ບົດຄວາມສຶກສາທີ 25
ພະເຢໂຫວາອວຍພອນຜູ້ທີ່ໃຫ້ອະໄພຄົນອື່ນ
“ພວກເຈົ້າຕ້ອງເຕັມໃຈໃຫ້ອະໄພກັນຄືກັບທີ່ພະເຢໂຫວາເຕັມໃຈໃຫ້ອະໄພພວກເຈົ້າ.”—ກລຊ. 3:13
ເພງ 130 ເຮົາຕ້ອງໃຫ້ອະໄພກັນ
ໃຈຄວາມສຳຄັນ a
1. ພະເຢໂຫວາສັນຍາຫຍັງກັບຜູ້ທີ່ເຮັດຜິດແລ້ວກັບໃຈ?
ເຖິງວ່າພະເຢໂຫວາຈະເປັນຜູ້ສ້າງ ຜູ້ໃຫ້ກົດໝາຍ ແລະຜູ້ຕັດສິນ ແຕ່ເພິ່ນຍັງເປັນພໍ່ທີ່ຮັກເຮົາ. (ເພງ. 100:3; ເອຊາ. 33:22) ເມື່ອເຮົາເຮັດຜິດຕໍ່ເພິ່ນແລ້ວກັບໃຈແທ້ໆ ເພິ່ນບໍ່ພຽງແຕ່ມີສິດທີ່ຈະໃຫ້ອະໄພເຮົາ ແຕ່ເພິ່ນຍັງຢາກໃຫ້ອະໄພເຮົາ. (ເພງ. 86:5) ເຮົາໝັ້ນໃຈເລື່ອງນີ້ໄດ້ຈາກຄຳເວົ້າທີ່ເພິ່ນບອກຜ່ານທາງຜູ້ພະຍາກອນເອຊາຢາທີ່ວ່າ: “ເຖິງບາບຂອງພວກເຈົ້າຈະແດງກ່ຳ ເຮົາກໍຈະເຮັດໃຫ້ຂາວຄືກັບຫິມະ.”—ເອຊາ. 1:18, ລ.ມ.
2. ຖ້າເຮົາຢາກມີສາຍສຳພັນທີ່ດີກັບຄົນອື່ນ ເຮົາຕ້ອງເຮັດຫຍັງ?
2 ຍ້ອນເຮົາເປັນຄົນບໍ່ສົມບູນແບບ ເຮົາທຸກຄົນຈຶ່ງເວົ້າແລະເຮັດບາງຢ່າງທີ່ເຮັດໃຫ້ຄົນອື່ນເສຍໃຈ. (ຢກບ. 3:2) ເຖິງຈະເປັນແນວນັ້ນ ເຮົາກໍສາມາດມີສາຍສຳພັນທີ່ດີກັບເຂົາເຈົ້າໄດ້ ຖ້າເຮົາຮຽນຮູ້ທີ່ຈະໃຫ້ອະໄພ. (ສຸພາ. 17:9; 19:11; ມທ. 18:21, 22) ເມື່ອມີບາງຄົນເວົ້າຫຼືເຮັດບາງສິ່ງທີ່ເຮັດໃຫ້ເຮົາເສຍໃຈ ພະເຢໂຫວາຢາກໃຫ້ເຮົາໃຫ້ອະໄພເຂົາເຈົ້າ. (ກລຊ. 3:13) ເປັນຫຍັງເຮົາຄວນເຮັດແບບນັ້ນ? ເພາະພະເຢໂຫວາກໍໃຫ້ອະໄພເຮົາ “ຢ່າງໃຈກວ້າງ.”—ເອຊາ. 55:7, ລ.ມ.
3. ເຮົາຈະຮຽນຫຍັງໃນບົດຄວາມນີ້?
3 ໃນບົດຄວາມນີ້ເຮົາຈະມາເບິ່ງວ່າ ມະນຸດທີ່ບໍ່ສົມບູນແບບຈະຮຽນແບບການໃຫ້ອະໄພຂອງພະເຢໂຫວາໄດ້ແນວໃດ? ຄວາມຜິດແບບໃດທີ່ເຮົາຕ້ອງໄດ້ບອກຜູ້ດູແລ? ເປັນຫຍັງພະເຢໂຫວາຈຶ່ງຢາກໃຫ້ເຮົາໃຫ້ອະໄພຄົນອື່ນ? ແລະເຮົາຈະໄດ້ບົດຮຽນຫຍັງຈາກຕົວຢ່າງຂອງພີ່ນ້ອງທີ່ຮູ້ສຶກເຈັບປວດໃຈຈາກການກະທຳທີ່ບໍ່ດີຂອງຄົນອື່ນ?
ເມື່ອມີການເຮັດຜິດຮ້າຍແຮງ
4. (ກ) ເມື່ອຜູ້ຮັບໃຊ້ຂອງພະເຢໂຫວາເຮັດຜິດຮ້າຍແຮງ ລາວຈະຕ້ອງເຮັດຫຍັງ? (ຂ) ຜູ້ດູແລມີໜ້າທີ່ຫຍັງເມື່ອມີຄົນເຮັດຜິດຮ້າຍແຮງໃນປະຊາຄົມ?
4 ເຮົາຄວນບອກຜູ້ດູແລເມື່ອມີການເຮັດຜິດຮ້າຍແຮງໃນປະຊາຄົມ. ໃນ 1 ໂກຣິນໂທ 6:9, 10 ກໍໄດ້ເວົ້າເຖິງຄວາມຜິດຮ້າຍແຮງແບບນັ້ນ ເຊິ່ງເປັນການລະເມີດຕໍ່ກົດໝາຍຂອງພະເຈົ້າ. ຖ້າຄລິດສະຕຽນຄົນໜຶ່ງເຮັດຜິດຮ້າຍແຮງ ລາວຈະຕ້ອງສາລະພາບກັບພະເຢໂຫວາໂດຍການອະທິດຖານ ແລະຕ້ອງໄປບອກຜູ້ດູແລໃນປະຊາຄົມ. (ເພງ. 32:5; ຢກບ. 5:14) ຜູ້ດູແລມີໜ້າທີ່ຫຍັງ? ທີ່ຈິງ ມີພຽງພະເຢໂຫວາເທົ່ານັ້ນທີ່ມີສິດໃຫ້ອະໄພຜູ້ທີ່ເຮັດຜິດໂດຍທາງຄ່າໄຖ່ຂອງພະເຢຊູ. b ແຕ່ເພິ່ນກໍຍັງມອບໝາຍໃຫ້ຜູ້ດູແລຕັດສິນຕາມຫຼັກພະຄຳພີວ່າ ຜູ້ທີ່ເຮັດຜິດຄວນຈະຢູ່ໃນປະຊາຄົມຕໍ່ໄປຫຼືບໍ່. (1 ກຣ. 5:12) ແລະສິ່ງທີ່ຈະຊ່ວຍຜູ້ດູແລໃຫ້ເຮັດແບບນັ້ນໄດ້ກໍຄືການຫາຄຳຕອບສຳລັບຄຳຖາມຕໍ່ໄປນີ້: ລາວຈົງໃຈເຮັດຜິດບໍ? ລາວວາງແຜນແລະພະຍາຍາມປົກປິດຄວາມຜິດໄວ້ບໍ? ລາວເຮັດຜິດເລື້ອຍໆຈົນເປັນນິດໄສບໍ? ມີຫຼັກຖານບໍວ່າລາວກັບໃຈແທ້ໆ? ແລະມີສິ່ງໃດບໍທີ່ສະແດງວ່າພະເຢໂຫວາໃຫ້ອະໄພລາວແລ້ວ?—ກຈກ. 3:19
5. ສິ່ງທີ່ຜູ້ດູແລເຮັດມີຜົນດີຫຍັງແດ່?
5 ເມື່ອຜູ້ດູແລໄປພົບກັບຜູ້ທີ່ເຮັດຜິດ ເປົ້າໝາຍຂອງເຂົາເຈົ້າກໍຄືເພື່ອຈະຕັດສິນໃຫ້ຄືກັບທີ່ພະເຢໂຫວາຕັດສິນແລ້ວໃນສະຫວັນ. (ມທ. 18:18) ປະຊາຄົມໄດ້ຮັບປະໂຫຍດແນວໃດຈາກການຈັດກຽມນີ້? ຄົນທີ່ເຮັດຜິດຮ້າຍແຮງແລ້ວບໍ່ກັບໃຈຈະບໍ່ໄດ້ຢູ່ໃນປະຊາຄົມອີກຕໍ່ໄປ. ນີ້ເປັນການປົກປ້ອງພີ່ນ້ອງໃນປະຊາຄົມ. (1 ກຣ. 5:6, 7, 11-13; ຕຕ. 3:10, 11) ແລະຍັງເປັນການຊ່ວຍຜູ້ທີ່ເຮັດຜິດໃຫ້ກັບໃຈແລະໄດ້ຮັບປະໂຫຍດຈາກການໃຫ້ອະໄພຂອງພະເຢໂຫວາ. (ລກ. 5:32) ຜູ້ດູແລຍັງຈະອະທິດຖານເພື່ອຜູ້ທີ່ກັບໃຈແລະຊ່ວຍລາວໃຫ້ກັບມາມີສາຍສຳພັນທີ່ດີກັບພະເຢໂຫວາອີກ.—ຢກບ. 5:15
6. ຖ້າຄົນໜຶ່ງຖືກຕັດສຳພັນ ພະເຢໂຫວາຍັງຈະໃຫ້ອະໄພລາວບໍ? ຂໍໃຫ້ອະທິບາຍ
6 ໃນກໍລະນີຂອງຜູ້ທີ່ເຮັດຜິດແລ້ວບໍ່ກັບໃຈ ຜູ້ດູແລຈະຕ້ອງຕັດລາວອອກຈາກປະຊາຄົມ. ຖ້າລາວເຮັດຜິດຕໍ່ກົດໝາຍບ້ານເມືອງ ຜູ້ດູແລຈະບໍ່ໄດ້ປົກປ້ອງລາວຈາກຜົນຂອງການກະທຳຜິດນັ້ນບໍ່ວ່າລາວຈະກັບໃຈຫຼືບໍ່ກໍຕາມ ເພາະພະເຢໂຫວາອະນຸຍາດໃຫ້ອຳນາດການປົກຄອງມີສິດຕັດສິນແລະລົງໂທດຜູ້ໃດກໍຕາມ ທີ່ເຮັດຜິດຕໍ່ກົດໝາຍບ້ານເມືອງ. (ຣມ. 13:4) ແຕ່ຖ້າລາວສຳນຶກຜິດແລະປ່ຽນແປງຕົວເອງ ພະເຢໂຫວາກໍຈະໃຫ້ອະໄພລາວເຖິງວ່າຄວາມຜິດທີ່ລາວເຮັດນັ້ນຈະຮ້າຍແຮງກໍຕາມ.—ລກ. 15:17-24; 2 ຂ່າວ. 33:9, 12, 13; 1 ຕມ. 1:15
7. ການໃຫ້ອະໄພຜູ້ທີ່ເຮັດຜິດຕໍ່ເຮົາໝາຍຄວາມວ່າແນວໃດ?
7 ເຮົາຮູ້ສຶກດີໃຈທີ່ບໍ່ໄດ້ມີໜ້າທີ່ຕັດສິນວ່າຜູ້ທີ່ເຮັດຜິດສົມຄວນຈະໄດ້ຮັບການໃຫ້ອະໄພຫຼືບໍ່ ເພາະພະເຢໂຫວາເທົ່ານັ້ນທີ່ຈະຕັດສິນໃນເລື່ອງນີ້. ແຕ່ກໍມີບາງຢ່າງທີ່ເຮົາຈະຕ້ອງໄດ້ຕັດສິນໃຈເອງ. ຕົວຢ່າງເຊັ່ນ: ຖ້າມີບາງຄົນເຮັດບໍ່ດີຕໍ່ເຮົາແລະລາວໄດ້ມາຂໍໂທດແລະຂໍໃຫ້ເຮົາຍົກໂທດໃຫ້ ຫຼືບາງເທື່ອລາວອາດຈະບໍ່ໄດ້ຂໍໂທດເລີຍ. ໃນກໍລະນີນີ້ ເຮົາຕ້ອງເລືອກເອງວ່າຈະໃຫ້ອະໄພລາວຫຼືບໍ່ ເຊິ່ງໝາຍຄວາມວ່າເຮົາຈະບໍ່ຄຽດໃຫ້ລາວອີກຕໍ່ໄປ. ແຕ່ເພື່ອຈະເຮັດແບບນັ້ນໄດ້ ມັນຕ້ອງໃຊ້ເວລາແລະຄວາມພະຍາຍາມຫຼາຍແທ້ໆ ໂດຍສະເພາະຖ້າຜູ້ນັ້ນເຮັດໃຫ້ເຮົາເຈັບປວດໃຈຫຼາຍ. ໃນຫໍສັງເກດການ 15 ກັນຍາ 1994 c ບອກວ່າ: “ເມື່ອເຈົ້າໃຫ້ອະໄພຄົນທີ່ເຮັດຜິດຕໍ່ເຈົ້າ ນີ້ບໍ່ໄດ້ໝາຍຄວາມວ່າເຈົ້າເຫັນດີກັບຄວາມຜິດທີ່ລາວເຮັດ. ສຳລັບຄລິດສະຕຽນແລ້ວ ການໃຫ້ອະໄພໝາຍເຖິງການຝາກເລື່ອງນັ້ນໄວ້ໃນມືຂອງພະເຢໂຫວາດ້ວຍຄວາມໄວ້ວາງໃຈ. ພະອົງເປັນຜູ້ພິພາກສາທີ່ຊອບທຳທີ່ສຸດໃນເອກະພົບແລະພະອົງຈະຈັດການເລື່ອງນັ້ນຢ່າງຍຸຕິທຳໃນເວລາທີ່ເໝາະສົມ.” ເປັນຫຍັງພະເຢໂຫວາຈຶ່ງຢາກໃຫ້ເຮົາໃຫ້ອະໄພຄົນອື່ນແລະຝາກເລື່ອງນັ້ນໄວ້ໃນມືຂອງເພິ່ນ?
ເປັນຫຍັງພະເຢໂຫວາຢາກໃຫ້ເຮົາໃຫ້ອະໄພຄົນອື່ນ
8. ການໃຫ້ອະໄພສະແດງໃຫ້ເຫັນແນວໃດວ່າເຮົາເຫັນຄ່າຄວາມເມດຕາຂອງພະເຢໂຫວາ?
8 ການໃຫ້ອະໄພສະແດງວ່າເຮົາເຫັນຄ່າຄວາມເມດຕາຂອງພະເຢໂຫວາ. ໃນຕົວຢ່າງປຽບທຽບໜຶ່ງ ພະເຢຊູໄດ້ສົມທຽບພະເຢໂຫວາຄືກັບກະສັດອົງໜຶ່ງທີ່ໄດ້ຍົກໜີ້ຈຳນວນຫຼາຍໃຫ້ທາດຄົນໜຶ່ງທີ່ບໍ່ສາມາດໄຊ້ໜີ້ໄດ້. ແຕ່ທາດຄົນນີ້ພັດບໍ່ຍອມເມດຕາໝູ່ທີ່ເປັນທາດນຳກັນເຊິ່ງຕິດໜີ້ລາວພຽງແຕ່ໜ້ອຍດຽວ. (ມທ. 18:23-35) ເຮົາໄດ້ບົດຮຽນຫຍັງຈາກເລື່ອງນີ້? ຖ້າເຮົາເຫັນຄ່າຄວາມເມດຕາຂອງພະເຢໂຫວາ ເຮົາກໍຢາກຈະໃຫ້ອະໄພຄົນອື່ນ. (ເພງ. 103:9) ໃນຫໍສັງເກດການ ສະບັບໜຶ່ງໄດ້ບອກມາຫຼາຍປີແລ້ວວ່າ: “ບໍ່ວ່າເຮົາຈະໃຫ້ອະໄພຄົນອື່ນມາຫຼາຍສ່ຳໃດ ກໍທຽບບໍ່ໄດ້ເລີຍກັບການທີ່ພະເຢໂຫວາໃຫ້ອະໄພເຮົາຜ່ານທາງຄ່າໄຖ່ຂອງພະເຢຊູ.”
9. ພະເຢໂຫວາສະແດງຄວາມເມດຕາຕໍ່ໃຜ? (ມັດທາຍ 6:14, 15)
9 ພະເຢໂຫວາຈະໃຫ້ອະໄພຜູ້ທີ່ໃຫ້ອະໄພຄົນອື່ນ. ພະເຢໂຫວາສະແດງຄວາມເມດຕາຕໍ່ຜູ້ທີ່ເມດຕາຄົນອື່ນ. (ມທ. 5:7; ຢກບ. 2:13) ເຮົາເຫັນເລື່ອງນີ້ໄດ້ແຈ້ງຈາກວິທີທີ່ພະເຢຊູສອນລູກສິດໃຫ້ອະທິດຖານ. (ອ່ານມັດທາຍ 6:14, 15) ແລະເຮົາຍັງໄດ້ບົດຮຽນຄ້າຍໆກັນນີ້ຈາກສິ່ງທີ່ພະເຢໂຫວາເວົ້າກັບໂຢບ. ໂຢບເຊິ່ງເປັນຄົນທີ່ສັດຊື່ຮູ້ສຶກເຈັບປວດໃຈຫຼາຍກັບຄຳເວົ້າທີ່ບໍ່ດີຂອງໝູ່ລາວສາມຄົນ ເຊິ່ງກໍຄືເອລີຟາດ ບີເລດາດ ແລະໂຈຟາ. ແຕ່ພະເຢໂຫວາກໍໄດ້ບອກໂຢບໃຫ້ອະທິດຖານເພື່ອເຂົາເຈົ້າ. ເມື່ອລາວເຮັດແບບນັ້ນ ພະເຢໂຫວາກໍໄດ້ອວຍພອນລາວ.—ໂຢບ 42:8-10
10. ການເກັບຄວາມຄຽດໄວ້ເປັນອັນຕະລາຍແນວໃດ? (ເອເຟໂຊ 4:31, 32)
10 ການເກັບຄວາມຄຽດເປັນການທຳລາຍຕົວເອງ. ການເກັບຄວາມຄຽດໄວ້ເປັນຄືກັບການແບກພາລະໜັກ. ຖ້າປ່ອຍວາງກໍຈະເຮັດໃຫ້ເຮົາສະບາຍໃຈແລະມີຄວາມສຸກ. ພະເຢໂຫວາກໍຢາກໃຫ້ເຮົາເຮັດແບບນັ້ນ. (ອ່ານເອເຟໂຊ 4:31, 32) ເພິ່ນບອກເຮົາວ່າ “ຢ່າຄຽດແລະຢ່າໂມໂຫ.” (ເພງ. 37:8, ລ.ມ.) ຖ້າເຮົາເຮັດຕາມຄຳແນະນຳນີ້ເຮົາຈະໄດ້ປະໂຫຍດຫຼາຍ ເພາະການເກັບຄວາມຄຽດໄວ້ຈະສົ່ງຜົນທີ່ບໍ່ດີຕໍ່ເຮົາທາງຮ່າງກາຍແລະຈິດໃຈ. (ສຸພາ. 14:30) ການຄຽດໃຫ້ຄົນອື່ນບໍ່ເຊົາກໍປຽບຄືກັບເຮົາກິນຢາພິດເຊິ່ງຈະສົ່ງຜົນທີ່ບໍ່ດີຕໍ່ຕົວເຮົາເອງ ບໍ່ແມ່ນຕໍ່ຄົນທີ່ເຮັດໃຫ້ເຮົາຄຽດ. ດັ່ງນັ້ນ ຖ້າເຮົາໃຫ້ອະໄພຄົນອື່ນກໍເປັນຄືກັບເຮົາໃຫ້ຂອງຂວັນກັບຕົວເອງ. (ສຸພາ. 11:17) ເຮົາມີຄວາມສະຫງົບໃຈແລະສາມາດຮັບໃຊ້ພະເຢໂຫວາຕໍ່ໆໄປໄດ້.
11. ຄຳພີໄບເບິນເວົ້າແນວໃດກ່ຽວກັບການແກ້ແຄ້ນ? (ໂຣມ 12:19-21)
11 ການແກ້ແຄ້ນເປັນໜ້າທີ່ຂອງພະເຢໂຫວາ. ພະເຢໂຫວາບໍ່ໄດ້ໃຫ້ເຮົາມີສິດແກ້ແຄ້ນຄົນທີ່ເຮັດຜິດຕໍ່ເຮົາ. (ອ່ານໂຣມ 12:19-21) ຍ້ອນເຮົາເປັນຄົນບໍ່ສົມບູນແບບ ເຮົາຈຶ່ງບໍ່ສາມາດເບິ່ງເລື່ອງຕ່າງໆໄດ້ຢ່າງຄົບຖ້ວນແລະບໍ່ສາມາດຕັດສິນໄດ້ຢ່າງຖືກຕ້ອງຄືກັບພະເຢໂຫວາ. (ຮຣ. 4:13) ແລະບາງເທື່ອເຮົາກໍມັກໃຊ້ອາລົມຫຼາຍກວ່າເຫດຜົນ ຈຶ່ງເປັນເລື່ອງຍາກທີ່ເຮົາຈະຕັດສິນໄດ້ຢ່າງຖືກຕ້ອງ. ພະເຢໂຫວາໄດ້ດົນໃຈໃຫ້ຢາໂກໂບຂຽນວ່າ: “ຄວາມຮ້າຍຂອງຄົນເຮົາບໍ່ໄດ້ຊ່ວຍໃຫ້ຜູ້ໃດເຮັດສິ່ງທີ່ຖືກຕ້ອງໃນສາຍຕາພະເຈົ້າ.” (ຢກບ. 1:20) ດັ່ງນັ້ນ ເຮົາຈຶ່ງໝັ້ນໃຈໄດ້ວ່າພະເຢໂຫວາຈະເຮັດທຸກສິ່ງໃຫ້ຖືກຕ້ອງແລະຍຸຕິທຳຢ່າງແນ່ນອນ.
ບໍ່ເກັບຄວາມຄຽດແຄ້ນໄວ້. ຝາກເລື່ອງນັ້ນໄວ້ກັບພະເຢໂຫວາ. ເພິ່ນຈະແກ້ໄຂຄວາມເສຍຫາຍທຸກຢ່າງທີ່ເກີດຈາກບາບ. (ເບິ່ງຂໍ້ 12)
12. ເຮົາຈະສະແດງໃຫ້ເຫັນແນວໃດວ່າເຮົາໄວ້ໃຈຄວາມຍຸຕິທຳຂອງພະເຢໂຫວາ?
12 ການໃຫ້ອະໄພສະແດງວ່າເຮົາໄວ້ໃຈໃນຄວາມຍຸຕິທຳຂອງພະເຢໂຫວາ. ການທີ່ເຮົາຝາກເລື່ອງທັງໝົດໄວ້ກັບພະເຢໂຫວາກໍສະແດງວ່າເຮົາໄວ້ໃຈວ່າ ພະເຢໂຫວາຈະແກ້ໄຂຄວາມເສຍຫາຍທຸກຢ່າງທີ່ເກີດຈາກບາບ. ໃນໂລກໃໝ່ ພະເຢໂຫວາສັນຍາວ່າ: “ຈະບໍ່ມີໃຜຈື່ ຫຼືນຶກເຖິງ” ຄວາມຊົງຈຳທີ່ເຈັບປວດອີກເລີຍ. (ເອຊາ. 65:17, ລ.ມ.) ແຕ່ຖ້າມີຄົນເຮັດໃຫ້ເຮົາເຈັບໃຈຫຼືເສຍໃຈຫຼາຍເດ ຈະເປັນໄປໄດ້ບໍທີ່ເຮົາຈະບໍ່ເກັບຄວາມຄຽດແລະໃຫ້ອະໄພເຂົາເຈົ້າ? ໃຫ້ເຮົາມາເບິ່ງວ່າບາງຄົນໄດ້ເຮັດແນວໃດໃນເລື່ອງນີ້.
ການໃຫ້ອະໄພເຮັດໃຫ້ໄດ້ຮັບສິ່ງດີໆຫຍັງແດ່?
13-14. ເຈົ້າໄດ້ບົດຮຽນຫຍັງຈາກຕົວຢ່າງຂອງໂທນີແລະໂຮເຊໃນເລື່ອງການໃຫ້ອະໄພ?
13 ພີ່ນ້ອງຂອງເຮົາຫຼາຍຄົນໄດ້ໃຫ້ອະໄພຄົນທີ່ເຮັດໃຫ້ເຂົາເຈົ້າເຈັບປວດໃຈ. ແລ້ວເຂົາເຈົ້າໄດ້ຮັບສິ່ງດີໆຫຍັງແດ່ຈາກການເຮັດແບບນັ້ນ?
14 ເປັນເວລາຫຼາຍປີກ່ອນທີ່ໂທນີ dເຊິ່ງຢູ່ປະເທດຟີລິບປິນຈະເຂົ້າມາເປັນພະຍານພະເຢໂຫວາ. ອ້າຍຂອງລາວຕາຍຍ້ອນຖືກຜູ້ຊາຍຄົນໜຶ່ງທີ່ຊື່ໂຮເຊຂ້າ. ໃນຕອນນັ້ນໂທນີເປັນຄົນໃຈຮ້າຍແລະມັກໃຊ້ຄວາມຮຸນແຮງ ລາວຈຶ່ງຢາກແກ້ແຄ້ນໃຫ້ອ້າຍຂອງລາວ. ເມື່ອລາວຮູ້ວ່າໂຮເຊຖືກປ່ອຍອອກຈາກຄຸກແລ້ວ ລາວກໍສາບານວ່າຈະຕາມລ່າແລະຂ້າໂຮເຊໃຫ້ໄດ້. ລາວຈຶ່ງຊື້ປືນມາໄວ້ເພື່ອສິ່ງນີ້. ແຕ່ເມື່ອໂທນີເລີ່ມສຶກສາຄຳພີໄບເບິນກັບພະຍານພະເຢໂຫວາ ລາວໄດ້ບອກວ່າ: “ການສຶກສາຄຳພີໄບເບິນເຮັດໃຫ້ຂ້ອຍຮູ້ວ່າຂ້ອຍຕ້ອງປ່ຽນແປງນິດໄສແລະການກະທຳຂອງຕົວເອງ ເຊິ່ງລວມເຖິງການບໍ່ເກັບຄວາມຄຽດແຄ້ນໄວ້ໃນໃຈ.” ຫຼັງຈາກນັ້ນໂທນີກໍຮັບບັບເຕມາ ແລະຕໍ່ມາກໍຖືກແຕ່ງຕັ້ງໃຫ້ເປັນຜູ້ດູແລ. ລອງຄິດເບິ່ງດຸວ່າ ໂທນີຊິຕົກໃຈຫຼາຍສ່ຳໃດທີ່ຮູ້ວ່າໂຮເຊໄດ້ເຂົ້າມາເປັນພະຍານພະເຢໂຫວາແລ້ວ! ເມື່ອທັງສອງຄົນພົບກັນ ເຂົາເຈົ້າກໍໄດ້ກອດກັນຢ່າງອົບອຸ່ນ ແລະໂທນີບອກໂຮເຊວ່າລາວໄດ້ໃຫ້ອະໄພໂຮເຊແລ້ວ. ໂທນີເວົ້າວ່າເມື່ອລາວໃຫ້ອະໄພໂຮເຊ ລາວມີຄວາມສຸກຫຼາຍຈົນບໍ່ຮູ້ຈະອະທິບາຍຄວາມຮູ້ສຶກນັ້ນອອກມາແນວໃດ. ເຮົາເຫັນໄດ້ວ່າພະເຢໂຫວາອວຍພອນໂທນີທີ່ໃຫ້ອະໄພຄົນອື່ນ.
ຕົວຢ່າງຂອງປີເຕີກັບຊູສະແດງໃຫ້ເຫັນວ່າເຮົາສາມາດໃຫ້ອະໄພແລະບໍ່ເກັບຄວາມຄຽດແຄ້ນໄວ້. (ເບິ່ງຂໍ້ 15-16)
15-16. ເຮົາໄດ້ບົດຮຽນຫຍັງຈາກປະສົບການຂອງປີເຕີກັບຊູໃນເລື່ອງການໃຫ້ອະໄພ?
15 ໃນປີ 1985 ຕອນທີ່ປີເຕີແລະຊູກຳລັງນັ່ງປະຊຸມຢູ່ທີ່ຫໍປະຊຸມ ທັນໃດນັ້ນກໍໄດ້ເກີດການລະເບີດທີ່ຮຸນແຮງຂຶ້ນ. ມີຜູ້ຊາຍຄົນໜຶ່ງໄດ້ມາລັກວາງລະເບີດໄວ້ໃນຫໍປະຊຸມ! ຊູໄດ້ຮັບບາດເຈັບສາຫັດເຊິ່ງມີຜົນກະທົບຕໍ່ການເບິ່ງເຫັນ ການໄດ້ຍິນ ແລະຍັງສູນເສຍການດົມກິ່ນ. e ປີເຕີແລະຊູສົງໄສມາຕະຫຼອດວ່າ ‘ໃຜທີ່ເຮັດສິ່ງຊົ່ວແບບນີ້?’ ຫຼາຍປີຕໍ່ມາ ຜູ້ທີ່ວາງລະເບີດເຊິ່ງບໍ່ແມ່ນພະຍານພະເຢໂຫວາກໍໄດ້ຖືກຈັບແລະຖືກຕັດສິນໃຫ້ຈຳຄຸກຕະຫຼອດຊີວິດ. ເມື່ອຖາມປີເຕີກັບຊູວ່າຈະໃຫ້ອະໄພຜູ້ຊາຍຄົນນີ້ບໍ ເຂົາເຈົ້າຕອບວ່າ: “ພະເຢໂຫວາສອນເຮົາວ່າ ການເກັບຄວາມຄຽດແຄ້ນໄວ້ຈະສົ່ງຜົນທີ່ບໍ່ດີຕໍ່ຮ່າງກາຍ ຈິດໃຈ ແລະອາລົມຄວາມຮູ້ສຶກຂອງເຮົາ. ບໍ່ດົນຫຼັງຈາກທີ່ເຮົາຖືກລະເບີດ ເຮົາກໍໄດ້ຂໍພະເຢໂຫວາໃຫ້ຊ່ວຍເຮົາໃຫ້ອະໄພແລະບໍ່ເກັບຄວາມຄຽດແຄ້ນໄວ້ ແລ້ວເຮົາກໍໃຊ້ຊີວິດຢ່າງສະຫງົບໃຈຕໍ່ໄປໄດ້.”
16 ເປັນເລື່ອງງ່າຍບໍທີ່ປີເຕີກັບຊູຈະໃຫ້ອະໄພຜູ້ຊາຍຄົນນີ້? ບໍ່ງ່າຍເລີຍ. ເຂົາເຈົ້າບອກວ່າ: “ບາງເທື່ອເມື່ອຊູຮູ້ສຶກເຈັບປວດຍ້ອນໄດ້ຮັບຜົນກະທົບຈາກການລະເບີດຄັ້ງນັ້ນ ເຮົາກໍຮູ້ສຶກໃຈຮ້າຍ. ແຕ່ເມື່ອເຮົາພະຍາຍາມບໍ່ຄິດເຖິງເລື່ອງນັ້ນ ຄວາມຮູ້ສຶກໃຈຮ້າຍກໍຄ່ອຍໆຫາຍໄປ. ທີ່ຈິງເຮົາເວົ້າຈາກໃຈໄດ້ເລີຍວ່າ ຖ້າມື້ໜຶ່ງຜູ້ຊາຍຄົນນີ້ເຂົ້າມາເປັນພະຍານພະເຢໂຫວາ ເຮົາກໍຈະຍິນດີຕ້ອນຮັບລາວ. ເລື່ອງນີ້ສອນເຮົາໃຫ້ຮູ້ວ່າເມື່ອເຮົາເຮັດຕາມຫຼັກການໃນຄຳພີໄບເບິນ ເຮົາກໍຮູ້ສຶກສະບາຍໃຈແລະຊ່ວຍເຮົາໃຫ້ເປັນອິດສະຫຼະໃນຫຼາຍໆດ້ານຈົນເຮົານຶກພາບບໍ່ອອກ! ແລະເຮົາຍັງຮູ້ສຶກດີໃຈທີ່ຮູ້ວ່າ ອີກບໍ່ດົນພະເຢໂຫວາຈະແກ້ໄຂຄວາມເສຍຫາຍທັງໝົດທີ່ເກີດຂຶ້ນ.”
17. ເຮົາໄດ້ບົດຮຽນຫຍັງຈາກປະສົບການຂອງມີຣາໃນເລື່ອງການໃຫ້ອະໄພ?
17 ມີຣາຮຽນຄວາມຈິງຫຼັງຈາກທີ່ລາວແຕ່ງດອງແລະມີລູກນ້ອຍ 2 ຄົນແລ້ວ. ແຕ່ຜົວຂອງລາວບໍ່ເອົາຄວາມຈິງ. ຕໍ່ມາຜົວຂອງລາວກໍໄດ້ຫຼິ້ນຊູ້ແລະປະຖິ້ມຄອບຄົວ. ມີຣາບອກວ່າ: “ເມື່ອຜົວໄດ້ຖິ້ມຂ້ອຍກັບລູກ 2 ຄົນ ຂ້ອຍກໍຮູ້ສຶກຄືກັບທີ່ຫຼາຍຄົນຮູ້ສຶກເມື່ອຖືກຫັກຫຼັງຈາກຄົນທີ່ຮັກ ເຊັ່ນ ຮູ້ສຶກຕົກໃຈ ບໍ່ຢາກຈະເຊື່ອ ເຈັບໃຈ ເສຍໃຈ ໃຈຮ້າຍ ແລະໂທດຕົວເອງ.” ເຖິງວ່າຈະປະຮ້າງກັນແລ້ວ ແຕ່ຄວາມເຈັບປວດຍັງມີຢູ່. ມີຣາເວົ້າວ່າ: “ຂ້ອຍຍັງຮູ້ສຶກກະວົນກະວາຍໃຈແລະໃຈຮ້າຍເປັນເວລາຫຼາຍເດືອນ. ແລະຂ້ອຍຮູ້ວ່າຄວາມຮູ້ສຶກນີ້ສົ່ງຜົນຕໍ່ສາຍສຳພັນຂອງຂ້ອຍກັບພະເຢໂຫວາແລະກັບຄົນອື່ນ.” ຕອນນັ້ນມີຣາຮູ້ສຶກຄຽດແຄ້ນແລະຢາກໃຫ້ສິ່ງທີ່ບໍ່ດີເກີດຂຶ້ນກັບຜົວເກົ່າຂອງລາວ. ແຕ່ຕອນນີ້ລາວບໍ່ໄດ້ຮູ້ສຶກແບບນັ້ນແລ້ວ ແລະລາວກໍຫວັງວ່າມື້ໜຶ່ງຜົວເກົ່າຈະເຂົ້າມາເປັນຜູ້ຮັບໃຊ້ຂອງພະເຢໂຫວາ. ມີຣາບໍ່ໄດ້ຈົມຢູ່ກັບອະດີດ. ເຖິງລາວຈະເປັນແມ່ລ້ຽງດ່ຽວ ແຕ່ລາວກໍສາມາດລ້ຽງລູກ 2 ຄົນໃຫ້ຮັບໃຊ້ພະເຢໂຫວາ. ຕອນນີ້ລາວມີຄວາມສຸກທີ່ໄດ້ຮັບໃຊ້ພະເຢໂຫວາຮ່ວມກັບລູກໆແລະຄອບຄົວຂອງເຂົາເຈົ້າ.
ພະເຢໂຫວາເປັນຜູ້ຕັດສິນທີ່ຍຸຕິທຳທີ່ສຸດ
18. ເປັນຫຍັງເຮົາຈຶ່ງເວົ້າໄດ້ວ່າພະເຢໂຫວາເປັນຜູ້ຕັດສິນທີ່ດີທີ່ສຸດ?
18 ເຮົາຮູ້ສຶກດີໃຈທີ່ຮູ້ວ່າເຮົາບໍ່ໄດ້ມີໜ້າທີ່ເປັນຜູ້ຕັດສິນຄົນອື່ນ ແຕ່ພະເຢໂຫວາເປັນຜູ້ທີ່ເຮັດໜ້າທີ່ທີ່ສຳຄັນນີ້ ເພາະເພິ່ນເປັນຜູ້ຕັດສິນທີ່ດີທີ່ສຸດ. (ຣມ. 14:10-12) ແລະເຮົາກໍສາມາດໝັ້ນໃຈໄດ້ວ່າພະເຢໂຫວາຈະຕັດສິນຕາມກົດໝາຍທີ່ສົມບູນແບບຂອງເພິ່ນ. (ຕົ້ນ. 18:25; 1 ກະ. 8:32) ເພິ່ນບໍ່ມີທາງທີ່ຈະເຮັດສິ່ງທີ່ບໍ່ຖືກຕ້ອງແລະບໍ່ຍຸຕິທຳ.
19. ພະເຢໂຫວາເຊິ່ງເປັນຜູ້ຕັດສິນທີ່ຍຸຕິທຳທີ່ສຸດຈະເຮັດຫຍັງ?
19 ເຮົາລໍຖ້າມື້ທີ່ພະເຢໂຫວາຈະແກ້ໄຂຄວາມເສຍຫາຍທຸກຢ່າງທີ່ເກີດຈາກບາບແລະຄວາມບໍ່ສົມບູນແບບຂອງມະນຸດ. ໃນຕອນນັ້ນ ບາດແຜທາງກາຍແລະໃຈຈະໄດ້ຮັບການປິ່ນປົວຢ່າງຖາວອນແລະເຮົາຈະບໍ່ນຶກເຖິງມັນອີກເລີຍ. (ເພງ. 72:12-14; ພນມ. 21:3, 4) ແຕ່ກ່ອນຈະຮອດມື້ນັ້ນ ເຮົາຢາກຮຽນແບບພະເຢໂຫວາໃນການໃຫ້ອະໄພຄົນອື່ນ ແລະຢາກຂອບໃຈພະເຢໂຫວາຫຼາຍແທ້ໆທີ່ຊ່ວຍເຮົາໃຫ້ເຮັດແບບນັ້ນໄດ້.
ເພງ 18 ຂອບໃຈສຳລັບຄ່າໄຖ່
a ພະເຢໂຫວາພ້ອມທີ່ຈະໃຫ້ອະໄພຜູ້ທີ່ເຮັດຜິດແລ້ວກັບໃຈ. ຍ້ອນເຮົາເປັນຄລິດສະຕຽນເຮົາຈຶ່ງຢາກຮຽນແບບຕົວຢ່າງຂອງພະເຢໂຫວາໂດຍໃຫ້ອະໄພຜູ້ທີ່ເຮັດໃຫ້ເຮົາເສຍໃຈ. ໃນບົດຄວາມນີ້ ເຮົາຈະມາເບິ່ງວ່າມີຄວາມຜິດແບບໃດທີ່ເຮົາໃຫ້ອະໄພໄດ້ ແລະຄວາມຜິດແບບໃດທີ່ເຮົາຕ້ອງໄດ້ບອກຜູ້ດູແລ. ແລະເຮົາຍັງຈະມາເບິ່ງວ່າ ເປັນຫຍັງພະເຢໂຫວາຈຶ່ງຢາກໃຫ້ເຮົາໃຫ້ອະໄພຄົນອື່ນ ແລະຖ້າເຮົາເຮັດແບບນັ້ນເຮົາຈະໄດ້ຮັບພອນຫຍັງແດ່.
b ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ 15 ເມສາ 1996 (ພາສາໄທ)
c ພາສາໄທ
d ຊື່ສົມມຸດ
e ເບິ່ງປຶ້ມ ຕື່ນເຖິດ! 8 ມັງກອນ 1992 ໜ້າ 9-13 ແລະເບິ່ງລາຍການໂທລະທັດ JW® ໃນຫົວຂໍ້ ປີເຕີກັບຊູ ຊູນ ເອົາຊະນະແຜທາງໃຈ. (ພາສາໄທ)
