga, andimuwa avapingoni katinamvunele ira a-agumanena vyo-arelavo va vyotakala vyairile liyevyo. Yohova unorumeli-a andimuwa andimuwa aanamatonga tonganga thitho velelanga malangi-o wa uliwethene upwanyile malamulo—akala atochinyuwa waandimuwa avapingoni venango kabe. (Aroma 13:4) Mbwenye akala mutuo zelu dhitom’mwelela, thitho utochinyuwa kumela vathi va rima, Yohova unokala ofunechecha mlevelela. (Luka 15:17-24) Unomlevelela angalive ira atoira vyodawa vilukulu maningi.—2 Limb. 33:9, 12, 13; 1 Timo. 1:15.

7. N’nga ninaoni-e a-vi ira nitomlevelela mutu unidawele?

⁷ Pyosangalali-a idhiwa ira kaniva-iwile izo yosakula ira Nlungu amlevelele mutu venango kabe! Mbwenye vatokala yongo inango inofwanela i-yo sakula. N’nga ninofwanela sakula n’ni? Hora dhinango mutu unooda—nidawela venango nidawela—maningi, aira ee-no liye pepesa thitho nivepa ira nimlevelele. Mbwenye hora dhinango kanaode irana vyevyo. Angalive vili e-no ninooda sakula mlevelela vo-odhowanave mlokotedha vyarimani thitho nlunduwela. Onga vyaimbarimbari irana vyevi, vanofuneela hora thitho thindhi simbwasimbwa akala mutuo utonidawela maningi. Nsanja ya Olonda ya 15 wa Setembro  wa 1994, yaongile ira: “Namlevelela mutu, kavinothapulela ira ninosangalala na yodawa yairile liyeyo. Wa Kristau levelela unothapulela i-yachi mwasuo mandhani mwa Yohova no roromelanga ira unoiravo yongo. Liye ndi namatonga olongomana muvyopanduchiwa vyothene thitho unodha onechecha ira longomano litoireya vahoree.” Mwasiwa ngwan’ni liye unonilimbi-a ira nilevelelenga no roromelanga—ira liye autonge mwasuo molongomana?

8. N’nga ninothonyi-edha a-vi ira nili osimba nalevelelanga atu enango?

⁸ Levelela unothonyi-edha ira nili osimba. Muifwanafwani-o inango Yesu atomfwanafwani-edhela Yohova na patharau wenuo amlevelele dhaaree mangawa malukulu enao a-aoda liye apagali. Mbwenye dhaaruo atoimwanana mthonyi-edha tangaranga dhaari fwee wenuo amfiyarile kobiri dhoyeva maningi. (Mat. 18:23-35) N’nga Yesu afuna anifunji-e n’ni veva? Akala ninosimbadi tangaranga ilukulu yeniyo Yohova inonithonyi-edha liye ninodha kala ofunechecha levelela atu enango. (Sal. 103:9) Vyawa vinjinji vivirile Nsanja ya Olonda inango yatoonga ira: “Akala nitolevelela atu enango fendo dhinjinji moi a-vi, kavinofiya va mwezo wenuo Nlungu unonilevelelana liye thitho nithonyi-edha tangaranga dhela mwa Kristu.”

9. N’nga Yohova unovwela tangaranga atu avi? (Mateu 6:14, 15)

⁹ Olevelela atu enango naaliwene thitho anodha leveleliwa. Yohova unovwela tangaranga atu enao ali atangaranga. (Mat. 5:7; Tiy. 2:13) Yesu atoonga likundo leli movweya pama vevo vafunji-a liye anama-arelee lobela. (Muleri Mateu 6:14, 15.) Ninofunjedha thitho va likundo leli, vavyevyo Yohova vyam’mwandele liye rumiwee Yobo. Mutu ororomeleula ali angasukwanle maningi na madhu ovwi-a upa enao Elifazi, Bilidadi na Zofari tam’mongele aliwa. Yohova atom’mwandela Yobo ira aalobelele. Liye angairile vyevi Yohova atomraeli-a.—Yobo 42:8-10.

10. N’nga ninodhipei-a a-vi nalokotanga vyarimani? (Aefeso 4:31, 32)

¹⁰ Ninodhipei-a okene nalokotanga vyarimani. Yohova unofuna ira nisangalalenga thitho vevueliwa rimani namwasa o-olokota vyarimani. (Muleri Aefeso 4:31, 32.) Liye unonilimbi-a ira “kanikaengana raiva venango takaleliwa.” (Sal. 37:8) A-rela malangi-o enala kokami-a maningi. lokota vyarimani unooda nonga tutu li-u thitho mathuulelwi-u. (Sang. 14:30) Lokota vyarimani, kunampei-a mutu unidaweluo ninga munokalela aliwa namwa rombwe opei-a nodedi-edhelanga ira apeye fwi-uo. E-no nalevelelanga atu enango vinokala ninga ninadhiva-a yotuva. (Sang. 11:17) Ninokaana rendele wa rimani na wa mathuuleloni thitho ninodhowanave mlabela Yohova.

11. N’nga Bibilya linoonga n’ni vamwasa oweli-edha? (Aroma 12:19-21)

¹¹ Yohova ngunoweli-edha. Yohova kaniva-idhe izo yoweli-edha mutu anidawele. (Muleri Aroma 12:19-21.) Voi kaninoona vyongo mofwanelela namwasa oi kanili olongomana, kaninaode tonga mwasa molongomana ninga mwemo Nlungu munoirela liye. (Aeb. 4:13) Thitho hora dhinango ninoimwanana tonga pama namwasa ododomi-iwa, thitho moda munovwela i-yo. Movudeleliwa na Yohova Tiyago atolemba ira: “Thakaleliwa wa mutu kunova-a longomana wa Nlungu.” (Tiy. 1:20) Ninooda kala osikimizela ira Yohova unodha ira vyofwanelela thitho unodha onechecha ira longomano litoireya.

12. N’nga ninathonyi-edhe a-vi ira Yohova unodhaira longomano?

 ¹² Levelela unothonyi-edha ira Yohova unodhaira longomano. Na-iyanga mwasa mandhani mwa Yohova ninothonyi-edha ira ninororomela ira liye unodha kumi-avo vyothakala vyothene vyodha namwasa wa madao. Muilambo ipya vyongo “vyopa kavinodha thuuleliwave thitho kavinodha welela rimani” navang’onovene. (Esaya 65:17) N’nga mutu mwinango anisukwali-a maningi, pyoodeya i-ya nlunduwela thitho mlokotedha vyarimani? Dhoweni nioneni vyakami-idhe atu enango irana vyevi.

13-14. N’nga mufunjedhilen’ni va vyam’mwireele Tony na José va mwasa olevelela?

¹³ Abali naarongola anjinji tatosakula levelela angalive ira atu enango tatoairela vyongo vyothakala maningi. N’nga aliwa tafwaidhe maraeli-o oi a-vi?

¹⁴ A-anafunjedhe imbarimbari, Tony, * wenuo unokala u Filipina, avwidhe ira m’mbo-i mwaakandamwee atopiwa na mutu mwinango dhinalee José. Va hora yeniyo, Tony ali mutu wauwalanga thitho anofuna weli-edha. José atomangiwa no-eliwa perezoni namwasa wa selweuo. Angakumi-iwile perezo Tony atosikimiza rima ira unomsakasaka fiyedhela m’pa. Thitho atogula futi. Moi ee-no, Tony atoroma funjedha Bibilya na Amboni dha Yohova. Tony aongile ira: “Vyafunjedha miyo Bibilya ndatozindiyela ira ndinofuneela chinja ingumi yanga, vyevyo vyathangani-avo i-yachi ingumi yo-rucha thakaleliwa.” Vangavirile hora Tony atobadiziwa thitho atokala ndimuwa wavapingoni. Kathuulelani mwemo mwadabwele liye angavwide ira José atobadiziwa no kala rumiwi wa Yohova! Ambilene tangaguman’ne tatokumbarelana thitho Tony atom’mwandela José ira ali angamlevelele. Tony atoonga ira mlevelela José watomkami-a kaana imwerumweru yo-oongeya. Onga vyaimbarimbari, Yohova atomraeli-a namwasa okaana rima ofunechecha kala olevelela.

15-16. N’nga vyam’mwireele Peter na Sue viufunji-idhenin’ni vamwasa olevelela?

¹⁵ Mu 1985, Peter na Sue tali vamigumanoni mu Nyumba ya Umwene wewo mo-odedi-edha watotweya bomba. Mutu unango ali anga-enle bombiyo Nyumbani ya Umwene!  Vahora yeniyo Sue atopeya maningi vyevyo vyatoiri-a ira a-aonenga thitho uvwa. Liye ato-iya uvwa. * Hora dhinjinji Peter na Sue tanoodhifuka ira, ‘Ngu mutu oi a-vi wenuo unaire yongo yothakala e-ni?’ Vangavirile vyawa vinjinji mutu atwidhe bombule wenuo a-amlabela Yohova atotongiwa ira akale perezoni vaingumiyee yothene. Tangafukiwile akala tatomlevelela mutuo Peter na Sue tatoonga ira: “Yohova unonifunji-a ira dhowanave thakaleliwa thitho lokota vyarimani, unooda nonga tutu namathuulelwi-u. Ee-no vyevyo vyangaireile natomvepa Yohova ira anikami-e ira na-athakaleliwenga thitho lokota vyarimani.”

¹⁶ N’nga vyali vyokweya ira tamlevelele mutule? A-kala hora dhothene. Aliwa tatodhowanave onga ira: “Hora dhinango nagumanangana nyarwa namwasa opeya wa Sue, vinoroma nipa rimani. Mbwenye nino-iya thuulela mwasuo thitho vyaira e-no takaleliwa unomala. Thitho ninoonga mokumela vathi va rima ira, akala dambo n’nango mutuo unodha kala bali-u ninodha m’mwachela. Vyaniirelevi vitonifunji-a ira makundo a Bibilyani anonithathula; kwaranya mwathuulela i-yo! Ninolimbi-iwa thitho voidhiwa ira vachineneeva Yohova unomali-a nyarwa dhothene.”

17. N’nga mufunjedhilevo n’ni va mwasa olevelela na vyam’mwireele Mira?

¹⁷ Mira afunjedhile imbarimbari angamadhi theliwa thitho angana a-ima ambili ang’onong’ono. Mbwenye man’nee kaarumenle funjedha Bibilya. Vangavirile hora lombwanuo atoraruwa no i-yachi banjalee. Mira aongile ira: “Man’nanga angandi-iidhe naa-ima, ndavivwa ninga mwemo atu anjinji munovivwela aliwa taireliwa vyongo vyo-olongomana na mutu wenuo unamdhiveliwana aliwa, ninga sukwala maningi, a-roromela ira vinaaireyadi, dhivwela tangaranga, nong’onedha libondo, dhiomba landu thitho thakaleliwa.” Angalive ira banjalo latomala, ndanodhivwave ira ndito-indi-iwa vathi. Mira atodhowanave onga ira: “Ndanodhowanave dhivwa ee-no  wa myedi injinji, adhaire ee-no ndatozindiyela ira vyevi vyanodhodhomi-a uxamwalanga na Yohova thitho naatu enango.” Va-eeni, liye unoonga ira uto-iyachi kala othakaleliwa thitho kanamlokotedha vyarimani man’nee wawalule. Liye unodedi-edha ira dambo n’nango man’neuo unodharoma mlabela Yohova. Mira unothuulela vinjinji vya sogolo. Liye atolela a-imee ambilao enao malamboano anomlabela Yohova. Mbwenye va-eeni uli osangalala mlabela Yohova naa-imeao vambo-i namabanjiwa.

18. Mwasiwa ngwan’ni ninofwanela m’nyindela Yohova uli namatonga nlukulu?

¹⁸ Ninoluluveliwa rimani namwasa oidhiwa ira kaniva-iwile izo yorucha yosakulela atu munofuna aliwa kalela! Ninga namatonga nlukulu, Yohova ngunofuna dhalaba basa lofuneyali. (Aroma 14:10-12) Nikale osikimizela ira hora dhothene unodha tonga movwelana na makundwee okuza yapama na yothakala. (Maro. 18:25; 1 Mam. 8:32) Liye kanodha irana vyongo vyo-olongomana na vang’onovene!

19. N’nga Yohova unodhaira vyongo viivi namwasa otonga molongomana?

¹⁹ Ninodedi-edha mosangalala hora yeniyo Yohova inofuna liye dhamali-a nyarwa dhinodha namwasa oi i-yo aatu nili o-olongomana thitho odawa. Vahoriyo, nyarwa dhedho dikuzile tutu li-u thitho mathuulelwi-u, dhinodha mali-iwa. (Sal. 72:12-14; Apok. 21:3, 4) Kaninodha thuulelave nyarwa dhedhi. Vevo vanodedi-edhela i-yo hora yosangalali-ila ira ifiye, ninomsimba maningi Yohova namwasa oi unonikami-a ira nimsazi-edhenga va mwasa olevelela.